ဩဝါဒနှင့် ပဋိညာဉ်များ ၁၁၃

အပိုဒ်ငယ် ၁၁၃

၁၈၃၈ ခု၊ မတ်လ၊ အနောက်ဖျား၊ မစ်ဆိုရီအနီးအနား၌ ပရောဖက်ဂျိုးဇက်စမစ် ဖော်ပြခဲ့သည့် ဟေရှာယ၏စာများနှင့်စပ်လျဉ်းသည့် မေးခွန်းအချို့အတွက် အဖြေများ။

၁–၆၊ ယေရှဲအမျိုး၏ အငုတ်၊ ၎င်းမှထွက်လာသည့် အတက်၊ ထို့အတူ ယေရှဲ၏ အမြစ်တို့ကို ဖော်ထုတ်၏။ ၇–၁၀၊ ဇိအုန်၏ကွဲပြားပြန့်ကျဲသည့် ကျန်ကြွင်းသောသူတို့သည် ယဇ်ပုရောဟိတ်အခွင့်အဖို့ အခွင့်အရေးရှိပြီး၊ ကိုယ်တော်ရှင်ထံသို့ ပြန်လာရန်အခေါ်ခံကြရ၏။

၁ ဟေရှာယအခန်းကြီး ၁၁ ၏ အခန်းငယ် ၁၊ ၂၊ ၃၊ ၄ နှင့် ၅ ၌ ဟောပြောထားသည့် ယေရှဲ၏အငုတ်သည် မည်သူနည်း။

၂ ကိုယ်တော်ရှင်အမှန် မိန့်တော်မူသည်ကား၊ ထိုအရာမှာ ခရစ်တော်ဖြစ်၏။

၃ ဟေရှာယအခန်းကြီး ၁၁ ၏ ပထမအခန်းငယ်၌ ဟောပြောထားသည့် ယေရှဲ၏ အငုတ်မှ ထွက်လာမည့် အတက်မှာ မည်သည့်အရာဖြစ်သနည်း။

၄ ရှုလော့၊ ကိုယ်တော်ရှင်မိန့်တော်မူသည်ကား၊ ထိုသူမှာ ခရစ်တော်၏လက်ထဲ၌ရှိသည့် ကျွန်တစ်ယောက်ဖြစ်၏၊ ထိုသူသည် ယေရှဲ၏အမျိုးအနွယ်တစ်ပိုင်းဖြစ်သကဲ့သို့ ဧဖရိမ်၏ သို့မဟုတ် ယောသပ်အမျိုးသားတို့၏ အမျိုးအနွယ်တစ်ပိုင်းလည်းဖြစ်၏၊ ထိုသူ့အပေါ်၌ များစွာသောတန်ခိုးကို ပေးထား၏။

၅ အခန်းကြီး ၁၁ ၏ အခန်းငယ် ၁၀ ၌ ဟောပြောထားသည့် ယေရှဲ၏အမြစ်သည် မည်သည့်အရာဖြစ်သနည်း။

၆ ရှုလော့၊ ကိုယ်တော်ရှင် မိန့်တော်မူသည်ကား၊ ထိုသူသည် ယေရှဲ၏ အမျိုးအနွယ် ဖြစ်သကဲ့သို့ ယောသပ်၏ အမျိုးအနွယ်လည်း ဖြစ်၏၊ ထိုသူသည် နောက်ဆုံးသောကာလ၌ ငါ၏ လူမျိုးတို့ စုဝေးခြင်း အတွက် အလံတစ်ခုအဖြစ် ရှိခြင်းငှာ ယဇ်ပုရောဟိတ်အခွင့်ကို၊ ထို့အတူ နိုင်ငံတော်၏သော့များကို မှန်ကန်စွာပိုင်ဆိုင်၏။

၇ ဧလိုင်ယဟစ်ဘီး၏မေးခွန်းတို့သည်ကား၊ ဟေရှာယအခန်းကြီး ၅၂၊ အခန်းငယ် ၁ ၌ဆိုသည့် အို ဇိအုန်မြို့ သင်၏ခွန်အားကို ဝတ်ဆင်လော့ဟူသောမိန့်တော်မူချက်သည် အဘယ်သို့ဆိုလိုသနည်း—ဟေရှာယသည် မည်သည့်လူမျိုးကို ရည်ညွှန်းခဲ့လေသနည်း။

၈ နောက်ပိုင်းကာလ၌ ဘုရားသခင်ခေါ်သွင်းတော်မူမည့်သူများတည်းဟူသော၊ ဇိအုန်မြို့ကို၊ ထို့အတူ၊ ဣသရေလအမျိုးသားတို့၏ရွေးနုတ်ခြင်းကို ပြန်လည်တည်ရှိစေရန် ယဇ်ပုရောဟိတ်အခွင့် တန်ခိုးကို ကိုင်ဆောင်မည့်သူများကို သူရည်ညွှန်းခဲ့လေ၏။ သူမ၏ ခွန်အားကို ဝတ်ဆင်ရန်ဆိုသည်မှာ သူမ၊ ဇိအုန်၌ မျိုးရိုးအရအခွင့်အရေးရှိသည့် ယဇ်ပုရောဟိတ်အခွင့်အာဏာကို ဝတ်ဆင်ရန်ဖြစ်၏။ သူမ ဆုံးရှုံးခဲ့လေသည့် တန်ခိုးကို ပြန်လည်ရရှိရန်လည်းဖြစ်၏။

၉ အခန်းငယ် ၂ ၌၊ ဇိအုန်သည် မိမိလည်ကြိုးတို့မှ မိမိကိုယ်ကို ဖြေလွှတ်ခြင်းကို ကျွန်ုပ်တို့ မည်သို့ နားလည်ရမည်နည်း။

၁၀ ကျွန်ုပ်တို့နားလည်ရမည်ကား၊ ကွဲပြားပြန့်ကျဲသည့် ကျန်ကြွင်းသောသူတို့သည် မိမိတို့လဲကျရာမှ ကိုယ်တော်ရှင်ဆီသို့ပြန်လာရန်၊ တိုက်တွန်းခံကြရ၏။ ထိုအမှုကို သူတို့ပြုလျှင်၊ ကိုယ်တော်ရှင်၏ ကတိတော်မှာ၊ သူတို့ကို ဟောပြောတော်မူမည်၊ သို့မဟုတ် ဗျာဒိတ်တော်ပေးမည်။ အခန်းငယ် ၆၊ ၇ နှင့် ၈ ၌ကြည့်ပါ။ သူမ၏ လည်ကြိုးတို့မှာ သူမအပေါ်ရှိသည့် ဘုရားသခင်၏ ကျိန်ခြင်းများ၊ သို့မဟုတ် တစ်ပါးအမျိုးသားတို့၌ ဣသရေလအမျိုးသားတို့၏ ကျန်ကြွင်းသောသူများ သူတို့၏ကွဲပြားပြန့်ကျဲရာအခြေအနေ၌ရှိခြင်းဖြစ်၏။