ဩဝါဒနှင့် ပဋိညာဉ်များ ၁၂၄

အပိုဒ်ငယ် ၁၂၄

၁၈၄၁ ခုနှစ်၊ ဇန္နဝါရီ ၁၉ ရက်၊ နော်ဗူး၊ အီလီနွိုက်၌ ပရောဖက်ဂျိုးဇက်စမစ်သို့ ပေးတော်မူခဲ့သည့် ဗျာဒိတ်တော်။ သန့်ရှင်းသူတို့သည် တိုးပွားလာသော ညှဉ်းဆဲခြင်းများနှင့် သူတို့တစ်ဖက်၌ အစိုးရအရာရှိတို့၏ ဥပဒေနှင့်ဆန့်ကျင်သော နည်းလမ်းများကြောင့် မစ်ဆိုရီကို စွန့်ခွာရန် အနိုင်အထက် စီရင်ခံရ၏။ ၁၈၃၈ခုနှစ်၊ အောက်တိုဘာလ၊ ၂၇ ရက် နေ့စွဲဖြင့်၊ မစ်ဆိုရီ၏ အုပ်ချုပ်သူ လီဗာန်ဒဗယျူဘော့ ထုတ်ပြန်ခဲ့သည့် အမြစ်ပြတ်သုတ်သင် အမိန့်သည် သူတို့အား အခြားအခွင့်အရေးကို မပေးခဲ့။ ၁၈၄၁ ခုနှစ်၌၊ ဤဗျာဒိတ်တော်ကို ပေးသောအခါ၊ အီလီနွိုက်တွင် ယခင်ကော်မာရွာတည်ရှိရာ နော်ဗူးမြို့ကို သန့်ရှင်းသူတို့ တည်ဆောက်ခဲ့လေ၏၊ ဤနေရာ၌ အသင်းတော်ရုံးချုပ်ကို တည်ထောင်ခဲ့၏။

၁–၁၄၊ ဂျိုးဇက်စမစ်သည် အမေရိကန်ပြည်ထောင်စုဥက္ကဋ္ဌ၊ အုပ်ချုပ်သူများ၊ ခပ်သိမ်းသော ပြည်သားတို့၏ အုပ်စိုးသူများသို့ ဧဝံဂေလိတရားတော်အကြောင်း လေးနက်သော ကြေညာခြင်းကို ပြုရန် မိန့်မှာခံရ၏။ ၁၅–၂၁၊ ဟီရမ်စမစ်၊ ဒေးဗစ်ဒဗယျူပေတန်၊ ဂျိုးဇက်စမစ်အကြီးနှင့် အခြားသော အသက်ရှင်သူ၊ သေသူတို့သည် သူတို့၏ရိုးဖြောင့်ခြင်းနှင့် ကိုယ်ကျင့်သီလကြောင့် ကောင်းချီးခံစားရကြ၏။ ၂၂–၂၈၊ သန့်ရှင်းသူတို့သည် နော်ဗူး၌ ဗိမာန်တော်တစ်ခုနှင့် သူတစိမ်းတို့ကို ဧည့်ခံခြင်းအတွက် အိမ်တစ်အိမ် နှစ်မျိုးစလုံးကို တည်ဆောက်ရန် မိန့်မှာခံရ၏။ ၂၉–၃၆၊ သေသူတို့အတွက်ဗတ္တိဇံကို ဗိမာန်တော်များထဲ၌ ဆောင်ရွက်ရမည်။ ၃၇–၄၄၊ ကိုယ်တော်ရှင်၏ လူမျိုးတို့သည် သန့်ရှင်းသောဘိသိက်မင်္ဂလာများ ဆောင်ရွက်ခြင်းအတွက် ဗိမာန်တော်များကို အစဉ်အမြဲ တည်ဆောက်ကြ၏။ ၄၅–၅၅၊ သန့်ရှင်းသူတို့သည် သူတို့ရန်သူများ၏ ညှဉ်းပန်းနှိပ်စက်ခြင်းများကြောင့်၊ ဂျက်ဆင်ခရိုင်၌ ဗိမာန်တော်တည်ဆောက်ခြင်းမှ ကင်းလွတ်ခွင့်ရကြ၏။ ၅၆–၈၃၊ နော်ဗူးအိမ်တည်ဆောက်ခြင်းအတွက် လမ်းညွှန်ချက်များကို ပေးထား၏။ ၈၄–၉၆၊ ဟီရမ်စမစ်သည် အော်လီဗာကောင်ဒရီ၏ သော့များကို လက်ခံရန်နှင့် သူ၏ နေရာ၌ ရပ်တည်ရန် မျိုးနွယ်စုအဘကောင်းချီးပေးသူအဖြစ် ခေါ်သွင်းခံရ၏။ ၉၇–၁၂၂၊ ဝီလျံလောနှင့် အခြားသူများသည် သူတို့၏အလုပ်များ၌ သွန်သင်ခံကြရ၏။ ၁၂၃–၁၄၅၊ အထွေထွေနှင့် ဒေသခံအရာရှိများကို သူတို့၏တာဝန်များနှင့်၊ တွဲဘက်အဖွဲ့များနှင့်တကွ အမည်ခေါ်၏။

၁ သင့်ကို ကိုယ်တော်ရှင် အမှန်မိန့်တော်မူသည်ကား၊ ငါ့ကျွန်ဂျိုးဇက်စမစ်၊ ငါသည် သင်ပြုလေသည့် သင်၏ ပူဇော်သက္ကာနှင့် အသိအမှတ်ပြုခြင်းတို့အတွက် အလွန်နှစ်သက်တော်မူ၏။ အကြောင်းမူကား၊ ဤရည်ရွယ်ချက်အတွက် ငါသည် သင့်ကို ပေါ်ထွန်းစေတော်မူလေပြီ၊ မြေကြီးနှင့်ဆိုင်သော အားနည်းသည့်အရာတို့အားဖြင့် ငါ၏ဉာဏ်ပညာကို ထုတ်ပြနိုင်ခြင်းငှာပေတည်း။

၂ သင်၏ ဆုတောင်းခြင်းတို့သည် ငါ့ရှေ့၌ နှစ်သက်ဖွယ်ဖြစ်၏။ ၎င်းတို့အတွက် အဖြေအဖြစ် သင့်ကို ငါဆိုသည်ကား၊ သင်သည် ငါ၏ ဧဝံဂေလိတရားတော် အကြောင်း၊ ထို့အတူ သန့်စင်စေခြင်းဖြင့် နန်းတော်ပုံသဏ္ဌာန်အတိုင်း တောက်ပြောင်စေမည့် ဇိအုန်၏ ထောင့်ကျောက်အဖြစ် ငါချလေသည့် ဤပန္နက်အကြောင်း လေးနက်သော ကြေညာခြင်းကို ပြုရန် ယခုတွင် ချက်ချင်း ခေါ်သွင်းခံရ၏၊

၃ ဤကြေညာခြင်းကို လောက၏ခပ်သိမ်းသော မင်းများသို့၊ ၎င်း၏ အရပ်လေးမျက်နှာသို့၊ ရွေးကောက်ထားသည့် ဂုဏ်သရေရှိဥက္ကဋ္ဌများသို့၊ ထို့အတူ သင်နေထိုင်ရာပြည်၏ မြင့်မြတ်သော အုပ်ချုပ်သူများသို့၊ ထို့အတူ အရပ်ရပ်သို့ ကွဲပြားပြန့်ကျဲသည့် မြေကြီးပေါ်ရှိ ခပ်သိမ်းသော ပြည်သားများသို့ ပြုရမည်။

၄ ၎င်းကို သိမ်မွေ့အောက်ကျို့သော စိတ်သဘောဖြင့်၊ ရေးချိန်၌ သင့်အထဲ၌ ရှိမည့် သန့်ရှင်းသော ဝိညာဉ်တော်၏ တန်ခိုးအားဖြင့် ရေးစေလော့။

၅ အကြောင်းမူကား၊ ထိုမင်းများ၊ အခွင့်အာဏာရှိသူများနှင့် စပ်လျဉ်း၍ ငါ၏အလိုတော်ကို သိရန်၊ လာမည့်ကာလတွင် သူတို့၌ဖြစ်ပျက်မည့် အရာကိုပင် သင့်ကို ဖော်ပြတော်မူလိမ့်မည်။

၆ အကြောင်းမူကား၊ ရှုလော့၊ ငါသည် သူတို့အား ဇိအုန်၏အလင်းနှင့်ဘုန်းအသရေကို ပမာဏပြုကြရန် တောင်းဆိုတော့မည်၊ အကြောင်းမူကား၊ ဇိအုန်ကို ထောက်မရန် သတ်မှတ်ထားသောအချိန် ကျရောက်လေပြီ။

၇ ထို့ကြောင့်၊ သင်သည် သူတို့ကို ကျယ်သောကြေညာခြင်းနှင့်၊ ထို့အတူ သင်၏သက်သေခံချက်နှင့် တောင်းလော့၊ သူတို့ကို ကြောက်ရွံ့ခြင်းမရှိနှင့်၊ အကြောင်းမူကား၊ သူတို့သည် မြက်ပင်ကဲ့သို့ရှိကြ၏၊ သူတို့၏ခပ်သိမ်းသောဘုန်းအသရေသည်လည်း မကြာမီကြွေမည့် မြက်ပွင့်ကဲ့သို့ရှိ၏၊ သူတို့အကြောင်းပြချက်မရှိဘဲ ကျန်ရစ်ကြစေခြင်းငှာဖြစ်၏—

၈ ငါသည် ကြည့်ရှုစီရင်ရာနေ့၌၊ ငါ၏မျက်နှာဖုံးကို ဖွင့်ပြသောအခါ၊ သူတို့သည် ငါ၏ ကျွန်များနှင့် သူတို့ကို ငါဖော်ပြလေသည့် ငါ၏သက်သေခံချက်ကို ငြင်းပယ်ကြလျှင် ညှဉ်းပန်းနှိပ်စက်သောသူတို့၏ ဝေစုကို အံသွားခဲကြိတ်ရာ၊ သူတော်ကောင်းယောင် ဆောင်သောသူတို့၌ ပေးအပ်ရန် သူတို့ကို အကြည့်အရှုကြွရောက်နိုင်ခြင်းငှာလည်းဖြစ်၏—

၉ ထိုမှတစ်ဖန်၊ ငါသည် သင်တို့၏ ကောင်းကျိုးအတွက် သူတို့အထဲမှ များစွာသောသူတို့ကို အကြည့်အရှုကြွရောက်၍ သူတို့၏စိတ်နှလုံးကို ပျော့ပျောင်းစေမည်၊ သူတို့၏မျက်လုံးများ၌ ကျေးဇူးကို သင်တို့တွေ့နိုင်ကြစေခြင်းငှာ၊ သူတို့ သမ္မာတရားအလင်းသို့၊ ထို့အတူ တစ်ပါးအမျိုးသားတို့ ဇိအုန်၏ ချီးမြှောက်ခြင်း သို့မဟုတ် ချီးမြှင့်ခြင်းသို့ လာကြစေခြင်းငှာဖြစ်၏။

၁၀ အကြောင်းမူကား၊ ငါ၏ ကြည့်ရှုစီရင်ရာနေ့သည် သင်စဉ်းစားခြင်းမရှိသည့် နာရီ၌ အလျင်အမြန် ကျရောက်လာ၏။ ငါ့လူမျိုးတို့၏ ဘေးလွတ်ခြင်း၊ ထို့အတူ သူတို့အထဲမှ ကျန်ရစ်သူတို့အတွက် ခိုလှုံရာသည် အဘယ်မှာ ရှိမည်နည်း။

၁၁ နိုးလော့၊ အို မြေကြီးပေါ်ရှိမင်းတို့၊ ငါ့လူမျိုးတို့၏ အကူအညီအတွက်၊ ဇိအုန်သတို့သမီး၏ အိမ်အတွက်၊ သင်တို့၏ရွှေ သင်တို့၏ငွေနှင့် သင်တို့လာကြလော့၊ အို၊ သင်တို့လာကြလော့။

၁၂ ထိုမှတစ်ဖန်၊ သင့်ကို ငါအမှန်ဆိုသည်ကား၊ ဤကြေညာချက်ကို ရေးရန် ငါ့ကျွန်ရောဘတ်ဘီသောင်ပ်ဆင်အား သင့်ကို ကူညီစေလော့၊ အကြောင်းမူကား၊ ငါသည် သူ့အား သင်နှင့်အတူရှိရမည်ကို အလွန်နှစ်သက်၏။

၁၃ ထို့ကြောင့်၊ သူ့အား သင်၏အကြံကို စေ့စေ့နားထောင်စေလော့၊ ငါသည်လည်း သူ့ကို မြောက်မြားစွာသော ကောင်းချီးမင်္ဂလာတို့ဖြင့် ကောင်းချီးပေးတော်မူမည်။ သူ့အား ယခုမှစ၍ ခပ်သိမ်းသော အရာတို့၌ သစ္စာရှိ၍မှန်ကန်စေလော့၊ သူသည်လည်း ငါ၏ အမြင်၌ ကြီးမြတ်လိမ့်မည်။

၁၄ သို့ရာတွင်၊ သူ၏တာဝန်ခံအရာကို သူ့လက်မှ ငါတောင်းဆိုမည့်အကြောင်း သူသတိရစေလော့။

၁၅ ထိုမှတစ်ဖန်၊ သင့်ကို ငါအမှန်ဆိုသည်ကား၊ ငါ့ကျွန်ဟီရမ်စမစ်သည် မင်္ဂလာရှိ၏။ အကြောင်းမူကား၊ သူ့စိတ်နှလုံး၏ ရိုးဖြောင့်ခြင်းကြောင့်၊ ထို့အတူ ငါရှေ့၌ မှန်သောအရာကို သူချစ်သောကြောင့် ငါ၊ ကိုယ်တော်ရှင်သည် သူ့ကို ချစ်တော်မူ၏ဟု ကိုယ်တော်ရှင်မိန့်တော်မူ၏။

၁၆ တစ်ဖန်၊ ငါ့ကျွန် ဂျွန်စီဘင်နက်အား ငါ၏နှုတ်ကပတ်တော်ကို မင်းများနှင့် မြေကြီးပေါ်ရှိလူတို့ထံလွှတ်ရာ သင်၏အလုပ်၌ သင့်ကို ကူညီစေလော့၊ ထို့အတူ ဆင်းရဲဒုက္ခနာရီ၌၊ သင့်ဘေး၊ သင် ငါ့ကျွန်ဂျိုးဇက်စမစ်ဘေး၌ပင် ရပ်တည်စေလော့။ သူသည် အကြံကို လက်ခံလျှင် သူ၏ အကျိုးကျေးဇူးသည် မပျောက်ဆုံးရ။

၁၇ အကြောင်းမူကား၊ သူ၏ချစ်ခြင်းကြောင့် သူသည် ကြီးမြတ်လိမ့်မည်၊ သူသည် ဤအမှုကို ဆောင်ရွက်လျှင် ငါ၏လူဖြစ်လိမ့်မည်ဟု ကိုယ်တော်ရှင်မိန့်တော်မူ၏။ ငါသည် သူဆောင်ရွက်လေသည့် အမှုကို မြင်လေပြီ၊ သူဆက်၍ပြုလျှင် ငါသည် ထိုအမှုကို လက်ခံ၏၊ သူ့ကို ကောင်းချီးမင်္ဂလာများနှင့် ကြီးစွာသောဘုန်းအသရေဖြင့်လည်း ချီးမြှင့်တော်မူမည်။

၁၈ ထိုမှတစ်ဖန်၊ သင့်ကို ငါဆိုသည်ကား၊ ငါ့ကျွန်လိုင်မန်ဝိုက်သည် သိမ်မွေ့အောက်ကျို့ခြင်း စိတ်သဘောနှင့်၊ လောကရှေ့၌ ငါ့ကို ဝန်ခံလျက် ဇိအုန်အဖို့ ဟောပြောခြင်းကို ဆက်၍ပြုရမည်မှာ ငါ၏ အလိုတော်ဖြစ်၏။ ငါသည် သူ့ကို လင်းယုန်၏ အတောင်များ ပေါ်မှာကဲ့သို့ တင်ဆောင်မည်။ သူသည်လည်း သူကိုယ်တိုင်အဖို့ လည်းကောင်း၊ ငါ၏ နာမတော်အဖို့ လည်းကောင်း ဘုန်းနှင့် ဂုဏ်အသရေကို ဖြစ်စေလိမ့်မည်။

၁၉ သူ၏အမှု ပြီးဆုံးသောအခါ သူ့ကို ငါကိုယ်တိုင်ထံသို့ လက်ခံတော်မူမည်၊ ဤအချိန်၌ ငါနှင့်အတူ ရှိသည့် ငါ့ကျွန်ဒေးဗစ်ပေတန်၊ ထို့အတူ ငါ့ကျွန် အက်ဒဝါ့ပါ့ထရစ်ဂ်ျ၊ ထို့အတူ အာဗြဟံ၏ လက်ယာဘက်၌ အတူထိုင်သည့်သူ တည်းဟူသော ငါ၏လူဖြစ်၍၊ မင်္ဂလာလည်းရှိ၊ သန့်လည်းသန့်ရှင်းသည့် ငါ၏အသက်ကြီးသောကျွန် ဂျိုးဇက်စမစ်အကြီးတို့ကို ငါပြုခဲ့ သကဲ့သို့ပင်တည်း။

၂၀ ထိုမှတစ်ဖန်၊ သင့်ကို ငါအမှန်ဆိုသည်ကား၊ ငါ့ကျွန်ဂျော့မီလာသည် အပြစ်ရောက်ခြင်း မရှိဘဲနှင့် နေ၏။ သူ့စိတ်နှလုံး၏ ရိုးဖြောင့်ခြင်းကြောင့် သူ့ကို ယုံကြည် စိတ်ချနိုင်ပေ၏။ ငါ၏သက်သေခံချက်အဖို့ သူ၏ချစ်ခြင်းကြောင့်လည်း ငါ၊ ကိုယ်တော်ရှင်သည်၊ သူ့ကို ချစ်တော်မူ၏။

၂၁ ထို့ကြောင့်၊ သင့်ကို ငါဆိုသည်ကား၊ ငါ့ကျွန်အက်ဒဝါ့ပါ့ထရစ်ဂ်ျကဲ့သို့ပင် ငါ့အိမ်တော်၏ ဆက်ကပ်ခြင်းများကို သူလက်ခံနိုင်စေခြင်းငှာ၊ ငါ့လူမျိုးတို့၌ ဆင်းရဲသားတို့၏ ဦးခေါင်းပေါ်သို့ ကောင်းချီးမင်္ဂလာများကို သူစီမံဆောင်ရွက်နိုင်စေခြင်းငှာ ငါသည် သူ့ဦးခေါင်းပေါ်၌ သင်းအုပ်နှင့်အတိုင်ပင်ခံအဖွဲ့ အမှုအရာကို တံဆိပ်ခတ်၏ဟု ကိုယ်တော်ရှင်မိန့်တော်မူ၏။ အဘယ်သူမျှ ငါ့ကျွန်ဂျော့ကို မထီမဲ့မြင်မပြုစေနှင့်၊ အကြောင်းမူကား၊ သူသည် ငါ့ကို ရိုသေလိမ့်မည်။

၂၂ ငါ့ကျွန်ဂျော့၊ ထို့အတူ ငါ့ကျွန်လိုင်မန်၊ ထို့အတူ ငါ့ကျွန် ဂျွန်စနိုက်ဒါနှင့် အခြားသော သူတို့ကိုလည်း၊ ငါ့ကျွန်ဂျိုးဇက် သူတို့ကို ပြမည့်နေရာ၌၊ သူတို့ကို သူပြမည့် အိမ်ကဲ့သို့၊ ငါ၏ နာမတော်အဖို့ အိမ်တစ်ခုကို တည်ဆောက်စေလော့။

၂၃ ၎င်းသည် တည်းခိုစားသောက်ရာအိမ်၊ အဝေးမှလာသောသူတစိမ်းတို့ ယာယီတည်းခိုရာအိမ် ဖြစ်လိမ့်မည်။ ထို့ကြောင့်၊ မောပန်းသောခရီးသွားအဖို့ ကိုယ်တော်ရှင်၏ နှုတ်ကပတ်တော်ကို၊ ထို့အတူ ဇိအုန်အတွက် ငါစီရင်လေသည့် ထောင့်ကျောက်ကို ဆင်ခြင်စဉ် ကျန်းမာခြင်းနှင့် ဘေးလွတ်ခြင်းကို တွေ့ရနိုင်စေခြင်းငှာ ကောင်းသောအိမ် တစ်အိမ် ဖြစ်စေလော့၊ လက်ခံရာမှန်သမျှအတွက် ထိုက်တန်စေလော့။

၂၄ ဤအိမ်ကို ငါ၏နာမတော်အဖို့ တည်ဆောက်လျှင်၊ ထို့အတူ ၎င်းအဖို့ ခန့်အပ်မည့် အုပ်ချုပ်သူသည် အဘယ်ညစ်ညူးခြင်းကိုမျှ ကျရောက်ရန် အခွင့်မပေးလျှင်၊ ကျန်းမာရေးနှင့် ညီညွတ်သော နေရပ်တစ်ခုဖြစ်လိမ့်မည်။ သန့်ရှင်းလိမ့်မည်၊ သို့မဟုတ်လျှင် ဘုရားသခင်သည် ထိုနေရာ၌ နေထိုင်လိမ့်မည်မဟုတ်။

၂၅ ထိုမှတစ်ဖန်၊ သင့်ကို ငါအမှန်ဆိုသည်ကား၊ ငါ၏ ခပ်သိမ်းသော သန့်ရှင်းသူတို့ကို အဝေးမှလာကြစေလော့။

၂၆ သင်တို့သည် လျင်မြန်သောတမန်တို့၊ အမှန်စင်စစ်၊ ရွေးကောက်ထားသော တမန်တို့ကို စေလွှတ်၍ ဆိုရစေမည်ကား၊ သင်တို့၏ ခပ်သိမ်းသောရွှေ၊ ထို့အတူ သင်တို့၏ငွေ၊ ထို့အတူသင်တို့၏ အဖိုးထိုက်သည့်ကျောက်များနှင့်၊ ထို့အတူ သင်တို့၏ခပ်သိမ်းသော ရှေးဟောင်းပစ္စည်းများနှင့်၊ ထို့အတူ ရှေးဟောင်းပစ္စည်းများအကြောင်းအသိပညာရှိသည့် ခပ်သိမ်းသောသူတို့၊ ထို့အတူ လာလိုသူတို့နှင့် သင်တို့လာကြလော့၊ ထို့အတူ တာရှုရပင်၊ ထို့အတူ ထင်းရှူးပင်၊ ထို့အတူ တဒေရပင်တို့ကို မြေကြီးပေါ်ရှိ အဖိုးထိုက်သည့် ခပ်သိမ်းသောအပင်များနှင့်အတူ ယူလာကြလော့။

၂၇ ထို့အတူ၊ သံနှင့်၊ ကြေးနီနှင့်၊ ထို့အတူ ကြေးနှင့်၊ ထို့အတူ သွပ်နှင့်၊ ထို့အတူ မြေကြီးပေါ်ရှိ သင်တို့၏ ခပ်သိမ်းသော အဖိုးထိုက်သည့်အရာများနှင့် ငါ၏နာမတော်အဖို့ အိမ်တစ်အိမ်ကို အမြင့်ဆုံးသော ဘုရားအတွက် နေထိုင်ရန် တည်ဆောက်လော့။

၂၈ အကြောင်းမူကား၊ ပျောက်ဆုံးလေသည့်၊ သို့မဟုတ် သူသိမ်းယူသွားလေသည့်၊ ယဇ်ပုရောဟိတ်အခွင့်၏ ပြည့်စုံခြင်းကိုပင် သင်တို့ထံသို့ သူကြွရောက်လာပြီး၊ တစ်ဖန်ပြန်၍ပေးရန် မြေကြီးပေါ်၌ တွေ့ရသောနေရာတစ်ခုမျှမရှိ။

၂၉ အကြောင်းမူကား၊ ငါ၏သန့်ရှင်းသူတို့သည် သေသူတို့အတွက် ဗတ္တိဇံကို ပေးနိုင်ရန် ဗတ္တိဇံရေကန်သည် မြေကြီးပေါ်၌မရှိ—

၃၀ အကြောင်းမူကား၊ သင်တို့သည် ငါ့အဖို့ အိမ်တော်ကို တည်ဆောက်ရန် မတတ်စွမ်းနိုင်သော၊ သင်တို့၏ ဆင်းရဲနွမ်းပါးခြင်း ကာလ၌မှတစ်ပါး၊ ဤဘိသိက်မင်္ဂလာသည် ငါ၏အိမ်တော်နှင့် ဆိုင်၏၊ သို့မဟုတ်လျှင် ငါ့အဖို့ လက်ခံနိုင်ဖွယ်မဖြစ်နိုင်။

၃၁ သို့ရာတွင်၊ ခပ်သိမ်းသောငါ၏သန့်ရှင်းသူတို့၊ ငါ့အဖို့ အိမ်တော်တစ်ခုကို တည်ဆောက်ရန် သင်တို့ကို ငါမိန့်မှာ၏။ ငါ့အဖို့ အိမ်တော်တစ်ခုကို ဆောက်ရန် ငါသည် သင်တို့အား လုံလောက်သောအချိန်ကို ပေး၏။ ဤအချိန်အတွင်း၌ သင်တို့၏ ဗတ္တိဇံများသည် ငါ့အဖို့ လက်ခံနိုင်ဖွယ်ဖြစ်လိမ့်မည်။

၃၂ သို့ရာတွင် ရှုလော့၊ ဤသတ်မှတ်ချိန် ကုန်သောအခါ၊ သင်တို့၏သေသူများအတွက် ဗတ္တိဇံသည် ငါ့အတွက် လက်ခံနိုင်ဖွယ်ဖြစ်လိမ့်မည်မဟုတ်။ သင်တို့သည် ဤသတ်မှတ်ချိန် ကုန်သောအခါ ဤအရာတို့ကို ပြုခြင်းမရှိလျှင်၊ သင်တို့၏ သေသူတို့နှင့်အတူ အသင်းတော် တစ်ခုအဖြစ် ငြင်းပယ်ခံရလိမ့်မည်ဟု သင်တို့၏ ဘုရားသခင်ကိုယ်တော်ရှင် မိန့်တော်မူ၏။

၃၃ အကြောင်းမူကား၊ သင်တို့ကို ငါအမှန်ဆိုသည်မှာ၊ သင်တို့သည် သေသူတို့အတွက် ဗတ္တိဇံပေးခြင်း ဘိသိက်မင်္ဂလာပြုရန်သင့်လျော်ရာ ငါ့အဖို့ အိမ်တော်တစ်ခု၊ ထို့အတူ ကမ္ဘာမတည်မီကတည်းက တည်ထောင်ခဲ့လေသည့် ထိုဘိသိက်မင်္ဂလာပြုရာ အိမ်တော်အတွက် တည်ဆောက်ရန် လုံလောက်သောအချိန်ရရှိလေပြီးနောက်၊ သင်တို့၏သေသူတို့အတွက်ဗတ္တိဇံများကို ငါ့အဖို့ လက်ခံနိုင်ဖွယ်မဖြစ်နိုင်။

၃၄ အကြောင်းမူကား၊ ဂုဏ်အသရေနှင့် ဘုန်းတော်ကို သင်တို့ ရရှိနိုင်စေခြင်းငှာ ထိုအထဲ၌ သန့်ရှင်းသောယဇ်ပုရောဟိတ်အခွင့်သော့များကို ခန့်ထား၏။

၃၅ ဤအချိန်နောက်၌၊ အရပ်ရပ်သို့ ကွဲပြားပြန့်ကျဲသူတို့အားဖြင့် ဆောင်ရွက်သည့် သင်တို့၏သေသူတို့အတွက်ဗတ္တိဇံများသည် ငါ့အဖို့ လက်ခံနိုင်ဖွယ်မရှိဟု ကိုယ်တော်ရှင်မိန့်တော်မူ၏။

၃၆ အကြောင်းမူကား၊ ဇိအုန်၌၊ ထို့အတူ သူ၏ပန္နက်များ၌၊ ထို့အတူ ယေရုရှလင်၌၊ ငါစီရင်ထားနှင့်လေသည့် နေရာများ၌ ခိုလှုံရာအဖြစ် ငါခန့်အပ်ထားလေသည့် ထိုနေရာများသည် သင်တို့၏သေသူတို့အတွက် ဗတ္တိဇံပေးရာနေရာများဖြစ်လိမ့်မည်။

၃၇ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ သင်တို့၏ဆေးကြောခြင်းများကို ငါ၏ နာမတော်အဖို့ သင်တို့တည်ဆောက်လေသည့် အိမ်တော်ထဲ၌ မဆောင်ရွက်လျှင်၊ ၎င်းတို့သည် ငါ့အဖို့ အဘယ်သို့အားဖြင့် လက်ခံနိုင်ဖွယ်ရှိမည်နည်း။

၃၈ အကြောင်းမူကား၊ ဤအကြောင်းရင်းကြောင့်၊ ငါသည် ငါ့ကျွန်မောရှေကို တဲတော်တစ်ခု တည်ဆောက်ရမည့်အကြောင်း၊ သူတို့သည် တောရိုင်းထဲ၌ တဲတော်ကိုသူတို့နှင့်အတူ သယ်၍၊ ကတိတော်မြေ၌ အိမ်တော်တစ်ခု တည်ဆောက်ရမည့် အကြောင်း၊ ကမ္ဘာမတည်ရှိမီကတည်းက ကွယ်ဝှက်ထားလေသည့် ဘိသိက်မင်္ဂလာများကို ဖော်ပြရစေကြောင်း မိန့်တော်မူခဲ့၏။

၃၉ ထို့ကြောင့်၊ သင်တို့ကို ငါအမှန်ဆိုသည်ကား၊ သင်တို့၏ဆီလိမ်းခြင်းများ၊ ထို့အတူ သင်တို့၏ဆေးကြောခြင်းများ၊ ထို့အတူ သင်တို့၏သေသူတို့အတွက်ဗတ္တိဇံများ၊ ထို့အတူ သင်တို့၏ ဓမ္မအစည်းအဝေးများ၊ ထို့အတူ လေဝိ၏သားတို့အားဖြင့် သင်တို့၏ ယဇ်များအတွက်နှင့် သင်တို့စကားစမြည်ပြောဆိုရာ သင်တို့၏အသန့်ရှင်းဆုံးနေရာများရှိ သင်တို့၏ဗျာဒိတ်များအတွက် အောက်မေ့ဖွယ်ရာများ၊ ထို့အတူ ဗျာဒိတ်တော်များ၏အစနှင့် ဇိအုန်၏အုတ်မြစ်အတွက်နှင့် ဘုန်း၊ ဂုဏ်အသရေ၊ သူ၏ခပ်သိမ်းသောအရပ်သားတို့၏ ဝိညာဉ်ပကတိအပ်နှင်းခြင်းအတွက် ထုံးဥပဒေသများနှင့် စီရင်တော်မူချက်များသည် ငါ၏သန့်ရှင်းသော နာမတော်အဖို့ တည်ဆောက်ရန် ငါ၏လူမျိုးတို့ အစဉ်အမြဲမိန့်မှာခံရသည့် ငါ၏သန့်ရှင်းသောအိမ်တော်၏ ဘိသိက်မင်္ဂလာများအားဖြင့် ခန့်ထားခံရ၏။

၄၀ သင်တို့ကို ငါအမှန်ဆိုသည်ကား၊ ငါ၏ဘိသိက်မင်္ဂလာများကို ငါ၏လူမျိုးများသို့ အိမ်တော်ထဲ၌ ငါဖော်ပြနိုင်ခြင်းငှာ၊ ငါ၏နာမတော်အဖို့ ဤအိမ်တော်ကို တည်ဆောက်စေလော့။

၄၁ အကြောင်းမူကား၊ ကမ္ဘာမတည်မီကတည်းက ကွယ်ဝှက်ထားလေသည့် အရာများ၊ အချိန်ကာလပြည့်စုံခြင်းသာသနာနှင့် စပ်ဆိုင်သည့်အရာများကို ငါ၏အသင်းတော်သို့ ဖော်ပြရန် ငါအရေးတယူပြု၏။

၄၂ ငါသည် ငါ့ကျွန်ဂျိုးဇက်အား၊ ဤအိမ်တော်နှင့် စပ်ဆိုင်သည့်အရာများ၊ ထို့အတူ ၎င်းရှိ ယဇ်ပုရောဟိတ်အခွင့်၊ ၎င်းကိုတည်ဆောက်မည့်နေရာတို့ကို ဖော်ပြတော်မူမည်။

၄၃ သင်တို့သည်လည်း တည်ဆောက်ရန်ဆင်ခြင်မိကြလေသည့် နေရာပေါ်၌ တည်ဆောက်ရမည်၊ အကြောင်းမူကား၊ ထိုနေရာသည် တည်ဆောက်ရန် သင်တို့အတွက် ငါရွေးချယ်လေသည့် နေရာဖြစ်၏။

၄၄ သင်တို့သည် သင်တို့၏အစွမ်းသတ္တိရှိသမျှဖြင့် အလုပ်လုပ်ကြလျှင်၊ ငါသည် ထိုနေရာကို သန့်ရှင်းမွန်မြတ်စေမည်ဖြစ်၍၊ သန့်ရှင်းစေလိမ့်မည်။

၄၅ ငါ၏လူမျိုးတို့သည်လည်း ငါ၏အသံကို၊ ထို့အတူ ငါ၏လူမျိုးတို့ကို ဦးဆောင်ရန် ငါခန့်အပ်ထားလေသည့် ငါ၏ကျွန်တို့၏အသံကို စေ့စေ့နားထောင်ကြမည်ဆိုလျှင်၊ ရှုလော့၊ သင်တို့ကို ငါအမှန်ဆိုသည်ကား၊ သူတို့သည် သူတို့၏နေရာမှ ဖယ်ရှားမခံရ။

၄၆ သို့ရာတွင် သူတို့သည် ငါ၏အသံကို စေ့စေ့နားမထောင်ကြလျှင်၊ ငါခန့်အပ်ထားလေသောသူတို့၏ အသံကိုလည်း စေ့စေ့နားမထောင်ကြလျှင်၊ ကောင်းချီးမခံစားရ၊ သူတို့သည် ငါ၏သန့်ရှင်းသောမြေများ၊ ထို့အတူ ငါ၏သန့်ရှင်းသောဘိသိက်မင်္ဂလာများ၊ ထို့အတူ အမိန့်ပြန်တမ်းများ၊ ထို့အတူ သူတို့ကို ငါပေးသည့် ငါ၏သန့်ရှင်းသောနှုတ်ကပတ်တော်များကို ညစ်ညူးစေကြသောကြောင့်ဖြစ်၏။

၄၇ ဤသို့အားဖြင့်အချိန်တန်လာလတ္တံ့သောအခါ၊ သင်တို့သည် ငါ၏နာမတော်အဖို့ အိမ်တော်တစ်ခုကို တည်ဆောက်၍၊ ငါမိန့်တော်မူလေသည့် အရာများကို လုပ်ဆောင်ခြင်းမရှိလျှင်၊ ငါသည် သင်တို့ထံပြုသည့် ကျိန်ဆိုခြင်းကို မဆောင်ရွက်၊ ငါ့လက်မှ သင်တို့မျှော်လင့်သည့် ကတိတော်များကို ပြီးပြည့်စုံစေမည်လည်းမဟုတ်ဟု ကိုယ်တော်ရှင်မိန့်တော်မူ၏။

၄၈ အကြောင်းမူကား၊ ကောင်းချီးမင်္ဂလာများအစား၊ သင်တို့သည် သင်တို့၏ အကျင့်များအားဖြင့်၊ ကျိန်ခြင်းများ၊ အမျက်၊ ဒေါသ၊ ထို့အတူ တရားစီရင်တော်မူခြင်းတို့ကို သင်တို့၏ ဦးခေါင်းများပေါ်သို့၊ ငါ့ရှေ့၌ သင်တို့ လေ့ကျင့်သည့် သင်တို့၏ မိုက်မဲခြင်း၊ ထို့အတူ သင်တို့၏ ခပ်သိမ်းသော စက်ဆုပ်ရွံရှာဖွယ် အမှုများ အားဖြင့် ဆောင်ယူကြသည်ဟု ကိုယ်တော်ရှင်မိန့်တော်မူ၏။

၄၉ သင်တို့ကို ငါအမှန်၊ အမှန်ဆိုသည်ကား၊ လူသားတို့အထဲမှ အဘယ်သူကို ဖြစ်စေ ငါ၏နာမတော်အဖို့ အမှုကို လုပ်ဆောင်ရန် ပညတ်တော်ကို ငါပေးသောအခါ၊ ထိုလူသားတို့သည် ထိုအမှုကို ဆောင်ရွက်ရန် သူတို့၏အစွမ်းသတ္တိရှိသမျှနှင့်၊ သူတို့မှာရှိသမျှနှင့် သွား၍၊ သူတို့၏ လုံ့လဝီရိယကိုလည်း ရပ်တန့်ခြင်းမရှိကြ၊ သူတို့၏ရန်သူများသူတို့အပေါ်ရောက်လာပြီး၊ သူတို့အား ထိုအမှုကို ဆောင်ရွက်ခြင်းမှ ဆီးတားကြလျှင်၊ ရှုလော့၊ ငါ့အဖို့ ထိုအမှုကို ထိုလူသားတို့လက်မှ မတောင်းဆိုတော့ရန် ငါ့၌အကြောင်းရှိ၏၊ သို့ရာတွင် သူတို့၏ပူဇော်သက္ကာများကို လက်ခံ၏။

၅၀ ငါ၏ အမှုတော်ကို ဆီးတားသူများ နောင်တရခြင်းမရှိ၊ ထို့အတူ ငါ့ကို မုန်းကြသမျှ၊ ငါ၏ သန့်ရှင်းသော ဥပဒေနှင့် ပညတ်တော်များအပေါ် ဒုစုရိုက်နှင့် လွန်ကျူးခြင်းကို၊ သူတို့၏ ဦးခေါင်းပေါ်သို့ တတိယနှင့် စတုတ္ထမျိုးဆက်တိုင်အောင် ရောက်စေတော်မူမည်ဟု ကိုယ်တော်ရှင် ဘုရားသခင် မိန့်တော်မူ၏။

၅၁ ထို့ကြောင့်၊ ဤအကြောင်းရင်းကြောင့်၊ ဂျက်ဆင်ခရိုင်၊ မစ်ဆိုရီ၌ ငါ၏နာမတော်အဖို့ မြို့တစ်မြို့နှင့် အိမ်တော်တစ်ခုကို တည်ဆောက်ရန် ငါမိန့်တော်မူခဲ့သည့်သူတို့၏၊ ထို့အတူ မိမိတို့ရန်သူတို့အားဖြင့် ဆီးတားခံရကြသူတို့၏ ပူဇော်သက္ကာများကို ငါလက်ခံ၏ဟု သင်တို့၏ ဘုရားသခင်ကိုယ်တော်ရှင်မိန့်တော်မူ၏။

၅၂ သူတို့သည် နောင်တရခြင်းမရှိ၊ ထို့အတူ ငါ့ကို မုန်းကြသမျှ၊ ငါသည် တရားစီရင်တော်မူခြင်း၊ အမျက်၊ ထို့အတူ ဒေါသ၊ မြည်တမ်းခြင်း၊ ထို့အတူ ပြင်းစွာသောဝေဒနာ၊ ထို့အတူ အံသွားခဲကြိတ်ခြင်းတို့ကို သူတို့၏ဦးခေါင်းပေါ်သို့၊ တတိယနှင့်စတုတ္ထမျိုးဆက်တိုင်အောင် ရောက်စေတော်မူမည်ဟု သင်တို့၏ ဘုရားသခင်ကိုယ်တော်ရှင် မိန့်တော်မူ၏။

၅၃ ဤအမှုကို ငါသည် သင်တို့အဖို့ ပုံသက်သေတစ်ခု အဖြစ် ပြုတော်မူ၏၊ အမှုတော်ကို လုပ်ဆောင်ရန် မိန့်မှာခံထားရလေပြီး၊ သူတို့၏ ရန်သူတို့လက်များ အားဖြင့်၊ ထို့အတူ ညှဉ်းပန်းနှိပ်စက်ခြင်း အားဖြင့် ဆီးတားခံထားရလေသူအပေါင်းတို့နှင့်စပ်လျဉ်း၍ သင်တို့၏သက်သာခြင်းအတွက် ဖြစ်၏ဟု သင်တို့၏ဘုရားသခင်ကိုယ်တော်ရှင်မိန့်တော်မူ၏။

၅၄ အကြောင်းမူကား၊ ငါသည် သင်တို့၏ ဘုရားသခင်ကိုယ်တော်ရှင်ဖြစ်၏၊ စိတ်နှလုံးစင်ကြယ်ကြလေသော၊ ထို့အတူ မစ်ဆိုရီပြည်၌ ကွပ်မျက်ခံရကြလေသော သင်တို့၏ ခပ်သိမ်းသော ညီအစ်ကိုတို့ကို ကယ်တင်တော်မူမည်ဟု ကိုယ်တော်ရှင်မိန့်တော်မူ၏။

၅၅ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါသည် သင်တို့ကို ကောင်းချီးပေး၍၊ ဂုဏ်အသရေ၊ သေခြင်းမရှိရာ၊ ထို့အတူ ထာဝရအသက်နှင့် ချီးမြှင့်နိုင်ခြင်းငှာ၊ သင်တို့ကို ငါမိန့်တော်မူသမျှ ခပ်သိမ်းသောအရာတို့၌ သင်တို့သစ္စာရှိကြကြောင်း ငါ့ထံသို့ သင်တို့ကိုယ်တိုင် သက်သေပြနိုင်ကြစေခြင်းငှာ ဤနေရာ၌ပင်၊ ငါ၏ နာမတော်အဖို့ အိမ်တော်တစ်ခုကို တည်ဆောက်ရန် သင်တို့ကို ငါတစ်ဖန်မိန့်တော်မူ၏။

၅၆ ယခုမူကား၊ သူတစိမ်းတို့ယာယီတည်းခိုခြင်းအတွက် တည်ဆောက်ရန် သင်တို့ကို ငါမိန့်တော်မူလေသည့် ငါ၏ ယာယီတည်းခိုရာအိမ်နှင့် စပ်ဆိုင်၍၊ သင်တို့ကို ငါဆိုသည်မှာ၊ ထိုအိမ်ကို ငါ၏ နာမတော်အဖို့ တည်ဆောက်စေလော့၊ ထိုအိမ်ပေါ်၌ ငါ၏နာမတော်ကိုလည်း ရှိစေလော့၊ ငါ့ကျွန်ဂျိုးဇက်နှင့် သူ၏အိမ်သူအိမ်သားတို့ကိုလည်း ထိုအိမ်၌ လူမျိုးအစဉ်အဆက် နေရာရစေလော့။

၅၇ အကြောင်းမူကား၊ ဤဆီသွန်းလောင်းခန့်အပ်ခြင်းကို ငါသည် သူ၏ဦးခေါင်းပေါ်၌ ထားလေပြီ၊ သူ၏ ကောင်းချီးမင်္ဂလာကိုလည်း သူ့နောက်မှ သူ့သားစဉ်မြေးဆက်၏ ဦးခေါင်းပေါ် ထားရစေခြင်းငှာ ပေတည်း။

၅၈ မြေကြီးပေါ်ရှိအမျိုးစုတို့နှင့်စပ်လျဉ်း၍ အာဗြဟံကို ငါမိန့်တော်မူခဲ့သကဲ့သို့၊ ထိုကဲ့သို့ပင် ငါသည် ငါ့ကျွန်ဂျိုးဇက်ကို သင့်အားဖြင့်၊ သင်၏အမျိုးအနွယ်တို့အားဖြင့် မြေကြီးပေါ်ရှိ အမျိုးစုတို့ ကောင်းချီးခံစားရလိမ့်မည်ဟု မိန့်တော်မူ၏။

၅၉ ထို့ကြောင့်၊ ငါ့ကျွန်ဂျိုးဇက်နှင့် သူ့နောက်မှ သူ၏အမျိုးအနွယ်တို့ကို ထိုအိမ်၌ လူမျိုးအစဉ်အဆက်၊ ကာလအစဉ်အဆက်အမြဲ နေရာရစေလော့ဟု ကိုယ်တော်ရှင်မိန့်တော်မူ၏။

၆၀ ထိုအိမ်၏ အမည်ကို နော်ဗူးအိမ်ဟုခေါ်စေလော့။ လူသားအတွက် မွေ့လျော်ဖွယ်နေရပ်၊ ထို့အတူ မောပန်းသောခရီးသွားအတွက် ဇိအုန်၏ဘုန်းအသရေ၊ ထို့အတူ ဤထောင့်ကျောက်၏ ဘုန်းအသရေကို ဆင်ခြင်နိုင်စေခြင်းငှာ စခန်းချရာနေရာ ဖြစ်စေလော့။

၆၁ ကျော်စောသောအပင်များအဖြစ်၊ ထို့အတူ ၎င်း၏တံတိုင်းပေါ်၌ ကင်းစောင့်များအဖြစ် ငါခန့်ထားလေသူတို့၏အကြံကို သူရရှိနိုင်စေခြင်းငှာလည်းဖြစ်၏။

၆၂ ရှုလော့၊ သင်တို့ကို ငါအမှန်ဆိုသည်ကား၊ ငါ့ကျွန်ဂျော့မီလာ၊ ထို့အတူ ငါ့ကျွန်လိုင်မန်ဝိုက်၊ ထို့အတူ ငါ့ကျွန်ဂျွန်စနိုက်ဒါ၊ ထို့အတူ ငါ့ကျွန်ပီတာဟောတို့ကို သူတို့ကိုယ်သူတို့ ဖွဲ့စည်း၍၊ သူတို့အထဲမှ တစ်ဦးကို ထိုအိမ်ကို တည်ဆောက်ခြင်းရည်ရွယ်ချက်အတွက် သူတို့အဖွဲ့၏ ဥက္ကဋ္ဌအဖြစ် ခန့်အပ်ထားစေလော့။

၆၃ သူတို့သည် ဖွဲ့စည်းပုံတစ်ခုကို တည်ထောင်ရမည်၊ ယင်းကဲ့သို့အားဖြင့် ထိုအိမ်တည်ဆောက်ခြင်းအတွက် မတည်ငွေစုကို လက်ခံနိုင်ကြ၏။

၆၄ သူတို့သည် ထိုအိမ်၏မတည်ငွေစုတစ်စုကို ဒေါ်လာငါးဆယ်ထက်လျော့၍ လက်မခံရ၊ ထိုအိမ်၏ မတည်ငွေစုအတွက် အဘယ်တစ်စုံတစ်ဦးထံမှဖြစ်စေဒေါ်လာ တစ်သောင်းငါးထောင်ကို လက်ခံရန် အခွင့်ရကြရမည်။

၆၅ သို့ရာတွင်၊ သူတို့သည် အဘယ်တစ်စုံတစ်ဦးထံမှဖြစ်စေ မတည်ငွေစုကို ဒေါ်လာတစ်သောင်းငါးထောင်ထက် ကျော်၍ လက်ခံရန် အခွင့်မရှိစေရ။

၆၆ သူတို့သည် ထိုအိမ်၏ မတည်ငွေစုတစ်စုကို အဘယ်တစ်စုံတစ်ဦးထံမှဖြစ်စေ ဒေါ်လာငါးဆယ်အောက် လျော့၍လက်ခံရန် အခွင့်မရှိစေရ။

၆၇ သူတို့သည် အဘယ်သူကိုဖြစ်စေ၊ သူ၏မတည်ငွေစုကို ရရှိချိန်၌ သူ၏မတည်ငွေစုကို သူတို့လက်ထဲသို့ မပေးလျှင်၊ ဤအိမ်၏ မတည်ငွေစုရှင်တစ်ဦးအဖြစ် အခွင့်မရှိစေရ။

၆၈ သူတို့၏လက်ထဲသို့ သူပေးသည့် မတည်ငွေစု၏ ပမာဏနှင့်ညီမျှသော ထိုအိမ်၏ မတည်ငွေစုကို ထိုသူရရှိရမည်။ သို့ရာတွင်၊ သူတို့၏ လက်ထဲသို့ မည်သည့်အရာကိုမျှ မပေးလျှင် ထိုအိမ်၏ မတည်ငွေစုတစ်စုံတစ်ခုကိုမျှ မရရှိရ။

၆၉ အဘယ်သူမဆို မတည်ငွေစုကို သူတို့၏လက်ထဲသို့ ပေးလျှင်၊ သူနှင့် သူ၏အမွေခံသူတို့သည် ထိုမတည်ငွေစုကို ကိုင်ဆောင်၍၊ မိမိတို့၏လွတ်လပ်သောစိတ်နှင့်အကျင့်တို့အားဖြင့် ထိုမတည်ငွေစုကို မိမိတို့လက်ထဲမှနေ၍ မရောင်း သို့မဟုတ် မလွှဲပြောင်းသမျှ၊ ထိုသူကိုယ်တိုင်အတွက်၊ ထို့အတူ သူ့နောက်မှ သူ၏မျိုးဆက်အတွက်၊ ထိုအိမ်၏မတည်ငွေစုအဖြစ် လူမျိုးအစဉ်အဆက် ရှိလိမ့်မည်၊ သင်တို့သည် ငါ၏အလိုတော်ကို လုပ်ဆောင်လိုကြလျှင် ပြုကြလိမ့်မည်ဟု သင်တို့၏ဘုရားသခင် ကိုယ်တော်ရှင်မိန့်တော်မူ၏။

၇၀ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါ့ကျွန်ဂျော့မီလာ၊ ထို့အတူ ငါ့ကျွန်လိုက်မန်ဝိုက်၊ ထို့အတူ ငါ့ကျွန်ဂျွန်စနိုက်ဒါ၊ ထို့အတူ ငါ့ကျွန်ပီတာဟောတို့သည် သူတို့လက်၌ မတည်ငွေစု တစ်စုံတစ်ခုကို၊ ငွေများအဖြစ်၊ သို့မဟုတ် ငွေများ၏ တန်ဖိုးအမှန်အတိုင်း ဥစ္စာပစ္စည်းများအဖြစ် လက်ခံကြလျှင်၊ သူတို့သည် ထိုမတည်ငွေစု၏မည်သည့် အစိတ်အပိုင်းကိုမျှ ထိုအိမ်အတွက်မှတစ်ပါး၊ အခြား မည်သည့် ရည်ရွယ်ချက်အတွက်မျှ ယူ၍မသုံးရ။

၇၁ သူတို့သည် မတည်ငွေစုရှင်၏သဘောတူခြင်းမရှိဘဲ ထိုမတည်ငွေစု၏ အဘယ် အစိတ်အပိုင်းကိုဖြစ်စေ ထိုအိမ်အတွက်မှတစ်ပါး၊ အခြားတစ်နေရာရာ၌ ယူ၍သုံးပြီး၊ ထိုအိမ်အတွက်မှတစ်ပါး၊ အခြားတစ်နေရာရာ၌ သူတို့ယူ၍သုံးသည့် မတည်ငွေစု၏ လေးဆကို ပြန်မပေးလျှင် အကျိန်ခံရမည်၊ ထို့အတူ သူတို့၏နေရာမှ ဖယ်ရှားခံရမည်ဟု ကိုယ်တော်ရှင် ဘုရားသခင်မိန့်တော်မူ၏။ အကြောင်းမူကား၊ ငါ၊ ကိုယ်တော်ရှင်သည် ဘုရားသခင်ဖြစ်၏၊ ဤအရာတို့၌ အဘယ်အရာကိုမျှ ပြက်ရယ်ပြုမခံနိုင်။

၇၂ သင်တို့ကို ငါအမှန် ဆိုသည်ကား၊ ငါ့ကျွန်ဂျိုးဇက်အား ထိုအိမ်တည်ဆောက်ခြင်းအတွက် မတည်စုငွေကို သူကောင်းမြတ်သည်ဟုမှတ်ယူသည့်အတိုင်း သူတို့လက်ထဲသို့ ပေးစေလော့။ သို့ရာတွင်၊ ငါ့ကျွန်ဂျိုးဇက်သည် ထိုအိမ်၏ မတည်ငွေစုကို ဒေါ်လာတစ်သောင်းငါးထောင်ထက် ကျော်၍မပေးနိုင်၊ ဒေါ်လာငါးဆယ်အောက်လျော့၍လည်း မပေးနိုင်။ အခြားအဘယ်သူမျှလည်း ထိုသို့မပြုနိုင်ဟု ကိုယ်တော်ရှင်မိန့်တော်မူ၏။

၇၃ ၎င်းတို့နှင့်စပ်လျဉ်းသည့် ငါ၏အလိုတော်ကို သိလိုကြသည့် အခြားသောသူများလည်းရှိ၏၊ အကြောင်းမူကား၊ သူတို့သည် ထိုအရာကို ငါ့လက်မှ တောင်းကြလေပြီ။

၇၄ ထို့ကြောင့်၊ ငါ့ကျွန်ဗင်ဆင်နိုက်နှင့်စပ်လျဉ်း၍ သင်တို့ကို ငါဆိုသည်ကား၊ သူသည် ငါ၏အလိုတော်ကို လုပ်ဆောင်လျှင်၊ သူ့အား မတည်ငွေစုကို သူကိုယ်တိုင်အတွက်၊ ထို့အတူ သူ့နောက်မှ သူ၏မျိုးဆက်အတွက် ထိုအိမ်ထဲသို့ လူမျိုးအစဉ်အဆက် ထည့်စေလော့။

၇၅ သူ့အား လူမျိုးတို့အလယ်၌၊ ဆင်းရဲသားများနှင့် ချို့တဲ့သောသူတို့၏အမှုကို တောင်းပန်ရန် ကြာကြာနှင့် ကျယ်ကျယ်ကြွေးကြော်စေလော့။ ထို့အတူ သူ့အား မပျက်ကွက်စေနှင့်၊ သူ့စိတ်နှလုံးကိုလည်း အားမလျော့စေနှင့်။ ငါသည်လည်း သူ၏ပူဇော်သက္ကာများကို လက်ခံမည်၊ အကြောင်းမူကား၊ ၎င်းတို့သည် ငါ့အဖို့ ကာဣန၏ပူဇော်သက္ကာများကဲ့သို့ ဖြစ်လိမ့်မည်မဟုတ်၊ သူသည် ငါ၏လူဖြစ်လိမ့်မည်ဟု ကိုယ်တော်ရှင်မိန့်တော်မူ၏။

၇၆ သူ၏မိသားစုကို ရွှင်လန်းဝမ်းမြောက်စေပြီး၊ သူတို့၏စိတ်နှလုံးကို ဆင်းရဲဒုက္ခထံမှ ကျောခိုင်းစေလော့။ အကြောင်းမူကား၊ ငါသည် သူ့ကို ရွေးကောက်ပြီး၊ ဆီလိမ်း၍ခန့်အပ်လေပြီ၊ သူသည်လည်း သူ့အိမ်သူအိမ်သားတို့အလယ်၌ ဂုဏ်အသရေရှိရလိမ့်မည်၊ အကြောင်းမူကား၊ ငါသည် သူ၏ခပ်သိမ်းသောအပြစ်များကို ခွင့်လွှတ်မည်ဟု ကိုယ်တော်ရှင်မိန့်တော်မူ၏။ အာမင်။

၇၇ သင်တို့ကို ငါအမှန်ဆိုသည်ကား၊ ငါ့ကျွန်ဟီရမ်အား သူကောင်းမြတ်သည်ဟု မှတ်ယူသည့်အတိုင်း သူကိုယ်တိုင်အတွက်နှင့် သူ့နောက်မှ သူ၏မျိုးဆက်အတွက် မတည်ငွေစုကို ထိုအိမ်ထဲသို့ လူမျိုးအစဉ်အဆက်ထည့်စေလော့။

၇၈ ငါ့ကျွန်အိုက်ဇက်ဂေါလန်အား မတည်ငွေစုကို ထိုအိမ်ထဲသို့ ထည့်စေလော့။ အကြောင်းမူကား၊ ငါ၊ ကိုယ်တော်ရှင်သည် သူ့အား သူလုပ်ဆောင်လေသည့် အမှုအတွက် ချစ်တော်မူ၏၊ သူ၏ခပ်သိမ်းသောအပြစ်တို့ကိုလည်း ခွင့်လွှတ်တော်မူမည်။ ထို့ကြောင့်၊ သူ့အား ထိုအိမ်၌ လူမျိုးအစဉ်အဆက် အစုတစ်စုရှိကြောင်း အောက်မေ့စေလော့။

၇၉ ငါ့ကျွန်အိုက်ဇက်ဂေါလန်အား သင်တို့အထဲ၌ ခန့်အပ်ထားစေလော့၊ ထို့အတူ ငါ့ကျွန်ဝီလျံမာ့ခ်အားဖြင့် ခန့်ထားစေလော့၊ ထို့အတူ သူတို့ကို ငါ့ကျွန်ဂျိုးဇက်ဖော်ပြမည့်အမှုကို ပြီးမြောက်စေခြင်းငှာ ငါ့ကျွန်ဟီရမ်နှင့်အတူသွားရန် သူ့အားဖြင့် ကောင်းချီးခံစားစေလော့၊ သူတို့သည်လည်း ကြီးစွာကောင်းချီးခံစားရလိမ့်မည်။

၈၀ ငါ့ကျွန်ဝီလျံမာ့ခ်အား သူကောင်းမြတ်သည်ဟု မှတ်ယူသည့်အတိုင်း သူကိုယ်တိုင်အတွက်နှင့် သူ၏မျိုးဆက်အတွက် မတည်ငွေစုကို ထိုအိမ်ထဲသို့ လူမျိုးအစဉ်အဆက်ပေးစေလော့။

၈၁ ငါ့ကျွန်ဟင်နရီဂျီရှာဝုအား သူကောင်းမြတ်သည်ဟု မှတ်ယူသည့်အတိုင်း သူကိုယ်တိုင်အတွက်နှင့် သူ့နောက်မှ သူ၏မျိုးဆက်အတွက် မတည်ငွေစုကို ထိုအိမ်ထဲသို့ လူမျိုးအစဉ်အဆက် ပေးစေလော့။

၈၂ ငါ့ကျွန်ဝီလျံလောအား သူကိုယ်တိုင်အတွက်နှင့် သူ့နောက်မှ သူ၏မျိုးဆက်အတွက် မတည်ငွေစုကို ထိုအိမ်ထဲသို့ လူမျိုးအစဉ်အဆက် ပေးစေလော့။

၈၃ သူသည် ငါ့၏အလိုတော်ကို လုပ်ဆောင်လျှင် သူ့မိသားစုကို အရှေ့ပိုင်းပြည်များသို့၊ ကာ့တ်လန်းအထိပင် မခေါ်ဆောင်စေနှင့်။ သို့သော်လည်း၊ ငါ၊ ကိုယ်တော်ရှင်သည်၊ ကာ့တ်လန်းကို တည်ဆောက်မည်၊ သို့ရာတွင်၊ ငါ၊ ကိုယ်တော်ရှင်သည် ထိုနေရာ၌ နေထိုင်သော သူတို့အတွက် ကျာပွတ်ကို ပြင်ဆင်လေပြီ။

၈၄ ငါ့ကျွန်အော်လမော်ဘာဘစ်နှင့်စပ်လျဉ်း၍၊ ငါမနှစ်သက်သည့်အရာ များစွာရှိ၏။ ရှုလော့၊ သူသည် ငါခန့်ထားလေသည့်၊ အကယ်စင်စစ်၊ ငါ့အသင်းတော်မှဥက္ကဋ္ဌအဖွဲ့၏ အကြံအစား၊ သူ၏အကြံကို တည်စေရန်စွဲလမ်း၏။ သူသည် ငါ၏လူမျိုးတို့ ကိုးကွယ်ခြင်းအတွက် ရွှေနွားသငယ်ရုပ်ကိုလည်း ထူ၏။

၈၅ ငါ၏ပညတ်တော်များကို စောင့်ထိန်းရန်အားထုတ်လျက် ဤအရပ်သို့ လာလေသူ အဘယ်သူ့ကိုမျှ ဤနေရာမှ မသွားစေနှင့်။

၈၆ သူတို့သည် ဤအရပ်၌ အသက်ရှင်လျှင် ငါ့အဖို့ အသက်ရှင်ကြစေလော့။ သေလျှင်လည်း ငါ့အဖို့ သေကြစေလော့။ အကြောင်းမူကား၊ သူတို့သည် သူတို့၏ခပ်သိမ်းသောအလုပ်များမှ အနားရကြလိမ့်မည်၊ သူတို့၏အမှုတော်များကိုလည်း ဆက်၍လုပ်ကြလိမ့်မည်။

၈၇ ထို့ကြောင့်၊ ငါ့ကျွန်ဝီလျံအား ငါ့ကို ကိုးစားစေလော့၊ ထိုပြည်၏ အနာရောဂါကြောင့်၊ သူ့မိသားစုနှင့်စပ်လျဉ်း၍ စိုးရိမ်သည်ကိုလည်း ရပ်တန့်စေလော့။ သင်တို့သည် ငါ့ကို ချစ်လျှင်၊ ငါ၏ပညတ်တော်များကို စောင့်ထိန်းကြလော့။ ထိုပြည်၏ အနာရောဂါသည် သင်တို့၏ ဘုန်းအသရေ အလို့ငှာဖြစ်လိမ့်မည်။

၈၈ ငါ့ကျွန်ဝီလျံအား ဝိညာဉ်တော်၏တိုက်တွန်းတော်မူခြင်းကို ခံရမည့်အတိုင်း၊ ဝါဆော၌ နေထိုင်သောသူတို့ထံ၊ ထို့အတူ ကာသေ့ဂ်ျ၌ နေထိုင်သောသူတို့ထံ၊ ထို့အတူ ဘာလင်တန်၌ နေထိုင်သောသူတို့ထံ၊ ထို့အတူ မက်ဒစ်ဆင်၌ နေထိုင်သောသူတို့ထံ၊ ငါ၏ထာဝရတည်မြဲသော ဧဝံဂေလိတရားတော်ကို ကျယ်သောအသံနှင့်၊ ထို့အတူ ကြီးစွာသောဝမ်းမြောက်ခြင်းနှင့် ကြေညာစေလော့၊ ထို့အတူ ငါ၏အထွေထွေညီလာခံ၌ နောက်ထပ်သွန်သင်ချက်များအတွက် စိတ်ရှည်စွာနှင့် လုံ့လဝီရိယထက်သန်စွာစောင့်နေစေလော့ဟု ကိုယ်တော်ရှင်မိန့်တော်မူ၏။

၈၉ သူသည် ငါ၏အလိုတော်ကို လုပ်ဆောင်မည်ဆိုလျှင်၊ ငါ့ကျွန်ဂျိုးဇက်၏အကြံကို ယခုမှစ၍ စေ့စေ့နားထောင်စေလော့၊ ထို့အတူ ဆင်းရဲသားတို့၏ အမှုကို သူ၏တိုးလာသောအရာဖြင့် ထောက်မစေလော့၊ ထို့အတူ ငါ၏သန့်ရှင်းသောနှုတ်ကပတ်တော်၏ ဘာသာပြန်အသစ်ကို မြေကြီးပေါ်၌ နေထိုင်သူတို့ထံ ပုံနှိပ်ထုတ်ဝေစေလော့။

၉၀ သူသည် ဤအမှုကို လုပ်ဆောင်မည်ဆိုလျှင်၊ ငါသည် သူ့အား မြောက်မြားစွာသော ကောင်းချီးမင်္ဂလာတို့ဖြင့် ကောင်းချီးပေးတော်မူမည်ဖြစ်၍၊ သူသည် စွန့်ပစ်မခံရ၊ သူ၏အမျိုးအနွယ်တို့သည်လည်း မုန့်ကိုတောင်းလျက်မတွေ့ရ။

၉၁ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါ့ကျွန်ဝီလျံအား၊ ငါ့ကျွန်ဂျိုးဇက်အဖို့ တိုင်ပင်ဖက်အဖြစ်၊ ငါ့ကျွန်ဟီရမ်၏နေရာ၌၊ ခန့်အပ်ထား၊ ခန့်ထား၊ ထို့အတူ ဆီလိမ်း၍ ခန့်အပ်ခံစေလော့၊ ငါ့ကျွန်ဟီရမ်အဖို့ သူ့အဘအားဖြင့်၊ ကောင်းချီးမင်္ဂလာအားဖြင့်၊ အခွင့်အရေးအားဖြင့်လည်း သူ့ထံ ခန့်အပ်ထားခံရသည့် ယဇ်ပုရောဟိတ်အခွင့်နှင့် မျိုးနွယ်စုအဘအမှုအရာကို ခံယူနိုင်စေခြင်းငှာပေတည်း။

၉၂ ယခုမှစ၍၊ သူသည် ခပ်သိမ်းသောငါ၏လူမျိုးတို့၏ဦးခေါင်းပေါ်၌ မျိုးနွယ်စုအဘကောင်းချီးမင်္ဂလာများ၏ သော့များကို ကိုင်ဆောင်ရစေကြောင်း၊

၉၃ သူကောင်းချီးပေးမည့်သူမှန်သမျှ ကောင်းချီးခံစားရမည့်အကြောင်း၊ ထို့အတူ သူကျိန်မည့်သူမှန်သမျှ အကျိန်ခံရမည့်အကြောင်း။ မြေကြီးပေါ်၌ သူစည်းနှောင်သမျှကို ကောင်းကင်ဘုံ၌ စည်းနှောင်လျက် ရှိရစေကြောင်း၊ ထို့အတူ မြေကြီးပေါ်၌ သူဖြေလွှတ်သမျှကို ကောင်းကင်ဘုံ၌ ဖြေလွှတ်လျက်ရှိရစေကြောင်းပေတည်း။

၉၄ ဤအချိန်မှစ၍၊ ငါသည် သူ့အား ငါ့ကျွန်ဂျိုးဇက်နည်းတူ၊ ငါ့အသင်းတော်အဖို့ ပရောဖက်တစ်ပါး၊ ထို့အတူ မြင်သောသူတစ်ပါး၊ ထို့အတူ ဗျာဒိတ်ဟောသူတစ်ပါးဖြစ်ရစေခြင်းငှာ ခန့်အပ်ထားတော်မူ၏။

၉၅ သူ့အား ငါ့ကျွန်ဂျိုးဇက်နှင့် ညီညီညွတ်ညွတ်ဆောင်ရွက်နိုင်စေခြင်းငှာ၊ ထို့အတူ သူတောင်း၍ ရရှိနိုင်ရာ သော့များကို သူ့အား ပြမည့်သူ ငါ့ကျွန်ဂျိုးဇက်ထံမှ အကြံကို ရရှိရစေကြောင်း၊ ထို့အတူ ငါ့ကျွန်ဖြစ်ခဲ့လေသူ အော်လီဗာကောင်ဒရီအပေါ်၌ တစ်ချိန်ကထားခဲ့လေသည့် တူသော ကောင်းချီးမင်္ဂလာ၊ ထို့အတူ ဘုန်း၊ ထို့အတူ ဂုဏ်အသရေ၊ ထို့အတူ ယဇ်ပုရောဟိတ်အခွင့်၊ ထို့အတူ ယဇ်ပုရောဟိတ်အခွင့် ဆုကျေးဇူးဖြင့် ချီးမြှင့်ခံရစေကြောင်း၊

၉၆ ငါ့ကျွန်ဟီရမ်သည် သူ့အား ငါပြတော်မူမည့် အရာများအကြောင်း သက်သေခံနိုင်စေကြောင်း၊ သူ၏အမည်သည် လူမျိုးအစဉ်အဆက်၊ ကာလအစဉ်အဆက် အမြဲ ဂုဏ်အသရေရှိသော အောက်မေ့ခြင်း၌ရှိနိုင်စေကြောင်းပေတည်း။

၉၇ ငါ့ကျွန်ဝီလျံလောကိုလည်း ကောင်းချီးမင်္ဂလာများ သူတောင်း၍ရရှိနိုင်ရာ သော့များကို ရရှိစေလော့။ သူ့ကို ငါ့ရှေ့၌နှိမ့်ချစေလော့၊ ထို့အတူ အပြစ်ရောက်ခြင်းမရှိဘဲနေစေလော့၊ သူသည် ခပ်သိမ်းသောအရာတို့၏ အမှန်တရားကို သူ့အား ထင်ရှားစွာပြမည့်၊ ထို့အတူ သူပြောရမည့် အချိန်၌သူ့အားပေးမည့် ငါ၏ဝိညာဉ်တော်ထံမှ၊ နှစ်သိမ့်ရှင်ထံမှပင် ရရှိလိမ့်မည်။

၉၈ ဤနိမိတ်လက္ခဏာများသည် သူ့၌ ဖြစ်လိမ့်မည်—သူသည် ဖျားနာသောသူတို့ကို အနာငြိမ်းစေလိမ့်မည်၊ နတ်ဆိုးတို့ကို နှင်ထုတ်လိမ့်မည်၊ သူ့အားသေစေတတ်သော အဆိပ်ကို စီရင်သည့် သူတို့ထံမှလည်း ကယ်လွှတ်ခံရလိမ့်မည်။

၉၉ သူသည် အဆိပ်ရှိသောမြွေများ သူ့ဖနောင့်ကို မကိုက်နိုင်ရာလမ်းများ၌ ပို့ဆောင်ခံရလိမ့်မည်၊ လင်းယုန်၏ အတောင်များပေါ်မှာကဲ့သို့ သူ့အတွေး၏ စိတ်ကူးအကြံအစည်များဖြင့်တက်လိမ့်မည်။

၁၀၀ ငါအလိုတော်ရှိလျှင်၊ သူသည် သေသူတို့ကို ထမြောက်စေရမည်၊ သူ့အသံကို မဆီးတားစေနှင့်။

၁၀၁ ထို့ကြောင့်၊ ငါ့ကျွန်ဝီလျံကို ဝမ်းမြောက်ခြင်းနှင့် ရွှင်လန်းဝမ်းမြောက်ခြင်းတို့ဖြင့်၊ ထို့အတူ ပလ္လင်ပေါ်၌ ကာလအစဉ်အဆက်အမြဲထိုင်သူထံသို့ ဟောရှဏ္ဏဖြင့် ကျယ်ကျယ် တောင်းလျှောက် စေလော့ဟု သင်တို့၏ ဘုရားသခင်ကိုယ်တော်ရှင် မိန့်တော်မူ၏။

၁၀၂ ရှုလော့၊ သင်တို့ကို ငါဆိုသည်ကား၊ ငါ့ကျွန်ဝီလျံ၊ ထို့အတူ ငါ့ကျွန်ဟီရမ်တို့ အတွက် ဘဏ္ဍာတိုက်ထဲ၌ တာဝန်တစ်ရပ်ရှိ၏၊ သူတို့အတွက်သာဖြစ်၏။ ငါ့ကျွန်ဂျိုးဇက်ကို အိမ်၌နေစေလော့၊ အကြောင်းမူကား၊ သူ့ကို လိုအပ်၏။ ကျန်ကြွင်းသောအရာတို့ကို ငါသည် သင့်အား နောင်ကာလ၌ ပြမည်။ ထိုကဲ့သို့ပင်တည်း။ အာမင်။

၁၀၃ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါ့ကျွန်ဆစ်ဒနီသည် ငါ့ကို အစေခံ၍၊ ငါ့ကျွန်ဂျိုးဇက်အဖို့ တိုင်ပင်ဖက်ဖြစ်လျှင်၊ သူ့အား ထ၍၊ တက်လာပြီး၊ သူ၏ အမှုတော်ဆောင် တာဝန် အမှုအရာကို ဆောင်ရွက်စေလော့၊ ထို့အတူ ငါ့ရှေ့၌ သူ့ကိုယ်သူနှိမ့်ချစေလော့။

၁၀၄ သူသည် ငါ့အား နှစ်သက်ဖွယ်သောပူဇော်သက္ကာ၊ ထို့အတူ အသိအမှတ်ပြုခြင်းများကို ပူဇော်၍၊ ငါ၏လူမျိုးတို့နှင့်အတူ ဆက်၍ရှိလျှင်၊ ရှုလော့၊ ငါ၊ သင်တို့၏ ဘုရားသခင် ကိုယ်တော်ရှင်သည်၊ သူ့ကို အနာငြိမ်းစေမည်ဖြစ်၍၊ သူသည် အနာငြိမ်းစေရမည်။ ထို့အတူ သူသည် တောင်များပေါ်၌ တစ်ဖန်ကြွေးကြော်၍၊ ငါ့မျက်နှာရှေ့၌ စကားပြောသူတစ်ဦး ဖြစ်လိမ့်မည်။

၁၀၅ သူ့အား ငါ့ကျွန်ဂျိုးဇက်နေထိုင်ရာ အနီးအနားပတ်ဝန်းကျင်၌ လာ၍ သူ၏မိသားစုကို နေရာချစေလော့။

၁၀၆ သူ၏ခပ်သိမ်းသောခရီးသွားခြင်းများ၌ တံပိုးသံကဲ့သို့ ကြွေးကြော်စေလော့၊ ထို့အတူ မြေကြီးပေါ်၌ နေထိုင်သူတို့အား ကျရောက်လာမည့်အမျက်မှ ထွက်ပြေးကြစေရန် သတိပေးစေလော့။

၁၀၇ သူ့အား ငါ့ကျွန်ဂျိုးဇက်ကို ကူညီစေလော့၊ ထို့အတူ ငါ့ကျွန်ဝီလျံလောကိုလည်း ငါ့ကျွန်ဂျိုးဇက်ကို မြေကြီးပေါ်ရှိမင်းတို့အား လေးနက်သောကြေညာခြင်းကို ပြုရာ၌၊ သင်တို့ကို ယခင်ကငါဆိုလေသည့် အတိုင်းပင် ကူညီစေလော့။

၁၀၈ ငါ့ကျွန်ဆစ်ဒနီသည် ငါ၏အလိုတော်ကိုလုပ်ဆောင်လျှင်၊ သူ၏မိသားစုကို အရှေ့ပိုင်းပြည်များသို့ မရွှေ့စေနှင့်၊ သို့ရာတွင် ငါမိန့်တော်မူလေသကဲ့သို့ပင် သူ့အား သူတို့၏နေရပ်ကို ပြောင်းစေလော့။

၁၀၉ ရှုလော့၊ သူသည် သင်တို့အဖို့ ငါစီရင်ထားလေသည့်မြို့၊ အကယ်စင်စစ်၊ နော်ဗူးမြို့မှဝေးရာ၌ ဘေးလွတ်ခြင်းနှင့် ခိုလှုံရာကို ရှာရန်အားထုတ်ရမည်မှာ ငါ၏အလိုတော်မဟုတ်။

၁၁၀ သင်တို့ကို ငါအမှန်ဆိုသည်ကား၊ ယခုမှာပင်၊ သူသည် ငါ၏အသံကို စေ့စေ့နားထောင်မည်ဆိုလျှင်၊ ကောင်းသောအကျိုးကို ခံရလိမ့်မည်။ အာမင်။

၁၁၁ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါ့ကျွန်အာမုတ်ဒေဝီအား တည်းခိုစားသောက်ရာအိမ်၊ နော်ဗူးအိမ်ကိုပင် တည်ဆောက်ရန် ငါခန့်အပ်ထားလေသောသူတို့၏ လက်ထဲသို့ မတည်ငွေစုကို ပေးစေလော့။

၁၁၂ သူသည် အစုတစ်စုရှိလိုလျှင် ဤအမှုကို ပြုစေလော့။ ထို့အတူ သူ့အား ငါ့ကျွန်ဂျိုးဇက်၏ အကြံကို စေ့စေ့နားထောင်စေလော့၊ ထို့အတူ သူ့အား လူတို့၏ စိတ်ချယုံကြည်ခြင်းကို ရရှိနိုင်စေခြင်းငှာ သူ့လက်ဖြင့် အလုပ်လုပ်စေလော့။

၁၁၃ သူသည် ခပ်သိမ်းသော အရာတို့၌၊ သူ၏ ဂရုစိုက်ခြင်းသို့ ယုံကြည်လွှဲအပ်ထားသည့်၊ အထူးသဖြင့်၊ အနည်းငယ်သောအရာတို့၌ပင် သစ္စာရှိကြောင်း၊ သူ့ကိုယ်သူ သက်သေပြနိုင်လျှင်၊ သူ့ကို များစွာသောအရာတို့အပေါ် အုပ်စိုးသူဖြစ်စေမည်။

၁၁၄ ထို့ကြောင့်၊ သူ့အား ချီးမြှောက်ခံရနိုင်စေခြင်းငှာ သူ့ကိုယ်သူ နှိမ့်ချစေလော့။ ထိုကဲ့သို့ပင်တည်း။ အာမင်။

၁၁၅ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ ငါ့ကျွန်ရောဘတ်ဒီဖော်စတာသည် ငါ၏ အသံကို နာခံမည်ဆိုလျှင်၊ သူ့အား ငါ့ကျွန်ဂျိုးဇက်အတွက် အိမ်တစ်အိမ်ကို၊ သူနှင့် ပြုထားလေသည့် စာချုပ်အတိုင်း၊ တည်ဆောက်စေလော့၊ သူ့အဖို့ တံခါးသည် အချိန်နှင့်အမျှ ဖွင့်လိမ့်မည်။

၁၁၆ သူ့အား သူ၏ခပ်သိမ်းသော မိုက်မဲခြင်းအတွက် နောင်တရစေလော့၊ ထို့အတူ သူ့ကိုယ်သူ မေတ္တာနှင့် ဝတ်ဆင်စေလော့။ ထို့အတူ မကောင်းမှုကိုပြုရန် ရပ်တန့်စေလော့၊ ထို့အတူ သူ၏ကြမ်းတမ်းသော စကားမှန်သမျှတို့ကို ပယ်ရှားစေလော့။

၁၁၇ မတည်ငွေစုကိုလည်း သူကိုယ်တိုင်အတွက်၊ ထို့အတူ သူ့နောက်မှ သူ၏မျိုးဆက်အတွက် နော်ဗူးအိမ်အဖွဲ့၏လက်ထဲသို့ လူမျိုးအစဉ်အဆက် ပေးစေလော့။

၁၁၈ ငါ့ကျွန်များဖြစ်သည့် ဂျိုးဇက်၏၊ ထို့အတူ ဟီရမ်၊ ထို့အတူ ဝီလျံလော၊ ထို့အတူ ဇိအုန် အုတ်မြစ်ကို ချရန် ငါခေါ်သွန်းလေသည့် အခွင့်အာဏာရှိသူတို့၏ အကြံကို စေ့စေ့နားထောင်လော့။ သူသည် ကောင်းသောအကျိုးကို ကာလအစဉ်အဆက်အမြဲခံရလိမ့်မည်။ ထိုကဲ့သို့ပင်တည်း။ အာမင်။

၁၁၉ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ မော်မုန်ကျမ်း၌၊ ထို့အတူ သင်တို့အား ငါပေးလေသည့် ဗျာဒိတ်တော်များ၌ ယုံကြည်သူမဟုတ်လျှင်၊ အဘယ်သူကိုမျှ မတည်ငွေစုကို နော်ဗူးအိမ်အဖွဲ့သို့ မပေးစေနှင့်ဟု သင်တို့၏ဘုရားသခင်ကိုယ်တော်ရှင်မိန့်တော်မူ၏။

၁၂၀ ဤအရာထက် ပို၍ သို့မဟုတ် လျော့၍ရှိသောအရာသည် မကောင်းမှုထံမှလာ၏၊ ကျိန်ခြင်းအမင်္ဂလာနှင့် ကြုံတွေ့ရစေလိမ့်မည်၊ ကောင်းချီးမင်္ဂလာများနှင့်မဟုတ်ဟု သင်တို့၏ ဘုရားသခင်ကိုယ်တော်ရှင် မိန့်တော်မူ၏။ ထိုကဲ့သို့ပင်တည်း။ အာမင်။

၁၂၁ ထိုမှတစ်ဖန်၊ သင်တို့ကို ငါအမှန်ဆိုသည်ကား၊ နော်ဗူးအိမ်အဖွဲ့အား၊ နော်ဗူးအိမ် တည်ဆောက်ခြင်း၌ သူတို့လုပ်ဆောင်သည့် ခပ်သိမ်းသော အလုပ်များအတွက် မျှတသော အဖိုးအခဆုကို ရရှိစေလော့။ သူတို့၏ အဖိုးအခကိုလည်း သူတို့၌ သဘောတူသည့် အတိုင်း၊ အဖိုးအခနှင့် စပ်ဆိုင်သည့် တန်ဖိုးအတိုင်းရှိစေလော့။

၁၂၂ သူတို့၏ အထောက်အမအတွက်၊ လိုအပ်လျှင်၊ မတည်ငွေစုကို ပေးသူတိုင်းအား သူတို့၏ အဖိုးအခများထဲမှ မိမိဝေစုကို ခံယူစေလော့ဟု ကိုယ်တော်ရှင်မိန့်တော်မူ၏။ သို့မဟုတ်လျှင်၊ သူတို့၏ အလုပ်များကို သူတို့အဖို့ ထိုအိမ်၏မတည်ငွေစုအဖြစ် မှတ်ယူရမည်။ ထိုကဲ့သို့ပင်တည်း။ အာမင်။

၁၂၃ သင်တို့ကို ငါအမှန်ဆိုသည်ကား၊ ငါသည် သင်တို့အား ငါ၏ ယဇ်ပုရောဟိတ်အခွင့်ပိုင်သည့် အရာရှိများကို ယခုဖော်ပြ၏၊ ထိုအခွင့်၊ အကယ်စင်စစ်၊ ငါ၏တစ်ပါးတည်းသောသားတော်၏ အသင်းအတိုင်းရှိရာ မေလခိဇေဒက်၏ အသင်းအတိုင်းရှိသည့် ယဇ်ပုရောဟိတ်အခွင့်၏ သော့များကို၊ သင်တို့ကိုင်ဆောင်နိုင်စေခြင်းငှာပေတည်း။

၁၂၄ ပထမတွင်၊ ငါသည် သင်တို့အား ဟီရမ်စမစ်ကို သင်တို့အဖို့ မျိုးနွယ်စုအဘအဖြစ်၊ ငါ့အသင်းတော်၏ တံဆိပ်ခတ်ခြင်းကောင်းချီးမင်္ဂလာများကို ကိုင်ဆောင်ရန်၊ ရွေးနုတ်ခြင်း နေ့ရက်တိုင်အောင် သင်တို့ကို တံဆိပ်ခတ်တော်မူသော ကတိတော်နှင့်ယှဉ်သော သန့်ရှင်းသော ဝိညာဉ်တော်ကိုပင် ပေး၏။ သင်တို့အပေါ် ကျရောက်လာနိုင်သည့် စုံစမ်းခြင်း အချိန်နာရီ ရှိသော်ငြားလည်း သင်တို့မကျရှုံးနိုင်ကြစေခြင်းငှာပေတည်း။

၁၂၅ ငါသည် သင်တို့အား ငါ့ကျွန်ဂျိုးဇက်ကို ငါ၏အသင်းတော်တစ်ခုလုံးအပေါ် ဦးစီးအသင်းလူကြီးအဖြစ်၊ ဘာသာပြန်သူတစ်ဦး၊ ဗျာဒိတ်ဟောသူတစ်ဦး၊ မြင်သောသူတစ်ဦးနှင့် ပရောဖက်အဖြစ်ပေး၏။

၁၂၆ ငါသည် သူ့အား ငါ့ကျွန်ဆစ်ဒနီရစ်ဂဒွန်နှင့် ငါ့ကျွန်ဝီလျံလောကို တိုင်ပင်ဖက်များအဖြစ်ပေး၏၊ အသင်းတော်တစ်ခုလုံးအတွက် ဗျာဒိတ်တော်များကို လက်ခံရရှိရန်၊ အဖွဲ့တစ်ခုနှင့် ပထမဥက္ကဋ္ဌအဖွဲ့ကို ဤသူတို့ဖွဲ့စည်းတည်ထောင်နိုင်စေခြင်းငှာ ပေတည်း။

၁၂၇ ငါသည် သင်တို့အား ငါ့ကျွန်ဘရင်ဂ်ဟမ်ရန်းဂ်ကို ခရီးသွားအတိုင်ပင်ခံတစ်ဆယ့်နှစ်ပါးအပေါ် ဥက္ကဋ္ဌတစ်ဦးအဖြစ် ပေး၏။

၁၂၈ ထိုတစ်ဆယ့်နှစ်ပါးသည် မြေကြီးလေးမျက်နှာပေါ်၌ ငါ့နိုင်ငံတော်၏ အခွင့်အာဏာကို ဖွင့်ရန်သော့များကို ကိုင်ဆောင်ကြ၏၊ ထို့နောက်တွင် ငါ၏နှုတ်ကပတ်တော်ကို လူသတ္တဝါတိုင်းထံသို့ စေလွှတ်ရန်ဖြစ်၏။

၁၂၉ သူတို့သည်ကား ဟက်ဘာစီကင်းဘောလ်၊ ပါလီပီပရတ်၊ အော်ဆန်ပရတ်၊ အော်ဆန်ဟိုက်၊ ဝီလျံစမစ်၊ ဂျွန်တေလာ၊ ဂျွန်အီးပေ့ဂ်ျ၊ ဝီလဖို့ဝုဒရပ်ဖ်၊ ဝီလာ့ဒ်ရစ်ချတ်၊ ဂျော့အေစမစ်တို့ဖြစ်၏။

၁၃၀ ဒေးဗစ်ပေတန်ကို ငါ့ထံသို့ ခေါ်ဆောင်တော်မူလေပြီ။ ရှုလော့၊ သူ၏ ယဇ်ပုရောဟိတ်အခွင့်ကို အဘယ်သူမျှ သူ့ထံမှမယူ၊ သို့ရာတွင်၊ သင်တို့ကို ငါအမှန်ဆိုသည်ကား၊ တခြားသူတစ်ဦးကို ထိုတူသော အမှုတော်ဆောင်တာဝန်သို့ ခန့်အပ်ထားနိုင်ပေ၏။

၁၃၁ ထိုမှတစ်ဖန်၊ သင်တို့ကို ငါဆိုသည်ကား၊ ငါသည် သင်တို့အား ဇိအုန်၏ ထောင့်ကျောက် အတွက် အတိုင်ပင်ခံမင်းအဖွဲ့တစ်ခုကို ပေး၏—

၁၃၂ အမည်အားဖြင့်၊ ဆင်မြူရယ်လ်ဘန့်၊ ဟင်နရီဂျီရှာဝုဒ်၊ ဂျော့ဒဗယျူဟဲရစ်၊ ချားလ်စ်စီရစ်ခ်ျ၊ သောမတ်စ်ဂရိုဗာ၊ နီဝယ်လ်နိုက်၊ ဒေးဗစ်ဒေါ့၊ ဒုန်ဘာဝီလဆင်—ဆက်မိုးဝါဘာဆန်ကို ငါ့ထံသို့ခေါ်ဆောင်တော်မူလေပြီ၊ အဘယ်သူမျှ သူ၏ယဇ်ပုရောဟိတ်အခွင့်ကို မယူ၊ သို့ရာတွင် တခြားသောသူကို ထိုတူသောယဇ်ပုရောဟိတ်အခွင့်သို့ သူ၏နေရာ၌ ခန့်အပ်ထားနိုင်ပေ၏။ ထို့အတူ သင်တို့ကို ငါအမှန်ဆိုသည်ကား၊ ငါ့ကျွန် အာရုန်ဂျွန်ဆင်ကို ဤအမှုတော်ဆောင်တာဝန်သို့ သူ၏နေရာ၌ ခန့်ထားခံစေလော့—ဒေးဗစ်ဖူးမာ၊ အဲလ်ဖိယပ်စ်ကတ်တလာ၊ ဝီလျံဟန့်တင်တမ်တို့ဖြစ်၏။

၁၃၃ ထိုမှတစ်ဖန်၊ ငါသည် သင်တို့အား ဒွန်စီစမစ်ကို ယဇ်ပုရောဟိတ်မင်းများအဖွဲ့ အပေါ် ဥက္ကဋ္ဌတစ်ဦး အဖြစ် ပေး၏။

၁၃၄ ထိုဘိသိက်မင်္ဂလာကို အရပ်ရပ်သို့ကွဲပြားပြန့်ကျဲသည့် ခြားနားသောပန္နက်များ၌ အမြဲဥက္ကဋ္ဌများ သို့မဟုတ် ကျွန်များအဖြစ် ခန့်အပ်ထားခံရကြမည့်သူတို့ကို အရည်အချင်း ပြည့်မီစေခြင်း ရည်ရွယ်ချက်အတွက်တည်ထောင်ထား၏။

၁၃၅ သူတို့သည်လည်း ရွေးချယ်ကြလျှင်၊ ခရီးသွားနိုင်ကြ၏၊ သို့ရာတွင် အမြဲဥက္ကဋ္ဌများအဖြစ်သာ ခန့်ထားခံကြရ၏။ ဤအရာမှာ သူတို့၏ အမှုတော်ဆောင်တာဝန် အမှုအရာဖြစ်၏ဟု သင်တို့၏ ဘုရားသခင်ကိုယ်တော်ရှင်မိန့်တော်မူ၏။

၁၃၆ ငါသည် သူ့အား အမ်ဆာလိုင်မန်နှင့် နိုဝါပက်ကာ့ဒ်တို့ကို တိုင်ပင်ဖက်များအဖြစ်ပေး၏၊ ငါ့အသင်းတော်၏ ယဇ်ပုရောဟိတ်မင်းများအဖွဲ့အပေါ် သူတို့ဦးစီးနိုင်ကြစေခြင်းငှာပေတည်းဟု ကိုယ်တော်ရှင်မိန့်တော်မူ၏။

၁၃၇ ထိုမှတစ်ဖန်၊ သင်တို့ကို ငါဆိုသည်ကား၊ ငါသည် သင်တို့အား အသင်းလူကြီးအဖွဲ့အပေါ် ဦးစီးရန် ဖြစ်သော ယဇ်ပုရောဟိတ်အခွင့်ကို ကိုင်ဆောင်ထားသူ ဂျွန်အေဟစ်၊ ဆင်မြူရယ်လ်ဝီလျံနှင့် ဂျာဆီဘေကာတို့ကို ပေး၏၊ ထိုအဖွဲ့ကို အမြဲအမှုတော်ဆောင်များအတွက် တည်ထောင်ထား၏။ သို့သော်လည်း၊ သူတို့သည် ငါ့အသင်းတော်အဖို့ အမြဲအမှုတော်ဆောင်များအဖြစ် ခန့်ထားခံကြရသော်လည်း ခရီးသွားနိုင်ကြပေ၏ဟု ကိုယ်တော်ရှင်မိန့်တော်မူ၏။

၁၃၈ ထိုမှတစ်ဖန်၊ ငါသည် သင်တို့အား ဂျိုးဇက်ရန်း၊ ဂျိုဆိရဘတ်တာဖီးလ်ဒ်၊ ဒန်နီယယ်လ်မိုင်းလ်စ်၊ ဟင်နရီဟာရီမန်၊ ဇယ်ရာပူလ်ဆီဖာ၊ လေဝိဟန်ကော့၊ ဂျိမ်းဖော်စတာတို့ကို ခုနစ်ကျိပ်အဖွဲ့အပေါ် ဦးစီးရန် ပေး၏။

၁၃၉ ငါ၏ခရီးသွားအတိုင်ပင်ခံမင်းအဖွဲ့၊ ငါ၏တမန်တော်များက ခရီးသွားအသင်းလူကြီးတို့အား ငါ့မျက်နှာရှေ့၌ လမ်းကိုပြင်ဆင်ရန် အဘယ်အရပ်သို့လွှတ်သည်ဖြစ်စေ လောကတစ်ခုလုံး၌ ငါ၏နာမတော်အကြောင်းသက်သေခံရန် သူတို့အတွက် ထိုအဖွဲ့ကို တည်ထောင်ထား၏။

၁၄၀ ဤအဖွဲ့နှင့် အသင်းလူကြီးအဖွဲ့ကြား၌ ခြားနားချက်သည်ကား တစ်ဖွဲ့မှာ အစဉ်မပြတ်ခရီးသွားရန်ဖြစ်ပြီး၊ အခြားတစ်ဖွဲ့မှာ အသင်းတော်အပေါ် အချိန်နှင့်အမျှ ဦးစီးရန်ဖြစ်၏။ တစ်ဖွဲ့၌ အချိန်နှင့်အမျှ ဦးစီးခြင်းတာဝန်ရှိပြီး၊ အခြားတစ်ဖွဲ့မှာဦးစီးခြင်းတာဝန်မရှိဟု သင်တို့၏ ဘုရားသခင်ကိုယ်တော်ရှင်မိန့်တော်မူ၏။

၁၄၁ ထိုမှတစ်ဖန်၊ သင်တို့ကို ငါဆိုသည်ကား၊ ငါသည် သင်တို့အား ဗင်ဆင်နိုက်၊ ဆင်မြူရယ်လ်အိပ်ခ်ျ စမစ်၊ ထို့အတူ သူလက်ခံလိုလျှင် ရှက်ဒရက်ရောင်ဒီကိုလည်း၊ သင်းအုပ်နှင့်အတိုင်ပင်ခံအဖွဲ့ပေါ် ဦးစီးရန် ပေး၏။ ဖော်ပြပါသင်းအုပ်နှင့်အတိုင်ပင်ခံအဖွဲ့အကြောင်း အသိပညာကို သင်တို့အား ဩဝါဒနှင့်ပဋိညာဉ်များကျမ်း၌ ပေးထား၏။

၁၄၂ ထိုမှတစ်ဖန်၊ သင်တို့ကို ငါဆိုသည်ကား၊ ဆင်မြူရယ်လ်ရိုလ်ဖီနှင့် သူ၏တိုင်ပင်ဖက်များကို ယဇ်ပုရောဟိတ်များ၊ ထို့အတူ ဆရာတို့၏ ဥက္ကဋ္ဌနှင့် သူ၏တိုင်ပင်ဖက်များ၊ ထို့အတူ သင်းထောက်တို့၏ ဥက္ကဋ္ဌနှင့် သူ၏တိုင်ပင်ဖက်များ၊ ထို့အတူ ပန္နက်ဥက္ကဋ္ဌနှင့် သူ၏ တိုင်ပင်ဖက်များ အဖြစ် ပေး၏။

၁၄၃ အထက်ကအမှုအရာများနှင့် ၎င်းတို့ရှိသော့များကို သင်တို့အား ငါပေးလေပြီ၊ အကူအညီအတွက်နှင့် အစိုးရခြင်းအတွက်၊ အမှုတော်ဆောင်ခြင်းအလုပ်နှင့် ငါ၏သန့်ရှင်းသူတို့အား စုံလင်စေခြင်းအတွက် ဖြစ်၏။

၁၄၄ သင်တို့သည် ခပ်သိမ်းသောဤအမှုအရာတို့ကို ဖြည့်၍၊ ငါဖော်ပြလေသည့်အမည်များကို အတည်ပြုရမည်၊ သို့မဟုတ်လျှင် ၎င်းတို့ကို ငါ၏အထွေထွေညီလာခံ၌ အတည်မပြုရမည့်အကြောင်း ပညတ်တော်တစ်ခုကို သင်တို့အား ငါပေး၏။

၁၄၅ သင်တို့သည် ငါ၏နာမတော်အဖို့ ငါ၏အိမ်တော်ကို တည်ဆောက်သောအခါ၊ ထိုအထဲ၌ ခပ်သိမ်းသောဤ အမှုအရာတို့ အတွက် အခန်းများကို ပြင်ဆင်ရစေကြောင်းလည်းဖြစ်၏။ ထိုကဲ့သို့ပင်တည်း။ အာမင်။