មេរៀនទី ៩ ឯកសារគ្រូបង្រៀន ៖ ការបង្រួបបង្រួមក្រុមគ្រួសារសម្រាប់ភាពអស់កល្បជានិច្ច

« មេរៀនទី ៩ ឯកសារគ្រូបង្រៀន ៖ ការបង្រួបបង្រួមក្រុមគ្រួសារសម្រាប់ភាពអស់កល្បជានិច្ច » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ៩ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច

មេរៀនទី ៩ ឯកសារគ្រូបង្រៀន

ការបង្រួបបង្រួមក្រុមគ្រួសារសម្រាប់ភាពអស់កល្បជានិច្ច

ការទទួលពិធីបរិសុទ្ធនៃព្រះវិហារបរិសុទ្ធសម្រាប់ខ្លួនយើង និងសម្រាប់បុព្វការីជនរបស់យើង ដែលបានទទួលមរណភាពទៅហើយ ពង្រឹងយើង និងជួយយើងឲ្យកសាងគ្រួសារដ៏អស់កល្បជានិច្ចរបស់យើងផ្ទាល់ ។ ពង្សប្រវត្តិ និងការបម្រើនៅក្នុងព្រះវិហារបរិសុទ្ធក៏មានសារៈសំខាន់ផងដែរ ក្នុងការជួយដល់ព្រះវរបិតាសួគ៌របស់យើងឲ្យបង្រួបបង្រួមគ្រួសាររបស់ទ្រង់ ។ ជាលទ្ធផលនៃមេរៀននេះ សិស្សនឹងអាចពន្យល់ពីពរជ័យមួយចំនួន ដែលយើងអាចទទួលបានតាមរយៈការបម្រើក្នុងកិច្ចការព្រះវិហារបរិសុទ្ធ និងពង្សប្រវត្តិ ។ សិស្សក៏នឹងត្រូវបានអញ្ជើញឲ្យកំណត់ពីរបៀបដែលពួកគេអាចចាប់ផ្ដើម ឬបន្ដកិច្ចខិតខំរបស់ពួកគេ ដើម្បីស្វែងរកបុព្វការីជនរបស់ពួកគេដែលបានទទួលមរណភាពទៅហើយ និងធ្វើពិធីបរិសុទ្ធសម្រាប់ពួកគាត់នៅក្នុងព្រះវិហារបរិសុទ្ធផងដែរ ។

យោបល់សម្រាប់ការបង្រៀន

ព្រះវរបិតាសួគ៌សព្វព្រះទ័យដើម្បីប្រទានអំណាច និងកម្លាំងដល់បុត្រាបុត្រីរបស់ទ្រង់ ។

នៅដើមមេរៀននេះ សូមពិចារណាបង្ហាញសំណួរខាងក្រោម ហើយអញ្ជើញសិស្សឲ្យសរសេរចម្លើយរបស់ពួកគេនៅលើក្ដារខៀន ៖

ក្នុងនាមជាយុវមជ្ឈិមវ័យនៅក្នុងពិភពលោកនាសព្វថ្ងៃនេះ តើអ្នកត្រូវការអំណាច ឬពរជ័យខាងវិញ្ញាណជាពិសេសអ្វីខ្លះ និងហេតុអ្វី ?

សូមអញ្ជើញសិស្សម្នាក់ឲ្យអានកថាខណ្ឌទីបីនៃការប្រកាសអំពីក្រុមគ្រួសារឲ្យឮៗ ( សូមមើល « ក្រុមគ្រួសារ ៖ ការប្រកាសដល់ពិភពលោក » នៅលើគេហទំព័រ ChurchofJesusChrist.org ) ។ សូមឲ្យសិស្សពន្យល់ពីអ្វីដែលពួកគេដឹងអំពីតួនាទីនៃសេចក្ដីសញ្ញា និងពិធីបរិសុទ្ធនៅក្នុងផែនការរបស់ព្រះ ។

សូមឲ្យសិស្សមានពេលវេលារំឭកឡើងវិញដោយប្រុងប្រយ័ត្នក្នុង សេចក្ដីថ្លែងការណ៍ដោយប្រធាន រ័សុល អិម ណិលសុន នៅក្នុងផ្នែកទី ១ នៃឯកសាររៀបចំ ។ សូមអញ្ជើញពួកគេឲ្យចែកចាយអ្វីដែលពួកគេបានរៀនមកពីប្រធាន ណិលសុន អំពីពិធីបរិសុទ្ធនៃបព្វជិតភាព និងសេចក្តីសញ្ញាទំាងឡាយ ។ នៅពេលសិស្សចែកចាយ សូមជួយពួកគេឲ្យស្គាល់សេចក្ដីពិតដូចតទៅនេះ ៖ ការទទួលពិធីបរិសុទ្ធ និងសេចក្តីសញ្ញាទំាងឡាយអាចពង្រឹងដល់អាពាហ៍ពិពាហ៍ និងក្រុមគ្រួសាររបស់យើង ។ នៅពេលយើងទទួល និងគោរពតាមពិធីបរិសុទ្ធនៃបព្វជិតភាព និងសេចក្ដីសញ្ញាទាំងឡាយ នោះព្រះនឹងប្រទានដល់យើងនូវព្រះចេស្ដារបស់ទ្រង់ ( សូមមើល គោលលទ្ធិ និង សេចក្ដីសញ្ញា ១០៩:២២ ) ។

តើពិធីបរិសុទ្ធនៃបព្វជិតភាព និងសេចក្ដីសញ្ញាទាំងឡាយបានផ្ដល់អំណាច ឬពង្រឹងកម្លាំងដល់អ្នក និងគ្រួសាររបស់អ្នកតាមរបៀបណា ? ( សិស្សត្រូវបានអញ្ជើញឲ្យពិចារណាពីសំណួរនេះនៅក្នុងឯកសាររៀបចំ ) ។

អ្នកអាចថ្លែងទីបន្ទាល់អំពីពរជ័យទាំងនេះមួយ ឬច្រើនដែលកើតមាននៅក្នុងជីវិតអ្នក និងគ្រួសាររបស់អ្នកផ្ទាល់ផងដែរ ។ សូមលើកទឹកចិត្តសិស្សឲ្យឆ្ពោះទៅរកការទទួលបាននូវពិធីបរិសុទ្ធនៃព្រះវិហារបរិសុទ្ធ ប្រសិនបើពួកគេពុំទាន់បានទទួលនៅឡើយទេ ហើយគោរពតាមសេចក្ដីសញ្ញាទាំងឡាយដែលពួកគេបានធ្វើ ។

ព្រះវរបិតាសួគ៌របស់យើងសព្វព្រះទ័យឲ្យគ្រួសារទ្រង់ទាំងអស់ទទួលបានសេចក្ដីសង្គ្រោះ ។

សូមពិចារណាបំបែកសិស្សទៅជាក្រុមតូចៗ ដើម្បីធ្វើសកម្មភាពដូចខាងក្រោមនេះ ។ សូមផ្ដល់សំណៅចែកខាងក្រោមនេះដល់ក្រុមនីមួយៗមួយច្បាប់ ។ ( ឬអ្នកអាចរៀបចំសំណៅចែកមួយដូចជាសំណៅចែកនេះ ប្រសិនបើអ្នកចង់កែសម្រួលសាច់រឿងនេះ ឲ្យវាទាក់ទងកាន់តែខ្លាំងនឹងកាលៈទេសៈរបស់សិស្សអ្នក ) ។ សូមអញ្ជើញក្រុមទាំងអស់ឲ្យធ្វើតាមការណែនាំនៅលើសំណៅចែកនោះ ។

គោលលទ្ធិនៃការប្រោសលោះមរណជន

ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ៩

សូមអានសាច់រឿងខាងក្រោមនេះ ហើយពិភាក្សាសំណួរដែលមានអមមកជាមួយនោះជាក្រុម ។

មិត្តម្នាក់ដែលជាសមាជិកនៃជំនឿផ្សេង បានចូលរួមក្នុងពិធីសម្ពោធបើកព្រះវិហារបរិសុទ្ធនាពេលថ្មីៗនេះ ។ នៅទីនោះ នាងបានស្ដាប់ឮសមាជិកយើងនិយាយពីការធ្វើពិធីបរិសុទ្ធជូនបុព្វការីជនរបស់យើងដែលបានទទួលមរណភាព ។ ពីរបីថ្ងៃក្រោយមក នាងបានសួរអ្នកថា « ហេតុអ្វីព្រះវិហាររបស់ឯងធ្វើពិធីសម្រាប់មរណជន ? »

តើអ្នកនឹងឆ្លើយសំណួររបស់មិត្តអ្នកយ៉ាងដូចម្ដេច ? ( ក្រោយពីអ្នកបានពិភាក្សាសំណួរនេះហើយ ក្រុមរបស់អ្នកអាចរំឭកឡើងវិញក្នុង សេចក្ដីថ្លែងការណ៍ដោយប្រធាន យ៉ូសែប អេហ្វ ស្ម៊ីធ នៅក្នុងផ្នែកទី ១ នៃឯកសាររៀបចំ ។ អ្នកក៏អាចពិនិត្យមើលឡើងវិញក្នុង កូរិនថូស ទី១ ១៥:២៩ រួមគ្នាផងដែរ ) ។
តើគោលលទ្ធិនៃការប្រោសលោះមរណជនអាចបង្រៀនយើងអ្វីខ្លះ អំពីបុគ្គលិកលក្ខណៈ ព្រះទ័យ និងជំនួយរបស់ព្រះវរបិតាសួគ៌ និងព្រះយេស៊ូវគ្រីស្ទ ?

គោលលទ្ធិនៃការប្រោសលោះមរណជន

រូបភាព

សំណៅចែករបស់គ្រូបង្រៀន

បន្ទាប់ពីទុកពេលគ្រប់គ្រាន់ហើយ សូមអញ្ជើញសិស្សម្នាក់ ឬពីរនាក់ឲ្យចែកចាយអ្វីដែលពួកគេបានរៀន មកពីការពិភាក្សាជាក្រុមរបស់ពួកគេ ។

សូមរំឭក គោលលទ្ធិ និង សេចក្ដីសញ្ញា ១២៨:១៥ រួមគ្នាឡើងវិញ ហើយពិភាក្សាពីសំណួរដូចខាងក្រោម ៖

យោងតាមខគម្ពីរនេះ ហេតុអ្វីវាសំខាន់ដែលយើងត្រូវទទួលពិធីបរិសុទ្ធនៃព្រះវិហារបរិសុទ្ធ ជំនួសឲ្យបុព្វការីជនរបស់យើងដែលបានទទួលមរណភាព ? ( ដោយប្រើពាក្យសម្ដីរបស់សិស្ស សូមសរសេរសេចក្ដីពិតមួយដូចតទៅនេះដាក់នៅលើក្តារខៀន ៖ សេចក្ដីសង្គ្រោះដល់បុព្វការីជនរបស់យើងដែលបានទទួលមរណភាពទៅហើយ គឺជាការចាំបាច់ និងសំខាន់បំផុតចំពោះសេចក្ដីសង្គ្រោះ និងភាពល្អឥតខ្ចោះរបស់យើងផ្ទាល់ ) ។
ហេតុអ្វីអ្នកគិតថា សេចក្តីសង្គ្រោះរបស់បុព្វការីជនយើងគឺជាការចាំបាច់ និងសំខាន់បំផុតចំពោះសេចក្ដីសង្គ្រោះ និងភាពល្អឥតខ្ចោះរបស់យើងផ្ទាល់ ?
តើយើងអាចក្លាយកាន់តែដូចជាព្រះអង្គសង្គ្រោះ តាមរយៈការស្វែងរកបុព្វការីជនរបស់យើងដែលបានទទួលមរណភាព និងការទទួលពិធីបរិសុទ្ធនៅក្នុងព្រះវិហារបរិសុទ្ធជំនួសឲ្យពួកគាត់ដោយរបៀបណា ? ( អ្នកអាចអញ្ជើញសិស្សឲ្យរំឭកឡើងវិញក្នុង សេចក្ដីថ្លែងការណ៍ដោយប្រធាន ហ្គរដុន ប៊ី ហ៊ិងគ្លី នៅក្នុងផ្នែកទី ២ នៅក្នុងឯកសាររៀបចំបាន ) ។

សូមអញ្ជើញសិស្សឲ្យពិចារណាពីអារម្មណ៍របស់ពួកគេដែលមានចំពោះព្រះអង្គសង្គ្រោះ ទាក់ទងនឹងកិច្ចខិតខំរបស់ទ្រង់ដើម្បីធ្វើអ្វីមួយសម្រាប់ពួកគេ ដែលពួកគេមិនអាចធ្វើបានដោយខ្លួនឯង ។ បន្ទាប់មក សូមអញ្ជើញពួកគេឲ្យគិតពីអារម្មណ៍របស់បុព្វការីជនយើង ដែលបានទទួលមរណភាពហើយ នៅពេលយើងទទួលពិធីបរិសុទ្ធសង្គ្រោះសម្រាប់ពួកគាត់ ដែលពួកគាត់មិនអាចទទួលវាដោយខ្លួនគាត់បាន ។

ព្រះអម្ចាស់ប្រទានពរដល់អស់អ្នកដែលធ្វើការបម្រើក្នុងកិច្ចការព្រះវិហារបរិសុទ្ធ និងពង្សប្រវត្តិ ។

ការអភិវឌ្ឍការបង្រៀន និងការរៀនសូត្ររបស់យើង

ផ្ដល់ការអញ្ជើញដែលលើកទឹកចិត្តឲ្យមានការអនុវត្ត ។ សិស្សនឹងរៀនសូត្រពីដំណឹងល្អបានកាន់តែស៊ីជម្រៅ នៅពេលពួកគេអនុវត្តតាមគោលការណ៍ និងសេចក្ដីពិតនៃគោលលទ្ធិ ។ ការធ្វើសកម្មភាពដោយសេចក្ដីជំនឿជួយពួកគេឲ្យប្រែចិត្តជឿលើព្រះអង្គសង្គ្រោះ ហើយទទួលបានពរជ័យទាំងឡាយ ដែលទ្រង់បានសន្យាដល់អស់អ្នកដែលគោរពប្រតិបត្តិតាម ។ នៅពេលអ្នករៀបចំជួយសិស្សនៅក្នុងថ្នាក់ សូមផ្ដល់អាទិភាពសមរម្យមួយចំពោះសំណួរ និងសកម្មភាពនានាដែលនឹងលើកទឹកចិត្តឲ្យមានការអនុវត្ត ។

សូមពិចារណាអញ្ជើញសិស្សដែលអាចប្រើឧបករណ៍អេឡិចត្រូនិចរបស់ពួកគេបាន ឲ្យចូលទៅគេហទំព័រ FamilySearch.org ឬកម្មវិធីមែកធាងក្រុមគ្រួសារនៃកម្មវិធីស្រាវជ្រាវក្រុមគ្រួសារ ។ ( អ្នកក៏អាចបង្ហាញគេហទំព័រនេះ ឬកម្មវិធីនេះដល់សិស្សក្នុងថ្នាក់ផងដែរ ឬផ្ដល់យោបល់ឲ្យសិស្សដែលគ្មានឧបករណ៍អេឡិចត្រូនិច ឲ្យមើលជាមួយនឹងមិត្តរួមថ្នាក់ណាដែលមានឧបករណ៍នោះ ) ។ សូមរកមើលមុខងារមួយចំនួននៃគេហទំព័រ ឬកម្មវិធីនេះរួមគ្នា ។ អ្នកអាចប្រើមុខងារ « សាច់ញាតិនៅជុំវិញខ្ញុំ » ដើម្បីជួយសិស្សឲ្យឃើញពីរបៀបដែលពួកគេជាប់សាច់ញាតិនឹងគ្នា ។ សូមពិចារណាថា តើសំណួរខាងក្រោមណាមួយដែលអាចមានប្រយោជន៍ដល់ការពិភាក្សានេះ ៖

តើអ្នកមានបទពិសោធន៍អ្វីខ្លះជាមួយនឹងការធ្វើពង្សប្រវត្តិ ?
តើអ្វីទៅដែលរារាំងអ្នក ឬបានរារាំងអ្នកកាលពីអតីតកាលមិនឲ្យធ្វើពង្សប្រវត្តិ ? តើអ្នកបានយកឈ្នះលើឧបសគ្គប្រភេទទាំងនេះបានយ៉ាងដូចម្តេច ? តើព្រះអម្ចាស់អាចជួយអ្នកក្នុងកិច្ចខិតខំរបស់អ្នកបានយ៉ាងដូចម្តេច ?
ប្រសិនបើអ្នកបានទទួលពិធីបរិសុទ្ធនៃព្រះវិហារបរិសុទ្ធជំនួសឲ្យបុព្វការីជនរបស់អ្នករួចហើយ តើអ្នកមានអារម្មណ៍យ៉ាងណានៅពេលនោះ ?

អ្នកអាចបង្ហាញវីដេអូ « The Promised Blessings of Family History » ( ៣:២៤ ) បាន ( ដែលមានសេចក្ដីយោងនៅក្នុង ផ្នែកទី ២ នៃឯកសាររៀបចំ ) ។

សូមពិចារណាសូមឲ្យសិស្សរៀបរាប់ពីពរជ័យមួយចំនួន ដែលព្រះអម្ចាស់ និងថ្នាក់ដឹកនាំសាសនាចក្ររបស់ទ្រង់បានសន្យាដល់អស់អ្នកដែលចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។

សូមអញ្ជើញសិស្សឲ្យពិចារណាពីអំណាច ឬពរជ័យខាងវិញ្ញាណ ដែលពួកគេត្រូវការជាពិសេសនៅពេលនេះ ( សូមអញ្ជើញពួកគេឲ្យពិនិត្យមើលបញ្ជីនៅលើក្ដារខៀន មកពីដើមមេរៀនឡើងវិញ ) ។ សូមឲ្យសិស្សចែកចាយ ឬថ្លែងទីបន្ទាល់អំពីគ្រាដែលពួកគេបានដកពិសោធន៍ពរជ័យទាំងនេះ នៅពេលពួកគេបានចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។

សូមឲ្យសិស្សមានពេលវេលាពីរបីនាទី ដើម្បីកត់ត្រាពីរបៀបដែលពួកគេអាចអនុវត្តតាមអ្វី ដែលពួកគេបានរៀននៅក្នុងមេរៀននេះ ។ សូមលើកទឹកចិត្តពួកគេឲ្យដាក់គោលដៅមួយ ដែលពួកគេមានអារម្មណ៍ថាអាចសម្រេចបាន ដើម្បីចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិឲ្យបានទៀងទាត់ ។ ពួកគេក៏អាចកត់ត្រាពីពរជ័យ ដែលពួកគេសង្ឃឹមថានឹងទទួលបានមកពីការធ្វើកិច្ចការទាំងនោះផងដែរ ។

កំណត់ចំណាំ ៖ នៅពេលអ្នកជួបនឹងសិស្សរបស់អ្នកលើកក្រោយ សូមស្វែងរកឱកាសសួរពួកគេថា តើពួកគេដើរដល់ណាជាមួយនឹងគោលដៅព្រះវិហារបរិសុទ្ធ និងពង្សប្រវត្តិរបស់ពួកគេនោះ ។

សម្រាប់ពេលក្រោយ

នៅចុងបញ្ចប់នៃមេរៀននេះ ឬអំឡុងសប្ដាហ៍នេះ អ្នកអាចអញ្ជើញសិស្សឲ្យសម្ភាសប្ដីប្រពន្ធមួយគូ ដែលបានផ្សារភ្ជាប់នៅក្នុងព្រះវិហារបរិសុទ្ធ ។ សូមអញ្ជើញសិស្សឲ្យសួរប្ដីប្រពន្ធនោះ ពីរបៀបដែលអាពាហ៍ពិពាហ៍របស់ពួកគាត់ទទួលឥទ្ធិពលពីសេចក្ដីសញ្ញា ដែលពួកគាត់បានចុះនៅពេលពួកគាត់ផ្សារភ្ជាប់ និងពីរបៀបដែលពួកគាត់ព្យាយាមខិតទៅកាន់ជិតនឹងព្រះជាមួយគ្នា ។