ဩဝါဒနှင့် ပဋိညာဉ်များ ၁၀၇

အပိုဒ်ငယ် ၁၀၇

၁၈၃၅ ခု၊ ဧပြီခန့်၊ ကာ့တ်လန်း၊ အိုဟိုင်းရို၌ ယဇ်ပုရောဟိတ်အခွင့်နှင့် စပ်လျဉ်း၍၊ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့်ဗျာဒိတ်တော်။ ဤအပိုဒ်ငယ်ကို ၁၈၃၅ ခုတွင် မှတ်တမ်းတင်ခဲ့သော်လည်း အခန်းငယ် ၆၀ မှ ၁၀၀ အထိမှ အများဆုံးမှာ ၁၈၃၁ ခု၊ နိုဝင်ဘာ ၁၁ တွင် ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်နှင့် ပေါင်းစပ်ထားကြောင်း သမိုင်းဆိုင်ရာမှတ်တမ်းများက အတည်ပြု၏။ ဤအပိုဒ်ငယ်သည် ၁၈၃၅ ခု ဖေဖော်ဝါရီနှင့် မတ်တွင် တစ်ဆယ့်နှစ်ပါးအဖွဲ့ အဖွဲ့အစည်းနှင့် ဆက်စပ်ခဲ့၏။ ပထမဆုံးအဖွဲ့သာသနာပြုခြင်း အဖြစ် ၁၈၃၅ ခု၊ မေ ၃ တွင် ထွက်ခွာရန် ပြင်ဆင်လျက်ရှိသောသူတို့၏ မျက်မှောက်တွင် ထိုအရာကို ပရောဖက်က ဟောပြောခဲ့ဖွယ်ရှိ၏။

၁–၆၊ မေလခိဇေဒက်နှင့် အာရုန် ယဇ်ပုရောဟိတ်အခွင့် နှစ်ခုရှိ၏။ ၇–၁၂၊ မေလခိဇေဒက် ယဇ်ပုရောဟိတ်အခွင့်ကို ကိုင်ဆောင်သူတို့တွင် အသင်းတော်၏ ခပ်သိမ်းသောအမှုအရာတို့ကို အမှုဆောင်ရွက်ရန် အခွင့်ရှိကြ၏။ ၁၃–၁၇၊ သင်းအုပ်နှင့် အတိုင်ပင်ခံအဖွဲ့သည် အပြင်ပိုင်း ဘိသိက်မင်္ဂလာများကို စီမံဆောင်ရွက်သည့် အာရုန်ယဇ်ပုရောဟိတ်အခွင့်ကို ဦးစီး၏။ ၁၈–၂၀၊ မေလခိဇေဒက်ယဇ်ပုရောဟိတ်အခွင့်သည် ခပ်သိမ်းသော ဝိညာဉ်ပကတိ ကောင်းချီးမင်္ဂလာတို့၏ သော့များကို ကိုင်ဆောင်၏၊ အာရုန်ယဇ်ပုရောဟိတ်အခွင့်သည် ကောင်းကင်တမန်များ အမှုတော်ဆောင်ခြင်းသော့ကို ကိုင်ဆောင်၏။ ၂၁–၃၈၊ ပထမဥက္ကဋ္ဌအဖွဲ့၊ တစ်ဆယ့်နှစ်ပါးအဖွဲ့နှင့် ခုနစ်ကျိပ်အဖွဲ့တို့သည် စည်းလုံးခြင်းနှင့် ဖြောင့်မတ်ခြင်းတို့ဖြင့် ဆုံးဖြတ်ချက်များပြုရမည့် ဦးစီးအဖွဲ့များကို ဖွဲ့စည်းတည်ထောင်၏။ ၃၉–၅၂၊ အာဒံမှ နောဧအထိ မျိုးနွယ်စုအဘအစီအစဉ်ကို တည်ထောင်ထား၏။ ၅၃–၅၇၊ ရှေးသန့်ရှင်းသူတို့သည် အာဒံ-ဩဒိ-အာမန်၌ စုဝေးကြပြီး၊ ကိုယ်တော်ရှင်သည် သူတို့ထံပေါ်လာ၏။ ၅၈–၆၇၊ တစ်ဆယ့်နှစ်ပါးအဖွဲ့သည် အသင်းတော်၏ အရာရှိများကို အစီအစဉ်တကျ ဖွဲ့စည်းရမည်။ ၆၈–၇၆၊ သင်းအုပ်တို့သည် ဣသရေလအမျိုး၌ အထွေထွေ တရားသူကြီးများအဖြစ် အစေခံကြ၏။ ၇၇–၈၄၊ ပထမဥက္ကဋ္ဌအဖွဲ့နှင့် တစ်ဆယ့်နှစ်ပါးအဖွဲ့သည် အသင်းတော်၌ အမြင့်ဆုံးတရားရုံးကို ဖွဲ့စည်းတည်ထောင်၏။ ၈၅–၁၀၀၊ ယဇ်ပုရောဟိတ်ဥက္ကဋ္ဌများသည် မိမိတို့၏ သက်ဆိုင်ရာအဖွဲ့အသီးသီးကို အုပ်ချုပ်ကြ၏။

၁ အသင်းတော်တွင်၊ ယဇ်ပုရောဟိတ်အခွင့် နှစ်ခုရှိ၏၊ အမည်အားဖြင့်၊ မေလခိဇေဒက်နှင့် အာရုန်၊ လေဝိအမျိုးမှ ဆင်းသက်သော ယဇ်ပုရောဟိတ်အခွင့် အပါအဝင်ဖြစ်၏။

၂ ပထမအခွင့်ကို မေလခိဇေဒက်ယဇ်ပုရောဟိတ်အခွင့်ဟု ခေါ်ရခြင်းမှာ မေလခိဇေဒက်သည် အလွန် ကြီးမြတ်သော ယဇ်ပုရောဟိတ်မင်းတစ်ပါး ဖြစ်သောကြောင့်ပေတည်း။

၃ သူ့လက်ထက်မတိုင်မီတွင်၊ ဘုရားသခင့်သားတော်၏ အသင်းအတိုင်း၊ သန့်ရှင်းသော ယဇ်ပုရောဟိတ်အခွင့်ဟု ခေါ်ခဲ့၏။

၄ သို့ရာတွင် အထွဋ်အမြတ်ဖြစ်သောဘုရား၏ နာမတော်ကို ပမာဏပြုခြင်း သို့မဟုတ် ရိုသေခြင်းအားဖြင့်၊ သူ၏နာမတော်ကို အလွန်အမင်း အကြိမ်ကြိမ် အထပ်ထပ် မြွက်ဆိုခြင်းမှ ရှောင်ရန်၊ ရှေးကာလရှိ အသင်းတော်သည် ထိုယဇ်ပုရောဟိတ်အခွင့်ကို မေလခိဇေဒက်၊ သို့မဟုတ် မေလခိဇေဒက်ယဇ်ပုရောဟိတ်အခွင့်ဟု ခေါ်ခဲ့ကြ၏။

၅ အသင်းတော်ရှိ ခပ်သိမ်းသော အခြားအခွင့်အာဏာများ သို့မဟုတ် အမှုအရာများသည် ဤယဇ်ပုရောဟိတ်အခွင့်၏ တွဲဘက်အရာများဖြစ်၏။

၆ သို့ရာတွင် အခန်း သို့မဟုတ် ခမ်းနားသောကဏ္ဍ နှစ်ခုရှိ၏—တစ်ခုမှာ မေလခိဇေဒက် ယဇ်ပုရောဟိတ်အခွင့်ဖြစ်ပြီး၊ အခြားတစ်ခုမှာ အာရုန် သို့မဟုတ် လေဝိအမျိုးမှ ဆင်းသက်သော ယဇ်ပုရောဟိတ်အခွင့်ဖြစ်၏။

၇ အသင်းလူကြီးတစ်ဦး၏ အမှုအရာသည် မေလခိဇေဒက်၏ ယဇ်ပုရောဟိတ်အခွင့် အောက်၌ ကျရောက်၏။

၈ မေလခိဇေဒက်ယဇ်ပုရောဟိတ်အခွင့်သည် ဥက္ကဋ္ဌအဖွဲ့၏ အခွင့်အရေးကို ကိုင်ဆောင်ပြီး၊ ဝိညာဉ်ပကတိ အရာများကို စီမံဆောင်ရွက်ရန်၊ လောကကာလ တစ်ခုလုံး၌ အသင်းတော်ရှိ ခပ်သိမ်းသော အမှုအရာများအပေါ် မှာ အခွင့်အာဏာရှိ၏။

၉ ယဇ်ပုရောဟိတ်မင်းဥက္ကဋ္ဌအဖွဲ့သည် မေလခိဇေဒက်၏ အသင်းအတိုင်း၊ အသင်းတော်ရှိ ခပ်သိမ်းသောအမှုအရာတို့၌ အမှုဆောင်ရွက်ရန် အခွင့်အရေးရှိ၏။

၁၀ ယဇ်ပုရောဟိတ်မင်းတို့သည် မေလခိဇေဒက်ယဇ်ပုရောဟိတ်အခွင့်အတိုင်း သူတို့၏ အမှုအရာ၌၊ ဥက္ကဋ္ဌအဖွဲ့၏ လမ်းညွှန်မှုအောက်တွင်၊ ဝိညာဉ်ပကတိအရာများကို စီမံဆောင်ရွက်ရာ၌၊ ထို့အတူ အသင်းလူကြီး၊ ယဇ်ပုရောဟိတ် (လေဝိအမျိုးမှ ဆင်းသက်သောအသင်း၏)၊ ဆရာ၊ သင်းထောက်နှင့် အသင်းသား တစ်ဦး၏အမှုအရာ၌လည်း အမှုဆောင်ရွက်ရန် အခွင့်အရေးရှိ၏။

၁၁ ယဇ်ပုရောဟိတ်မင်းမရှိသောအခါ၊ အသင်းလူကြီးတစ်ဦးသည် သူ၏နေရာ၌ အမှုဆောင်ရွက်ရန် အခွင့်အရေးရှိ၏။

၁၂ ယဇ်ပုရောဟိတ်မင်းနှင့် အသင်းလူကြီးတို့သည် ဝိညာဉ်ပကတိအရာတို့ကို အသင်းတော်၏ ပဋိညာဉ်များနှင့် ပညတ်တော်များအတိုင်း စီမံဆောင်ရွက်ကြရမည်။ သာ၍ကြီးသော အခွင့်အာဏာရှိသူများ မရှိသောအခါ သူတို့သည် အသင်းတော်၏ ခပ်သိမ်းသော ဤအမှုအရာတို့ကို အမှုဆောင်ရွက်ရန် အခွင့်အရေးရှိကြ၏။

၁၃ ဒုတိယယဇ်ပုရောဟိတ်အခွင့်မှာ အာရုန်နှင့် သူ၏ အမျိုးအနွယ်တို့အပေါ်၊ သူတို့၏ ခပ်သိမ်းသော မျိုးဆက်များတစ်လျှောက် အပ်နှင်းထားလေသောကြောင့် အာရုန်ယဇ်ပုရောဟိတ်အခွင့်ဟု ခေါ်၏။

၁၄ ၎င်းကို သာ၍ငယ်သောယဇ်ပုရောဟိတ်အခွင့်ဟု ခေါ်ရခြင်းမှာ၊ သာ၍ကြီးသော၊ သို့မဟုတ် မေလခိဇေဒက် ယဇ်ပုရောဟိတ်အခွင့်၏ တွဲဘက်တစ်ခုဖြစ်ပြီး၊ အပြင်ပိုင်းဘိသိက်မင်္ဂလာများကို စီမံဆောင်ရွက်ရာ၌ အခွင့်ရှိသောကြောင့်ပေတည်း။

၁၅ သင်းအုပ်နှင့် အတိုင်ပင်ခံအဖွဲ့သည် ဤယဇ်ပုရောဟိတ်အခွင့်၏ ဥက္ကဋ္ဌအဖွဲ့ဖြစ်ပြီး၊ အလားတူအခွင့်၏သော့များ သို့မဟုတ် အခွင့်အာဏာကို ကိုင်ဆောင်၏။

၁၆ အာရုန်၏အမျိုးအနွယ်စစ် မဟုတ်လျှင်၊ ဤအမှုအရာအတွက်၊ ဤယဇ်ပုရောဟိတ်အခွင့်သော့များကို ကိုင်ဆောင်ရန်၊ အဘယ်သူမျှ ဥပဒေနှင့်ညီသောအခွင့်အရေးမရှိ။

၁၇ သို့ရာတွင် မေလခိဇေဒက် ယဇ်ပုရောဟိတ်အခွင့် ယဇ်ပုရောဟိတ်မင်းသည် ပို၍ငယ်သောအမှုအရာအပေါင်း၌ အမှုဆောင်ရွက်ရန် အခွင့်အာဏာရှိ၏၊ အာရုန်၏အမျိုးအနွယ်စစ်ကို ရှာ၍မတွေ့နိုင်သောအခါ၊ မေလခိဇေဒက် ယဇ်ပုရောဟိတ်အခွင့် ပထမဥက္ကဋ္ဌအဖွဲ့၏ လက်ဖြင့် ဤအခွင့်သို့ ခေါ်သွင်း၍၊ ရွေးထားပြီး ခန့်ထားခံရလျှင် သင်းအုပ်၏ အမှုအရာ၌ အမှုဆောင်ရွက်နိုင်ပေ၏။

၁၈ ပို၍ကြီးသော သို့မဟုတ် မေလခိဇေဒက်ယဇ်ပုရောဟိတ်အခွင့်၏ တန်ခိုးနှင့် အခွင့်အာဏာမှာ အသင်းတော်၏ ခပ်သိမ်းသောဝိညာဉ်ပကတိ ကောင်းချီးမင်္ဂလာများ၏ သော့များကို ကိုင်ဆောင်ရန် ဖြစ်၏—

၁၉ ကောင်းကင်နိုင်ငံတော်၏နက်နဲခြင်းကို လက်ခံရရှိရာအထူးအခွင့်အရေးကို ရရှိရန်၊ ၎င်းတို့အဖို့ ကောင်းကင်ကို ဖွင့်ပြရန်၊ အထွေထွေအစည်းအဝေးနှင့် သားဦး၏ အသင်းတော်တို့နှင့် ဆွေးနွေးပြောဆိုရန်၊ ခမည်းတော်ဘုရားသခင်၊ ထို့အတူ ပဋိညာဉ်တရားသစ်၏ အရှင်တည်းဟူသော စေ့စပ်ရှင် ယေရှု၏ ဆက်ဆံခြင်းနှင့် မျက်မှောက်တော်တို့နှင့် ပျော်မွေ့ရန်ဖြစ်၏။

၂၀ သာ၍ငယ်သော သို့မဟုတ် အာရုန်ယဇ်ပုရောဟိတ်အခွင့်၏ တန်ခိုးနှင့် အခွင့်အာဏာမှာ၊ ကောင်းကင်တမန်များ အမှုတော်ဆောင်ခြင်း၏ သော့များကို ကိုင်ဆောင်ရန်၊ ထို့အတူ ဧဝံဂေလိတရားတော်၏စာ၊ အပြစ်များမှလွှတ်ခြင်းအတွက် နောင်တရခြင်းကြောင့် ဗတ္တိဇံခံခြင်းစသည့် အပြင်ပိုင်းဘိသိက်မင်္ဂလာများကို ပဋိညာဉ်များ၊ ပညတ်တော်များအတိုင်း စီမံဆောင်ရွက်ရန် ဖြစ်၏။

၂၁ ဥက္ကဋ္ဌများ၊ သို့မဟုတ် ကြီးပြင်းလာသော၊ သို့မဟုတ် ဤယဇ်ပုရောဟိတ်အခွင့်နှစ်ခု၌ အသီးသီးသော အမှုအရာများသို့ ခန့်ထားခံရသူတို့ကြားမှ သို့မဟုတ် သူတို့အထဲမှ ခန့်အပ်ထားခံရသည့် ဦးစီးအရာရှိများ လိုအပ်ပေ၏။

၂၂ မေလခိဇေဒက်ယဇ်ပုရောဟိတ်အခွင့်မှ၊ ဦးစီးယဇ်ပုရောဟိတ်မင်း သုံးဦးသည်၊ အဖွဲ့အားဖြင့် ရွေးကောက်၍၊ ထိုအမှုအရာသို့ ခန့်အပ်ပြီး ခန့်ထားလျက်၊ အသင်းတော်၏ စိတ်ချယုံကြည်ခြင်း၊ ယုံကြည်ခြင်းနှင့် ဆုတောင်းခြင်းတို့အားဖြင့် ထောက်ခံမှုရ၍၊ အသင်းတော်ဥက္ကဋ္ဌအဖွဲ့၏ အဖွဲ့ကို ဖွဲ့စည်းတည်ထောင်၏။

၂၃ ခရီးသွားအတိုင်ပင်ခံတို့ကို တမန်တော်တစ်ဆယ့်နှစ်ပါး၊ ကမ္ဘာတစ်ခုလုံး၌ ခရစ်တော်၏ နာမတော်အတွက် အထူးသက်သေများဟု ခေါ်ရမည်—ထိုကဲ့သို့အားဖြင့်၊ အသင်းတော်၌ အခြား အရာရှိတို့၏ အမှုတော်ဆောင်တာဝန်၏ တာဝန်များနှင့် ကွဲပြားလျက်ရှိ၏။

၂၄ သူတို့သည် အဖွဲ့တစ်ခုကို ဖွဲ့စည်းတည်ထောင်၏၊ ယခင်ဖော်ပြခဲ့သည့် ဥက္ကဋ္ဌသုံးဦးကဲ့သို့ အခွင့်အာဏာနှင့် တန်ခိုး၌တူညီကြ၏။

၂၅ ခုနစ်ကျိပ်အဖွဲ့သည်လည်း ဧဝံဂေလိတရားတော်ကို ဟောပြောစေရန်၊ ထို့အတူ တစ်ပါးအမျိုးသားများအဖို့နှင့် ကမ္ဘာတစ်ခုလုံး၌ အထူးသက်သေများ ဖြစ်စေရန် ခေါ်သွင်းခံကြရ၏—ထိုကဲ့သို့အားဖြင့်၊ အသင်းတော်၌ အခြားအရာရှိတို့၏ အမှုတော်ဆောင်တာဝန်၏ တာဝန်များနှင့် ကွဲပြားလျက်ရှိ၏။

၂၆ သူတို့သည်လည်း အဖွဲ့တစ်ခုကို ဖွဲ့စည်းတည်ထောင်၏၊ အထက်ကဖော်ပြခဲ့သည့် အထူးသက်သေ တစ်ဆယ့်နှစ်ဦး သို့မဟုတ် တမန်တော်များကဲ့သို့ အခွင့်အာဏာ၌ တူညီကြ၏။

၂၇ ဤအဖွဲ့တို့ အထဲမှ တစ်ဖွဲ့ဖွဲ့က ပြုလုပ်သည့် ဆုံးဖြတ်ချက်သည် အလားတူ သဘောတူညီသော မဲဆန္ဒ အားဖြင့် ဖြစ်ရမည်။ ဆိုလိုသည်ကား၊ အဖွဲ့တစ်ခုချင်းစီ၌ ရှိသော အသင်းသားတိုင်းသည် အဖွဲ့၏ ဆုံးဖြတ်ချက်များကို သဘောတူရမည်၊ သူတို့၏ ဆုံးဖြတ်ချက်များကို တစ်ဦးနှင့်တစ်ဦး တူသောအခွင့် သို့မဟုတ် တရားနည်းလမ်းကျခြင်းဖြင့် ပြုကြစေခြင်းငှာဖြစ်၏—

၂၈ မဖြစ်နိုင်စေသောအခြေအနေများရှိသောအခါ အများစုသည် အဖွဲ့တစ်ခုကို ဖွဲ့စည်းတည်ထောင်နိုင်၏—

၂၉ ဤသို့မဟုတ်လျှင်၊ သူတို့၏ ဆုံးဖြတ်ချက်များသည် မေလခိဇေဒက်အသင်းအတိုင်း ခန့်ထားခံရ၊ ထို့အတူ ဖြောင့်မတ်ပြီး သန့်ရှင်းသောသူများဖြစ်သည့် ရှေးဥက္ကဋ္ဌသုံးဦးအဖွဲ့၏ ဆုံးဖြတ်ချက်များ အားဖြင့်ရှိခဲ့သည့် တူသောကောင်းချီးမင်္ဂလာများ အတွက် အကျုံးမဝင်ပေ။

၃၀ ဤအဖွဲ့များ၊ သို့မဟုတ် ၎င်းတို့အထဲမှ တစ်ဖွဲ့ဖွဲ့၏ ဆုံးဖြတ်ချက်များကို အလုံးစုံသော ဖြောင့်မတ်ခြင်းဖြင့်၊ သန့်ရှင်းခြင်း၊ ထို့အတူ စိတ်နှလုံး နှိမ့်ချခြင်း၊ သိမ်မွေ့အောက်ကျို့ခြင်းနှင့် စိတ်ရှည်ခြင်းတို့ဖြင့်၊ ထို့အတူ ယုံကြည်ခြင်း၊ ထို့အတူ ကိုယ်ကျင့်သီလ၊ ထို့အတူ အသိပညာ၊ ဣန္ဒြေစောင့်ခြင်း၊ သည်းခံခြင်း၊ ဘုရားဝတ်၌ မွေ့လျော်ခြင်း၊ ညီအစ်ကိုရင်းကဲ့သို့ ကြင်နာခြင်းနှင့် မေတ္တာတို့ဖြင့် ပြုရမည်။

၃၁ ကတိတော်ကြောင့်၊ သူတို့၌ ဤအရာတို့ များပြားကြလျှင်၊ သူတို့သည် ကိုယ်တော်ရှင်ကို သိခြင်းပညာ၌ အကျိုးမဲ့မဖြစ်ရ။

၃၂ ဤအဖွဲ့တို့၏ ဆုံးဖြတ်ချက်တစ်စုံတစ်ခုမှာ မတရားမှုဖြင့် ပြုထားလျှင်၊ အသင်းတော်၏ ဝိညာဉ်ပကတိ အခွင့်အာဏာပိုင်တို့ဖြင့် ဖွဲ့စည်းတည်ထောင်သည့် အဖွဲ့အသီးသီး၏ အထွေထွေအစည်းအဝေးရှေ့သို့ ဆောင်ယူနိုင်၏။ သို့မဟုတ်လျှင်၊ သူတို့၏ ဆုံးဖြတ်ချက်ကို အယူခံမဝင်နိုင်။

၃၃ တစ်ဆယ့်နှစ်ပါးအဖွဲ့သည် ဥက္ကဋ္ဌအဖွဲ့၏ လမ်းညွှန်မှုအောက်တွင်၊ ကောင်းကင်ဘုံ၏ ထူထောင်ခြင်းအတိုင်း ကိုယ်တော်ရှင်၏ နာမတော်၌ အမှုဆောင်ရွက်ရန်၊ အသင်းတော်ကို တည်ထောင်ရန်၊ ခပ်သိမ်းသောပြည်သားတို့၌ ပထမအနေဖြင့် တစ်ပါးအမျိုးသားတို့အဖို့၊ ဒုတိယအနေဖြင့် ယုဒလူမျိုးတို့အဖို့ ထိုအသင်းတော်၏ခပ်သိမ်းသော အမှုများကို အုပ်ချုပ်ရန် ခရီးသွား ဦးစီးအတိုင်ပင်ခံမင်းအဖွဲ့ ဖြစ်၏။

၃၄ ခုနစ်ကျိပ်အဖွဲ့သည် တစ်ဆယ့်နှစ်ပါးအဖွဲ့ သို့မဟုတ် ခရီးသွားအတိုင်ပင်ခံမင်းအဖွဲ့၏ လမ်းညွှန်မှုအောက်တွင်၊ အသင်းတော်ကို တည်ထောင်ခြင်းနှင့် ခပ်သိမ်းသောပြည်သားတို့၌၊ ပထမတွင် တစ်ပါးအမျိုးသားတို့အဖို့၊ ထို့နောက်တွင် ယုဒလူမျိုးတို့အဖို့ ထိုအသင်းတော်၏ ခပ်သိမ်းသောအမှုများကို အုပ်ချုပ်ရာတွင် ကိုယ်တော်ရှင်၏နာမတော်၌ ဆောင်ရွက်ရမည်—

၃၅ စေလွှတ်ခံရသူ ထိုတစ်ဆယ့်နှစ်ပါးအဖွဲ့သည်၊ ပထမတွင် တစ်ပါးအမျိုးသားတို့အဖို့၊ ထို့နောက်တွင် ယုဒလူမျိုးတို့အဖို့ ယေရှုခရစ်တော်၏ ဧဝံဂေလိတရားတော်ကို ကြေညာခြင်းအားဖြင့်၊ တံခါးကို ဖွင့်ရန် သော့များကို ကိုင်ဆောင်၏။

၃၆ အမြဲတမ်းအတိုင်ပင်ခံမင်းအဖွဲ့တို့သည်၊ ဇိအုန်ပန္နက်တို့တွင်၊ အသင်းတော်၏အမှုများနှင့် စပ်လျဉ်း၍ သူတို့၏ခပ်သိမ်းသောဆုံးဖြတ်ချက်များ၌၊ ဥက္ကဋ္ဌအဖွဲ့နှင့်၊ သို့မဟုတ် ခရီးသွား အတိုင်ပင်ခံမင်းအဖွဲ့နှင့် အခွင့်အာဏာ၌ တူညီသော အဖွဲ့တစ်ခုကို ဖွဲ့စည်း တည်ထောင်ကြ၏။

၃၇ ဇိအုန်ရှိအတိုင်ပင်ခံမင်းအဖွဲ့သည် အသင်းတော်၏အမှုများနှင့်စပ်လျဉ်း၍၊ ခပ်သိမ်းသောဆုံးဖြတ်ချက်များ၌၊ ဇိအုန်ပန္နက်တို့တွင် တစ်ဆယ့်နှစ်ပါးအတိုင်ပင်ခံအဖွဲ့တို့နှင့် အခွင့်အာဏာ၌ တူညီသော အဖွဲ့တစ်ခုကို ဖွဲ့စည်းတည်ထောင်၏။

၃၈ ခရီးသွားအတိုင်ပင်ခံမင်းအဖွဲ့သည် ဧဝံဂေလိတရားတော်ကို ဟောပြောခြင်းနှင့် စီမံဆောင်ရွက်ခြင်းအတွက် အမျိုးမျိုးသော ခေါ်သွင်းခြင်းများကို ဆောင်ရွက်ရန်၊ အကူအညီလိုသောအခါ၊ အခြားသူများအစား ခုနစ်ကျိပ်အဖွဲ့ကို တောင်းဆိုရမည်မှာ သူတို့၏တာဝန်ဖြစ်၏။

၃၉ အသင်းတော်၏ ခပ်သိမ်းသော အသင်းတော်ခွဲကြီးများ၌၊ ဧဝံဂေလိ အမှုတော်ဆောင်များကို တစ်ဆယ့်နှစ်ပါးအဖွဲ့သို့ ဗျာဒိတ်တော်အားဖြင့် သတ်မှတ်ခံရမည့်အခါ ခန့်ထားရမည်မှာ သူတို့၏ တာဝန်ဖြစ်၏။

၄၀ ဤယဇ်ပုရောဟိတ်အခွင့်၏ အသင်းကို အဘမှ သားသို့ လက်ဆင့်ကမ်း၍ ပေးသွားစေရန်၊ ထို့အတူ ကတိတော်များပေးထားခံရသူများဖြစ်သည့် ရွေးကောက်ထားသော အမျိုးအနွယ်၏ အမျိုးအနွယ်စစ်တို့ မှန်ကန်စွာပိုင်ဆိုင်စေရန် တည်စေတော်မူခဲ့၏။

၄၁ ဤအသင်းကို အာဒံ၏လက်ထက်၌ တည်ထောင်၍၊ အောက်ပါနည်းအတိုင်း မျိုးရိုးအားဖြင့် ဆင်းသက်လာခဲ့၏။

၄၂ အာဒံထံမှ ရှေသသို့ ရောက်၏၊ သူသည် အသက် ခြောက်ဆယ့်ကိုးနှစ်၌ အာဒံအားဖြင့် ခန့်ထားခံရ၏၊ သူ၏ (အာဒံ၏) သေခြင်း မတိုင်မီသုံးနှစ်တွင် သူ့အားဖြင့် ကောင်းချီးပေးခံရ၏၊ ထို့အတူ သူ၏သားစဉ်မြေးဆက်သည် ကိုယ်တော်ရှင် ရွေးကောက်သောသူများ ဖြစ်ရမည့်အကြောင်း၊ ကမ္ဘာကုန်ဆုံးသည် တိုင်အောင် ထိန်းသိမ်းစောင့်ရှောက် ခံကြရမည့်အကြောင်း သူ့အဘအားဖြင့် ဘုရားသခင်၏ ကတိတော်ကို ရရှိ၏။

၄၃ သူ (ရှေသ) သည် စုံလင်သောသူတစ်ဦးဖြစ်၏၊ ထို့အတူ သူသည် သူ၏အဘကဲ့သို့ပင်ဖြစ်၏၊ သူသည် ခပ်သိမ်းသောအရာတို့၌ သူ၏အဘနှင့် တူဟန်ရှိသဖြင့် သူ၏အသက်အားဖြင့်သာ ခွဲခြား၍သိနိုင်၏။

၄၄ ဧနုတ်သည် အသက် တစ်ရာသုံးဆယ့်လေးနှစ်နှင့် လေးလ၌ အာဒံ၏လက်အားဖြင့် ခန့်ထားခံရ၏။

၄၅ ဘုရားသခင်သည် ကာဣနန်ကို တောရိုင်းထဲ၌ သူ့အသက်လေးဆယ်နှစ်တွင် ခေါ်သွင်းတော်မူ၏။ သူသည် ရှေဒေါလာမအရပ်သို့ ခရီးသွားစဉ် အာဒံကို တွေ့၏။ သူသည် ဘိသိက်ပေးခြင်းကို လက်ခံရရှိစဉ်၌ အသက် ရှစ်ဆယ့်ခုနစ်နှစ်ရှိ၏။

၄၆ မဟာလေလသည် သူ့ကို ကောင်းချီးလည်းပေးသူ အာဒံ၏လက်အားဖြင့် ခန့်ထားခံရသောအခါ၌ အသက် လေးရာ့ကိုးဆယ့်ခြောက်နှစ်နှင့် ခုနစ်ရက်ရှိ၏။

၄၇ ယာရက်သည် သူ့ကို ကောင်းချီးလည်းပေးသူ အာဒံ၏လက်အောက်၌ ခန့်ထားခံရသောအခါ၌ အသက် နှစ်ရာရှိ၏။

၄၈ ဧနောက်သည် အာဒံ၏ လက်အောက်၌ ခန့်ထားခံရသောအခါ၌ အသက်နှစ်ဆယ့်ငါးနှစ်ရှိ၏။ သူသည် ခြောက်ဆယ့်ငါးနှစ်၌ အာဒံက ကောင်းချီးပေး၏။

၄၉ သူသည် ကိုယ်တော်ရှင်ကို မြင်၏၊ သူနှင့်အတူ လျှောက်၏၊ မျက်နှာတော်ရှေ့၌လည်း အစဉ်မပြတ်ရှိ၏။ ထို့အတူ သူသည် ဘုရားသခင်နှင့်အတူ သုံးရာခြောက်ဆယ့်ငါးနှစ်လျှောက်၍၊ ဘဝပြောင်းသောအခါ အသက် လေးရာ့သုံးဆယ်ရှိ၏။

၅၀ မသုရှလသည် အာဒံ၏လက်အောက်၌ ခန့်ထားခံရသောအခါ၌ အသက်တစ်ရာရှိ၏။

၅၁ လာမက်သည် ရှေသ၏လက်အောက်၌ ခန့်ထားခံရသောအခါ၌ အသက်သုံးဆယ့်နှစ်နှစ်ရှိ၏။

၅၂ နောဧသည် မသုရှလ၏ လက်အောက်၌ ခန့်ထားခံရသောအခါ၌ အသက်ဆယ်နှစ်ရှိ၏။

၅၃ အာဒံ၏သေခြင်း မတိုင်မီသုံးနှစ်တွင်၊ သူသည် အားလုံးယဇ်ပုရောဟိတ်မင်းများ ဖြစ်လေသူ ရှေသ၊ ဧနုတ်၊ ကာဣနန်၊ မဟာလေလ၊ ယာရက်၊ ဧနောက်နှင့် မသုရှလတို့ကို၊ ဖြောင့်မတ်လေသော သူများဖြစ်သည့် သူ၏သားစဉ်မြေးဆက်တို့မှ ကျန်ကြွင်းသောသူများနှင့်အတူ အာဒံ-ဩဒိ-အာမန် ချိုင့်ဝှမ်းသို့ခေါ်၏၊ ထိုနေရာ၌ သူတို့အပေါ် သူ၏နောက်ဆုံးကောင်းချီးမင်္ဂလာကို ပေးခဲ့၏။

၅၄ ကိုယ်တော်ရှင်သည် သူတို့ထံသို့ ပေါ်လာတော်မူ၏၊ သူတို့သည်လည်း ထ၍ အာဒံကို ကောင်းချီးပေး၏၊ သူ့ကို မိက္ခေလ၊ မင်းသား၊ ကောင်းကင်တမန်မင်းဟု ခေါ်ကြ၏။

၅၅ ကိုယ်တော်ရှင်သည် အာဒံအား သက်သာခြင်းကို ပေး၍၊ မိန့်တော်မူလေသည်ကား၊ ငါသည် သင့်အား ခေါင်းဆောင်အဖြစ် ထားတော်မူလေပြီ။ ပြည်သားအလုံးအရင်းတို့သည် သင့်ထံမှ ဖြစ်လာလိမ့်မည်၊ သင်သည် သူတို့အပေါ်၌ မင်းသားတစ်ပါး ကာလအစဉ်အဆက် ဖြစ်လိမ့်မည်။

၅၆ အာဒံသည် ပရိသတ်အလယ်၌ ရပ်၏။ ထို့အတူ၊ သူသည် အသက်ကြီး၍ ခါးကိုင်းသော်ငြားလည်း၊ သန့်ရှင်းသောဝိညာဉ်တော်နှင့် ပြည့်လျက်၊ သူ၏သားစဉ်မြေးဆက်တို့၌ နောက်ဆုံးမျိုးဆက်အထိ ဖြစ်ပျက်လာမည့်အရာမှန်သမျှကို ကြိုတင်၍ဟောကိန်းထုတ်၏။

၅၇ ဤအရာခပ်သိမ်းတို့ကို ဧနောက်ကျမ်း၌ ရေးထားလေပြီး၊ ကာလအချိန်တန်သောအခါ သက်သေခံခြင်းရှိလိမ့်မည်။

၅၈ အသင်းတော်၏ ခပ်သိမ်းသောအခြား အရာရှိများကို ဗျာဒိတ်တော်အတိုင်း ခန့်ထားပြီး အစီအစဉ်တကျရှိစေရန်မှာလည်း တစ်ဆယ့်နှစ်ပါးအဖွဲ့၏တာဝန်ဖြစ်၏။ ဗျာဒိတ်တော်ဆိုလေသည်ကား၊

၅၉ ဇိအုန်ပြည်ရှိ ခရစ်တော်၏အသင်းတော်သို့၊ အသင်းတော်အမှုအရေးနှင့်စပ်လျဉ်း၍ အသင်းတော်ဥပဒေများသို့ ထပ်လောင်းခြင်းအဖြစ်—

၆၀ သင်တို့ကို ငါအမှန်ဆိုသည်ကား၊ ကောင်းကင်ဗိုလ်ခြေကိုယ်တော်ရှင်မိန့်တော်မူသည်မှာ၊ အသင်းလူကြီးတစ်ဦး၏အမှုအရာ၌ ရှိသောသူများအပေါ် ဦးစီးရန် ဦးစီးအသင်းလူကြီးများ လိုအပ်၏။

၆၁ ယဇ်ပုရောဟိတ်တစ်ဦး၏ အမှုအရာ၌ ရှိသောသူများအပေါ် ဦးစီးရန် ယဇ်ပုရောဟိတ်များလည်း လိုအပ်၏။

၆၂ ဆရာတစ်ဦး၏ အမှုအရာ၌ ရှိသောသူများအပေါ် ဦးစီးရန် ဆရာများလည်း လိုအပ်၏၊ သင်းထောက်များသည်လည်း၊ ထိုနည်းတူ၊ လိုအပ်၏—

၆၃ သို့ဖြစ်၍၊ သင်းထောက်မှ ဆရာသို့၊ ထို့အတူ ဆရာမှ ယဇ်ပုရောဟိတ်သို့၊ ထို့အတူ ယဇ်ပုရောဟိတ်မှ အသင်းလူကြီးသို့၊ အသင်းတော်၏ပဋိညာဉ်များနှင့် ပညတ်တော်များအတိုင်း သူတို့ကို ခန့်အပ်ထားသည့် အရာအမျိုးမျိုးရှိ၏။

၆၄ ထို့နောက်တွင် ခပ်သိမ်းသောအရာတို့ထက် အကြီးမြတ်ဆုံးဖြစ်သည့် ယဇ်ပုရောဟိတ်မင်းအခွင့်ရှိ၏။

၆၅ သို့ဖြစ်၍၊ ယဇ်ပုရောဟိတ်အခွင့်အပေါ် ဦးစီးရန် ယဇ်ပုရောဟိတ်မင်းအခွင့်မှ တစ်ဦးကို ခန့်အပ်ထားဖို့ လိုအပ်၏၊ ထိုသူကို အသင်းတော်ယဇ်ပုရောဟိတ်မင်းအခွင့်၏ ဥက္ကဋ္ဌဟု ခေါ်ရမည်။

၆၆ သို့မဟုတ်၊ တစ်နည်းအားဖြင့်၊ အသင်းတော်ယဇ်ပုရောဟိတ်မင်းအခွင့်အပေါ် ဦးစီးယဇ်ပုရောဟိတ်မင်းဟု ခေါ်ရမည်။

၆၇ ထိုသူထံမှပင်၊ လက်တင်ခြင်းအားဖြင့်၊ ဘိသိက်မင်္ဂလာများကို စီမံဆောင်ရွက်ခြင်းနှင့် အသင်းတော်အပေါ်ကောင်းချီးမင်္ဂလာများ ဖြစ်လာ၏။

၆၈ သို့ဖြစ်၍၊ သင်းအုပ်တစ်ဦး၏ အမှုအရာမှာ ထိုအရာနှင့် မတူညီပေ။ အကြောင်းမူကား၊ သင်းအုပ်တစ်ဦး၏ အမှုအရာမှာ ခပ်သိမ်းသော ဇာတိပကတိအရာတို့ကို စီမံဆောင်ရွက်ခြင်း အတွက် ဖြစ်၏။

၆၉ သို့သော်လည်း သင်းအုပ်တစ်ဦးကို အာရုန်၏ အမျိုးအနွယ်စစ်တစ်ဦး မဟုတ်လျှင် ယဇ်ပုရောဟိတ်မင်းအခွင့်မှ ရွေးကောက်ရမည်။

၇၀ အကြောင်းမူကား၊ သူသည် အာရုန်၏ အမျိုးအနွယ်စစ်တစ်ဦး မဟုတ်လျှင် ယဇ်ပုရောဟိတ်အခွင့်သော့များကို မကိုင်ဆောင်နိုင်ပေ။

၇၁ သို့သော်လည်း၊ ယဇ်ပုရောဟိတ်မင်းတစ်ဦး ဆိုသည်ကား၊ မေလခိဇေဒက်၏ အသင်းအတိုင်းရှိသူသည်၊ ဇာတိပကတိအရာများကို စီမံဆောင်ရွက်ခြင်းသို့ ခန့်အပ်ခံရနိုင်ပေ၏၊ သမ္မာတရားဝိညာဉ်တော်အားဖြင့် ထိုအရာတို့အကြောင်းကိုလည်း သိလိမ့်မည်။

၇၂ အသင်းတော်၏ အသင်းလူကြီးများ၌ သူရွေးချယ်ထားလေသော၊ သို့မဟုတ် ရွေးကောက်မည့် သူ့တိုင်ပင်ဖက်တို့၏ အကူအညီအားဖြင့် ဣသရေလအမျိုး၌ တရားသူကြီးအဖြစ်ရှိစေရန်၊ အသင်းတော်၏ အမှုအရေးကို ဆောင်ရွက်ရန်၊ ဥပဒေအတိုင်း သူ့ရှေ့မှာပြမည့် သက်သေခံချက်ကို အခြေခံ၍ လွန်ကျူးသူများကို တရားစီရင်ရန်လည်းဖြစ်၏။

၇၃ ဤအရာသည် အာရုန်၏အမျိုးအနွယ်စစ်တစ်ဦးမဟုတ်သော၊ သို့ရာတွင် မေလခိဇေဒက်၏ အသင်းအတိုင်း ခန့်ထားခံရလေသောသူဖြစ်သည့် သင်းအုပ်တစ်ဦး၏တာဝန်ဖြစ်၏။

၇၄ ထိုကဲ့သို့အားဖြင့်၊ ဇိအုန်၌ နေထိုင်ကြသူတို့၌၊ သို့မဟုတ် ဇိအုန်ပန္နက်၌၊ သို့မဟုတ် ဇိအုန်၏ နယ်နိမိတ်တို့ ကျယ်လာ၍၊ ဇိအုန်သို့မဟုတ် အခြားနေရာ၌ အခြားသင်းအုပ်များ သို့မဟုတ် တရားသူကြီးများရှိရန် လိုအပ်လာသည်အထိ ဤအမှုတော်ဆောင်ခြင်းသို့ သူ ခန့်အပ်ခံရမည့် အသင်းတော်၏ အဘယ်အသင်းတော်ခွဲ၌မဆို တရားသူကြီးတစ်ဦး၊ အထွေထွေတရားသူကြီးတစ်ဦးပင်ဖြစ်လိမ့်မည်။

၇၅ အခြားခန့်အပ်ထားသောသင်းအုပ်ရှိသမျှတို့သည်လည်း တူသောအမှုအရာ၌ ဆောင်ရွက်ကြရမည်။

၇၆ သို့ရာတွင်၊ အာရုန်၏အမျိုးအနွယ်စစ်တစ်ဦးသည် မေလခိဇေဒက်၏ အသင်းအတိုင်းရှိသည့်၊ ယဇ်ပုရောဟိတ်မင်းအခွင့်၏ ဥက္ကဋ္ဌကို ဣသရေလအမျိုး၌ တရားသူကြီးအဖြစ် တရားစီရင်ရန် စီရင်ခံထားရသည့် အမှုမှတစ်ပါး၊ ဤယဇ်ပုရောဟိတ်အခွင့်၏ ဥက္ကဋ္ဌအဖွဲ့ အတွက်၊ ဤအမှုတော်ဆောင်ခြင်းသော့များ အတွက်၊ တိုင်ပင်ဖက်များမပါဘဲ၊ သင်းအုပ်၏ အမှုအရာ၌ လွတ်လပ်စွာဆောင်ရွက်ရန် ဥပဒေနှင့်ညီသောအခွင့်အရေးရှိ၏။

၇၇ ဤတိုင်ပင်ဖက်များထဲမှ တစ်ယောက်ယောက်၏ဆုံးဖြတ်ချက်သည် ပညတ်တော်အတိုင်း ဖြစ်ရမည်၊ ဆိုလေသည်ကား၊

၇၈ တစ်ဖန်၊ သင်တို့ကို၊ ငါအမှန်ဆိုသည်ကား၊ အသင်းတော်၏အရေးအကြီးဆုံးအမှုအရေး၊ ထို့အတူ အသင်းတော်၏ အခက်ခဲဆုံးအမှုများ၌၊ သင်းအုပ်သို့မဟုတ် တရားသူကြီးများ၏ ဆုံးဖြတ်ချက်ကို ကျေနပ်ခြင်းမရှိသမျှ၊ ယဇ်ပုရောဟိတ်မင်းအခွင့် ဥက္ကဋ္ဌအဖွဲ့ရှေ့၌ အသင်းတော်၏ အတိုင်ပင်ခံအဖွဲ့သို့ လွှဲပေး၍ ဆောင်ယူရမည်။

၇၉ ယဇ်ပုရောဟိတ်မင်းအတိုင်ပင်ခံအဖွဲ့၏ ဥက္ကဋ္ဌအဖွဲ့သည်၊ အခြားယဇ်ပုရောဟိတ်မင်းများကို၊ တစ်ဆယ့်နှစ်ပါးကိုပင်၊ တိုင်ပင်ဖက်များအဖြစ် ကူညီကြစေခြင်းငှာ၊ ခေါ်ရန်အခွင့်ရှိ၏။ ထိုကဲ့သို့အားဖြင့်၊ ယဇ်ပုရောဟိတ်မင်းအခွင့်ဥက္ကဋ္ဌအဖွဲ့နှင့် ၎င်း၏တိုင်ပင်ဖက်များသည် သက်သေခံချက်ကို အသင်းတော်၏ ဥပဒေများအတိုင်း ဆုံးဖြတ်ရန်အခွင့်ရှိရမည်။

၈၀ ဤဆုံးဖြတ်ချက်၏ နောက်တွင်၊ ထိုအမှုကို ကိုယ်တော်ရှင်ရှေ့၌ အမှတ်မရစေတော့နှင့်။ အကြောင်းမူကား၊ ဤအရာသည် ဘုရားသခင့်အသင်းတော်၏ အမြင့်ဆုံးအတိုင်ပင်ခံအဖွဲ့ဖြစ်၏၊ ဝိညာဉ်ပကတိဆိုင်ရာအမှုများ၌ အငြင်းပွားမှုများနှင့် စပ်လျဉ်း၍ နောက်ဆုံး ဆုံးဖြတ်ချက်လည်းဖြစ်၏။

၈၁ အသင်းတော်၏ ဤအတိုင်ပင်ခံအဖွဲ့နှင့် လွတ်ငြိမ်းသူ အသင်းတော်၏ အသင်းဝင် တစ်စုံတစ်ဦးမျှမရှိ။

၈၂ ယဇ်ပုရောဟိတ်မင်းအခွင့်၏ဥက္ကဋ္ဌသည် လွန်ကျူးသမျှ၊ ယဇ်ပုရောဟိတ်မင်းအခွင့်၏ တိုင်ပင်ဖက် တစ်ဆယ့်နှစ်ဦး၏ အကူအညီကိုရသည့် အသင်းတော်၏ အထွေထွေအတိုင်ပင်ခံအဖွဲ့ရှေ့၌ အမှတ်ရစေရမည်။

၈၃ သူနှင့်စပ်လျဉ်းသည့် သူတို့၏ဆုံးဖြတ်ချက်သည် သူ့အကြောင်း အငြင်းပွားခြင်း၏ အဆုံးဖြစ်ရမည်။

၈၄ ထိုကဲ့သို့အားဖြင့်၊ အဘယ်သူမျှ ဘုရားသခင်၏ တရားတော်မူခြင်းနှင့် ပညတ်တရားများမှ မလွတ်ငြိမ်းရ၊ ခပ်သိမ်းသောအရာတို့ကို သမ္မာတရားနှင့် ဖြောင့်မတ်ခြင်းအတိုင်း အစီအစဉ်တကျဖြင့် သူ့ရှေ့၌ တည်ကြည်လေးနက်စွာ ပြုနိုင်ကြစေခြင်းငှာပေတည်း။

၈၅ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ သင်းထောက်တစ်ဦး၏ အမှုအရာအပေါ်၊ ဥက္ကဋ္ဌတစ်ဦး၏ တာဝန်မှာ သင်းထောက်တစ်ဆယ့်နှစ်ဦးကို ဦးစီးရန်၊ သူတို့နှင့်တိုင်ပင်ရန်၊ ထို့အတူ ပဋိညာဉ်များ၌ ဖော်ပြထားသည့်အတိုင်း တစ်ယောက်ကို တစ်ယောက်တည်ဆောက်လျက်၊ သူတို့၏ တာဝန်ကို သူတို့အား သွန်သင်ရန်ဖြစ်၏။

၈၆ ဆရာများ၏အမှုအရာအပေါ် ဥက္ကဋ္ဌ၏ တာဝန်မှာလည်း ဆရာနှစ်ဆယ့်လေးဦးအပေါ် ဦးစီးရန်၊ ပဋိညာဉ်များ၌ ဖော်ပြထားသည့်အတိုင်း သူတို့အမှုအရာ၏တာဝန်များကို သူတို့အား သွန်သင်လျက်၊ သူတို့နှင့်တိုင်ပင်ရန်ဖြစ်၏။

၈၇ အာရုန်ယဇ်ပုရောဟိတ်အခွင့်အပေါ် ဥက္ကဋ္ဌ၏ တာဝန်မှာ ယဇ်ပုရောဟိတ် လေးဆယ့်ရှစ်ဦးအပေါ် ဦးစီးရန်၊ သူတို့နှင့်တိုင်ပင်ရန်၊ ပဋိညာဉ်များ၌ ဖော်ပြထားသည့်အတိုင်း သူတို့အမှုအရာ၏တာဝန်များကို သူတို့အား သွန်သင်ရန်ဖြစ်၏—

၈၈ ဤဥက္ကဋ္ဌသည် သင်းအုပ်တစ်ဦး ဖြစ်ရမည်။ အကြောင်းမူကား၊ ဤအရာသည် ဤယဇ်ပုရောဟိတ်အခွင့်၏ တာဝန်များထဲမှ တစ်ခုဖြစ်၏။

၈၉ တစ်ဖန်၊ အသင်းလူကြီးအမှုအရာအပေါ် ဥက္ကဋ္ဌ၏တာဝန်မှာ အသင်းလူကြီး ကိုးဆယ့်ခြောက်ဦးအပေါ် ဦးစီးရန်၊ ထို့အတူ သူတို့နှင့်တိုင်ပင်ရန်၊ ထို့အတူ ပဋိညာဉ်များ၌ ဖော်ပြထားသည့်အတိုင်း သူတို့ကို သွန်သင်ရန်ဖြစ်၏။

၉၀ ဤဥက္ကဋ္ဌအဖွဲ့သည် ခုနစ်ကျိပ်ဥက္ကဋ္ဌအဖွဲ့နှင့် ကွဲပြား၏၊ လောကီနိုင်ငံ အရပ်ရပ်သို့ ခရီးမသွားသည့်သူများအတွက် စီစဉ်ထားခြင်းလည်းဖြစ်၏။

၉၁ ထိုမှတစ်ဖန်၊ ယဇ်ပုရောဟိတ်မင်းအခွင့် အမှုအရာဥက္ကဋ္ဌ၏ တာဝန်မှာ အသင်းတော် တစ်ခုလုံး အပေါ် ဦးစီးရန်ဖြစ်၏၊ မောရှေကဲ့သို့ရှိရန်လည်းဖြစ်၏—

၉၂ ရှုလော့၊ ဤအရာ၌ ဉာဏ်ပညာရှိ၏။ ထိုမှတစ်ပါး၊ မြင်သောသူတစ်ဦး၊ ဗျာဒိတ်ဟောသူတစ်ဦး၊ ဘာသာပြန်သူတစ်ဦး၊ ထို့အတူ ပရောဖက်တစ်ဦးအဖြစ်၊ အသင်းတော်ခေါင်းဆောင် အပေါ် ပေးတော်မူသည့် ဘုရားသခင်၏ ခပ်သိမ်းသော ဆုကျေးဇူးများလည်း ရှိ၏။

၉၃ သူတို့အပေါ်ဦးစီးရန်၊ ခုနစ်ကျိပ်ထဲမှ ရွေးကောက်ထားသော ဥက္ကဋ္ဌခုနစ်ဦး သူတို့၌ ရှိရမည့်အကြောင်း၊ ခုနစ်ကျိပ်အဖွဲ့၏ အသင်းကို ဖော်ပြသည့် ရူပါရုံအတိုင်းလည်းဖြစ်၏။

၉၄ ဤဥက္ကဋ္ဌများထဲမှ သတ္တမဥက္ကဋ္ဌသည် ခြောက်ဦးအပေါ် ဦးစီးရမည်။

၉၅ ဤဥက္ကဋ္ဌခုနစ်ဦးသည် မိမိတို့ပါဝင်ရာ ပထမခုနစ်ကျိပ်အပြင် အခြားသောခုနစ်ကျိပ်ကို ရွေးချယ်ရမည်၊ ထိုသူတို့အပေါ်ကိုလည်း ဦးစီးရမည်။

၉၆ စပျစ်ဥယျာဉ်ထဲ၌ အလုပ်လုပ်ခြင်းအတွက် လိုအပ်လျှင်၊ ခုနစ်ကျိပ်ခုနစ်လီတိုင်အောင် အခြားသောခုနစ်ကျိပ်ကိုလည်း ရွေးချယ်ရမည်။

၉၇ ဤခုနစ်ကျိပ်တို့သည် ပထမအနေဖြင့် တစ်ပါးအမျိုးသားတို့အဖို့၊ ထို့အတူ ယုဒလူမျိုးတို့အဖို့လည်း ခရီးသွားအမှုတော်ဆောင်များအဖြစ် ရှိရမည်။

၉၈ အခြားတစ်ဖက်တွင်၊ တစ်ဆယ့်နှစ်ပါးအဖွဲ့၏ အသင်းဝင်မဟုတ်သောသူများ၊ ခုနစ်ကျိပ်အဖွဲ့သို့လည်း အသင်းဝင်မဟုတ်သောသူများဖြစ်သည့် အသင်းတော်၏ အခြားအရာရှိများသည် ခပ်သိမ်းသောပြည်သားတို့၌ ခရီးသွားရန်တာဝန်အောက်၌ မရှိကြ၊ သို့ရာတွင်သူတို့သည် အသင်းတော်၌ အရေးကြီး၍ တာဝန်ရှိသောအမှုအရာကို ထမ်းဆောင်နိုင်ကြသော်ငြားလည်း သူတို့၏အခြေအနေများ အခွင့်ပေးသမျှ ခရီးသွားကြရမည်။

၉၉ သို့ဖြစ်၍၊ ယခုတွင်၊ လူတိုင်းကို မိမိတာဝန်၊ ထို့အတူ မိမိခန့်အပ်ထားခံရသည့် အမှုအရာ၌ အလုံးစုံသော လုံ့လဝီရိယဖြင့် ဆောင်ရွက်ရန် သင်ယူစေလော့။

၁၀၀ ပျင်းရိသောသူသည် တည်ရှိရန် ထိုက်တန်သည်ဟု ရေတွက်မခံရ၊ ထို့အတူ မိမိတာဝန်ကို သင်ယူခြင်းမရှိ၊ မိမိကိုယ်ကို အတည်မပြုသူသည် တည်ရှိရန်ထိုက်တန်သည်ဟု ရေတွက်မခံရ။ ထိုကဲ့သို့ပင်တည်း။ အာမင်။