1 Ronjake, O kom̧ lan̄ ko, im letok lo̧jiln̄ūm̧, O laļ, im m̧ōņōņō kom̧ ro rej pād ie, bwe Irooj ej Anij, im ijello̧kun E ebar ejjeļo̧k Rilo̧mo̧o̧r.

2 Eļap ej An mālōtlōt, im kabwilōn̄lōn̄ rej iaļ ko An, im jetn̄akin kōm̧m̧an ko An ejjeļo̧k emaron̄ loi.

3 Jibadbad ko An rej jab likjab, barāinwōt ejjeļo̧k emaron̄ dāpij Pein.

4 Jān indeeo n̄an indeeo E ej āinwōt juon, im iiō ko An rej jab likjab.

5 Bwe āindein Irooj ej ba—N̄a, Irooj, Ij tūriam̧o im jouj n̄an ro rej mijak Eō, im itok-limo n̄an kautiej ro rej jerbal n̄an Eō ilo jim̧we im ilo m̧ool n̄an jem̧ļo̧kin.

6 Eļap naaj men eo wōņāer im indeeo naaj aer aiboojoj.

7 Im n̄an er Inaaj kwaļo̧k aolep mennin ittino ko, aaet, aolep mennin ittino ko reņojak an aelōn̄ eo Aō jān raan ko etto, im n̄an iiō ko rej itok, Inaaj kōjjeļāik er jān Aō kōņaan im Ankilaō kōn aolep men ko rej ekkejelļo̧k n̄an aelōn̄ eo Aō.

8 Aaet, em̧ool kabwilōn̄lōn̄ ko an indeeo renaaj jeļā, im men ko rej itok Inaaj kwaļo̧ki n̄an er, em̧ool men ko in elōn̄ epepen ko.

9 Im aer mālōtlōt enaaj ļap, im aer meļeļe enaaj tōpar ļo̧k lan̄; im im̧aer mālōtlōt an rimālōtlōt enaaj jako, im meļeļe an rijeļā enaaj itok n̄an kajejtokjān.

10 Bwe jān Jetōb eo Aō Inaaj kōmeramļo̧k er, im jān kajoor eo Aō Inaaj kōjjeļāik er ittino ko an Ankilaō—aaet, em̧ool men ko me māj ejjan̄in kar loi, ak jab kar ron̄, ak jan̄in kar deļo̧n̄ ilo būruōn armej.

11 Kōm, Josep Smith, Jun., im Sidney Rigdon, ke kōm ar pād ilo Jetōb ilo jon̄ouljiljino raan in Pāpode, ilo iiō eo an Irooj juon to̧ujin ruwalitōkbukwi im jiln̄uulruo—

12 Jān kajoor eo an Jetōb mājām raar peļļo̧k im meļeļe ko am rekar meramļo̧k, bwe āinwōt kōmin maron̄ lo im meļeļe men ko an Anij—

13 Em̧ool men ko me rekar jān jinoin m̧okta jān kar laļ, ko rekar kajutak in Jemān, kōn Nejin Eaar Keotake, eo eaar pād ilo ubōn Jemān, em̧ool jān jinoin.

14 Eo kake kōmij kam̧ool kake; im kam̧ool eo me kōmij kōm̧m̧ane ej tarlep in gospel eo an Jisōs Kraist, eo ej Nejin, eo kōm ar loe im eo Ippān kōm ar kōm̧m̧ao ilo visōn jān lan̄.

15 Bwe ke kōm ar kōm̧m̧ane jerbal in ukok eo, eo me Irooj ar jitōn̄e jān kōm, kōm ar itok n̄an kein karon̄oul ruwatimjuon eoon in ļalem jebta in Jon, eo me kar letok n̄an kōmro āinwōt in—

16 Eo ej ekkōnono kōn jerkakpeje an ro remej, kōn ro renaaj ron̄ ainikien eo Nejin Armej:

17 Im naaj waļo̧ktok; er ro rekar kōm̧m̧an em̧m̧an, ilo jerkakpeje eo an ro rem̧m̧an; im er ro rekar kōm̧m̧an nana, ilo jerkakpeje eo an ro renana.

18 Kiiō men in eaar kōm̧m̧an bwe kōmin koļmānļo̧kijeņ, bwe kar letok e n̄an kōm jān Jetōb eo.

19 Im ke kōm ar koļmānļo̧kijeņ kaki men kein, Irooj eaar un̄ūr mejān meļeļe ko am im rekar peļļo̧k, im aiboojoj eo an Irooj eaar romaak ipeļaakin ijo.

20 Im kōm ar lo wōj eo an Nejin, ituanbwijmaron̄ in pein Jemān, im bōk jān likiio eo An;

21 Im kar lo enjeļ ro rekwōjarjar, im er ro kar kokwōjarjar er im̧aan tūroon eo An, rej kabun̄-jar n̄an Anij, im Lamb eo, ro rej kabun̄-jar n̄an E indeeo im indeeo.

22 Im kiiō, ālikin elōn̄ naan in kam̧ool ko me kar letok kōn E, en̄in ej naan im kam̧ool eo, āliktata in aolep, eo me kōmij lewōj kōn E: Bwe E emour!

23 Bwe kōm ar lo E, em̧ool ituanbwijmaron̄ in Anij; im kōm ar ron̄ ainikien eo ej kam̧ool bwe E ej eo Nejin Emake Keotak in Jemān—

24 Bwe jān E, im kōn E, im ilo E, laļ ko rej im rekar ejaak, im ro rej pād ie rej m̧aan im kōrā ro nejin keotak n̄an Anij.

25 Im men in kōm ar loe barāinwōt, im jeje ļo̧o̧k in kam̧ool, bwe enjeļ eo an Anij eo eaar ilo kōmaron̄e ilo im̧aan mejān Anij, eo eaar jum̧ae eo Nejin Keotake eo im Jemān eaar iakwe im eo eaar pād ilo ubōn Jemān, kar jolaļļo̧k jān im̧aan mejān Anij im Nejin.

26 Im kar ņa etan Marok, bwe lan̄ ko rekar jan̄ kake e—e ar Lucifer, eo nejin jibbon̄.

27 Im kōm ar lo, im lo, e ebun̄lo̧k! ebun̄lo̧k, em̧ool eo nejin jibbon̄!

28 Im ke kōm ar pād wōt ilo Jetōb eo, Irooj eaar jiron̄ kōm bwe kōmin jeje visōn eo; bwe kōm ar lo Setan, jedpānit eo etto, em̧ool devil eo, eo ar jum̧ae Anij, im kappukot n̄an bōk aelōn̄ eo an ad Anij im An Kraist—

29 Kōn menin, ej kōm̧m̧an tariņae ippān ro rekwōjarjar an Anij, im jepooļe peļaakier.

30 Im kōm ar lo juon visōn in en̄taan ko an ro im eaar kōm̧m̧an tariņae im anjo̧ ioer, bwe āindein eaar itok ainikien Irooj n̄an kōm:

31 Āindein Irooj ej ba kōn aolep ro im rejeļā kajoor eo Aō, im kar kōm̧m̧an bwe er ren ribōk jān e, im kar kōtļo̧k er make kōn kajoor eo an devil n̄an anjo̧ ioer, im n̄an kaarmejjete m̧ool eo im jum̧ae kajoor eo Aō—

32 Er rej er ro rej m̧aan ro nejin marok, kōn er Iaar ba bwe en kar em̧m̧anļo̧k n̄an er eļan̄n̄e rekar jab ļotak;

33 Bwe er rej jāpe ko an libabne, ro jem̧ļo̧k eo aer ej n̄an en̄taan libabne an Anij, ippān devil im enjeļ ro an ilo indeeo;

34 Kake er Iaar ba bwe ejjeļo̧k jeorļo̧k bōd ilo laļ in ak ilo laļ eo ej itok—

35 Kōnke rekar kaarmejjete Jetōb Kwōjarjar eo ālikin aer kar bōk e, im kōnke rekar kaarmejjete Nejin Emake Keotak in Jemān, kōnke rekar debwāāl e n̄an er make im likūt E n̄an kajjookok etoojlo̧k.

36 Er rein ro renaaj ilo̧k ilo lo̧jet in kijeek im brimstone, ippān devil im enjeļ ro an—

37 Im ro wōt im ioer mej eo kein karuo enaaj wōr an kajoor ioer;

38 Aaet, em̧ool, ro wōt im naaj ban lo̧mo̧o̧ren er ilo iien eo an Irooj make, ālikin en̄taan ko jān libabne eo An.

39 Bwe aolep ro jet naaj bōkm̧aantak er jān jerkakpeje eo an ro remej, kōn anjo̧ im aiboojoj eo an Lamb eo, eo kar m̧ane, eo eaar pād ilo ubōn Jemān m̧okta jān kar kōm̧anm̧ani laļ ko.

40 Im en̄in ej gospel eo, im naan ko rem̧m̧an, ko ainikien eo jān lan̄ eaar kam̧ooli n̄an kōm—

41 Bwe E eaar itok ilo laļ in, em̧ool Jisōs, n̄an kar debwāāl n̄an laļ in, im n̄an ineeki jero̧wiwi ko an laļ in, im n̄an kokwōjarjare laļ in, im n̄an karreoik e jān aolep jab weeppān;

42 Bwe kōn E aolep ren maron̄ mour ro Jemān eaar likūt ilo kajoor eo An im kar kōm̧anm̧an jān E;

43 Ro rej kaiboojoj Jemān, im kōjparok aolep jerbal ko an Pein, ijello̧kun m̧aan ro nejin mej im rej kaarmejjete Nejin ālikin an Jemān kar kwaļo̧k E.

44 Kōn menin, ej lo̧mo̧o̧ren aolep ijello̧kun wōt er—renaaj etal ilo kaje n̄an indeeo, eo kaje ejjeļo̧k jem̧ļo̧kin, eo ej kaje indeeo im indeeo, n̄an pād ippān devil im enjeļ ro an ilo indeeo, ijo aer likaakrak reban mej, im kijeek eo ej jab kun, eo ej aer en̄taan—

45 Im jem̧ļo̧k eo an, im jab ijo jikin, ak jab aer en̄taan, ejjeļo̧k armej ejeļā;

46 Im e kar jab kwaļo̧k, im ej jab, im jamin kwaļo̧k e n̄an armej, ijello̧kun wōt n̄an ro rej bōk m̧ōttan;

47 Mekarta, N̄a, Irooj, Ij kwaļo̧k e jān visōn n̄an elōn̄, ak m̧ōkaj im kiili bar juon alen;

48 Kōn menin, jem̧ļo̧kin, depakpakin, utiejen, im m̧wilaļin, im kabbūrom̧ōjm̧ōjōn, rej jab meļeļe kake, ak ejjeļo̧k armej ijello̧kun wōt ro kapit er n̄an liaakeļo̧k in.

49 Im kōm ar ron̄ ainikien eo, ej ba: Kom̧in je visōn in, bwe lo, en̄in ej jem̧ļo̧k in visōn eo kōn en̄taan ko an ro renana.

50 Im bar juon alen kōmij jeje ļo̧o̧k in kam̧ool—bwe kōm ar lo im ron̄, im en̄in ej kam̧ool eo kōn gospel eo an Kraist kōn er ro renaaj wōnm̧aantak ilo jerkakpeje eo an ro rem̧m̧an—

51 Er rej erro rekar bōk naan in kam̧ool kōn Jisōs, im tōmak ioon Etan im kar peptaij ālikin jekjek in kallib eo an, jān kar kallib ilo dān eo ilo Etan, im men in ekkar n̄an kien eo me em̧ōj An kar letok—

52 Im jān kōjparok kien ko remaron̄ kwaļkoļ im karreo jān aolep jero̧wiwi ko aer, im bōk Jetōb Kwōjarjar jān likūt pā ko ioon jān eo kar kapiti im sili n̄an kajoor in;

53 Im ro rej anjo̧ ioon jān tōmak, im rej sil jān Jetōb Kwōjarjar in kallim̧ur, eo Jemān ej lutōkļo̧k ioon aolep ro rej jim̧we im m̧ool.

54 Er rej er ro im rej kabun̄ eo an M̧aanje eo.

55 Er rej er ro ilo peier Jemān eaar leļo̧k aolep men otemjeļo̧k—

56 Er rej er ro rej pris ro im kiin̄ ro, ro rekar bōk dipiio eo An, im An aiboojoj;

57 Im rej pris ro an Eo Eutiejtata, ilo̧kan ellaajrak eo an Melkizedek, eo eaar ilo̧kan ekkar eo an Inok, eo eaar ilo̧kan ekkar eo an Nejin Eaar Keotake.

58 Kōn menin, āinwōt e kar jeje, er rej anij, em̧ool ro nejin Anij—

59 Kōn menin, aolep men otemjeļo̧k rej aer, men̄e mej ak mour, ak men ko kiiō, ak men ko rej itok, aolep rej aer im er rej an Kraist, im Kraist an Anij.

60 Im er renaaj anjo̧ ioon aolep men otemjeļo̧k.

61 Kōn menin, en ejjeļo̧k armej ej kōmmejāje ilo armej, ak e en kōmmejāje ilo Anij, eo enaaj door aolep rikōjdat ro an ium̧win neen.

62 Rein renaaj jokwe ilo im̧aan mejān Anij im an Kraist indeeo im indeeo.

63 Errein ro im E naaj bōk er Ippān, n̄e E naaj itok ilo kōdo̧ ko ilan̄ n̄an irooj ioon laļ ioon armej ro An.

64 Errein ro enaaj wōr aer ilo jerkakpeje eo m̧oktata.

65 Errein ro renaaj jerkaktok ilo jerkakpeje eo an ro rem̧m̧an.

66 Errein rej ro raar itok n̄an Toļ Zaion, im n̄an jikin kwelo̧k eo an Anij emour, jikin eo ilan̄, eo ekwōjarjar jān aolep.

67 Errein rej ro rekar itok n̄an juon jarin enjeļ raņ reban bwini, jān juon kobatok eļap im kabun̄ eo an Inok, im eo an M̧aanje eo.

68 Errein rej ro etaer rekar jeje ilo lan̄, ijo Anij im Kraist rej riekajet an aolep.

69 Errein rej ro armej rejim̧we kōweeppān er kōn Jisōs rijojomar eo an bujen eo ekāāl, eo kar jerbale jān pinmuur eweeppān in kōn kōto̧o̧rļo̧k in bōtōktōkin make.

70 Errein rej ro im ānbwinnier rej selestial, eo aiboojoj eo an ej āinwōt al, em̧ool aiboojoj eo an Anij, eo eutiejtata jān aolep, eo aiboojoj eo an aļ in lan̄ ekar jeje kake ke āindein.

71 Im bar juon alen, kōm ar lo laļ eo terrestrial, im lo im lo, errein rej ro an terrestrial, ro aiboojoj eo aer eoktak jān eo an kabun̄ eo an M̧aanje eo eo ekar bōk dipiio in Jemān, em̧ool āinwōt an allōn̄ oktak jān al ilo lan̄.

72 Lo, errein rej ro rekar mej ilo ejjeļo̧k kien.

73 Im barāinwōt rej jetōb ko an armej ro dāpij er ilo kalbuuj, ro Nejin eaar loļo̧k er, im kwaļo̧k gospel eo n̄an er, bwe remaron̄ ekajet ekkar n̄an armej ilo kanniōk;

74 Ro rekar jab bōk naan in kam̧ool kōn Jisōs ilo kanniōk, ak tokālik rekar bōk e.

75 Errein rej ro armej rem̧m̧an in laļ, ro rekar pilo jān m̧oņ an armej raņ.

76 Errein rej ro rej bōk aiboojoj eo An, ak jab dipiio.

77 Errein ro rej bōk iiaio eo an eo Nejin, ak jab jān dipiio jān Jemān.

78 Kōn menin, er rej ānbwin ko an terrestrial, im jab ānbwin ko an selestial, im oktak ilo aiboojoj āinwōt allōn̄ eoktak jān al.

79 Errein ro rej jab kajoor ilo naan in kam̧ool kōn Jisōs; kōn menin, rej jab bōk kūrawūn eo ioon aelōn̄ eo an ad Anij.

80 Im kiiō en̄in ej jem̧ļo̧k in visōn eo kōm ar loe kōn terrestrial, eo im Irooj eaar jiron̄ kōm n̄an jeje ke kōm ar pād wōt ilo Jetōb eo.

81 Im bar juon alen, kōm ar lo aiboojoj eo an telestial, aiboojoj eo edikļo̧k, em̧ool āinwōt aiboojoj eo an iju ko eoktak jān aiboojoj eo an allōn̄ ilo lan̄.

82 Errein rej ro rekar jab bōk gospel eo an Kraist, im jab bōk naan in kam̧ool kōn Jisōs.

83 Errein rej ro rekar jab kaarmejjete Jetōb Kwōjarjar.

84 Errein rej ro kar jolaļļo̧k er n̄an hell.

85 Errein rej ro reban lo̧mo̧o̧ren er jān devil m̧ae jerkakpeje eo āliktata, m̧ae Irooj, em̧ool Kraist Lamb eo, enaaj kar kadedeļo̧k jerbal eo An.

86 Errein rej ro rej jab bōk jān dipiio eo An ilo laļ ko ejjeļo̧k jem̧ļo̧kier, ak jān Jetōb Kwōjarjar kōn jipjipan̄ an terrestrial;

87 Im terrestrial kōn jipjipan̄ an selestial.

88 Im barāinwōt telestial ej bōke jān jipan̄ an enjeļ ro kar jitōn̄ er n̄an jipan̄ e er, ak ro kar jitōn̄ er n̄an jetōb ko rej jipan̄ er; bwe renaaj rijolōte lo̧mo̧o̧r.

89 Im āindein kōmar lo, ilo visōn eo jān lan̄, aiboojoj eo an telestial, eo eaar eļļāļo̧k jān aolep jeļā;

90 Im ejjeļo̧k armej ejeļā kake ijello̧kun e eo n̄an e Anij eaar kwaļo̧k e.

91 Im āindein kōm ar lo aiboojoj eo an terrestrial eo eaar ļapļo̧k ilo aolep men jān aiboojoj eo an telestial, em̧ool ilo aiboojoj, im ilo kajoor, im ilo maron̄, im ilo tōln̄an.

92 Im āindein kōm ar lo aiboojoj eo an selestial, eo eļapļo̧k ilo aolep men otemjeļo̧k—ijo Anij, em̧ool Jemān, ej irooj ioon tūroon eo An indeeo im indeeo;

93 Eo im̧aan tūroon eo An aolep men otemjeļo̧k rej bun̄badik ilo ettā im kautiej, im leļo̧k n̄an e aiboojoj indeeo im indeeo.

94 Er ro rej jokwe ilo m̧aan Mejān rej kabun̄ eo an M̧aanje eo; im rej lo āinwōt rekar loe, im jeļā āinwōt rekar jeļā, kōnke rekar bōk jān dipiio eo An im jouj eo An;

95 Im Ej kōm̧m̧an er ren juon wōt ilo kajoor, im ilo maron̄, im ilo tōln̄an.

96 Im aiboojoj eo an selestial ej juon, em̧ool āinwōt aiboojoj eo an aļ ej juon.

97 Im aiboojoj eo an terrestrial ej juon, em̧ool āinwōt aiboojoj eo an allōn̄ ej juon.

98 Im aiboojoj eo an telestial ej juon, em̧ool āinwōt aiboojoj eo an iju ko ej juon; bwe āinwōt juon iju eoktak jān bar juon iju ilo aiboojoj, em̧ool āindein eoktak juon jān bar juon ilo aiboojoj ilo laļ telestial.

99 Bwe errein er ro doon Paul, im doon Apollōs, im doon Sipas.

100 Errein er ro rej ba rej jet doon juon im jet doon bar juon—jet doon Kraist im jet doon Jon, im jet doon Moses, im jet doon Elias, im jet doon Esaias, im jet doon Aiseia, im jet doon Inok;

101 Ak raar jab bōk gospel eo, ak jab naan in kam̧ool eo an Jisōs, im jab rikanaan ro, im jab bujen eo ejjeļo̧k jem̧ļo̧kin.

102 Āliktata in aolep, errein aolep er ro reban kobatok ippān ro rekwōjarjar, n̄an weaakļo̧k n̄an kabun̄ eo an M̧aanje eo, im bōkļo̧k er ilo kōdo̧ eo.

103 Errein er ro rej ririab, im rianijnij, im rilōn̄, im rijuwaļōn̄ļōn̄, im jabdewōt eo ej iakwe im ej kōm̧m̧ane juon riab.

104 Errein er ro rej en̄taan kōn libabne an Anij ioon laļ.

105 Errein er ro im rej en̄taan kōn idenoņe an kijeek ejjeļo̧k jem̧ļo̧kin.

106 Errein er ro kar jolaļļo̧k er n̄an hell im rej en̄taan kōn libabne an Anij Ekajoor Bōtata, m̧ae jejjet in iien ko, n̄e Kraist enaaj kar likūt aolep rikōjdat ro an ium̧win neen, im naaj kar kōweeppān jerbal eo An;

107 N̄e Enaaj leļo̧k aelōn̄ eo, im jakeļo̧k e n̄an Jemān, ejjeļo̧k libbijinjin, im ba: Iaar anjo̧ im kar jujuri kōn jooniak wain eo make, em̧ool jikin jooniak wain eo an bwil in illu an Anij Ekajoor Bōtata.

108 Innām E naaj pālpel kōn kūrawūn in aiboojoj eo An, n̄an jijet ioon tūroon in An kajoor n̄an irooj indeeo im indeeo.

109 Ak lo, im lo, kōmar lo aiboojoj eo im ro rej pād ilo laļ eo telestial, bwe rekar ban bwine er āinwōt iju ko ilo mejatoto in lan̄, ak āinwōt bok ioon parijet;

110 Im kar ron̄ ainikien Irooj ej ba: Rein aolep renaaj bun̄badik ilo bukwier, im lo otemjej naaj kwaļo̧k n̄an E eo ej jijet ioon tūroon eo indeeo im indeeo;

111 Bwe renaaj ekajet ekkar n̄an jerbal ko aer, im aolep armej otemjej enaaj bōk ekkar n̄an jerbal ko an make, tōln̄an eo an make, ilo m̧ōko im̧ōn irooj ko repojak;

112 Im renaaj ro rikarejeran eo Eutiejtata; ak ijo Anij im Kraist rej jokwe reban itok, laļ ko ejjeļo̧k jem̧ļo̧kier.

113 En̄in ej jem̧ļo̧k in visōn eo kōm ar loe, eo kar jiron̄ kōm n̄an jeje ke kōm ar pād wōt ilo Jetōb eo.

114 Ak reļļap im kabwilōn̄lōn̄ jerbal ko an Irooj, im mennin ittino ko an aelōn̄ eo An ko Eaar kwaļo̧ki n̄an kōm, ko rellāļo̧k jān aolep meļeļe ilo aiboojoj, im ilo maron̄, im ilo tōln̄an;

115 Eo Eaar jiron̄ kōm bwe kōmin jab jeje ke kōm ar pād wōt ilo Jetōb eo, im rej jab jim̧we ium̧win kakien n̄an an armej kōnono;

116 Barāinwōt armej ej jab kapeel n̄an unujiļo̧k, bwe rej wōt n̄an lo im meļeļe jān kajoor eo an Jetōb Kwōjarjar, eo Anij ej door ioon ro rej iakwe E, im karreoik er make Im̧aan;

117 N̄an er Ej kōtļo̧k utiej eo n̄an loi im jeļā kaki n̄an er make;

118 Bwe kōn kajoor eo im kaalikkar eo an Jetōb, ke ej ilo kanniōk wōt, ren maron̄ mour ilo Im̧aan Mejān ilo laļ in aiboojoj eo.

119 Im n̄an Anij im Lamb eo ej ilo̧k aiboojoj, im utiej, im tōln̄an indeeo im indeeo. Amen.