Jekjōn 88
Revelesōn letok kōn Josep Smith Rikanaan eo ilo Kirtland, Ohio, Tijem̧ba 27 im 28, 1832, im Jānwōde 3, 1833. Rikanaan eo kar kōjenolo̧ke āinwōt “‘bilkōn wōjke olive’ … rujeļo̧k jān Wōjke in Paredais, ennaan in kaenōm̧m̧an eo an Irooj n̄an kōj.” Revelesōn in kar leļo̧k ālkin an pris utiej ro ilo juon kweļok kar jar “kajjojo makeļo̧k ian im ilo ainikien elaaj n̄an Irooj bwe En kwaļo̧k ankilan n̄an kōm̧ kōn ekkal lōn̄ļo̧k eo an Zaion.”
1–5, Ro Rekwōjarjar retiljek rej bōk Rikaenōm̧m̧an, eo ej kallim̧ur kōn mour indeeo; 6–13, Aolep men otemjeļo̧k rej pād ium̧win kajeikik im oņaake jān Meram in Kraist; 14–16, Jerkakpeje eo ej itok kōn Lo̧mo̧o̧ren Eo; 17–31, Pokake kien selestial, terrestrial, im telestial ej kōpooj armej n̄an aelōn̄ in kiin̄ kein im aiboojoj kein kajjojo; 32–35, Ro renaaj mour wōt ilo jero̧wiwi renaaj pād wōt ilo ettoon; 36–41, Aolep aelōn̄ in kiin̄ ko rej oņaake jān kien; 42–45, Anij eaar letok kien n̄an aolep men otemjeļo̧k; 46–50, Armej enaaj meļeļe em̧ool Anij; 51–61, Būrabōļ eo kōn an armej jilkinļo̧k ro rikarejeran n̄an jikin kallib eo im loļo̧k er kajjojo iaer; 62–73, Kepaaktok Irooj, im kom̧ naaj lo turin Mejān; 74–80, Kokwōjarjar kom̧ im katakin doon pedped in katak ko an aelōn̄ eo; 81–85, Aolep armej em̧ōj kakkōl e en kakkōl eo riturun; 86–94, Kakōļļe ko, poktak ko an mennin bobo ko, im enjeļ raņ rej kōpooj iaļ eo n̄an itok eo an Irooj; 95–102, Jilel ko an enjeļ raņ rej kūrtok ro remej ilo ekkar eo aer; 103–116, Jilel ko an enjeļ raņ rej kabun̄bun̄ļo̧k jepļaaktok eo an gospel eo, jeepepļo̧k eo an Babilon, im pata eo an Anij eo eļap; 117–126, Kappukot jeļāļo̧kjeņ, kajutak m̧weo im̧ōn Anij (juon tampeļ), im ņa ballemi kōn korak an iakwe-em̧ool; 127–141, Ekkar eo an Jikuuļ eo an Rikanaan ro ej ellaajrak, ekitbuuj kain̄i in kwaļi ne ko.
1 Em̧ool, āindein Irooj ej ba n̄an kom̧ ro rekar kuktok ippān doon n̄an bōk Ankilaan kake kom̧:
2 Lo, men in ekabun̄-būruōn ami Irooj, im enjeļ raņ rej m̧ōņōņō ioomi; jerbal in jouj ko ami jān jar ko ami em̧ōj aer wanlōn̄tak ilo lo̧jiln̄in Irooj in Sabaot, im rej jeje ilo bok in etan ro em̧ōj kokwōjarjar er, em̧ool er an laļ eo selestial.
3 Kōn menin, Ij kiiō jilkinwaj ioomi bar juon Rikaenōm̧m̧an, em̧ool ioomi ro jera, bwe en maron̄ pād ilo būruōmi, em̧ool Jetōb Kwōjarjar in kallim̧ur; bar Rikaenōm̧m̧an eo ej ejja eo Iaar kallim̧ur kake n̄an ro rikaļoora, āinwōt kar je ilo naan in kam̧ool eo an Jon.
4 Rikaenōm̧m̧an in ej kallim̧ur eo Ij lewōj n̄an kom̧ kōn mour indeeo, em̧ool aiboojoj eo an aelōn̄ selestial;
5 Aiboojoj eo me ej an kabun̄ eo an M̧aanje eo, em̧ool an Anij, Eo ekwōjarjar jān aolep, kōn Jisōs Kraist eo Nejin—
6 Eo ej wanlōn̄ļo̧k n̄an lan̄, āinwōt barāinwōt Eaar wanlaļtak ium̧win aolep men ko otemjeļo̧k, bwe En meļeļe aolep men ko otemjeļo̧k, bwe En maron̄ pād ilo aolep im kōn aolep men ko otemjeļo̧k, meram in m̧ool;
7 M̧ool eo ej romaak. En̄in ej meram in Kraist. Āinwōt barāinwōt E ej ilo al, im meram eo an al, im kajoor eo ie im jān e ekar kōm̧anm̧an e.
8 Āinwōt barāinwōt E ej ilo allōn̄, im ej meram eo an allōn̄, im kajoor eo ie im jān e ekar kōm̧anm̧an e;
9 Āinwōt barāinwōt meram eo an iju ko, im kajoor eo ie im jān e kar kōm̧anm̧ani;
10 Im laļ in barāinwōt, im kajoor eo ie, em̧ool laļ in eo me kom̧ij jutak ioon.
11 Im meram eo me ej romaak, eo ej lewōj n̄an kom̧ meram, ej kōn E eo ej kōmeramļo̧k mājāmi, eo ej ejja meram eo wōt me ej kōm̧ōkajļo̧k jeļā ko ami;
12 Meram eo ej erromaakļo̧k jān im̧aan mejān Anij n̄an kobrak ļap in lan̄—
13 Meram eo me ej ilo aolep men ko otemjeļo̧k, eo ej leļo̧k mour n̄an aolep men ko otemjeļo̧k, eo ej kien eo jān e aolep men ko otemjeļo̧k rej bōk oņaake, em̧ool kajoor eo an Anij eo ej jijet ioon An tūroon, eo ej ilo ubōn indeeo, eo ej ilo ilubwiljin aolep men ko otemjeļo̧k.
14 Kiiō, em̧ool Ij ba n̄an kom̧, bwe kōn lo̧mo̧o̧r eo me ej kōm̧m̧an n̄an kom̧ ej bōktok jerkakpeje jān ro remej.
15 Im jetōb im ānbwin rej ejaake an eo an armej.
16 Im jerkakpeje jān ro remej ej lo̧mo̧o̧r eo an an.
17 Im lo̧mo̧o̧r eo an an ej kōn E eo ej kōmour aolep men otemjeļo̧k, Eo ilo ubōn ej kean̄ bwe ro rijeram̧ōl im rittā an laļ renaaj jolōt e.
18 Kōn menin, e mennin aikuj bwe en ekwōjarjar jān aolep jab wānōk, bwe en maron̄ pojak n̄an aiboojoj an selestial;
19 Bwe n̄e em̧ōj an kajejjet lukkuun unin kōm̧anm̧an eo an, e naaj kūrawūn kōn aiboojoj, em̧ool kōn pād im̧aan mejān Anij Jemān;
20 Bwe ānbwin ko rej jān aelōn̄ selestial ren maron̄ bōk e indeeo im indeeo; bwe, bwe en̄in kar jibadbad eo kar kōm̧m̧ane im ejaake kake, im kōn jibadbad in ej kokwōjarjar er.
21 Im er ro jab kokwōjarjar er kōn kien eo me Iaar lewōj n̄an kom̧, em̧ool kien eo an Kraist, reaikuj jolōte bar juon aelōn̄ in kiin̄, em̧ool eo ej an aelōn̄ in terrestrial, ak eo ej an juon aelōn̄ telestial.
22 Bwe e eo ej jab maron̄ pokake kien eo an aelōn̄ selestial ej jab maron̄ mour ilo aiboojoj in selestial.
23 Im e eo ej jab maron̄ pokake kien eo an aelōn̄ in terrestrial eban mour ilo aiboojoj eo an terrestrial.
24 Im e eo ej jab maron̄ pokake kien eo an aelōn̄ in telestial ej jab maron̄ mour ilo aiboojoj eo an telestial; kōn menin e ej jab tōllo̧ke juon aelōn̄ in aiboojoj. Kōn menin eaikuj mour ilo juon aelōn̄ eo me ej jab juon aelōn̄ in aiboojoj.
25 Im bar juon alen, em̧ool Ij ba n̄an kom̧, laļ ej pokake kien eo an aelōn̄ selestial, bwe ej kajejjet unin kōm̧anm̧an eo an, im jab rupe kien eo—
26 Kōn menin, naaj kokwōjarjar e; aaet, men̄e enaaj mej, naaj kōmour e bar juon alen, im naaj maron̄ pād wōt ilo kajoor eo me kōn e ej kōmour e, im ro rewānōk renaaj jolōt e.
27 Bwe jekdo̧o̧n n̄e remej, renaaj barāinwōt bar jerkak, juon ānbwinnin jetōb.
28 Er ro rej jān jitōbōn selestial renaaj bōk ejja ānbwin eo eaar lukkuun ānbwinnin kanniōk; em̧ool kom̧ naaj bōk ānbwin ko ānbwinnōmi, im aiboojoj eo ami enaaj aiboojoj eo me naaj kōmour ānbwin ko ānbwinnōmi n̄an i.
29 Kom̧ ro kōmour er jān m̧ōttan aiboojoj eo an selestial innām naaj bōk jān ejja in wōt, em̧ool likiion.
30 Im ro rej kōmour er jān m̧ōttan aiboojoj eo an terrestrial innām naaj bōk jān ejja in wōt, em̧ool likiion.
31 Im barāinwōt er ro kōmour er jān m̧ōttan aiboojoj eo an telestial innām naaj bōk jān ejja in wōt, em̧ool likiion.
32 Im er ro repād wōt naaj barāinwōt kōmour er; mekarta, renaaj bar ro̧o̧l n̄an ijo jikier make, n̄an lan̄lōn̄ ilo men eo me rej m̧ōņōņō n̄an bōk e, kōnke rekar jab m̧ōņōņō n̄an lan̄lōn̄ ilo men eo me remaron̄ kar bōke.
33 Bwe ta em̧m̧an eo n̄an juon armej eļan̄n̄e mennin leļo̧k eo likūti ioon, im e ej jab bōk mennin leļo̧k eo? Lo, e ej jab m̧ōņōņō ilo men eo kar leļo̧k n̄an e, im jab m̧ōņōņō ilo e eo rileļo̧k eo an mennin leļo̧k eo.
34 Im bar juon alen, em̧ool Ij ba n̄an kom̧, bwe men eo oņaake jān kien eo ej barāinwōt bōk kōjparok jān kien im kōweeppān im kokwōjarjar jān ejja in wōt.
35 Men eo ej rupe juon kein, im jab mour ekkar n̄an kien, ak kappukot n̄an erom juon kien n̄an e make, im kipel e n̄an mour ilo jero̧wiwi, im jim̧or aolep mour ilo jero̧wiwi, ej jab maron̄ kokwōjarjar e jān kien, im jab jān tūriam̧okake, jim̧we, ak ekajet. Kōn menin, reaikuj pād wōt ilo ettoon.
36 Aolep aelōn̄ in kiin̄ ko em̧ōj leļo̧k n̄an er juon kien;
37 Im elōn̄ aelōn̄ in kiin̄ ko; bwe ejjeļo̧k to eo ijo ejjeļo̧k juon aelōn̄ in kiin̄ ie; im elōn̄ ejjeļo̧k aelōn̄ in kiin̄ ilo ijo ejjeļo̧k to ie, juon aelōn̄ in kiin̄ eo eļapļo̧k ak edikļo̧k.
38 Im n̄an aolep aelōn̄ in kiin̄ em̧ōj leļo̧k juon kien; im n̄an kajjojo kien ewōr jon̄aer barāinwōt im koņ ko.
39 Aolep ro rej jab mour ekkar n̄an koņ ko rej jab jim̧we.
40 Bwe jeļāļo̧kjeņ ej eddāp n̄an jeļāļo̧kjeņ; mālōtlōt ej bōk mālōtlōt; m̧ool ej jiburlepe m̧ool; erreo ej iakwe erreo; meram ej eddāp n̄an meram; tūriam̧o ewōr an jouj ioon tūriam̧o im ej kappukot ro an; jim̧we ej wōnm̧aanļo̧k ilo iaļ eo an im kappukot ro an; ekajet ej ilo̧k im̧aan mejān E eo ej jijet ioon tūroon eo im oņaake im kōm̧akūtkūt aolep men ko otemjeļo̧k.
41 E meļeļe aolep men otemjeļo̧k, im aolep men otemjeļo̧k rej pād Im̧aan, im aolep men otemjeļo̧k rej pād ipeļaakin; im E ej ilōn̄in aolep men otemjeļo̧k, im ilo aolep men, im ej deblo̧ke aolep men otemjeļo̧k, im ej jepooļe aolep men otemjeļo̧k; im aolep men otemjeļo̧k rej jān E, im kōn E, em̧ool Anij, indeeo im indeeo.
42 Im bar juon alen, em̧ool Ij ba n̄an kom̧, E eaar leļo̧k juon kien n̄an aolep men otemjeļo̧k, jān e rej em̧m̧akūtkūt ilo iien ko aer im tōre ko aer;
43 Im kooj ko aer rej dedeļo̧k, em̧ool kooj ko an lan̄ ko im laļ in, ko rekitbuuj laļ im aolep planet ko.
44 Im rej leļo̧k meram n̄an doon ilo iien ko aer im ilo tōre ko aer, ilo minit ko aer, ilo awa ko aer, ilo raan ko aer, ilo wiik ko aer, ilo allōn̄ ko aer, ilo iiō ko aer—aolep men kein rej juon iiō ippān Anij, ak jaab ippān armej.
45 Laļ ej jabwilļo̧k ioon pein bao ko pein, im al ej leļo̧k an meram ilo raan, im allōn̄ ej leļo̧k an meram ilo bon̄, im iju ko barāinwōt rej leļo̧k meram ko aer, ke rej jabwilļo̧k ioon pein bao ko peier ilo aiboojoj eo aer, ilubwiljin kajoor eo an Anij.
46 N̄a ta Inaaj keidi aelōn̄ in kiin̄ kein, bwe kom̧in maron̄ meļeļe?
47 Lo, aolep kein rej aelōn̄ in kiin̄, im jabdewōt armej eo em̧ōj an lo jabdewōt ak eo ediktata ian kein em̧ōj an lo an Anij em̧m̧akūtkūt ilo an utiej im kajoor.
48 Ij ba n̄an kom̧, e eo em̧ōj an lo E; mekarta, E eo ar itok n̄an ro An rekar jab meļeļe.
49 Meram eo ej romaak ilo marok, im marok ejjab meļeļe e; mekarta, raan eo enaaj itok n̄e kom̧ naaj meļeļe em̧ool Anij, kōnke kom̧ naaj kōmour ilo E im jān E.
50 Innām kom̧ naaj jeļā bwe em̧ōj ami lo Eō, bwe N̄aij mour, im bwe N̄aij meram eo em̧ool ej pād ilo kom̧, im bwe kom̧ij pād ilo N̄a; eļan̄n̄e jaab kom̧ ban maron̄ tōprak.
51 Lo, Inaaj keidi aelōn̄ in kiin̄ kein n̄an juon em̧m̧aan ewōr juon an meļaaj, im eaar jilkinļo̧k ro rikarejeran ilo meļaaj eo n̄an jukur ilo meļaaj eo.
52 Im eaar ba n̄an eo m̧oktata: Kwōn ilo̧k im jerbal ilo jikin kallib eo, im ilo awa eo kein kajuon Inaaj itok n̄an ippam̧, im kwōnaaj lo m̧ōņōņō eo an baaktok eo Aō.
53 Im eaar ba n̄an eo kein karuo: Kwōn ilo̧k barāinwōt ilo jikin kallib eo, im ilo awa eo kein karuo Inaaj lowaj eok kōn m̧ōņōņō in baaktok eo Aō.
54 Im barāinwōt n̄an eo kein kajilu, im ba: Inaaj lowaj eok;
55 Im n̄an eo kein kāāmen, im āindein ļo̧k n̄an eo kein kajon̄oulruo.
56 Im irooj eo an jikin kallib eo eaar etal n̄an eo m̧oktata ilo awa eo kein kajuon, im pād ippān aolep awa eo, im eaar m̧ōņōņō kōn meram in baaktok eo an irooj eo an.
57 Innām eaar etal jān eo m̧oktata bwe en maron̄ loļo̧k eo kein karuo barāinwōt, im eo kein kajilu, im eo kein kāāmen, im āindein n̄an eo kein kajon̄oulruo.
58 Im āindein raar aolep bōk meram in baaktok eo an irooj eo aer, kajjojo armej ilo awa eo an, im ilo iien eo an, im ilo tōre eo an—
59 Jinoe ippān eo m̧oktata, im āindein n̄an eo āliktata, im jān eo āliktata n̄an eo m̧oktata, im jān eo m̧oktata n̄an eo āliktata;
60 Kajjojo armej ilo ekkar eo an, m̧ae awa eo an ekar dedeļo̧k, em̧ool ekkar n̄an āinwōt irooj eo an eaar jiron̄ e, bwe irooj eo an en maron̄ aiboojoj ilo e, im e ilo irooj eo an, bwe ren aolep maron̄ in aiboojoj.
61 Kōn menin, n̄an būrabōļ in Inaaj keidi aolep aelōn̄ in kiin̄ kein, im ro rej pād ie—kajjojo aelōn̄ in kiin̄ ilo awa eo an, im ilo iien eo an, im ilo tōre eo an, em̧ool ekkar n̄an kean̄ eo me Anij eaar kōm̧m̧ane.
62 Im bar juon alen, em̧ool Ij ba n̄an kom̧, ro jera, Ij likūt ennaan kein ippemi n̄an koļmānļo̧kijeņ kaki ilo būruōmi, ippān kien in Ij lewōj n̄an kom̧, bwe kom̧ naaj kūr Ioō ke N̄aij epaak—
63 Kom̧in kepaaktok Eō im Inaaj kepaakwaj kom̧; niknik kappukot Eō im kom̧ naaj lo Eō; kajjitōk, im kom̧ naaj bōk; kaļļaļļaļ, im enaaj peļļo̧k n̄an kom̧.
64 Jabdewōt kom̧ij kajjitōk ippān Jema ilo Eta enaaj lewōj n̄an kom̧, eo emennin aikuj n̄an kom̧;
65 Im eļan̄n̄e kom̧ij kajjitōk jabdewōt ej jab mennin aikuj n̄an kom̧, enaaj oktak n̄an ami liaakeļo̧k.
66 Lo, men eo kom̧ij ron̄ ej āinwōt ainikien juon ej lam̧ōj ilo āne jem̧aden—ilo āne jem̧aden, kōnke kom̧ij jab maron̄ lo e—Ainikiō, kōnke Ainikiō ej Jetōb; Aō Jetōb ej m̧ool; m̧ool ej pād im ejjeļo̧k jem̧ļo̧kin; im eļan̄n̄e e ej pād ilo kom̧ enaaj lōn̄ļo̧k.
67 Im eļan̄n̄e mājāmi rej reim̧aanļo̧k wōt n̄an aiboojoj eo Aō, aolepān ānbwinnōmi renaaj obrak kōn meram, im enaaj ejjeļo̧k marok ilo kom̧; im ānbwin eo eobrak kōn meram emeļeļe aolep men otemjeļo̧k.
68 Kōn menin, kom̧in kokwōjarjar kom̧ bwe ļōmņak ko ami ren reilo̧k n̄an wōt Anij, im raan ko renaaj itok n̄e kom̧ naaj lo E; bwe Enaaj joļo̧k jān pinjān Mejān n̄an kom̧, im enaaj ilo iien eo An make, im ilo wāween eo An make, im ekkar n̄an Ankilaan make.
69 Keememej kallim̧ur eo eļap im āliktata me em̧ōj Aō kōm̧m̧ane n̄an kom̧; juļo̧k ļōmņak waan ko ami im leea eļļaaj ko ami ettoļo̧k jān kom̧.
70 Kom̧in pād, kom̧in pād ilo jikin in, im kūr juon kwelo̧k ekwōjarjar, em̧ool an ro rej rijerbal ko m̧oktata ilo aelōn̄ in kiin̄ in āliktata.
71 Im ro kar kakkōl er ilo ito-itak ko aer ren kūr ioon Irooj, im koļmānļo̧kijeņ kōn kakkōl eo ilo burueer me rekar bōk e, ium̧win juon tōre ekadu.
72 Lo, im lo, Inaaj oņaake bwijin in sip ko ami, im naaj kajutak elder ro im jilkinļo̧k n̄an er.
73 Lo, Inaaj kōm̧ōkaj jerbal eo Aō ilo iien eo an.
74 Im Ij lewōj n̄an kom̧, ro rej rijerbal ro m̧oktata ilo aelōn̄ in kiin̄ in āliktata, juon kien bwe kom̧in kuktok kom̧ make ippān doon, im karōk kom̧ make, im kōpooj kom̧ make, im kokwōjarjar kom̧ make; aaet, karreoik būruōmi, im kwaļ pā ko peimi im neemi Im̧aō, bwe In maron̄ karreoik kom̧;
75 Bwe In maron̄ kam̧ool n̄an Jemāmi, im ami Anij, im Aō Anij, bwe kom̧ij erreo jān bōtōktōkin epepen in enana; bwe In maron̄ kakūrm̧ool kallim̧ur in, kallim̧ur in eļap im āliktata, eo me Iaar kōm̧m̧ane n̄an kom̧, n̄e ej Ankilaō.
76 Barāinwōt, Ij lewōj n̄an kom̧ juon kien bwe kom̧in wōnm̧aanļo̧k ilo jar im jitlo̧k jān iien in m̧aanļo̧k.
77 Im Ij lewōj n̄an kom̧ juon kien bwe kom̧in katakin doon pedped in katak ko an aelōn̄ in kiin̄ eo.
78 Kom̧in niknik katakin im Aō jouj enaaj pād ippemi, bwe kom̧in maron̄ bōk naan in tōl ilo eļapļo̧k weeppān ilo ļamļam, ilo pedped, ilo katak, ilo kien gospel eo, ilo aolep men ko rej ekkejeltok n̄an aelōn̄ in Anij, im rej mennin aikuj n̄an meļeļe;
79 Kōn men ko jim̧or ilo lan̄ im ilo laļ, im ium̧win laļ; men ko me rekar pād, men ko repād kiiō, men ko me ejjab etto an jejjet kūtier; men ko ilo laļ eo ami, men ko ilo laļ ko jet; tariņae ko im lim̧aajņoņo ko an laļ ko, im ekajet ko rej ioon āniin; im juon jeļāļo̧kjeņ eo barāinwōt kōn laļ ko im aelōn̄ in kiin̄ ko—
80 Bwe kom̧in maron̄ pojak ilo aolep men otemjeļo̧k n̄e Inaaj bar jilkinļo̧k kom̧ n̄an kōļapļo̧k kūr eo me Iaar kūr kom̧ n̄an e, im mijen eo me Iaar jitōn̄e n̄an kom̧.
81 Lo, Iaar jilkinļo̧k kom̧ n̄an kam̧ool im kakkōl armej raņ, im ej an kajjojo armej eo kar kakkōl e n̄an kakkōl eo riturun.
82 Kōn menin, epād n̄an er ejjeļo̧k jekpen, im jero̧wiwi ko aer repād ioon bōraer make.
83 E eo ej kappukot Eō m̧ōkaj enaaj lo Eō, im naaj ban eļļo̧k jān e.
84 Kōn menin, kom̧in pād, im jerbal ilo niknik, bwe kom̧in maron̄ weeppān ilo jerbal eo ami n̄an ilo̧k ilubwiljin ro riAelōn̄ ko n̄an iien in āliktata, jon̄an wōt lōn̄in ro lo̧n̄iin Irooj enaaj kūr, n̄an lukwōj kien eo im sili naan in kam̧ool eo, im n̄an kōpooj ro rekwōjarjar n̄an awa in ekajet eo me ej itok wōt;
85 Bwe jetōb ko aer ren maron̄ jo̧o̧r jān libabne an Anij, lo̧urō in mennin kajjōjō eo ej kōttar ro renana, jim̧or ilo laļ in im ilo laļ eo ej itok. Em̧ool, Ij ba n̄an kom̧, ro rej jab elder ro m̧oktata ren wōnm̧aanļo̧k wōt ilo jikin kallib grep in m̧ae lo̧n̄iin Irooj enaaj kūr er, bwe iien eo aer ej jan̄in itok; men ko ballier rej jab erreo jān bōtōktōkin epepen in.
86 Kom̧in pād wōt ilo anemkwōj eo me kar kaanemkwōj kom̧ kake; kom̧in jab kōdapitōk kom̧ ilo jero̧wiwi, ak pā ko peimi ren erreo, m̧ae iien Irooj ej itok.
87 Bwe ej jab lōn̄ raan ko jān kiiō im laļ enaaj wūdiddid im em̧m̧alm̧al ļo̧k im tok āinwōt juon em̧m̧aan ekadek; im al enaaj ņooj mejān, im enaaj m̧akoko in letok meram; im allōn̄ enaaj tutu ilo bōtōktōk; im iju ko renaaj illu otem illu, im naaj jolaļļo̧k er make āinwōt juon leen fig eo ewōtlo̧k jān wōjke fig eo.
88 Im ālikin naan in kam̧ool eo ami ej itok illu im libabne ioon armej raņ.
89 Bwe ālikin naan in kam̧ool eo ami ej itok naan in kam̧ool in m̧akūtkūt ko an laļ, ko renaaj kōm̧m̧an n̄irļo̧k ilujeen laļ, im armej raņ renaaj wōtlo̧k ioon bwidej im naaj ban maron̄ in jutak.
90 Im barāinwōt ej itok naan in kam̧ool in ainikien jourur ko, im ainikien jarom ko, im ainikien kior ko, im ainikien ņo ko in lo̧meto rej ibebļo̧k make jān jon̄an ko aer em̧ōj kajejjeti.
91 Im aolep men otemjeļo̧k renaaj poktak; im em̧ool, būruōn armej renaaj likjab jān er; bwe mijak enaaj itok ioon aolep armej.
92 Im enjeļ raņ renaaj ekkāke ilujeen lan̄, im lam̧ōj kōn juon ainikien eļļaaj, im kōjan̄ jilel eo an Anij, im ba: Kom̧in pojak, kom̧in pojak, O ro rej pād ilaļ; bwe ekajet an ad Anij ej itok. Lo, im lo, Ļeo Pālele ej itok; kom̧in diwōjļo̧k n̄an iioon E.
93 Im ilo jidimkij enaaj wōr juon kakōļļe eļap ilo lan̄, im aolep armej renaaj lo e ippān doon.
94 Im bar juon enjeļ enaaj kōjan̄ jilel eo an, im ba: Kabun̄ en eļap, eo jinen mennin kajjōjō ko, eo eaar kōm̧m̧an aolep laļ ko n̄an idaak jān wain in illu in ejej eo an, eo ej ko̧kkure ro rekwōjarjar an Anij, eo ar kōto̧o̧rļo̧k bōtōktōkier—lio ej jijet ioon elōn̄ dān ko, im ioon āne ko ilo̧meto—lo, liin ej tāō ko an laļ in; liin ej lokjak ilo tūrtūr ko; to ko an em̧ōj kōm̧m̧ani bwe ren kajoor, ejjeļo̧k armej emaron̄ jeļati; kōn menin, lio epojak n̄an tile. Im e enaaj kōjan̄ jilel eo an jim̧or aetok im eļļaaj, im aolep laļ ko renaaj ron̄jake e.
95 Im enaaj wōr ikōn̄ ilo lan̄ ium̧win tōrean eo jimattan awa; im ilo jidimkij ālikin enaaj erļo̧k katiin̄ in lan̄, āinwōt juon bok lemlem ej erļo̧k ālikin kar limi, im turun mejān Irooj naaj bōk jān penjān;
96 Im ro rekwōjarjar ro repād ioon laļ, ro rej mour, naaj kōmour er im renaaj weaakļo̧n̄ļo̧k n̄an iioon E.
97 Im er ro rekar kiki ilo lōb ko aer renaaj jerkaktok, bwe lōb ko aer naaj kōpeļļo̧ki; im renaaj barāinwōt weaaklōn̄ļo̧k n̄an iioon E ilo ilubwiljin jurōn lan̄—
98 Er rej an Kraist, leen ko m̧oktata, er ro renaaj wanlaļtak Ippān m̧oktata, im er ro rej pād ioon laļ im ilo lōb ko aer, ro rej m̧oktata weaaklōn̄ļo̧k n̄an iioon E; im aolep men in jān ainikien eo kōjan̄ e jān jilel eo an enjeļ an Anij.
99 Im ālikin men in bar juon enjeļ enaaj kōjan̄, eo ej jilel eo kein karuo; innām ej itok lo̧mo̧o̧r eo an ro rej an Kraist ilo itok eo An; ro rekar bōk kōj eo aer ilo kalbuuj eo me em̧ōj kar kōpooje n̄an er, bwe ren maron̄ bōk gospel eo, im ekajet ekkar n̄an armej raņ ilo kanniōk.
100 Im bar juon alen, bar juon jilel enaaj jan̄, eo ej jilel eo kein kajilu; innām ej itok jetōb ko an armej raņ ro rej itōn ekajet, im ej lo er ium̧win liaakeļo̧k;
101 Im errein rej bwein ro remej; im rej jab bar mour m̧ae juon to̧ujin iiō ko rej jem̧ļo̧k, im jab bar juon alen, m̧ae jem̧ļo̧k in laļ in.
102 Im bar juon jilel enaaj jan̄, eo ej jilel eo kein kāāmen, im ba: Ewōr rej lo ilubwiljin ro rej itōn pād wōt m̧ae raan eo eļap im āliktata, em̧ool jem̧ļo̧k eo, ro renaaj pād wōt ilo ettoon.
103 Im bar juon jilel enaaj jan̄, eo ej jilel eo kein kaļalem, eo ej enjeļ eo kein kaļalem eo leļo̧k n̄an e gospel ejjeļo̧k jem̧ļo̧kin—ej ekkāke ilubwiljin lan̄, n̄an aolep laļ ko, bwij ko, lo ko, im armej;
104 Im men in enaaj ainikien jilel eo an, im ba n̄an aolep armej, jim̧or ilo lan̄ im ilo laļ, im ro rej ium̧win laļ—bwe kajjojo lo̧jiln̄i enaaj ron̄jake e, im kajjojo bukwe enaaj bukwelōlō, im kajjojo lo enaaj kwaļo̧k, ke rej ron̄ ainikien jilel eo, im ba: Mijak Anij, im leļo̧k n̄an E aiboojoj eo ej jijet ioon tūroon eo, indeeo im indeeo; bwe awa eo in An ekajet ej itok.
105 Im bar juon alen, bar juon enjeļ enaaj kōjan̄ an jilel, eo ej enjeļ eo kein kajiljino, im ba: Lio e bun̄ eo eaar kōm̧m̧an bwe aolep laļ ko ren idaak jān wain in illu in ejej eo an; lio e bun̄, e bun̄!
106 Im bar juon alen, bar juon enjeļ enaaj kōjan̄ an jilel, eo ej enjeļ eo kein kajiljilimjuon, im ba: E ededeļo̧k; e ededeļo̧k! Lamb an Anij eaar anjo̧ im jujuri jikin jooniak grep ko e make, em̧ool jikin jooniak grep in rōkaammijak in libabne an Anij Ekajoor Bōtata.
107 Innām enjeļ ro naaj kōpālpel er kōn aiboojoj in kajoor eo An, im ro rekwōjarjar renaaj obrak kōn aiboojoj eo An, im bōk aer jolōt im kōm̧m̧an jon̄an wōt juon Ippān.
108 Innām enjeļ eo m̧oktata enaaj bar kōjan̄ jilel eo an ilo lo̧jiln̄in aolep ro remour, im kwaļo̧k jerbal ko rettino an armej raņ, im jerbal ko rekajoor an Anij ilo iiō ko to̧ujin m̧oktata.
109 Innām enjeļ eo kein karuo enaaj kōjan̄ jilel eo an, im kwaļo̧k jerbal ko rettino an armej raņ, im ļōmņak ko im jibadbad ko an burueer, im jerbal ko rekajoor an Anij ilo iiō ko to̧ujin kein karuo—
110 Im āindein m̧aanļo̧k, m̧ae enjeļ eo kein kajiljilimjuon enaaj kōjan̄ jilel eo an; im enaaj jutak ioon āne im ioon lo̧jet, im kanejnej ilo etan E eo ej jijet ioon tūroon eo, bwe eban bar lōn̄ iien; im Setan enaaj lokjak, jedpānit eo etto, eo kūri e devil, im naaj jab kōtļo̧k e ium̧win tōrean in juon to̧ujin iiō ko.
111 Innām naaj kōtļo̧k e ium̧win juon tōre ekadu, bwe en maron̄ ain ippān doon jarin tariņae ko an.
112 Im Maikeel, enjeļ eo kein kajiljilimjuon, em̧ool arkenjeļ eo, enaaj ain ippān doon jarin tariņae ko an, em̧ool inelep ko in lan̄.
113 Im devil enaaj ain ippān doon jarin tariņae ko an; em̧ool inelep ko in hell, im naaj itok n̄an kōpata ņae Maikeel im jarin tariņae ko an.
114 Innām ej itok kōpata eo an Anij eļap eo; im devil im jarin tariņae ko an naaj joļo̧k er ilo ijo jikier, bwe enaaj ban wōr aer kajoor ioon ro rekwōjarjar ļo̧k wōt n̄an jidik.
115 Bwe Maikeel enaaj ire ilo pata ko aer, im naaj anjo̧ ioon eo ej kappukot tūroon eo an Eo ej jijet ioon tūroon eo, em̧ool Lamb eo.
116 En̄in ej aiboojoj an Anij, im ro kokwōjarjar er; im rej jamin naaj bar lo mej.
117 Kōn menin, em̧ool Ij ba n̄an kom̧, ro jera, kūr kwelo̧k ekwōjarjar eo ami, āinwōt Iaar jiron̄ kom̧.
118 Im kōnke aolep ej jab wōr aer tōmak, kom̧in kappukot ilo niknik im katakin doon naan ko in mālōtlōt; aaet, kom̧in kappukot jān bok ko rem̧m̧antata naan ko in mālōtlōt; kappukot jeļā, em̧ool jān katak im barāinwōt jān tōmak.
119 Karōke kom̧ make; kōpooj kajjojo mennin aikuj; im kajutak juon em̧, em̧ool juon im̧ōn jar, juon im̧ōn jitlo̧k, juon im̧ōn tōmak, juon im̧ōn ekkatak, juon im̧ōn aiboojoj, juon im̧ōn koņ, juon im̧ōn Anij;
120 Bwe deļo̧n̄tok ko ami ren maron̄ ilo etan Irooj; bwe diwōjļo̧k ko ami ren maron̄ ilo etan Irooj; bwe aolep iakiakwe ko ami ren maron̄ ilo etan Irooj, kōn pā ko kotaki n̄an eo Eutiej Tata.
121 Kōn menin, kom̧in bōjrak jān aolep ekkōnono waan ko ami, jān ami leea, jān aolep ikdeelel mejkaiie ko ami, jān aolep juwa im kōjak, im jān aolep kōm̧m̧an nana ko ami.
122 Jitōn̄ ilubwiljimi juon rikaki, im aolep ren jab rikōnono ilo juon wōt iien; ak juon en ekkōnono ilo juon iien im aolep ren ron̄jake ennaan ko an, bwe n̄e em̧ōj an aolep kar kōnono aolep ren maron̄ ketak jān aolep, im bwe kajjojo armej en maron̄ wōr an iien utiej in ekkōnono.
123 Lale bwe kom̧in iakwe doon; bōjrak jān ankoņak; jeļā ajej n̄an doon āinwōt gospel eo ej ba.
124 Bōjrak jān jowan; bōjrak jān ettoonon; bōjrak jān lo bōd an doon; bōjrak jān kiki aetokļo̧k jān aikuji; etal n̄an jikin kiki ko ami m̧ōkaj, bwe kom̧in maron̄ jab mōk; jerkak m̧ōkaj, bwe ānbwinnōmi im ļōmņak ko ami ren maron̄ wāmourur.
125 Im ilōn̄in aolep men kein, ņa ballemi kōn korak an iakwe-em̧ool, āinwōt ippān juon liboror, eo ej korak an wānōk im aenōm̧m̧an.
126 Jar iien otemjej, bwe kom̧in maron̄ jab ļotļo̧k, m̧ae Aō itok. Lo, im lo, Inaaj itok m̧ōkaj, im bōk kom̧ n̄an Eō make. Amen.
127 Im bar juon alen, ekkar eo an m̧weo eo kōpooje n̄an presidency eo an jikuuļ eo an rikanaan ro, eo kajutake n̄an aer bōk naan in tōl ilo aolep men otemjeļo̧k remennin aikuj n̄an er, em̧ool n̄an aolep opija ro an kabun̄ in, ak ilo bar jet naan, ro kūr er n̄an jerbal in ilo kabun̄ in, jino jān pris utiej ro, em̧ool laļļo̧k n̄an tikōn ro—
128 Im en̄in enaaj ekkar eo an m̧weo im̧ōn presidency eo an jikuuļ eo: E eo jitōn̄e n̄an president, ak rikaki, naaj lo e jutak ilo ijo jikin, ilo m̧weo me naaj kōpooje n̄an e.
129 Kōn menin, enaaj pād m̧oktata ilo m̧weo im̧ōn Anij, ilo juon jikin ijo jarlepju in rijar eo ilo m̧weo emaron̄ ron̄ naan ko an ilo jim̧we im alikkar, jaab kōn ekkōnono eļļaaj.
130 Im n̄e ej itok ilo m̧weo im̧ōn Anij, bwe en pād m̧oktata ilo m̧weo—lo, en̄in ej mejādik, bwe en maron̄ in juon waanjon̄ok—
131 E en ajeļo̧k e make ilo jar ioon bukwe ko bukien im̧aan Anij, ilo kakōļļeen un̄ūr ak ememeje an bujen eo ejjeļo̧k jem̧ļo̧kin.
132 Im n̄e jabdewōt enaaj itok ālikin e, rikaki eo en jutak, im, kōn pā ko pein kotaki n̄an lan̄, aaet, em̧ool lukkuun jim̧we lōn̄ļo̧k, en iakiakwe eo jein im jatin ak ro jein im jatin kōn naan kein:
133 Kwe juon jeiū im jatū m̧aan ke ak kom̧ ro jeiū im jatū m̧aan ke? Ij iakiakwe eok ilo etan Irooj Jisōs Kraist, ilo kakōļļeen un̄ūr ak ememej eo an bujen eo ejjeļo̧k jem̧ļo̧kin, bujen eo me ilo e ij bōk eok n̄an jemdoon, ilo juon kōttōpar eo im epen, edim, im ejjab ukoktak, n̄an juon jeram̧ im jeiūm̧ im jatūm m̧aan kōn jouj an Anij ilo korak ko an iakiakwe, n̄an etetal ilo aolep kien ko an Anij ilo ejjeļo̧k ruō, ilo kam̧m̧oolol, indeeo im indeeo. Amen.
134 Im e eo lo ej jab tōllo̧ke iakiakwe in ejjāmin wōr jikin ilubwiljimi; bwe kom̧ naaj jab kōtļo̧k bwe m̧weo Im̧ō en ettoonon jān e.
135 Im e eo ej itok im ej tiljek Im̧aō, im ej juon jeiūm̧ im jatūm, ak eļan̄n̄e rej ro jeiūm̧ im jatūm, renaaj iakiakwe president eo ak rikaki eo kōn peier kotaki n̄an lan̄, kōn ejja jar im bujen in wōt, ak jān ba Amen, ilo kakōļļeen un̄ūr eo an ejja men in wōt.
136 Lo, em̧ool, Ij ba n̄an kom̧, en̄in ej juon jon̄ok eo n̄an kom̧ n̄an juon iakiakwe doon ilo m̧weo im̧ōn Anij, ilo jikuuļ eo an rikanaan ro.
137 Im ej kūr kom̧ n̄an kōm̧m̧ane men in jān jar im kam̧m̧oolol, āinwōt Jetōb enaaj lewōj ekkōnono ilo aolep kōm̧m̧an ko ami ilo m̧weo im̧ōn Irooj, ilo jikuuļ eo an rikanaan ro, bwe en maron̄ juon jikin koone, juon im̧ōn kōppād an Jetōb Kwōjarjar n̄an kōketak eo ami.
138 Im kom̧ jamin bōktok jabdewōt ilubwiljimi n̄an jikuuļ in ijello̧kun wōt n̄e e ej erreo jān bōtōktōkin epepen in;
139 Im e naaj bōk e jān kain̄i in kwaļkoļ ne eo, bwe kōn un in kain̄i in kwaļkoļ ne eo kar kajutake.
140 Im bar juon alen, kain̄i in kwaļkoļ ne eo ej eaikuj kōm̧m̧an jān president eo, ak elder eo ej ritōl an kabun̄ in.
141 E ej aikuj ijjino kōn jar; im ālikin bōke pilawā im wain eo, e en kan̄ōrn̄ōre e make ekkar n̄an jon̄ok eo leļo̧k ilo jon̄ouljilu jebta in naan in kam̧ool eo an Jon kake Eō. Amen.