ဩဝါဒနှင့် ပဋိညာဉ်များ ၁၂၁

အပိုဒ်ငယ် ၁၂၁

ပရောဖက်ဂျိုးဇက်စမစ်သည် မစ်ဆိုရီ၊ လစ်ဘာတီအကျဉ်းထောင်၌ အကျဉ်းသားတစ်ဦးအဖြစ်ရှိစဉ်၊ ၁၈၃၉ ခု၊ မတ် ၂၀ ရက်စွဲဖြင့်၊ အသင်းတော်သို့ အမှာစာ၌ ရေးခဲ့သည့် ဆုတောင်းခြင်းနှင့် ပရောဖက်ပြုဟောချက်များ။ ပရောဖက်နှင့် အဖော်အချို့သည် ထောင်ထဲ၌ လများစွာနေခဲ့ကြရ၏။ အာဏာရှိသော အရာရှိများနှင့် တရားသူကြီးစုသို့ လိပ်မူသည့် သူတို့၏ အသနားခံခြင်းများနှင့် အယူခံဝင်ခြင်းများသည် သူတို့ကို သက်သာခြင်းသို့မရောက်စေခဲ့။

၁–၆၊ ပရောဖက်သည် ဒုက္ခဝေဒနာခံစားရသော သန့်ရှင်းသူတို့အတွက် ကိုယ်တော်ရှင်အား တောင်းပန်၏။ ၇–၁၀၊ ကိုယ်တော်ရှင်သည် သူ့အား ငြိမ်းချမ်းခြင်းကိုဟောပြော၏။ ၁၁–၁၇၊ အကျိန်ခံရသောသူတို့သည်ကား ကိုယ်တော်ရှင်၏ လူမျိုးတို့တစ်ဖက်၌ လွန်ကျူးခြင်း အတုများကို ဟစ်ကြွေးသောသူ ခပ်သိမ်းတို့ဖြစ်၏။ ၁၈–၂၅၊ သူတို့သည် ယဇ်ပုရောဟိတ်အခွင့်အဖို့ အခွင့်အရေး ရရှိလိမ့်မည် မဟုတ်၊ အပြစ်စီရင်သည်ကိုလည်း ခံရလိမ့်မည်။ ၂၆–၃၂၊ ရဲရင့်စွာကြံ့ကြံ့ခံသောသူတို့အား အသရေထင်ရှားသော ဗျာဒိတ်တော်များ ကတိထား၏။ ၃၃–၄၀၊ များစွာသောသူတို့ခေါ်သွင်းခံရသော်လည်း၊ အနည်းငယ်သာ ရွေးကောက် ခံရသည်မှာ အဘယ်ကြောင့်နည်း။ ၄၁–၄၆၊ ယဇ်ပုရောဟိတ်အခွင့်ကို ဖြောင့်မတ်ခြင်းဖြင့်သာ အသုံးပြုရမည်။

၁ အို ဘုရားသခင်၊ ကိုယ်တော်သည် အဘယ်မှာရှိသနည်း။ ကိုယ်တော်၏ပုန်းကွယ်ရာနေရာကို ဖုံးသည့် ပေါင်းမိုးသည် အဘယ်မှာရှိသနည်း။

၂ ကိုယ်တော်၏လက်တော်ကို အဘယ်မျှကြာအောင် ရုပ်သိမ်းမည်နည်း၊ ထို့အတူ ကိုယ်တော်၏မျက်စိသည်၊ အမှန်စင်စစ် ကိုယ်တော်၏စင်ကြယ်သောမျက်စိသည် ထာဝရကောင်းကင်ဘုံမှနေ၍၊ ကိုယ်တော်၏လူမျိုးတို့နှင့် ကိုယ်တော်၏ကျွန်တို့ ခံစားရသော မတရားမှုတို့ကို ကြည့်မည်နည်း၊ ထို့အတူ ကိုယ်တော်၏နားသည် သူတို့၏တောင်းလျှောက်ခြင်းတို့ကို ကြားမည်နည်း။

၃ ထိုမှတစ်ပါး၊ အို ကိုယ်တော်ရှင်၊ ကိုယ်တော်၏ စိတ်နှလုံးသည် သူတို့အတွက် မပျော့ပျောင်းစေမီ၊ ထို့အတူ ကိုယ်တော်၏ ဝမ်းသည် သူတို့အတွက် သနားခြင်းစိတ်မရှိမီ သူတို့သည် ဤမတရားမှုတို့နှင့် မတရားသော ညှဉ်းပန်းနှိပ်စက်ခြင်းတို့ကို အဘယ်မျှကြာအောင် ခံစားရပါမည်နည်း။

၄ အို ကိုယ်တော်ရှင် ဘုရားသခင် အနန္တတန်ခိုးရှင်၊ ကောင်းကင်၊ မြေကြီး၊ ထို့အတူ ပင်လယ်တို့၏၊ ထို့အတူ ၎င်းတို့၌ရှိသည့် ခပ်သိမ်းသောအရာတို့၏ ဖန်ဆင်းရှင်၊ နတ်ဆိုးကို ထိန်းချုပ်၍ ဩဇာခံဖြစ်စေသူ၊ မရဏနိုင်ငံ၏အစိုးရခြင်းကိုလည်း မှောင်မိုက်၍ မိုးချုပ်စေသူ— ကိုယ်တော်၏ လက်တော်ကို ဆန့်တော်မူပါ၊ ကိုယ်တော်၏မျက်စိသည် စူးရှပါစေ။ ကိုယ်တော်၏ ပေါင်းမိုးကို ရုပ်သိမ်းပါစေ။ ကိုယ်တော်၏ပုန်းကွယ်ရာ နေရာကို ဖုံးမထားပါစေတော့နှင့်။ ကိုယ်တော်၏နားကို လှည့်ပါစေ။ ကိုယ်တော်၏စိတ်နှလုံးကို ပျော့ပျောင်းပါစေ၊ ကိုယ်တော်၏ဝမ်းကိုလည်း ကျွန်ုပ်တို့အတွက် သနားခြင်းစိတ်ရှိပါစေ။

၅ ကိုယ်တော်၏ အမျက်တော်ကို ကျွန်ုပ်တို့၏ရန်သူတို့တစ်ဖက်၌ ထွက်ပါစေ။ ထို့အတူ၊ ကိုယ်တော့စိတ်နှလုံး၏ ဒေါသအမျက်၌၊ ကိုယ်တော်၏ဓားနှင့် ကျွန်ုပ်တို့ခံစားရသည့် မတရားမှုတို့ကို လက်တုံ့ပြန်တော်မူပါ။

၆ ကိုယ်တော်၏ ဒုက္ခဝေဒနာခံစားရသော သန့်ရှင်းသူတို့ကို အောက်မေ့တော်မူပါ၊ အို ကျွန်ုပ်တို့၏ဘုရားသခင်။ ကိုယ်တော်၏ ကျွန်တို့သည် ကိုယ်တော်၏ နာမတော်၌ ကာလအစဉ်အဆက် ရွှင်လန်းဝမ်းမြောက်ကြပါမည်။

၇ ငါ့သား၊ သင်၏စိတ်ဝိညာဉ်ကို ငြိမ်းချမ်းခြင်းရှိစေလော့။ သင်၏ ဒုက္ခနှင့် ဆင်းရဲဒုက္ခတို့သည် ခဏသာရှိလိမ့်မည်။

၈ ထို့နောက်တွင်၊ သင်သည် ကောင်းစွာကြံ့ကြံ့ခံလျှင်၊ ဘုရားသခင်သည် သင့်ကို အထက်၌ ချီးမြှောက်လိမ့်မည်။ သင်သည် ခပ်သိမ်းသော သင်၏ရန်သူတို့ကို အောင်နိုင်လိမ့်မည်။

၉ သင်၏အဆွေခင်ပွန်းတို့သည် သင့်ဘေးမှာရှိလိမ့်မည်၊ ထို့အတူ သူတို့သည် သင့်ကို နွေးထွေးသောစိတ်နှလုံး၊ ခင်မင်သောလက်တို့ဖြင့် တစ်ဖန်နှုတ်ဆက်ကြလိမ့်မည်။

၁၀ သင်သည် ယောဘကဲ့သို့မဟုတ်သေး။ သင်၏အဆွေခင်ပွန်းတို့သည် သင့်ကို ဆန့်ကျင်၍ ရန်မတွေ့ကြ၊ ယောဘကို ပြုခဲ့ကြသကဲ့သို့ သင့်ကို လွန်ကျူးခြင်းနှင့်လည်း စွဲချက်မတင်ကြ။

၁၁ သင့်ကို လွန်ကျူးခြင်းနှင့် စွဲချက်တင်သောသူတို့သည်လည်း၊ သူတို့၏ မျှော်လင့်ခြင်းသည် လေပြင်းဟပ်ခံရလိမ့်မည်၊ သူတို့၏ မျှော်လင့်ချက်တို့သည်လည်း လောင်မြိုက်သော နေရောင်ခြည် ရှေ့၌ အရည်ပျော်သည့် နှင်းဖြူခဲကဲ့သို့ အရည်ပျော်သွားလိမ့်မည်။

၁၂ ထို့အတူ ဘုရားသခင်သည် အချိန်နှင့် ရာသီကို ပြောင်းလဲရန်၊ ထို့အတူ သူတို့၏စိတ်များကို အသိစိတ် ကွယ်စေရန်၊ သူ၏ အံ့ဩဖွယ်ကောင်းသော အမှုတော်တို့ကို သူတို့နားမလည် နိုင်ကြစေခြင်းငှာ၊ သူတို့ကို စမ်းသပ်နိုင်ခြင်းငှာနှင့် သူတို့ကိုယ်တိုင်၏ ပရိယာယ်ထဲသို့ ဆောင်ယူနိုင်ခြင်းငှာ မိမိလက်နှင့် တံဆိပ်ကို ပြင်တော်မူလေပြီ။

၁၃ သူတို့၏စိတ်နှလုံး ဖောက်ပြန်သောကြောင့်လည်းဖြစ်၏၊ အခြားသူတို့အပေါ်သို့ ရောက်စေရန်၊ ထို့အတူ အခြားသူတို့ ခံစားရသည်ကို နှစ်သက်ရန် သူတို့လိုလိုလားလားရှိသည့် အရာများ သူတို့ကိုယ်တိုင် အပေါ်သို့ လွန်စွာအကြွင်းမဲ့ကျရောက်နိုင်စေရန်လည်းဖြစ်၏။

၁၄ သူတို့စိတ်ပျက်ကြစေခြင်းငှာ၊ သူတို့၏မျှော်လင့်ခြင်းတို့လည်း ပယ်ရှင်းခံရကြစေခြင်းငှာ ဖြစ်၏။

၁၅ ယခုအချိန်မှစ၍ များစွာသောနှစ်များမကြာမီ၊ သူတို့နှင့် သူတို့၏ သားစဉ်မြေးဆက်တို့ ကောင်းကင်အောက်မှ ပယ်ရှားခံရစေခြင်းငှာဖြစ်၏ဟု ဘုရားသခင်မိန့်တော်မူ၍၊ သူတို့အထဲမှ အဘယ်သူမျှ တံတိုင်းအနီး၌ မကျန်ရစ်ရ။

၁၆ အကျိန်ခံရသောသူတို့သည်ကား၊ ငါ၏ ဆီလိမ်း၍ ခန့်အပ်ထားသောသူတို့တစ်ဖက်၌ ဖနောင့်ပေါက်သောသူများဖြစ်၏ဟု ကိုယ်တော်ရှင်မိန့်တော်မူ၏၊ ထို့အတူ ငါ့ရှေ့၌သူတို့ အပြစ်မပြုလေကြသော်လည်းကို သူတို့အပြစ်ပြုကြလေပြီဟု ဟစ်ကြွေးကြပြီဟု ကိုယ်တော်ရှင်မိန့်တော်မူ၏၊ သို့ရာတွင် သူတို့သည် ငါ့အမြင်၌သင့်လျော်သည့်အရာကို ပြုကြလေပြီ၊ ထိုအရာမှာလည်း သူတို့ကို ငါမိန့်တော်မူလေသည့်အရာဖြစ်၏။

၁၇ သို့ရာတွင်၊ လွန်ကျူးခြင်းကို ဟစ်ကြွေးသောသူတို့သည်ကား အပြစ်၏ ကျွန်များ ဖြစ်သောကြောင့် ၎င်းကို ပြုကြ၏၊ သူတို့ကိုယ်တိုင်သည်လည်း မနာခံခြင်း၏ သားသမီးများဖြစ်ကြ၏။

၁၈ ငါ့ကျွန်တို့ကို ကျွန်ပြုခြင်းနှင့် သေခြင်းသို့ ဆောင်ယူနိုင်ခြင်းငှာ သူတို့တစ်ဖက်၌ မှားယွင်းစွာ ကျိန်ဆိုသောသူတို့သည်ကား—

၁၉ သူတို့သည် အမင်္ဂလာရှိကြ၏။ သူတို့သည် ငါ၏ကလေးသူငယ်တို့ကို စိတ်ပျက်စေသောကြောင့် ငါ့အိမ်တော်၏ ဘိသိက်မင်္ဂလာတို့နှင့် ခွဲထားခံရလိမ့်မည်။

၂၀ သူတို့၏တောင်း မပြည့်ရ၊ သူတို့၏အိမ်များနှင့် သူတို့၏ကျီများလည်း ပျက်စီးလိမ့်မည်၊ သူတို့ကိုယ်တိုင်သည်လည်း သူတို့ကို မြှောက်ပင့်ပြောဆိုသူတို့အားဖြင့် မထီမဲ့မြင်ပြုခံရလိမ့်မည်။

၂၁ သူတို့သည် ယဇ်ပုရောဟိတ်အခွင့်အဖို့ အခွင့်အရေး ရရှိလိမ့်မည်မဟုတ်၊ သူတို့နောက်မှ သူတို့၏ သားစဉ်မြေးဆက်တို့သည်လည်း လူမျိုးအစဉ်အဆက် ရရှိလိမ့်မည်မဟုတ်။

၂၂ သူတို့အတွက်မူကား လည်ပင်း၌ ကြိတ်ဆုံကျောက်ကို ဆွဲ၍၊ ပင်လယ်ရေနက်၌ နစ်မြုပ်ကြသော် သာ၍ကောင်း၏။

၂၃ ငါ၏လူမျိုးတို့ကို နှောင့်ယှက်သည့်၊ ထို့အတူ နှင်ထုတ်သည့်၊ ထို့အတူ သတ်သည့်၊ ထို့အတူ သူတို့ကို ဆန့်ကျင်၍ သက်သေခံသည့် ခပ်သိမ်းသောသူတို့သည် အမင်္ဂလာရှိကြ၏ဟု ကောင်းကင်ဗိုလ်ခြေ ကိုယ်တော်ရှင် မိန့်တော်မူ၏။ မြွေပွေးမျိုးဆက်သည် ငရဲ၏ အပြစ်ဒဏ်ရောက်ခြင်းမှ မလွတ်မြောက်ရ။

၂၄ ရှုလော့၊ ငါ၏မျက်စိတို့သည် သူတို့၏ခပ်သိမ်းသောအမှုတို့ကို မြင်၍သိ၏၊ ငါသည် လျင်မြန်သောတရားစီရင်တော်မူခြင်းကို ထိုရာသီ၌၊ သူတို့အားလုံးအတွက် သိမ်းထားလေပြီ။

၂၅ အကြောင်းမူကား၊ လူတိုင်းအတွက် မိမိအကျင့်တို့ ရှိမည့်အတိုင်း စီရင်ထားနှင့်သော အချိန်တစ်ခုရှိ၏။

၂၆ ဘုရားသခင်သည် သူ၏သန့်ရှင်းသောဝိညာဉ်တော်အားဖြင့်၊ အထူးသဖြင့်၊ သန့်ရှင်းသောဝိညာဉ်တော်၏ ပြောမပြနိုင်သောဆုကျေးဇူးအားဖြင့်၊ ကမ္ဘာတည်ကတည်းက ယခုတိုင်အောင် ဖော်ပြမထားလေသည့် အသိပညာကို သင်တို့အား ပေးတော်မူလိမ့်မည်။

၂၇ နောက်ဆုံးသောအချိန်တို့၌ ဖော်ပြရန် ကျွန်ုပ်တို့၏ဘိုးဘေးတို့ စိတ်အား ထက်သန်သော မျှော်လင့်ချက်ဖြင့် စောင့်ခဲ့ကြလေသည့်အရာ၊ သူတို့၏ ဘုန်းအသရေ အပြည့်အစုံအတွက် သိမ်းထားသည့်အတိုင်း၊ ကောင်းကင်တမန်တို့အားဖြင့် သူတို့စိတ်ကို ညွှန်ပြသည့်အရာဖြစ်၏။

၂၈ အဘယ်အရာကိုမျှ မဆီးတားမည့်အချိန်သည် ကျရောက်လာမည်၊ ဘုရားသခင်တစ်ပါးရှိသည် ဖြစ်စေ၊ သို့မဟုတ် များစွာသောဘုရားများရှိသည်ဖြစ်စေ သူတို့ကို ထင်ရှားစွာပြလိမ့်မည်။

၂၉ ယေရှုခရစ်တော်၏တရားတော်အတွက် ရဲရင့်စွာ တည်ကြည်သောသူအပေါင်းတို့ကို ခပ်သိမ်းသော ပလ္လင်များနှင့် အစိုးရခြင်းများ၊ မင်းသားအုပ်ချုပ်ခံရာများနှင့် တန်ခိုးတို့ကို ဖော်ပြ၍ ပေးလိမ့်မည်။

၃၀ ထို့အတူ၊ ကောင်းကင်နှင့်စပ်လျဉ်း၍ သို့မဟုတ် ပင်လယ်နှင့်စပ်လျဉ်း၍၊ သို့မဟုတ် ကုန်းမြေနှင့်စပ်လျဉ်း၍၊ သို့မဟုတ် နေ၊ လနှင့်စပ်လျဉ်း၍၊ သို့မဟုတ် ကြယ်နှင့်စပ်လျဉ်း၍ ကန့်သတ်ချက်များ ရှိလျှင်လည်း—

၃၁ ၎င်းတို့၏လည်ပတ်ရာအချိန်မှန်သမျှ၊ စီရင်ထားသည့် ခပ်သိမ်းသော နေ့များ၊ လများ၊ ထို့အတူ နှစ်များ၊ ထို့အတူ ၎င်းတို့၏ နေ့များ၊ လများ၊ ထို့အတူ နှစ်များ၊ ထို့အတူ ၎င်းတို့၏ ခပ်သိမ်းသော ဂုဏ်အသရေများ၊ ဥပဒေများ၊ ထို့အတူ သတ်မှတ်ထားသောအချိန်များ၏ နေ့များကို အချိန်ကာလပြည့်စုံခြင်းသာသနာ၏ နေ့များ၌ ဖော်ပြလိမ့်မည်—

၃၂ ဤကမ္ဘာမတည်မီက ခပ်သိမ်းသောအခြားဘုရားတို့၏ ထာဝရဘုရားသခင်၏ အစုအဝေးအလယ်၌ ခန့်ထားသည့်အတိုင်း၊ လူတိုင်း သူ၏ထာဝရမျက်မှောက်သို့လည်းကောင်း၊ သေခြင်းမရှိသော ချမ်းသာခြင်းသို့လည်းကောင်း ဝင်ရောက်သောအခါ ပြီးဆုံးခြင်းနှင့် အဆုံးတိုင်အောင် သိမ်းထားမည့်အတိုင်းဖြစ်လိမ့်မည်။

၃၃ လည်နေသောရေတို့သည် အဘယ်မျှကြာအောင် မစင်ကြယ်ဘဲနေနိုင်မည်နည်း။ အဘယ်တန်ခိုးသည် ကောင်းကင်ဘုံကို ရုပ်သိမ်းလိမ့်မည်နည်း။ လူသည် မစ်ဆိုရီမြစ်၏ စီးရာရေကြောင်းကို ရပ်စေရန်၊ သို့မဟုတ် ရေစီးကြောင်းကို နောက်ပြန်လှည့်စေရန်၊ မိမိ၏နုန့်နဲ့သောလက်ကို ဆန့်သကဲ့သို့ အနန္တတန်ခိုးရှင်ကို နောက်ပိုင်းကာလသန့်ရှင်းသူတို့၏ဦးခေါင်းများပေါ်သို့ ကောင်းကင်ဘုံမှ အသိပညာသွန်းလောင်းခြင်းကို ဆီတားရန် မဖြစ်နိုင်ပေ။

၃၄ ရှုလော့၊ များစွာသောသူတို့ ခေါ်သွင်းခံကြရ၏၊ သို့ရာတွင် အနည်းငယ်သာ ရွေးကောက်ခံရကြ၏။ သူတို့သည် အဘယ်ကြောင့် ရွေးကောက်မခံကြရသနည်း။

၃၅ သူတို့၏ စိတ်နှလုံးသည် ဤလောကီ အရာတို့အပေါ်၌ များစွာရှိကြ၏၊ ထို့အတူ လူသားတို့၏ ဂုဏ်အသရေတို့ကို စွဲလန်း၍၊ သူတို့သည် ဤသင်ခန်းစာကို မသင်ယူသောကြောင့်ဖြစ်၏—

၃၆ ယဇ်ပုရောဟိတ်အခွင့်၏ အခွင့်အရေးတို့သည် ကောင်းကင်ဘုံ၏တန်ခိုးတို့နှင့် ခွဲ၍ မရအောင်ဆက်သွယ်ထားကြောင်း၊ ထို့အတူ ဖြောင့်မတ်ခြင်း အခြေခံဩဝါဒတို့ အတိုင်းမှတစ်ပါး၊ ကောင်းကင်ဘုံ၏တန်ခိုးတို့ကို မထိန်းချုပ်နိုင်၊ ကိုင်လည်း မကိုင်တွယ်နိုင်ကြောင်းပေတည်း။

၃၇ ၎င်းတို့ကို ကျွန်ုပ်တို့အပေါ်အပ်နှင်းနိုင်ကြောင်းသည် အမှန်ဖြစ်၏။ သို့ရာတွင်၊ ကျွန်ုပ်တို့သည် ကျွန်ုပ်တို့၏ အပြစ်တို့ကို ဖုံးကွယ်ရန်၊ သို့မဟုတ် ကျွန်ုပ်တို့၏မာန၊ ကျွန်ုပ်တို့၏ အချည်းနှီးသော ရည်မှန်းချက်ကို နှစ်ခြိုက်စေရန်၊ သို့မဟုတ် လူသားတို့၏ စိတ်ဝိညာဉ်တို့အပေါ် မတရားမှု၏ မည်သည့် ပမာဏဖြင့်ဖြစ်စေ ထိန်းချုပ်ခြင်း၊ သို့မဟုတ် အစိုးရခြင်း၊ သို့မဟုတ် အနိုင်အထက် ပြုခြင်းကို ကျင့်သုံးရန် ဆောင်ရွက်ကြလျှင်၊ ရှုလော့၊ ကောင်းကင်ဘုံတို့သည် မိမိတို့ဘာသာ ပြန်လည်ရုပ်သိမ်းကြ၏။ ကိုယ်တော်ရှင်၏ဝိညာဉ်တော်သည် ဝမ်းနည်းပူဆွေး၍၊ ပြန်လည် ရုပ်သိမ်းသောအခါ ထိုသူ၏ ယဇ်ပုရောဟိတ်အခွင့် သို့မဟုတ် အခွင့်အာဏာသည် အဆုံးသတ်၏။

၃၈ ရှုလော့၊ ထိုသူသတိမပြုမိမီ၊ တုတ်ချွန်ကို ကန်ရန်၊ သန့်ရှင်းသူတို့ကို ညှဉ်းဆဲရန်၊ ထို့အတူ ဘုရားသခင်ကို ဆန့်ကျင်တိုက်ခိုက်ရန် သူ့ချည်းသာ ပစ်ထားခံရ၏။

၃၉ လူသားတို့သည် တွေးထင်သည့်အတိုင်း၊ အနည်းငယ်သော အခွင့်အာဏာကို ရလျှင်ရချင်း မတရားသော အစိုးရခြင်းကို ကျင့်သုံးရန် ချက်ချင်း အစပြုကြမည်မှာ သူတို့အားလုံးနီးပါး၏ ပကတိသဘောနှင့် သဘောထားဖြစ်ကြောင်း ဝမ်းနည်းဖွယ်အတွေ့အကြုံမှ ကျွန်ုပ်တို့ သင်ယူကြရ၏။

၄၀ ထို့ကြောင့်၊ များစွာသောသူတို့ ခေါ်သွင်းခံကြရ၏၊ သို့ရာတွင် အနည်းငယ်သာ ရွေးကောက်ခံကြရ၏။

၄၁ အဘယ်တန်ခိုး သို့မဟုတ် လွှမ်းမိုးမှုကိုမျှ ယဇ်ပုရောဟိတ်အခွင့်အားဖြင့် မထိန်းသိမ်းနိုင် သို့မဟုတ် မထိန်းသိမ်းသင့်၊ ဖျောင်းဖျခြင်းအားဖြင့်၊ စိတ်ရှည်ခြင်းအားဖြင့်၊ နူးညံ့ခြင်းနှင့် သိမ်မွေ့အောက်ကျို့ခြင်းအားဖြင့်၊ ထို့အတူ ဟန်မဆောင်သောချစ်ခြင်းဖြင့်သာ၊

၄၂ ကြင်နာခြင်း၊ ထို့အတူ စင်ကြယ်သောအသိပညာအားဖြင့် ပြုနိုင်၏၊ ၎င်းတို့သည် သူတော်ကောင်းယောင်ဆောင်ခြင်းမရှိဘဲ၊ ထို့အတူ အပြစ်ရောက်ခြင်းမရှိဘဲ စိတ်ဝိညာဉ်ကို ကြီးစွာတိုးပွားစေလိမ့်မည်—

၄၃ သန့်ရှင်းသောဝိညာဉ်တော်၏ တိုက်တွန်းတော်မူခြင်းကို ခံရသည့်အခါ အချိန်သင့်အခါသင့် ပြင်းထန်စွာပြစ်တင်ဆုံးမရမည်။ ထို့နောက်တွင်၊ သင်ပြစ်တင်ဆုံးမလေသောသူက သင့်ကို သူ၏ရန်သူဟု မထင်မှတ်စေခြင်းငှာ သူ့ဆီသို့ တိုးလာသောချစ်ခြင်းကို နောက်ထပ်၍ပြရမည်။

၄၄ သင်၏သစ္စာရှိခြင်းသည် သေခြင်း၏ကြိုးတို့ထက် ပို၍အားကြီးကြောင်းထိုသူ သိနိုင်စေခြင်းငှာပေတည်း။

၄၅ သင်၏ ဝမ်းသည်လည်း ခပ်သိမ်းသောလူတို့ဆီသို့၊ ထို့အတူ ယုံကြည်ခြင်းရှိရာ အိမ်သူအိမ်သားတို့ဆီသို့ မေတ္တာဖြင့် ပြည့်စေလော့၊ ကိုယ်ကျင့်သီလကိုလည်း သင်၏အတွေးများကို မရပ်မတန့် အလှဆင်စေလော့။ ထို့နောက်တွင်၊ သင်၏စိတ်ချယုံကြည်ခြင်းသည် ဘုရားသခင်၏ မျက်မှောက်တော်၌ အားကြီးလာလိမ့်မည်။ ယဇ်ပုရောဟိတ်အခွင့်ဩဝါဒသည်လည်း ကောင်းကင်မှ နှင်းကဲ့သို့ သင်၏စိတ်ဝိညာဉ်အပေါ် ဖြည်းညှင်းစွာ သက်ရောက်လိမ့်မည်။

၄၆ သန့်ရှင်းသောဝိညာဉ်တော်သည် သင်၏အမြဲတမ်းအဖော်၊ ထို့အတူ သင်၏ ရာဇလှံတံ၊ မပြောင်းလဲသော ဖြောင့်မတ်ခြင်းနှင့် သမ္မာတရားရာဇလှံတံဖြစ်လိမ့်မည်။ သင်၏အုပ်ချုပ်ခံဒေသသည်လည်း ထာဝရတည်မြဲသောအုပ်ချုပ်ခံဒေသဖြစ်လိမ့်မည်၊ အတင်းပြုရခြင်းမရှိဘဲနှင့်လည်း သင့်ဆီသို့ ကာလအစဉ်အဆက် အမြဲစီးလိမ့်မည်။