ဩဝါဒနှင့် ပဋိညာဉ်များ ၁၀၂

အပိုဒ်ငယ် ၁၀၂

၁၈၃၄ ခု၊ ဖေဖော်ဝါရီ ၁၇၊ ကာ့တ်လန်း၊ အိုဟိုင်းရို၌ အသင်းတော်ပထမအတိုင်ပင်ခံမင်းအဖွဲ့၏ အစည်းအဝေးမှတ်တမ်း။ အစည်းအဝေးမှတ်တမ်းမူရင်းကို အသင်းလူကြီးအော်လီဗာကောင်ဒရီနှင့် အော်ဆန်ဟိုက်တို့ရေးခဲ့ကြ၏။ ပရောဖက်သည် နောက်နေ့တွင် အစည်းအဝေးမှတ်တမ်းကို ပြုပြင်ရေးသားခဲ့၏၊ နောက်နေ့တွင် ပြင်ဆင်ထားသော အစည်းအဝေးမှတ်တမ်းကို “အတိုင်ပင်ခံမင်းအဖွဲ့၏ ပုံစံနှင့် ဖွဲ့စည်းပုံတစ်ခုအဖြစ်” အတိုင်ပင်ခံမင်းအဖွဲ့က သဘောတူညီစွာ လက်ခံခဲ့၏။ တမန်တော်တစ်ဆယ့်နှစ်ပါး အတိုင်ပင်ခံအဖွဲ့နှင့် စပ်လျဉ်း၍၊ ဤအပိုဒ်ငယ်ကို ဩဝါဒနှင့်ပဋိညာဉ်များ၌ ပုံနှိပ်ထုတ်ဝေခြင်းအတွက် ပြင်ဆင်ပြီးသောအခါ ဂျိုးဇက်စမစ်၏ လမ်းညွှန်မှုဖြင့် ၁၈၃၅ ခုတွင် အခန်းငယ် ၃၀ မှ ၃၂ အထိကို ထပ်၍ဖြည့်စွက်ခဲ့၏။

၁–၈၊ အသင်းတော်၌ ပေါ်ပေါက်လာသည့် အရေးကြီးသော အခက်အခဲများကို ဖြေရှင်းရန် အတိုင်ပင်ခံမင်းအဖွဲ့တစ်ခုကို ခန့်အပ်ထား၏။ ၉–၁၈၊ အမှုများကြားနာခြင်းအတွက် နည်းလမ်းများကို ဖော်ပြထား၏။ ၁၉–၂၃၊ အတိုင်ပင်ခံအဖွဲ့ဥက္ကဋ္ဌသည် ဆုံးဖြတ်ချက်ကို ချပေး၏။ ၂၄–၃၄၊ အယူခံဝင်ရာနည်းလမ်းကို ဖော်ပြထား၏။

၁ ဤနေ့တွင် ယဇ်ပုရောဟိတ်မင်း နှစ်ဆယ့်လေးဦးအထွေထွေအတိုင်ပင်ခံအဖွဲ့သည် ဗျာဒိတ်တော်အရ၊ ဂျိုးဇက်စမစ်အငယ်၏ အိမ်၌ စည်းဝေးကြ၏။ ခရစ်တော်၏ အသင်းတော် အတိုင်ပင်ခံမင်းအဖွဲ့ကို ဖွဲ့စည်းရန် ဆက်၍ ဆောင်ရွက်ကြ၏၊ ထိုအဖွဲ့တွင် ယဇ်ပုရောဟိတ်မင်း တစ်ဆယ့်နှစ်ဦး၊ ထို့အတူ အမှုလိုအပ်ချက်အလိုက် ဥက္ကဋ္ဌတစ်ဦး သို့မဟုတ် သုံးဦးပါဝင်၏။

၂ အသင်းတော်၌ ပေါ်ပေါက်လာသည့်၊ အသင်းတော် သို့မဟုတ် သင်းအုပ်၏ အတိုင်ပင်ခံအဖွဲ့အားဖြင့် အုပ်စုများကျေနပ်သည်အထိ ဖြေရှင်း၍ မရနိုင်သည့် အရေးကြီးသော အခက်အခဲများကို ဖြေရှင်းရန်ဟူသော ရည်ရွယ်ချက်အတွက် အတိုင်ပင်ခံမင်းအဖွဲ့သည် ဗျာဒိတ်တော်အားဖြင့် ခန့်အပ်ထားခံရ၏၊

၃ ဂျိုးဇက်စမစ်အငယ်၊ ဆစ်ဒနီရစ်ဂဒွန်နှင့် ဖရက်ဒရစ်ခ်ဂျီဝီလျံတို့သည် အတိုင်ပင်ခံအဖွဲ့၏ မဲဆန္ဒအားဖြင့် အသိအမှတ်ပြုခံရသော ဥက္ကဋ္ဌများ ဖြစ်ကြ၏။ ဂျိုးဇက်စမစ်အကြီး၊ ဂျွန်စမစ်၊ ဂျိုးဇက်ကိုး၊ ဂျွန်ဂျွန်ဆင်၊ မာတင်ဟဲရစ်၊ ဂျွန်အက်စ်ကာတာ၊ ယာရက်ကာတာ၊ အော်လီဗာကောင်ဒရီ၊ ဆင်မြူရယ်လ် အိပ်ခ်ျစမစ်၊ အော်ဆန်ဟိုက်၊ ဆီလ်ဗက်စတာစမစ်၊ ထို့အတူ လုဂျွန်ဆင်တို့သည်လည်း၊ ယဇ်ပုရောဟိတ်မင်းများ၊ အသင်းတော်အတွက် အမြဲတမ်းအတိုင်ပင်ခံအဖွဲ့အဖြစ်၊ အတိုင်ပင်ခံအဖွဲ့၏ သဘောတူညီသောမဲဆန္ဒအားဖြင့် ရွေးကောက်ခံရလေ၏။

၄ အထက်ဖော်ပြပါအတိုင်ပင်ခံတို့သည် သူတို့၏တာဝန်များကို သူတို့လက်ခံခဲ့ကြောင်း၊ ထို့အတူ ဘုရားသခင်၏ ကျေးဇူးတော်အတိုင်း သူတို့အပေါ်ပေးခဲ့သည့် သူတို့၏အမှုအရာများကို ပြီးပြည့်စုံစေကြမည်ဟု သူတို့အားလုံး ဖြေခဲ့ကြသည့် သူတို့၏တာဝန်များကို လက်ခံခြင်းရှိမရှိ၊ ထို့အတူ သူတို့သည် ထိုအမှုအရာကို ကောင်းကင်ဘုံဥပဒေအတိုင်း ဆောင်ရွက်လိုခြင်းရှိမရှိ အမေးခံကြရ၏။

၅ အထက်ဖော်ပြပါ အတိုင်ပင်ခံတို့ကို ခန့်အပ်ခြင်းနှင့် စပ်လျဉ်း၍ အသင်းတော်၏နာမနှင့် အသင်းတော်အတွက် မဲဆန္ဒပေးခဲ့သူများတည်းဟူသော၊ အတိုင်ပင်ခံအဖွဲ့ကို ဖွဲ့စည်းသူတို့၏ အရေအတွက်မှာ၊ လေးဆယ့်သုံးဖြစ်ပြီး၊ အောက်ပါအတိုင်းဖြစ်၏၊ ယဇ်ပုရောဟိတ်မင်း ကိုးဦး၊ အသင်းလူကြီး တစ်ဆယ့်ခုနစ်ဦး၊ ယဇ်ပုရောဟိတ် လေးဦးနှင့် အသင်းသားတစ်ဆယ့်သုံးဦး ဖြစ်၏။

၆ မဲဆန္ဒပေးခဲ့သည်ကား၊ အတိုင်ပင်ခံမင်းအဖွဲ့သည် အထက်ဖော်ပြပါအတိုင်ပင်ခံတို့အထဲမှ ခုနစ်ဦးမပါဘဲနှင့် သို့မဟုတ် သူတို့နေရာ၌ မှန်ကန်စွာ အစားထိုးခန့်အပ်ထားသူများ မရှိဘဲနှင့် ဆောင်ရွက်ရန် အခွင့်မရှိနိုင်စေရ။

၇ ထိုက်တန်မှုရှိကြောင်းနှင့် အတိုင်ပင်ခံများမရှိသည့်နေရာ၌ ဆောင်ရွက်နိုင်စွမ်းရှိသည်ဟု သူတို့မှတ်ယူသူ အခြားယဇ်ပုရောဟိတ်မင်းများကို ခန့်အပ်ရန် ထိုခုနစ်ဦး၌ အခွင့်ရှိ၏။

၈ မဲဆန္ဒပေးခဲ့သည်ကား၊ အထက်ဖော်ပြပါအတိုင်ပင်ခံတို့အထဲမှ တစ်စုံတစ်ဦး သေခြင်းကြောင့်ဖြစ်စေ၊ လွန်ကျူးခြင်းအတွက် အမှုအရာမှ ဖယ်ရှားခံရခြင်းကြောင့်ဖြစ်စေ၊ ဤအသင်းတော် အုပ်ချုပ်မှုနယ်ပယ်မှ ဖယ်ရှားခံရခြင်းကြောင့်ဖြစ်စေ လစ်လပ်သော နေရာတစ်စုံတစ်ခု ရှိသည့်အခါတိုင်း ဥက္ကဋ္ဌသို့မဟုတ်၊ ဥက္ကဋ္ဌများ၏ အဆိုပြုချက်အားဖြင့် ဖြည့်ရမည်၊ ထို့အတူ အသင်းတော်၏ နာမတော်အားဖြင့် ဆောင်ရွက်ရန် စုဝေးသည့် ယဇ်ပုရောဟိတ်မင်း အထွေထွေအတိုင်ပင်ခံအဖွဲ့၏ မဲဆန္ဒအားဖြင့် အတည်ပြုရမည်။

၉ အတိုင်ပင်ခံအဖွဲ့ဥက္ကဋ္ဌလည်း ဖြစ်သည့်၊ အသင်းတော်၏ ဥက္ကဋ္ဌသည် ဗျာဒိတ်တော်အားဖြင့် ခန့်အပ်ထားခံရ၏၊ ထို့အတူ သူ၏စီမံဆောင်ရွက်ခြင်း၌ အသင်းတော်၏ မဲဆန္ဒဖြင့် အသိအမှတ်အပြုခံရ၏။

၁၀ သူ့အမှုအရာ၏ ဂုဏ်သိက္ခာအတိုင်း အသင်းတော် အတိုင်ပင်ခံအဖွဲ့ကို သူဦးစီးရမည်။ သူကိုယ်တိုင် ခန့်အပ်ထားခံရလေသည့် နည်းအတိုင်း ခန့်အားထားခံကြရလေသည့် အခြားသော ဥက္ကဋ္ဌ နှစ်ဦး၏ အကူအညီကို ရရှိရမည်မှာလည်း သူ၏ အထူးအခွင့်အရေး ဖြစ်၏။

၁၁ သူ့ကို ကူညီရန်ခန့်အပ်ထားခံရသူများမှ တစ်ဦး သို့မဟုတ် နှစ်ဦးစလုံး မရှိပါက၊ သူသည် အတိုင်ပင်ခံအဖွဲ့ကို အကူအညီ တစ်ဦးမပါဘဲနှင့် ဦးစီးရန်အခွင့်ရှိ၏။ သူကိုယ်တိုင် မရှိပါက၊ အခြားသော ဥက္ကဋ္ဌများသည်၊ နှစ်ဦးစလုံးဖြစ်စေ၊ သူတို့အထဲမှ တစ်ဦးကဖြစ်စေ သူ၏နေရာ၌ ဦးစီးရန် အခွင့်ရှိကြ၏။

၁၂ အသင်းတော်အတိုင်ပင်ခံမင်းအဖွဲ့တစ်ခုကို၊ ရှေ့ကဆိုခဲ့ပြီးဖြစ်သော ပုံစံအတိုင်း ဖွဲ့စည်းသည့်အခါတိုင်းတွင်၊ နံပါတ်များကို စာရေးတံချရမည်မှာ အတိုင်ပင်ခံတစ်ဆယ့်နှစ်ဦး၏ တာဝန်ဖြစ်လိမ့်မည်၊ ထိုကဲ့သို့အားဖြင့် တစ်ဆယ့်နှစ်ဦးထဲ၌ နံပါတ်တစ်မှအစပြု၍၊ နံပါတ်တစ်ဆယ့်နှစ်အထိ အစဉ်အလိုက် အဘယ်သူပထမဆုံးပြောရမည်ကို ထုတ်ဖော်စိစစ်၏။

၁၃ ဤအတိုင်ပင်ခံအဖွဲ့သည် အမှုတစ်စုံတစ်ခုကို ဆုံးဖြတ်ရန် ဆင့်ခေါ်သောအခါတိုင်း၊ ထိုအမှုသည် ခက်ခဲသောအမှုတစ်ခု ဟုတ်မဟုတ်ကို အတိုင်ပင်ခံတစ်ဆယ့်နှစ်ဦးက ဆင်ခြင်လိမ့်မည်။ ခက်ခဲသောအမှု မဟုတ်လျှင်၊ အထက်မှ ရေးထားသည့် ပုံစံအတိုင်း၊ အတိုင်ပင်ခံတို့အထဲမှ နှစ်ဦးတည်းကသာ ထိုအမှုကို ဆွေးနွေးကြလိမ့်မည်။

၁၄ သို့ရာတွင် ထိုအမှုကို ခက်ခဲသည်ဟု ထင်မှတ်ခံရလျှင်၊ လေးဦးကို ခန့်အပ်ထားလိမ့်မည်။ ပို၍ ခက်ခဲလျှင်၊ ခြောက်ဦးကို ခန့်အပ်ထားလိမ့်မည်၊ သို့ရာတွင် အဘယ်အမှုတွင်မျှ ပြောဆိုရန် ခြောက်ဦးထက်ပို၍ မခန့်အပ်ထားရ။

၁၅ စွပ်စွဲခံရသောသူသည်၊ ခမ်သိမ်းသောအမှုတို့၌၊ စော်ကားမှု သို့မဟုတ် မတရားမှုကို တားဆီးရန် အတိုင်ပင်ခံအဖွဲ့၏ တစ်ဝက်အထိ အခွင့်အရေးရှိ၏။

၁၆ အတိုင်ပင်ခံအဖွဲ့ရှေ့၌ ပြောဆိုရန် ခန့်အပ်ထားခံရသည့် အတိုင်ပင်ခံတို့သည်၊ သက်သေကို စုံစမ်းစစ်ဆေးပြီးနောက်၊ အမှုကို အမှန်သဘောအတိုင်း အတိုင်ပင်ခံအဖွဲ့ရှေ့၌ တင်ပြရမည်။ လူတိုင်းသည် ဖြောင့်မတ်စွာနှင့် တရားမျှတစွာ ပြောဆိုရမည်။

၁၇ စုံနံပါတ်များဖြစ်သည့် ၂၊ ၄၊ ၆၊ ၈၊ ၁၀နှင့် ၁၂ တို့ကို ကောက်သည့် အတိုင်ပင်ခံတို့သည် စွပ်စွဲခံရသော သူအတွက် ရပ်တည်ရမည့်၊ ထို့အတူ စော်ကားမှုနှင့် မတရားမှုကို တားဆီးရမည့်သူများဖြစ်၏။

၁၈ သက်သေများကို ကြားနာပြီး၊ အမှုနှင့်စပ်လျဉ်း၍ ပြောဆိုရန် ခန့်အပ်ထားခံရသူ အတိုင်ပင်ခံတို့မှ သူတို့၏မှတ်ချက်များ ချမှတ်ပြီးနောက်၊ ခပ်သိမ်းသောအမှုတို့၌ စွပ်စွဲသူနှင့် စွပ်စွဲခံရသူတို့သည် အတိုင်ပင်ခံအဖွဲ့ရှေ့၌ သူတို့ကိုယ်တိုင် ပြောဆိုခြင်းအထူးအခွင့်အရေးကို ရရှိလိမ့်မည်။

၁၉ သက်သေများကို ကြားနာပြီး၊ အတိုင်ပင်ခံများ၊ စွပ်စွဲသူနှင့် စွပ်စွဲခံရသူတို့ ပြောဆိုလေပြီးနောက်၊ ဥက္ကဋ္ဌသည် အမှုနှင့်စပ်လျဉ်း၍ သူရရှိမည့် နားလည်ခြင်းအတိုင်း ဆုံးဖြတ်ချက်တစ်ခုကို ပေးရမည်၊ အတိုင်ပင်ခံတစ်ဆယ့်နှစ်ဦးကိုလည်း သူတို့၏မဲဆန္ဒအားဖြင့် ထိုဆုံးဖြတ်ချက်ကို အတည်ပြုရန် တောင်းဆိုရမည်။

၂၀ သို့ရာတွင်၊ သက်သေများနှင့် လျှောက်လဲချက်များကို သမာသမတ်ကျစွာ ကြားနာပြီးနောက်၊ မပြောဆိုလေသည့် ကျန်ကြွင်းသောအတိုင်ပင်ခံများက၊ သို့မဟုတ် သူတို့အထဲမှ တစ်စုံတစ်ဦးက ဥက္ကဋ္ဌ၏ဆုံးဖြတ်ချက်၌ အမှားအယွင်းတစ်ခုကို တွေ့ရှိလျှင်၊ သူတို့သည် ထိုအရာကို ထင်ရှားစွာပြနိုင်ကြ၏၊ အမှုကိုလည်း ပြန်၍ကြားနာရမည်။

၂၁ ဂရုတစိုက်ပြန်၍ကြားနာခြင်း ပြီးသည့်နောက် အမှုနှင့်စပ်လျဉ်း၍ နောက်ထပ် အမှန်တရား တစ်စုံတစ်ခုကို မြင်တွေ့ရလျှင် ဆုံးဖြတ်ချက်ကို လျော်ညီစွာ ပြောင်းလဲရမည်။

၂၂ သို့ရာတွင်နောက်ထပ်အမှန်တရား ဖော်ပြခြင်းမရှိပါက၊ ပထမဆုံးဖြတ်ချက်သည် အတည်ဖြစ်ရမည်၊ အတိုင်ပင်ခံအဖွဲ့မှ အများစုသည် အလားတူဆုံးဖြတ်ရန် အခွင့်ရှိကြ၏။

၂၃ ဩဝါဒ သို့မဟုတ် အခြေခံဩဝါဒနှင့် စပ်လျဉ်း၍ ခက်ခဲခြင်းရှိပါက၊ အမှုကို အတိုင်ပင်ခံအဖွဲ့၏စိတ်၌ ရှင်းလင်းစေသည့် လုံလောက်သောစာမရှိလျှင်၊ ဥက္ကဋ္ဌသည် မေးလျှောက်၍၊ ကိုယ်တော်ရှင်၏စိတ်ကို ဗျာဒိတ်တော်အားဖြင့် ရရှိနိုင်၏။

၂၄ ယဇ်ပုရောဟိတ်မင်းတို့သည် အဝေးရောက်နေသောအခါ၊ အုပ်စုများ သို့မဟုတ် သူတို့အထဲမှ တစ်ဖက်ဖက်က အခက်အခဲများကို ဖြေရှင်းရန် တောင်းဆိုလျှင်၊ ရှေ့ကဆိုခဲ့ပြီးသည့်နည်းအတိုင်း အတိုင်ပင်ခံအဖွဲ့တစ်ခုကို ခေါ်ရန်နှင့် စီစဉ်ရန် အခွင့်ရှိကြ၏။

၂၅ အထက်ဖော်ပြပါ ယဇ်ပုရောဟိတ်မင်းအတိုင်ပင်ခံအဖွဲ့သည် သူတို့အဖွဲ့ထဲမှတစ်ဦးကို ထိုကဲ့သို့သော အတိုင်ပင်ခံအဖွဲ့ကို ဦးစီးစေခြင်းငှာ ခန့်အပ်ထားရန် အခွင့်ရှိကြလိမ့်မည်။

၂၆ သူတို့၏ လုပ်ဆောင်မှုများအကြောင်း ရေးကူးထားသော စာတစ်စောင်ကို၊ သူတို့၏ ဆုံးဖြတ်ချက်နှင့်တွဲလျက် သက်သေခံချက်အကြောင်းဖော်ပြချက် အပြည့်အစုံတစ်ခုနှင့်အတူ အသင်းတော်၏ ပထမဥက္ကဋ္ဌအဖွဲ့ရှိရာ အတိုင်ပင်ခံမင်းအဖွဲ့သို့ ချက်ချင်းပေးပို့ရမည်မှာ အထက်ဖော်ပြပါ အတိုင်ပင်ခံအဖွဲ့၏တာဝန်ဖြစ်၏။

၂၇ အထက်ဖော်ပြပါ အတိုင်ပင်ခံအဖွဲ့၏ ဆုံးဖြတ်ချက်ကို အုပ်စုများ သို့မဟုတ် သူတို့အထဲမှ တစ်ဖက်ဖက်က မကျေနပ်လျှင်၊ သူတို့သည် အသင်းတော်၏ ပထမဥက္ကဋ္ဌအဖွဲ့ရှိရာ အတိုင်ပင်ခံမင်းအဖွဲ့သို့ အယူခံဝင်နိုင်ကြ၊ ထို့အတူ ပြန်၍ကြားနာခြင်းကို ခံယူနိုင်ကြ၏၊ ဖော်ပြပါ ဆုံးဖြတ်ချက်ကို မပြုထားခဲ့လေသည့်ပမာ၊ ယခင်ရေးထားသည့် ပုံစံအတိုင်း ထိုအမှုကို စီမံကြရမည်။

၂၈ ဤအဝေးရောက် ယဇ်ပုရောဟိတ်မင်း အတိုင်ပင်ခံအဖွဲ့ကို အသင်းတော် ကိစ္စများနှင့် စပ်လျဉ်းသည့် အခက်ခဲဆုံးအမှုများ အတွက်သာ ခေါ်ရမည်။ အဘယ် သာမန် သို့မဟုတ် ရိုးရိုးအမှုမျှ ထိုကဲ့သို့သော အတိုင်ပင်ခံအဖွဲ့ကို ခေါ်ရန်လုံလောက်သောအကြောင်းမရှိ။

၂၉ ထိုကဲ့သို့သော အတိုင်ပင်ခံအဖွဲ့ကို ခေါ်ဖို့ လိုအပ်ခြင်းရှိမရှိကို ပြောရန် ခရီးသွားသို့မဟုတ် အဝေးရောက်နေသော ယဇ်ပုရောဟိတ်မင်းအဖွဲ့၌ အခွင့်ရှိ၏။

၃၀ အတိုင်ပင်ခံမင်းအဖွဲ့ သို့မဟုတ် ခရီးသွားအဝေးရောက် ယဇ်ပုရောဟိတ်မင်းများ၊ တမန်တော်တစ်ဆယ့်နှစ်ပါး ပါဝင်သည့် ခရီးသွားအတိုင်ပင်ခံမင်းအဖွဲ့တို့ကြား၌ သူတို့၏ ဆုံးဖြတ်ချက်များတွင် ကွဲပြားချက်တစ်ခုရှိ၏။

၃၁ ယခင်အဖွဲ့၏ ဆုံးဖြတ်ချက်၌ အယူခံဝင်ခြင်းရှိနိုင်၏။ သို့ရာတွင် နောက်အဖွဲ့၏ ဆုံးဖြတ်ချက်၌ မရှိနိုင်။

၃၂ လွန်ကျူးခြင်းပါဝင်သော အမှု၌သာ နောက်အဖွဲ့သည် အသင်းတော်၏ အထွေထွေ အခွင့်အာဏာပိုင်တို့အားဖြင့် မေးမြန်းရန် အခေါ်ခံရနိုင်၏။

၃၃ အယူခံဝင်ခြင်း၊ သက်သေခံများ၊ တွဲဖက်ပါရှိသော ဖော်ပြချက်များကို စုံစမ်း စစ်ဆေးပြီးနောက်၊ ထိုကဲ့သို့ အယူခံဝင်လာနိုင်သည့် အမှုကို ပြန်လည်ကြားနာရန် တရားမျှတစွာ ခံစားပိုင်ခွင့် ရှိမရှိ ဆုံးဖြတ်ရန် ဥက္ကဋ္ဌ သို့မဟုတ် အသင်းတော်၏ ပထမဥက္ကဋ္ဌအဖွဲ့ရှိရာ ဥက္ကဋ္ဌတို့၌ အခွင့်ရှိရမည့်အကြောင်း ဆုံးဖြတ်ကြ၏။

၃၄ ထို့နောက်တွင် အတိုင်ပင်ခံတစ်ဆယ့်နှစ်ဦးသည် အဘယ်သူပထမဆုံး ပြောသင့်ကြောင်း၊ စာရေးတံချ သို့မဟုတ် ဆန္ဒမဲပေးခြင်းကို ဆက်၍ပြုကြ၏၊ ရလဒ်မှာ အမည်အားဖြင့် ၁၊ အော်လီဗာကောင်ဒရီ။ ၂၊ ဂျိုးဇက်ကိုး။ ၃၊ ဆင်မြူရယ်အိပ်ခ်ျစမစ်။ ၄၊ လုဂျွန်ဆင်။ ၅၊ ဂျွန်အက်စ်ကာတာ။ ၆၊ ဆီလ်ဗက်စတာစမစ်။ ၇၊ ဂျွန်ဂျွန်ဆင်။ ၈၊ အော်ဆန်ဟိုက်။ ၉၊ ယာရက်ကာတာ။ ၁၀၊ ဂျိုးဇက်စမစ်အကြီး။ ၁၁၊ ဂျွန်စမစ်။ ၁၂၊ မာတင်ဟဲရစ်တို့ဖြစ်၏။ဆုတောင်းပြီးနောက် ညီလာခံကို ရပ်နား၏။

အော်လီဗာကောင်ဒရီ၊

အော်ဆန်ဟိုက်

စာရေးများ