ဩဝါဒနှင့် ပဋိညာဉ်များ ၁၁၅

အပိုဒ်ငယ် ၁၁၅

၁၈၃၈ ခု၊ ဧပြီ ၂၆ ရက်၊ အနောက်ဖျား၊ မစ်ဆိုရီ၌ ထိုနေရာနှင့် ကိုယ်တော်ရှင်၏အိမ်ကို တည်ဆောက်ခြင်းနှင့် စပ်လျဉ်း၍ ဘုရားသခင်၏အလိုတော်ကို ဖော်ပြသည့်၊ ပရောဖက် ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ဤဗျာဒိတ်တော်ကို ဦးစီးအရာရှိများနှင့် အသင်းတော်၏အသင်းသားတို့အား ဟောပြောခဲ့၏။

၁–၄၊ ကိုယ်တော်ရှင်သည် မိမိအသင်းတော်ကို ယေရှုခရစ်တော်၏ နောက်ပိုင်းကာလ သန့်ရှင်းသူများ အသင်းတော်ဟု အမည်ပေး၏။ ၅–၆၊ ဇိအုန်နှင့် ၎င်း၏ပန္နက်များသည် သန့်ရှင်းသူတို့အတွက် ကာကွယ်ရာနှင့် ခိုလှုံရာနေရာများဖြစ်၏။ ၇–၁၆၊ သန့်ရှင်းသူတို့သည် အနောက်ဖျား၌ ကိုယ်တော်ရှင်၏အိမ်တော်ကို တည်ဆောက်ရန် မိန့်မှာခံကြရ၏။ ၁၇–၁၉၊ ဂျိုးဇက်စမစ်သည် မြေကြီးပေါ်၌ နိုင်ငံတော်၏သော့များကို ကိုင်ဆောင်၏။

၁ သင်၊ ငါ့ကျွန် ဂျိုးဇက်စမစ်အငယ်၊ ထို့အတူ ငါ့ကျွန်ဆစ်ဒနီရစ်ဂဒွန်၊ ထို့အတူ ငါ့ကျွန်ဟီရမ်စမစ်၊ ထို့အတူ သင်၏တိုင်ပင်ဖက်များအဖြစ် ယခုခန့်အပ်ထားသောသူများနှင့် နောင်ကာလ၌ခန့်အပ်ထားမည့်သူများကို ကိုယ်တော်ရှင်အမှန်မိန့်တော်မူသည်ကား၊

၂ ထို့အတူ၊ သင် ငါ့ကျွန် အက်ဒဝါ့ပါ့ထရစ်ဂ်ျနှင့် သူ၏တိုင်ပင်ဖက်များ၊

၃ ထို့အတူ၊ ဇိအုန်၌ ငါ့အသင်းတော်၏ အတိုင်ပင်ခံမင်းအဖွဲ့ဟု အခေါ်ခံကြရမည့်၊ ငါ၏သစ္စာရှိသောကျွန်များ၊ ထို့အတူ လောကတစ်ခုလုံး၌ အရပ်ရပ်သို့ကွဲပြားပြန့်ကျဲကြသည့် ငါ၏ ယေရှုခရစ်တော်၏ နောက်ပိုင်းကာလသန့်ရှင်းသူများအသင်းတော်မှ အသင်းလူကြီးများနှင့် လူမျိုးတို့၊

၄ ထိုကဲ့သို့အားဖြင့် ငါ၏ အသင်းတော်ကို နောက်ပိုင်းကာလ၌၊ ယေရှုခရစ်တော်၏ နောက်ပိုင်းကာလ သန့်ရှင်းသူများ အသင်းတော်ဟုပင်ခေါ်ကြရမည်။

၅ ခပ်သိမ်းသောသင်တို့ကို ငါအမှန်ဆိုသည်ကား၊ ထ၍တောက်ပစေကြလော့၊ သင်တို့၏အလင်းသည် ပြည်သားတို့အဖို့ အလံဖြစ်စေကြောင်းပေတည်း။

၆ ဇိအုန်မြေပေါ်နှင့် ပန္နက်များပေါ်၌ အတူတကွစုဝေးခြင်းသည်ကား၊ မြေကြီးတစ်ခုလုံးပေါ်သို့ အရောအနှောမပါဘဲ သွန်းလောင်းမည့် မုန်တိုင်းဘေးမှ၊ ထို့အတူ အမျက်တော်ဘေးမှ အကာအကွယ်၊ ထို့အတူ ခိုလှုံရာအဖြစ် ရှိနိုင်စေကြောင်းပေတည်း။

၇ မြို့၊ အနောက်ဖျားကို ငါ့အဖို့ သန့်ရှင်းစေပြီး ဆက်ကပ်ထားသောပြည် ဖြစ်စေလော့။ အသန့်ရှင်းဆုံးဟု ခေါ်ကြလိမ့်မည်၊ အကြောင်းမူကား၊ သင်ရပ်သည့်မြေကြီးသည် သန့်ရှင်း၏။

၈ ထို့ကြောင့်၊ ငါ၏သန့်ရှင်းသူတို့ အတူတကွစုဝေးခြင်းအတွက်၊ ငါ့အဖို့ အိမ်တော်တစ်ခုကို တည်ဆောက်ရန် သင့်ကို ငါမိန့်တော်မူ၏၊ သူတို့ ငါ့ကို ကိုးကွယ်နိုင်ကြစေခြင်းငှာပေတည်း။

၉ ဤလာမည့်နွေရာသီ၌၊ ဤအမှုတော်၏အစပြုခြင်း၊ ထို့အတူ အုတ်မြစ်၊ ထို့အတူ ပြင်ဆင်ရာအမှုကို ရှိစေလော့။

၁၀ အစပြုခြင်းကို လာမည့်ဇူလိုင် လေးရက်တွင် ပြုလုပ်စေလော့။ ထိုအချိန်မှစ၍ ငါ၏ လူမျိုးတို့အား ငါ၏နာမတော်အဖို့ အိမ်တော်တစ်ခုကို တည်ဆောက်ရန် လုံ့လဝီရိယထက်သန်စွာ အလုပ်လုပ်ကြစေလော့။

၁၁ ဤနေ့မှစ၍ တစ်နှစ်ကြာလျှင်၊ သူတို့အား ငါ့အိမ်တော်၏ အုတ်မြစ်ချခြင်းကို ပြန်လည် အစပြုစေလော့။

၁၂ ထိုကဲ့သို့အားဖြင့်၊ သူတို့ကို ထိုအချိန်မှစ၍ ပြီးဆုံးသည်အထိ၊ ထောင့်ကျောက်မှ ထိပ်ပိုင်းအထိ၊ မပြီးဆုံးသည့်အရာတစ်စုံတစ်ခုမျှ မကျန်သည်အထိ လုံ့လဝီရိယထက်သန်စွာ အလုပ်လုပ်ကြစေလော့။

၁၃ သင့်ကို ငါအမှန်ဆိုသည်ကား၊ ငါ့ကျွန်ဂျိုးဇက်ကိုသော်လည်းကောင်း၊ ငါ့ကျွန်ဆစ်ဒနီကို သော်လည်းကောင်း၊ ငါ့ကျွန်ဟီရမ်ကို သော်လည်းကောင်း ငါ၏နာမတော်အဖို့ အိမ်တော်တစ်ခု တည်ဆောက်ခြင်းအတွက် နောက်ထပ်အကြွေးမတင်စေတော့နှင့်။

၁၄ သို့ရာတွင်၊ သူတို့ကို ငါပြတော်မူမည့် ပုံစံအတိုင်း ငါ၏နာမတော်အဖို့ အိမ်တော်တစ်ခုကို တည်ဆောက်စေလော့။

၁၅ ငါ၏လူမျိုးတို့သည် သူတို့၏ဥက္ကဋ္ဌအဖွဲ့သို့ ငါပြတော်မူမည့် ပုံစံအတိုင်း တည်ဆောက်ခြင်း မရှိလျှင် ငါသည် ၎င်းကို သူတို့လက်မှ လက်ခံမည်မဟုတ်။

၁၆ သို့ရာတွင်၊ ငါ၏လူမျိုးတို့သည် သူတို့၏ဥက္ကဋ္ဌအဖွဲ့၊ ငါ့ကျွန်ဂျိုးဇက်နှင့် သူ၏ တိုင်ပင်ဖက်များသို့ပင် ငါပြတော်မူမည့် ပုံစံအတိုင်း အမှန်တည်ဆောက်ကြလျှင်၊ ထို့နောက်တွင် ငါသည် ၎င်းကို ငါ့လူမျိုးတို့၏လက်မှ လက်ခံတော်မူမည်။

၁၇ ထိုမှတစ်ဖန်၊ သင့်ကို ငါအမှန်ဆိုသည်ကား၊ အနောက်ဖျားမြို့ကို ငါ၏ သန့်ရှင်းသူတို့ စုဝေးခြင်းအားဖြင့် အလျင်အမြန်တည်ဆောက်ရမည်မှာ ငါ၏အလိုတော်ဖြစ်၏။

၁၈ ငါ့ကျွန်ဂျိုးဇက်ကို အချိန်နှင့်အမျှ ထင်ရှားစွာ ပြမည့်အတိုင်း အခြားနေရာများကိုလည်း ပတ်ဝန်းကျင်ဒေသများ၌ ပန္နက်များအတွက် စီရင်ရမည်။

၁၉ အကြောင်းမူကား၊ ရှုလော့၊ ငါသည် သူနှင့်အတူ ရှိတော်မူမည်၊ ငါသည် သူ့ကို လူမျိုးတို့ရှေ့၌ သန့်ရှင်းစင်ကြယ်စေတော်မူမည်။ အကြောင်းမူကား၊ သူ့အား ငါသည် ဤနိုင်ငံတော်နှင့် အမှုတော်ဆောင်ခြင်း၏ သော့များကို ပေးထားလေပြီ။ ထိုကဲ့သို့ပင်တည်း။ အာမင်။