ဩဝါဒနှင့် ပဋိညာဉ်များ ၁၂၂

အပိုဒ်ငယ် ၁၂၂

မစ်ဆိုရီ၊ လစ်ဘာတီအကျဉ်းထောင်၌ အကျဉ်းသားတစ်ဦးအဖြစ်ရှိစဉ်၊ ပရောဖက်ဂျိုးဇက်စမစ်သို့ ကိုယ်တော်ရှင်၏ နှုတ်ကပတ်တော်။ ဤအပိုဒ်ငယ်သည် ၁၈၃၉ ခု၊ မတ်လ ၂၀ ရက်၊ ရက်စွဲဖြင့်၊ အသင်းတော်သို့ အမှာစာမှ ကောက်နုတ်ချက်တစ်ခုဖြစ်၏ (အပိုဒ်ငယ် ၁၂၁ ခေါင်းစဉ်တွင် ကြည့်ပါ)။

၁–၄၊ မြေကြီးစွန်းသားတို့သည် ဂျိုးဇက်စမစ်၏ အမည်ကို စုံစမ်းကြလိမ့်မည်။ ၅–၇၊ သူ၏ခပ်သိမ်းသော ဘေးတို့နှင့် အခက်အခဲတို့သည် သူ့အား အတွေ့အကြုံကို ပေးလိမ့်မည်၊ သူ၏ ကောင်းကျိုး အတွက်လည်းဖြစ်လိမ့်မည်။ ၈–၉၊ လူသားတော်သည် အောက်အရပ်ခပ်သိမ်းသောသူတို့ဆီသို့ ဆင်းသက်တော်မူ၏။

၁ မြေကြီးစွန်းသားတို့သည် သင်၏အမည်ကို စုံစမ်းကြလိမ့်မည်၊ လူမိုက်တို့သည် သင့်ကို ပြက်ရယ်ပြုကြလိမ့်မည်၊ ငရဲသည်လည်း သင့်တစ်ဖက်၌ လှုပ်ရှားထကြွစေလိမ့်မည်။

၂ တစ်ဖက်တွင်၊ စိတ်နှလုံးစင်ကြယ်သောသူများ၊ ထို့အတူ ဉာဏ်ပညာရှိသောသူများ၊ ထို့အတူ မြင့်မြတ်သောသူများ၊ ထို့အတူ ကောင်းမြတ်စွာကျင့်သောသူများတို့သည် သင်၏လက်အောက်မှ အကြံ၊ ထို့အတူ အခွင့်အာဏာ၊ ထို့အတူ ကောင်းချီးမင်္ဂလာတို့ကို အမြဲတမ်းရှာကြလိမ့်မည်။

၃ သင်၏လူမျိုးတို့သည် သစ္စာဖျက်သောသူတို့၏သက်သေခံချက်အားဖြင့် သင့်ကိုဘယ်တော့မျှ ဆန့်ကျင်၍ တိုက်ခိုက်ကြမည်မဟုတ်။

၄ သူတို့၏လွှမ်းမိုးမှုက သင့်ကို ဒုက္ခဆင်းရဲထဲသို့၊ ထို့အတူ တိုင်များနှင့် တံတိုင်းများထဲသို့ ပစ်ချသော်လည်း၊ သင်သည် ဂုဏ်အသရေရှိလိမ့်မည်။ သို့ရာတွင် ခဏသာဖြစ်၍၊ သင်၏အသံသည် သင့်ရန်သူတို့အလယ်၌ ကြမ်းကြုတ်သောခြင်္သေ့ထက် သာ၍ကြောက်မက်ဖွယ်ဖြစ်လိမ့်မည်၊ သင်၏ဖြောင့်မတ်ခြင်းကြောင့်ပေတည်း။ သင်၏ဘုရားသခင်သည်လည်း သင့်ဘေးမှာ ကာလအစဉ်အဆက် အမြဲရပ်တော်မူလိမ့်မည်။

၅ သင်သည် အတိဒုက္ခကို ဖြတ်သန်းရန် ခေါ်သွင်းခံရလျှင်၊ သင်သည် ညီအစ်ကိုအတုတို့ကြား၌ ဘေးရောက်လျှင်၊ သင်သည် ဓားပြတို့ကြား၌ ဘေးရောက်လျှင်၊ သင်သည် မြေ၌ဖြစ်စေ၊ ပင်လယ်၌ဖြစ်စေ ဘေးရောက်လျှင်၊

၆ သင်သည် မှားယွင်းသောစွဲချက်အမျိုးမျိုးဖြင့် စွပ်စွဲခံရလျှင်၊ သင်၏ရန်သူတို့ သင့်အပေါ် ကျရောက်လျှင်၊ သူတို့သည် သင့်ကို သင်၏အဘနှင့် အမိနှင့် ညီအစ်ကိုတို့နှင့် ညီအစ်မတို့၏ လူ့အဖွဲ့အစည်းမှခွဲပစ်လျှင်၊ ထို့အတူ ဓားလွတ်ဖြင့် သင်၏ရန်သူတို့က သင့်ကို သင့်ဇနီး၏၊ ထို့အတူ သင့်သားသမီးတို့၏ရင်မှ ခွဲပစ်လျှင်၊ ထို့အတူ ခြောက်နှစ်အရွယ်သာရှိသည့် သင့်သားကြီးက၊ သင်၏အဝတ်တန်ဆာတို့ကို ဆွဲ၍၊ ကျွန်ုပ်အဘ၊ ကျွန်ုပ်အဘ၊ သင်သည် ကျွန်ုပ်တို့နှင့် အဘယ့်ကြောင့် အတူမနေနိုင်သနည်း၊ အို၊ ကျွန်ုပ်အဘ၊ လူကြီးတွေက သင့်ကို အဘယ်သို့ပြုကြမည်နည်းဟု မေးလျှင်၊ ထို့နောက် သူသည် သင့်ထံမှနေ၍ ဓားဖြင့် အခွဲခံရပြီးလျှင်၊ သင်သည် ထောင်သို့ ဆွဲသွားခံရ၊ သင်၏ ရန်သူတို့ကလည်း သိုးသငယ်၏အသွေးကိုရှာနေသည့် တောခွေးတို့ကဲ့သို့ သင့်ပတ်လည်၌ လှည့်လည်ချောင်းမြောင်းနေလျှင်၊

၇ သင်သည် တွင်းထဲသို့၊ သို့မဟုတ် လူ့အသက်ကို သတ်သောသူတို့၏လက်ထဲသို့ အပစ်ခံရ၊ ထို့အတူ သေဒဏ်သည် သင့်အပေါ်ရောက်လာလျှင်၊ သင်သည် နက်ရာထဲသို့ ပစ်ချခံရလျှင်၊ ဂယက်ထနေသောလှိုင်းက သင့်ကို ပုတ်ခတ်လျှင်၊ ပြင်းစွာသောလေက သင်၏ရန်သူဖြစ်လာလျှင်၊ ကောင်းကင်နက်မှောင်လာ၍၊ လမ်းကို ဆီးကာရန် ခပ်သိမ်းသောလောကဓာတ်တို့ ပူးပေါင်းကြလျှင်၊ အားလုံးတို့ထက်၊ ငရဲ၏မေးရိုးတို့က သင့်ကို မျိုရန် နှုတ်ကိုဟ၍ ကျယ်ကျယ်ဖွင့်လျှင်၊ ခပ်သိမ်းသော ဤအရာတို့သည် သင့်အား အတွေ့အကြုံကို ပေးလိမ့်မည်၊ ထို့အတူ သင်၏ကောင်းကျိုးအတွက် ဖြစ်လိမ့်မည့်အကြောင်း၊ သင်သိလော့၊ ငါ့သား။

၈ လူသားတော်သည် အောက်အရပ် ခပ်သိမ်းသောသူတို့ဆီသို့ ဆင်းသက်တော်မူ၏။ သင်သည် သူ့ထက် သာ၍ကြီးမြတ်သလော။

၉ ထို့ကြောင့်၊ သင်၏လမ်း၌ ဆက်၍ရှိနေလော့၊ ယဇ်ပုရောဟိတ်အခွင့်သည်လည်း သင်နှင့်အတူ ဆက်၍ ရှိလိမ့်မည်။ အကြောင်းမူကား၊ ၎င်းတို့၏ နယ်ကို ကန့်သတ်ထား၍ မကျော်လွန်နိုင်ကြ။ သင်၏ နေ့ရက်တို့ကို သိ၏၊ သင်၏နှစ်တို့သည်လည်း လျော့၍ရေတွက်မခံရ။ ထို့ကြောင့်၊ လူသားပြုနိုင်သည့်အရာကို ကြောက်ခြင်းမရှိနှင့်၊ အကြောင်းမူကား၊ ဘုရားသခင်သည် သင်နှင့်အတူ ကာလအစဉ်အဆက် အမြဲရှိလိမ့်မည်။