ဩဝါဒနှင့် ပဋိညာဉ်များ ၇၆

အပိုဒ်ငယ် ၇၆

၁၈၃၂ ခု၊ ဖေဖော်ဝါရီ ၁၆ ရက်၊ ဟိုင်ရမ်၊ အိုဟိုင်းရို၌ ပရောဖက်ဂျိုးဇက်စမစ်နှင့် ဆစ်ဒနီရစ်ဂဒွန်တို့အား ပေးတော်မူခဲ့သည့် ရူပါရုံ။ ဤရူပါရုံအကြောင်းမှတ်တမ်း၏ ကျမ်းဦးစကားအဖြစ်၊ ဂျိုးဇက်စမစ်၏ သမိုင်းက ဖော်ပြသည်မှာ “အမ်းဟက်ညီလာခံမှ ကျွန်ုပ်ပြန်လာပြီးနောက်၊ ကျမ်းစာဘာသာပြန်ခြင်းကို ကျွန်ုပ်ပြန်လည်စတင်ခဲ့၏။ လက်ခံရရှိခဲ့လေသည့် အမျိုးမျိုးသောဗျာဒိတ်တော်များအရ၊ လူသား၏ ကယ်တင်ခြင်းနှင့် စပ်လျဉ်းသည့် အရေးကြီးသော အချက်များစွာကို သမ္မာကျမ်းမှ နုတ်ယူထားလေခြင်း၊ သို့မဟုတ် စုဆောင်းမပြုစုမီ ပျောက်ဆုံးလေခြင်းမှာ ထင်ရှားပေ၏။ ကျန်ရှိခဲ့လေသော အမှန်တရားများအရ၊ ဘုရားသခင်သည် လူတိုင်းကို ကိုယ်ခန္ဓာရှိအကျင့်များအတိုင်း အကျိုးကျေးဇူးကို ပေးလျှင်၊ သန့်ရှင်းသူတို့၏ ထာဝရအိမ်အဖြစ် ရည်ညွှန်းသည့် ‘ကောင်းကင်ဘုံ’ ဟူသော စကားရပ်၌ တစ်ခုထက်ပိုသော နိုင်ငံတော်များပါဝင်ရမည်မှာ အထင်အရှား ရှိလာပေ၏။ သို့ဖြစ်သောကြောင့်၊ … ရှင်ယောဟန်၏ ဧဝံဂေလိတရားတော်ကို ဘာသာပြန်စဉ်၌ ကျွန်ုပ်ကိုယ်တိုင်နှင့် အသင်းလူကြီးရစ်ဂဒွန်တို့သည် အောက်ပါရူပါရုံကို မြင်ခဲ့ကြ၏။” ဤရူပါရုံကို ပေးလေသည့်အချိန်တွင်၊ ပရောဖက်သည် ယောဟန် ၅း၂၉၊ ကို ဘာသာပြန်လျက်ရှိ၏။

၁–၄၊ ကိုယ်တော်ရှင်သည် ဘုရားသခင်ဖြစ်၏။ ၅–၁၀၊ သစ္စာရှိသောသူအပေါင်းတို့အား နိုင်ငံတော်၏ နက်နဲခြင်းကို ဖော်ပြလိမ့်မည်။ ၁၁–၁၇၊ တရားသောသူများ သို့မဟုတ် မတရားသောသူများ၏ ရှင်ပြန်ထမြောက်ခြင်း၌ ခပ်သိမ်းသောသူတို့ ထွက်လာကြလိမ့်မည်။ ၁၈–၂၄၊ များစွာသော လောကတို့၌ နေထိုင်သောသူတို့သည် ယေရှုခရစ်တော်၏ အပြစ်ဖြေခြင်းမင်္ဂလာအားဖြင့် ဘုရားသခင်အဖို့ ဖြစ်ဖွားစေသည့် သားများနှင့်သမီးများဖြစ်ကြ၏။ ၂၅–၂၉၊ ဘုရားသခင်၏ ကောင်းကင်တမန်တစ်ပါး ကျရှုံးပြီး နတ်ဆိုးဖြစ်လာ၏။ ၃၀–၄၉၊ ပျက်စီးခြင်း၏သားတို့သည် ထာဝရအပြစ်ဒဏ်ရောက်ခြင်းကို ခံစားကြရ၏၊ အခြားသောသူခပ်သိမ်းတို့သည် ကယ်တင်ခြင်းပမာဏအချို့ကို ရရှိကြ၏။ ၅၀–၇၀၊ ဆီလက်ရှယ်လ်နိုင်ငံတော်၌ ချီးမြှောက်ခံကြရသူတို့၏ ဘုန်းအသရေနှင့် အကျိုးကျေးဇူးတို့ကို ဖော်ပြထား၏။ ၇၁–၈၀၊ ထီရက်စ်ထရီရယ်လ်နိုင်ငံတော်ကို အမွေခံမည့်သူများကို ဖော်ပြထား၏။ ၈၁–၁၁၃၊ ထီလက်စ်ရှယ်လ်၊ ထီရက်စ်ထရီရယ်လ်နှင့် ဆီလက်ရှယ်လ်ဘုန်းအသရေတို့၌ ရှိကြသောသူတို့၏ အခြေအနေကို ရှင်းပြထား၏။ ၁၁၄–၁၁၉၊ သစ္စာရှိသောသူတို့သည် ဘုရားသခင့်နိုင်ငံတော်၏ နက်နဲသောအရာတို့ကို သန့်ရှင်းသောဝိညာဉ်တော်၏ တန်ခိုးတော်အားဖြင့် မြင်နိုင်၊ နားလည်နိုင်ကြ၏။

၁ နားထောင်ကြလော့၊ အို အသင်ကောင်းကင်တို့၊ ထို့အတူ နားညောင်းကြလော့၊ အို မြေကြီး၊ ထိုအရပ်တို့၌ နေထိုင်ကြသူ သင်တို့သည်လည်း ရွှင်လန်းဝမ်းမြောက်ကြလော့၊ အကြောင်းမူကား၊ ကိုယ်တော်ရှင်သည် ဘုရားသခင်ဖြစ်၏။ သူမှတစ်ပါး ကယ်တင်ရှင်မရှိ။

၂ ကြီးမြတ်သည်မှာ သူ၏ဉာဏ်ပညာတော်ဖြစ်၏၊ အံ့ဩဖွယ်ကောင်းသည်မှာ သူ၏တရားလမ်းတော်တို့ဖြစ်၏၊ သူ့အမှုတော်တို့၏ ပမာဏကိုလည်း အဘယ်သူမျှ ရှာမတွေ့နိုင်။

၃ သူ၏အကြံအစည်တော်များ ကျရှုံးခြင်းမရှိ၊ သူ၏လက်တော်ကို ရုပ်သိမ်းနိုင်သောသူများလည်း တစ်ဦးမျှမရှိ။

၄ ထာဝရကာလမှ ထာဝရကာလသို့တိုင်အောင် သူသည် အတူတူဖြစ်၏၊ သူ၏နှစ်များသည်လည်း အဘယ်တော့မျှ မကုန်ဆုံးရ။

၅ အကြောင်းမူကား၊ ကိုယ်တော်ရှင်မိန့်တော်မူသည်မှာ—ငါ၊ ကိုယ်တော်ရှင်သည် ငါ့ကို ကြောက်သောသူတို့အား ကရုဏာကြီး၍ ကျေးဇူးပြုတော်မူ၏၊ ဖြောင့်မတ်ခြင်းနှင့် သမ္မာတရားတို့ဖြင့် အဆုံးတိုင်အောင် ငါ့ကို အစေခံသည့်သူတို့ကို ဂုဏ်ပြုရာ၌လည်း မွေ့လျော်၏။

၆ ကြီးမြတ်ခြင်းသည် သူတို့၏အကျိုးကျေးဇူးဖြစ်လိမ့်မည်၊ ထာဝရသည် သူတို့၏ဘုန်းအသရေဖြစ်လိမ့်မည်။

၇ သူတို့အား၊ ငါသည် ခပ်သိမ်းသောနက်နဲခြင်းတို့ကို၊ အထူးသဖြင့်၊ ရှေးနေ့ရက်များကတည်းက ရှိခဲ့သည့် ငါ့နိုင်ငံတော်၏ကွယ်ဝှက်ထားသည့် ခပ်သိမ်းသောနက်နဲခြင်းတို့ကို ဖော်ပြတော်မူမည်၊ နောင်လာမည့် ကာလတို့၌လည်း၊ နိုင်ငံတော်နှင့်စပ်ဆိုင်သည့် ခပ်သိမ်းသောအရာများနှင့် စပ်လျဉ်းသည့် ငါ့အလိုတော်၏စေတနာကို သူတို့အား ငါဖော်ပြတော်မူမည်။

၈ ထိုမှတစ်ပါး၊ ထာဝရကာလ၏ အံ့မခန်းချီးမွမ်းဖွယ်အမှုများကိုပင် သူတို့သိကြလိမ့်မည်၊ ဖြစ်လာမည့်အမှုများ၊ များစွာသောမျိုးဆက်တို့၏အမှုများကိုလည်း သူတို့ကို ငါပြတော်မူမည်။

၉ သူတို့၏ဉာဏ်ပညာသည်လည်း ကြီးမြတ်လိမ့်မည်၊ သူတို့၏နားလည်ခြင်းသည် ကောင်းကင်ကို ထိလိမ့်မည်။ သူတို့ရှေ့၌ ဉာဏ်ပညာရှိသူတို့၏ ဉာဏ်ပညာသည် ပျက်စီးလိမ့်မည်၊ ပညာတတ်တို့၏ နားလည်ခြင်းသည်လည်း အကျိုးမဲ့ဖြစ်လိမ့်မည်။

၁၀ အကြောင်းမူကား၊ ငါ၏ဝိညာဉ်တော်အားဖြင့် ငါသည် သူတို့ကို အလင်းသို့ရောက်စေမည်၊ ငါ၏ တန်ခိုးတော်အားဖြင့်လည်း ငါသည် သူတို့အား ငါ့အလိုတော်၏လျှို့ဝှက်သော အရာတို့ကို ဖော်ပြတော်မူမည်—အထူးသဖြင့်၊ မျက်စိဖြင့် မမြင်ရစဖူး၊ နားဖြင့်လည်း မကြားရစဖူး၊ လူသား၏ စိတ်နှလုံးထဲသို့ မဝင်ရောက်စဖူးသေးသည့် ထိုအရာများပင်တည်း။

၁၁ ကျွန်ုပ်တို့၊ ဂျိုးဇက်စမစ်အငယ်နှင့် ဆစ်ဒနီရစ်ဂဒွန်တို့သည် ဝိညာဉ်တော်၌ ရှိလျက်၊ ဖေဖော်ဝါရီ တစ်ဆယ့်ခြောက်ရက်မြောက်၊ ကိုယ်တော်ရှင်၏ တစ်ထောင့်ရှစ်ရာသုံးဆယ့်နှစ်နှစ်တွင်—

၁၂ ဝိညာဉ်တော်၏ တန်ခိုးတော်အားဖြင့် ကျွန်ုပ်တို့၏ မျက်စိများ ပွင့်လေပြီး၊ ကျွန်ုပ်တို့၏ နားလည်ခြင်းသည် အလင်းသို့ရောက်သဖြင့်၊ ဘုရားသခင်၏အရာတို့ကို မြင်၍ နားလည်ကြ၏—

၁၃ ကမ္ဘာမတည်ရှိမီ ရှေးဦးစွာကတည်းက ရှိလေသည့်အရာများပင်ဖြစ်၏၊ ထိုအရာတို့သည်ကား၊ ခမည်းတော်၏ရင်၌ ရှေးဦးစွာကပင် ရှိလေသည့်သူတည်းဟူသော သူဖြစ်ဖွားစေသည့် တစ်ပါးတည်းသောသားတော်အားဖြင့် ခမည်းတော်စီရင်လေသည့်အရာများဖြစ်၏။

၁၄ သူ့အကြောင်းကို ကျွန်ုပ်တို့သက်သေခံကြ၏။ ကျွန်ုပ်တို့သက်သေခံသည့်အရာမှာ သားတော်ဖြစ်သူ ယေရှုခရစ်တော်၏ ဧဝံဂေလိတရားတော်အပြည့်အစုံဖြစ်၏၊ သူ့ကို ကျွန်ုပ်တို့မြင်ခဲ့ကြပြီး ကျွန်ုပ်တို့သည် ကောင်းကင်ဘုံရှင်ရူပါရုံ၌ သူနှင့်စကားပြောခဲ့ကြ၏။

၁၅ အကြောင်းမူကား၊ ကျွန်ုပ်တို့ကို ကိုယ်တော်ရှင်ခန့်အပ်သည့် ဘာသာပြန်ခြင်းအမှုကို ကျွန်ုပ်တို့ ဆောင်ရွက်စဉ်တွင်၊ ကျွန်ုပ်တို့သည် ယောဟန်အခန်းကြီးငါး အခန်းငယ်နှစ်ဆယ့်ကိုးသို့ ရောက်လာခဲ့ပြီး ကျွန်ုပ်တို့ကို အောက်ပါအတိုင်း ဖော်ပြခဲ့၏—

၁၆ ဆိုလေသည်ကား၊ သေသူတို့၏ရှင်ပြန်ထမြောက်ခြင်း၊ လူသားတော်၏ အသံကို ကြားနာရမည့်သူတို့အကြောင်းဖြစ်၏။

၁၇ အကောင်းကို ကျင့်သောသူတို့သည် တရားသောသူတို့၏ ရှင်ပြန်ထမြောက်ခြင်း၌၊ အဆိုးကို ကျင့်သောသူတို့သည် မတရားသောသူတို့၏ ရှင်ပြန်ထမြောက်ခြင်း၌ ထွက်လာကြလိမ့်မည်။

၁၈ ယခုတွင်၊ ဤအရာက ကျွန်ုပ်တို့ကို အံ့ဩစေ၏၊ အကြောင်းမူကား၊ ဝိညာဉ်တော်အားဖြင့် ကျွန်ုပ်တို့ကို ဖော်ပြလေ၏။

၁၉ ဤအရာတို့ကို ကျွန်ုပ်တို့စဉ်းစားဆင်ခြင်နေစဉ်တွင်၊ ကျွန်ုပ်တို့၏ ဉာဏ်မျက်စိကို ကိုယ်တော်ရှင်ထိ၍ ပွင့်လေသဖြင့်၊ ပတ်ဝန်းကျင်၌ ကိုယ်တော်ရှင်၏ ဘုန်းတော်ထွန်းတောက်၏။

၂၀ ကျွန်ုပ်တို့သည်လည်း ခမည်းတော်၏လက်ယာတော်ဘက်၌ သားတော်၏ဘုန်းတော်ကို မြင်ကြရပြီး၊ သူ၏ပြည့်စုံခြင်းကို ရရှိကြ၏။

၂၁ သန့်ရှင်းသော ကောင်းကင်တမန်များ၊ ထို့အတူ သန့်ရှင်းစင်ကြယ်စေပြီးလေသောသူများ ဘုရားသခင်ကို၊ ထို့အတူ သိုးသငယ်ကို ကိုးကွယ်လျက်၊ သူ့ကို ကာလအစဉ်အဆက် အမြဲကိုးကွယ်ကြသည်ကိုလည်း သူ၏ပလ္လင်ရှေ့၌ မြင်ကြရ၏။

၂၂ ယခုမူကား၊ သူ့အကြောင်းကို များစွာသောသက်သေခံချက်များ ပြီးလေပြီးနောက်၊ ဤအရာသည်ကား၊ သူအသက်ရှင်တော်မူကြောင်း၊ သူ့အကြောင်း နောက်ဆုံးအနေအဖြစ် ကျွန်ုပ်တို့ပေးသည့် သက်သေခံချက်ပေတည်း။

၂၃ အကြောင်းမူကား၊ ကျွန်ုပ်တို့သည် သူ့ကို ဘုရားသခင်၏လက်ယာတော်ဘက်၌ပင် မြင်ကြရ၏။ သူသည် ခမည်းတော်ဖြစ်ဖွားစေသည့် တစ်ပါးတည်းသောသားတော်ဖြစ်ကြောင်း သက်သေခံသည့် အသံကိုလည်း ကျွန်ုပ်တို့ကြားကြပေ၏။

၂၄ သူ့အားဖြင့်၊ ထို့အတူ သူမှတစ်ဆင့်၊ ထို့အတူ သူ့ထံမှ ကမ္ဘာတို့ကို ဖန်ဆင်းထားလေခဲ့၊ ဖန်ဆင်းထားလျက်ရှိပေ၏၊ ထိုအရပ်တို့၌ နေထိုင်သောသူများသည်လည်း ဘုရားသခင်အဖို့ ဖြစ်ဖွားစေသည့် သားများနှင့် သမီးများ ဖြစ်ကြ၏။

၂၅ ကျွန်ုပ်တို့မြင်၍၊ သက်သေခံကြသည်မှာ၊ ဘုရားသခင်၏ မျက်မှောက်တော်၌ အခွင့်အာဏာရှိသည့် ကောင်းကင်တမန်တစ်ပါး၊ ထိုတမန်သည် ခမည်းတော်ချစ်သည့်၊ ထို့အတူ ခမည်းတော်၏ ရင်၌ ရှိလေသူတည်းဟူသော ခမည်းတော်ဖြစ်ဖွားစေသည့် တစ်ပါးတည်းသောသားတော်ကို ဆန့်ကျင်ပုန်ကန်၍ ဘုရားသခင်နှင့် သားတော်၏ မျက်မှောက်တော်မှ ပစ်ချခံရသည့် အကြောင်း၊

၂၆ ပျက်စီးခြင်းဟု အခေါ်ခံရကြောင်းပေတည်း၊ အကြောင်းမူကား၊ ကောင်းကင်သားတို့သည် သူ့အတွက် ငိုကြွေးကြ၏—သူသည်ကား၊ လူစီဖာ၊ နံနက်သားဖြစ်၏။

၂၇ ကျွန်ုပ်တို့မြင်ကြရ၏၊ ကြည့်ဦးလော့၊ သူသည် လဲကျလေပြီတကား၊ နံနက်သားသည်ပင် လဲကျလေပြီတကား။

၂၈ ဝိညာဉ်တော်၌ ကျွန်ုပ်တို့ရှိနေသေးစဉ်တွင်၊ ရူပါရုံကို ရေးရမည့်အကြောင်း ကျွန်ုပ်တို့ကို ကိုယ်တော်ရှင်မိန့်တော်မူ၏။ အကြောင်းမူကား၊ ဘုရားသခင်ကို ဆန့်ကျင်ပုန်ကန်ပြီး၊ ကျွန်ုပ်တို့ဘုရားသခင်နှင့် သူ့ခရစ်တော်၏နိုင်ငံတော်ကို သိမ်းယူဖို့ကြိုးစားသည့်သူ၊ စာတန်၊ ရှေးမြွေဟောင်း၊ နတ်ဆိုးကိုပင် ကျွန်ုပ်တို့မြင်ကြ၏—

၂၉ သို့ဖြစ်၍၊ သူသည် ဘုရားသခင်၏ သန့်ရှင်းသူတို့နှင့် စစ်တိုက်၏၊ သူတို့ကို ပတ်လည်ဝိုင်းထား၏။

၃၀ သူစစ်တိုက်၍ အောင်နိုင်ခဲ့သူတို့၏ ဒုက္ခဝေဒနာခံစားခြင်းများအကြောင်း ရူပါရုံကို ကျွန်ုပ်တို့မြင်ကြရ၏၊ ကျွန်ုပ်တို့ထံသို့ ကိုယ်တော်ရှင်၏အသံ ရောက်လာသည်ကား၊

၃၁ ငါ၏တန်ခိုးတော်ကိုသိကြပြီး၊ ထိုတန်ခိုးတော်ကို ခံယူသူများဖြစ်စေလျက်၊ နတ်ဆိုး၏ တန်ခိုးအားဖြင့် အနိုင်ခံရဖို့၊ ထို့အတူ သမ္မာတရားကို ငြင်းဆိုဖို့နှင့် ငါ၏တန်ခိုးတော်ကို ကြိမ်းပဖို့ မိမိတို့ကိုယ်ကို အခွင့်ပေးကြသူအပေါင်းတို့နှင့်စပ်လျဉ်း၍ ကိုယ်တော်ရှင် မိန့်တော်မူသည်မှာ—

၃၂ သူတို့သည်ကား၊ ပျက်စီးခြင်း၏သားများ ဖြစ်ကြ၏၊ ဖွားမြင်ခြင်းကို မခံရလျှင် အနေသာ၍ကောင်းပေလိမ့်မည်ဟု ငါဆိုသည့်သူများဖြစ်၏။

၃၃ အကြောင်းမူကား၊ သူတို့သည် အမျက်ခွက်များ၊ ထာဝရကာလ၌ နတ်ဆိုးနှင့် သူ၏တမန်တို့နှင့်အတူ ဘုရားသခင်၏ အမျက်တော်ကိုခံစားရဖို့ ကြမ္မာငင်ကြသူများဖြစ်၏။

၃၄ သူတို့နှင့်စပ်လျဉ်း၍ ငါမိန့်တော်မူခဲ့သည်မှာ ဤလောက၌ အပြစ်လွှတ်ခြင်းမရှိ၊ လာမည့်လောက၌လည်းမရှိ—

၃၅ သန့်ရှင်းသောဝိညာဉ်တော်ကို လက်ခံရရှိကြလေပြီးနောက် ငြင်းဆိုကြ၍၊ ခမည်းတော်ဖြစ်ဖွားစေသည့် တစ်ပါးတည်းသောသားတော်ကို ငြင်းဆိုလျက်၊ သူတို့စိတ်နှလုံး၌ သူ့ကို လက်ဝါးကပ်တိုင်မှာတင်၍ ကွပ်မျက်ပြီး ထင်ရှားစွာ အသရေရှုတ်ချကြ၏။

၃၆ ဤသူတို့သည်ကား၊ ကန့်နှင့်ရောသောမီးအိုင်ထဲသို့ နတ်ဆိုးနှင့် သူ၏တမန်တို့နှင့်အတူ ထွက်သွားကြမည့်သူများဖြစ်၏—

၃၇ သူတို့သည်သာလျှင် ဒုတိယသေခြင်းမှ တန်ခိုးတစ်စုံတစ်ရာ သက်ရောက်မည့်သူများ ဖြစ်၏။

၃၈ အထူးသဖြင့်၊ သူတို့သည်သာလျှင် ကိုယ်တော်ရှင်၏ အမျက်တော်ကြောင့် ဒုက္ခဝေဒနာခံစားခြင်းများ၏နောက်၌၊ သူ၏ ကာလအချိန်တန်သောအခါ ရွေးနုတ်မခံရမည့်သူများ အမှန်ဖြစ်၏။

၃၉ အကြောင်းမူကား၊ ကျန်သောသူခပ်သိမ်းတို့ကို သေသူတို့၏ရှင်ပြန်ထမြောက်ခြင်းအားဖြင့်၊ ထွက်လာစေလိမ့်မည်၊ ကွပ်မျက်ခံရလေသူ၊ ကမ္ဘာများကို မဖန်ဆင်းမီ ခမည်းတော်၏ ရင်၌ရှိလေသူတည်းဟူသော၊ သိုးသငယ်၏ အောင်နိုင်ခြင်းနှင့် ဘုန်းတော်တို့ အားဖြင့်ပင်တည်း။

၄၀ ဤအရာသည်ကား၊ ဧဝံဂေလိတရားတော်၊ ဝမ်းသာစရာသတင်း၊ ကောင်းကင်ဘုံမှနေ၍ ကျွန်ုပ်တို့ထံသက်သေခံသည့် အသံဖြစ်၏—

၄၁ လောကအတွက် လက်ဝါးကပ်တိုင်မှာကွပ်မျက်ခံရဖို့၊ ထို့အတူ လောကီသားတို့၏အပြစ်များကို ခံခြင်းငှာ၊ ထို့အတူ လောကကို သန့်ရှင်းစေခြင်းငှာ၊ ထို့အတူ ခပ်သိမ်းသော မတရားမှုမှ သန့်စင်စေခြင်းငှာ၊ သူ၊ ယေရှုသည်ပင်၊ လောကထဲသို့ ကြွလာတော်မူခဲ့သည့်အကြောင်း၊

၄၂ ခမည်းတော်က မိမိတန်ခိုးတော်အောက်၌ထား၍ ဖန်ဆင်းတော်မူခဲ့သူတည်းဟူသောသူ့အားဖြင့် ခပ်သိမ်းသောသူတို့ ကယ်တင်ခြင်းသို့ ရောက်နိုင်စေသည့် အကြောင်းပေတည်း။

၄၃ သူသည် ခမည်းတော်ကို ချီးမွမ်း၏၊ ခမည်းတော်ဖော်ပြတော်မူလေပြီးနောက်၊ သားတော်ကို ငြင်းဆိုကြသည့် ပျက်စီးခြင်း၏သားများမှတစ်ပါး၊ သူ့လက်ဖြင့် ဖန်ဆင်းတော်မူသည့် ခပ်သိမ်းသောအရာတို့ကို ကယ်တင်၏။

၄၄ သို့ဖြစ်၍၊ ထိုသူတို့မှတစ်ပါး၊ ခပ်သိမ်းသော အရာတို့ကို သူကယ်တင်တော်မူ၏—ထိုသူတို့သည် မိမိတို့ပိုးလောက်များ သေခြင်းမရှိရာ၊ ထို့အတူ မီးမငြိမ်းသည့် မိမိတို့၏ စိတ်ဆင်းရဲ ကိုယ်ဆင်းရဲဖြစ်ခြင်းတွင်၊ ထာဝရကာလ၌ နတ်ဆိုးနှင့် သူ၏တမန်တို့နှင့်အတူ အစိုးရဖို့၊ အဆုံးမရှိသည့်အပြစ်ဒဏ်၊ ထာဝရအပြစ်ဒဏ်ဖြစ်သည့် ထာဝရတည်မြဲသည့် အပြစ်ဒဏ်ထဲသို့ သွားကြလိမ့်မည်—

၄၅ ထိုအရာ၏အဆုံးကိုသော်လည်းကောင်း၊ ထိုအရာ၏ နေရာကိုသော်လည်းကောင်း၊ သူတို့၏စိတ်ဆင်းရဲကိုယ်ဆင်းရဲဖြစ်ခြင်းကိုသော်လည်းကောင်း အဘယ်သူမျှမသိ။

၄၆ ထိုအရာကို ခံယူသူဖြစ်စေသည့် သူများမှတစ်ပါး၊ လူသားထံသို့ မဖော်ပြလေခဲ့၊ ဖော်ပြထားခြင်းလည်းမရှိ၊ ဖော်ပြလိမ့်မည်လည်းမဟုတ်။

၄၇ သို့သော်လည်း၊ ငါ၊ ကိုယ်တော်ရှင်သည် ရူပါရုံအားဖြင့် များစွာသောသူများထံသို့ ပြတော်မူ၏၊ သို့ရာတွင် ချက်ချင်းတစ်ဖန်ပြန်၍ပိတ်၏။

၄၈ သို့ဖြစ်၍၊ ထိုအရာ၏ အဆုံး၊ အကျယ်၊ အမြင့်၊ အနက်နှင့် နက်နဲခြင်းကို သူတို့နားလည်ခြင်း မရှိကြ၊ ဤပြစ်ဒဏ်ချမှတ်ခြင်းသို့ ခန့်ထားခံရသောသူများမှတစ်ပါး အဘယ်သူမျှလည်း နားမလည်ကြ။

၄၉ ဆိုလေသည့်အသံကို ငါတို့ကြားရသည်ကား၊ ရူပါရုံကို ရေးလော့၊ အကြောင်းမူကား ကြည့်ပါ၊ ဤအရာမှာ ဘုရားမဲ့နေသောသူတို့ ဒုက္ခဝေဒနာခံစားခြင်းများအကြောင်း ရူပါရုံ၏အဆုံးဖြစ်၏။

၅၀ ထိုမှတစ်ဖန်၊ ကျွန်ုပ်တို့သက်သေခံကြပါ၏—အကြောင်းမူကား၊ ကျွန်ုပ်တို့ မြင်ရကြားရ၏၊ ဤအရာမှာ တရားသောသူတို့၏ရှင်ပြန်ထမြောက်ခြင်း၌ ထွက်လာကြမည့်သူတို့နှင့် စပ်လျဉ်း၍ ခရစ်တော်၏ ဧဝံဂေလိတရားတော်အကြောင်း သက်သေခံချက်ဖြစ်၏—

၅၁ ထိုသူတို့သည်ကား၊ ယေရှုအကြောင်း သက်သေခံချက်ကို လက်ခံကြသော၊ ထို့အတူ သူ၏နာမတော်ကို ယုံကြည်ပြီး၊ သူ၏နှစ်မြှုပ်ခြင်းနည်းတူ သူ၏နာမတော်၌ ရေထဲတွင် နှစ်မြှုပ်ခံလျက် ဗတ္တိဇံခံကြသောသူများဖြစ်၏၊ ဤအရာသည်လည်း သူပေးထားတော်မူလေသည့် ပညတ်တော်အတိုင်းဖြစ်၏—

၅၂ ပညတ်တော်များကို စောင့်ထိန်းခြင်းအားဖြင့် သူတို့၏ခပ်သိမ်းသောအပြစ်များမှ ဆေးကြော၍၊ သန့်စင်စေခြင်းကို ခံရနိုင်ပြီး၊ ဤအခွင့်သို့ ခန့်ထားပြီး၊ တံဆိပ်ခတ်ခံထားရသူ၏ လက်တင်ခြင်းအားဖြင့် သန့်ရှင်းသောဝိညာဉ်တော်ကို လက်ခံရရှိနိုင်ကြစေကြောင်းပေတည်း။

၅၃ ယုံကြည်ခြင်းအားဖြင့် အောင်နိုင်ကြသူများ၊ ထို့အတူ ဖြောင့်မတ်မှန်ကန်သော သူအပေါင်းတို့အပေါ် ခမည်းတော်သွန်းလောင်းတော်မူသည့် ကတိတော်နှင့်ယှဉ်သော သန့်ရှင်းသောဝိညာဉ်တော်အားဖြင့် တံဆိပ်ခတ်ခံရသူများလည်း ဖြစ်ကြ၏။

၅၄ သူတို့သည် သားဦး၏အသင်းတော်ဖြစ်သောသူများဖြစ်ကြ၏။

၅၅ သူတို့သည် လက်ထဲသို့ ခပ်သိမ်းသောအရာများကို ခမည်းတော်ပေးတော်မူခဲ့သည့်သူများ ဖြစ်ကြ၏—

၅၆ သူတို့သည် သူ၏ပြည့်စုံခြင်း၊ ထို့အတူ သူ၏ဘုန်းတော်ကို ရရှိကြလေသူများတည်းဟူသော ယဇ်ပုရောဟိတ်များနှင့် ရှင်ဘုရင်များ ဖြစ်ကြ၏။

၅၇ တစ်ပါးတည်းသောသားတော်၏ အသင်းအတိုင်းဖြစ်လေသည့် ဧနောက်၏ အသင်းအတိုင်း ဖြစ်လေသော မေလခိဇေဒက်၏ အသင်းအတိုင်း၊ အမြင့်ဆုံးသောဘုရား၏ ယဇ်ပုရောဟိတ်များလည်း ဖြစ်ကြ၏။

၅၈ သို့ဖြစ်၍၊ ရေးထားသည့်အတိုင်း၊ သူတို့သည် ဘုရားများ၊ ဘုရားသခင်၏သားများပင် ဖြစ်ကြ၏—

၅၉ သို့ဖြစ်၍၊ ခပ်သိမ်းသော အရာတို့သည် သူတို့အဖို့ ဖြစ်ကြ၏၊ အသက်ရှင်ခြင်းဖြစ်စေ၊ သေခြင်းဖြစ်စေ၊ မျက်မှောက်အရာဖြစ်စေ၊ ဖြစ်လာမည့်အရာဖြစ်စေ ခပ်သိမ်းသော အရာတို့သည် သူတို့အဖို့ ဖြစ်ကြ၏၊ သူတို့သည်လည်း ခရစ်တော်အဖို့ ဖြစ်ကြ၏၊ ခရစ်တော်သည်လည်း ဘုရားသခင်အဖို့ ဖြစ်တော်မူ၏။

၆၀ သူတို့သည် ခပ်သိမ်းသောအရာတို့ကို အောင်နိုင်လိမ့်မည်။

၆၁ သို့ဖြစ်၍၊ အဘယ်သူမျှ လူသား၌ ဝါကြွားခြင်း မရှိစေနှင့်၊ ခပ်သိမ်းသောရန်သူတို့ကို သူ့ခြေအောက်၌ ထား၍အောင်မည့် ဘုရားသခင်၌သာလျှင် ဝါကြွားစေလော့။

၆၂ ဤသူတို့သည် ဘုရားသခင်နှင့် သူ့ခရစ်တော်၏မျက်မှောက်တော်၌ ကာလအစဉ်အဆက် အမြဲနေထိုင်ကြရလိမ့်မည်။

၆၃ ဤသူတို့သည်ကား၊ သူသည် မိမိလူမျိုးတို့ကို မြေကြီးပေါ်မှာ အုပ်စိုးဖို့ ကောင်းကင် တိမ်တိုက်ထဲ၌ ကြွလာတော်မူမည့်အချိန်တွင်၊ သူနှင့်အတူ ဆောင်ယူတော်မူမည့်သူများ ဖြစ်ကြ၏။

၆၄ ဤသူတို့သည် ပထမရှင်ပြန်ထမြောက်ခြင်းကို ဝင်စားကြမည့်သူများဖြစ်ကြ၏။

၆၅ ဤသူတို့သည် တရားသောသူတို့၏ ရှင်ပြန်ထမြောက်ခြင်း၌ ထွက်လာကြမည့်သူများ ဖြစ်ကြ၏။

၆၆ ဤသူတို့သည် ဇိအုန်တောင်သို့လည်းကောင်း၊ အသက်ရှင်တော်မူသော ဘုရားသခင်၏ မြို့တည်းဟူသော ခပ်သိမ်းသောအရာတို့ထက် အသန့်ရှင်းဆုံးဖြစ်သည့် ကောင်းကင်ဘုံရှင်နေရာသို့ လာကြသူများဖြစ်၏။

၆၇ ဤသူတို့သည် မရေတွက်နိုင်အောင်ရှိသော ကောင်းကင်တမန်တို့၏ အစုအဝေးသို့ လည်းကောင်း၊ အထွေထွေအစည်းအဝေးနှင့် ဧနောက်၏၊ ထို့အတူ သားဦး၏ အသင်းတော်သို့လည်းကောင်း လာကြလေသူများ ဖြစ်၏။

၆၈ ဤသူတို့သည် ကောင်းကင်၌ အမည်များ ရေးထားခံရသူများ ဖြစ်၏၊ ထိုနေရာ၌ ဘုရားသခင်နှင့် ခရစ်တော်သည် ခပ်သိမ်းသောသူတို့၏ တရားသူကြီးဖြစ်၏။

၆၉ ဤသူတို့သည်ကား၊ မိမိကိုယ်တိုင်၏အသွေးတော်သွန်းလောင်းခြင်းအားဖြင့် ဤစုံလင်သောအပြစ်ဖြေခြင်းမင်္ဂလာကို ပြုပြင်စီရင်ခဲ့သူ၊ ပဋိညာဉ်တရားသစ်၏ အရှင်တည်းဟူသော စေ့စပ်ရှင် ယေရှုအားဖြင့် စုံလင်စေခဲ့သည့် တရားသောသူများ ဖြစ်ကြ၏။

၇၀ ဤသူတို့သည်ကား၊ နေ၏ဂုဏ်အသရေ၊ အမှန်စင်စစ်၊ ခပ်သိမ်းသောအရာတို့ထက် အမြင့်ဆုံး ဖြစ်သည့် ဘုရားသခင်၏ ဂုဏ်အသရေ ကဲ့သို့ပင်ရှိသည့် ဆီလက်ရှယ်လ် ကိုယ်ခန္ဓာရှိသူများဖြစ်၏၊ စံနမူနာထားရာအဖြစ်ရေးထားလေသည့် မိုးမျက်နှာကြက်ရှိ နေ၏ ဂုဏ်အသရေကဲ့သို့ပင်ဖြစ်၏။

၇၁ ထိုမှတစ်ဖန်၊ ကျွန်ုပ်တို့သည် ထီရက်စ်ထရီရယ်လ်လောကကို မြင်ခဲ့ကြ၏၊ ရှုဦးလော့၊ ကြည့်ဦးလော့၊ ဤသူတို့သည်ကား၊ ထီရက်စ်ထရီရယ်လ်သားများဖြစ်ကြ၏၊ ခမည်းတော်၏ပြည့်စုံခြင်းကို လက်ခံရရှိကြလေသည့် သားဦး၏အသင်းတော်၏ ဂုဏ်အသရေနှင့် ခြားနားသည့်ဂုဏ်အသရေရှိသောသူများ ဖြစ်ကြ၏၊ လ၏ဂုဏ်အသရေသည် မိုးမျက်နှာကြက်ရှိနေနှင့် ခြားနားသကဲ့သို့ပင်ဖြစ်၏။

၇၂ ရှုလော့၊ ဤသူတို့သည်ကား ပညတ်တရားမရှိဘဲ သေသောသူများဖြစ်ကြ၏။

၇၃ ထို့အတူ၊ ထောင်ထဲမှာလှောင်ထားသည့် လူသားဝိညာဉ်များလည်းဖြစ်၏၊ ဇာတိကိုယ်ခန္ဓာ၌ လူသားတို့အတိုင်း တရားစီရင်ခံကြရနိုင်မည့်အကြောင်း ထိုသူတို့ကို သားတော်အကြည့်အရှု ကြွတော်မူပြီး၊ ဧဝံဂေလိတရားတော်ကို ဟောပြော၏။

၇၄ ဇာတိကိုယ်ခန္ဓာ၌ရှိစဉ် ယေရှုအကြောင်းသက်သေခံချက်ကို လက်ခံရရှိခြင်းမရှိသောသူများဖြစ်၏၊ သို့ရာတွင် နောက်ပြီးမှ လက်ခံရရှိကြ၏။

၇၅ ဤသူတို့သည် မြေကြီးပေါ်၌ ဂုဏ်သရေရှိသူများ၊ လူသားတို့၏ပရိယာယ်ကြောင့် အလင်းကွယ်ရသူများ ဖြစ်ကြ၏။

၇၆ ဤသူတို့သည် သူ၏ဘုန်းအသရေကို ရရှိကြ၏၊ သို့ရာတွင် သူ၏ပြည့်စုံခြင်းကို မရရှိကြ။

၇၇ ဤသူတို့သည် သားတော်၏မျက်မှောက်တော်ကို ရရှိကြ၏၊ သို့ရာတွင် ခမည်းတော်၏ပြည့်စုံခြင်းကို မရရှိကြ။

၇၈ သို့ဖြစ်၍၊ သူတို့သည် ထီရက်စ်ထရီရယ်လ်ကိုယ်ခန္ဓာများ ဖြစ်ကြ၏၊ ဆီလက်ရှယ်လ်ကိုယ်ခန္ဓာများမဟုတ်ကြ၊ လသည် နေနှင့် ခြားနားသကဲ့သို့ ဂုဏ်အသရေ၌လည်း ခြားနားကြ၏။

၇၉ ဤသူတို့သည် ယေရှုအကြောင်းသက်သခံချက်၌ မရဲရင့်ကြသောသူများဖြစ်၏။ သို့ဖြစ်၍၊ ကျွန်ုပ်တို့ဘုရားသခင့်နိုင်ငံတော်၏သရဖူကို ရရှိခြင်း မရှိကြ။

၈၀ ယခုမူကား၊ ဤအရာသည် ထီရက်စ်ထရီရယ်လ်အကြောင်း ကျွန်ုပ်တို့မြင်ခဲ့သည့် ရူပါရုံ၏အဆုံးဖြစ်၏၊ ဝိညာဉ်တော်၌ ကျွန်ုပ်တို့ရှိနေသေးစဉ်တွင် ရေးစေခြင်းငှာ ကျွန်ုပ်တို့ကို ကိုယ်တော်ရှင် မိန့်တော်မူခဲ့သည့် အရာပေတည်း။

၈၁ ထိုမှတစ်ဖန်၊ ကျွန်ုပ်တို့သည် ထီလက်စ်ရှယ်လ်ဂုဏ်အသရေကို မြင်ခဲ့ကြ၏၊ ထိုဂုဏ်အသရေမှာ ပို၍နိမ့်သော ဂုဏ်အသရေဖြစ်၏၊ ကြယ်တို့၏ဂုဏ်အသရေ၊ မိုးမျက်နှာကြက်ရှိလ၏ဂုဏ်အသရေနှင့် ခြားနားသကဲ့သို့ပင်ဖြစ်၏။

၈၂ ဤသူတို့သည် ခရစ်တော်၏ဧဝံဂေလိတရားတော်ကို လက်ခံခြင်းမရှိကြသောသူများ ဖြစ်၏၊ ယေရှုအကြောင်းသက်သေခံချက်ကိုလည်း လက်မခံကြ။

၈၃ ဤသူတို့သည် သန့်ရှင်းသောဝိညာဉ်တော်ကို ငြင်းဆိုခြင်းမရှိကြသောသူများဖြစ်၏။

၈၄ ဤသူတို့သည် ငရဲသို့ပစ်ချခံကြရသောသူများဖြစ်၏။

၈၅ ဤသူတို့သည် နောက်ဆုံးရှင်ပြန်ထမြောက်ခြင်း မရောက်မီ၊ ကိုယ်တော်ရှင်၊ ခရစ်တော်သိုးသငယ်သည်ပင်၊ မိမိအမှုတော်ကို မပြီးဆုံးမီ နတ်ဆိုးထံမှ ရွေးနုတ်မခံကြရမည့်သူများ ဖြစ်၏။

၈၆ ဤသူတို့သည် ထာဝရလောက၌ သူ၏ပြည့်စုံခြင်းကို ရရှိခြင်းမရှိသည့်သူများ၊ သို့ရာတွင် ထီရက်စ်ထရီရယ်လ်သားတို့၏ အမှုတော်ဆောင်ခြင်းအားဖြင့် သန့်ရှင်းသောဝိညာဉ်တော်ကို ရရှိကြသူများ ဖြစ်၏။

၈၇ ထီရက်စ်ထရီရယ်လ်သားတို့သည် ဆီလက်ရှယ်လ်သားတို့၏ အမှုတော်ဆောင်ခြင်းအားဖြင့် ရရှိကြ၏။

၈၈ ထီလက်စ်ရှယ်လ်သားတို့သည် မိမိတို့အတွက် အမှုတော်ဆောင်စေခြင်းငှာ ခန့်အပ်ခံရသည့် သို့မဟုတ် မိမိတို့အတွက် အမှုတော်ဆောင်ဝိညာဉ်များအဖြစ် ခန့်အပ်ခံရသည့် ကောင်းကင်တမန်တို့၏ အကူအမပေးခြင်းအားဖြင့် ရရှိကြ၏။ အကြောင်းမူကား၊ သူတို့သည် ကယ်တင်ခြင်းကို အမွေခံသူများ ဖြစ်ကြလိမ့်မည်။

၈၉ ထိုကဲ့သို့အားဖြင့်၊ ကျွန်ုပ်တို့သည် အဘယ်သူမျှ နားလည်ခြင်း မမီနိုင်သည့် ထီလက်စ်ရှယ်လ်ဂုဏ်အသရေကို ကောင်းကင်ဘုံရှင်ရူပါရုံ၌ မြင်ခဲ့ကြ၏။

၉၀ ဘုရားသခင်ဖော်ပြထားလေသူမှတစ်ပါး အဘယ်သူမျှ ထိုအရာကိုမသိ။

၉၁ ထိုကဲ့သို့အားဖြင့်၊ ခပ်သိမ်းသောအရာတို့၌၊ အကယ်စင်စစ်၊ ဂုဏ်အသရေ၌၊ ထို့အတူ တန်ခိုး၌၊ ထို့အတူ အာနုဘော်၌၊ ထို့အတူ အစိုးရခြင်း၌ ထီလက်စ်ရှယ်လ်ဂုဏ်အသရေထက် သာလွန်သည့် ထီရက်စ်ထရီရယ်လ်ဂုဏ်အသရေကို ကျွန်ုပ်တို့မြင်ခဲ့ကြ၏။

၉၂ ထိုကဲ့သို့အားဖြင့်၊ ခပ်သိမ်းသောအရာတို့၌ သာလွန်သည့် ဆီလက်ရှယ်လ်ဂုဏ်အသရေကို ကျွန်ုပ်တို့ မြင်ခဲ့ကြ၏—ထိုနေရာ၌ ဘုရားသခင်၊ အဘသည်ပင်၊ သူ၏ပလ္လင်ပေါ်မှာ ကာလအစဉ်အဆက် အမြဲအုပ်စိုးတော်မူ၏။

၉၃ သူ၏ပလ္လင်ရှေ့တွင် ခပ်သိမ်းသောသူတို့သည် နှိမ့်ချသောရိုသေခြင်းဖြင့် ဦးညွှတ်ကြ၏၊ သူ့ကို ကာလအစဉ်အဆက် အမြဲချီးမွမ်းကြ၏။

၉၄ သူ၏မျက်မှောက်တော်၌ နေထိုင်သောသူတို့သည် သားဦး၏အသင်းတော်ဖြစ်၏။ သူတို့သည် သူ၏ပြည့်စုံခြင်းနှင့် သူ၏ကျေးဇူးတော်ကို ရရှိကြ၍၊ သူတို့ကို မြင်သကဲ့သို့ သူတို့မြင်ကြ၏၊ သူတို့ကို သိသကဲ့သို့ သူတို့သိကြ၏။

၉၅ သူသည်လည်း ထိုသူတို့ကို တန်ခိုး၌၊ ထို့အတူ အာနုဘော်၌၊ ထို့အတူ အစိုးရခြင်း၌ ညီမျှစေ၏။

၉၆ နေ၏ဂုဏ်အသရေသည် တစ်မျိုးဖြစ်သကဲ့သို့ပင်၊ ဆီလက်ရှယ်လ်ဂုဏ်အသရေသည် တစ်မျိုးဖြစ်၏။

၉၇ လ၏ဂုဏ်အသရေသည် တစ်မျိုးဖြစ်သကဲ့သို့ပင်၊ ထီရက်စ်ထရီရယ်လ် ဂုဏ်အသရေသည် တစ်မျိုးဖြစ်၏။

၉၈ ကြယ်တို့၏ဂုဏ်အသရေသည် တစ်မျိုးဖြစ်သကဲ့သို့ပင်၊ ထီလက်စ်ရှယ်လ် ဂုဏ်အသရေသည် တစ်မျိုးဖြစ်၏။ အကြောင်းမူကား၊ ကြယ်တစ်လုံးသည် ဂုဏ်အသရေ၌ တခြားသောကြယ်နှင့် ခြားနားသကဲ့သို့၊ ထိုကဲ့သို့ပင် ထီလက်စ်ရှယ်လ်လောကတွင် တစ်ခုသည် ဂုဏ်အသရေ၌ တခြားတစ်ခုနှင့် ခြားနား၏။

၉၉ အကြောင်းမူကား၊ ဤသူတို့သည် ပေါလု၏တပည့်ဖြစ်သူများ၊ ထို့အတူ အာပေါလု၏တပည့်ဖြစ်သူများ၊ ထို့အတူ ကေဖ၏တပည့်ဖြစ်သူများ ဖြစ်ကြ၏။

၁၀၀ ဤသူတို့သည်ကား၊ အချို့မှာ တစ်ဦး၏ တပည့်ဟုလည်းကောင်း၊ အချို့မှာ တခြားသောသူ၏ တပည့်ဟုလည်းကောင်း—အချို့မှာ ခရစ်တော်၏ တပည့်ဟုလည်းကောင်း၊ အချို့မှာ ယောဟန်၏ တပည့်ဟုလည်းကောင်း၊ အချို့မှာ မောရှေ၏ တပည့်ဟုလည်းကောင်း၊ အချို့မှာ ဧလိုင်ယ၏ တပည့်ဟုလည်းကောင်း၊ အချို့မှာ ဧရှာယ၏ တပည့်ဟုလည်းကောင်း၊ အချို့မှာ ဟေရှာယ၏ တပည့်ဟုလည်းကောင်း၊ အချို့မှာ ဧနောက်၏ တပည့်ဟုလည်းကောင်း ဆိုကြသောသူများ ဖြစ်ကြ၏။

၁၀၁ သို့ရာတွင်၊ ဧဝံဂေလိတရားတော်ကို လက်ခံခြင်းမရှိကြ၊ ယေရှုအကြောင်း သက်သေခံချက်ကို သော်လည်းကောင်း၊ ပရောဖက်တို့ကို သော်လည်းကောင်း၊ ထာဝရတည်မြဲသောပဋိညာဉ်ကို သော်လည်းကောင်း လက်ခံခြင်းမရှိကြ။

၁၀၂ နောက်ဆုံးအနေဖြင့်၊ ဤသူတို့သည် သားဦး၏အသင်းတော်သို့ ချီဆောင်ခံရစေဖို့၊ ထို့အတူ မိုးတိမ်ထဲသို့ ဝင်ခွင့်ရစေဖို့ သန့်ရှင်းသူတို့နှင့် အတူစုဝေးမခံရမည့်သူများ ဖြစ်ကြ၏။

၁၀၃ ဤသူတို့သည် မုသားပြောသူများ၊ ပြုစားတတ်သောသူများ၊ မတရားသောမေထုန်၌ မှီဝဲသောသူများ၊ သူ့သားမယားအား ပြစ်မှားသောသူများ၊ မုသားကို ချစ်၍ ပြောသောသူများ ဖြစ်ကြ၏။

၁၀၄ ဤသူတို့သည် မြေကြီးပေါ်၌ ဘုရားသခင်၏အမျက်တော်ကို ခံစားရသောသူများ ဖြစ်ကြ၏။

၁၀၅ ဤသူတို့သည် ထာဝရမီးအပြစ်ဒဏ်ကို ခံရကြသူများ ဖြစ်၏။

၁၀၆ ဤသူတို့သည် ငရဲသို့ ပစ်ချခံရသောသူများဖြစ်ကြ၏၊ ထို့အတူ ခရစ်တော် သူ၏ခပ်သိမ်းသော ရန်သူတို့ကို သူ့ခြေအောက်၌ ထား၍ အောင်ပြီး၊ သူ၏အမှုတော်ကို စုံလင်စေမည့် အချိန်တည်းဟူသော အချိန်ကာလပြည့်စုံခြင်းသို့ ရောက်သည်အထိ အနန္တတန်ခိုးရှင်ဘုရားသခင်၏ အမျက်တော်ကို ခံစားကြရသောသူများဖြစ်၏။

၁၀၇ နိုင်ငံတော်ကို သူလွှဲအပ်၍၊ ခမည်းတော်ထံ ဆက်သသောအခါ၌ အစွန်းအထင်းကင်းစေ၍ ဆိုလေသည်ကား၊ ငါသည် အောင်နိုင်၍၊ စပျစ်သီးနယ်ရာကျင်းကို၊ အနန္တတန်ခိုးရှင်ဘုရားသခင်၏ အမျက်တော်ပြင်းထန်ခြင်း စပျစ်သီးနယ်ရာကျင်းကိုပင် ငါတစ်ယောက်တည်း နင်းနယ်လေပြီ။

၁၀၈ ထို့နောက်တွင်၊ သူသည် မိမိဘုန်းတော်သရဖူဖြင့် ချီးမြှင့်ခံရလိမ့်မည်၊ မိမိတန်ခိုးတော်ပလ္လင်ပေါ်မှာထိုင်၍ ကာလအစဉ်အဆက်အမြဲအုပ်စိုးတော်မူလိမ့်မည်။

၁၀၉ သို့ရာတွင် ရှုလော့၊ ကြည့်ဦးလော့၊ ဂုဏ်အသရေနှင့် ထီလက်စ်ရှယ်လ်လောက၌ နေထိုင်ကြသောသူတို့ကို ကျွန်ုပ်တို့မြင်ခဲ့ကြ၏၊ သူတို့သည် ကောင်းကင်မိုးမျက်နှာကြက်ရှိ ကြယ်များကဲ့သို့ပင်၊ သို့မဟုတ် ပင်လယ်ကမ်းနားရှိ သဲကဲ့သို့ပင် မရေတွက်နိုင်အောင်ရှိကြ၏။

၁၁၀ ကိုယ်တော်ရှင်၏ အသံကိုလည်း ကြားရ၍ မိန့်တော်မူလေသည်ကား၊ ပလ္လင်ပေါ်မှာ ကာလအစဉ်အဆက်အမြဲထိုင်သည့် သူ့ထံသို့ ဤသူခပ်သိမ်းတို့သည် ဒူးထောက်ကြလိမ့်မည်၊ နှုတ်တိုင်းသည်လည်း ဝန်ခံလိမ့်မည်။

၁၁၁ အကြောင်းမူကား၊ သူတို့သည် သူတို့အကျင့်များအတိုင်း တရားစီရင်ခံရလိမ့်မည်၊ လူတိုင်းသည် ပြင်ဆင်ထားသည့် နေစရာအခန်းများ၌၊ မိမိကိုယ်တိုင်၏ အကျင့်များအတိုင်း မိမိကိုယ်တိုင်၏ အုပ်ချုပ်ခံဒေသကို ရရှိကြလိမ့်မည်။

၁၁၂ သူတို့သည် အမြင့်ဆုံးသောဘုရား၏ ကျွန်များ ဖြစ်ကြလိမ့််မည်။ သို့ရာတွင်၊ ဘုရားသခင်နှင့် ခရစ်တော် နေထိုင်ရာသို့ အဆုံးမဲ့ကမ္ဘာကြာအောင် မလာနိုင်ကြ။

၁၁၃ ဤအရာသည် ကျွန်ုပ်တို့မြင်ခဲ့ရသည့်၊ ဝိညာဉ်တော်၌ ကျွန်ုပ်တို့ရှိနေသေးစဉ်တွင် ရေးစေခြင်းငှာ မိန့်တော်မူခြင်းကို ကျွန်ုပ်တို့ခံရသည့် ရူပါရုံ၏အဆုံးဖြစ်၏။

၁၁၄ သို့ရာတွင်၊ ကြီးမြတ်ပြီး အံ့ဩဖွယ်ကောင်းသည်မှာ ဂုဏ်အသရေ၌၊ ထို့အတူ အာနုဘော်၌၊ ထို့အတူ အစိုးရခြင်း၌ အဘယ်သူမျှနားလည်ခြင်း မမီနိုင်သည့်အရာများတည်းဟူသော ကျွန်ုပ်တို့ကို သူပြတော်မူသည့် ကိုယ်တော်ရှင်၏ အမှုတော်များ၊ ထို့အတူ သူ့နိုင်ငံတော်၏ နက်နဲသောအရာများ ပေတည်း။

၁၁၅ ထိုအရာတို့သည် ဝိညာဉ်တော်၌ ကျွန်ုပ်တို့ရှိနေသေးစဉ်တွင် ကျွန်ုပ်တို့ မရေးသင့်ကြောင်း ကျွန်ုပ်တို့ကို သူမိန့်တော်မူခဲ့သည့် အရာများ၊ လူမပြောအပ်သည့်အရာများလည်း ဖြစ်၏။

၁၁၆ လူသည် ထိုအရာတို့ကို ဖော်ပြနိုင်စွမ်းလည်းမရှိ၊ အကြောင်းမူကား၊ ဘုရားသခင်ကို ချစ်၍၊ သူ့ရှေ့၌ သူတို့ကိုယ်သူတို့ စင်ကြယ်စေသောသူများအပေါ် ပေးတော်မူသည့် သန့်ရှင်းသော ဝိညာဉ်တော်၏ တန်ခိုးအားဖြင့်သာလျှင် ထိုအရာတို့ကို မြင်နိုင်၊ နားလည်နိုင်၏။

၁၁၇ ထိုသူတို့အား မိမိတို့ကိုယ်တိုင် မြင်ခြင်းနှင့် သိခြင်းတည်းဟူသော ဤအထူးအခွင့်အရေးကို သူပေးတော်မူ၏။

၁၁၈ ဝိညာဉ်တော်၏ တန်ခိုးတော်နှင့် ထင်ရှားစွာပြတော်မူခြင်းတို့အားဖြင့်၊ ဇာတိကိုယ်ခန္ဓာ၌ ရှိစဉ်တွင် ဘုန်းတော်ကမ္ဘာမျက်မှောက်တော်ကို သူတို့ခံစားနိုင်ကြစေကြောင်းဖြစ်၏။

၁၁၉ ဘုရားသခင်နှင့် သိုးသငယ်သည် ဘုန်းတော်၊ ဂုဏ်အသရေ၊ အစိုးရခြင်း ကာလအစဉ်အဆက် အမြဲရှိပါစေသတည်း။ အာမင်။