တရားဝင် ကြေညာချက် ၂

“မည်းသောသူနှင့် ဖြူသောသူ၊ ကျွန်နှင့် လူလွတ်၊ ယောက်ျားနှင့် မိန်းမ” (ဒုတိယ ၂ နီဖိုင်း ၂၆း၃၃) တို့အပါအဝင် “ခပ်သိမ်းသောသူတို့သည် ဘုရားသခင်အဖို့ အတူတူဖြစ်ကြ” ကြောင်း မော်မုန်ကျမ်းက သွန်သင်၏။ အသင်းတော်၏သမိုင်းတစ်လျှောက်၌၊ များစွာသောနိုင်ငံတို့တွင် မျိုးနွယ်နှင့် ဇာတိ အမျိုးမျိုးမှ လူမျိုးတို့သည် ဗတ္တိဇံခံကြလေပြီး၊ အသင်းတော်၏သစ္စာရှိသောအသင်းသားများ အဖြစ် နေထိုင်ခဲ့ကြလေ၏။ ဂျိုးဇက်စမစ်၏ အသက်တာကာလတွင်၊ အသင်းတော်၏ လူမည်းအမျိုးသား အသင်းသား အနည်းငယ်တို့သည် ယဇ်ပုရောဟိတ်အခွင့်သို့ ခန့်ထားခံခဲ့ကြရ၏။ အသင်းတော် သမိုင်း၏ အစောပိုင်း၌၊ အသင်းတော်ခေါင်းဆောင်တို့သည် အာဖရိကမျိုးရိုး လူမည်းအမျိုးသားတို့အပေါ် ယဇ်ပုရောဟိတ်အခွင့် အပ်နှင်းခြင်းကို ရပ်ခဲ့ကြ၏။ အသင်းတော်၏မှတ်တမ်း၌ ဤအလေ့အကျင့်၏ မူရင်းဇစ်မြစ်အကြောင်း ရှင်းလင်းသောအမြင်ကို မဖော်ပြပေ။ အသင်းတော်ခေါင်းဆောင်တို့သည် ဤအလေ့အကျင့်ကို ပြောင်းလဲရန် ဘုရားသခင်ထံမှ ဗျာဒိတ်တော်ကို လိုအပ်ကြောင်း ယုံကြည်ခဲ့ကြပြီး၊ လမ်းညွှန်မှုကို ဆုတောင်းခြင်းထက်သန်စွာ ရှာခဲ့ကြ၏။ ဗျာဒိတ်တော်သည် အသင်းတော်ဥက္ကဋ္ဌ စပင်ဆာဒဗယျူကင်းဘောလ်သို့ ရောက်လာခဲ့ပြီး၊ အသင်းတော်၏ အခြားခေါင်းဆောင်များသို့ ဆော့လိတ်ဗိမာန်တော်၌၊ ၁၉၇၈ ဇွန်လ ၁ ရက်တွင် အတည်ပြုပေးခဲ့၏။ ဗျာဒိတ်တော်သည် ယဇ်ပုရောဟိတ်အခွင့်နှင့် တစ်ချိန်ကသက်ရောက်မှုရှိခဲ့သည့် မျိုးနွယ်နှင့် စပ်လျဉ်းသည့် ကန့်သတ်ချက်များကို ဖယ်ရှားခဲ့၏။

သက်ဆိုင်သူများသို့

၁၉၇၈ ခုနှစ်၊ စက်တင်ဘာလ ၃၀ ရက် တွင်၊ ယေရှုခရစ်တော်၏ နောက်ပိုင်းကာလ သန့်ရှင်းသူများ အသင်းတော်၏ ၁၄၈ ကြိမ်မြောက် နှစ်ဝက်အထွေထွေညီလာခံ၌၊ အောက်ပါအကြောင်းအရာကို အသင်းတော်၏ ပထမဥက္ကဋ္ဌအဖွဲ့မှ ပထမအတိုင်ပင်ခံ ဥက္ကဋ္ဌ အန်အယ်လ်ဒန်တန်နာက ဖော်ပြခဲ့ပါ၏။

ဤနှစ်၏ဇွန်လအစောပိုင်းတွင်၊ ပထမဥက္ကဋ္ဌအဖွဲ့သည် အသင်းတော်၏ ခပ်သိမ်းသော ထိုက်တန်သည့် အမျိုးသားအသင်းသားတို့အား ယဇ်ပုရောဟိတ်အခွင့်နှင့် ဗိမာန်တော်ကောင်းချီးမင်္ဂလာများ ရရှိနိုင် စေကြောင်း ဥက္ကဋ္ဌစပင်ဆာဒဗယျူကင်းဘောလ် လက်ခံရရှိခဲ့သည့် ဗျာဒိတ်တော်ကို ကြေညာခဲ့ကြ၏။ ဥက္ကဋ္ဌစပင်ဆာဒဗယျူကင်းဘောလ်သည် ဤဗျာဒိတ်တော်ကို လက်ခံရရှိခဲ့ပြီးနောက်၊ ကျွန်ုပ်သည် ညီလာခံအား အသိပေးခဲ့ကြောင်း တောင်းဆိုခဲ့၏၊ သန့်ရှင်းသောဗိမာန်တော်၏ သန့်ရှင်းမွန်မြတ်သော အခန်းများထဲ၌၊ အချိန်ကြာမြင့်စွာ ဆင်ခြင်အောက်မေ့ခြင်းနှင့် ဆုတောင်းခြင်းတို့၏ နောက်၌ သူ့ထံသို့ ထိုဗျာဒိတ်တော်ရောက်လာခဲ့ပြီး၊ သူသည် သူ၏တိုင်ပင်ဖက်များသို့ ဖော်ပြခဲ့၏၊ ထိုသူတို့ကလည်း လက်ခံပြီး အတည်ပြုပေးခဲ့၏။ ထို့နောက်တွင် တမန်တော်တစ်ဆယ့်နှစ်ပါး အဖွဲ့သို့ ဖော်ပြခဲ့ရာ သူတို့ကလည်း သဘောတူညီစွာ အတည်ပြုပေးခဲ့ကြ၏၊ ခပ်သိမ်းသော အထွေထွေ အခွင့်အာဏာ ရှိသူများသို့ နောက်ပိုင်းတွင် ဖော်ပြခဲ့ပြီး၊ သူတို့ကလည်း ထိုနည်းတူ သဘောတူညီစွာ အတည်ပြု ခဲ့ကြ၏။

ဥက္ကဋ္ဌကင်းဘောလ်က ကျွန်ုပ်သည် ယခုတွင် ဤစာကို ဖတ်မည်ဟု တောင်းဆိုခဲ့၏။

၁၉၇၈ ခု၊ ဇွန်လ ၈ ရက်

ကမ္ဘာတစ်ဝှမ်းရှိ ယေရှုခရစ်တော်၏နောက်ပိုင်းကာလ သန့်ရှင်းသူများအသင်းတော်၏ ခပ်သိမ်းသော အထွေထွေနှင့် ဒေသခံ ယဇ်ပုရောဟိတ်အခွင့် အရာရှိများသို့၊

ချစ်သောညီအစ်ကိုများ ခင်ဗျာ၊

မြေကြီးပေါ်၌ ကိုယ်တော်ရှင်၏ အမှုတော်၏ တိုးချဲ့ခြင်းကို ကျွန်ုပ်တို့ သက်သေပြုကြလေပြီးသည်နှင့် အမျှ၊ ပြန်လည်ဆောင်ယူထားသည့် ဧဝံဂေလိတရားတော်၏ အမှာစကားကို များစွာသောပြည်သားတို့ ပြန်ကြားခဲ့ကြ၊ ထို့အတူ အသင်းတော်သို့ ဝင်ရောက်ကြပြီး အရေအတွက် တိုးလာသည့်အတွက် ကျွန်ုပ်တို့ ကျေးဇူးတင်ကြပါတယ်။ ဤအမှု၏ ရလဒ်အဖြစ်၊ အသင်းတော်၏ ထိုက်တန်သော အသင်းသားတိုင်းကို ဧဝံဂေလိတရားတော်က ပေးသည့် ခပ်သိမ်းသော အထူးအခွင့်အရေးများနှင့် ကောင်းချီးမင်္ဂလာများကို ရရှိစေလိုသော အလိုဆန္ဒဖြင့် ကျွန်ုပ်တို့ လမ်းပြလှုံ့ဆော်ခံခဲ့ကြရပါတယ်။

ဘုရားသခင်၏ထာဝရအစီအစဉ်၌၊ ကျွန်ုပ်တို့ရှေ့မှာ ရှိခဲ့လေသည့်သူများတည်းဟူသော အသင်းတော်၏ ပရောဖက်များနှင့် ဥက္ကဋ္ဌများပြုထားခဲ့သည့် ကတိများကို သတိပြုလျက်၊ ကျွန်ုပ်တို့၏ ခပ်သိမ်းသော ထိုက်တန်သည့် ညီအစ်ကိုများသည် ယဇ်ပုရောဟိတ်အခွင့်ကို လက်ခံရရှိနိုင်ကြ၏၊ ယဇ်ပုရာဟိတ်အခွင့် ပြန်လည်သိမ်းယူခံရသောသူတို့၏ သစ္စာရှိခြင်းကို မြင်ရသောအခါ၊ ကျွန်ုပ်တို့သည် ဤသူတို့၊ ကျွန်ုပ်တို့၏ သစ္စာရှိသော ညီအစ်ကိုတို့ကိုယ်စား၊ ကြာရှည်စွာနှင့် အလေးအနက် တောင်းပန်ခဲ့ကြ၏၊ မြင့်မြတ်သော လမ်းညွှန်မှုအတွက် ကိုယ်တော်ရှင်ကို ပတ္ထနာပြုလျက် ဗိမာန်တော်၏ အထက်အခန်း၌ နာရီများစွာကုန်လွန်စေခဲ့ကြပါ၏။

သူသည် ကျွန်ုပ်တို့၏ ဆုတောင်းခြင်းများကို ကြားတော်မူခဲ့၏၊ အသင်းတော်၌ သစ္စာရှိသော၊ ထိုက်တန်သော ယောက်ျားတိုင်း သန့်ရှင်းသောယဇ်ပုရောဟိတ်အခွင့်ကို ၎င်း၏မြင့်မြတ်သော အခွင့်အာဏာကို ကျင့်သုံးရန် တန်ခိုးနှင့်အတူ လက်ခံရရှိနိုင်ပြီး၊ ဗိမာန်တော်၏ ကောင်းချီးမင်္ဂလာများ အပါအဝင်၊ ထိုအခွင့်မှ စီးထွက်လာသည့် ကောင်းချီးမင်္ဂလာတိုင်း၌ မိမိချစ်သောသူများနှင့်အတူ ပျော်မွေ့နိုင်ကြသည့် ရှည်လျားသောကတိတော်ကာလကိုလည်း ဗျာဒိတ်တော်အားဖြင့် အတည်ပြု ပေးတော်မူခဲ့လေ၏။ ထိုအတိုင်းပင်၊ အသင်းတော်၌၊ ခပ်သိမ်းသော ထိုက်တန်သူ အမျိုးသား အသင်းသားတို့သည် မျိုးနွယ်နှင့် အသားအရောင် အပေါ် စဉ်းစားစရာမလိုဘဲ ယဇ်ပုရောဟိတ်အခွင့်သို့ ခန့်ထား ခံရနိုင်ကြပေ၏။ ယဇ်ပုရောဟိတ်အခွင့် ခေါင်းဆောင်တို့သည် အာရုန် ယဇ်ပုရောဟိတ်အခွင့်သို့ဖြစ်စေ၊ မေလခိဇေဒက် ယဇ်ပုရောဟိတ်အခွင့်သို့ဖြစ်စေ ဘိက်သိက်ပေးခြင်းအတွက် ရည်ရွယ်ထားသည့် ခပ်သိမ်းသောသူတို့ကို ထိုက်တန်ခြင်းအတွက် တည်ထောင်ထားသည့် စံနှုန်းများနှင့် ကိုက်ညီကြောင်း သေချာစေရန် ဂရုတစိုက်လူတွေ့မေးမြန်းခြင်း မူဝါဒကို လိုက်နာကြရန် ညွှန်ကြားခံကြရ၏။

ကိုယ်တော်ရှင်သည် မြေကြီးတစ်ခုလုံး၌ သူ၏အခွင့်အာဏာရကျွန်တို့၏ အသံကို စေ့စေ့နားထောင်ကြမည့်၊ ထို့အတူ ဧဝံဂေလိတရားတော်၏ ကောင်းချီးမင်္ဂလာတိုင်းကို ရရှိရန် သူတို့ကိုယ်သူတို့ ပြင်ဆင်ကြမည့် သူ၏ ခပ်သိမ်းသော သားသမီးတို့၏ ကောင်းချီးမင်္ဂလာအတွက် သူ၏အလိုတော်ကို ယခု ဖော်ပြကြောင်း ကျွန်ုပ်တို့ တည်ကြည်လေးနက်စွာ ကြေညာပါ၏။

ရိုးသားစွာဖြင့် သင်တို့၏

စပင်ဆာဒဗယျူကင်းဘောလ်

အန်အယ်လ်ဒန်တာနာ

မာရီယွန်ဂျီရော်မနီ

ပထမဥက္ကဋ္ဌအဖွဲ့

စပင်ဆာဒဗယျူကင်းဘောလ် ကို ယေရှုခရစ်တော်၏နောက်ပိုင်းကာလသန့်ရှင်းသူများ အသင်းတော်၏ ပရောဖက်၊ မြင်သောသူ၊ ထို့အတူ ဗျာဒိတ်ဟောသူ၊ ထို့အတူ ဥက္ကဋ္ဌအဖြစ် အသိအမှတ်ပြုလျက်၊ ကျွန်ုပ်တို့သည် မဲဆန္ဒရှင်တစ်စုအဖြစ် ဤဗျာဒိတ်တော်ကို ကိုယ်တော်ရှင်၏ နှုတ်ကပတ်တော်နှင့် အလိုတော်အဖြစ် လက်ခံကြောင်း အဆိုပြုကြပါ၏။ သဘောတူသူများအားလုံး ကျေးဇူးပြု၍ မိမိတို့ လက်ယာလက်ကို မြှောက်၍ပြပါ။ ကန့်ကွက်သူ တစ်စုံတစ်ဦးရှိပါက အလားတူမြှောက်၍ပြပါ။

ရှေ့ကဆိုခဲ့ပြီးသည့်နည်းအတိုင်း ထောက်မသည့် မဲဆန္ဒကို အခိုင်အမာသဘောတူညီမှု ရရှိခဲ့၏။

ဆော့လိတ်မြို့၊ ယုတ၊ ၁၉၇၈ ခုနှစ်၊ စက်တင်ဘာလ ၃၀ ရက်။