មេរៀនទី ១៩ ឯកសារគ្រូបង្រៀន ៖ ការទទួលខុសត្រូវដ៏ពិសិដ្ឋរបស់ម្ដាយ

« មេរៀនទី ១៩ ឯកសារគ្រូបង្រៀន ៖ ការទទួលខុសត្រូវដ៏ពិសិដ្ឋរបស់ម្ដាយ » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ១៩ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច

មេរៀនទី ១៩ ឯកសារគ្រូបង្រៀន

ការទទួលខុសត្រូវដ៏ពិសិដ្ឋរបស់ម្ដាយ

ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ថា « មិនមានតួនាទីណាក្នុងជីវិតនេះដែលសំខាន់ជាង និងអស់កល្បជានិច្ចជាងភាពជាម្ដាយនោះទេ » ( « Daughters of God » Liahona ខែ ឧសភា ឆ្នាំ ២០០៨ ទំព័រ ១០៨ ) ។ នៅក្នុងមេរៀននេះ សិស្សនឹងពន្យល់ពីលក្ខណៈ និងតម្លៃដ៏អស់កល្បជានិច្ចនៃភាពជាម្ដាយ និងការចិញ្ចឹមបីបាច់មនុស្សដទៃ ។ ពួកគេនឹងពិភាក្សាអំពីរបៀបដែលព្រះអង្គសង្គ្រោះធ្វើជាគំរូនៃការចិញ្ចឹមបីបាច់ ។ សិស្សក៏នឹងរៀនពន្យល់ពីគោលការណ៍អំពីភាពជាម្ដាយដល់អ្នកដទៃផងដែរ ។

យោបល់សម្រាប់ការបង្រៀន

ការអភិវឌ្ឍការបង្រៀននិងការរៀនសូត្ររបស់យើង

កំណត់ល្បឿន ។ សូមចៀសវាងចំណាយពេលច្រើនពេកទៅលើផ្នែកដំបូងនៃមេរៀន រួចហើយត្រូវប្រញាប់បញ្ចប់ផ្នែកក្រោយៗនៃមេរៀនទៅវិញ ។ នៅពេលអ្នករៀបចំខ្លួន សូមប៉ាន់ស្មានថា តើសិស្សនឹងត្រូវចំណាយពេលប៉ុន្មានដើម្បីចូលរួមក្នុងផ្នែកនីមួយៗនៃមេរៀននេះ ដោយប្រើវិធីសាស្ត្រដែលអ្នកបានជ្រើសរើស ។ សូមសម្របវិធីសាស្រ្តតាមតម្រូវការចាំបាច់ ដោយផ្អែកទៅលើតម្រូវការ និងចំណាប់អារម្មណ៍របស់សិស្សអ្នក ។

ម្ដាយមានទំនួលខុសត្រូវដ៏ពិសិដ្ឋមួយលើការចិញ្ចឹមបីបាច់ ។

សូមបង្ហាញសេចក្ដីថ្លែងការណ៍ខាងក្រោមដោយប្រធាន រ័សុល អិម ណិលសុន ៖

រូបភាព
ប្រធាន រ័សុល អិម ណិលសុន

ក្នុងអាជីពការងាររបស់ខ្ញុំក្នុងនាមជាវេជ្ជបណ្ឌិតផ្នែកវេជ្ជសាស្ត្រ ជួនកាលមានគេសួរខ្ញុំថា ហេតុអ្វីបានជាខ្ញុំជ្រើសរើសធ្វើការងារដ៏លំបាកនោះ ។ ខ្ញុំបានឆ្លើយតបតាមទស្សនៈរបស់ខ្ញុំថា ការងារដ៏ខ្ពង់ខ្ពស់បំផុត និងថ្លៃថ្នូរបំផុតក្នុងជីវិតនេះគឺជាការងារជាម្ដាយ ។ ដោយសារជម្រើសនោះមិនអាចមានសម្រាប់ខ្ញុំ ទើបខ្ញុំគិតថា ការថែទាំដល់អ្នកឈឺអាចនឹងប្រហាក់ប្រហែលនឹងការងារនោះ ។ …

ជាច្រើនឆ្នាំកន្លងទៅ គណៈប្រធានទីមួយបានចេញសេចក្តីថ្លែងការណ៍មួយ ដែលមានឥទ្ធិពលយ៉ាងជ្រាលជ្រៅ និងដ៏យូរអង្វែងមកលើខ្ញុំ ។ ពួកលោកបានសរសេរថា « ភាពជាម្ដាយគឺជិតស្មើនឹងភាពជាព្រះ ។ វាគឺជាការបម្រើដ៏ខ្ពង់ខ្ពស់បំផុត និងបរិសុទ្ធបំផុតសម្រាប់មនុស្ស ។ ការងារនេះដាក់ស្ដ្រីដែលគោរពដល់ការហៅ និងការបម្រើដ៏បរិសុទ្ធរបស់ខ្លួននៅក្បែរពួកទេវតា » [ នៅក្នុង James R. Clark, comp., Messages of the First Presidency of The Church of Jesus Christ of Latter-day Saints ( ឆ្នាំ ១៩៧៥ ) ៦:១៧៨ ] ។ ( « Our Sacred Duty to Honor Women » Ensign ខែ ឧសភា ឆ្នាំ ១៩៩៩ ទំព័រ ៣៨ )

តើអ្នកចាប់អារម្មណ៍អ្វីខ្លះពីក្នុងសេចក្ដីថ្លែងការណ៍របស់ប្រធាន ណិលសុន ហើយមូលហេតុអ្វី ?
តើអ្នកនឹងពន្យល់ពីលក្ខណៈដ៏អស់កល្បជានិច្ចនៃតួនាទីជាម្ដាយយ៉ាងដូចម្ដេច ?
តើតួនាទីជាម្ដាយទាក់ទងនឹងស្ត្រីទាំងអស់ រួមទាំងអ្នកដែលមិនមានកូនផងដែរយ៉ាងដូចម្ដេច ? ( ប្រសិនបើចាំបាច់ សូមអញ្ជើញសិស្សឲ្យរំំឭកសេចក្ដីថ្លែងការណ៍ដោយ ស៊ីស្ទើរ សឺរី អិល ឌូវ និង ប្រធាន ណិលសុន នៅក្នុងផ្នែកទី ១ នៃឯកសាររៀបចំ ។ សូមជួយសិស្សឲ្យរកឃើញសេចក្ដីពិតស្រដៀងគ្នាមួយដូចតទៅនេះ ៖ ស្ត្រីគ្រប់រូបគឺជាម្ដាយ ដោយសារតែជោគវាសនាដ៏ទេវភាព និងដ៏អស់កល្បជានិច្ចរបស់នាង [ សូមមើល រ័សុល អិម ណិលសុន « Sisters’ Participation in the Gathering of Israel » Liahona ខែ វិច្ឆិកា ឆ្នាំ ២០១៨ ទំព័រ ៦៨ ] ) ។
តើសេចក្ដីពិតនេះមានន័យយ៉ាងណាចំពោះអ្នក និងស្ត្រីដែលអ្នកស្គាល់ ?

សូមពិចារណាយករុក្ខជាតិដែលស្រស់បំព្រង និងរុក្ខជាតិដែលស្រពោនមកកាន់ថ្នាក់រៀន ឬបង្ហាញជារូបភាព ។

រូបភាព

ផ្កាកុលាបដ៏ស្រស់បំព្រង

រូបភាព

ផ្កាកុលាបស្រពោន

សូមអញ្ជើញសិស្សឲ្យគិតអំពីអ្វីដែលបានធ្វើសម្រាប់រុក្ខជាតិដ៏ស្រស់បំព្រង ហើយដែលមិនបានធ្វើសម្រាប់រុក្ខជាតិដែលស្វិតស្រពោននោះ ។

តើការថែទាំរុក្ខជាតិអាចប្រៀបបានទៅនឹងការចិញ្ចឹមបីបាច់មនុស្សយ៉ាងដូចម្ដេច ? ( តាមការចាំបាច់ សូមពិនិត្យមើលនិយមន័យនៃការចិញ្ចឹមបីបាច់ឡើងវិញជាមួយសិស្ស ដែលផ្តល់ដោយ ប្រធាន ស៊ូសាន ដបុលយូ ថែនណឺ ក្នុងផ្នែកទី ២ នៃឯកសាររៀបចំ ) ។

សូមបង្ហាញសេចក្ដីថ្លែងការណ៍ខាងក្រោមនេះមកពី ការប្រកាសអំពីក្រុមគ្រួសារ ៖ ម្ដាយមានភារកិច្ចសំខាន់ដើម្បីថែរក្សាបីបាច់កូនចៅរបស់ខ្លួន ( សូមមើលគេហទំព័រ ChurchofJesusChrist.org ) ។

តើព្រះវរបិតាសួគ៌បានប្រទានអំណោយអ្វីដល់ស្ត្រី ដើម្បីជួយពួកគេឲ្យបំពេញទំនួលខុសត្រូវដ៏ពិសិដ្ឋនេះ ? ( ជាផ្នែកមួយនៃការពិភាក្សា អ្នកអាចនឹងពិនិត្យមើលសេចក្ដីថ្លែងការណ៍របស់ ស៊ិស្ទើរ នែល អេហ្វ ម៉ារីអូត និង ប្រធាន ហិនរី ប៊ី អាវរិង ក្នុងផ្នែកទី ២ នៃឯកសាររៀបចំឡើងវិញជាមួយសិស្ស ) ។

សូមពន្យល់ថា ព្រះយេស៊ូវគ្រីស្ទគឺជាគំរូដ៏ល្អឥតខ្ចោះនៃការចិញ្ចឹមបីបាច់ ។ សូមអញ្ជើញសិស្សឲ្យពិនិត្យមើល វគ្គបទគម្ពីរ ដែលពួកគេបានសិក្សានៅក្នុងផ្នែកទី ២ នៃឯកសាររៀបចំ ហើយរកមើលអ្វីដែលពួកគេអាចរៀនអំពីការចិញ្ចឹមបីបាច់ មកពីគំរូរបស់ព្រះអង្គសង្គ្រោះ ។ សូមឲ្យសិស្សពីរបីនាក់ចែកចាយគំនិតរបស់ពួកគេ ។

ម្ដាយមានតួនាទីដ៏ពិសិដ្ឋ និងចាំបាច់មួយនៅក្នុងផែនការរបស់ព្រះ ។

សូមអញ្ជើញស្ត្រីនៅក្នុងថ្នាក់រៀនឲ្យឆ្លើយតបនឹងសំណួរខាងក្រោមនេះ ៖

តើអ្នកមានគំនិត អារម្មណ៍ ឬការព្រួយបារម្ភអ្វីខ្លះអំពីការធ្វើជាម្ដាយ ?

បន្ទាប់មក សូមសួរសំណួរដូចខាងក្រោមនេះដល់សិស្សក្នុងថ្នាក់ ៖

នៅក្នុងវប្បធម៌របស់យើង តើស្ត្រីអាចមានអារម្មណ៍ថាមានសម្ពាធអ្វីខ្លះទាក់ទងនឹងភាពជាម្ដាយ ?
តើអ្នកអាចឃើញថាមានភាពខុសគ្នាយ៉ាងណាខ្លះ រវាងរបៀបដែលមនុស្សមួយចំនួនមើលទៅភាពជាម្ដាយ និងរបៀបដែលព្រះទតទៅភាពជាម្ដាយ ? ( ជាផ្នែកមួយនៃការពិភាក្សានេះ អ្នកអាចឲ្យសិស្សយោងទៅសេចក្ដីថ្លែងការណ៍របស់ ប្រធាន ណិលសុន និង អែលឌើរ ឌី ថត គ្រីស្តូហ្វឺសិន នៅក្នុងផ្នែកទី ៣ នៃឯកសាររៀបចំ ។ សូមជួយសិស្សឲ្យរកឃើញសេចក្ដីពិតមួយដូចតទៅនេះ ៖ ការមានកូន និងការថែទាំបុត្រាបុត្រីរបស់ព្រះគឺជាផ្នែកដ៏សំខាន់នៃកិច្ចការ និងសិរីល្អរបស់ព្រះ ) ។
ហេតុអ្វីបានជាការពពោះ ( បើអាចមាន ) និងការថែទាំកូនមានសារៈសំខាន់នៅក្នុងផែនការនៃសុភមង្គលរបស់ព្រះវរបិតាសួគ៌ ?

សូមបង្ហាញរូបភាពអំពីកងពលកំលោះ ។ សូមអញ្ជើញសិស្សឲ្យចែកចាយនូវអ្វី ដែលពួកគេដឹងអំពីសេចក្ដីជំនឿរបស់យុវជនទាំងនេះ ( សូមមើល អាលម៉ា ៥៦:៤៥–៤៨; ៥៧:២១–២៦ ) ។

រូបភាព

កងពលកំលោះពីរពាន់នាក់ ដោយ អាណុល ហ្វ្រីប៊ើក

តើអ្នកម្ដាយរបស់កងពលកំលោះមានឥទ្ធិពលយ៉ាងណាទៅលើជីវិតរបស់កូនប្រុសពួកគាត់ និងទៅលើសន្ដិសុខនៃជាតិសាសន៍នីហ្វៃទាំងមូល ?

នៅក្នុងការត្រៀមខ្លួនសម្រាប់ថ្នាក់រៀន សិស្សត្រូវបានអញ្ជើញឲ្យផ្ញើសំបុត្រមួយច្បាប់ទៅកាន់ម្តាយរបស់ពួកគេ ឬស្ដ្រីដែលដូចជាម្តាយម្នាក់ ដែលបានផ្ដល់ពរជ័យដល់ជីវិតរបស់ពួកគេ ។ អ្នកអាចអញ្ជើញសិស្សពីរបីនាក់ឲ្យចែកចាយពីរបៀបដែលស្ត្រី ដែលពួកគេបានសរសេរសំបុត្រទៅនោះមានឥទ្ធិពលលើជីវិតរបស់ពួកគេ ។ ឬប្រសិនបើសិស្សភាគច្រើនមិនបានសរសេរសំបុត្រនេះទេ នោះអ្នកអាចអញ្ជើញពួកគេឲ្យចំណាយពេលពីរបីនាទី ដើម្បីសរសេរសារ ឬអ៊ីម៉ែលមួយនៅអំឡុងម៉ោងរៀន ។

សូមឲ្យសិស្សជ្រើសរើសគំរូមួយក្នុងចំណោមគំរូខាងក្រោមនេះ ដែលពិពណ៌នាអំពីទស្សនៈ ឬអាកប្បកិរិយា ដែលពួកគេអាចនឹងជួបប្រទះនៅលើប្រព័ន្ធផ្សព្វផ្សាយសង្គម ។ សូមអញ្ជើញពួកគេឲ្យសរសេរចម្លើយជាសម្មតិកម្មមួយ ដែលពួកគេគិតថា វាអាចជួយបង្ហាញពីអារម្មណ៍នេះបានដោយមានប្រសិទ្ធភាព ។ ( ប្រសិនបើសិស្សមានគំរូមួយចេញពីជីវិតពិត ដែលពួកគេចង់ប្រើជំនួសវិញនោះ សូមអញ្ជើញពួកគេឲ្យប្រើគំរូនោះចុះ ) ។ សូមលើកទឹកចិត្តសិស្សឲ្យប្រើអ្វីដែលពួកគេបានរៀននៅក្នុងការសិក្សាឯកសាររៀបចំរបស់ពួកគេ និងមកពីបទពិសោធន៍ផ្ទាល់ខ្លួន រួចហើយចែកចាយទីបន្ទាល់របស់ពួកគេ នៅពេលពួកគេបង្កើតបានជាចម្លើយរបស់ពួកគេហើយ ។

មិត្តម្នាក់រៀបរាប់ថា ភាពជាម្តាយគឺជាការខ្ជះខ្ជាយសក្តានុពលដ៏ពិតប្រាកដរបស់ស្ត្រី ដោយនិយាយថា ការជ្រើសរើសដើម្បីមានគ្រួសារ ជាជាងជ្រើសរើសយកអាជីពការងារ នឹងដាក់ដែនកំណត់លើអ្វីដែលស្ត្រីអាចធ្វើ និងសម្រេចបាននៅក្នុងជីវិត ។
មិត្តម្នាក់មានអារម្មណ៍ថាគ្មានគេដឹងគុណគាត់សោះ—នាងមានអារម្មណ៍ថា អ្វីៗដែលនាងធ្វើសម្រាប់កូនៗរបស់នាងគឺមិនសំខាន់នោះទេ ហើយថានាងមិនល្អគ្រប់គ្រាន់ដើម្បីធ្វើជាម្ដាយឡើយ ។
មិត្តម្នាក់ព្រួយបារម្ភថា « ចុះបើខ្ញុំមិនមែនជាមនុស្សចេះចិញ្ចឹមបីបាច់កូននោះ ? តើខ្ញុំអាចធ្វើជាម្ដាយម្នាក់ ដែលព្រះអម្ចាស់ចង់ឲ្យខ្ញុំធ្វើតាមរបៀបណាទៅ ? »
មិត្តម្នាក់មានអារម្មណ៍សោកសៅយ៉ាងខ្លាំង ដោយសារនាង និងស្វាមីរបស់នាងមិនអាចមានកូនបាន ។

បន្ទាប់ពីសិស្សមានពេលគ្រប់គ្រាន់ហើយ សូមអញ្ជើញពួកគេពីរបីនាក់ដែលចង់ចែកចាយ ឲ្យឡើងចែកចាយនូវអ្វីដែលពួកគេបានសរសេរ ។

សូមពិចារណាបង្ហាញវីដេអូ « Just a Mom » ( ១:០២ ) ។

ដើម្បីបញ្ចប់មេរៀននេះ អ្នកអាចអញ្ជើញសិស្សឲ្យពិចារណាពីអ្វីដែលពួកគេអាចធ្វើបាន ដើម្បីបំពេញតួនាទីដ៏ពិសិដ្ឋរបស់ពួកគេក្នុងនាមជាម្ដាយក៏បាន ឬដើម្បីគាំទ្រដល់ស្ត្រីដែលនៅជិតពួកគេនៅក្នុងតួនាទីនេះក៏បាន ។ សូមលើកទឹកចិត្តសិស្សឲ្យពឹងផ្អែកលើជំនួយរបស់ព្រះអម្ចាស់ នៅពេលពួកគេខិតខំប្រឹងប្រែងធ្វើកិច្ចការទាំងនេះ ។ សូមថ្លែងទីបន្ទាល់ ឬសូមអញ្ជើញសិស្សម្នាក់ឲ្យឡើងថ្លែងទីបន្ទាល់អំពីសារៈសំខាន់នៃភាពជាម្ដាយនៅក្នុងផែនការរបស់ព្រះវរបិតាសួគ៌ ។

សម្រាប់ពេលក្រោយ

សូមអញ្ជើញសិស្សឲ្យពិចារណាអំពីតួនាទីរបស់ឪពុក នៅពេលពួកគេសិក្សា ឯកសាររៀបចំសម្រាប់មេរៀនទី ២០ ។ សិស្សអាចនឹងចង់សរសេរលិខិតដឹងគុណដល់ឪពុករបស់ពួកគេ ឬបុរសដែលដូចជាឪពុកម្នាក់ ដែលបានផ្ដល់ពរជ័យដល់ជីវិតរបស់ពួកគេ ។