ဩဝါဒနှင့် ပဋိညာဉ်များ ၁၀၄

အပိုဒ်ငယ် ၁၀၄

၁၈၃၄ ခု၊ ဧပြီ ၂၃ ရက်၊ ကာ့တ်လန်း အိုဟိုင်းရိုအနီးအနားတွင် ပရောဖက်ဂျိုးဇက်စမစ်သို့ စည်းလုံးညီညာစီးပွားရေးလုပ်ငန်း (အပိုဒ်ငယ် ၇၈ နှင့် ၈၂ တို့၏ ခေါင်းစဉ်များတွင် ကြည့်ပါ) နှင့်စပ်လျဉ်း၍ ပေးတော်မူခဲ့သည့် ဗျာဒိတ်တော်။ ထိုအချိန်မှာ စည်းလုံးညီညာစီးပွားရေးလုပ်ငန်း အသင်းသားတို့၏ အတိုင်ပင်ခံအစည်းအဝေး ကျင်းပချိန် ဖြစ်နိုင်ဖွယ်ရှိ၏၊ ထိုအစည်းအဝေးတွင် အသင်းတော်၏ ဇာတိပကတိ အရေးပေါ်လိုအပ်ချက်များကို ဆွေးနွေးခဲ့ကြ၏။ ဧပြီ ၁၀ ရက်တွင် စီးပွားရေးလုပ်ငန်း၏ ယခင်အစည်းအဝေး၌ အဖွဲ့အစည်းကို ဖျက်သိမ်းရန် ဆုံးဖြတ်ခဲ့ကြ၏။ စီးပွားရေးလုပ်ငန်းကို အစားပြန်လည်ဖွဲ့စည်းရန် ဤဗျာဒိတ်တော်က လမ်းညွှန်၏။ စီးပွားရေးလုပ်ငန်းပိုင်ဥစ္စာပစ္စည်းများကို စီးပွားရေးလုပ်ငန်းအသင်းသားတို့၌ သူတို့၏တာဝန်ခံအရာများအဖြစ် ခွဲခြမ်းပေးစေရန်ဖြစ်၏။ ဂျိုးဇက်စမစ်၏လမ်းညွှန်မှုအောက်၌ နောက်ပိုင်းတွင် “စည်းလုံးညီညာစီးပွားရေးလုပ်ငန်း” စကားပိုဒ်ကို “စည်းလုံးညီညာအသင်း” ဖြင့် အစားထိုးခဲ့၏။

၁–၁၀၊ စည်းလုံးညီညာအသင်းကို ဆန့်ကျင်၍ လွန်ကျူးသောသန့်ရှင်းသူတို့သည် အကျိန်ခံရလိမ့်မည်။ ၁၁–၁၆၊ ကိုယ်တော်ရှင်သည် သူ၏သန့်ရှင်းသူတို့ကို သူ၏နည်းအတိုင်း ပေးသနားတော်မူ၏။ ၁၇–၁၈၊ ဧဝံဂေလိတရားတော်ဥပဒေသည် ဆင်းရဲသားတို့အား ဂရုစိုက်ခြင်းကို အုပ်စိုး၏။ ၁၉–၄၆၊ အမျိုးမျိုးသော ညီအစ်ကိုတို့၏ တာဝန်ခံအရာများနှင့် ကောင်းချီးမင်္ဂလာများကို သတ်မှတ်ထား၏။ ၄၇–၅၃၊ ကာ့တ်လန်းရှိ စည်လုံးညီညာအသင်းနှင့် ဇိအုန်ရှိအသင်းတို့ကို သီးခြားစီ ဆောင်ရွက်ရမည်။ ၅၄–၆၆၊ ကျမ်းစာများကို ပုံနှိပ်ခြင်းအတွက် ကိုယ်တော်ရှင်၏ သန့်ရှင်းမွန်မြတ်သော ဘဏ္ဍာတိုက်ကို တည်ထောင်ထား၏။ ၆၇–၇၇၊ စည်းလုံးညီညာအသင်း၏ အထွေထွေဘဏ္ဍာတိုက်သည် အများသဘောတူခြင်းကို အခြေခံ၍ ဆောင်ရွက်ရမည်။ ၇၈–၈၆၊ စည်းလုံးညီညာအသင်း၌ ရှိသောသူတို့သည် မိမိတို့၏ခပ်သိမ်းသောအကြွေးများကို ဆပ်ရမည်၊ ကိုယ်တော်ရှင်သည် သူတို့ကို ငွေကြေးအနှောင်အဖွဲ့မှ ကယ်လွှတ်တော်မူလိမ့်မည်။

၁ သင်တို့ကို ငါအမှန်ဆိုသည်ကား၊ ငါ၏အဆွေခင်ပွန်းတို့၊ စည်းလုံးညီညာအသင်းတစ်သင်း၊ ထို့အတူ ငါ့အသင်းတော်၏ အကျိုးအတွက် ထာဝရတည်မြဲသောအသင်းတစ်သင်းအဖြစ်၊ ထို့အတူ ငါကြွလာတော်မူသည်အထိ လူသားတို့၏ကယ်တင်ခြင်းအတွက် ဖွဲ့စည်းတည်ထောင်ရန် ငါမိန့်တော်မူသည့် အသင်းနှင့် ဆိုင်သည့် ခပ်သိမ်းသော ဥစ္စာပစ္စည်းများနှင့် စပ်လျဉ်း၍ ငါသည် သင်တို့အား သွန်သင်တော်မူခြင်းကို၊ ထို့အတူ ပညတ်တော်ကို ပေး၏—

၂ မပြင်နိုင် မပြောင်းလဲနိုင်သည့် ကတိတော်နှင့်အတူ၊ ငါမိန့်တော်မူလေသည့် သူတို့သည် သစ္စာရှိကြသမျှ၊ မြောက်မြားစွာသော ကောင်းချီးမင်္ဂလာတို့ဖြင့် ကောင်းချီးခံစားကြရလိမ့်မည်။

၃ သို့ရာတွင် သူတို့သည် သစ္စာမရှိကြသမျှ ကျိန်ခြင်းသို့ နီးကြလေပြီ။

၄ ထို့ကြောင့်၊ ငါ၏ကျွန်များထဲမှ အချို့သည် ပညတ်တော်ကို မစောင့်ထိန်းကြဘဲ၊ လောဘ လွန်ကျူးခြင်းအားဖြင့်၊ ထို့အတူ ဟန်ဆောင်သောစကားတို့ဖြင့် ပဋိညာဉ်ကို ချိုးဖောက်ကြသမျှ၊ ငါသည် သူတို့ကို အလွန်ပြင်းထန်ပြီးလေးလံသောကျိန်ခြင်းဖြင့် ကျိန်တော်မူမည်။

၅ အကြောင်းမူကား၊ ငါ၊ ကိုယ်တော်ရှင်သည်၊ ငါ၏စိတ်နှလုံး၌ စီရင်တော်မူလေပြီ၊ အသင်း၏အသင်းဝင် အဘယ်သူမဆို၊ လွန်ကျူးသောသူအဖြစ်တွေ့ရ၊ သို့မဟုတ်၊ တစ်နည်းအားဖြင့်၊ သင်တို့ထိန်းသိမ်းခံရရာ ပဋိညာဉ်ကို ချိုးဖောက်သမျှ သူ၏ဘဝ၌ အကျိန်ခံရလိမ့်မည်၊ ထို့အတူ ငါအလိုရှိရာ အဘယ်သူအားဖြင့်မဆို နင်းချေခံရလိမ့်မည်။

၆ အကြောင်းမူကား၊ ငါ၊ ကိုယ်တော်ရှင်သည်၊ ဤအရာတို့၌ ပြက်ရယ်ပြုခံရဖို့ မဟုတ်—

၇ ဤအရာအားလုံးကို ပြုလေသည်မှာ သင်တို့၌ အပြစ်မရှိသောသူတို့ကို မတရားသောသူတို့နှင့် အတူ ပြစ်ဒဏ်ချမှတ်မခံရနိုင်စေကြောင်း၊ ထို့အတူ သင်တို့၌ အပြစ်ရောက်သောသူတို့ မလွတ်မြောက်နိုင်စေကြောင်းပေတည်း။ အကြောင်းမူကား၊ ငါ၊ ကိုယ်တော်ရှင်သည် သင်တို့အား ဘုန်းအသရေသရဖူကို ငါ၏လက်ယာတော်ဘက်၌ ကတိထားတော်မူလေပြီ။

၈ ထို့ကြောင့်၊ သင်တို့သည် လွန်ကျူးသောသူများအဖြစ် တွေ့ရကြသမျှ၊ သင်တို့ဘဝ၌ ငါ၏အမျက်တော်မှ မလွတ်မြောက်နိုင်ကြ။

၉ သင်တို့သည် လွန်ကျူးခြင်းကို မပယ်ရှင်းကြသမျှ၊ ရွေးနုတ်ခြင်းနေ့ရက်တိုင်အောင် စာတန်၏ညှဉ်းပန်းနှိပ်စက်ခြင်းမှ မလွတ်မြောက်နိုင်ကြ။

၁၀ ငါသည် ယခုတွင် သင်တို့အား တန်ခိုးကို ပေး၏၊ သင်တို့အထဲ၌ ထိုအသင်း၏ အသင်းဝင်အဘယ်သူမဆို လွန်ကျူးသောသူအဖြစ်တွေ့ရပြီး၊ မကောင်းမှုတို့မှ နောင်တရခြင်းမရှိလျှင်၊ သင်တို့ ထိုသူကို စာတန်၏ ညှဉ်းပန်းနှိပ်စက်ခြင်းသို့ လွှဲအပ်ရမည့်အကြောင်းပေတည်း။ စာတန်သည်လည်း သင်တို့အပေါ် မကောင်းမှုကို ဆောင်ယူရန် တန်ခိုးမရှိလတ္တံ့။

၁၁ ထိုအရာသည် ငါ့အထဲ၌ရှိသည့် ဉာဏ်ပညာဖြစ်၏၊ သင်တို့သည် သင်တို့ကိုယ်သင်တို့ ဖွဲ့စည်း၍၊ လူတိုင်းအား သူ၏တာဝန်ခံအရာကို ခန့်အပ်ထားရမည့်အကြောင်း ပညတ်တော်တစ်ခုကို သင်တို့အား ငါပေး၏။

၁၂ လူတိုင်းမိမိကို ခန့်အပ်ထားသည့် တာဝန်ခံအရာအကြောင်း မှတ်တမ်းကို ငါ့အား ပေးနိုင်စေခြင်းငှာပေတည်း။

၁၃ အကြောင်းမူကား၊ ငါ၊ ကိုယ်တော်ရှင်သည် လူတိုင်းကို ငါ၏ လူသတ္တဝါတို့ အတွက် ငါဖန်ဆင်းပြီး ပြင်ဆင်ထားသည့် မြေကြီးအရာ ကောင်းချီးမင်္ဂလာတို့အပေါ် တာဝန်ခံတစ်ဦးအဖြစ် တာဝန်ရှိစေရမည်မှာ လိုအပ်၏။

၁၄ ငါ၊ ကိုယ်တော်ရှင်သည် ငါ၏ လက်တော်နှင့်လုပ်သောအရာများ တည်းဟူသော ကောင်းကင်ကို ကြက်တော်မူ၏၊ မြေကြီးကိုလည်း တည်ဆောက်၏။ ထိုအရပ်တို့၌ ရှိသည့် ခပ်သိမ်းသော အရာတို့သည် ငါ၏အရာများဖြစ်၏။

၁၅ ငါ၏သန့်ရှင်းသူတို့ကို ပေးသနားရန်မှာ ငါ၏ရည်ရွယ်ချက်ဖြစ်၏၊ အကြောင်းမူကား ခပ်သိမ်းသောအရာတို့သည် ငါ၏အရာများဖြစ်၏။

၁၆ သို့ရာတွင် ငါ၏ နည်းအတိုင်းဖြစ်ရမည်။ ရှုဦးလော့၊ ဤအရာသည်ကား ဆင်းရဲသားတို့ ချီးမြှောက်ခံရမည့်အကြောင်း၊ ငါ၏ သန့်ရှင်းသူတို့ကို ပေးသနားရန် ငါ၊ ကိုယ်တော်ရှင်၊ စီရင်တော်မူလေသည့် နည်းလမ်းဖြစ်၏၊ ထိုကဲ့သို့အားဖြင့်၊ ကြွယ်ဝသောသူတို့သည် နှိမ့်ချခံကြရ၏။

၁၇ အကြောင်းမူကား၊ မြေကြီးသည် ပြည့်၏၊ လုံလောက်အောင်ရှိ၏၊ ပိုလည်းပို၏။ ထိုမှတစ်ပါး၊ ငါသည် ခပ်သိမ်းသောအရာတို့ကို ပြင်ဆင်တော်မူလေပြီ၊ လူသားတို့အား သူတို့သဘောနှင့်သူတို့ ပြုနိုင်သောသူများဖြစ်စေရန်လည်း အခွင့်ပေးတော်မူလေပြီ။

၁၈ ထို့ကြောင့်၊ တစ်စုံတစ်ဦးသည် ငါဖန်ဆင်းတော်မူလေသည့် မြောက်မြားစွာသောအရာထဲမှ ယူ၍၊ မိမိဝေစုကို ဆင်းရဲသားများနှင့် ချို့တဲ့သူတို့အား ငါ၏ဧဝံဂေလိတရားတော်ဥပဒေအတိုင်း မျှ၍ပေးခြင်းမရှိလျှင်၊ ထိုသူသည် ဆိုးညစ်သောသူတို့နှင့်အတူ၊ ငရဲ၌ စိတ်ဆင်းရဲ ကိုယ်ဆင်းရဲ ဖြစ်လျက် မျှော်ကြည့်ရလိမ့်မည်။

၁၉ ယခုမူကား၊ သင်တို့ကို ငါအမှန်ဆိုသည်မှာ၊ အသင်း၏ ဥစ္စာပစ္စည်းများနှင့် စပ်လျဉ်း၍—

၂၀ ငါ့ကျွန်ဆစ်ဒနီရစ်ဂဒွန်အား ငါမိန့်တော်မူသည့်အခါ ငါ၏ဥယျာဉ်ထဲ၌၊ ငါအလိုရှိသည့် အတိုင်းပင်၊ သူအလုပ်လုပ်နေစဉ် သူ၏ အထောက်အမအတွက် သူယခုနေထိုင်သည့်နေရာကို၊ ထို့အတူ သားရေနယ်ရာမြေကွက်ကို သူ၏ တာဝန်ခံအရာအဖြစ် ခန့်အပ်ထားစေလော့။

၂၁ ခပ်သိမ်းသောအရာတို့ကိုလည်း ကာ့တ်လန်းမြေရှိ အသင်း၏အကြံပေးသည့်အတိုင်း၊ ထို့အတူ အသင်း၏ ညီညွတ်သော သဘောတူခြင်း သို့မဟုတ် မဲဆန္ဒအတိုင်း ဆောင်ရွက်ရမည်။

၂၂ ဤတာဝန်ခံအရာနှင့် ကောင်းချီးမင်္ဂလာကို၊ ငါ၊ ကိုယ်တော်ရှင်သည်၊ ငါ့ကျွန် ဆစ်ဒနီရစ်ဂ်ဒွန်ထံ၊ ထို့အတူ သူနှင့် သူ့နောက်မှ သူ၏အမျိုးအနွယ်တို့ထံ ကောင်းချီးမင်္ဂလာအဖြစ် အပ်နှင်းတော်မူ၏။

၂၃ သူသည် ငါ့ရှေ့၌နှိမ့်ချသမျှ၊ ငါသည် သူ့အပေါ်ကောင်းချီးမင်္ဂလာတို့ကို များပြားစေမည်။

၂၄ ထိုမှတစ်ဖန်၊ ငါ့ကျွန်မာတင်ဟဲရစ်အား ငါ့ကျွန်ဂျွန်ဂျွန်ဆင် ယခင်နေထိုင်ရာအတွက် အစားရရှိသည့် မြေကွက်ကို သူ၏ တာဝန်ခံအရာအဖြစ်၊ သူနှင့် သူ့နောက်မှ သူ၏အမျိုးအနွယ်တို့ အတွက် ခန့်အပ်ထားစေလော့။

၂၅ သူသည်လည်း သစ္စာရှိသမျှ၊ ငါသည် သူနှင့် သူ့နောက်မှ သူ၏အမျိုးအနွယ်တို့အပေါ် ကောင်းချီးမင်္ဂလာတို့ကို များပြားစေမည်။

၂၆ ငါ့ကျွန်မာတင်ဟဲရစ်အား ငါ၏ နှုတ်ကပတ်တော်တို့ကို ကြေညာခြင်းအတွက်၊ ငါ့ကျွန်ဂျိုးဇက်စမစ်အငယ် လမ်းညွှန်မည့်အတိုင်း သူ၏ငွေများကို ဆက်ကပ်စေလော့။

၂၇ ထိုမှတစ်ဖန်၊ ငါ့ကျွန် ဖရက်ဒရစ်ခ်ဂျီဝီလျံအား သူယခုနေသည့် နေရာကို ရရှိစေလော့။

၂၈ ငါ့ကျွန်အော်လီဗာကောင်ဒရီအား ပုံနှိပ်ရုံးဖြစ်ရမည့် အိမ်နှင့်ကပ်လျက်ရှိသောမြေကွက်၊ မြေကွက်နံပါတ်တစ်ကို၊ ထို့အတူ သူ့အဘနေထိုင်သည့်မြေကွက်ကိုလည်း ရရှိစေလော့။

၂၉ ငါ့ကျွန်များဖြစ်သည့် ဖရက်ဒရစ်ခ်ဂျီဝီလျံနှင့် အော်လီဗာကောင်ဒရီတို့အား ပုံနှိပ်ရုံးအပါအဝင် ၎င်းနှင့်စပ်ဆိုင်သည့် ခပ်သိမ်းသောအရာတို့ကို ရရှိကြစေလော့။

၃၀ ဤအရာသည် သူတို့ကို ခန့်အပ်ထားမည့် သူတို့၏တာဝန်ခံအရာဖြစ်ရမည်။

၃၁ သူတို့သည် သစ္စာရှိကြသမျှ၊ ရှုလော့၊ ငါသည် သူတို့ကို ကောင်းချီးပေးတော်မူမည်၊ ထို့အတူ သူတို့အပေါ်ကောင်းချီးမင်္ဂလာတို့ကို များပြားစေမည်။

၃၂ ဤအရာသည် သူတို့နှင့် သူတို့နောက်မှ သူတို့၏အမျိုးအနွယ်တို့အတွက် သူတို့ကို ငါခန့်အပ်လေသည့် တာဝန်ခံအရာ၏ အစဖြစ်၏။

၃၃ ထို့အတူ၊ သူတို့သည် သစ္စာရှိကြသမျှ၊ ငါသည် သူတို့နှင့် သူတို့နောက်မှ သူတို့၏ အမျိုးအနွယ်တို့အပေါ်၊ မြောက်မြားစွာသောကောင်းချီးမင်္ဂလာတို့ဖြင့်ပင် ကောင်းချီးမင်္ဂလာတို့ကို များပြားစေမည်။

၃၄ ထိုမှတစ်ဖန်၊ ငါ့ကျွန်ဂျွန်ဂျွန်ဆင်အား သူနေသည့်အိမ်ကိုလည်းကောင်း၊ အမွေခံရာ၊ ငါ၏ အိမ်တော်များတည်ဆောက်ခြင်းအတွက် ချန်ထားလေသော ထိုအမွေခံရာနှင့် စပ်ဆိုင်သည့် မြေကြီးမှတစ်ပါး ခပ်သိမ်းသောအရာများကိုလည်းကောင်း၊ ငါ့ကျွန်အော်လီဗာကောင်ဒရီအတွက် သတ်မှတ်ထားလေသည့် မြေကွက်များကိုလည်းကောင်း ရရှိစေလော့။

၃၅ သူသည် သစ္စာရှိသမျှ၊ ငါသည် သူ့အပေါ်ကောင်းချီးမင်္ဂလာတို့ကို များပြားစေမည်။

၃၆ ဝိညာဉ်တော်၏ အသံအားဖြင့်၊ ထို့အတူ အသင်း၏ အကြံပေးသည့်အတိုင်း၊ ထို့အတူ အသင်း၏ မဲဆန္ဒအားဖြင့် သူ့ကို ဖော်ပြသမျှ၊ ငါ၏သန့်ရှင်းသူတို့၏ မြို့ကို တည်ဆောက်ခြင်းအတွက် မှတ်သားထားသည့် မြေကွက်များကို သူရောင်းရမည်မှာ ငါ၏အလိုတော်ဖြစ်၏။

၃၇ ဤအရာသည် သူနှင့် သူ့နောက်မှ သူ၏ အမျိုးအနွယ်တို့အဖို့ ကောင်းချီးမင်္ဂလာအဖြစ် သူ့ကို ငါခန့်အပ်လေသည့် တာဝန်ခံအရာ၏ အစဖြစ်၏။

၃၈ သူသည် သစ္စာရှိသမျှ၊ ငါသည် သူ့အပေါ် ကောင်းချီးမင်္ဂလာတို့ကို များပြားစေမည်။

၃၉ ထိုမှတစ်ဖန်၊ ငါ့ကျွန်နီဝယ်လ်ကေဝှစ်တနီအား အိမ်များနှင့် သူယခုနေထိုင်ရာမြေကွက်၊ ထို့အတူ ကုန်သွယ်ရေးထူထောင်မှု တည်ရှိရာမြေကွက်နှင့် အဆောက်အအုံ၊ ထို့အတူ ကုန်သွယ်ရေးထူထောင်မှု၏ တောင်ဘက်ထောင့်ရှိမြေကွက်၊ ထို့အတူ ဓာတ်ဆားတိုက်တည်ရှိရာ မြေကွက်တို့ကို သူ့အဖို့ ခန့်အပ်ထားစေလော့။

၄၀ ဤခပ်သိမ်းသောအရာတို့ကို ငါသည် ငါ့ကျွန်နီဝယ်လ်ကေဝှစ်တနီအား သူ၏ တာဝန်ခံအရာ အဖြစ်၊ သူနှင့် သူ့နောက်မှ သူ၏အမျိုးအနွယ်တို့ အပေါ် ကောင်းချီးမင်္ဂလာအဖြစ်၊ ကာ့တ်လန်းမြေရှိ ငါ၏ ပန္နက်အဖို့ ငါတည်ထောင်လေသည့် ငါ့အသင်း၏ ကုန်သွယ်ရေးထူထောင်မှုအတွက် ခန့်အပ်လေပြီ။

၄၁ ထိုမှတစ်ပါး၊ ဤအရာသည် ငါ့ကျွန်နီဝယ်လ်ကေဝှစ်တနီကို၊ အကယ်စင်စစ် ဤကုန်သွယ်ရေးထူထောင်မှုတစ်ခုလုံးသည်၊ သူနှင့် သူ၏ကိုယ်စားလှယ်၊ ထို့အတူ သူ့နောက်မှ သူ၏အမျိုးအနွယ်တို့ကို ငါခန့်အပ်လေသည့် တာဝန်ခံအရာ အမှန်ဖြစ်၏။

၄၂ သူ့ကို ငါပေးလေသည့် ပညတ်တော်များကို စောင့်ထိန်းရာ၌ သူသစ္စာရှိသမျှ၊ ငါသည် သူနှင့် သူ့နောက်မှ သူ၏အမျိုးအနွယ်တို့အပေါ် မြောက်မြားစွာသောကောင်းချီးမင်္ဂလာတို့ဖြင့်ပင် ကောင်းချီးမင်္ဂလာတို့ကို များပြားစေမည်။

၄၃ ထိုမှတစ်ဖန်၊ ငါ့ကျွန်ဂျိုးဇက်စမစ်အငယ်အား ငါ၏အိမ်တော်ကို တည်ဆောက်ခြင်းအတွက် မှတ်သားထားသည့်၊ ဝါးအပြန်လေးဆယ်ရှည်ပြီး တစ်ဆယ့်နှစ်ပြန်ကျယ်သည့် မြေကွက်ကို၊ ထို့အတူ သူ၏အဘယခုနေထိုင်သည့် အမွေခံရာကိုလည်း ခန့်အပ်ထားစေလော့။

၄၄ ဤအရာသည် သူ့အဖို့၊ ထို့အတူ သူ့အဘအဖို့ ကောင်းချီးမင်္ဂလာအဖြစ် သူ့ကို ငါခန့်အပ်လေသည့် တာဝန်ခံအရာ၏ အစဖြစ်၏။

၄၅ အကြောင်းမူကား၊ ရှုလော့၊ ငါသည် သူ့အဘအတွက် အထောက်အမအဖြစ် အမွေခံရာကို ချန်ထားလေပြီ။ ထို့ကြောင့်၊ သူသည် ငါ့ကျွန်ဂျိုးဇက်စမစ်အငယ်၏ အိမ်၌ ရေတွက်ခံရလိမ့်မည်။

၄၆ ငါ့ကျွန်ဂျိုးဇက်စမစ်အငယ်သည် သစ္စာရှိသမျှ၊ ငါသည် သူ၏ အိမ်သားတို့အပေါ် မြောက်မြားစွာသော ကောင်းချီးမင်္ဂလာတို့ဖြင့်ပင် ကောင်းချီးမင်္ဂလာတို့ကို များပြားစေမည်။

၄၇ ယခုမူကား၊ ဇိအုန်နှင့် စပ်လျဉ်းသည့် ပညတ်တော်ကို သင်တို့အားငါပေး၏၊ သင်တို့သည် ဤနည်းဖြင့်မှတစ်ပါး၊ ဇိအုန်ရှိသင်၏ ညီအစ်ကိုများသို့ စည်းလုံးညီညာအသင်းအဖြစ် အထားမခံရတော့။

၄၈ သင်တို့သည် ဖွဲ့စည်းပြီးနောက်၊ ကာ့တ်လန်းမြို့ရှိ ဇိအုန်ပန္နက်၏စည်းလုံးညီညာအသင်းဟု အခေါ်ခံရလိမ့်မည်။ သင်တို့၏ညီအစ်ကိုတို့သည်လည်း ဖွဲ့စည်းပြီးနောက်၊ ဇိအုန်မြို့၏ စည်းလုံးညီညာအသင်းဟု အခေါ်ခံရလိမ့်မည်။

၄၉ သူတို့သည် သူတို့၏အမည်များဖြင့်၊ ထို့အတူ သူတို့၏ အမည်ဖြင့် ဖွဲ့စည်းကြရမည်။ သူတို့၏ အမှုအရေးကိုလည်း သူတို့၏ အမည်ဖြင့်၊ ထို့အတူ သူတို့၏ အမည်များဖြင့် ဆောင်ရွက်ကြရမည်။

၅၀ သင်တို့သည် သင်တို့၏အမှုအရေးကို သင်တို့၏အမည်ဖြင့်၊ ထို့အတူ သင်တို့၏ အမည်များဖြင့် ဆောင်ရွက်ကြရမည်။

၅၁ ဤအရာကို ငါမိန့်တော်မူလေသည်မှာ သင်တို့၏ ကယ်တင်ခြင်းအတွက်၊ ထို့အတူ သူတို့နှင်ထုတ်ခံရခြင်းနှင့် ဖြစ်လာမည့်အရာ၏ အကျိုးဆက်အဖြစ် သူတို့၏ကယ်တင်ခြင်းအတွက် ပြီးမြောက်စေခြင်းငှာဖြစ်၏။

၅၂ ပဋိညာဉ်တို့မှာ လွန်ကျူးခြင်းအားဖြင့်၊ လောဘလွန်ကျူးခြင်းနှင့် ဟန်ဆောင်သော စကားတို့ဖြင့် ကျိုးပေါက်၍—

၅၃ ထို့ကြောင့်၊ သင်တို့သည် သင်တို့၏ ညီအစ်ကိုတို့နှင့် စည်းလုံးညီညာအသင်းအဖြစ်မှ ပြိုကွဲသဖြင့်၊ သူတို့နှင့် ဤအချိန်ထိသာလျှင်၊ ဤနည်းအားဖြင့်သာလျှင်၊ ပေါင်းစည်း ထားသည်မဟုတ်။ ငါမိန့်တော်မူလေသကဲ့သို့ပင်၊ ဤအသင်းအားဖြင့် တိုင်ပင်၍ သဘောတူမည့်အတိုင်း၊ သင်တို့၏ အခြေအနေများအခွင့်ပေး၍၊ အတိုင်ပင်ခံအဖွဲ့၏ မဲဆန္ဒလမ်းညွှန်မည့်အတိုင်း ချေးငွေအားဖြင့် ရှိကြ၏။

၅၄ ထိုမှတစ်ဖန်၊ သင်တို့ကို ငါခန့်အပ်လေသည့် သင်တို့၏တာဝန်ခံအရာနှင့်စပ်လျဉ်း၍ ပညတ်တော်တစ်ခုကို သင်တို့အား ငါပေး၏။

၅၅ ရှုလော့၊ ဤခပ်သိမ်းသော ဥစ္စာပစ္စည်းများသည် ငါ၏အရာများဖြစ်၏၊ သို့မဟုတ်လျှင်၊ သင်တို့၏ ယုံကြည်ခြင်းသည် အချည်းနှီးဖြစ်၏၊ ထို့အတူ သင်တို့ကို သူတော်ကောင်း ယောင်ဆောင်သူများ အဖြစ် တွေ့ရ၏၊ ငါ့ထံသို့ သင်တို့ပြုထားသော ပဋိညာဉ်များသည်လည်း ကျိုးပေါက်၏။

၅၆ ဤဥစ္စာပစ္စည်းများသည် ငါ၏အရာများဖြစ်လျှင်၊ ထို့နောက်တွင် သင်တို့သည် တာဝန်ခံများဖြစ်ကြ၏။ သို့မဟုတ်လျှင် သင်တို့သည် တာဝန်ခံများမဟုတ်ကြ။

၅၇ သို့ရာတွင်၊ သင်တို့ကို ငါအမှန်ဆိုသည်ကား၊ ငါသည် သင်တို့ကို ငါ၏ အိမ်တော်အတွက် တာဝန်ခံများ အဖြစ်၊ အကယ်စင်စစ် တာဝန်ခံများ အဖြစ် ခန့်အပ်ထားလေပြီ။

၅၈ ဤရည်ရွယ်ချက်အတွက် သင်တို့ကိုယ်သင်တို့ ဖွဲ့စည်းကြစေရန်၊ ငါ၏ နှုတ်ကပတ်တော်များကို၊ ငါ၏ ကျမ်းစာအပြည့်အစုံကို၊ သင်တို့ကို ငါပေးထားလေသည့်၊ ထို့အတူ၊ နောင်ကာလ၌ အချိန်နှင့်အမျှ၊ သင်တို့ကို ငါပေးမည့် ဗျာဒိတ်တော်များကိုပင် ပုံနှိပ်ရန် သင်တို့ကို ငါမိန့်တော်မူလေပြီ—

၅၉ မြေကြီးပေါ်၌ ငါ၏အသင်းတော်နှင့် နိုင်ငံတော်ကို တည်ဆောက်ခြင်းရည်ရွယ်ချက်အတွက်၊ ထို့အတူ ငါ၏လူမျိုးတို့ကို သူတို့နှင့် ငါအတူနေထိုင်တော်မူမည့် နီးကပ်လာသည့် အချိန်အတွက် ပြင်ဆင်ခြင်းငှာပေတည်း။

၆၀ သင်တို့သည် သင်တို့ကိုယ်တိုင်အတွက် ဘဏ္ဍာတိုက်တစ်ခုအဖြစ် နေရာတစ်နေရာကို ပြင်ဆင်ပြီး၊ ၎င်းကို ငါ၏နာမတော်အဖို့ ဆက်ကပ်ရမည်။

၆၁ သင်တို့သည် သင်တို့အထဲမှ တစ်ဦးကို ဘဏ္ဍာတိုက်ကို ထိန်းသိမ်းရန် ခန့်အပ်ထားရမည်၊ သူသည်လည်း ဤကောင်းချီးမင်္ဂလာသို့ ခန့်ထားခံရလိမ့်မည်။

၆၂ ဘဏ္ဍာတိုက်ပေါ်၌ တံဆိပ်တစ်ခု ရှိရမည်၊ သန့်ရှင်းမွန်မြတ်သော အရာခပ်သိမ်းတို့ကို ဘဏ္ဍာတိုက်ထဲသို့ လွှဲအပ်ရမည်။ သင်တို့အထဲမှ အဘယ်သူကမျှ ထိုအရာကို၊ သို့မဟုတ် ထိုအရာ၏ အဘယ်အစိတ်အပိုင်းကိုမျှ မိမိအရာဟု မခေါ်ရ၊ အကြောင်းမူကား၊ ထိုအရာကို သင်တို့အားလုံး တညီတညွတ်တည်း ပိုင်ဆိုင်ရမည်။

၆၃ ယခုအချိန်မှစ၍၊ သင်တို့ထံ ငါပေး၏။ ယခုမူကား ထိုအရာကို ကြည့်ကြလော့၊ ငါမိန့်တော်မူလေသည့် ဤသန့်ရှင်းမွန်မြတ်သောအရာတို့ကို ပုံနှိပ်ခြင်းရည်ရွယ်ချက်အတွက်၊ သန့်ရှင်းမွန်မြတ်သောအရာတို့မှတစ်ပါး၊ သင်တို့ကို ငါခန့်အပ်လေသည့် တာဝန်ခံအရာကို သင်တို့သွား၍ အသုံးပြုကြလော့။

၆၄ သန့်ရှင်းမွန်မြတ်သောအရာတို့မှ ရသည့်အကျိုးအမြတ်ကို ဘဏ္ဍာတိုက်ထဲမှာ ထားရမည်၊ တံဆိပ်တစ်ခုကိုလည်း ထိုအရာအပေါ်မှာ ထားရမည်။ ထိုအရာကို အဘယ်သူမျှ၊ အသုံးမပြုရ၊ ဘဏ္ဍာတိုက်အပြင်သို့လည်း ယူမသွားရ၊ အသင်း၏ မဲဆန္ဒအားဖြင့်၊ သို့မဟုတ် ပညတ်တော်အားဖြင့် မှတစ်ပါး၊ ၎င်းအပေါ်မှာ ထားမည့် တံဆိပ်ကိုလည်း မရွေ့စေရ။

၆၅ ထိုကဲ့သို့အားဖြင့်၊ သင်တို့သည် သန့်ရှင်းမွန်မြတ်ပြီး သန့်ရှင်းသောရည်ရွယ်ချက်များ အတွက် သန့်ရှင်းမွန်မြတ်သောအရာတို့မှရသည့် အကျိုးအမြတ်ကို ဘဏ္ဍာတိုက်ထဲမှာ ထားရမည်။

၆၆ ဤအရာကို ကိုယ်တော်ရှင်၏ သန့်ရှင်းမွန်မြတ်သောဘဏ္ဍာတိုက်ဟု ခေါ်ရမည်။ ထိုအရာကို သန့်ရှင်းနိုင်စေခြင်းငှာနှင့် ကိုယ်တော်ရှင်အဖို့ ဆက်ကပ်နိုင်စေခြင်းငှာ တံဆိပ်တစ်ခုကို အပေါ်မှာ ထားရမည်။

၆၇ ထိုမှတစ်ဖန်၊ တခြားသောဘဏ္ဍာတိုက်ကို ပြင်ဆင်ထားရမည်၊ ဘဏ္ဍာတိုက်ကိုထိန်းသိမ်းရန် ဘဏ္ဍာစိုးတစ်ဦးကိုလည်း ခန့်အပ်ထားရမည်၊ ၎င်းအပေါ်၌ တံဆိပ်တစ်ခုကိုလည်း ထားရမည်။

၆၈ သင်တို့၏ တာဝန်ခံအရာတို့၌ သင်တို့ရရှိသည့် ခပ်သိမ်းသောငွေများကို သင်တို့ကို ငါခန့်အပ်ထားလေသည့် ဥစ္စာပစ္စည်းများဖြစ်သည့် အိမ်များ၌၊ သို့မဟုတ် မြေများ၌၊ သို့မဟုတ် ကျွဲနွားတိရစ္ဆာန်များ၌၊ သို့မဟုတ် သန့်ရှင်းပြီး သန့်ရှင်းမွန်မြတ်သော ရည်ရွယ်ချက်များအတွက် ငါကိုယ်တိုင်အဖို့ ငါသိမ်းထားသည့် သန့်ရှင်းပြီး သန့်ရှင်းမွန်မြတ်သော စာများမှတစ်ပါး၊ ခပ်သိမ်းသောအရာများ၌ တိုးတက်စေလျက်၊ ငွေများကို ရရှိလျှင်ရရှိချင်း၊ တစ်ရာတန်များ၊ သို့မဟုတ် ငါးဆယ်တန်များ၊ သိုမဟုတ် နှစ်ဆယ်တန်များ၊ သို့မဟုတ် တစ်ဆယ်တန်များ၊ သို့မဟုတ် ငါးဒေါ်လာတန်များအားဖြင့် ဘဏ္ဍာတိုက်ထဲသို့ ထည့်ထားရမည်။

၆၉ သို့မဟုတ်၊ တစ်နည်းအားဖြင့်၊ သင်တို့အထဲမှ တစ်စုံတစ်ဦးသည် ငါးဒေါ်လာတန်များကို ရရှိလျှင်၊ ၎င်းတို့ကို ဘဏ္ဍာတိုက်ထဲသို့ ထည့်စေလော့။ ထိုသူသည် တစ်ဆယ်တန်၊ သို့မဟုတ် နှစ်ဆယ်တန်၊ သို့မဟုတ် ငါးဆယ်တန်၊ သို့မဟုတ် တစ်ရာတန်ကို ရရှိလျှင်လည်း အလားတူ ပြုစေလော့။

၇၀ သင်တို့အထဲမှ အဘယ်သူ့ကိုမျှ ထိုအရာကို မိမိအရာဟု မဆိုစေနှင့်။ အကြောင်းမူကား၊ ထိုအရာကို သူ၏အရာဟု မခေါ်ရ၊ အဘယ်အစိတ်အပိုင်းကိုမျှလည်း မခေါ်ရ။

၇၁ အသင်း၏မဲဆန္ဒနှင့် အများသဘောတူခြင်းအားဖြင့်မှတစ်ပါး အဘယ်အစိတ်အပိုင်းကိုမျှ အသုံးမပြုရ၊ ဘဏ္ဍာတိုက်အပြင်သို့လည်း ယူမသွားရ။

၇၂ ဤအရာသည် အသင်း၏မဲဆန္ဒနှင့် အများသဘောတူခြင်းဖြစ်လိမ့်မည်—သင်တို့အထဲမှ အဘယ်သူကဖြစ်စေ ဘဏ္ဍာစိုးကို၊ ကျွန်ုပ်တာဝန်ခံအရာ၌ ကျွန်ုပ်ကို ကူညီရန် ဤမျှ ကျွန်ုပ်အလိုရှိပါ၏—ဟုဆို၍၊

၇၃ ငါးဒေါ်လာတန်များဖြစ်လျှင်၊ သို့မဟုတ် တစ်ဆယ်ဒေါ်လာတန်များဖြစ်လျှင်၊ သို့မဟုတ် နှစ်ဆယ်တန်၊ သို့မဟုတ် ငါးဆယ်တန်၊ သို့မဟုတ် တစ်ရာတန်ဖြစ်လျှင် ဘဏ္ဍာစိုးသည် ထိုသူကို သူ၏တာဝန်ခံအရာ၌ ကူညီရန်လိုအပ်သည့် ပမာဏကို ပေးရမည်—

၇၄ ထိုသူကို လွန်ကျူးသောသူအဖြစ်တွေ့ရ၍၊ သစ္စာမရှိသော၊ ဉာဏ်ပညာမရှိသော တာဝန်ခံဖြစ်ကြောင်း အသင်း၏ အတိုင်ပင်ခံအဖွဲ့ရှေ့၌ ရှင်းလင်းထင်ရှားစွာပြသည့် အချိန်တိုင်အောင်ပင်တည်း။

၇၅ သို့ရာတွင်၊ ထိုသူသည် ပြည့်စုံသောမိဿဟာယဖွဲ့ခြင်းရှိ၍၊ သူ၏တာဝန်ခံအရာ၌ သစ္စာရှိပြီး၊ ဉာဏ်ပညာရှိသမျှ၊ ဤအရာသည် ဘဏ္ဍာစိုးကမပေးဘဲမထားရမည့်အကြောင်း ဘဏ္ဍာစိုးထံသို့ သူ၏ လက္ခဏာသက်သေ ဖြစ်လိမ့်မည်။

၇၆ သို့ရာတွင် လွန်ကျူးခြင်းပါဝင်သောအမှု၌၊ ဘဏ္ဍာစိုးသည် အသင်း၏အတိုင်ပင်ခံအဖွဲ့နှင့် မဲဆန္ဒ၏ ဩဇာခံဖြစ်ရလိမ့်မည်။

၇၇ ဘဏ္ဍာစိုးကို သစ္စာမရှိသော၊ ဉာဏ်ပညာမရှိသော တာဝန်ခံအဖြစ် တွေ့ရလျှင်၊ သူသည် အသင်း၏အတိုင်ပင်ခံအဖွဲ့နှင့် မဲဆန္ဒ၏ ဩဇာခံဖြစ်ရလိမ့်မည်၊ ထို့အတူ သူ၏နေရာမှ ဖယ်ရှားခံရလိမ့်မည်၊ ထို့အတူ သူ၏နေရာ၌ တခြားသောသူကို ခန့်အပ်ထားလိမ့်မည်။

၇၈ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ သင်တို့၏ အကြွေးများနှင့် စပ်လျဉ်း၍—ရှုလော့၊ သင်တို့၏ခပ်သိမ်းသောအကြွေးများကို သင်တို့ဆပ်ရမည်မှာ ငါ၏အလိုတော်ဖြစ်၏။

၇၉ ငါ့ရှေ့၌ သင်တို့ကိုယ်သင်တို့နှိမ့်ချရမည်၊ ထို့အတူ သင်တို့၏လုံ့လဝီရိယ၊ နှိမ့်ချခြင်းနှင့် ယုံကြည်ခြင်းရှိသော ဆုတောင်းခြင်းတို့အားဖြင့် ဤကောင်းချီးမင်္ဂလာကို ရရှိရမည်မှာလည်း ငါ၏ အလိုတော်ဖြစ်၏။

၈၀ သင်တို့သည် လုံ့လဝီရိယရှိပြီး နှိမ့်ချ၍၊ ယုံကြည်ခြင်းရှိသော ဆုတောင်းခြင်းကို ကျင့်သုံးကြသမျှ၊ ရှုလော့၊ သင်တို့၏ လွတ်မြောက်ခြင်းအတွက် သင်တို့ထံသို့ ငွေကြေးကို ငါပို့သည့်အချိန်အထိ ငါသည် သင်တို့ အကြွေးဆပ်စရာရှိသောသူတို့၏ စိတ်နှလုံးကို ပျော့ပျောင်းစေမည်။

၈၁ ထို့ကြောင့် နယူးယောက်သို့ အလျင်အမြန်ရေးလော့၊ ငါ၏ ဝိညာဉ်တော် ညွှန်ကြားမည့်အတိုင်း ရေးလော့။ သင်တို့အကြွေးဆပ်စရာရှိသောသူတို့၏စိတ်နှလုံးကို ပျော့ပျောင်းစေမည်ဖြစ်၍၊ သင်တို့အပေါ် ဆင်းရဲဒုက္ခဖြစ်စေမည့်အရာကို သူတို့၏ စိတ်မှ ဖယ်ရှားလိမ့်မည်။

၈၂ သင်တို့သည် နှိမ့်ချပြီး သစ္စာရှိလျက် ငါ၏နာမတော်ကို ပတ္ထနာပြုကြသမျှ၊ ငါသည် သင်တို့အား အောင်မြင်ခြင်းကို ပေးတော်မူမည်။

၈၃ သင်တို့သည် ဤတစ်ကြိမ်၌ သင်တို့၏အနှောင်အဖွဲ့မှ ကယ်လွှတ်ခံကြရမည့်အကြောင်း ကတိကို သင်တို့အား ငါပေး၏။

၈၄ သင်တို့သည် ငွေကို ရာချီလျက်၊ သို့မဟုတ် ထောင်ချီလျက် ချေးယူရန် အခွင့်ကို ရရှိကြသမျှ၊ သင်တို့ကိုယ်ကို အနှောင်အဖွဲ့မှ ကယ်လွှတ်ရန်လုံလောက်သည့်တိုင်အောင်ပင် ချေးယူရန်မှာ သင်တို့၏အထူး အခွင့်အရေးဖြစ်၏။

၈၅ သင်တို့လက်ထဲသို့ ငါထည့်ပေးလေသည့် ဥစ္စာပစ္စည်းများကို၊ ဤတစ်ကြိမ်၌၊ သင်တို့အမည်များကိုပေး၍ အများသဘောတူခြင်းအားဖြင့်၊ သို့မဟုတ် တစ်နည်းအားဖြင့်၊ သင်တို့အဖို့ ကောင်းမြတ်သည်ဟု ထင်မည့်အတိုင်း အပေါင်ထားကြလော့။

၈၆ ငါသည် သင်တို့အား ဤတစ်ကြိမ်၌၊ ဤအထူးအခွင့်အရေးကို ပေးတော်မူ၏။ ရှုဦးလော့၊ သင်တို့ရှေ့၌ ငါချထားလေသည့်အရာတို့ကို၊ ငါ၏ ပညတ်တော်များအတိုင်း ဆက်၍ ဆောင်ရွက်ကြလျှင်၊ ခပ်သိမ်းသော ဤအရာတို့သည် ငါ၏အရာများဖြစ်၏၊ သင်တို့သည်လည်း ငါ၏ တာဝန်ခံများဖြစ်ကြ၏၊ သခင်သည်လည်း မိမိအိမ်ကို ပြိုကွဲစေရန် အခွင့်ပေးလိမ့်မည်မဟုတ်။ ထိုကဲ့သို့ပင်တည်း။ အာမင်။