ဩဝါဒနှင့် ပဋိညာဉ်များ ၁၀၃

အပိုဒ်ငယ် ၁၀၃

၁၈၃၄ ခု၊ ဖေဖော်ဝါရီ ၂၄၊ ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့်ဗျာဒိတ်တော်။ သန့်ရှင်းသူတို့ကို သက်သာစေခြင်း၊ ဂျက်ဆင်ခရိုင်ရှိ သူတို့၏မြေများသို့ ပြန်လည်ဆောင်ယူခြင်းတို့နှင့် စပ်လျဉ်း၍ ပရောဖက်နှင့် တိုင်ပင်ရန် မစ်ဆိုရီမှ လာခဲ့ကြလေသည့် ပါလီပီပရတ်နှင့် လိုင်မန်ဝိုက်တို့ ကာ့တ်လန်း၊ အိုဟိုင်းရိုသို့ ရောက်လာခဲ့ကြပြီးနောက် ဤဗျာဒိတ်တော်ကို လက်ခံရရှိခဲ့၏။

၁–၄၊ ကိုယ်တော်ရှင်သည် ဂျက်ဆင်ခရိုင်ရှိ သန့်ရှင်းသူတို့ကို ညှဉ်းဆဲခံရရန် အခွင့်ပေးတော်မူ၏။ ၅–၁၀၊ သန့်ရှင်းသူတို့သည် ပညတ်တော်များကို စောင့်ထိန်းကြလျှင် အနိုင်ရကြလိမ့်မည်။ ၁၁–၂၀၊ ဇိအုန်၏ ရွေးနုတ်ခြင်းသည် တန်ခိုးတော်အားဖြင့် ဖြစ်လိမ့်မည်၊ ကိုယ်တော်ရှင်သည် သူ၏ လူများရှေ့မှ ကြွတော်မူလိမ့်မည်။ ၂၁–၂၈၊ သန့်ရှင်းသူတို့သည် ဇိအုန်၌ စုဝေးကြရမည်၊ မိမိတို့ အသက်ကို စွန့်သောသူတို့သည် အသက်ကို တစ်ဖန်တွေ့လိမ့်မည်။ ၂၉–၄၀၊ အမျိုးမျိုးသော ညီအစ်ကိုတို့သည် ဇိအုန်တပ်စခန်းကို ဖွဲ့စည်းရန်နှင့် ဇိအုန်သို့သွားရန် ခေါ်သွင်းခံကြရ၏၊ သူတို့သည် သစ္စာရှိကြလျှင် အောင်မြင်ခြင်းကတိကို ခံကြရ၏။

၁ သင်တို့ကို ငါအမှန်ဆိုသည်ကား၊ ငါ၏အဆွေခင်ပွန်းတို့၊ ရှုလော့၊ သင်တို့၏ ညီအစ်ကိုတို့၏ ကယ်တင်ခြင်း၊ ရွေးနုတ်ခြင်းတို့နှင့် စပ်လျဉ်းသည့် သင်တို့၏ တာဝန်များကို ကျေပွန်စေရာ၌ အဘယ်သို့ ပြုမူရမည်ကို သင်တို့သိနိုင်ကြစေခြင်းငှာ ဗျာဒိတ်တော်နှင့် ပညတ်တော်ကို သင်တို့အား ငါပေးတော်မူမည်၊ သူတို့သည် ဇိအုန်ပြည်၌ ကွဲပြားပြန့်ကျဲကြလေပြီ။

၂ ငါ့ရန်သူတို့၏ လက်များအားဖြင့် နှင်ထုတ်ခံကြရ၊ ပြင်းစွာအရိုက်ခံကြရလေပြီ။ ငါ၏အချိန်ကာလ၌ ထိုသူတို့အပေါ် ငါ၏အမျက်တော်ကို အတိုင်းမသိ ငါသွန်းလောင်းတော်မူမည်။

၃ အကြောင်းမူကား၊ သူတို့၏ ဒုစရိုက်ပမာဏကို သူတို့ဖြည့်နိုင်ကြစေခြင်းငှာ၊ သူတို့၏ဖလား ပြည့်နိုင်စေခြင်းငှာ၊ ငါသည် သူတို့ကို ဤမျှအထိ အခွင့်ပေးလေပြီ။

၄ သူတို့ကိုယ်သူတို့ ငါ၏နာမတော်အတိုင်းခေါ်ကြသူများသည် သူတို့အား ငါပေးသည့် ပညတ်များနှင့် ပညတ်တော်များကို အပြည့်အဝစေ့စေ့နားမထောင်ကြသောကြောင့်၊ အလွန်ပြင်းထန် လေးလံသောဆုံးမခြင်းဖြင့် ကာလအနည်းငယ်မျှသာ ဆုံးမခံကြရနိုင်စေခြင်းငှာလည်းဖြစ်၏။

၅ သို့ရာတွင်၊ သင်တို့ကို ငါအမှန်ဆိုသည်ကား၊ ငါ၏လူမျိုးတို့သည် ငါ၊ သူတို့၏ဘုရားသခင် ကိုယ်တော်ရှင် သူတို့အား ပေးတော်မူမည့် သွန်သင်ခြင်းကို ယခုအချိန်မှစ၍ စေ့စေ့နားထောင်ကြသမျှ၊ သူတို့နားလည်ကြမည့် စီရင်ချက်ကို ငါစီရင်လေပြီ။

၆ ငါစီရင်တော်မူသဖြင့်၊ ရှုလော့ သူတို့သည် ယခုအချိန်မှစ၍ ငါ၏ ရန်သူတို့ကို အနိုင်ရစပြုကြ၏။

၇ ငါ၊ သူတို့၏ဘုရားသခင်ကိုယ်တော်ရှင် သူတို့ကို ဟောပြောမည့် ခပ်သိမ်းသော နှုတ်ကပတ်တော်တို့ကို ကျင့်စောင့်ရန် စေ့စေ့နားထောင်ခြင်းဖြင့် သူတို့သည် လောကီနိုင်ငံများကို ငါ့ခြေအောက်၌ ထား၍ အောင်သည့်တိုင်အောင် အနိုင်ရခြင်းကို အဘယ်တော့မျှ မရပ်တန့်လတ္တံ့၊ မြေကြီးကိုလည်း သန့်ရှင်းသူတို့ကာလအစဉ်အဆက်အမြဲ ပိုင်ဆိုင်စေရန် ပေးထား၏။

၈ သို့ရာတွင် သူတို့သည် ငါ၏ပညတ်တော်များကို စောင့်ထိန်းခြင်းမရှိကြ၊ ထို့အတူ ငါ၏ ခပ်သိမ်းသောနှုတ်ကပတ်တော်တို့ကို ကျင့်စောင့်ရန် စေ့စေ့နားထောင်ခြင်းမရှိကြသမျှ လောကီနိုင်ငံတို့သည် သူတို့ကို အနိုင်ရလိမ့်မည်။

၉ အကြောင်းမူကား၊ သူတို့ကို လောကအဖို့ အလင်းအဖြစ်၊ ထို့အတူ လူသားတို့၏ ကယ်တင်ရှင်များအဖြစ် ခန့်ထားလေ၏။

၁၀ သူတို့သည် လူသားတို့၏ ကယ်တင်ရှင်များ မဟုတ်ကြသမျှ၊ အရသာ ကင်းပျောက်သည့် ဆားကဲ့သို့ ဖြစ်ကြ၏၊ ထိုအချိန်မှစ၍ ပြင်သို့ အပစ်ခံရဖို့နှင့် လူတို့၏ ခြေအောက်၌ နင်းချေခံရဖို့မှတစ်ပါး၊ အဘယ်အသုံးမျှမဝင်။

၁၁ သို့ရာတွင် သင်တို့ကို ငါအမှန်ဆိုသည်ကား၊ ကွဲပြားပြန့်ကျဲကြလေသည့် သင်တို့၏ ညီအစ်ကိုတို့ သူတို့အမွေခံရာမြေသို့ ပြန်လာကြမည့်အကြောင်း၊ ထို့အတူ ဇိအုန်၏ ဆိတ်ညံရာအရပ်တို့ကို တည်ဆောက်ကြမည့်အကြောင်း ငါစီရင်လေပြီ။

၁၂ အကြောင်းမူကား၊ များစွာသော အတိဒုက္ခ၏ နောက်တွင်၊ ယခင်ပညတ်တော်၌ သင်တို့ကို ငါမိန့်တော်မူလေသကဲ့သို့ပင်၊ ကောင်းချီးမင်္ဂလာရောက်လာ၏။

၁၃ ရှုလော့၊ ဤအရာသည်ကား၊ သင်တို့၏ အတိဒုက္ခများ၊ ထို့အတူ သင်တို့ညီအစ်ကိုတို့၏ အတိဒုက္ခများနောက်၌ ငါကတိပေးတော်မူလေသည့် ကောင်းချီးမင်္ဂလာ—သင်တို့၏ရွေးနုတ်ခြင်း၊ ထို့အတူ သင်တို့ညီအစ်ကိုတို့၏ ရွေးနုတ်ခြင်း၊ တည်ဆောက်ရန်နှင့် ဖြိုချပစ်မခံရတော့ရန် ဇိအုန်ပြည်သို့ သူတို့၏ ပြန်လည်ဆောင်ယူခြင်းပင်ဖြစ်၏။

၁၄ သို့သော်လည်း၊ သူတို့သည် သူတို့၏အမွေခံရာတို့ကို ညစ်ညူးစေကြလျှင်၊ ဖြိုချပစ်ခံကြရမည်။ အကြောင်းမူကား၊ သူတို့သည် သူတို့၏အမွေခံရာတို့ကို ညစ်ညူးစေကြလျှင် ငါသည် သူတို့ကို ချမ်းသာပေးမည်မဟုတ်။

၁၅ ရှုလော့၊ သင်တို့ကို ငါဆိုသည်ကား၊ ဇိအုန်၏ ရွေးနုတ်ခြင်းသည် တန်ခိုးတော်အားဖြင့် ဖြစ်ရမည်။

၁၆ ထို့ကြောင့်၊ ဣသရေလအမျိုးသားတို့ကို မောရှေပို့ဆောင်သကဲ့သို့ပင် ငါ၏လူမျိုးတို့ကို ပို့ဆောင်မည့် လူတစ်ယောက်ကို သူတို့အဖို့ ငါပေါ်ထွန်းစေတော်မူမည်။

၁၇ အကြောင်းမူကား၊ သင်တို့သည် ဣသရေလအမျိုးသားများဖြစ်ကြ၏၊ ထို့အတူ အာဗြဟံ၏ အမျိုးအနွယ်ဖြစ်ကြ၏၊ သင်တို့သည် တန်ခိုးတော်အားဖြင့်၊ ထို့အတူ လက်ဆန့်ခြင်းဖြင့် ကျွန်ခံရာမှ ခေါ်ထုတ် ခံကြရမည်။

၁၈ သင်တို့၏ဘိုးဘေးတို့ ရှေ့ဦးစွာပို့ဆောင်ခံရသကဲ့သို့၊ ဇိအုန်၏ ရွေးနုတ်ခြင်းသည်လည်း ထိုကဲ့သို့ပင် ဖြစ်လိမ့်မည်။

၁၉ ထို့ကြောင့်၊ သင်တို့၏စိတ်နှလုံးကို အားမလျော့စေနှင့်၊ အကြောင်းမူကား၊ ငါ၏ ကောင်းကင်တမန်သည် သင်တို့ရှေ့မှ သွားလိမ့်မည်၊ သို့ရာတွင် ငါ၏မျက်မှောက်မှ မသွားကြဟု သင်တို့၏ ဘိုးဘေးတို့ကို ငါဆိုသကဲ့သို့ သင်တို့ကို ငါဆိုခြင်းမရှိ။

၂၀ သို့ရာတွင် သင်တို့ကို ငါဆိုသည်ကား၊ ငါ၏ ကောင်းကင်တမန်တို့သည် သင်တို့ရှေ့မှ သွားကြလိမ့်မည်၊ ထို့အတူ ငါ၏ မျက်မှောက်မှလည်း သွားကြလိမ့်မည်၊ ထို့အတူ အချိန်စေ့သော အခါ၌ သင်တို့သည် ကောင်းသောမြေကို ပိုင်ဆိုင်ကြလိမ့်မည်။

၂၁ သင်တို့ကို ငါအမှန်၊ အမှန်ဆိုသည်ကား၊ ငါ့ကျွန်ဂျိုးဇက်စမစ်အငယ်သည် သင်တို့ကို ငါပေးသည့် ပုံဆောင်စကား၌ ဥယျာဉ်ပိုင်ရှင်ဆိုသည့် ကျွန်နှင့် ငါပမာပြုသောသူဖြစ်၏။

၂၂ ထို့ကြောင့်၊ ငါ့ကျွန်ဂျိုးဇက်စမစ်အငယ်ကို၊ ငါ့အိမ်မှအင်အား၊ ငါ၏လူပျိုနှင့် လူလတ်တို့ကို—ငါ့ထံဆက်ကပ်ထားသည့် ငွေနှင့် ငါဝယ်လေသည့် ပြည်တည်းဟူသော ဇိအုန်ပြည်သို့ သင်တို့ကိုယ်သင်တို့ အတူတကွစုဝေးကြလော့ဟု ဆိုစေလော့။

၂၃ ခပ်သိမ်းသော အသင်းတော်တို့ကိုလည်း သူတို့၏ငွေများနှင့်အတူ ဉာဏ်ပညာရှိသောသူတို့ကို စေလွှတ်၍၊ သူတို့ကို ငါမိန့်တော်မူလေသည့်အတိုင်းပင် မြေများကို ဝယ်ကြစေလော့။

၂၄ ငါ၏ရန်သူတို့ တစ်ဖက်၌ ငါရှေ့သို့ သင်တို့ဆောင်ယူလာသည့် သက်သေခံချက်များ နောက်တွင် သူတို့သည် ဇိအုန်ပြည်အဖြစ် ငါရည်းစူးထားတော်မူလေသည့် ပြည်တည်းဟူသော ကောင်းသောမြေမှ၊ သင်တို့၏မြေမှပင် သင်တို့ကို နှင်ထုတ်ရန် လာ၍တိုက်ခိုက်ကြသမျှ၊ သင်တို့သည် သူတို့ကို ကျိန်ရမည်။

၂၅ သင်တို့ကျိန်သည့်သူမှန်သမျှကို ငါကျိန်တော်မူမည်၊ သင်တို့သည်လည်း ငါ့အဖို့ ငါ၏ ရန်သူတို့ကို လက်တုံ့ပြန်ရမည်။

၂၆ ငါ့ကို မုန်းသောသူတို့၏ တတိယနှင့်စတုတ္ထ မျိုးဆက်တိုင်အောင် ငါ့အဖို့ ငါ၏ရန်သူတို့ကို လက်တုံ့ပြန်ရာ၌ပင် ငါ၏မျက်မှောက်တော်သည် သင်တို့နှင့် အတူရှိလိမ့်မည်။

၂၇ အဘယ်သူမျှ ငါ့အတွက် မိမိအသက်ကို စွန့်ရန် မကြောက်လန့်စေနှင့်။ အကြောင်းမူကား၊ ငါ့အတွက် မိမိအသက်ကို စွန့်သူမှန်သမျှသည် အသက်ကို တစ်ဖန်တွေ့လိမ့်မည်။

၂၈ ငါ့အတွက် မိမိအသက်ကိုစွန့်ရန် လိုလိုလားလား မရှိသူမှန်သမျှသည် ငါ၏တပည့်တော် မဟုတ်။

၂၉ ငါ့ကျွန် ဆစ်ဒနီရစ်ဂဒွန်သည် အရှေ့ပိုင်းတိုင်းပြည်များရှိ ပရိသတ်တို့၌ အသင်းတော်တို့ကို ပြင်ဆင်ရာတွင် ဇိအုန်၏ ပြန်လည်ဆောင်ယူခြင်းနှင့် ရွေးနုတ်ခြင်းတို့နှင့် စပ်လျဉ်း၍ သူတို့ကို ငါပေးထားတော်မူလေသည့် ပညတ်တော်များကို စောင့်ထိန်းစေရန် ကြွေးကြော်ရမည်မှာ ငါ၏ အလိုတော်ဖြစ်၏။

၃၀ ငါ့ကျွန် ပါလီပီပရတ်နှင့် ငါ့ကျွန်လိုင်မန်ဝိုက်တို့သည် ဇိအုန်ပြည်သို့ တက်သွားရန် လူစုများကို၊ ဆယ်ယောက်စီဖြစ်စေ၊ အယောက်နှစ်ဆယ်စီဖြစ်စေ၊ အယောက်ငါးဆယ်စီဖြစ်စေ၊ အယောက်တစ်ရာစီဖြစ်စေ မရရှိမီ၊ ငါ့အိမ်မှ အင်အားကို အရေအတွက် ငါးရာအထိ သူတို့မရရှိမီ၊ သူတို့ညီအစ်ကိုတို့၏မြေသို့ ပြန်မလာရမည်မှာ ငါ၏အလိုတော်ဖြစ်၏။

၃၁ ရှုလော့၊ ဤအရာသည် ငါ၏အလိုတော်ဖြစ်၏။ တောင်းကြလော့၊ သင်တို့ရကြလိမ့်မည်။ သို့ရာတွင် လူသားတို့သည် ငါ၏အလိုတော်ကို အစဉ်အမြဲ မဆောင်ရွက်ကြ။

၃၂ ထို့ကြောင့်၊ သင်တို့သည် အယောက်ငါးရာကို မရရှိနိုင်ကြလျှင်၊ အယောက်သုံးရာကို ရရှိကောင်း ရရှိနိုင်ကြစေခြင်းငှာ လုံ့လဝီရိယထက်သန်စွာ ကြိုးစားကြလော့။

၃၃ သင်တို့သည် အယောက်သုံးရာကို မရရှိနိုင်လျှင်လည်း၊ အယောက်တစ်ရာကို ရရှိကောင်း ရရှိနိုင်ကြစေခြင်းငှာ လုံ့လဝီရိယထက်သန်စွာ ကြိုးစားကြလော့။

၃၄ သို့ရာတွင် သင်တို့ကို ငါအမှန်ဆိုသည်ကား၊ သင်တို့နှင့်အတူ ဇိအုန်ပြည်သို့ တက်သွားရန် ငါ့အိမ်မှ အင်အား အယောက်တစ်ရာကို သင်တို့မရရှိမီ၊ ဇိအုန်ပြည်သို့ တက်မသွားရမည့်အကြောင်း ပညတ်တော်တစ်ခုကို သင်တို့အား ငါပေး၏။

၃၅ ထို့ကြောင့်၊ သင်တို့ကို ငါမိန့်တော်မူလေသည့်အတိုင်း၊ တောင်းကြလော့၊ သင်တို့ရကြ လိမ့်မည်။ ငါ့ကျွန်ဂျိုးဇက်စမစ်အငယ် သင်တို့နှင့်အတူ သွားကောင်းသွားနိုင်၍၊ ထို့အတူ ငါ့လူမျိုးတို့အလယ်၌ ဦးစီးနိုင်၊ ထို့အတူ ဆက်ကပ်ထားသောပြည်ပေါ်၌ ငါ၏နိုင်ငံတော်ကို ဖွဲ့စည်းနိုင်၊ ထို့အတူ သင်တို့အား ငါပေးလေပြီးသည့်၊ ငါပေးတော်မူလိမ့်မည့် ဥပဒေများနှင့် ပညတ်တော်များကို အခြေခံ၍ ဇိအုန်သားတို့ကို တည်ထောင်နိုင်စေခြင်းငှာ အလေးအနက် ဆုတောင်းကြလော့။

၃၆ သင်တို့၏လုံ့လဝီရိယ၊ သစ္စာရှိခြင်း၊ ထို့အတူ ယုံကြည်ခြင်းရှိသော ဆုတောင်းခြင်းတို့အားဖြင့် ခပ်သိမ်းသောအောင်နိုင်ခြင်းနှင့် ဂုဏ်အသရေကို သင်တို့အဖို့ဖြစ်ပေါ်စေ၏။

၃၇ ငါ့ကျွန် ပါလီပီပရတ်ကို ငါ့ကျွန်ဂျိုးဇက်စမစ်အငယ်နှင့်အတူ ခရီးသွားစေလော့။

၃၈ ငါ့ကျွန်လိုင်မန်ဝိုက်ကို ငါ့ကျွန်ဆစ်ဒနီရစ်ဂဒွန်နှင့်အတူ ခရီးသွားစေလော့။

၃၉ ငါ့ကျွန်ဟီရမ်စမစ်ကို ငါ့ကျွန်ဖရက်ဒရစ်ခ်ဂျီဝီလျံနှင့်အတူ ခရီးသွားစေလော့။

၄၀ ငါ့ကျွန်အော်ဆန်ဟိုက်ကို ငါ့ကျွန်အော်ဆန်ပရတ်နှင့်အတူ ခရီးသွားစေလော့၊ သင်တို့ကို ငါပေးလေသည့် ဤပညတ်တော်တို့အား ပြီးပြည့်စုံစေခြင်းကို ရရှိစေရန်၊ ငါ့ကျွန်ဂျိုးဇက်စမစ်အငယ် သွန်သင်မည့် အရပ်မှန်သမျှသို့ ခရီးသွားကြစေလော့၊ ကျန်ကြွင်းသောအရာတို့ကို ငါ့လက်ထဲ၌ ထားခဲ့ကြလော့။ ထိုကဲ့သို့ပင်တည်း။ အာမင်။