ဩဝါဒနှင့် ပဋိညာဉ်များ ၁၀၆

အပိုဒ်ငယ် ၁၀၆

၁၈၃၄ ခု၊ နိုဝင်ဘာ ၂၅၊ ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ဤဗျာဒိတ်တော်သည် အော်လီဗာကောင်ဒရီ၏အစ်ကို ဝေါရင်အေကောင်ဒရီသို့ ညွှန်ကြား၏။

၁–၃၊ ဝေါရင်အေကောင်ဒရီသည် ဒေသခံဦးစီးအရာရှိအဖြစ် ခေါ်သွင်းခံရ၏။ ၄–၅၊ ဒုတိယအကြိမ် ကြွလာတော်မူခြင်းသည် အလင်း၏သားတို့အပေါ် သူခိုးတစ်ဦးကဲ့သို့ ရောက်မလာ။ ၆–၈၊ ကြီးစွာသော ကောင်းချီးမင်္ဂလာများသည် အသင်းတော်၌ သစ္စာရှိသောအစေခံခြင်းနောက်မှ ဖြစ်လာ၏။

၁ ငါ့ကျွန်ဝေါရင်အေကောင်ဒရီကို လွတ်လပ်ခွင့်မြေနှင့် ထိုမြေပတ်ဝန်းကျင်ဒေသတို့ရှိ ငါ၏ အသင်းတော်အပေါ် ဦးစီးယဇ်ပုရောဟိတ်မင်းအဖြစ် ခန့်အပ်ပြီးခန့်ထားရမည်မှာ ငါ၏ အလိုတော်ဖြစ်၏။

၂ သူ၏နေရာ၌သာမက၊ ကပ်လျက်ရှိသောခရိုင်များ၌လည်း၊ ငါ၏ထာဝရတည်မြဲသော ဧဝံဂေလိတရားတော်ကို ဟောပြောရမည်၊ လူတို့ကို ကြွေးကြော်၍ သတိပေးရမည်။

၃ သူ့ကို ယခုငါပေးသည့် ဤမြင့်မြတ်၍ သန့်ရှင်းသော အမှုတော်ဆောင်တာဝန်သို့ သူ၏ အချိန်တစ်ခုလုံးကို ဆက်ကပ်ရမည်၊ ကောင်းကင်နိုင်ငံတော်နှင့် ၎င်း၏ဖြောင့်မတ်ခြင်း၊ ထို့အတူ ထပ်၍ပေးတော်မူမည့် လိုအပ်သည့် ခပ်သိမ်းသောအရာတို့ကို လုံ့လဝီရိယ ထက်သန်စွာရှာလျက်နေရမည်။ အကြောင်းမူကား၊ အလုပ်လုပ်သောသူသည် အခကို ခံထိုက်ပေ၏။

၄ ထိုမှတစ်ဖန်၊ သင်တို့ကို ငါဆိုသည်ကား၊ ကိုယ်တော်ရှင်၏ကြွလာတော်မူခြင်းသည် ရောက်လုနီးပြီ၊ ညဉ့်အချိန်၌ သူခိုးတစ်ဦးကဲ့သို့ လောကအပေါ် ရောက်လာ၏—

၅ ထို့ကြောင့်၊ သင်တို့သည် အလင်း၏သားများ ဖြစ်နိုင်ကြစေခြင်းငှာ၊ ထိုနေ့သည် သူခိုးတစ်ဦးကဲ့သို့ သင်တို့အပေါ်ရောက်မလာစေခြင်းငှာ၊ သင်တို့၏ခါးကို စည်းကြလော့။

၆ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါ့ကျွန်ဝေါရင်သည် ရာဇလှံတံကို ဦးညွှတ်၍၊ လူသားတို့၏အမှုမှ သူ့ကိုယ်သူခွဲခြားသောအခါ၊ ကောင်းကင်ဘုံ၌ ဝမ်းမြောက်ခြင်းရှိ၏။

၇ ထို့ကြောင့်၊ ငါ့ကျွန်ဝေါရင်သည် မင်္ဂလာရှိ၏၊ အကြောင်းမူကား၊ ငါသည် သူ့အပေါ်မှာ ကရုဏာထားတော်မူမည်။ ထို့အတူ၊ သူ၏စိတ်နှလုံး အချည်းနှီးဖြစ်ခြင်းရှိသော်ငြားလည်း၊ သူသည် ငါ့ရှေ့၌ နှိမ့်ချသမျှ၊ ငါသည် သူ့ကို ချီးမြှောက်တော်မူမည်။

၈ သူခံရပ်နိုင်ရာ ကျေးဇူးတော်နှင့် အာမခံချက်ကိုလည်း သူ့အား ငါပေးတော်မူမည်။ သူသည် သစ္စာရှိသော သက်သေနှင့် အသင်းတော်အဖို့ အလင်းအဖြစ် ဆက်၍ရှိလျှင် ငါ့ခမည်းတော်၏ နေစရာအခန်းများ၌ သူ့အတွက် သရဖူတစ်ခုကို ငါပြင်ဆင်ထားလေပြီ။ ထိုကဲ့သို့ပင်တည်း။ အာမင်။