ဩဝါဒနှင့် ပဋိညာဉ်များ ၁၃၆

အပိုဒ်ငယ် ၁၃၆

ဆောင်းရပ်ကွက်၊ ဣသရေလတပ်၊ အိုမားဟား နိုင်ငံ၊ မစ်ဆိုရီမြစ် အနောက်ဘက်ကမ်း၊ ကောင်ဆယ်လ် ဘလဖ်အနီး၊ အိုင်အိုဝါ၌ ဥက္ကဋ္ဌ ဘရင်ဂ်ဟမ်ရန်းဂ် အားဖြင့် ပေးတော်မူခဲ့သည့် ကိုယ်တော်ရှင်၏ နှုတ်ကပတ်တော်နှင့် အလိုတော်။

၁–၁၆၊ အနောက်ဘက်လားရာ ခရီးအတွက် ဣသရေလတပ်ကို မည်သို့ ဖွဲ့စည်းရမည့် အကြောင်း ရှင်းပြထား၏။ ၁၇–၂၇၊ သန့်ရှင်းသူတို့သည် မြောက်မြားလှသော ဧဝံဂေလိတရားတော် စံနှုန်းများ အတိုင်း နေထိုင်ရန် မိန့်မှာခံရ၏။ ၂၈–၃၃၊ သန့်ရှင်းသူတို့သည် သီချင်းဆိုရ၊ ကရ၊ ဆုတောင်းရ၊ ထို့အတူ ဉာဏ်ပညာကို သင်ယူကြရမည်။ ၃၄–၄၂၊ ပရောဖက်တို့သည် သူတို့ ဂုဏ်ပြုခံရနိုင်စေခြင်းငှာနှင့် ဆိုးညစ်သောသူတို့ ပြစ်ဒဏ် ချမှတ်ခံရနိုင်စေခြင်းငှာ ကွပ်မျက်ခံကြရ၏။

၁ ဣသရေလတပ်၏ အနောက်အရပ်သို့ ခရီးသွားခြင်း၌ သူတို့နှင့်စပ်လျဉ်းသည့် ကိုယ်တော်ရှင်၏ နှုတ်ကပတ်တော်နှင့် အလိုတော်သည်ကား၊

၂ ယေရှုခရစ်တော်၏နောက်ပိုင်းကာလသန့်ရှင်းသူများအသင်းတော်မှ ခပ်သိမ်းသော လူမျိုးတို့အား၊ ထို့အတူ သူတို့နှင့် အတူခရီးသွားသည့် သူတို့အား ကျွန်ုပ်တို့၏ ဘုရားသခင် ကိုယ်တော်ရှင်၏ ခပ်သိမ်းသော ပညတ်တော်များနှင့် ထုံးဥပဒေသများကို စောင့်ထိန်းရန် ပဋိညာဉ်နှင့် ကတိတို့ဖြင့် လူစုများအဖြစ် ဖွဲ့စည်းစေလော့။

၃ လူစုတို့အား ရာစုတပ်မှူးများ၊ ငါးဆယ်စုတပ်မှူးများ၊ ထို့အတူ ဆယ်စုတပ်မှူးများဖြင့်၊ သူတို့အထက်၌ ဥက္ကဋ္ဌတစ်ဦးနှင့် သူ၏တိုင်ပင်ဖက်နှစ်ဦးဖြင့်၊ တမန်တော် တစ်ဆယ့်နှစ်ပါး၏ လမ်းညွှန်မှုအောက်၌ ဖွဲ့စည်းစေလော့။

၄ ဤအရာသည်ကား—ကျွန်ုပ်တို့သည် ကိုယ်တော်ရှင်၏ ခပ်သိမ်းသော ဘိသိက်မင်္ဂလာများ၌ လျှောက်ကြမည့်အကြောင်း ပဋိညာဉ်ဖြစ်၏။

၅ လူစုတိုင်းအား သူတို့တတ်နိုင်သည့် ခပ်သိမ်းသော တိရစ္ဆာန်အရှဉ်းများ၊ လှည်းများ၊ ရိက္ခာများ၊ အဝတ်တန်ဆာနှင့် ခရီးအတွက် အခြားလိုအပ်သာအရာများကို ပေးစေလော့။

၆ လူစုများကို ဖွဲ့စည်းပြီးသောအခါ၊ တည်းခိုမည့် သူတို့အတွက် ပြင်ဆင်ရန် သူတို့အား သူတို့၏ အစွမ်းသတ္တိ ရှိသမျှဖြင့် သွားစေလော့။

၇ လူစုတိုင်းအား၊ သူတို့၏ တပ်မှူးများ၊ ဥက္ကဋ္ဌများနှင့် အတူ၊ နောက်နွေဦး၌ အဘယ်နှစ်ဦး သွားနိုင်သည်ကို ဆုံးဖြတ်စေလော့။ ထို့နောက်တွင်၊ တိရစ္ဆာန်အရှဉ်းများ၊ မျိုးစေ့များနှင့် လယ်ယာ စိုက်ပျိုးရေး ကိရိယာတို့ကို ယူဆောင်ရန်၊ ထို့အတူ နွေဦးကောက်ပဲ သီးနှံများကို စိုက်ပျိုးခြင်း အတွက် ပြင်ဆင်ရန် ကျန်းမာသန်စွမ်းသော သူများနှင့် ကျွမ်းကျင်သော သူများကို ရှေ့ဆောင် သွားနှင့်သူများ အဖြစ် သွားစေရန် ရွေးကောက်စေလော့။

၈ လူစုတိုင်းအား ဆင်းရဲသားများ၊ မုဆိုးမများ၊ အဘမရှိသော သူငယ်များ၊ ထို့အတူ တပ်ထဲသို့ ဝင်သွားလေသောသူတို့၏ မိသားစုများနှင့် စပ်လျဉ်း၍၊ သူတို့ဥစ္စာပစ္စည်း၏ ဝေစုအတိုင်း ညီမျှသော ဝေစုကို ခံယူစေလော့၊ မုဆိုးမများနှင့် အဘမရှိသောသူငယ်တို့၏ ငိုကြွေးသံများ ဤလူမျိုးတို့တစ်ဖက်၌ ကိုယ်တော်ရှင်၏နားသို့ တက်မလာ စေခြင်းငှာပေတည်း။

၉ လူစုတိုင်းအား အိမ်များကို၊ ထို့အတူ ဤရာသီ၌ နောက်မှာဆက်၍ ကျန်ရှိမည့် သူများအတွက်၊ စပါးစိုက်ပျိုးခြင်းအတွက် လယ်ကွင်းများကို ပြင်ဆင်စေလော့။ ဤအရာသည် ကိုယ်တော်ရှင်၏ လူမျိုးတို့နှင့် စပ်လျဉ်း၍ သူ၏အလိုတော်ဖြစ်၏။

၁၀ လူတိုင်းအား မိမိ၏ ခပ်သိမ်းသောဩဇာနှင့် ဥစ္စာပစ္စည်းတို့ကို ဇိအုန်ပန္နက်ကို ကိုယ်တော်ရှင် နေရာချ တော်မူမည့် နေရာသို့ ဤလူမျိုးတို့ကို ရွှေ့ပြောင်းရန် အသုံးပြုစေလော့။

၁၁ သင်တို့သည် ဤအမှုကို စင်ကြယ်သောစိတ်နှလုံးနှင့်၊ အလုံးစုံသောသစ္စာရှိခြင်းဖြင့် လုပ်ဆောင်လျှင်၊ ကောင်းချီး ခံစားရလိမ့်မည်။ သင်တို့သည် သင်တို့၏ သိုးစုများ၌၊ ထို့အတူ သင်တို့၏ နွားစုများ၌၊ ထို့အတူ သင်တို့၏ လယ်ကွင်းများ၌၊ ထို့အတူ သင်တို့၏ အိမ်များ၌၊ ထို့အတူ သင်တို့၏ မိသားစုများ၌ ကောင်းချီး ခံစားကြရလိမ့်မည်။

၁၂ ငါ့ကျွန်များ ဖြစ်သည့် အယ်ဇရာ တီဘင်ဆင်နှင့် အီရက်စ်တပ်စနိုးတို့အား လူစုတစ်စုကို ဖွဲ့စည်းစေလော့။

၁၃ ငါ့ကျွန်များ ဖြစ်သည့် အော်ဆန်ပရတ်နှင့် ဝီလဖို့ဝုဒရပ်ဖ်တို့အား လူစုတစ်စုကို ဖွဲ့စည်းစေလော့။

၁၄ ငါ့ကျွန်များ ဖြစ်သည့် အမ်ဆာလိုင်မန်နှင့် ဂျော့အေစမစ်တို့ကိုလည်း လူစုတစ်စုကို ဖွဲ့စည်းစေလော့။

၁၅ ဥက္ကဋ္ဌများ၊ ထို့အတူ ရာစု၊ ထို့အတူ ငါးဆယ်စု၊ ထို့အတူ ဆယ်စု တပ်မှူးများကိုလည်း ခန့်အပ်ထားစေလော့။

၁၆ ခန့်အပ်ထားခံရလေသည့် ငါ၏ကျွန်တို့အား ငါ၏ အလိုတော်ဖြစ်သည့် ဤအမှုကို သန့်ရှင်းသူတို့ထံ သွား၍ သွန်သင်စေလော့၊ သူတို့အား ငြိမ်းချမ်းရာပြည်သို့ သွားရန် အဆင်သင့် ဖြစ်နိုင်စေခြင်းငှာ ပေတည်း။

၁၇ သင်တို့လမ်းသင်တို့ သွား၍၊ သင်တို့ကို ငါမိန့်တော်မူလေသည့်အတိုင်း လုပ်ဆောင်ကြလော့၊ သင်တို့၏ ရန်သူတို့ကိုလည်း ကြောက်ခြင်းမရှိကြနှင့်။ အကြောင်းမူကား၊ သူတို့၌ ငါ၏အမှုတော်ကို ရပ်စေရန် တန်ခိုးရှိလိမ့်မည်မဟုတ်။

၁၈ ဇိအုန်သည် ငါ၏ ကာလအချိန်တန်သောအခါ၌ ရွေးနုတ်ခံရလိမ့်မည်။

၁၉ လူတစ်စုံတစ်ဦးသည် မိမိကိုယ်ကို တည်ဆောက်ရန်ကြိုးစား၍၊ ငါ၏အကြံကို ကြိုးစားခြင်း မရှိလျှင်၊ တန်ခိုးကို ရလိမ့်မည်မဟုတ်၊ သူ၏မိုက်မဲခြင်းကိုလည်း ထင်ရှားစွာပြလိမ့်မည်။

၂၀ သင်တို့ကြိုးစားကြလော့။ ထို့အတူ သင်တို့၏ ခပ်သိမ်းသော ကတိများကို အချင်းချင်း စောင့်ထိန်းကြလော့။ သင်တို့ညီအစ်ကို၏ အရာကို တပ်မက်သောစိတ်မရှိနှင့်။

၂၁ ကိုယ်တော်ရှင်၏ နာမတော်ကို အချည်းနှီးမြွက်ဆိုခြင်းတည်းဟူသော မကောင်းမှုမှ သင်တို့ကိုယ်သင်တို့ စောင့်ထိန်းကြလော့။ အကြောင်းမူကား၊ ငါသည် သင်တို့၏ ဘုရားသခင် ကိုယ်တော်ရှင်၊ အမှန်စင်စစ်၊ သင်တို့ဘိုးဘေးတို့၏ ဘုရားသခင်၊ အာဗြဟံ၏ ဘုရားသခင်၊ ဣဇာက်၏ ဘုရားသခင်၊ ယာကုပ်၏ ဘုရားသခင် ဖြစ်တော်မူ၏။

၂၂ ငါသည် ဣသရေလအမျိုးသားတို့ကို အဲဂုတ္တုပြည်မှ ပို့ဆောင်ခဲ့လေသောသူဖြစ်၏။ ငါ၏ လက်ရုံးသည်လည်း နောက်ဆုံးသောကာလ၌၊ ငါ၏လူမျိုး ဣသရေလအမျိုးတို့ကို ကယ်တင်ရန် ဆန့် တော်မူ၏။

၂၃ အချင်းချင်းရန်တွေ့ခြင်းကို ရပ်တန့်ကြလော့။ တစ်ဦးအကြောင်းတစ်ဦး မကောင်းပြောခြင်းကို ရပ်တန့်ကြလော့။

၂၄ ယစ်မူးခြင်းကို ရပ်တန့်ကြလော့။ သင်တို့၏စကားတို့ကိုလည်း တစ်ယောက်ကို တစ်ယောက် တည်ဆောက်ရန် ဂရုစိုက်စေလော့။

၂၅ သင်သည် ကိုယ်နှင့်စပ်ဆိုင်သူထံမှ ချေးငှားယူလျှင်၊ သင်ချေးငှားယူလေသည့်အရာကို ပြန်ပေးရမည်။ သင်သည် ပြန်၍မပေးနိုင်လျှင်၊ ထိုသူက သင့်ကို ပြစ်ဒဏ် မချမှတ်စေခြင်းငှာ၊ ချက်ချင်းသွား၍၊ ကိုယ်နှင့်စပ်ဆိုင်သူကို ပြောပြလော့။

၂၆ သင်သည် ကိုယ်နှင့်စပ်ဆိုင်သူ ပျောက်ဆုံးလေသည့် အရာကို တွေ့လျှင်၊ ထိုသူ့ကို တစ်ဖန်ပြန် ပေးရသည် အထိ၊ လုံ့လဝီရိယ ထက်သန်စွာ ရှာလော့။

၂၇ သင်သည် သင့်၌ ရှိသည့်အရာကို ထိန်းသိမ်းစောင့်ရှောက်ရာ၌ လုံ့လဝီရိယရှိလော့၊ သင့်အား ဉာဏ်ပညာရှိသော တာဝန်ခံ တစ်ဦးဖြစ်နိုင်စေကြောင်းပေတည်း။ အကြောင်းမူကား၊ ထိုအရာသည် သင်၏ ဘုရားသခင် ကိုယ်တော်ရှင်ထံမှ အဖိုးအခမဲ့ ဆုကျေးဇူးဖြစ်၏၊ သင်သည်လည်း သူ၏တာဝန်ခံ ဖြစ်၏။

၂၈ သင်သည် ပျော်မွေ့လျှင်၊ သီချင်းဆိုခြင်းဖြင့်၊ တေးဂီတဖြင့်၊ ကခြင်းဖြင့်၊ ထို့အတူ ချီးမွမ်းခြင်းနှင့် ကျေးဇူးတော် ချီးမွမ်းခြင်းတို့၏ ဆုတောင်းခြင်းဖြင့် ကိုယ်တော်ရှင်ကို ချီးမွမ်းလော့။

၂၉ သင်သည် ဝမ်းနည်းလျှင်၊ သင်၏ ဘုရားသခင်ကိုယ်တော်ရှင်ကို ပတ္ထနာပြုခြင်းဖြင့် တောင်းလျှောက်လော့၊ သင်၏ စိတ်ဝိညာဉ် ရွှင်လန်း ဝမ်းမြောက်နိုင်စေကြောင်းပေတည်း။

၃၀ သင်၏ရန်သူတို့ကို ကြောက်ခြင်းမရှိနှင့်၊ အကြောင်းမူကား၊ သူတို့သည် ငါ၏လက်များထဲ၌ ရှိ၍၊ ငါသည် သူတို့၌ ငါ၏အလိုတော်ကို ပြည့်စုံစေမည်။

၃၁ ငါ၏လူမျိုးတို့သည် ခပ်သိမ်းသောအရာတို့၌ အစမ်းသပ်ခံကြရမည်၊ သူတို့အတွက် ငါ့၌ရှိသည့် ဘုန်းအသရေကို၊ ဇိအုန်၏ ဘုန်းအသရေကိုပင်ရရှိရန် သူတို့ပြင်ဆင်ရနိုင်စေခြင်းငှာပေတည်း။ ဆုံးမခြင်းကို မခံမည့်သူသည် ငါ၏နိုင်ငံတော်နှင့် မထိုက်တန်။

၃၂ မသိသောသူအား သူ့ကိုယ်သူနှိမ့်ချခြင်းနှင့် သူ၏ဘုရားသခင်ကိုယ်တော်ရှင်ကို ပတ္ထနာပြုခြင်းတို့ အားဖြင့် သူ၏မျက်စိများပွင့်နိုင်၍၊ မြင်နိုင်စေခြင်းငှာ၊ ထို့အတူ သူ၏နားများပွင့်၍ ကြားနိုင်စေခြင်းငှာ ဉာဏ်ပညာကို သင်ယူစေလော့။

၃၃ အကြောင်းမူကား၊ နှိမ့်ချ၍ ကြေကွဲသောသူတို့အား အလင်းသို့ ရောက်စေရန်၊ ထို့အတူ ဘုရားမဲ့ နေသော သူတို့အား ပြစ်ဒဏ်ချမှတ်ခြင်းသို့ ရောက်စေရန် ငါ၏ဝိညာဉ်တော်ကို လောကထဲသို့ စေလွှတ် ထား၏။

၃၄ သင်၏ညီအစ်ကိုတို့၊ သင်တို့ကို နှင်ထုတ်လေသည့် ပြည်သားတို့သည်ပင် သင်တို့နှင့် သင်တို့၏ သက်သေခံချက်ကို ငြင်းပယ်ကြလေပြီ။

၃၅ ယခုမူကား၊ သားဖွားသော မိန်းမ ခံရသကဲ့သို့ သူတို့၏ ဘေးဒုက္ခကာလ၊ ဝမ်းနည်းခြင်း ကာလသည်ပင် ကျရောက်လာ၏။ သူတို့သည် အလျင်အမြန်၊ အမှန်စင်စစ်၊ အလွန် အလျင်အမြန် နောင်တမရလျှင် သူတို့၏ဝမ်းနည်းခြင်းသည်လည်း ကြီးစွာဖြစ်လိမ့်မည်။

၃၆ သူတို့သည် ပရောဖက်များ၊ ထို့အတူ သူတို့ထံ စေလွှတ်ခံရလေသူများကို သတ်ခဲ့ကြ၏။ သူတို့သည် အပြစ်မရှိသောသူ၏ အသွေးကို သွန်းကြလေပြီ၊ ထိုအသွေးက သူတို့တစ်ဖက်၌ မြေကြီးမှ နေ၍ ဟစ်ကြွေး၏။

၃၇ ထို့ကြောင့်၊ ဤအမှုတို့၌ အံ့ဩခြင်းမရှိကြနှင့်၊ အကြောင်းမူကား၊ သင်တို့သည် မစင်ကြယ်ကြသေး။ သင်တို့သည် ငါ၏ ဘုန်းအသရေကို မခံယူနိုင်ကြသေး။ သို့ရာတွင်၊ သင်တို့သည် အာဒံ၏ လက်ထက်မှစ၍ အာဗြဟံအထိ၊ အာဗြဟံမှစ၍ မောရှေအထိ၊ မောရှေမှစ၍ ယေရှုနှင့် သူ၏ တမန်တော်များအထိ၊ ထို့အတူ ယေရှုနှင့် သူ၏တမန်တော်များမှစ၍၊ ငါ၏အမှုတော်ကို ထူထောင်ရန် ငါ၏ ကောင်းကင်တမန်များ၊ ငါ၏ အမှုတော်ဆောင်ကျွန်များ၊ ထို့အတူ ကောင်းကင်ဘုံမှ ငါကိုယ်တိုင်၏ အသံဖြင့် ငါခေါ်သွင်းခဲ့သူ ဂျိုးဇက်စမစ်အထိ သင်တို့အား ငါပေးလေသည့် ခပ်သိမ်းသော ငါ၏ နှုတ်ကပတ်တော်တို့ကို စောင့်ထိန်းရာ၌ သစ္စာရှိကြလျှင် ထိုဘုန်းအသရေကို မြင်ရကြလိမ့်မည်။

၃၈ ထိုအုတ်မြစ်ကို သူသည်ချခဲ့၏၊ သစ္စာလည်းရှိ၏။ ငါသည်လည်း သူ့ကို ငါ့ထံသို့ ခေါ်ဆောင် တော်မူခဲ့၏။

၃၉ များစွာသော သူတို့သည် သူ၏ သေခြင်းကြောင့် အံ့ဩကြ၏။ သို့ရာတွင် သူဂုဏ်ပြု ခံရနိုင်စေခြင်းငှာနှင့် ဆိုးညစ်သောသူတို့ ပြစ်ဒဏ်ချမှတ်ခံရနိုင်စေခြင်းငှာ၊ သူ၏ သက်သေခံချက်ကို သူ၏ အသွေးဖြင့် တံဆိပ်ခတ်ရမည်မှာ လိုအပ်၏။

၄၀ ငါ၏ နာမတော် အကြောင်း သက်သေတစ်ခုကို ငါချန်ထားလေရာနည်းဖြင့် မှတစ်ပါး ငါသည် သင်တို့ကို သင်တို့၏ ရန်သူတို့ထံမှ မကယ်လွှတ်လေသလော။

၄၁ ယခုတွင်၊ ထို့ကြောင့်၊ စေ့စေ့နားထောင်ကြလော့၊ အို ငါ့အသင်းတော်မှ အသင်လူမျိုးတို့။ ထို့အတူ အသင် အသင်းလူကြီးတို့၊ အတူတကွ နားထောင်ကြလော့။ သင်တို့သည် ငါ၏ နိုင်ငံတော်ကို ရရှိကြလေပြီ။

၄၂ တရားစီရင်တော်မူခြင်းများ သင်တို့အပေါ် မကျရောက်စေခြင်းငှာ၊ ထို့အတူ သင်တို့၏ ယုံကြည်ခြင်း မပျက်စေခြင်းငှာ၊ ထို့အတူ သင်တို့၏ ရန်သူများ သင်တို့ကို မအောင်နိုင်စေခြင်းငှာ ငါ၏ ခပ်သိမ်းသော ပညတ်တော်တို့ကို စောင့်ထိန်းရာ၌ သစ္စာရှိကြလော့။ ယခုတွင် မပြတော့။ အာမင်နှင့် အာမင်။