« សេចក្ដីផ្ដើមស្តីពី ឯកសារគ្រូបង្រៀន គ្រួសារដ៏អស់កល្បជានិច្ច ( សាសនា ២០០ ) » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )
« សេចក្តីផ្ដើម » ឯកសារគ្រូបង្រៀន គ្រួសារដ៏អស់កល្បជានិច្ច
សេចក្ដីផ្ដើមស្តីពី ឯកសារគ្រូបង្រៀន គ្រួសារដ៏អស់កល្បជានិច្ច ( សាសនា ២០០ )
សូមស្វាគមន៍មកកាន់វគ្គសិក្សាស្ដីពីគ្រួសារដ៏អស់កល្បជានិច្ច ! សូមអរគុណចំពោះការព្រមទទួលយកឱកាសដើម្បីជួយយុវម្ឈិមវ័យឲ្យមករកព្រះយេស៊ូវគ្រីស្ទ តាមរយៈការសិក្សាពីគោលលទ្ធិនៃគ្រួសារនៅក្នុងផែនការរបស់ព្រះវរបិតាសួគ៌ ។ កម្មវិធីសិក្សានេះត្រូវបានរៀបរៀងឡើងដើម្បីជួយអ្នកឲ្យគាំទ្រដល់សិស្សរបស់អ្នកដើម្បីមានបទពិសោធន៍ដែលផ្តោតលើព្រះយេស៊ូវគ្រីស្ទ និងផ្តោតលើអ្នកសិក្សា ដែលនឹងនាំពួកគេឆ្ពោះទៅរកការប្រែចិត្តជឿលើព្រះអង្គសង្រ្គោះឲ្យបានកាន់តែស៊ីជម្រៅ ។
តើអ្វីជាលទ្ធផលដែលជាគោលបំណងនៃវគ្គសិក្សានេះ ?
គោលបំណងរបស់ថ្នាក់សិក្ខាសាលា និងថ្នាក់វិទ្យាស្ថាននៃសាសនាថែ្លង ៖
គោលបំណងរបស់យើងគឺដើម្បីជួយយុវវ័យ និងយុវមជ្ឈិមវ័យឲ្យយល់ដឹង និងពឹងផ្អែកលើការបង្រៀន និងដង្វាយធួនរបស់ព្រះយេស៊ូវគ្រីស្ទ ដើម្បីមានភាពស័ក្តិសមដើម្បីទទួលពរជ័យទាំងឡាយនៃព្រះវិហារបរិសុទ្ធ ព្រមទាំងរៀបចំខ្លួនពួកគេ ក្រុមគ្រួសារពួកគេ និងអ្នកដទៃទៀត ដើម្បីទទួលបានជីវិតដ៏អស់កល្បជានិច្ច ជាមួយនឹងព្រះវរបិតារបស់ពួកគេដែលគង់នៅស្ថានសួគ៌ ។ ( ការបង្រៀន និងការរៀនសូត្រដំណឹងល្អ ៖ ក្បួនខ្នាតសម្រាប់គ្រូបង្រៀន និងអ្នកដឹកនាំទាំងឡាយនៅក្នុងថ្នាក់សិក្ខាសាលា និងថ្នាក់វិទ្យាស្ថានសាសនា [ ឆ្នាំ ២០១២ ] ទំព័រ ១ )
នៅក្នុងការបំពេញគោលបំណងរបស់ថ្នាក់សិក្ខាសាលា និងថ្នាក់វិទ្យាស្ថានសាសនា នោះវគ្គសិក្សានេះត្រូវបានរចនាឡើងដើម្បីជួយសិស្សឲ្យ
-
ពន្យល់ពីតួនាទីដ៏សំខាន់របស់គ្រួសារនៅក្នុងផែនការនៃសេចក្ដីសង្គ្រោះរបស់ព្រះវរបិតាសួគ៌
-
វិភាគសំណួរ និងបញ្ហាដែលទាក់ទងនឹងគ្រួសារដោយមានទស្សនវិស័យដ៏នៅអស់កល្បជានិច្ច
-
ធ្វើសកម្មភាពដោយសេចក្ដីជំនឿនៅលើព្រះយេស៊ូវគ្រីស្ទ ពេលលើកឡើងនូវឧបសគ្គផ្ទាល់ខ្លួន និងជាគ្រួសារ ព្រមទាំងសម្ពាធខាងសង្គម
-
អនុវត្តការបង្រៀនរបស់ព្រះយេស៊ូវគ្រីស្ទនៅក្នុងការខិតខំប្រឹងប្រែងរបស់ពួកគេដើម្បីធ្វើ និងរក្សាសេចក្ដីសញ្ញាដ៏ពិសិដ្ឋ ហើយពង្រឹងទំនាក់ទំនងគ្រួសារ ព្រមទាំង
-
បង្កើនសមត្ថភាពរបស់ពួកគេ ដើម្បីបំពេញការទទួលខុសត្រូវដ៏ពិសិដ្ឋនៅក្នុងជីវិតគ្រួសារ ហើយប្រែក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទ ។
តើសៀវភៅសិក្សានេះរៀបចំឡើងយ៉ាងដូចម្តេច ?
មាតិកាសៀវភៅសិក្សានេះត្រូវបានរចនាឡើងដើម្បីជួយសិស្សឲ្យមានបទពិសោធន៍ដ៏មានអត្ថន័យ និងមានសីលធម៌ល្អទាំងនៅក្នុង និងក្រៅថ្នាក់រៀន ។ មេរៀននីមួយៗមាននូវឯកសាររៀបចំសម្រាប់ថ្នាក់ និងឯកសារគ្រូបង្រៀន ។ ឯកសារទាំងនេះត្រូវបានរចនាឡើងដើម្បីជួយសិស្សឲ្យរៀបចំខ្លួនដោយមានការគិតគូរ ចូលរួមក្នុងការរៀនសូត្រដ៏ស៊ីជម្រៅ ហើយធ្វើសកម្មភាពតាមរបៀបដែលជួយពួកគេឲ្យប្រែក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទ ។
អែលឌើរ គីម ប៊ី ក្លាក នៃពួកចិតសិបនាក់បានបង្រៀនពីអ្វីដែលសិស្សម្នាក់ ( និងគ្រូម្នាក់ ) ត្រូវធ្វើដើម្បីរៀនសូត្រឲ្យបានកាន់តែស៊ីជម្រៅ ៖
ប្រសិនបើអ្នកពិតជាចង់រៀនសូត្រឲ្យកាន់តែស៊ីជម្រៅ ប្រសិនបើដួងចិត្ត និងគំនិតរបស់អ្នកបើកទូលាយដើម្បីរៀនសូត្រ ហើយប្រសិនបើអ្នកធ្វើសកម្មភាពតាមបំណងប្រាថ្នានោះ នោះព្រះអម្ចាស់នឹងប្រទានពរដល់អ្នក ។ នៅពេលអ្នកធ្វើផ្នែករបស់អ្នក—អធិស្ឋានដោយសេចក្ដីជំនឿ រៀបចំខ្លួន សិក្សា ចូលរួមយ៉ាងសកម្ម និងធ្វើឲ្យអស់ពីសមត្ថភាពរបស់អ្នក—នោះព្រះវិញ្ញាណបរិសុទ្ធនឹងបង្រៀនអ្នក បង្កើនលទ្ធភាពរបស់អ្នកដើម្បីធ្វើសកម្មភាពតាមអ្វីដែលអ្នកបានរៀន ហើយជួយអ្នកឲ្យក្លាយជាអ្វីដែលព្រះអម្ចាស់សព្វព្រះទ័យឲ្យអ្នកប្រែក្លាយ ។ ( « Learning for the Whole Soul » Ensign ខែ សីហា ឆ្នាំ ២០១៧ ទំព័រ ២៧ )
ឯកសាររៀបចំសម្រាប់ថ្នាក់
ឯកសាររៀបចំសម្រាប់ថ្នាក់គឺមានគោលបំណងដើម្បីឲ្យអ្នក និងសិស្សរបស់អ្នកយកមកសិក្សាដើម្បីរៀបចំខ្លួនសម្រាប់ថ្នាក់រៀន ។ វារួមមានទាំងការបង្រៀនមកពីបទគម្ពីរ និងថ្នាក់ដឹកនាំសាសនាចក្រ ក៏ដូចជាផ្នែក « ចង់បានបន្ថែមទៀតទេ ? » ដែលផ្ដល់ធនធានបន្ថែមទៀតទាក់ទងនឹងប្រធានបទមេរៀននោះ ។
ឯកសាររៀបចំសម្រាប់ថ្នាក់ក៏មាននូវសំណួរ និងសកម្មភាពទាំងឡាយដែលនឹងជួយសិស្សឲ្យរៀនសូត្រយ៉ាងស៊ីជម្រៅ និងរៀបចំខ្លួនឲ្យបានប្រសើរជាងមុនដើម្បីចូលរួមក្នុងថ្នាក់ ។ ឧទាហរណ៍ នៅក្នុងឯកសាររៀបចំសម្រាប់ថ្នាក់សម្រាប់មេរៀនទី ១០ « សេចក្ដីសញ្ញាថ្មី ហើយអស់កល្បអស់កាលជានិច្ចនៃអាពាហ៍ពិពាហ៍ » សិស្សត្រូវបានផ្ដល់ឱកាសឲ្យសិក្សានូវការបង្រៀនមកពីបទគម្ពីរ និងថ្នាក់ដឹកនាំសាសនាចក្រអំពីសេចក្ដីសញ្ញានៃអាពាហ៍ពិពាហ៍ដ៏នៅអស់កល្បជានិច្ច និងពិធីបរិសុទ្ធនៃការផ្សារភ្ជាប់ ។ បន្ទាប់មក សិស្សត្រូវបានអញ្ជើញឲ្យធ្វើសកម្មភាពដូចខាងក្រោម ៖
ឯកសារគ្រូបង្រៀន
មេរៀននីមួយៗត្រូវបានរៀបចំឡើងសម្រាប់ថ្នាក់ដែលមានរយៈពេល ៥០ នាទី ។ សម្រាប់ថ្នាក់ដែលជួបគ្នាមួយសប្ដាហ៍ម្ដងរយៈពេលលើសពី ៩០ នាទី អ្នកត្រូវបានលើកទឹកចិត្តឲ្យដាក់មេរៀនពីរបញ្ចូលគ្នា ។
នៅក្នុងសេចក្ដីផ្ដើមនៃឯកសារគ្រូបង្រៀនសម្រាប់មេរៀននីមួយៗ អ្នកនឹងរកឃើញការពិពណ៌នានៃលទ្ធផលដែលមេរៀនចង់បាន ។ សេចក្ដីផ្ដើមនេះបន្ដដោយគំនិតយោបល់សម្រាប់ការបង្រៀន ដែលផ្តល់ជាគម្រោងមេរៀន មាតិកា ជំនួយសម្រាប់ការពិភាក្សា ព្រមទាំងគំនិតអនុវត្ត ។
នៅពេលអ្នកសិក្សាឯកសារគ្រូបង្រៀន សូមយកចិត្តទុក្ខដាក់ទៅលើរបៀបដែលវាទាញយកមកពីការរៀបចំរបស់សិស្ស ។ សេចក្ដីណែនាំខាងក្រោមនេះមកពីមេរៀនទី ១០ គឺជាឧទាហរណ៍ ៖
តាមរយៈការប្រើប្រាស់ការរៀបចំខ្លួនរបស់សិស្សជាទៀងទាត់ អ្នកនឹងជួយឲ្យពួកគេទទួលអារម្មណ៍ពីសារៈសំខាន់នៃការរៀបចំខ្លួនសម្រាប់គ្រប់ថ្នាក់ ហើយជួយពួកគេឲ្យរៀនយ៉ាងស៊ីជម្រៅ ។
ពិចារណាអំពីការរៀបចំដើម្បីបង្រៀនវគ្គសិក្សានេះ
ស្រដៀងគ្នាទៅនឹងអ្វីដែលអ្នក និងសិស្សរបស់អ្នកនឹងធ្វើពីមុនថ្នាក់ចាប់ផ្តើមដែរ សូមចំណាយពេលខ្លះដើម្បីពិចារណា នៅពេលអ្នករៀបចំខ្លួនបង្រៀនវគ្គសិក្សានេះ ។ ដំបូងសូមមើលមេរៀនមួយឬពីរ ដើម្បីឲ្យស្គាល់ពីឯកសាររៀបចំខ្លួនសម្រាប់ថ្នាក់ និងឯកសារគ្រូបង្រៀន ។ សូមកត់ចំណាំពីរបៀបដែលឯកសារទាំងនេះត្រូវបានរចនាឡើងដើម្បីប្រើប្រាស់រួមគ្នា នៅពេលអ្នករៀបចំខ្លួនបង្រៀន ។ បន្ទាប់មកសូមពិចារណាសំណួរដូចតទៅនេះ ៖ តើវិធីមួយចំនួនណាខ្លះដែលខ្ញុំអាចលើកទឹកចិត្តសិស្សឲ្យសិក្សាឯកសាររៀបចំខ្លួនសម្រាប់ថ្នាក់សម្រាប់មេរៀននីមួយៗ ? តើខ្ញុំអាចធ្វើអ្វីខ្លះដើម្បីរួមបញ្ចូលសិស្សដែលមិនបានសិក្សាឯកសាររៀបចំខ្លួន ?
កំណត់ចំណាំ ៖ ពេលសិស្សបានរៀបចំខ្លួនសម្រាប់ការពិភាក្សាក្នុងថ្នាក់ អ្នកនឹងឃើញថាអ្នកអាចមានការពិភាក្សាមួយយ៉ាងលឿន ស៊ីជម្រៅអំពីគោលលទ្ធិ និងគោលការណ៍ដែលទាក់ទងនឹងគ្រួសារដ៏អស់កល្បជានិច្ចប្រកបដោយអត្ថន័យ ។ ការណ៍នេះគួរតែអនុញ្ញាតឲ្យមានពេលថែមទៀតក្នុងថ្នាក់ដើម្បីពិនិត្យស្រាវជ្រាវពីរបៀបដែលអ្នក និងសិស្សរបស់អ្នកអាចអនុវត្តសេចក្ដីពិតដែលពួកគេបានរកឃើញនៅក្នុងមេរៀន ។
តើខ្ញុំអាចរៀបចំខ្លួនបង្រៀនឲ្យមានប្រសិទ្ធភាពដោយរបៀបណា ?
ព្រះវរបិតានឹងជួយអ្នក នៅពេលអ្នករៀបចំខ្លួនបង្រៀនបុត្រាបុត្រីរបស់ទ្រង់ ។ ការខិតខំរបស់អ្នកដើម្បីសិក្សាបទគម្ពីរ និងរស់នៅតាមដំណឹងល្អដោយឧស្សាហ៍ព្យាយាម នឹងជួយឲ្យអ្នកមានលក្ខណៈសម្បត្តិក្នុងការទទួលបានការណែនាំពីព្រះវិញ្ញាណ នៅក្នុងការរៀបចំខ្លួនរបស់អ្នកដើម្បីបង្រៀន ។
ពេលអ្នកសិក្សាឯកសាររៀបចំសម្រាប់ថ្នាក់ និងឯកសារគ្រូបង្រៀនសម្រាប់មេរៀននីមួយៗ សូមអធិស្ឋានស្វែងរកជំនួយរបស់ព្រះអម្ចាស់ដើម្បីយល់ពីសេចក្តីត្រូវការរបស់សិស្សអ្នក ។ អែលឌើរ ជែហ្វ្រី អ័រ ហូឡិន ក្នុងកូរ៉ុមពួកសាវកដប់ពីរនាក់បានបង្រៀន ៖
ជាពិសេស—សូមស្តាប់ សូមស្ដាប់តាមព្រះវិញ្ញាណ ។ សូមទុកពេលបន្ថែមសម្រាប់រៀបចំផែនការមេរៀនរបស់អ្នក ។ ប្រសិនបើអ្នកត្រូវរៀបចំមេរៀនខ្លីបន្តិចដើម្បីថ្លែងទីបន្ទាល់របស់អ្នក ហើយពញ្ញាក់អារម្មណ៍ឲ្យមានការពិភាក្សាមួយស្តីពីបញ្ហាសម័យបច្ចុប្បន្ននេះ សូមធ្វើវា ពេលមានការបំផុសគំនិត និងការប្រាប់ពីព្រះវិញ្ញាណដោយត្រឹមត្រូវ ។ …
…សូមចាំថា សិស្សពុំមែនជាថូដែលត្រូវចាក់បំពេញទេ តែសិស្សគឺជាភ្លើងមួយដែលត្រូវដុតឲ្យឆេះសន្ធោសន្ធៅ ។ ( « Angels and Astonishment » [ សន្ទរកថាដែលបានថ្លែងនៅឯការចាក់ផ្សាយស្តីពីការបំពាក់បំប៉នរបស់ប្រព័ន្ធអប់រំសាសនាចក្រ ថ្ងៃទី ១២ ខែ មិថុនា ឆ្នាំ ២០១៩ ] នៅលើគេហទំព័រ broadcasts.ChurchofJesusChrist.org )
ជាពិសេស ប្រសិនបើអ្នកកំពុងដាក់មេរៀនពីរបញ្ចូលគ្នា សូមពិចារណាពីសេចក្ដីត្រូវការរបស់សិស្សអ្នក ហើយស្វែងរកការដឹកនាំពីព្រះវិញ្ញាណ ។ ការធ្វើរឿងទាំងនេះអាចជួយអ្នកឲ្យកំណត់ថា តើត្រូវប្រើប្រាស់ផ្នែកមួយណានៃឯកសារគ្រូបង្រៀនដូចដែលវាបានសរសេរឡើង និងផ្នែកណាមួយដែលត្រូវកែសម្រួលដើម្បីផ្ដល់បទពិសោធន៍រៀនសូត្រដ៏មានអត្ថន័យដល់សិស្សរបស់អ្នក ។ ការណ៍នេះអាចរួមមាននូវការកំណត់ផ្នែកណាមួយនៃឯកសារគ្រូបង្រៀនដែលត្រូវគូសបញ្ជាក់ និងផ្នែកណាមួយដែលត្រូវសង្ខេប ។
អ្នកអាចឃើញថា វាអាចមានប្រយោជន៍ ពេលសួរខ្លួនឯងនូវសំណួរមួយចំនួនដូចខាងក្រោមនេះ ជាផ្នែកមួយនៃការរៀបចំខ្លួនរបស់អ្នកដើម្បីបង្រៀនមេរៀននីមួយៗ ៖
-
តើខ្ញុំបានអធិស្ឋានដើម្បីទទួលបានការដឹកនាំពីព្រះវិញ្ញាណបរិសុទ្ធ និងដើម្បីដឹងពីសេចក្តីត្រូវការរបស់សិស្សខ្ញុំដែរឬទេ ? តើខ្ញុំអាចកំណត់ថាមាតិកាមេរៀនណាដែលទាក់ទងនឹងពួកគេច្រើនបំផុតដោយរបៀបណា ? តើខ្ញុំអាចបង្ហាញសេចក្តីស្រឡាញ់ចំពោះពួកគេតាមរបៀបណា ?
-
តើខ្ញុំមានអារម្មណ៏ថាមានគ្រឹះគ្រប់គ្រាន់នៅក្នុងឯកសាររៀបចំសម្រាប់ថ្នាក់ រួមទាំងបទគម្ពីរផងដែរ និងក្នុងឯកសារគ្រូបង្រៀនដែរឬទេ ? តើមានអ្វីខ្លះដែលខ្ញុំចាំបាច់ត្រូវកែសម្រួលដើម្បីបំពេញតាមតម្រូវការរបស់សិស្សខ្ញុំ ?
-
តើខ្ញុំអាចជួយសិស្សខ្ញុំឲ្យផ្ដោតលើព្រះអង្គសង្គ្រោះ ហើយរៀនសូត្រពីព្រះវិញ្ញាណបរិសុទ្ធនៅក្នុងមេរៀននេះដោយរបៀបណា ?
-
តើខ្ញុំអាចអញ្ជើញឲ្យមានការរៀនសូត្រដោយឧស្សាហ៍ ហើយជួយសិស្សឲ្យរួមចំណែកក្នុងមេរៀននេះដោយរបៀបណា ? តើខ្ញុំអាចធ្វើឲ្យប្រាកដថា ពួកគេមានពេលដែលពួកគេត្រូវការ ដើម្បីរៀបចំផែនការផ្ទាល់ខ្លួនក្នុងការអនុវត្តតាមអ្វីដែលពួកគេកំពុងរៀនដោយរបៀបណា ?
-
តើខ្ញុំអាចបង្កើតឲ្យមានបរិយាកាសរៀនសូត្រមួយដែលសិស្សមានអារម្មណ៍ថាមានចំណែកដោយរបៀបណា ? តើខ្ញុំអាចជួយពួកគេឲ្យមានអារម្មណ៍ថាពួកគេមានតម្លៃ មានគេទទួលស្គាល់ និងមានសុវត្ថិភាពដើម្បីចែកចាយ និងរៀនពីគ្នាទៅវិញទៅមកដោយរបៀបណា ? ( សូមមើល គោលលទ្ធិ និង សេចក្ដីសញ្ញា ៨៨:៧៨, ១២២ ) ។
តើខ្ញុំអាចកែសម្រួលមេរៀនទាំងឡាយសម្រាប់សិស្សពិការដោយរបៀបណា ?
នៅពេលអ្នករៀបចំខ្លួនបង្រៀន សូមគិតដល់សិស្សដែលមានតម្រូវការពិសេសផងដែរ ។ សូមកែសម្រួលសកម្មភាព និងការរំពឹងទុកទាំងឡាយដើម្បីដាក់បញ្ចូលពួកគេ ហើយជួយពួកគេឲ្យទទួលបានជោគជ័យ ។ សម្រាប់ព័ត៌មានបន្ថែម សូមមើលធនធានទាំងឡាយនៅលើ ទំព័រ ពិការភាព នៅលើគេហទំព័រ disabilities.ChurchofJesusChrist.org ។
តើសិស្សទទួលបានក្រេដីឌសម្រាប់វគ្គសិក្សានេះតាមរបៀបណា ?
ដើម្បីទទួលបានក្រេដីឌដើម្បីបញ្ចប់ការសិក្សាថ្នាក់វិទ្យាស្ថាន សិស្សទាំងឡាយត្រូវតម្រូវឲ្យ
-
សិក្សាឯកសាររៀបចំយ៉ាងតិចណាស់ឲ្យបាន ៧៥ ភាគរយនៃមេរៀននេះ
-
មានវត្តមានក្នុងថ្នាក់ ៧៥ ភាគរយ ហើយ
-
បញ្ចប់បទពិសោធន៍មួយក្នុងបទពិសោធន៍រៀនសូត្រទាំងបួន ៖
-
រក្សាកំណត់ហេតុសិក្សា ។
-
កត់ត្រាចម្លើយទាំងអស់ចំពោះរាល់សំណួរ និងសកម្មភាពនៅក្នុងឯកសាររៀបចំ ( សូមកត់ចំណាំថា សិស្សមិនចាំបាច់ដាក់ជូនកំណត់ហេតុការសិក្សា ឬចម្លើយរបស់ពួកគេមកកាន់អ្នកនៅចុងបញ្ចប់នៃឆមាសទេ គឺពួកគេគ្រាន់តែត្រូវបង្ហាញអ្នកពីអ្វីដែលពួកគេបានបញ្ចប់ជាការស្រេចប៉ុណ្ណោះ ) ។
-
សរសេរចម្លើយសម្រាប់សំណួរតែងសេចក្ដីចំនួនបី ។
-
រចនា និងបញ្ចប់គម្រោងរៀនសូត្រមួយដោយខ្លួនឯង ( ដោយមានការអនុម័តពីគ្រូ ) ដែលទាក់ទងទៅនឹងមាតិកានៃវគ្គសិក្សានេះ ។ ( សូមស្វែងរកព័ត៌មានលម្អិតថែមទៀតក្នុងទំព័រ បទពិសោធន៍នៃការលើកកម្ពស់ដល់ការរៀនសូត្រថ្នាក់វិទ្យាស្ថាន ដែលមាននៅលើគេហទំព័រ ChurchofJesusChrist.org ) ។
-
កត់ត្រាគំនិតរបស់អ្នក
សូមពិចារណាអំពីប្រភេទនៃបទពិសោធន៍ដែលអ្នកសង្ឃឹមថា សិស្សរបស់អ្នកនឹងមាននៅក្នុងវគ្គសិក្សានេះ ។ សូមសរសេរគំនិត ឬចំណាប់អារម្មណ៍របស់អ្នកពីរបៀបដែលអ្នកដាក់ផែនការជួយពួកគេឲ្យមានបទពិសោធន៍នៃការរៀនសូត្រដ៏មានអត្ថន័យ ។