တရားဝင် ကြေညာချက် ၁

တစ်လင်တစ်မယားစနစ်သည် ဘုရားသခင်တစ်နည်းအားဖြင့် ဟောကြားထားခြင်းမရှိလျှင် (ဓမ္မရာဇဝင် ဒုတိယစောင် ၁၂း၇–၈ နှင့် ယာကုပ် ၂း၂၇၊ ၃၀ တွင် ကြည့်ပါ) အိမ်ထောင်ဖက် ပြုခြင်းအတွက် သူ၏ စံနှုန်းဖြစ်ကြောင်း သမ္မာကျမ်းနှင့် မော်မုန်ကျမ်းက သွန်သင်၏။ ဂျိုးဇက်စမစ်ထံသို့ ဗျာဒိတ်တော်တစ်ခု၏ နောက်တွင်၊ ၁၈၄၀ ခုနှစ်များ အစောပိုင်း၌ အပြိုင်အိမ်ထောင်ဖက်ပြုခြင်း အလေ့အကျင့်ကို အသင်းတော်အသင်းသားတို့၌ တည်ထောင်ခဲ့၏ (အပိုဒ်ငယ် ၁၃၂ တွင် ကြည့်ပါ)။ ၁၈၆၀ ခုနှစ်များမှ ၁၈၈၀ ခုနှစ်များအထိ၊ အမေရိကန်ပြည်ထောင်စု အစိုးရသည် ဤဘာသာရေးအလေ့အကျင့်ကို တရားမဝင်ဖြစ်စေရန် ဥပဒေများပြဋ္ဌာန်းခဲ့၏။ ဤဥပေဒေများသည် နောက်ဆုံးတွင် အမေရိကန်ပြည်ထောင်စု တရားရုံးချုပ်၏ ထောက်ခံမှုကို ရခဲ့၏။ ဗျာဒိတ်တော်ကို ရရှိပြီးနောက်တွင်၊ ဥက္ကဋ္ဌဝီလဖို့ ဝုဒရပ်ဖ်သည် အောက်ပါကြေညာချက်ကို ထုတ်ပြန်ခဲ့၏၊ ထိုကြေညာချက်ကို အသင်းတော်က ဩဇာအာဏာနှင့် ဝန်ခံချက်အဖြစ် ၁၈၉၀ ခုနှစ်၊ အောက်တိုဘာ ၆ ရက်တွင် လက်ခံခဲ့၏။ ဤအရာသည် အသင်းတော်၌ အပြိုင်အိမ်ထောင်ဖက်ပြုခြင်းအလေ့အကျင့်ကို အဆုံးသတ်ခြင်းသို့ ဦးတည်ခဲ့၏။

သက်ဆိုင်သူများသို့

ဆော့လိတ်မြို့မှနေ၍၊ နိုင်ငံရေး ရည်ရွယ်ချက်များအတွက် သတင်းကို ထုတ်လွှင့်၍၊ အကျယ်တဝင့် ပုံနှိပ်ထုတ်ဝေခဲ့ရာ၊ ယုတကော်မရှင်အဖွဲ့သည် ပြည်ထဲရေးအတွင်းရေးမှူးထံသို့ သူတို့၏ လတ်တလော အစီရင်ခံစာ၌၊ အပြိုင်အိမ်ထောင်ဖက်ပြုခြင်းများကို ကျင်းပလျက်ရှိသေးကြောင်း၊ ထို့အတူ လေးဆယ်ထက်ပိုသည့် ထိုကဲ့သို့သော အိမ်ထောင်ဖက်ပြုခြင်းများကို ယုတ၌ လွန်ခဲ့သော ဇွန်လ သို့မဟုတ် လွန်ခဲ့သည့်နှစ်က ချုပ်ဆိုခဲ့ကြောင်း၊ အသင်းတော်၏ခေါင်းဆောင်တို့သည် မယားပြိုင်စနစ် အလေ့အကျင့်အား ဆက်၍ကျင့်သုံးခြင်းကို သွန်သင်ခဲ့၊ အားပေးခဲ့ပြီး၊ တိုက်တွန်းခဲ့ကြောင်းကိုလည်း စွပ်စွဲ ဖော်ပြခဲ့သဖြင့်—

ထို့ကြောင့်၊ ကျွန်ုပ်သည် ယေရှုခရစ်တော်၏ နောက်ပိုင်းကာလ သန့်ရှင်းသူများ အသင်းတော်၏ ဥက္ကဋ္ဌ အနေဖြင့်၊ ဤစွဲချက်များ မှားယွင်းကြောင်းကို၊ ယခု ကြေညာချက်ဖြင့်၊ အလေးနက်ဆုံး ကြေညာ လိုက်ပါ၏။ ကျွန်ုပ်တို့သည် မယားပြိုင်စနစ် သို့မဟုတ် အပြိုင်အိမ်ထောင်ဖက်ပြုခြင်းကို သွန်သင်ခြင်းမရှိ၊ လူတစ်စုံတစ်ဦးကိုမျှ ထိုအလေ့အကျင့်ကို ခွင့်ပြုခြင်းမရှိပါ၊ ထိုဖော်ပြပါ ကာလအတွင်း၌၊ ကျွန်ုပ်တို့၏ ဗိမာန်တော်များ၌ သို့မဟုတ် နယ်မြေအတွင်းရှိ အခြားမည်သည့် နေရာ၌မျှ လေးဆယ်သို့မဟုတ် အပြိုင် အိမ်ထောင်ဖက်ပြုခြင်း အခြားအရေအတွက် တစ်စုံတစ်ခုမျှ မရှိကြောင်းကိုလည်း ကျွန်ုပ်ငြင်းဆိုပါ၏။

အမှုတစ်ခုကို အစီရင်ခံခဲ့ပါ၏၊ အိမ်ထောင်ဖက်ပြုခြင်းကို ၁၈၈၉ ခုနှစ်၊ နွေဦးတွင် ဆော့လိတ်မြို့ရှိ၊ ဝိညာဉ်ပကတိအပ်နှင်းခြင်း အိမ်တော်၌ ဆောင်ရွက်ခဲ့ကြောင်း ထိုအမှုတွင် အုပ်စုများက စွပ်စွဲကြပါ၏၊ သို့ရာတွင် ထိုအခမ်းအနားကို အဘယ်သူ ဆောင်ရွက်ခဲ့ကြောင်း ကျွန်ုပ်သိနိုင်စွမ်း မရှိခဲ့ပါ။ ဤအမှုနှင့် စပ်လျဉ်း၍ လုပ်ဆောင်ခဲ့သမျှသည် ကျွန်ုပ်မသိဘဲ ပြုသောအရာ ဖြစ်ပါ၏။ ဤစွပ်စွဲသော ဖြစ်ရပ်၏ အကျိုးဆက် အဖြစ်၊ ဝိညာဉ်ပကတိအပ်နှင်းခြင်း အိမ်တော်ကို၊ ကျွန်ုပ်၏ ညွှန်ကြားချက်ဖြင့်၊ နှောင့်နှေးခြင်းမရှိဘဲ ဖြိုချခဲ့ပါ၏။

အပြိုင်အိမ်ထောင်ဖက်ပြုခြင်းကို တားမြစ်သည့် ဥပဒေများကို ညီလာခံမှ ပြဋ္ဌာန်း သတ်မှတ်ပြီး၊ ထိုဥပဒေများကို နောက်ဆုံးလျှောက်လဲရာ တရားရုံးမှ ဖွဲ့စည်းပုံအဖြစ် ကြေညာခဲ့လေပြီးဖြစ်၍၊ ထိုဥပဒေများကို လိုက်နာရန်နှင့် ကျွန်ုပ်ဦးစီးရာ အသင်းတော်၏အသင်းသားတို့ကိုလည်း ကျွန်ုပ်၏ဩဇာကို အသုံးပြု၍ ထိုနည်းတူ လိုက်နာကြစေရန် ကျွန်ုပ်၏ကြံရွယ်ချက်ကို၊ ကျွန်ုပ် ယခုကြေညာပါ၏။

အသင်းတော်သို့ ကျွန်ုပ်၏ သွန်သင်ခြင်း၌ဖြစ်စေ၊ ကျွန်ုပ်အပေါင်းအဖော်များ၏သွန်သင်ခြင်း၌ဖြစ်စေ၊ အထက်ဖော်ပြပါအချိန်အတွင်း၌၊ မယားပြိုင်စနစ်ကို အကျိုးသင့်အကြောင်းသင့် အနက်ရောက် နိုင်စေရန် သွတ်သွင်းသည့် သို့မဟုတ် အားပေးသည့်အရာ တစ်ခုမျှမရှိပါ။ အသင်းတော်မှ အဘယ်အသင်းလူကြီးဖြစ်စေ ထိုကဲ့သို့သော သွန်သင်ခြင်း တစ်စုံတစ်ခုကို ပို့ဆောင်သည့် ဟန်ရှိသည့် စကားကို အသုံးပြုလျှင် ချက်ချင်း အပြစ်တင်ဆုံးမခံရပြီး ဖြစ်ပါ၏။ ယခုမူကား၊ ပြည်၏ ဥပဒေမှ တားမြစ်ထားသော အဘယ် အိမ်ထောင်ဖက်ပြုခြင်းကိုမဆို ရှောင်ကြဉ်ရန် နောက်ပိုင်း ကာလ သန့်ရှင်းသူ တို့အား ကျွန်ုပ်၏ အကြံပြုချက်ကို ကျွန်ုပ် လူသိရှင်ကြား ကြေညာပါ၏။

ဝီလဖို့ဝုဒရပ်ဖ်

ယေရှုခရစ်တော်၏နောက်ပိုင်းကာလသန့်ရှင်းသူများအသင်းတော်၏ ဥက္ကဋ္ဌ

ဥက္ကဋ္ဌလော်ရန်ဇိုစနိုးက အောက်ပါအကြောင်းအရာကို ကမ်းလှမ်းခဲ့၏။

“ကျွန်ုပ်အဆိုပြုသည်မှာ၊ ဝီလဖို့ဝုဒရပ်ဖ်ကို ယေရှုခရစ်တော်၏ နောက်ပိုင်းကာလသန့်ရှင်းသူများ အသင်းတော်၏ ဥက္ကဋ္ဌအဖြစ်၊ ထို့အတူ မြေကြီးပေါ်တွင်၊ မျက်မှောက်ကာလ၌ တံဆိပ်ခတ်ခြင်း ဘိသိက်မင်္ဂလာတို့၏ သော့များကို ကိုင်ဆောင်သည့် တစ်ဦးတည်းသောသူအဖြစ် အသိအမှတ်ပြုလျက်၊ ကျွန်ုပ်တို့နားရှေ့မှာ ဖတ်လေပြီးသည့်၊ ထို့အတူ ၁၈၉၀ ခုနှစ်၊ စက်တင်ဘာလ ၂၄ ရက် နေ့စွဲဖြင့်ရှိသည့် ကြေညာချက်ကို ထုတ်ပြန်ရန် သူ၏ အမှုတော်ဆောင် တာဝန်ကို အခြေခံ၍ ပြည့်စုံစွာအခွင့်အာဏာရှိသည်ဟု သူ့ကို ကျွန်ုပ်တို့ မှတ်ယူကြောင်း၊ ထို့အတူ အသင်းတော် တစ်ခုအဖြစ် အထွေထွေညီလာခံ၌ စုဝေး၍၊ ကျွန်ုပ်တို့သည် အပြိုင်အိမ်ထောင်ဖက်ပြုခြင်းနှင့် စပ်လျဉ်း၍၊ သူ၏ကြေညာချက်ကို ဩဇာအာဏာနှင့် ဝန်ခံချက်အဖြစ် လက်ခံကြကြောင်းဖြစ်ပါ၏။”

ဆော့လိတ်မြို့၊ ယုတ၊ ၁၈၉၀ ခုနှစ်၊ အောက်တိုဘာ ၆ ရက်။

ကြေညာချက်နှင့်စပ်လျဉ်း၍
ဥက္ကဋ္ဌဝီလဖို့ဝုဒရပ်၏
မိန့်ခွန်းသုံးခုမှ ကောက်နုတ်ချက်များ

ကိုယ်တော်ရှင်သည် ကျွန်ုပ်ကိုဖြစ်စေ၊ ဤအသင်းတော်၏ဥက္ကဋ္ဌအဖြစ်ရှိသည့် အခြား အဘယ်သူကို ဖြစ်စေ သင်တို့အား လမ်းလွဲသို့ ပို့ဆောင်စေရန် အဘယ်တော့မျှ အခွင့်ပေးမည် မဟုတ်ပါ။ အဲဒါက အစီအစဉ်ထဲမှာ မရှိပါဘူး။ အဲဒါက ဘုရားသခင်ရဲ့ စိတ်ထဲမှာ မရှိပါဘူး။ ကျွန်တော်သာ အဲဒါကို လုပ်ဖို့ ကြိုးစားမည်ဆိုလျှင်၊ ကိုယ်တော်ရှင်က ကျွန်တော့်ကို ကျွန်တော့် နေရာကနေ ဖယ်ရှားမှာဖြစ်ပါတယ်၊ လူသားတို့ကို ဘုရားသခင်ရဲ့ ဗျာဒိတ်တော်များနဲ့ သူတို့ရဲ့ တာဝန်ကနေ လမ်းလွဲသို့ ပို့ဆောင်ဖို့ ကြိုးစားတဲ့ အခြားအဘယ်သူကိုမဆို သူအဲဒီလို ဖယ်ရှားမှာ ဖြစ်ပါတယ်။ (ခြောက်ဆယ့် တစ်ကြိမ်မြောက် အသင်းတော်၏ နှစ်ဝက်အထွေထွေညီလာခံ၊ တနင်္လာနေ့၊ အောက်တိုဘာလ ၆ ရက်၊ ၁၈၉၀ ခုနှစ်၊ ဆော့လိတ်မြို့၊ ယုတ။ Deseret Evening News (ဒက်စရက် ညနေခင်းသတင်း)၊ အောက်တိုဘာလ ၁၁ ရက်၊ ၁၈၉၀ ခုနှစ်၊ စာ၊ ၂၊ ၌ မှတ်တမ်းတင်ထား၏)

ဘယ်သူ အသက်ရှင်တယ် သို့မဟုတ် ဘယ်သူသေတယ်၊ သို့မဟုတ် ဤအသင်းတော်ကို ဦးဆောင်ဖို့ ဘယ်သူခေါ်သွင်းခံရတယ်ဆိုတာ အရေးမကြီးပါဘူး၊ သူတို့ဟာ ဒီအသင်းတော်ကို ဦးဆောင်ဖို့ အနန္တတန်ခိုးရှင် ဘုရားသခင်ရဲ့လမ်းပြလှုံ့ဆော်မှုကို ခံရမှာဖြစ်ပါတယ်။ သူတို့ဟာ အဲဒီလိုနည်းနဲ့ မလုပ်ဆောင်ကြဘူးဆိုလျှင်၊ ဘာကိုမျှလုပ်နိုင်ကြမှာမဟုတ်ပါဘူး၊ …

ကျွန်တော့်မှာ မကြာသေးခင်က ရထားတဲ့ ဗျာဒိတ်တော်အချို့ရှိပါတယ်၊ ကျွန်တော့်အဖို့ အလွန် အရေးကြီးတဲ့ အရာတွေလည်း ဖြစ်ပါတယ်၊ ကျွန်တော့်ကို ကိုယ်တော်ရှင်မိန့်တော်မူ ခဲ့တဲ့အရာကို သင်တို့ကို ကျွန်တော် ပြောပြပါမယ်။ ကြေညာချက်ဆိုတာ ဘယ်လိုခေါ်သလဲဆိုတာ ကျွန်တော် သင်တို့ကို စဉ်းစားခိုင်းပါရစေ၊ …

နောက်ပိုင်းကာလ သန့်ရှင်းသူတွေကို မေးခွန်းတစ်ခုမေးဖို့ ကိုယ်တော်ရှင်က ကျွန်တော့်ကို ပြောပြ ခဲ့ပါတယ်။ သူတို့ကို ကျွန်တော်ပြောတဲ့အရာကို သူတို့နားထောင်လိုကြပြီး၊ သူတို့ကိုမေးတဲ့ မေးခွန်း ကိုလည်း ဘုရားသခင်ရဲ့ ဝိညာဉ်တော်နဲ့ တန်ခိုးတော်အားဖြင့် ဖြေလိုကြမယ်ဆိုလျှင်၊ သူတို့ အားလုံးဟာ တူညီစွာဖြေကြမှာ၊ သူတို့အားလုံးဟာ ဤအမှုနဲ့စပ်လျဉ်းပြီး တူညီစွာ ယုံကြည်ကြမှာလည်း ဖြစ်တဲ့ အကြောင်းကိုလည်း ကျွန်တော့်ကို သူမိန့်တော်မူခဲ့ပါတယ်။

မေးခွန်းကတော့ ဒီလိုဖြစ်ပါတယ်။ နောက်ပိုင်းကာလသန့်ရှင်းသူတို့အတွက် အဘယ်လမ်းသည် လိုက်ရန် ဉာဏ်ပညာအရှိဆုံးလမ်းဖြစ်သနည်း—အပြိုင်အိမ်ထောင်ဖက်ပြုခြင်းကိုဆန့်ကျင်သည့် နိုင်ငံ၏ ဥပေဒေနှင့် လူသန်းခြောက်ဆယ်၏ ဆန့်ကျင်မှုဖြင့်၊ ထို့အတူ နိုင်ငံတော်ဘဏ္ဍာအဖြစ် အသိမ်းခံရခြင်း၊ ခပ်သိမ်းသော ဗိမာန်တော်များ ဆုံးရှုံးရခြင်း၊ ထို့အတူ အသက်ရှင်သူနှင့် သေသူနှစ်မျိုးစလုံးအတွက် ၎င်းတို့အထဲ၌ ခပ်သိမ်းသောဘိသိက်မင်္ဂလာများကို ရပ်ခြင်း၊ ထို့အတူ ပထမဥက္ကဋ္ဌအဖွဲ့၊ တစ်ဆယ့်နှစ်ပါးနှင့် အသင်းတော်ရှိမိသားစုများမှ ခေါင်းဆောင်များ ထောင်ချခံရခြင်း၊ လူတို့၏ ကိုယ်ပိုင် ဥစ္စာပစ္စည်းများ နိုင်ငံတော် ဘဏ္ဍာအဖြစ် အသိမ်းခံရခြင်း (ခပ်သိမ်းသော ထိုအရာတို့သည်ပင် အလေ့အကျင့်ကို ရပ်စေလိမ့်မည်) တို့ကို ကုန်ကျခံလျက် ထိုအကျင့်ကို လေ့ကျင့်ရန် ဆက်၍ ကြိုးစားမည်လော၊ သို့မဟုတ်၊ ဤအခြေခံဩဝါဒသဘောတရားကို ကျွန်ုပ်တို့၏ သစ္စာရှိစွာနာခံခြင်းဖြင့် လုပ်ဆောင်ခြင်းနှင့် ဒုက္ခဝေဒနာခံစားခြင်းတို့ ရှိပြီးနောက်မှ အလေ့အကျင့်ကို ရပ်တန့်ပြီး၊ ဥပဒေကိုနာခံ၍၊ ထိုကဲ့သို့လုပ်ဆောင်ခြင်းအားဖြင့်၊ ပရောဖက်များ၊ တမန်တော်များနှင့် အဘတို့ကို အိမ်မှာထား၍၊ သူတို့အား လူတို့ကို သွန်သင်နိုင်ပြီး၊ အသင်းတော်၏ တာဝန်များကို ဆောင်ရွက်နိုင်ကြ၊ ထို့အတူ ဗိမာန်တော်များကိုလည်း သန့်ရှင်းသူတို့၏လက်၌ ထား၍၊ သူတို့သည် အသက်ရှင်သူနှင့် သေသူနှစ်မျိုးစလုံးအတွက် ဧဝံဂေလိတရားတော်၏ ဘိသိက်မင်္ဂလာများကို ဂရုစိုက်နိုင်ကြစေမည်လော။

ကျွန်ုပ်တို့သည် ဤအလေ့အကျင့်ကို မရပ်လျှင်၊ ဖြစ်ပျက်လာမည့်အရာကို ကိုယ်တော်ရှင်သည် ကျွန်ုပ်ကို ရူပါရုံနှင့် ဗျာဒိတ်တော်တို့ဖြင့် အတိအကျ ပြတော်မူခဲ့၏။ ကျွန်ုပ်တို့သည် ထိုအကျင့်ကို မရပ်ခဲ့လေလျှင်၊ လိုဂန်ရှိ ဤဗိမာန်တော်၌ ဤလူတို့အထဲမှ အဘယ်သူအတွက်မျှ မလိုအပ်။ အကြောင်းမူကား၊ ဇိအုန်ပြည်တစ်လျှောက်လုံး၌ ခပ်သိမ်းသောဘိသိက်မင်္ဂလာများ ရပ်ခဲ့လိမ့်မည်။ ရှုပ်ထွေးခြင်းသည် ဣသရေလအမျိုးတစ်လျှောက်၌ အုပ်စိုးလိမ့်မည်၊ များစွာသောသူတို့ကိုလည်း အကျဉ်းသားများ ဖြစ်စေလိမ့်မည်။ ဤဒုက္ခသည် အသင်းတော်တစ်ခုလုံးအပေါ် ကျရောက် လာလိမ့်မည်၊ ကျွန်ုပ်တို့သည်လည်း ထိုအလေ့အကျင့်ကို ရပ်ရန် အတင်းအကျပ် အပြုခံရလိမ့်မည်။ ယခုတွင်၊ မေးခွန်းမှာ၊ ဤနည်းဖြင့်ရပ်သင့် မရပ်သင့်၊ သို့မဟုတ် ကျွန်ုပ်တို့အား ကိုယ်တော်ရှင် ထင်ရှားစွာပြထားတော်မူလေသည့်အတိုင်း ကျွန်ုပ်တို့၏ ပရောဖက်များ၊ တမန်တော်များနှင့် အဘတို့အား လွတ်လပ်သောသူများအဖြစ်၊ ထို့အတူ ဗိမာန်တော်များကိုလည်း လူတို့၏လက်ထဲ၌ ထား၍၊ ထိုကဲ့သို့အားဖြင့် သေသူတို့ကို ရွေးနုတ်ခံရနိုင်စေ၏။ အရေအတွက်များစွာတို့ကို ဤလူတို့အားဖြင့် ဝိညာဉ်လောက၌ အကျဉ်းထောင်အိမ်များမှ လွတ်မြောက်စေခဲ့လေပြီ၊ ထိုအမှုကို ဆက်၍ပြုရမည်လော သို့မဟုတ် ရပ်ရမည်လော။ ဤအရာမှာ နောက်ပိုင်းကာလ သန့်ရှင်းသူတို့ရှေ့၌ ကျွန်ုပ်ချပြသည့် မေးခွန်းဖြစ်၏။ သင်တို့သည် သင်တို့ဘာသာသင်တို့ ဆုံးဖြတ်ကြရမည်။ ထိုအရာကို သင်တို့ဘာသာသင်တို့ ဖြေရန် ကျွန်ုပ်အလိုရှိ၏။ ကျွန်ုပ်ဖြေမည်မဟုတ်။ သို့ရာတွင် သင်တို့ကို ကျွန်ုပ်ဆိုသည်ကား၊ ထိုအရာမှာ လူမျိုးတစ်မျိုးအဖြစ် ကျွန်ုပ်တို့သွားခဲ့သည့် လမ်းကို မသွားခဲ့လျှင်ရှိမည့်အခြေအနေ အတိအကျဖြစ်၏။

တစ်စုံတစ်ခုကို လုပ်ဆောင်ပြီးခြင်းမရှိလျှင်၊ ဖြစ်လာမည့်အရာကို ကျွန်ုပ်အတိအကျ မြင်ရ၏။ ကျွန်ုပ်၌ ဤစိတ်ဝိညာဉ် အချိန်ကြာမြင့်စွာ ရှိခဲ့လေပြီ။ သို့ရာတွင် သင်တို့ကို ကျွန်ုပ် ဤသို့ ဆိုချင်၏၊ ကျွန်ုပ်သည် ခပ်သိမ်းသောဗိမာန်တော်များကို ကျွန်ုပ်တို့လက်များမှ လွတ်သွားရန် အခွင့်ပေးလို၏။ ကျွန်ုပ် လုပ်ဆောင်ခဲ့သည့်အရာကို ကောင်းကင်ဘုံ၏ ဘုရားသခင်က ကျွန်ုပ်ကို လုပ်ဆောင်ရန် မမိန့်တော်မူ ခဲ့လေလျှင်၊ ကျွန်ုပ်ကိုယ်တိုင် ထောင်ထဲသို့ သွားရန် အခွင့်ပေးလို၏၊ အခြားယောက်ျားတိုင်းကိုလည်း ထိုနေရာသို့ သွားရန် အခွင့်ပေးလို၏။ ထိုအရာကို လုပ်ဆောင်ရန် ကျွန်ုပ်မိန့်မှာခံရသည့်အချိန် ကျရောက်လာသောအခါ၊ ခပ်သိမ်းသောအရာတို့သည် ကျွန်ုပ်အဖို့ ရှင်းလင်းပေ၏။ ကျွန်ုပ်သည် ကိုယ်တော်ရှင်ရှေ့သို့ သွားခဲ့၏၊ ကျွန်ုပ်အား ရေးရန် ကိုယ်တော်ရှင်မိန့်တော်မူခဲ့သည့်အရာကိုလည်း ကျွန်ုပ်ရေးခဲ့၏။

ကျွန်ုပ်သည် ဤရာကို သင်တို့ ဆင်ခြင်စဉ်းစားရန် သင်တို့နှင့်အတူ ထားခဲ့၏။ ကိုယ်တော်ရှင်သည် အမှုတော်၌ ကျွန်ုပ်တို့နှင့် အတူရှိတော်မူ၏။ (ကက်ချီပန္နက် ညီလာခံ၊ လိုဂန်၊ ယုတ၊ တနင်္ဂနွေနေ့၊ နိုဝင်ဘာ ၁ ရက်၊ ၁၈၉၁ ခုနှစ်။ Deseret Weekly (ဒက်စရက် အပတ်စဉ်သတင်း)၊ နိုဝင်ဘာလ ၁၄ ရက်၊ ၁၈၉၁ ခုနှစ်။)

ယခုတွင်၊ ကျွန်ုပ်ကို ထင်ရှားစွာပြတော်မူခဲ့လေသောအရာနှင့် ဤအမှု၌ ဘုရားသင်၏သားတော် ဆောင်ရွက်တော်မူခဲ့သည့်အရာကို သင့်တို့အား ကျွန်ုပ်ပြောပြမည်။ ခပ်သိမ်းသောဤအရာတို့သည် ဖြစ်လာလိမ့်မည်၊ အနန္တတန်ခိုးရှင်ဘုရားသခင် အသက်ရှင်တော်မူသည့်အတိုင်း၊ ထိုကြေညာချက်ကို မပေးခဲ့လေသလော။ ထို့ကြောင့်၊ ဘုရားသခင်၏ သားတော်သည် သူကိုယ်တိုင်၏ စိတ်၌ ရှိသည့် ရည်ရွယ်ချက်များအတွက် အသင်းတော်သို့လည်းကောင်း၊ လောကသို့လည်းကောင်း ထိုအရာကို ဖော်ပြခြင်းရှိရန် လိုလားတော်မူခဲ့၏။ ကိုယ်တော်ရှင်သည် ဇိအုန်၏တည်ထောင်ခြင်းကို ကြေညာခဲ့၏။ သူသည် ဤဗိမာန်တော်၏အပြီးသတ်ခြင်းကို စီရင်ခဲ့၏။ အသက်ရှင်သူများနှင့် သေသူများအတွက် ကယ်တင်ခြင်းကို ဤတောင်တို့၏ချိုင့်ဝှမ်းများ၌ ပေးလိမ့်မည့်အကြောင်း စီရင်ခဲ့၏။ အနန္တတန်ခိုးရှင် ဘုရားသခင်သည် ထိုအမှုကို နတ်ဆိုး မဆီးတားရမည့်အကြောင်းကိုလည်း စီရင်ခဲ့၏။ သင်တို့သည် ထိုအရာကို နားလည်နိုင်ကြလျှင်၊ ထိုအရာမှာ သော့တစ်ခုဖြစ်၏။ (၁၈၉၃ ခုနှစ်၊ ဧပြီလ၊ ဆော့လိတ် ဗိမာန်တော် ဆက်ကပ်ခြင်း ဆဋ္ဌမမြောက်ကဏ္ဍ မိန့်ခွန်းတစ်ခုမှ။ ဆက်ကပ်ခြင်း အခမ်းအနား လက်နှိပ်စက်စာမူ၊ မော်ကွန်းတိုက်များ၊ အသင်းတော်သမိုင်းဌာန၊ ဆော့လိတ်မြို့၊ ယုတ။)