ဩဝါဒနှင့် ပဋိညာဉ်များ ၁၀၈

အပိုဒ်ငယ် ၁၀၈

၁၈၃၅ ခု၊ ဒီဇင်ဘာ ၂၆ ရက်၊ ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ခုနစ်ကျိပ်ဝင်အဖြစ် ယခင်က ခန့်ထားခံခဲ့ရပြီး၊ သူ၏တာဝန်ကို ဖော်ပြရန် ဗျာဒိတ်တော်ကို တောင်းဆိုလျက် ပရောဖက်ထံသို့ လာခဲ့လေသော လိုင်မန်ရှာမန်၏ တောင်းဆိုမှုဖြင့် ဤဗျာဒိတ်တော်ကို လက်ခံရရှိခဲ့၏။

၁–၃၊ လိုင်မန်ရှာမန်သည် သူ၏အပြစ်များအတွက် ခွင့်လွှတ်ခံရ၏။ ၄–၅၊ သူသည် အသင်းတော်၏ ခေါင်းဆောင်သော အသင်းလူကြီးတို့၌ ရေတွက်ခံရမည်။ ၆–၈၊သူသည် ဧဝံဂေလိတရားတော်ကို ဟောပြောစေရန်နှင့် သူ၏ညီအစ်ကိုတို့ကို ခွန်အားဖြည့်ပေးရန် ခေါ်သွင်းခံရ၏။

၁ သင့်ကို ကိုယ်တော်ရှင် အမှန်မိန့်တော်မူသည်ကား၊ ငါ့ကျွန်လိုင်မန်၊ သင်သည် ငါခန့်အပ်ထားလေသူ၏ အကြံကို ရရှိရန် ဤနေရာသို့ လာရာ၌ ငါ၏အသံကို နာခံသောကြောင့် သင်၏အပြစ်များကို ခွင့်လွှတ်ပြီ။

၂ ထို့ကြောင့်၊ သင်၏စိတ်ဝိညာဉ်ကို သင်၏ဝိညာဉ်ပကတိရပ်တည်ခြင်းနှင့် စပ်လျဉ်း၍ ချမ်းသာစေလော့၊ ငါ၏အသံကိုလည်း မတားဆီးတော့နှင့်။

၃ ထလော့၊ သင်ပြုခဲ့လေသည့်၊ ထို့အတူ သင်ပြုသည့် သင်၏ သစ္စာကတိများကို ကျင့်စောင့်ခြင်း၌ ယခုမှစ၍ ပိုပြီးဂရုစိုက်လော့၊ သင်သည် အလွန်ကြီးစွာသော ကောင်းချီးမင်္ဂလာများဖြင့် ကောင်းချီးခံစားရလိမ့်မည်။

၄ ငါ့ကျွန်တို့၏ ဓမ္မအစည်းအဝေးကို ခေါ်သည့်တိုင်အောင် စိတ်ရှည်စွာစောင့်နေလော့၊ ထို့နောက်တွင် သင်သည် ငါ၏အသင်းလူကြီးများထဲမှ ပထမဦးဆုံးသောသူများနှင့်အတူ အောက်မေ့ခံရလိမ့်မည်၊ ငါရွေးကောက်ထားလေသည့် ငါ၏အသင်းလူကြီးတို့အထဲမှ ကျန်ကြွင်းသူများနှင့်အတူ ဘိသိက်မင်္ဂလာအားဖြင့် အခွင့်အရေးကိုလည်း ရလိမ့်မည်။

၅ ရှုလော့၊ သင်သည် ဆက်၍သစ္စာရှိလျှင် ဤအရာသည် သင့်ထံသို့ ခမည်းတော်၏ ကတိတော်ဖြစ်၏။

၆ ယခုမှစ၍၊ ထိုအချိန်မှစ၍ သင့်ကို ငါစေလွှတ်မည့် အရပ်မှန်သမျှ၌ ငါ၏ဧဝံဂေလိတရားတော်ကို ဟောပြောရန် သင်အခွင့်အရေးရမည့် ထိုနေ့၌ သင့်အပေါ်မှာ ပြီးပြည့်စုံစေလိမ့်မည်။

၇ သင်၏ ခပ်သိမ်းသောစကားစမြည်၌၊ သင်၏ခပ်သိမ်းသောဆုတောင်းခြင်းတို့၌၊ သင်၏ခပ်သိမ်းသော တိုက်တွန်းခြင်းတို့၌၊ ထို့အတူ သင်၏ခပ်သိမ်းသောအကျင့်တို့၌ သင်၏ညီအစ်ကိုတို့ကို ခွန်အားဖြည့်ပေးလော့။

၈ ရှုဦးလော့၊ ကြည့်ဦးလော့၊ ငါသည် သင့်ကို ကာလအစဉ်အဆက် ကောင်းချီးပေးရန်နှင့် ကယ်လွှတ်ရန် သင်နှင့်အတူ ရှိတော်မူ၏။ အာမင်။