1 Juon jerbal eļap im ekabwilōn̄lōn̄ enan̄in waļo̧ktok ilubwiljin ro nejin armej.

2 Lo, N̄a Anij; eo̧ron̄ naan eo Aō, eo em̧ōkaj im kajoor, ekkan̄ļo̧k jān jāje ruo mejān, n̄an ajeje ijeņ im ijeņ jim̧or mo̧kwōj im ņoņņoņmeej; kōn menin eo̧ron̄ naan ko Aō.

3 Lo, meļaaj eo emouj epojak n̄an m̧adm̧ōd; kōn menin, jabdewōt eo ekōņaan m̧adm̧ōd, en bun̄raake sickle eo an kōn an maron̄, im m̧adm̧ōd ilo an raan wōt, bwe en maron̄ ko̧koņe n̄an jetōb eo an mour indeeo ilo aelōn̄ in Anij.

4 Aaet, jabdewōt eo ej bun̄raake sickle eo an im m̧adm̧ōd, ejja in wōt Anij ej kūri.

5 Kōn menin, eļan̄n̄e kom̧ naaj kajjitōk jān N̄a kom̧ naaj bōk; eļan̄n̄e kom̧ naaj kaļļaļļaļ enaaj peļļo̧k n̄an kom̧.

6 Kiiō, kōnke kom̧ro ar kajjitōk, lo, Ij ba n̄an kom̧ro, kōjparok kien ko Aō, im kappukot n̄an kōjerkaktok im kajutak jibadbad eo an Zaion;

7 Jab kappukot m̧weiie ko ak pukot mālōtlōt, im lo, men ko rettino an Anij naaj erļo̧ki n̄an kom̧ iro, innām kom̧iro naaj m̧weiie. Lo, e eo ewōr an mour indeeo em̧weiie.

8 Em̧ool, em̧ool, Ij ba n̄an eok, em̧ool āinwōt am kōņaan jān Eō āindein enaaj n̄an eok; im eļan̄n̄e kwo kōņaan, kwo naaj unjān kōm̧m̧an eļap em̧m̧an ilo epepen in.

9 Ba ejjeļo̧k ijello̧kun wōt ukeļo̧k n̄an epepen in; kōjparok kien ko Aō, im jipan̄ n̄an kōjerkaktok jerbal eo Aō, ekkar n̄an kien ko Aō, im kwo naaj jeraam̧m̧an.

10 Lo ewōr juon am mennin letok, im kwo jeraam̧m̧an kōnke mennin letok in am. Keememej bwe ekwōjarjar im ej itok jān ilan̄—

11 Im eļan̄n̄e kwo naaj kajjitōk, kwo naaj jeļā mennin ittino ko reļļap im kabwilōn̄lōn̄; kōn menin kwo naaj kōjerbale mennin letok eo am, bwe kwōn maron̄ loi mennin ittino ko, bwe kwōn maron̄ bōktok elōn̄ n̄an jeļā kōn m̧ool eo, aaet, karreel er kōn bōd in iaļ ko aer.

12 Jab kōjjeļā jabdewōt kōn mennin letok in am ijello̧kun wōt ro jān tōmak eo am. Jab kōjak kōn men ko rekwōjarjar.

13 Eļan̄n̄e kwo naaj kōm̧m̧an em̧m̧an, aaet, im pād wōt ilo tiljek n̄an jem̧ļo̧kin, enaaj lo̧mo̧o̧ren eok ilo aelōn̄ in Anij, eo eļaptata ian aolep mennin letok ko an Anij; bwe ejjeļo̧k bar mennin letok eļapļo̧k jān mennin letok in lo̧mo̧o̧r.

14 Em̧ool, em̧ool, Ij ba n̄an eok, kwo jeraam̧m̧an kōn ta eo kwaar kōm̧m̧ane; bwe kwaar kajjitōk Ippa, im lo, ekkutkut in wōt am kar kajjitōk kwaar bōk naan in tōl jān Aō Jetōb. Eļan̄n̄e en kar jab āindein, kwo ban kar itok n̄an ijin kwōj pād ie ilo iien in.

15 Lo, kwo jeļā bwe kwaar kajjitōk jān Eō im Iaar kōmeramļo̧k am ļōmņak; im kiiō Ij ba n̄an eok men kein bwe kwōn maron̄ jeļā ke em̧ōj kōmeramļo̧k eok jān Jetōb in m̧ool;

16 Aaet, Ij ba n̄an eok, bwe kwōn maron̄ jeļā bwe ejjeļo̧k bar juon ijello̧kun wōt Anij ejeļā koļmānļo̧kijeņ ko am im kōttōpar ko an būruōm̧.

17 Ij ba n̄an eok men kein āinwōt kam̧ool eo n̄an kwe—bwe naan ko ak jerbal eo me kwōj jei rem̧ool.

18 Kōn menin kwōn tiljek; jutak ilikin rikarejera Josep, ilo niknik, ilo jabdewōt jekjek ko reppen emaron̄ pād ie kōn wōt naan eo.

19 Kōketak e ilo bōd ko an, im barāinwōt bōk kōketak jān e. Kwōn kōmmaanwa; en alikkar am ļōmņak; kwōn jatōr; en wōr am lōjokmen, tōmak, kōjatdikdik, im iakwe-em̧ool.

20 Lo, kwe Oliver, im Iaar kōnono n̄an eok kōnke ikdeelel ko am; kōn menin ko̧koņi naan kein ilo būruōm̧. Kwōn tiljek im niknik ilo kōjparok kien ko an Anij, im I naaj jepooļe eok ilo pein Aō iakwe.

21 Lo, N̄a Jisōs Kraist, eo Nejin Anij. N̄a ejja eo wōt eaar itok n̄an armej ro aō, im armej ro aō raar jab bōk Eō. N̄a meram eo ej romaak ilo marok, im marok ej jab jeļā E.

22 Em̧ool, em̧ool, Ij ba n̄an eok, eļan̄n̄e kwōj kōņaan juon kam̧ool eļapļo̧k, keememej ilo ļōmņak bon̄ōn eo kwaarkūr n̄an Eō ilo būruōm̧, bwe kwōn maron̄ jeļā ikijjien m̧ool in men kein.

23 Iaar jab kwaļo̧k aenōm̧m̧an n̄an am ļōmņak kōn menin ke? Ta kam̧ool eļapļo̧k kwo maron̄ bōke jān jān Anij?

24 Im kiiō, lo, em̧ōj am bōk juon kam̧ool; bwe eļan̄n̄e Iaar ba n̄an eok men ko ejjeļo̧k armej ejeļā kwo kar jab bōk juon kam̧ool ke?

25 Im, lo, Ij lewōj n̄an eok juon mennin lewōj, eļan̄n̄e kwo kōņaan jān Eō, n̄an ukok, em̧ool āinwōt rikarejera Josep.

26 Em̧ool, em̧ool, Ij ba n̄an eok, bwe ewōr ļo̧o̧k ko eļap gospel eo Aō epād ie eo kar dāpiji kōnke nana eo an armej raņ;

27 Im kiiō Ij jiron̄ eok, bwe eļan̄n̄e ewōr ippam̧ ikdeelel ko rem̧m̧an—juon ikdeelel n̄an likūt mennin aorōk ko n̄an kwe make ilo lan̄—innām kwo naaj jipan̄ ilo bōktok n̄an meram, kōn mennin lewōj in am, m̧ōttan ko an jeje ko rekwōjarjar Aō me rekar ņojak kōnke nana.

28 Im kiiō, lo, Ij lewōj n̄an eok, im barāinwōt n̄an karejera Josep, ki ko an mennin lewōj in, ko renaaj kan̄ōltok meram n̄an jerbal in; im ilo lo̧n̄iin ruo ak jilu rikam̧ool naan otemjeļo̧k naaj jutak.

29 Em̧ool, em̧ool, Ij ba n̄an kom̧iro, eļan̄n̄e rej juļo̧k naan ko Aō, im m̧ōttan in an gospel im jerbal eo Aō, kom̧iro en m̧ōņōņō, bwe rej jab maron̄ kōm̧m̧an eļapļo̧k n̄an kom̧iro jān n̄an N̄a.

30 Im em̧ool eļan̄n̄e rej kōm̧m̧an n̄an kom̧iro em̧ool āinwōt rekar kōm̧m̧an n̄an Eō, kom̧iro en m̧ōņōņō, bwe kom̧iro naaj jokwe Ippa ilo wōj.

31 Ak eļan̄n̄e rej jab juļo̧k naan ko Aō, ko renaaj jutak jān naan in kam̧ool eo naaj leļo̧k e, ren m̧ōņōņō, innām enaaj wōr aer lan̄lōn̄ ilo leen jerbal ko amiro.

32 Em̧ool, em̧ool, Ij ba n̄an kom̧iro, āinwōt Iaar ba n̄an ro rikaļoora, ijo ruo ak jilu rej koba ippān doon ilo Eta, āinwōt kōn jabdewōt men, lo, Inaaj barāinwōt pād ilubwiljier—em̧ool āinwōt Ij pād ilubwiljimiro.

33 Jab mijak n̄an kōm̧m̧an em̧m̧an, m̧aan raņ nejū, bwe jabdewōt kom̧ naaj jeore, men in kom̧ naaj barāinwōt m̧adm̧ōd; kōn menin, eļan̄n̄e kom̧ naaj jeor em̧m̧an kom̧ naaj barāinwōt m̧adm̧ōd em̧m̧an n̄an woņeam̧i.

34 Kōn menin, jab mijak, bwij jidikdik in sip; kōm̧m̧an em̧m̧an; laļ im hell ren koba ņae kom̧, bwe eļan̄n̄e kom̧ij ekkal ioon Aō ejm̧aan, rej jamin anjo̧.

35 Lo, Ij jab liaakeļo̧k kom̧; etal ilo iaļ ko amiro im jab bar jero̧wiwi; jerbal ilo alikkar in ļōmņak, jerbal eo Iaar jiron̄ kom̧iro.

36 Reitok n̄an Eō ilo ļōmņak otemjeļo̧k; jab pere, jab mijak.

37 Lali kinej kein rekar wākari ikatū, im barāinwōt jenkwan dila kā ilo Peiū im Neō; kom̧in tiljek, kōjparok kien ko Aō, im kom̧ naaj jolōte aelōn̄ in lan̄. Amen.