ဩဝါဒနှင့် ပဋိညာဉ်များ ၈၉

အပိုဒ်ငယ် ၈၉

၁၈၃၃ ခု၊ ဖေဖော်ဝါရီ ၂၇ ရက်၊ ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်အားဖြင့်၊ ပေးတော်မူခဲ့သည့် ဗျာဒိတ်တော်။ အစောပိုင်းညီအစ်ကိုများ သူတို့အစည်းအဝေး၌ ဆေးရွက်ကြီးသုံးစွဲခြင်း၏ အကျိုးဆက်အဖြစ်၊ ပရောဖက်သည် ထိုအမှုကို မှတ်ကျုံး၍ စဉ်းစားဆင်ခြင်ရန် ပို့ဆောင်ခံရ၏။ သို့ဖြစ်သောကြောင့်၊ သူသည် ထိုအမှုနှင့်စပ်လျဉ်း၍ ကိုယ်တော်ရှင်ထံ မေးလျှောက်၏။ ဉာဏ်ပညာစကားဟု ထင်ရှားသည့် ဤဗျာဒိတ်တော်သည် ရလဒ်ဖြစ်၏။

၁–၉၊ စပျစ်ရည်၊ သေရည်သေရက်၊ ဆေးရွက်ကြီးနှင့် အပူဖျော်ရည်သုံးစွဲခြင်းကို တားမြစ်၏။ ၁၀–၁၇၊ ဆေးဝါးပင်၊ အသီး၊ အသားနှင့် စပါးတို့ကို လူသားနှင့် တိရစ္ဆာန်တို့ အသုံးပြုစရာ အတွက် ခန့်ထား၏။ ၁၈–၂၁၊ ဉာဏ်ပညာစကားအပါအဝင်၊ ဧဝံဂေလိတရားတော်ဥပဒေများကို နာခံခြင်းသည် ဇာတိပကတိနှင့် ဝိညာဉ်ပကတိကောင်းချီးမင်္ဂလာများကို ဖြစ်စေ၏။

၁ ကာ့တ်လန်း၌ စည်းဝေးသည့် ယဇ်ပုရောဟိတ်မင်းအတိုင်ပင်ခံအဖွဲ့၊ ထို့အတူ အသင်းတော်၊ ထို့အတူ ဇိအုန်၌ရှိသော သန့်ရှင်းသူတို့အကျိုးအတွက် ဉာဏ်ပညာစကားသည်ကား—

၂ နှုတ်ဆက်လိုက်သည်မှာ၊ ပညတ်အားဖြင့်လည်းမဟုတ် အုပ်စိုးခြင်းအားဖြင့်လည်းမဟုတ်၊ သို့ရာတွင် ဗျာဒိတ်တော်အားဖြင့်၊ ဉာဏ်ပညာစကားအားဖြင့်၊ ဘုရားသခင်၏ အစီအစဉ်နှင့် အလိုတော်ကို ဖော်ပြလျက်၊ နောက်ဆုံးသောကာလ၌ သန့်ရှင်းသူအပေါင်းတို့၏ ဇာတိပကတိကယ်တင်ခြင်းအတွက်—

၃ သန့်ရှင်းသူများဖြစ်ကြသည့် သို့မဟုတ် သန့်ရှင်းသူများဟုလည်း အခေါ်ခံရနိုင်သည့် သန့်ရှင်းသူခပ်သိမ်းတို့ အထဲမှ အားနည်းသူတို့နှင့် အားအနည်းဆုံးသူတို့၏ စွမ်းရည်နှင့် လိုက်ဖက်အောင် ညှိထားသည့် ကတိတော်နှင့် ယှဉ်သော ကျင့်ဝတ်စည်းကမ်းအဖြစ် ပေးထား၏။

၄ ရှုလော့၊ ကိုယ်တော်ရှင်က သင်တို့ကို အမှန်မိန့်တော်မူသည်ကား၊ နောက်ဆုံးသောကာလ၌ လျှို့ဝှက် ကြံစည်သောသူတို့၏ စိတ်နှလုံး၌ တည်ရှိသည့် ထို့အတူ တည်ရှိမည့် မကောင်းမှုနှင့် အကြံအစည်တို့၏ အကျိုးဆက်အဖြစ်၊ သင်တို့ထံသို့ ဤဉာဏ်ပညာစကားကို ဗျာဒိတ်တော်ဖြင့် ပေးခြင်းအားဖြင့် သင်တို့ကို ငါသတိပေးတော်မူ၊ ထို့အတူ ကြိုတင် သတိပေးတော်မူလေပြီ—

၅ သင်တို့၌ အဘယ်သူမဆို စပျစ်ရည်သို့မဟုတ် သေရည်သေရက်ကို သောက်သမျှ၊ ရှုလော့၊ ထိုအမှုသည် မကောင်း၊ သင်တို့အဘ၏ ရှေ့၌ ပွဲတော်ကို ပူဇော်ရန် သင်တို့ကိုယ်သင်တို့ အတူတကွစည်းဝေးခြင်းအချိန်၌ မှတစ်ပါး၊ သူ့အမြင်၌လည်း မသင့်လျော်။

၆ ထို့အတူ၊ ရှုလော့၊ ဤအရာသည် စပျစ်ရည်၊ အထူးသဖြင့်၊ စပျစ်နွယ်ပင်၏ စပျစ်သီးမှထုတ်သည့် စင်ကြယ်သောစပျစ်ရည်၊ သင်တို့ကိုယ်တိုင်လုပ်သည့်အရာ ဖြစ်ရမည်။

၇ ထို့အတူ၊ တစ်ဖန်၊ သေရည်သေရက်သည် ဝမ်းအတွက်မကောင်း၊ သင်တို့၏ကိုယ်ခန္ဓာကို ဆေးခြင်းအတွက်သာပေတည်း။

၈ ထိုမှတစ်ဖန်၊ ဆေးရွက်ကြီးသည် ကိုယ်ခန္ဓာအတွက်မကောင်း၊ ဝမ်းအတွက်လည်းမကောင်း၊ ထို့အတူ လူသားအတွက် မကောင်း၊ သို့ရာတွင် အနာများနှင့် ဖျားနာသော ကျွဲနွားတိရစ္ဆာန်အပေါင်းတို့ အတွက် ဝေဖန်ပိုင်းခြားနိုင်စွမ်းနှင့် ကျွမ်းကျင်မှုတို့ဖြင့် အသုံးပြုဖို့ဖြစ်၏။

၉ ထိုမှတစ်ဖန်၊ အပူဖျော်ရည်တို့သည် ကိုယ်ခန္ဓာ သို့မဟုတ် ဝမ်းအတွက်မဟုတ်။

၁၀ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ လူသား၏ ကျန်းမာရေး၊ ဇာတိသဘောနှင့် အသုံးပြုစရာအတွက် ကောင်းကျိုးပေးသည့် ဆေးဝါးပင်အပေါင်းတို့ကို ဘုရားသခင်ခန့်ထားတော်မူလေ၏—

၁၁ ဆေးဝါးပင်တိုင်း သူ့ရာသီအလိုက်၊ ထို့အတူ အသီးတိုင်း သူ့ရာသီအလိုက်ရှိ၏။ ခပ်သိမ်းသောဤအရာတို့ကို ပညာသတိရှိခြင်းနှင့် ကျေးဇူးတော်ချီးမွမ်းခြင်းတို့ဖြင့် အသုံးပြုရမည်။

၁၂ ထိုမှတစ်ပါး၊ သားရဲများနှင့် မိုးကောင်းကင်ငှက်တို့၏ အသားကိုလည်း ငါ၊ ကိုယ်တော်ရှင်သည် လူသားတို့ ကျေးဇူးတော်ချီးမွမ်းခြင်းနှင့် အသုံးပြုစရာအတွက် ခန့်ထားလေပြီ။ သို့သော်လည်း၊ ၎င်းတို့ကို တော်တန်ရုံအသုံးပြုရမည်။

၁၃ ၎င်းတို့ကို ဆောင်း၊ သို့မဟုတ် ချမ်းသော၊ သို့မဟုတ် ငတ်မွတ်ခေါင်းပါးခြင်းဘေး ကာလတို့၌သာ အသုံးပြုရမည်မဟုတ်သည်မှာ ငါ့အဖို့ နှစ်သက်စေ၏။

၁၄ ခပ်သိမ်းသောစပါးတို့ကို အသက်အဖို့ အထောက်အပံ့အဖြစ်၊ လူသားနှင့် သားရဲများ အသုံးပြုစရာအတွက်ခန့်ထား၏၊ လူသားအတွက်သာမဟုတ်ဘဲ၊ တောသားရဲများ၊ ထို့အတူ ကောင်းကင်မှ ငှက်များ၊ မြေကြီးပေါ်မှာ ပြေးတတ် သို့မဟုတ် တွားသွားတတ်သော တောတိရစ္ဆာန်တို့ အတွက်လည်းဖြစ်၏။

၁၅ ဤအရာတို့ကို ဘုရားသခင်သည် လူသားတို့ ငတ်မွတ်ခေါင်းပါးခြင်းဘေးနှင့် လွန်ကဲသော ငတ်မွတ်ခြင်းကာလများ၌သာ အသုံးပြုစရာအတွက် ဖန်ဆင်းထားတော်မူလေ၏။

၁၆ ခပ်သိမ်းသောစပါးတို့သည် လူသား၏စားစရာအတွက် ကောင်းမြတ်၏။ မြေကြီးထဲ၌ဖြစ်စေ၊ မြေကြီးပေါ်၌ဖြစ်စေ အသီးသီးသည့် နွယ်ပင်အသီးလည်းပါဝင်၏—

၁၇ သို့သော်လည်း၊ ဂျုံစပါးသည် လူသားအတွက်၊ ထို့အတူ ပြောင်းဖူးသည် နွားအတွက်၊ ထို့အတူ မြင်းစားဂျုံသည် မြင်းအတွက်၊ ထို့အတူ ဂျုံကြမ်းသည် ငှက်အတွက်နှင့် ဝက်အတွက်၊ ထို့အတူ ခပ်သိမ်းသော တောသားရဲတို့အတွက်၊ ထို့အတူ မုယောသည် အသုံးရသည့် ခပ်သိမ်းသော တိရစ္ဆာန်တို့အတွက်၊ ထို့အတူ အခြားစပါးကဲ့သို့ပင် အားပျော့ဖျော်ရည်အတွက်ဖြစ်၏။

၁၈ ဤစကားများကို စောင့်ထိန်းပြီး၊ ဆောင်ရွက်၍၊ ပညတ်တော်များကို နာခံလျက် လိုက်လျှောက်ကြသည့် သန့်ရှင်းသူအပေါင်းတို့သည် အတွင်းအင်္ဂါတို့၏ကျန်းမာခြင်းနှင့် အရိုးတို့၌ ခြင်ဆီတို့နှင့် ပြည့်စုံကြလိမ့်မည်။

၁၉ ဉာဏ်ပညာနှင့် ကြီးစွာသောအသိပညာရတနာများ၊ အမှန်စင်စစ်၊ ဝှက်ထားသောရတနာများကိုလည်း တွေ့ကြလိမ့်မည်။

၂၀ ပြေးသော်လည်း မမောပန်းရ၊ လျှောက်သော်လည်း မပင်ပန်းရ။

၂၁ ငါကိုယ်တော်ရှင်သည် သူတို့ကို ကတိထားတော်မူသည်ကား၊ ဖျက်ဆီးခြင်းကောင်းကင်တမန်သည် ဣသရေလအမျိုးသားတို့ကို ကျော်လွန်သွား သကဲ့သို့ပင် သူတို့ကို ကျော်လွန် သွားလိမ့်မည်၊ သူတို့ကို မကွပ်မျက်ကြ။ အာမင်။