ဩဝါဒနှင့် ပဋိညာဉ်များ ၁၃၂

အပိုဒ်ငယ် ၁၃၂

၁၈၄၃ ခု၊ ဇူလိုင်လ ၁၂ ရက်၊ နော်ဗူး၊ အီလီနွိုက်၌၊ မှတ်တမ်းတင်ခဲ့သည့်၊ အိမ်ထောင်ဖက် ပြုခြင်း ပဋိညာဉ်၏ ထာဝရဖြစ်ခြင်းနှင့်အပြိုင် အိမ်ထောင်ဖက်ပြုခြင်း အခြေခံသဘောတရား အပါအဝင်၊ ထာဝရတည်မြဲသော ပဋိညာဉ်သစ်နှင့် စပ်လျဉ်း၍၊ ပရောဖက် ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ဗျာဒိတ်တော်ကို ၁၈၄၃ ခု၌ မှတ်တမ်းတင်ခဲ့သော်လည်း၊ ဤဗျာဒိတ်တော်၌ ပါဝင်သည့် အခြေခံသဘောတရားအချို့ကို ပရောဖက်သည် ၁၈၃၁ ခု ကတည်းကပင် သိခဲ့လေ၏။ တရားဝင် ကြေညာချက် ၁ တွင် ကြည့်ပါ။

၁–၆၊ ချီးမြှောက်ခြင်းကို ထာဝရတည်မြဲသောပဋိညာဉ်သစ်အားဖြင့် ရရှိ၏။ ၇–၁၄၊ ပဋိညာဉ်၏ သတ်မှတ်ချက်များနှင့် ပြဋ္ဌာန်းချက်များကို ဖော်ပြထား၏။ ၁၅–၂၀၊ ဆီလက်ရှယ်လ် အိမ်ထောင်ဖက်ပြုခြင်းနှင့် မိသားစုအဖွဲ့အစည်း၏အဆက်သည် လူသားတို့အား ဘုရားများဖြစ်လာစေရန် စွမ်းဆောင်နိုင်စေ၏။ ၂၁–၂၅၊ ကျပ်တည်းကျဉ်းမြောင်းသည့် လမ်းသည် ထာဝရအသက် ဆီသို့ ပို့ဆောင်၏။ ၂၆–၂၇၊ သန့်ရှင်းသောဝိညာဉ်တော်ကို ဆန့်ကျင်၍ ဘုရားကို ပြစ်မှားသည့် အပြစ်နှင့် စပ်လျဉ်းသည့် ဥပဒေကိုပေးထား၏။ ၂၈–၃၉၊ ထာဝရတိုးပွားခြင်းနှင့် ချီးမြှောက်ခြင်းတို့၏ ကတိတို့ကို ပရောဖက်တို့နှင့် သန့်ရှင်းသူတို့အား ကာလတစ်ခုလုံး၌ ပေးထား၏။ ၄၀–၄၇၊ မြေကြီးပေါ်နှင့် ကောင်းကင်ဘုံ၌ ထုပ်၍စည်းနှောင်သည့် တန်ခိုးကို ဂျိုးဇက်စမစ်အား ပေးထား၏။ ၄၈–၅၀၊ ကိုယ်တော်ရှင်သည် သူ့အပေါ်၌ သူ၏ချီးမြှောက်ခြင်းကို တံဆိပ်ခတ်၏။ ၅၁–၅၇၊ အီမာစမစ်အား သစ္စာရှိပြီး မှန်ကန်ရန် အကြံပေး၏။ ၅၈–၆၆၊ အပြိုင် အိမ်ထောင်ဘက်ပြုခြင်းကို ထိန်းချုပ်သည့် ဥပဒေများကို ဖော်ပြထား၏။

၁ သင့်ကို ကိုယ်တော်ရှင်အမှန်မိန့်တော်မူသည်ကား၊ ငါ့ကျွန်ဂျိုးဇက်၊ ငါ၏ကျွန်တို့ ဖြစ်သည့် အာဗြဟံ၊ ဣဇာက်၊ ယာကုပ်၊ ထို့အတူ မောရှေ ဒါဝိနှင့်ရှောလမုန်တို့အား သူတို့၏ များစွာသော မိန်းမများနှင့် မယားငယ်များ ယူခြင်းကို ငါ အဘယ်နည်းဖြင့် အပြစ်ကင်းစေကြောင်းနှင့် စပ်လျဉ်းသည့် အခြေခံသဘောတရားနှင့် ဩဝါဒကို သင်သည် သိ၍နားလည်ရန် ငါ့ထံမေးလျှောက်လေသဖြင့်—

၂ ရှုလော့၊ ကြည့်ဦးလော့၊ ငါသည် သင်၏ဘုရားသခင်ကိုယ်တော်ရှင်ဖြစ်၏၊ ဤအမှုနှင့် စပ်လျဉ်း၍လည်း သင့်ကို အဖြေပေးတော်မူမည်။

၃ ထို့ကြောင့်၊ သင့်ကို ငါပေးတော့မည့် သွန်သင်ချက်တို့ကို လက်ခံ၍ နာခံရန် သင်၏ စိတ်နှလုံးကို ပြင်ဆင်လော့။ အကြောင်းမူကား၊ ဤဥပဒေကို သူတို့ထံ ဖော်ပြ၍ ရရှိသူမှန်သမျှသည် နာခံရမည်။

၄ အကြောင်းမူကား၊ ရှုလော့၊ ငါသည် သင့်အား ထာဝရတည်မြဲသောပဋိညာဉ်သစ်ကို ဖော်ပြ၏။ သင်သည် ထိုပဋိညာဉ်အတိုင်း နေထိုင်ခြင်းမရှိလျှင် အပြစ်စီရင်ခံရ၏။ အကြောင်းမူကား၊ အဘယ်သူမျှ ဤပဋိညာဉ်ကို ငြင်းပယ်ပြီးလျှင် ငါ၏ ဘုန်းတော်သို့ ဝင်ရန် အခွင့်မရနိုင်။

၅ အကြောင်းမူကား၊ ငါ၏လက်တို့မှ ကောင်းချီးမင်္ဂလာကို ရရှိမည့် ခပ်သိမ်းသောသူတို့သည် ထိုကောင်းချီးမင်္ဂလာ အတွက် စီရင်ထားသည့်၊ ကမ္ဘာမတည်မီ ကတည်းက တည်ထောင်ထားလေသည့်ဥပဒေအတိုင်း၊ ထို့အတူ ပါရှိသည့် ပြဋ္ဌာန်းချက်တို့ အတိုင်း နေထိုင်ရမည်။

၆ ထာဝရတည်မြဲသောပဋိညာဉ်သစ်နှင့် စပ်ဆိုင်၍၊ ငါ့ဘုန်းတော်၏ ပြည့်စုံခြင်းအတွက် တည်ထောင်ထားလေ၏။ ပါရှိသည့် ပြည့်စုံခြင်းကို ရရှိသောသူသည် ထိုဥပဒေအတိုင်း မဖြစ်မနေ နေထိုင်ရမည်၊ သို့မဟုတ်လျှင်၊ အပြစ်စီရင်ခံရလိမ့်မည်ဟု ကိုယ်တော်ရှင်ဘုရားသခင်မိန့်တော်မူလေ၏။

၇ သင်တို့ကို ငါအမှန်ဆိုသည်မှာ၊ ဤဥပဒေ၏ ပြဋ္ဌာန်းချက်များသည်ကား၊ ဤတန်ခိုးကို ကိုင်ဆောင်ရန် မြေကြီးပေါ်၌ ငါ၏ခန့်အပ်ထားသောသူ (နောက်ဆုံးသောကာလ၌ ဤတန်ခိုးကို ကိုင်ဆောင်ရန်၊ ငါ၏ကျွန် ဂျိုးဇက်ကို ငါခန့်ထားလေပြီ၊ ဤတန်ခိုးကိုလည်းကောင်း၊ ဤယဇ်ပုရောဟိတ်အခွင့်၏ သော့များကိုလည်းကောင်း အပ်နှင်းထားခံရသူမှာ တစ်ကြိမ်၌ တစ်ဦးသာ ရှိဖူးလေ၏) အားဖြင့် ရောက်လာသည့် ဗျာဒိတ်တော်နှင့် ပညတ်တော်အားဖြင့်၊ ယခုကာလအတွက်သော်လည်းကောင်း၊ ထာဝရကာလတစ်ခုလုံးအတွက်သော်လည်းကောင်း၊ နှစ်ခုစလုံး၌လည်း အသန့်ရှင်းဆုံးဖြစ်သည့် ခန့်အပ်ခံရသူအားဖြင့်၊ ကတိတော်နှင့်ယှဉ်သော သန့်ရှင်းသောဝိညာဉ်တော်ဖြင့် ပြုမထားသည့်၊ ထို့အတူ ဝင်ရောက်မထားသည့်၊ ထို့အတူ တံဆိပ်ခတ်မထားသည့် ခပ်သိမ်းသော ပဋိညာဉ်များ၊ သဘောတူညီချက်များ၊ ခံဝန်ချုပ်များ၊ ကျိန်ဆိုခြင်းများ၊ သစ္စာကတိများ၊ စီရင်ခြင်းများ၊ ချိတ်ဆက်မှုများ၊ အသင်းအဖွဲ့များ သို့မဟုတ် မျှော်လင့်ချက်များသည် သေခြင်းမှ ရှင်ပြန်ထမြောက်ရာနှင့် ယင်းနောက်၌ အစွမ်း၊ တန်ခိုး သို့မဟုတ် အင်အား မရှိ၊ အကြောင်းမူကား ဤရည်ရွယ်ချက်အတွက် ပြုမထားသည့် ခပ်သိမ်းသော သဘောတူညီချက်များသည် လူသားတို့သေသောအခါ အဆုံးသတ်ခြင်းသို့ ရောက်၏။

၈ ရှုလော့၊ ငါ၏အိမ်သည် အစီအစဉ်တကျရှိသောအိမ်ဖြစ်၏၊ ရှုပ်ထွေးသောအိမ်မဟုတ်ဟု ကိုယ်တော်ရှင်ဘုရားသခင်မိန့်တော်မူလေ၏။

၉ ငါ၏နာမတော်ဖြင့် ပြုမထားသည့် ပူဇော်သက္ကာကို ငါလက်ခံလိမ့်မည်လောဟု ကိုယ်တော်ရှင်မိန့်တော်မူလေ၏။

၁၀ သို့မဟုတ် ငါခန့်အပ်မထားလေသောအရာကို သင့်တို့လက်မှ ငါလက်ခံလိမ့်မည်လော။

၁၁ သင်တို့ထံသို့ ငါနှင့် ငါ့ခမည်းတော် ကမ္ဘာမတည်ရှိမီက၊ ခန့်ထားခဲ့သကဲ့သို့ပင်၊ ဥပဒေအားဖြင့်မှတစ်ပါး၊ သင်တို့ကို ငါခန့်အပ်လိမ့်မည်လောဟု ကိုယ်တော်ရှင်မိန့်တော်မူ၏။

၁၂ ငါသည် သင်တို့၏ ဘုရားသခင်ကိုယ်တော်ရှင် ဖြစ်၏။ ငါ့အားဖြင့် သို့မဟုတ် ငါ၏ ဥပဒေဖြစ်သည့် ငါ၏ နှုတ်ကပတ်တော် အားဖြင့် မှတစ်ပါး၊ အဘယ်သူမျှ ခမည်းတော်ထံသို့ မလာရဟူသော—ဤပညတ်တော်ကို သင်တို့အား ငါပေး၏ဟု ကိုယ်တော်ရှင်မိန့်တော်မူ၏။

၁၃ လောကထဲ၌ရှိသည့်အရာတိုင်း၊ လူသားအားဖြင့်၊ ပလ္လင်တို့အားဖြင့်၊ သို့မဟုတ် မင်းသားအုပ်ချုပ်ခံရာများ၊ သို့မဟုတ် တန်ခိုးများ၊ သို့မဟုတ် အဘယ်သို့ဖြစ်စေ အမည် ထင်ရှားသည့် အရာများအားဖြင့် ခန့်ထား ခံရသည်ဖြစ်စေ၊ ထိုအရာတို့သည် ငါ့အားဖြင့်မဟုတ်၊ ငါ၏ နှုတ်ကပတ်တော် အားဖြင့်လည်း မဟုတ်ဟု ကိုယ်တော်ရှင် မိန့်တော်မူ၏၊ ထိုအရာတို့သည် ပစ်ချ ခံရ လိမ့်မည်၊ လူသားတို့ သေပြီးနောက်၌လည်း ဆက်၍မရှိရ၊ ရှင်ပြန်ထမြောက်ခြင်း၌သော်လည်းကောင်း၊ နောက်၌သော်လည်းကောင်း မရှိရဟု သင်တို့၏ ဘုရားသခင်ကိုယ်တော်ရှင်မိန့်တော်မူ၏။

၁၄ အကြောင်းမူကား၊ ဆက်၍ရှိသည့် အရာမှန်သမျှသည် ငါ့အားဖြင့် ဖြစ်၏။ ငါ့အားဖြင့် မဟုတ်သော အရာမှန်သမျှသည် လှုပ်၍ဖျက်ဆီးခံရလိမ့်မည်။

၁၅ ထို့ကြောင့်၊ လူတစ်ယောက်သည် လောကထဲ၌ ဇနီးတစ်ယောက်ကို အိမ်ထောင်ဖက်ပြု၍၊ ငါ့အားဖြင့် မဟုတ်၊ ငါ၏ နှုတ်ကပတ်တော် အားဖြင့်လည်း မဟုတ်ဘဲ သူမကို အိမ်ထောင်ဖက်ပြု၍၊ ထိုသူသည် လောကထဲ၌ ရှိနေသမျှ၊ သူမသည်လည်း ထိုသူနှင့် အတူရှိ၍ ပဋိညာဉ်ပြုလျှင်၊ သူတို့၏ ပဋိညာဉ်နှင့် အိမ်ထောင်ဖက်ပြုခြင်းသည် သူတို့သေသောအခါ၌၊ ထို့အတူ လောကအပြင်ဘက်သို့ သူတို့ရောက်သောအခါ၌ စွမ်းအားမရှိတော့။ ထို့ကြောင့်သူတို့သည် လောက အပြင်ဘက်သို့ ရောက်သော အခါ၌ အဘယ်ဥပဒေနှင့်မျှ ပေါင်းစည်းမထားပေ။

၁၆ ထို့ကြောင့်၊ သူတို့သည် လောက အပြင်ဘက်သို့ ရောက်သောအခါ၊ အိမ်ထောင်ဖက် မပြုကြ၊ အိမ်ထောင်ဖက် ပြုခြင်းလည်း မခံကြရ။ သို့ရာတွင်၊ ကောင်းကင်ဘုံ၌ ခန့်အပ်ထားသော ကောင်းကင်တမန်များ ဖြစ်ကြ၏၊ ထိုကောင်းကင်တမန်တို့သည် ကြီးစွာသော၊ ထာဝရ ဘုန်းအသရေနှင့် အတိုင်းထက်အလွန် ထိုက်တန်သူများသို့ အမှုတော်ဆောင်ကျွန်များ ဖြစ်ကြ၏။

၁၇ အကြောင်းမူကား၊ ဤကောင်းကင်တမန်တို့သည် ငါ၏ဥပဒေအတိုင်းမနေထိုင်ကြ။ ထို့ကြောင့်၊ သူတို့သည် မတိုးပွားနိုင်ကြ၊ သို့ရာတွင်၊ ကွဲပြားစွာနှင့် အထီးကျန်စွာရှိပြီးလျှင်၊ ချီးမြှောက်ခြင်းမရှိဘဲနှင့်၊ သူတို့၏ ကယ်တင်ခြင်းသို့ ရောက်ရာအခြေအနေ၌ ထာဝရကာလတစ်ခုလုံးအထိ ဆက်၍ရှိကြ၏။ ထို့အတူ ယခုမှစ၍ ဘုရားများ မဟုတ်ကြ၊ ဘုရားသခင်၏ ကောင်းကင်တမန်များသာ ကာလအစဉ်အဆက် အမြဲဖြစ်ကြ၏။

၁၈ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ လူတစ်ယောက်သည် ဇနီးတစ်ယောက်ကို အိမ်ထောင်ဖက်ပြု၍၊ ယခုကာလနှင့် ထာဝရကာလတစ်ခုလုံးအတွက် သူမနှင့် ပဋိညာဉ်ပြုလျှင်၊ ထိုပဋိညာဉ်သည် ငါ့အားဖြင့်မဟုတ်၊ ငါ၏ဥပဒေဖြစ်သည့် ငါ၏နှုတ်ကပတ်တော်အားဖြင့်လည်း မဟုတ်၊ ထို့အတူ ဤတန်ခိုးသို့ ငါဆီလိမ်း၍ ခန့်အပ်ပြီး၊ ခန့်အပ်ထားသောသူအားဖြင့်၊ ကတိတော်နှင့်ယှဉ်သော သန့်ရှင်းသောဝိညာဉ်တော်အားဖြင့် တံဆိပ်ခတ် မထားလျှင်၊ သူတို့သည် ငါ့အားဖြင့် ပေါင်းစည်းမထား၊ ငါ့နှုတ်ကပတ်တော်အားဖြင့်လည်း မဟုတ်သောကြောင့် လောကအပြင်ဘက်သို့ ရောက်သောအခါ၊ တရားမဝင်၊ စွမ်းအားလည်းမရှိဟု ကိုယ်တော်ရှင်မိန့်တော်မူ၏။ သူတို့သည် လောကအပြင်ဘက်သို့ ရောက်သောအခါ၊ ထိုနေရာ၌ သူတို့ မကျော်ဖြတ်နိုင်ရာ ကောင်းကင်တမန်များနှင့် ဘုရားများကို ခန့်အပ်ထားသောကြောင့်၊ ထိုပဋိညာဉ်ကို မရရှိနိုင်ကြ။ ထို့ကြောင့်၊ သူတို့သည် ငါ၏ ဘုန်းအသရေကို အမွေမခံနိုင်ကြ။ အကြောင်းမူကား၊ ငါ၏အိမ်တော်သည် အစီအစဉ်တကျရှိသော အိမ်တော်ဖြစ်၏ဟု ကိုယ်တော်ရှင်ဘုရားသခင်မိန့်တော်မူလေ၏။

၁၉ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ လူတစ်ယောက်သည် ဇနီးတစ်ယောက်ကို ငါ၏ဥပဒေဖြစ်သည့် ငါ၏နှုတ်ကပတ်တော်အားဖြင့်၊ ထို့အတူ ထာဝရတည်မြဲသော ပဋိညာဉ်သစ်အားဖြင့်၊ အိမ်ထောင်ဖက်ပြု၍၊ ဤတန်ခိုးနှင့် ဤယဇ်ပုရောဟိတ်အခွင့်သော့များသို့ ငါဆီလိမ်း၍ ခန့်အပ်ပြီး၊ ခန့်အပ် ထားသောသူအားဖြင့်၊ ကတိတော်နှင့်ယှဉ်သော သန့်ရှင်းသောဝိညာဉ်တော် အားဖြင့်၊ တံဆိပ်ခတ်ထားလျှင်၊ သူတို့ကို ဆိုရမည်ကား—သင်တို့သည် ပထမရှင်ပြန်ထမြောက်ခြင်း၌ ထွက်လာကြ လိမ့်မည်။ ပထမရှင်ပြန်ထမြောက်ခြင်း နောက်မှဖြစ်လျှင်၊ နောက် ရှင်ပြန် ထမြောက်ခြင်း၌ ဖြစ်၏။ ပလ္လင်များ၊ နိုင်ငံများ၊ မင်းသားအုပ်ချုပ်ခံရာများ၊ ထို့အတူ တန်ခိုးများ၊ အစိုးရခြင်းများ၊ အမြင့်၊ အနိမ့်ခပ်သိမ်းတို့ကိုလည်း အမွေခံရလိမ့်မည်—ထို့နောက်တွင်၊ သူသည် အပြစ်မရှိသောသူ၏ အသွေးကို သွန်းလောင်းသည့် လူ့အသက်သတ်ခြင်းကို မကျူးလွန်ရမည့် အကြောင်း သိုးသငယ်၏ အသက်စာစောင်၌ ရေးထားလိမ့်မည်၊ သင်တို့သည် ငါ၏ ပဋိညာဉ်အတိုင်း နေထိုင်၍၊ ထို့အတူ အပြစ်မရှိသောသူ၏ အသွေးကို သွန်းလောင်းသည့် လူ့အသက်သတ်ခြင်းကို မကျူးလွန်လျှင်၊ သူတို့အပေါ်၌ ငါ၏ကျွန် ထားလေသည့် ခပ်သိမ်းသောအရာတို့သည် သူတို့အဖို့ ယခုကာလနှင့် ထာဝရကာလတစ်ခုလုံး ဖြစ်လိမ့်မည်။ သူတို့ လောကအပြင်ဘက်သို့ ရောက်သော အခါ၌လည်း စွမ်းအားအပြည့်နှင့် ရှိလိမ့်မည်။ ထိုနေရာ၌ ခန့်ထားသည့် ကောင်းကင်တမန်များ၊ ထို့အတူ ဘုရားများကို ကျော်ဖြတ်၍၊ ခပ်သိမ်းသောအရာတို့၌ သူတို့၏ချီးမြှောက်ခြင်းနှင့် ဘုန်းအသရေသို့ ရောက်ကြလိမ့်မည်။ သူတို့၏ဦးခေါင်းများပေါ်၌ တံဆိပ်ခတ် ထားလေသည့်အတိုင်း၊ ထိုဘုန်းအသရေသည် အမျိုးအနွယ်တို့၏ ပြည့်စုံခြင်းနှင့် အဆက်အဖြစ် ကာလအစဉ်အဆက် အမြဲရှိလိမ့်မည်။

၂၀ ထို့နောက်တွင်၊ သူတို့သည် အဆုံးမရှိသောကြောင့် ဘုရားများဖြစ်လိမ့်မည်။ ထို့ကြောင့်၊ သူတို့သည် ဆက်၍ရှိသဖြင့် ထာဝရတည်မြဲခြင်းမှ ထာဝရတည်မြဲခြင်းသို့ ရှိလိမ့်မည်။ ထို့နောက်တွင်၊ ခပ်သိမ်းသောအရာတို့သည် သူတို့၏ဩဇာခံများဖြစ်ကြသောကြောင့် သူတို့သည် ခပ်သိမ်းသောအရာတို့၏ အထက်၌ ရှိကြလိမ့်မည်။ ထို့နောက်တွင် သူတို့၌ ခပ်သိမ်းသောတန်ခိုးရှိ၍၊ ကောင်းကင်တမန်တို့သည်လည်း သူတို့၏ဩဇာခံများဖြစ်ကြသောကြောင့် သူတို့သည် ဘုရားများဖြစ်လိမ့်မည်။

၂၁ သင်တို့ကို ငါအမှန်၊ အမှန်ဆိုသည်ကား၊ သင်တို့သည် ငါ၏ဥပဒေအတိုင်း မနေထိုင်ကြလျှင်၊ ဤဘုန်းအသရေကို မရရှိနိုင်ကြ။

၂၂ အကြောင်းမူကား၊ ချီးမြှောက်ခြင်းနှင့် ဘဝများအဆက်ဖြစ်ခြင်းသို့ ရောက်သည့် တံခါးသည် ကျပ်တည်း၍၊ လမ်းသည် ကျဉ်းမြောင်းသည်ဖြစ်၍၊ တွေ့ဝင်သောသူနည်း၏၊ သင်တို့သည် လောကထဲ၌ ငါ့ကို လက်ခံခြင်းမရှိကြသောကြောင့်၊ ငါ့ကို သိလည်းမသိကြသောကြောင့်ပေတည်း။

၂၃ သို့ရာတွင်၊ သင်တို့သည် လောကထဲ၌ ငါ့ကို လက်ခံကြလျှင်၊ ထို့နောက်တွင် ငါ့ကို သိကြလိမ့်မည်၊ သင်တို့၏ ချီးမြှောက်ခြင်းကိုလည်း ရရှိကြလိမ့်မည်။ ငါရှိသည့်နေရာ၌ သင်တို့ရှိနိုင်ကြစေခြင်းငှာပေတည်း။

၂၄ ဤအရာသည် ထာဝရအသက်များဖြစ်၏—ဉာဏ်ပညာရှိ၍ မှန်ကန်သည့် တစ်ပါးတည်းသော ဘုရားသခင်၊ ထို့အတူ သူစေလွှတ်တော်မူလေသည့် ယေရှုခရစ်တော်ကို သိဖို့ဖြစ်၏။ ငါသည် ထိုသူဖြစ်၏။ ထို့ကြောင့်၊ သင်တို့သည် ငါ၏ဥပဒေကို လက်ခံကြလော့။

၂၅ သေခြင်းသို့ ရောက်သောတံခါးသည် ကျယ်ဝန်း၍၊ လမ်းသည် ကျယ်၍၊ ထိုတံခါးမှ သွားလာသူများ၏၊ သူတို့သည် ငါ့ကို လက်ခံခြင်းမရှိကြသောကြောင့်၊ ငါ၏ဥပဒေအတိုင်း နေလည်း မနေထိုင်ကြသောကြောင့်ပေတည်း။

၂၆ သင်တို့ကို ငါအမှန်၊ အမှန်ဆိုသည်ကား၊ လူတစ်ယောက်သည် ဇနီးတစ်ယောက်ကို ငါ၏ နှုတ်ကပတ်တော် အတိုင်း အိမ်ထောင်ဖက်ပြု၍၊ သူတို့သည် ကတိတော်နှင့်ယှဉ်သော သန့်ရှင်းသောဝိညာဉ်တော်အားဖြင့် ငါ၏ စီရင်ချက်အတိုင်း တံဆိပ်ခတ်ခံရ၍၊ သူ သို့မဟုတ် သူမသည် ထာဝရ တည်မြဲသော ပဋိညာဉ်သစ်နှင့် စပ်လျဉ်း၍ အဘယ်အပြစ် သို့မဟုတ် လွန်ကျူးခြင်းကို မဆို၊ ထို့အတူ ဘုရားကို ပြစ်မှားသည့် အမျိုးမျိုးသော အပြစ်များကို ကျူးလွန်လျှင်၊ ထို့အတူ သူတို့သည် အပြစ်မရှိသောသူ၏ အသွေးကို သွန်းလောင်းသည့် လူ့အသက်သတ်ခြင်းကို မကျူးလွန်လျှင်၊ ပထမရှင်ပြန်ထမြောက်ခြင်း၌ ထွက်လာကြဦးမည်၊ သူတို့၏ ချီးမြှောက်ခြင်းသို့လည်း ဝင်ကြဦးမည်။ သို့ရာတွင်၊ သူတို့သည် ကိုယ်ခန္ဓာ၌ ဖျက်ဆီးခံကြရလိမ့်မည်။ ထို့အတူ ရွေးနုတ်ခြင်း နေ့ရက်အထိ စာတန်၏ညှဉ်းပန်းနှိပ်စက်ခြင်းသို့ လွှဲအပ်ခံရလိမ့်မည်ဟု ကိုယ်တော်ရှင်ဘုရားသခင် မိန့်တော်မူလေ၏။

၂၇ လောကထဲ၌ သော်လည်းကောင်း၊ လောကအပြင်ဘက်၌ သော်လည်းကောင်း ခွင့်လွှတ် မခံရမည့် အပြစ်တည်းဟူသော၊ သန့်ရှင်းသောဝိညာဉ်တော်ကို ဆန့်ကျင်၍ ဘုရားကို ပြစ်မှားသည့် အပြစ်၌၊ သင်တို့သည် ငါ၏ထာဝရတည်မြဲသော ပဋိညာဉ်သစ်ကို ရရှိပြီးနောက် အပြစ်မရှိသောသူ၏ အသွေးကို သွန်းလောင်းသည့် လူ့အသက်သတ်ခြင်းကို ကျူးလွန်ခြင်း၊ ထို့အတူ ငါ၏သေခြင်းသို့ တိုင်အောင် အခွင့်ပေးခြင်း ပါဝင်၏ဟု ကိုယ်တော်ရှင်ဘုရားသခင် မိန့်တော်မူလေ၏။ ဤဥပဒေအတိုင်း နေထိုင်ခြင်းမရှိသောသူသည် ငါ၏ဘုန်းတော်သို့ အလျှင်းမဝင်ရောက်နိုင်၊ သို့ရာတွင် အပြစ်စီရင်ခံရလိမ့်မည်ဟု ကိုယ်တော်ရှင်မိန့်တော်မူ၏။

၂၈ ငါသည် သင်တို့၏ ဘုရားသခင်ကိုယ်တော်ရှင်ဖြစ်၏၊ ငါနှင့် ငါ့ခမည်းတော် အားဖြင့် ကမ္ဘာမတည်ရှိမီက ခန့်ထားလေသည့်အတိုင်း သင်တို့အား ငါ၏ သန့်ရှင်းသော ယဇ်ပုရောဟိတ် အခွင့်၏ ဥပဒေကိုလည်း ပေးတော်မူမည်။

၂၉ အာဗြဟံသည် ခပ်သိမ်းသောအရာတို့ကို ရရှိ၏၊ သူရရှိသည့် အရာမှန်သမျှသည် ငါ၏ နှုတ်ကပတ်တော် အားဖြင့်ရောက်လာသည့် ဗျာဒိတ်တော်နှင့် ပညတ်တော်အားဖြင့် ရရှိသည်ဟု ကိုယ်တော်ရှင်မိန့်တော်မူ၏၊ ထို့အတူ သူ၏ချီးမြှောက်ခြင်းသို့ဝင်လေပြီးလျှင်၊ သူ၏ပလ္လင်ပေါ်၌ထိုင်၏။

၃၀ အာဗြဟံသည် သူ၏ အမျိုးအနွယ်နှင့် စပ်လျဉ်း၍၊ ထို့အတူ သူ၏ ရင်သွေး—သူ၏ရင်သွေးဖြစ်သည့် သင်၊ အမည်အားဖြင့် ငါ့ကျွန်ဂျိုးဇက်—နှင့်စပ်လျဉ်း၍ ကတိတော်များကို ရရှိ၏၊ ထိုအမျိုးအနွယ်တို့သည် လောကထဲ၌ ရှိလေသမျှ ဆက်၍ရှိနေလိမ့်မည်။ အာဗြဟံ၊ သူ၏အမျိုးအနွယ်တို့နှင့် စပ်လျဉ်း၍၊ လောကအပြင်ဘက်၌လည်း သူတို့သည် ဆက်၍ရှိလိမ့်မည်။ လောကထဲ၌ သော်လည်းကောင်း၊ လောကအပြင်ဘက်၌ သော်လည်းကောင်း သူတို့သည် နှစ်ခုစလုံး၌ ကြယ်များကဲ့သို့ မရေတွက်နိုင်အောင်ဆက်၍ ရှိလိမ့်မည်။ သို့မဟုတ်၊ သင်တို့သည် ပင်လယ်ကမ်းနားပေါ်၌ သဲလုံးကိုရေတွက်ရလေသည့်ပမာ သူတို့ကို မရေတွက်နိုင်ကြ။

၃၁ ဤကတိတော်သည် သင်တို့အရာလည်းဖြစ်၏၊ သင်တို့သည် အာဗြဟံ၏ အမျိုးအနွယ်များ ဖြစ်သောကြောင့်ပေတည်း၊ ကတိတော်ကိုလည်း အာဗြဟံသို့ ပေးထားလေပြီ။ ဤဥပဒေအားဖြင့်၊ ငါ့ခမည်းတော်၏ အမှုတော် အဆက်ရှိ၍၊ ထိုကဲ့သို့အားဖြင့် သူသည် မိမိကိုယ်ကိုဘုန်းထင်ရှားစေ၏။

၃၂ ထို့ကြောင့်၊ သင်တို့သွားကြလော့၊ အာဗြဟံ၏အမှုတို့ကို လုပ်ဆောင်ကြလော့။ သင်တို့သည် ငါ၏ ဥပဒေထဲသို့ ဝင်ကြလော့၊ ကယ်တင်ခြင်းသို့ ရောက်ကြလိမ့်မည်။

၃၃ သို့ရာတွင်၊ သင်တို့သည် ငါ၏ဥပဒေထဲသို့ မဝင်ကြလျှင်၊ အာဗြဟံသို့ ငါ၏ခမည်းတော် ပြုခဲ့သည့် ကတိတော်ကို မရရှိနိုင်ကြ။

၃၄ ဘုရားသခင်သည် အာဗြဟံကို မိန့်တော်မူခဲ့၏၊ စာရာသည်လည်း အာဗြဟံကို ဟာဂရနှင့် ပေးစား၏။ သူမသည် အဘယ်ကြောင့် ထိုအမှုကို ပြုသနည်း။ ဤအရာသည် ဥပဒေ ဖြစ်သောကြောင့် ပေတည်း။ ဟာဂရမှနေ၍လည်း များစွာသောလူမျိုးတို့ ပေါက်ဖွားကြ၏။ ထို့ကြောင့်၊ ဤအမှုသည် အခြားအရာတို့နှင့်အတူ၊ ကတိတော်တို့ကို ပြီးပြည့်စုံစေ၏။

၃၅ ထို့ကြောင့်၊ အာဗြဟံသည် ပြစ်ဒဏ်ချမှတ်ခြင်းအောက်၌ ရှိလေသလော။ မဟုတ်ပေဟု သင်တို့ကို ငါအမှန်ဆို၏။ အကြောင်းမူကား၊ ထိုအမှုကို ငါ၊ ကိုယ်တော်ရှင်မိန့်တော်မူခဲ့၏။

၃၆ အာဗြဟံသည် သူ၏သားဣဇာက်ကို ပူဇော်ရန် မိန့်တော်မူခံရ၏။ သို့သော်လည်း၊ သင်သည် လူ့အသက်ကို မသတ်ရဟု ရေးထားလေပြီ။ အာဗြဟံသည်၊ အဘယ်သို့ပင်ဖြစ်စေ၊ မငြင်းပယ်ခဲ့၊ သူ့အဖို့ ထိုအမှုကို ဖြောင့်မတ်ခြင်းဟု မှတ်ယူလေ၏။

၃၇ အာဗြဟံသည် မယားငယ်တို့ကို ရရှိ၏။ သူတို့သည်လည်း သူ့အဖို့ သားသမီးတို့ကို ဖွားမြင်ကြ၏။ ထိုအမှုကိုလည်း သူ့အဖို့ ဖြောင့်မတ်ခြင်းဟု မှတ်ယူ၏၊ သူတို့ကို သူ့အား ပေးထားသောကြောင့်ပေတည်း၊ သူသည်လည်း ငါ၏ဥပဒေအတိုင်း နေထိုင်၏။ ဣဇာက်နှင့် ယာကုပ်တို့သည်လည်း မိန့်တော်မူခံရသည့် အရာမှတစ်ပါး အခြားအဘယ်အရာကိုမျှမလုပ်ဆောင်ကြ။ သူတို့သည် မိန့်တော်မူခံရသည့် အရာမှတစ်ပါး အခြား အဘယ်အရာကိုမျှ မလုပ်ဆောင်ကြ သောကြောင့်၊ ကတိတော်တို့အတိုင်း သူတို့၏ချီးမြှောက်ခြင်းသို့ ဝင်ကြလေပြီ၊ ပလ္လင်များပေါ်၌လည်း ထိုင်ကြ၏၊ ကောင်းကင်တမန်များမဟုတ်ကြ၊ သို့ရာတွင် ဘုရားများ ဖြစ်ကြ၏။

၃၈ ဒါဝိဒ်သည်လည်း များစွာသောဇနီးများနှင့် မယားငယ်များကို ရရှိခဲ့၏၊ ငါ့ကျွန်များဖြစ်သည့် ရှောလမုန်နှင့် မောရှေတို့သည်လည်း၊ ဖန်ဆင်းခြင်း၏ အစကတည်းက ယခုအချိန်အထိရှိသော အခြားများစွာသော ငါ့ကျွန်တို့နည်းတူ ရရှိကြ၏။ ငါ့ထံမှ ရရှိသည် မဟုတ်သော အရာတို့မှတစ်ပါး၊ အဘယ်အရာ၌မျှ သူတို့အပြစ်မပြုကြ။

၃၉ ဒါဝိဒ်၏ ဇနီးများနှင့် မယားငယ်များကို ငါ့ထံမှ သူ့ဆီသို့၊ ငါ့ကျွန်၊ နာသန်၏ လက်အားဖြင့်၊ ထို့အတူ ဤတန်ခိုး၏ သော့ရှိသူများတည်းဟူသော ပရောဖက်များထဲမှ အခြားသူတို့အားဖြင့် ပေးထား၏။ ဥရိယနှင့် သူ၏ဇနီး အမှုတွင်မှတစ်ပါး၊ သူသည် ဤအရာတို့၌ အဘယ်အရာကိုမျှ ငါ့ကို ဆန့်ကျင်၍ အပြစ်မပြု။ ထို့ကြောင့်၊ သူသည် သူ၏ချီးမြှောက်ခြင်းမှ ကျရှုံးလေပြီးလျှင်၊ သူ၏ဝေစုကို ရရှိ၏။ ထို့အတူ သူသည် လောကအပြင်ဘက်၌ ၎င်းတို့ကို အမွေမခံရ၊ အကြောင်းမူကား၊ ငါသည် ၎င်းတို့ကို တခြားသူအား ပေး၏ဟု ကိုယ်တော်ရှင်မိန့်တော်မူ၏။

၄၀ ငါသည် သင်၏ ဘုရားသခင်ကိုယ်တော်ရှင်ဖြစ်၏၊ ထို့အတူ ငါသည်၊ ငါ့ကျွန်ဂျိုးဇက်၊ သင့်အား၊ တာဝန်တစ်ခုကို ပေး၏၊ ခပ်သိမ်းသောအရာတို့ကိုလည်း ပြန်လည်ဆောင်ယူပေး၏။ သင်အလိုရှိသည့် အရာကို တောင်းလော့၊ ငါ၏နှုတ်ကပတ်တော်အတိုင်း သင့်အား ပေးတော်မူမည်။

၄၁ သူ့သားမယားအားပြစ်မှားခြင်းနှင့် စပ်လျဉ်း၍ သင်မေးသဖြင့် သင့်ကို ငါအမှန်၊ အမှန် ဆိုသည်ကား၊ လူတစ်ယောက်သည် ဇနီးတစ်ယောက်ကို ထာဝရတည်မြဲသော ပဋိညာဉ်သစ်အတိုင်းရရှိလျှင်၊ ထိုသူမသည်လည်း တခြားယောက်ျားတစ်ယောက်နှင့် အတူနေ၍၊ သူမအား သန့်ရှင်းသော ဆီလိမ်းခန့်အပ်ခြင်းဖြင့် ငါခန့်အပ်မထားလေလျှင်၊ သူမသည် သူ့သားမယားအား ပြစ်မှားခြင်းကို ကျူးလွန်၍ ဖျက်ဆီး ခံရလိမ့်မည်။

၄၂ ထိုသူမသည် ထာဝရတည်မြဲသောပဋိညာဉ်သစ်အတိုင်းမရှိ၊ တခြားယောက်ျား တစ်ယောက်နှင့်လည်း အတူနေလျှင်၊ သူ့သားမယားအား ပြစ်မှားခြင်းကို ကျူးလွန်လေပြီ။

၄၃ ထိုသူမ၏ ခင်ပွန်းသည်လည်း တခြားမိန်းမတစ်ယောက်နှင့် အတူနေလျှင်၊ ထိုသူသည် သစ္စာကတိ အောက်၌ရှိလျက်၊ မိမိသစ္စာကတိကို ဖောက်ဖျက်၍၊ သူ့သားမယားအား ပြစ်မှားခြင်းကို ကျူးလွန်လေပြီ။

၄၄ ထိုသူမသည် သူ့သားမယားအား ပြစ်မှားခြင်းကို မကျူးလွန်ဘဲ အပြစ်လည်းမရှိ၊ မိမိသစ္စာကတိကိုလည်း မဖောက်ဖျက်၊ ထိုသို့ဖြစ်ခြင်းကိုလည်း သိလျှင်၊ ငါသည် သင့်အား ထိုအမှုကို ဖော်ပြ၏၊ ငါ့ကျွန်ဂျိုးဇက်၊ ထို့နောက်တွင် သင်သည် ငါ၏သန့်ရှင်းသော ယဇ်ပုရောဟိတ်အခွင့်၏ တန်ခိုးအားဖြင့်၊ သူမကို ခေါ်၍ သူ့သားမယားအား ပြစ်မှားခြင်းကို မကျူးလွန် သစ္စာသာရှိလေသော ထိုသူသို့ ပေးရန် တန်ခိုးကို ရရှိလိမ့်မည်။ အကြောင်းမူကား၊ ထိုသူအား များစွာသောသူတို့အပေါ် အုပ်စိုးသူ ဖြစ်စေမည်။

၄၅ အကြောင်းမူကား၊ ငါသည် ခပ်သိမ်းသောအရာတို့ကို ပြန်လည်ဆောင်ယူရာ ယဇ်ပုရောဟိတ် အခွင့် သော့များနှင့် တန်ခိုးကို၊ သင့်အပေါ် အပ်နှင်း၏၊ ခပ်သိမ်းသောအရာတို့ကိုလည်း ကာလ အချိန်တန်သောအခါ သင့်ကို ဖော်ပြ၏။

၄၆ သင့်ကို ငါအမှန်အမှန်ဆိုသည်ကား၊ မြေကြီးပေါ်၌ သင်တံဆိပ်ခတ်သမျှသည် ကောင်းကင်ဘုံ၌ တံဆိပ်ခတ်လျက် ရှိလိမ့်မည်။ ထို့အတူ ငါ၏နာမတော် အားဖြင့်လည်းကောင်း၊ ငါ၏ နှုတ်ကပတ်တော် အားဖြင့်လည်းကောင်း မြေကြီးပေါ်၌ သင်စည်းနှောင်သမျှသည် ကောင်းကင်ဘုံ၌ အစဉ်ထာဝရ စည်းနှောင်လျက် ရှိလိမ့်မည်ဟု ကိုယ်တော်ရှင်မိန့်တော်မူ၏။ ထို့အတူ မြေကြီးပေါ်၌ သင်လွှတ် သမျှသော သူ၏အပြစ်များသည် ကောင်းကင်ဘုံ၌ အစဉ်ထာဝရအလွှတ်ခံရလျက်ရှိလိမ့်မည်။ ထို့အတူ မြေကြီးပေါ်၌ သင်တည်စေသည့် အဘယ်သူ၏အပြစ်များကိုမဆို ကောင်းကင်ဘုံ၌ တည်စေလိမ့်မည်။

၄၇ ထိုမှတစ်ဖန်၊ ငါအမှန်ဆိုသည်ကား၊ သင်ကောင်းချီးပေးမည့်သူ မှန်သမျှကို ငါကောင်းချီးပေးတော်မူမည်၊ သင်ကျိန်မည့်သူမှန်သမျှကိုလည်း ငါကျိန်တော်မူမည်ဟု ကိုယ်တော်ရှင် မိန့်တော်မူ၏။ အကြောင်းမူကား၊ ငါ၊ ကိုယ်တော်ရှင်သည်၊ သင်၏ဘုရားသခင်ဖြစ်၏။

၄၈ ထိုမှတစ်ဖန်၊ သင့်ကို ငါအမှန်ဆိုသည်ကား၊ ငါ့ကျွန်ဂျိုးဇက်၊ ငါ၏နှုတ်ကပတ်တော်အားဖြင့်၊ ငါ၏ဥပဒေအတိုင်း မြေကြီးပေါ်၌ သင် ပေးသူမှန်သမျှ၊ ထို့အတူ မြေကြီးပေါ်၌ တစ်စုံတစ်ဦးကို သင် ပေးသူမှန်သမျှသည် ကောင်းချီးမင်္ဂလာတို့နှင့် အကြည့်အရှုကြွရောက်ခံရလိမ့်မည်၊ ကျိန်ခြင်းအမင်္ဂလာတို့နှင့်မဟုတ်၊ ငါ၏တန်ခိုးတော်နှင့် ဖြစ်လိမ့်မည်ဟု ကိုယ်တော်ရှင်မိန့်တော်မူ၏၊ မြေကြီးပေါ်နှင့် ကောင်းကင်ဘုံ၌ ပြစ်ဒဏ်ချမှတ်ခြင်း မရှိဘဲနှင့်လည်း ရှိလိမ့်မည်။

၄၉ အကြောင်းမူကား၊ ငါသည် သင်၏ ဘုရားသခင်ကိုယ်တော်ရှင် ဖြစ်တော်မူ၏၊ ကမ္ဘာကုန်သည့် တိုင်အောင်ပင် ထာဝရကာလ တစ်လျှောက်လုံး သင်နှင့်အတူ ရှိတော်မူမည်။ အကြောင်းမူကား၊ ငါသည် သင်၏ချီးမြှောက်ခြင်းကို သင့်အပေါ်အမှန်တံဆိပ်ခတ်၍၊ ပလ္လင်တစ်ခုကို ငါ့ခမည်းတော်၏ နိုင်ငံတော်၌၊ သင်၏ ဘိုးဘေးအာဗြဟံနှင့်အတူ သင့်အတွက်ပြင်ဆင်၏။

၅၀ ရှုလော့၊ ငါသည် သင်၏ယဇ်တို့ကို မြင်လေပြီ၊ သင်၏ခပ်သိမ်းသောအပြစ်တို့ကိုလည်း ခွင့်လွှတ်မည်။ သင့်ကို ငါမိန့်တော်မူလေသည့် အရာကို နာခံခြင်း၌သင်၏ ယဇ်တို့ကို ငါမြင်လေပြီ။ ထို့ကြောင့်၊ သွားလော့၊ အာဗြဟံမှ သူ၏သား ဣဇာက်အား ပူဇော်ခြင်းကို ငါလက်ခံသကဲ့သို့ပင် ငါသည် သင်၏ လွတ်မြောက်ခြင်းအတွက် နည်းလမ်းကို ပြုတော်မူ၏။

၅၁ သင့်ကို ငါအမှန်ဆိုသည်ကား၊ ပညတ်တော်တစ်ခုကို သင့်အား ငါပေးလေသည့် သင်၏ဇနီးအီမာစမစ်၊ ငါ၏ကျွန်မအား ငါပေးသည်မှာ သူမကိုယ်သူမရှောင်ကြဉ်ရန်နှင့် သူမအား ပေးရန် သင့်ကို ငါမိန့်တော်မူခဲ့သည့်အရာကို သုံးစွဲခြင်းမပြုရန်ပေတည်း။ အကြောင်းမူကား၊ ထိုအမှုကို ငါပြုတော်မူ၏ဟု ကိုယ်တော်ရှင်မိန့်တော်မူ၏၊ အာဗြဟံကို ငါပြုခဲ့သကဲ့သို့ပင်၊ ငါသည် ပူဇော်သက္ကာတစ်ခုကို ပဋိညာဉ်နှင့် ယဇ်ပူဇော်ခြင်းအားဖြင့်၊ သင်တို့အားလုံးကို စမ်းသပ်ရန် သင်၏လက်မှ တောင်းဆိုနိုင်ခြင်းငှာပေတည်း။

၅၂ ငါ၏ကျွန်မ၊ အီမာစမစ်အား၊ ငါ့ကျွန်ဂျိုးဇက်အား ပေးထားလေသည့်၊ ငါ့ရှေ့၌ ကောင်းမြတ်စွာ ကျင့်၍၊ စင်ကြယ်သူ ခပ်သိမ်းတို့ကို လက်ခံစေလော့၊ မစင်ကြယ်သော်လည်း သူတို့သည် စင်ကြယ်၏ဟု ဆိုလေသောသူတို့သည် ဖျက်ဆီးခံရလိမ့်မည်ဟု ကိုယ်တော်ရှင် ဘုရားသခင် မိန့်တော်မူလေ၏။

၅၃ အကြောင်းမူကား၊ ငါသည် သင်တို့၏ ဘုရားသခင်ကိုယ်တော်ရှင်ဖြစ်တော်မူ၏၊ သင်တို့သည်လည်း ငါ၏အသံကို နာခံရမည်။ ငါသည် ငါ့ကျွန်ဂျိုးဇက်အား များစွာသောအရာတို့အပေါ် အုပ်စိုးသူဖြစ်ရစေခြင်းငှာ အခွင့်ပေး၏။ အကြောင်းမူကား၊ သူသည် အနည်းငယ်သော အရာတို့အပေါ် သစ္စာရှိလေပြီ၊ ယခုမှစ၍ ငါသည် သူ့ကို ခွန်အားဖြည့်ပေးတော်မူမည်။

၅၄ ငါသည် ငါ၏ကျွန်မ၊ အီမာစမစ်အား ငါ့ကျွန်ဂျိုးဇက်၌ တည်၍၊ စွဲမြဲရန်နှင့် အခြားအဘယ်သူ၌ မျှမစွဲမြဲရန် မိန့်မှာ၏။ သို့ရာတွင်၊ သူမသည် ငါ၏ ပညတ်တော်အတိုင်း မနေထိုင်လျှင်၊ ဖျက်ဆီး ခံရလိမ့်မည်ဟု ကိုယ်တော်ရှင် မိန့်တော်မူ၏။ အကြောင်းမူကား၊ ငါသည် သင်၏ ဘုရားသခင် ကိုယ်တော်ရှင် ဖြစ်တော်မူ၏၊ ငါ၏ဥပဒေအတိုင်း နေထိုင်ခြင်းမရှိလျှင် သူမကို ဖျက်ဆီးတော်မူမည်။

၅၅ သို့ရာတွင်၊ သူမသည် ဤပညတ်တော် အတိုင်းမနေထိုင်လျှင်၊ ထို့နောက်တွင် ငါ့ကျွန် ဂျိုးဇက်သည် ခပ်သိမ်းသော အရာတို့ကို သူဆိုခဲ့လေသည့် အတိုင်းပင် သူမအတွက် လုပ်ဆောင် လိမ့်မည်။ ငါသည်လည်း သူ့ကို ကောင်းချီးပေး၍၊ သူ့ကို ပွားများစေ၍၊ သူ့အား ဤလောက၌ အဆတစ်ရာတည်းဟူသော၊ အဘများနှင့် အမိများ၊ ညီအစ်ကိုများနှင့် ညီအစ်မများ၊ အိမ်များနှင့် မြေများ၊ ဇနီးများနှင့် ကလေးများ၊ ထို့အတူ ထာဝရလောက၌ ထာဝရအသက်တို့၏ သရဖူများကို ပေးတော်မူ၏။

၅၆ ထိုမှတစ်ဖန်၊ ငါအမှန်ဆိုသည်ကား၊ ငါ၏ကျွန်မအား ငါ့ကျွန်ဂျိုးဇက်၏လွန်ကျူးခြင်းတို့ကို ခွင့်လွှတ်စေလော့။ ထို့နောက်တွင်၊ ငါ့ကို ဆန့်ကျင်၍ သူမ လွန်ကျူးလေရာ သူမ၏လွန်ကျူးခြင်းတို့ ခွင့်လွှတ်ခံရလိမ့်မည်။ ငါ၊ သင်တို့၏ဘုရားသခင်ကိုယ်တော်ရှင်သည် သူမကို ကောင်းချီးပေး၍၊ သူမကို ပွားများစေ၍၊ သူမ၏စိတ်နှလုံးကိုလည်း ရွှင်လန်းဝမ်းမြောက်စေမည်။

၅၇ ထိုမှတစ်ဖန်၊ ငါဆိုသည်ကား၊ ငါ့ကျွန် ဂျိုးဇက်အား၊ သူ၏ ဥစ္စာပစ္စည်းကို သူ့လက်မှ ဝေးရာ၌ မထားစေနှင့်၊ ရန်သူတစ်ဦး ရောက်လာ၍ သူ့ကို မဖျက်ဆီးစေခြင်းငှာပေတည်း။ အကြောင်းမူကား၊ စာတန်သည် ဖျက်ဆီးရန် ကြိုးစားအားထုတ်၏။ အကြောင်းမူကား၊ ငါသည် သင်၏ ဘုရားသခင် ကိုယ်တော်ရှင်ဖြစ်၏၊ သူသည်လည်း ငါ၏ကျွန် ဖြစ်၏။ ရှုဦးလော့၊ ကြည့်ဦးလော့၊ ငါသည် သင်၏ ဘိုးဘေး၊ အာဗြဟံနှင့် အတူရှိလေသကဲ့သို့ပင်၊ သူ၏ ချီးမြှောက်ခြင်းနှင့် ဘုန်းအသရေ အထိပင် သူနှင့်အတူ ရှိတော်မူ၏။

၅၈ ယခုတွင်၊ ယဇ်ပုရောဟိတ်အခွင့်ဥပဒေနှင့်စပ်လျဉ်း၍၊ ၎င်းနှင့်စပ်ဆိုင်သည့် များစွာသောအရာတို့ရှိ၏။

၅၉ လူတစ်ယောက်သည်၊ အာရုန်ကို ကဲ့သို့ပင်၊ ငါကိုယ်တိုင်၏ အသံဖြင့်၊ ထို့အတူ ငါ့ကို စေလွှတ်တော်မူ ခဲ့သည့် သူ၏ အသံအားဖြင့် ခေါ်သွင်းခံရ၍၊ ငါသည်လည်း သူ့ကို ဤယဇ်ပုရောဟိတ်အခွင့်တန်ခိုး၏သော့များနှင့် အပ်နှင်းလေ၍၊ သူသည် အဘယ်အရာကိုမဆို ငါ၏နာမတော်အားဖြင့်၊ ထို့အတူ ငါ၏ ဥပဒေ အားဖြင့် သော်လည်းကောင်း၊ ငါ၏ နှုတ်ကပတ်တော် အားဖြင့် သော်လည်းကောင်း လုပ်ဆောင်လျှင်၊ ထိုသူသည် အပြစ်ကို ကျူးလွန်လိမ့်မည်မဟုတ်၊ ငါသည်လည်း သူ့ကို အပြစ်ကင်းစေမည်။

၆၀ ထို့ကြောင့်၊ အဘယ်သူကိုမျှ ငါ့ကျွန်ဂျိုးဇက်ကို မဝေဖန်စေနှင့်။ အကြောင်းမူကား၊ ငါသည် သူ့ကို အပြစ်ကင်းစေမည်။ သူ၏ လွန်ကျူးခြင်းများ အတွက် သူ့လက်မှ ငါတောင်းဆိုမည့် ယဇ်ကို သူလုပ်ဆောင် လိမ့်မည်ဟု သင်တို့၏ဘုရားသခင်ကိုယ်တော်ရှင် မိန့်တော်မူ၏။

၆၁ ထိုမှတစ်ဖန်၊ ယဇ်ပုရောဟိတ်အခွင့်ဥပဒေနှင့် စပ်ဆိုင်၍—ယောက်ျားတစ်စုံ တစ်ယောက်သည် အပျိုကညာတစ်ယောက်ကို ထိမ်းမြားဆောင်နှင်း၍၊ တခြားတစ်ယောက်ကိုလည်း ထိမ်းမြားဆောင်နှင်းလို၍၊ ပထမဇနီးက သဘောတူလျှင်၊ သူသည်လည်း ဒုတိယဇနီးကို ထိမ်းမြားဆောင်နှင်းလျှင်၊ သူတို့သည် အပျိုကညာများဖြစ်၍၊ အခြားအဘယ်ယောက်ျားနှင့်မျှ သစ္စာကတိမရှိ။ ထိုသို့ဆိုလျှင်၊ သူသည် အပြစ်ကင်းစေ၏။ သူ့အဖို့ အပျိုကညာများ ဖြစ်သောကြောင့် သူသည် သူ့သားမယားအား ပြစ်မှားခြင်းကို မကျူးလွန်နိုင်။ အကြောင်းမူကား၊ သူသည် မိမိနှင့်ဆိုင်သောအရာ၊ အခြားအဘယ်သူနှင့်မျှ မဆိုင်သောအရာနှင့် သူ့သားမယားအား ပြစ်မှားခြင်းကို မကျူးလွန်နိုင်။

၆၂ ဤဥပဒေအတိုင်း အပျိုကညာဆယ်ယောက်ကို သူ့အားပေးထားခံရလျှင်၊ သူသည် သူ့သားမယားအားပြစ်မှားခြင်းကို မကျူးလွန်နိုင်၊ အကြောင်းမူကား သူနှင့်ဆိုင်သောသူများဖြစ်၍၊ သူ့ကို ပေးထား၏။ ထို့ကြောင့် သူသည် အပြစ်ကင်းစေ၏။

၆၃ သို့ရာတွင်၊ တစ်ယောက် သို့မဟုတ် အပျိုကညာဆယ်ယောက်ထဲမှ တစ်ယောက်ယောက်သည် ထိမ်းမြားဆောင်နှင်းပြီးနောက်၊ တခြားယောက်ျား တစ်ယောက်နှင့် အတူနေလျှင် သူ့သားမယားအား ပြစ်မှားခြင်းကို ကျူးလွန်၍ ဖျက်ဆီး ခံရလိမ့်မည်။ အကြောင်းမူကား၊ ငါ၏ပညတ်တော်အတိုင်း၊ ပွားများ၍၊ မြေကြီးကို ပြည့်စေရန်၊ ထို့အတူ ကမ္ဘာမတည်မီက ငါ့ခမည်းတော်ပေးထားလေသည့် ကတိတော်ကို ပြီးပြည့်စုံစေရန်၊ ထို့အတူ ထာဝရလောက၌ သူတို့၏ချီးမြှောက်ခြင်းအတွက်၊ လူသား၏ စိတ်ဝိညာဉ်တို့ကို သူတို့မွေးဖွားကြစေခြင်းငှာ သူ့ထံသို့ ပေးထား၏။ အကြောင်းမူကား၊ ဤအရာ၌၊ ငါ့ခမည်းတော်၏ အမှုတော် ဆက်၍ရှိ၏၊ သူဘုန်းတော် ထင်ရှားနိုင်စေခြင်းငှာပေတည်း။

၆၄ ထိုမှတစ်ဖန်၊ သင်တို့ကို ငါအမှန်၊ အမှန်ဆိုသည်ကား၊ ဤတန်ခိုး၏ သော့များကို ကိုင်ဆောင်သည့် တစ်စုံတစ်ဦးသည် ဇနီးတစ်ယောက်ရှိ၍၊ သူမအား ဤအရာတို့နှင့် စပ်ဆိုင်သည့်၊ ငါ့ယဇ်ပုရောဟိတ်အခွင့်၏ ဥပဒေကို သူမအား သွန်သင်ပေးလျှင်၊ သူမသည် သူ့ကို ယုံကြည်၍ ကူညီထောက်မရမည်၊ သို့မဟုတ်လျှင် သူမသည် ဖျက်ဆီးခံရလိမ့်မည်ဟု သင်တို့၏ ဘုရားသခင် ကိုယ်တော်ရှင်မိန့်တော်မူ၏။ အကြောင်းမူကား၊ ငါသည် သူမကို ဖျက်ဆီးမည်။ ငါ၏ဥပဒေကို လက်ခံ၍ ၎င်းအတိုင်းနေထိုင်သူ ခပ်သိမ်းတို့အပေါ်၌ ငါ၏နာမတော်ကိုချီးမွမ်းတော်မူမည်။

၆၅ ထို့ကြောင့်၊ ငါ့အဖို့ တရား၏၊ သူမသည် ဤဥပဒေကို လက်ခံခြင်းမရှိလျှင်၊ ငါ၏ နှုတ်ကပတ်တော် အတိုင်း သူ့ကို မယုံကြည်၊ မကူညီ မထောက်မသောကြောင့်၊ သူ့အတွက် ရရှိရန် ခပ်သိမ်းသော အရာမှန်သမျှကို ငါ၊ သူ၏ ဘုရားသခင် ကိုယ်တော်ရှင်သည် သူ့အား ပေးတော်မူမည်။ ထို့နောက်တွင်၊ သူမသည် လွန်ကျူးသူဖြစ်လာ၏။ သူသည်လည်း အာဗြဟံကို ဟာဂရအား အိမ်ထောင်ဖက်ပြုရန် ငါမိန့်တော်မူသည့် အချိန်က ဥပဒေအတိုင်း အာဗြဟံကို ကူညီထောက်မခဲ့သည့် စာရာ၏ ဥပဒေမှ ကင်းလွတ်ခွင့်ရ၏။

၆၆ ယခုမူကား၊ ဤဥပဒေနှင့် စပ်ဆိုင်၍၊ သင့်ကို ငါအမှန်၊ အမှန်ဆို သည်ကား၊ ငါသည် သင့်ကို နောင်ကာလ၌ ထပ်၍ ဖော်ပြတော်မူမည်။ ထို့ကြောင့်၊ ယခုမျက်မှောက်၌ ဤအရာနှင့် လုံလောက် စေလော့။ ရှုလော့၊ ငါသည် အာလဖနှင့် ဩမေဃ ဖြစ်၏။ အာမင်။