« មេរៀនទី ៧ ឯកសាររៀបចំសម្រាប់ថ្នាក់ ៖ និស្ស័យដ៏អស់កល្បជានិច្ច និងគោលបំណងនៃភេទ » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )
« មេរៀនទី ៧ ឯកសាររៀបចំសម្រាប់ថ្នាក់ » ឯកសារគ្រូបង្រៀន គ្រួសារដ៏អស់កល្បជានិច្ច
មេរៀនទី ៧ ឯកសាររៀបចំសម្រាប់ថ្នាក់
និស្ស័យដ៏អស់កល្បជានិច្ច និងគោលបំណងនៃភេទ
ភេទរបស់យើងដែលបានប្រើនៅក្នុងនេះ និងមេរៀនខាងក្រោមនេះគឺមានន័យទៅលើភេទជីវសាស្ត្រនៅពេលកើតមក ( លើកលែងតែមានការកត់សម្គាល់ផ្សេងទៀត ) អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់បានបង្រៀនថា « នៅក្នុងរង្វាស់ដ៏ធំ វាឲ្យនិយមន័យថាយើងជានរណា ហេតុអ្វីយើងនៅលើផែនដីនេះ ហើយតើយើងនឹងត្រូវធ្វើអ្វី ហើយប្រែក្លាយជាអ្វី » ( « Marriage Is Essential to His Eternal Plan » Ensign ខែ មិថុនា ឆ្នាំ ២០០៦ ទំព័រ ៨៣ ) ។ នៅពេលអ្នកសិក្សាឯកសារសម្រាប់មេរៀននេះ សូមពិចារណាពីរបៀបដែលផែនការនៃសុភមង្គលរបស់ ព្រះវរបិតាសួគ៌អាចជួយអ្នកឲ្យយល់កាន់តែច្បាស់អំពីសារៈសំខាន់នៃអត្តសញ្ញាណ និងគោលបំណងដ៏ទេវភាពរបស់អ្នកក្នុងនាមជាបុត្រា ឬបុត្រីរបស់ព្រះវរបិតាមាតាសួគ៌ា ។
កំណត់ចំណាំ ៖ ភេទគឺជាបញ្ហាដ៏រសើបសម្រាប់មនុស្សជាច្រើន ។ ឯកសារទាំងនេះគឺមានគោលបំណងដើម្បីជួយអ្នកឲ្យយល់ពីគោលលទ្ធិរបស់ព្រះវរបិតាសួគ៌ទាក់ទងនឹងភេទ និងស្វែងរករបៀបដែលវាអនុវត្តទៅនឹងកាលៈទេសៈផ្សេងៗនៅក្នុងពិភពលោកយើងសព្វថ្ងៃនេះ ។ សូមស្វែងរកជំនួយពីព្រះវិញ្ញាណដើម្បីយល់ពីសារលិខិតដែលព្រះមានព្រះរាជបំណងសម្រាប់អ្នក កាលដែលអ្នកសិក្សា ។
ផ្នែកទី ១
តើការយល់ដឹងរបស់ខ្ញុំអំពីភេទអាចត្រូវបានពង្រឹងដោយរបៀបណា កាលដែលខ្ញុំយល់កាន់តែច្បាស់អំពីផែនការរបស់ព្រះវរបិតាសួគ៌នោះ ?
សេចក្តីប្រកាសអំពីក្រុមគ្រួសារបានចែង ៖ « មនុស្សទាំងអស់—ទាំងប្រុសទាំងស្រី—ត្រូវបានបង្កើតឡើងតាមរូបភាពនៃព្រះ ។ មនុស្សម្នាក់ៗសុទ្ធតែជាបុត្រា និងបុត្រីខាងវិញ្ញាណរបស់ព្រះមាតាបិតាសួគ៌ ដូច្នេះហើយមនុស្សម្នាក់ៗមានចរិត និងគោលដៅនៃព្រះ ។ ភេទប្រុសស្រីគឺជាលក្ខណៈពិសេសនៃអត្តសញ្ញាណ និងគោលបំណងរបស់បុគ្គលម្នាក់ៗនៅជីវិតមុនផែនដី ជីវិតរមែងស្លាប់ និងនៅអស់កល្បជានិច្ច » ( « ក្រុមគ្រួសារ ៖ ការប្រកាសដល់ពិភពលោក » នៅលើគេហទំព័រ ChurchofJesusChrist.org ) ។
ពាក្យថា ភេទ អាចមានអត្ថន័យផ្សេងៗចំពោះមនុស្សខុសៗគ្នា ។ ដូចដែលបានពន្យល់នៅក្នុងក្បួនខ្នាតសាសនាចក្រ « គោលបំណងនៃអត្ថន័យពាក្យថា ភេទ នៅក្នុងសេចក្តីប្រកាសអំពីក្រុមគ្រួសារគឺ ភេទជីវសាស្រ្តនៅពេលកើតមក » ( ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៣៨.៦.២៣ ) ។
អែលឌើរ រីឆាដ ជី ស្កត នៃកូរ៉ុមនៃពួកសាវកដប់ពីរនាក់បានមានប្រសាសន៍ពីការបង្កបង្កើត របស់យើង ថា ៖
[ ការបង្កបង្កើតនៃបុរស និងស្រ្តី ] នេះគឺត្រូវបានធ្វើឡើងខាងវិញ្ញាណនៅក្នុងជីវិតមុនឆាកជីវិតនេះរបស់អ្នក នៅពេលអ្នករស់នៅក្នុងទីវត្តមានរបស់ព្រះវរបិតាដែលគង់នៅស្ថានសួគ៌របស់អ្នក ។ ភេទរបស់អ្នកមានតាំងពីមុនអ្នកមកកាន់ផែនដីនេះម្ល៉េះ ។ ( « The Joy of Living the Great Plan of Happiness » Ensign ខែ វិច្ឆិកា ឆ្នាំ ១៩៩៦ ទំព័រ ៧៣ )
ប្រធាន ដាល្លិន អេក អូក នៃគណៈប្រធានទីមួយបានបង្រៀនបន្ថែមទៀតថា « ការបង្កបង្កើតពីរ [ មនុស្សប្រុស និងមនុស្សស្រី ] គឺចាំបាច់ចំពោះផែនការរបស់ព្រះអង្គសង្រ្គោះ » ( នៅក្នុង « General Conference Leadership Meetings Begin » ថ្ងៃទី ២ ខែ តុលា ឆ្នាំ ២០១៩ នៅលើគេហទំព័រ newsroom.ChurchofJesusChrist.org ) ។
ការយល់ដឹងអំពីភាពជាឪពុកម្តាយរបស់យើងនៅស្ថានសួគ៌អាចជួយយើងឲ្យយល់កាន់តែច្បាស់អំពីផែនការរបស់ព្រះសម្រាប់យើង និងជួយយើងឲ្យមើលឃើញកាន់តែច្បាស់អំពីសារៈសំខាន់នៃភេទរបស់យើងនៅក្នុងផែនការនោះ ។
ការសិក្សានៅក្នុងការរៀបចំសម្រាប់ថ្នាក់រៀន
សូមអាន លោកុប្បត្តិ ១:២៦–២៧ ហើយគិតអំពីអត្ថន័យនៃការបង្កបង្កើតតាមរូបភាពរបស់ព្រះវរបិតាមាតាសួគ៌ារបស់យើង ។
សូមពិចារណាពីមូលហេតុដែលភេទមានសារៈសំខាន់នៅក្នុងផែនការរបស់ព្រះវរបិតាសួគ៌ ។ ទាំងនេះគឺជាសេចក្តីពិតមួយចំនួនដែលអ្នកគួរតែគិតពិចារណាអំពី ៖
អាពាហ៍ពិពាហ៍ដ៏នៅអស់កល្បជានិច្ចនៃបុរស និងស្រ្តីគឺចាំបាច់ដើម្បីប្រែក្លាយដូចជាព្រះវរបិតាមាតាសួគ៌ារបស់យើង ។ និស្ស័យនៃជីវិតដ៏នៅអស់កល្បជានិច្ច ឬភាពតម្កើងឡើងគឺជាការបន្តនៃក្រុមគ្រួសារសម្រាប់ភាពអស់កល្បជានិច្ច ។ សក្តានុពលនេះអាចទទួលបានតែ « តាមរយៈអានុភាពដ៏ច្នៃប្រឌិតដែលមាននៅក្នុងការរួមបញ្ចូលគ្នានៃបុរស និងស្រ្តីដែលបានចូលទៅក្នុងអាពាហ៍ពិពាហ៍ដ៏នៅអស់កល្បជានិច្ច » ប៉ុណ្ណោះ ( សូមមើល គោលលទ្ធិ និង សេចក្តីសញ្ញា ១៣២:១៩ ) » ( ដាល្លិន អេក អូក នៅក្នុង « General Conference Leadership Meetings Begin » ) ។
« តាមផែនការរបស់ព្រះ បុរសម្នាក់ និងស្ត្រីម្នាក់ចាំបាច់ត្រូវនាំកូនចៅមកក្នុងជីវិតរមែងស្លាប់ ហើយផ្ដល់នូវជម្រកសម្រាប់ចិញ្ចឹម និងបីបាច់ថែរក្សាកូនៗឲ្យបានល្អបំផុត » ( ដេវីឌ អេ បែដណា « Marriage Is Essential to His Eternal Plan » Ensign ខែ មិថុនា ឆ្នាំ ២០០៦ ទំព័រ ៨៣; សូមមើលផងដែរ លោកុប្បត្តិ ១:២៨ ) ។
ព្រះវរបិតាសួគ៌ប្រទានដល់បុរស និងស្ត្រីនូវសមត្ថភាពផ្សេងពីគ្នាដើម្បីបំពេញភារកិច្ចដ៏ទេវភាពទាំងនេះ និងការទទួលខុសត្រូវផ្សេងទៀតនៅក្នុងផែនការរបស់ទ្រង់ ។ បុរស និងស្ត្រីត្រូវការគ្នាទៅវិញទៅមកដើម្បីរីកចម្រើន និងឈានទៅដល់សក្តានុពលដ៏នៅអស់កល្បជានិច្ចទាំងស្រុងរបស់ពួកគេ ។ ដូចដែលអែលឌើរ បែដណា បានបង្រៀន ៖
ធម្មជាតិនៃវិញ្ញាណបុរស និងស្រ្តីគឺថា ពួកគេបំពេញឲ្យគ្នាទៅវិញទៅមក និងជួយធ្វើឲ្យគ្នាបានគ្រប់លក្ខណ៍ ដូច្នេះហើយបុរស និងស្រ្តីត្រូវតាំងចិត្តដើម្បីរីកចម្រើនជាមួយគ្នាឆ្ពោះទៅកាន់ភាពតម្កើងឡើង ។ …
សម្រាប់គោលបំណងដ៏ទេវភាព វិញ្ញាណភេទប្រុស និងភេទស្រីគឺខុសគ្នា ហើយច្បាស់លាស់ និងបំពេញឲ្យគ្នា ទៅវិញទៅមក ។
… ការរួមបញ្ចូលគ្នាដ៏ពិសេសនៃសមត្ថភាពខាងវិញ្ញាណ រូបកាយ មនសិការ និងសតិអារម្មណ៍របស់មនុស្សទាំងប្រុស និងស្រីគឺជាការចាំបាច់ដើម្បីអនុវត្តផែនការនៃសុភមង្គល ។ បើមានតែបុរស ឬស្ត្រីតែមា្នក់គឺពុំអាចបំពេញគោលបំណងនៃការបង្កបង្កើតរបស់ពួកគេបានឡើយ ។ …
… គឺដូចជាលក្ខណៈពិសេសរបស់បុរស និងស្ត្រីដែលរួមចំណែកដើម្បីបំពេញបង្គ្រប់នូវទំនាក់ទំនងអាពាហ៍ពិពាហ៍ដ៏ពេញលេញដែរ ដូច្នេះលក្ខណៈដដែលនោះគឺសំខាន់ដើម្បីចិញ្ចឹមបីបាច់ ថែទាំ និងបង្រៀនដល់កូនចៅ ។ ( « Marriage Is Essential to His Eternal Plan » ទំព័រ ៨៣–៨៤ )
អែលឌើរ ឌែល ជី រិនឡាន់ នៃកូរ៉ុមនៃពួកសាវកដប់ពីរនាក់ និងស៊ីស្ទើរ រុស្ស អិល រិនឡាន់ ក៏បានបង្រៀនដែរថា
វិញ្ញាណរបស់បុរស និងស្រ្តីត្រូវបានបង្កើតឡើងដើម្បីយោងគ្នាទៅវិញទៅមក ។ នោះហើយជាមូលហេតុដែលភេទមិនមានភាពស្រពិចស្រពិលក្នុងភាពអស់កល្បជានិច្ចឡើយ—ពីព្រោះវាផ្ដល់នូវមូលដ្ឋានសម្រាប់អំណោយទានដ៏អស្ចារ្យបំផុតដែលព្រះវរបិតាសួគ៌អាចប្រទានឲ្យ គឺជាប្រភេទជីវិតដែលដូចជាព្រះជន្មរបស់ទ្រង់ ។ ( « The Divine Purposes of Sexual Intimacy » Ensign ខែ សីហា ឆ្នាំ ២០២០ ទំព័រ ១៦ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
សូមពិចារណាពីតួនាទីនៃភេទចេញពីទស្សនវិស័យដ៏អស់កល្បជានិច្ច ។ តើផែនការនៃសេចក្តីសង្រ្គោះជួយអ្នកឲ្យយល់ថា « ភេទប្រុសស្រីគឺជាលក្ខណៈពិសេសនៃអត្តសញ្ញាណ និងគោលបំណងរបស់បុគ្គលម្នាក់ៗនៅជីវិតមុនផែនដី ជីវិតរមែងស្លាប់ និងនៅអស់កល្បជានិច្ច » ដោយរបៀបណា ? ( « ក្រុមគ្រួសារ ៖ ការប្រកាសដល់ពិភពលោក » ) ។
ផ្នែកទី ២
តើខ្ញុំអាចយល់កាន់តែច្បាស់ពីសំណួរទាក់ទងនឹងភេទដោយរបៀបណា ?
អ្នកប្រហែលជាសម្គាល់ឃើញថានៅក្នុងសម័យរបស់យើង មានគំនិតខុសៗគ្នាជាច្រើនអំពីភេទ និងអត្តសញ្ញាណ ។ អ្នកខ្លះបំបែកពាក្យ ភេទ នេះចេញពីពាក្យ ភេទជីវសាស្រ្ត ។ ពួកគេអាចនិយាយអំពី អត្តសញ្ញាណភេទ របស់ពួកគេ ដែលអាចសំដៅទៅលើអារម្មណ៍ក្នុងចិត្តរបស់មនុស្សម្នាក់អំពីភេទរបស់ពួកគេ ទោះបីជាវាខុសពីភេទជីវសាស្រ្តរបស់ពួកគេក្តី ។ ( សូមចំណាំថា ការណ៍នេះខុសពីទំនោរខាងផ្លូវភេទ ដែលទាក់ទងនឹងការប្រតិព័ទ្ធខាងផ្លូវកាយ ផ្លូវអារម្មណ៍ និងផ្លូវភេទចំពោះអ្នកដទៃ ។ ទំនោរខាងផ្លូវភេទនឹងត្រូវពិភាក្សានៅក្នុងមេរៀនបន្ទាប់ ) ។
ការយល់ដឹងរបស់មនុស្សម្នាក់អំពីភេទស្រី ឬប្រុសទទួលរងឥទ្ធិពលពីវប្បធម៌ ទំនៀមទម្លាប់សង្គម និងរបៀបចិញ្ចឹមបីបាច់ ។ ដោយសារហេតុផលនេះ និងផ្សេងៗទៀត ការសន្មតនៃភេទពេលខ្លះអាចបង្កឲ្យមានការភាន់ច្រឡំសម្រាប់មនុស្សមួយចំនួន ហើយថែមទាំងអាចបង្កគ្រោះថ្នាក់ទៀតផង ។ ឧទាហរណ៍ មនុស្សមួយចំនួនប្រហែលជាបារម្ភថាចំណាប់អារម្មណ៍ និងសមត្ថភាពរបស់ពួកគេមិនត្រូវគ្នានឹងការចង់បានរបស់វប្បធម៌ និងសង្គមមួយចំនួនឡើយដោយសារភេទជីវសាស្ត្ររបស់ពួកគេ ។ នោះមិនមែនមានន័យថា វាមានអារម្មណ៍ផ្ទុយរវាងភេទជីវសាស្រ្តរបស់ពួកគេ និងអត្តសញ្ញាណភេទរបស់ពួកគេឡើយ ។ វាជារឿងសំខាន់ដើម្បីចងចាំថា ធាតុមួយចំនួនដែលបង្កើតបានជាអត្តសញ្ញាណបុគ្គលពេញលេញរបស់យើង រួមមានទាំងអត្តសញ្ញាណដ៏ទេវភាពរបស់យើង ភេទជីវសាស្រ្ត អំណោយទាន សមត្ថភាពធម្មជាតិ បំណងប្រាថ្នា និងជម្រើសនានា ។
សូម្បីតែនៅពេលយើងយល់ពីសេចក្តីពិតដ៏នៅអស់កល្បជានិច្ចអំពីភេទក៏ដោយ ក៏ការពិតដ៏ស្មុគស្មាញនៅក្នុងជីវិតរបស់យើងអាចបណ្តាលឲ្យមានសំណួរ ឬកាលៈទេសៈដ៏លំបាកជាច្រើនដែរ ។ សូមពិចារណាពីចំណុចខាងក្រោមនេះ ៖
-
ដោយសារហេតុផលដែលយល់មិនច្បាស់មួយចំនួន នោះបុគ្គលមួយចំនួននៅក្នុងចំណុចខ្លះនៃជីវិតរបស់ពួកគេ « ដកពិសោធន៍នូវអារម្មណ៍នៃភាពមិនស្របគ្នារវាងភេទជីវសាស្ត្ររបស់ពួកគេ និងអត្តសញ្ញាណភេទរបស់ពួកគេ ។ ជាលទ្ធផល ពួកគេអាចនឹងកំណត់ថាជាបុគ្គលប្ដូរភេទ ។ សាសនាចក្រពុំប្រកាន់ជំហរមួយលើបុព្វហេតុនៃមនុស្សដែលកំណត់អត្តសញ្ញាណខ្លួនពួកគេជាបុគ្គលប្ដូរភេទនោះទេ » ( ក្បួនខ្នាតទូទៅ ៣៨.៦.២៣ ) ។
-
បុគ្គលមួយចំនួនអាចមានអារម្មណ៍មិនស្រណុកចិត្ត ឬខកចិត្តជាមួយនឹងការចង់បានរបស់វប្បធម៌ និងសង្គមដែលទាក់ទងនឹងភេទជីវសាស្ត្ររបស់ពួកគេ ។
-
ដូចដែលមានចែងនៅក្នុង ក្បួនខ្នាតទូទៅ « នៅក្នុងកាលៈទេសៈដ៏សែនកម្រមួយ ទារកកើតមកដោយមិនមានភេទជាប្រុស ឬស្រីច្បាស់ » ( ៣៨.៧.៧ ) ។ ការណ៍នេះជាទូទៅហៅថា អន្តរភេទ ។ កាលៈទេសៈនេះ និងរបៀបដែលឪពុកម្តាយ ឬអ្នកប្រឹក្សាផ្នែកវេជ្ជសាស្រ្តដោះស្រាយបញ្ហានេះអាចប៉ះពាល់ ឬមិនប៉ះពាល់ដល់អត្តសញ្ញាណភេទរបស់បុគ្គលនោះ ។
ដូចជាការបោះពុម្ពផ្សាយមួយរបស់សាសនាចក្រលើប្រធានបទបុគ្គលប្តូរភេទបានលើកឡើងថា បុគ្គលណាដែលកំណត់ថាជាបុគ្គលប្តូរភេទ « ប្រឈមមុខនឹងឧបសគ្គនានា » ។ ពួកគេ « សមនឹងទទួលសេចក្ដីស្រឡាញ់ដូចព្រះគ្រីស្ទដូចជាបុត្រាបុត្រីផ្សេងទៀតរបស់ព្រះ ហើយគួរតែត្រូវបានប្រព្រឹត្តចំពោះដោយការយល់ចិត្ត សប្បុរស និងមេត្តាធម៌ » ( « បុគ្គលប្តូរភេទ ៖ តើខ្ញុំជាសមាជិកម្នាក់របស់សាសនាចក្រដែរឬទេ ? » នៅលើគេហទំព័រ ChurchofJesusChrist.org ) ។ ជំនួសឲ្យការបណ្តោយឲ្យមានកង្វះការយល់ដឹង ឬវិនិច្ឆ័យដោយទុច្ចរិតដើម្បីកំណត់នូវរបៀបដែលយើងប្រាស្រ័យទាក់ទងជាមួយអ្នកដទៃ នោះយើងអាច « មើលទៅមនុស្សដទៃតាមរយៈភ្នែកដូចជាព្រះគ្រីស្ទ » ( « បុគ្គលប្តូរភេទ ៖ តើខ្ញុំអាចធ្វើអ្វីខ្លះ ដើម្បីបង្ហាញសេចក្ដីស្រឡាញ់ដូចជាព្រះគ្រីស្ទ ? » នៅលើគេហទំព័រ ChurchofJesusChrist.org ) ។
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើខ្ញុំកាន់តែចេះគិតគូរ និងយកចិត្តទុកដាក់ នៅពេលពិភាក្សាអំពីភេទជាមួយអ្នកដទៃ ហើយនៅពេលគិតពិចារណាអំពីការពិតដ៏ស្មុគស្មាញរបស់អ្នកដទៃ ដែលខ្ញុំអាចស្គាល់ ឬមានទំនាក់ទំនងជាមួយដោយរបៀបណា ?
ផ្នែកទី ៣
ចុះបើខ្ញុំមានសំណួរអំពីអត្តសញ្ញាណភេទរបស់ខ្ញុំនោះ ?
ប្រសិនបើអ្នកមានសំណួរអំពីភេទរបស់អ្នក ឬជួបនឹងអារម្មណ៍ផ្ទុយភេទ សូមដឹងថា ព្រះវរបិតាសួគ៌ និងព្រះអង្គសង្គ្រោះរបស់អ្នកស្រឡាញ់អ្នក ។ ទ្រង់ទាំងទ្វេតែងគង់នៅទីនោះសម្រាប់អ្នកជានិច្ច ។ សូមពិចារណាពីរបៀបដែលព្រះយេស៊ូវគ្រីស្ទ និងដំណឹងល្អរបស់ទ្រង់អាចជួយ និងពង្រឹងដល់អ្នកបាន ។ ធនធានស្តីពីបុគ្គលប្តូរភេទ ដែលបានបោះពុម្ពដោយសាសនាចក្រចែកចាយនូវសេចក្តីពិត និងការរំឭកដ៏សំខាន់ទាំងនេះ ៖
ព្រះអង្គសង្គ្រោះមានការយល់ដឹងដ៏ឥតខ្ចោះអំពីកាលៈទេសៈខុសៗគ្នារបស់យើង ។ ក្នុងនាមជាមនុស្សរមែងស្លាប់ ការយល់ដឹងរបស់យើងគឺមានកំណត់ ។ យើងអាចប្រកាសជាមួយនីហ្វៃថា យើង « ដឹងថាព្រះអង្គ [ ព្រះ ] ស្រឡាញ់កូនចៅរបស់ទ្រង់ ប៉ុន្តែទោះជាយ៉ាងណាក៏ដោយ គង់តែ [ យើង ] មិនយល់ន័យនៃរឿងទាំងអស់នោះទេ » ( នីហ្វៃទី១ ១១:១៧ ) ។ ( « បុគ្គលប្តូរភេទ ៖ តើព្រះអង្គសង្គ្រោះពិតជាយល់ពីអ្វីដែលខ្ញុំកំពុងឆ្លងកាត់ទេ ? » នៅលើគេហទំព័រ ChurchofJesusChrist.org )
មិនមែនមនុស្សគ្រប់គ្នានៅជុំវិញអ្នកនឹងមានភាពឥតខ្ចោះក្នុងការបង្ហាញសេចក្ដីស្រឡាញ់ មេត្តាធម៌ ឬការយល់ចិត្តនោះទេ ។ នៅក្នុងពិភពលោកសព្វថ្ងៃនេះ វាងាយស្រួលក្នុងការរកឃើញការអាក់អន់ចិត្ត និងក្នុងការធ្វើឲ្យមានការអាក់អន់ចិត្ត ។ បញ្ហាប្រឈមមុខសំខាន់ៗអាចធ្វើឲ្យយើងងាយរងគ្រោះនឹងការធ្វើឲ្យមានការអាក់អន់ចិត្តដោយអចេតនា ដោយសារតែការប្រើពាក្យពេចន៍ និងឃ្លាដែលមានអារម្មណ៍ថាអាក់អន់ចិត្តដោយគ្មានចេតនា ។ ក្នុងនាមជាសមាជិកនៃសាសនាចក្រ យើងទាំងអស់គ្នាកំពុងរៀន និងរីកចម្រើន ។ ( « បុគ្គលប្តូរភេទ ៖ តើខ្ញុំជាសមាជិកម្នាក់របស់សាសនាចក្រដែរឬទេ ? » នៅលើគេហទំព័រ ChurchofJesusChrist.org )
ស៊ីស្ទើរ មីឆែល ឌី ក្រេហ្គ ជាទីប្រឹក្សាទីមួយក្នុងគណៈប្រធានយុវនារីទូទៅ ក៏បានបង្រៀនដែរថា
ពួកបរិសុទ្ធថ្ងៃចុងក្រោយមានចម្រុះពូជសាសន៍ ប៉ុន្តែ « ក៏ដូចគ្នានៅចំពោះព្រះដែរ » [ នីហ្វៃទី២ ២៦:៣៣ ] ។ … មិនថាបងប្អូនជានរណា ឬអ្វីដែលបងប្អូនកំពុងជួបប្រទះទេ បងប្អូនត្រូវបានអញ្ជើញមកឯតុរបស់ព្រះអម្ចាស់ ។ ( « Spiritual Capacity » Liahona ខែ វិច្ឆិកា ឆ្នាំ ២០១៩ ទំព័រ ២១ )
សូមជឿជាក់ថា ពរជ័យទាំងអស់នៃដំណឹងល្អមានសម្រាប់មនុស្សគ្រប់គ្នាដែលជ្រើសរើសគោរពតាមព្រះបញ្ញត្តិរបស់ព្រះ ។ អ្នក « អាចធ្វើ និងរក្សាការសន្យាទាំងឡាយចំពោះព្រះ » ហើយ « ដើរនៅក្នុងពន្លឺរបស់ទ្រង់ ហើយចូលរួមនៅក្នុងសាសនាចក្ររបស់ទ្រង់ » ទោះជាអ្នកមានអារម្មណ៍ផ្ទុយភេទក៏ដោយក្តី ( « បុគ្គលប្តូរភេទ ៖ តើខ្ញុំអាចរួមចំណែកនៅក្នុងនគររបស់ព្រះអម្ចាស់ដោយរបៀបណា ? » នៅលើគេហទំព័រ ChurchofJesusChrist.org ) ។
ក្បួនខ្នាតរបស់សាសនាចក្របានចែងថា « បុគ្គលប្ដូរភេទដែលមិនស្វែងរកការផ្លាស់ប្ដូរខាងវេជ្ជសាស្ត្រ ការវះកាត់ ឬការផ្លាស់ប្ដូរខាងសង្គម ទៅជាភេទផ្ទុយ ហើយមានភាពស័ក្ដិសម អាចទទួលការហៅរបស់សាសនាចក្រ ប័ណ្ណចូលព្រះវិហារបរិសុទ្ធ និងពិធីបរិសុទ្ធនៃព្រះវិហារបរិសុទ្ធបាន » ( ក្បួនខ្នាតទូទៅ ៣៨.៦.២៣ ) ។ ( កំណត់ចំណាំ ៖ « ការផ្លាស់ប្ដូរខាងសង្គម រួមមានការផ្លាស់ប្ដូរការស្លៀកពាក់ ឬការតុបតែងខ្លួន ឬការផ្លាស់ប្ដូរឈ្មោះ ឬសព្វនាម ដើម្បីបង្ហាញខ្លួនឯងជាមនុស្សម្នាក់ផ្សេងពីភេទជីវសាស្រ្តនៅពេលកើតមករបស់គាត់ ឬរបស់នាង » [ ក្បួនខ្នាតទូទៅ ៣៨.៦.២៣ ] ) ។ ប្រសិនបើអ្នកចង់យល់ដឹងបន្ថែមទៀត សូមជួបជាមួយប៊ីស្សព ឬប្រធានសាខារបស់អ្នក ។
ទោះបីជាមិនផ្ទុយនឹងគោលនយោបាយ ឬគោលលទ្ធិរបស់សាសនាចក្រក៏ដោយ ក៏ការកំណត់ខ្លួនឯងជាសាធារណៈថាជាបុគ្គលប្តូរភេទ អាចធ្វើឲ្យសមត្ថភាពរបស់អ្នកដើម្បីឈោងទៅកាន់គោលដៅដ៏អស់កល្បជានិច្ចរបស់អ្នកមានដែនកំណត់ដែរ ។ ប្រធាន អូក បានដាស់តឿន ៖
ចូរប្រុងប្រយ័ត្នពីរបៀបដែលអ្នកកំណត់ពីចរិតលក្ខណៈរបស់ខ្លួនឯង ។ … គុណសម្បត្តិតែមួយ គត់ ដែលគួរកត់សម្គាល់ចរិតយើងគឺថា យើងគឺជាបុត្រាបុត្រីនៃព្រះ ។ កត្តានោះល្អលើសបុគ្គលិកលក្ខណៈទាំងអស់ ។ ( « How to Define Yourself » New Era ខែ មិថុនា ឆ្នាំ ២០១៣ ទំព័រ ៤៨ )
យើងម្នាក់ៗគឺជាបុត្ររបស់ព្រះដែលមានជោគវាសនាដ៏មានសក្ដានុពលមួយសម្រាប់ជីវិតអស់កល្បជានិច្ច ។ ការកំណត់ផ្សេងៗទៀត … គឺជារឿងបណ្ដោះអាសន្ន ឬមិនសំខាន់នៅក្នុងភាពអស់កល្បជានិច្ចឡើយ ។ សូមកុំជ្រើសរើសកំណត់ខ្លួនឯង ឬគិតអំពីខ្លួនឯងក្នុងលក្ខខណ្ឌដែលកម្រិតព្រំដែនលើគោលដៅមួយដែលបងប្អូនអាចព្យាយាមនោះឡើយ ។ ( « Where Will This Lead? » Ensign ខែ ឧសភា ឆ្នាំ ២០១៩ ទំព័រ ៦២ )
អែលឌើរ ឌី ថត គ្រីស្តូហ្វឺសិន នៃកូរ៉ុមនៃពួកសាវកដប់ពីរនាក់ ក៏បានផ្តល់នូវការធានាបញ្ជាក់ដូចខាងក្រោមនេះដែរ ៖
មនុស្សគ្រប់រូបមានអំណោយទាន មនុស្សគ្រប់រូបមានទេពកោសល្យ មនុស្សគ្រប់រូបអាចរួមចំណែកដើម្បីបើកបង្ហាញអំពីផែនការរបស់ព្រះនៅក្នុងជំនាន់នីមួយៗ ។ … ដូច្នេះបងប្អូនជាច្រើនកំពុងខិតខំអស់ពីសមត្ថភាពហើយ ។ ហើយនៅពេលបងប្អូនដែលរែកបន្ទុកដ៏ធ្ងន់នៃជីវិតរមែងស្លាប់ ហើយក្រោកឈរឡើងការពារផែនការរបស់ព្រះ ដើម្បីតម្កើងបុត្រាបុត្រីទ្រង់ នោះយើងទាំងអស់គ្នាត្រៀមខ្លួនដើម្បីគាំទ្រ ។ យើងសូមថ្លែងទីបន្ទាល់ដោយមានទំនុកចិត្តថា ដង្វាយធួននៃព្រះយេស៊ូវគ្រីស្ទបានរំពឹងរង់ចាំជាមុន ហើយនៅទីបំផុត នឹងបង់សងរាល់ការខូចខាត និងការខ្វះខាត និងការបាត់បង់ទាំងអស់ចំពោះអ្នកទាំងឡាយដែលងាកទៅរកទ្រង់ ។ គ្មាននរណាម្នាក់ត្រូវបានតាំងជាមុនដើម្បីទទួលតិចជាងនូវអ្វីៗទាំងអស់ដែលព្រះបិតាមានសម្រាប់បុត្រាបុត្រីរបស់ទ្រង់ឡើយ ។ ( « Why Marriage, Why Family » Liahona ខែ ឧសភា ឆ្នាំ ២០១៥ ទំព័រ ៥២ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើការបង្រៀននៅក្នុងមេរៀននេះ និងសេចក្ដីជំនឿលើព្រះយេស៊ូវគ្រីស្ទអាចជួយអ្នក ឬនរណាម្នាក់ដែលអ្នកស្គាល់ឲ្យដោះស្រាយសំណួរអំពីភេទបានដោយរបៀបណា ?