មេរៀនទី ១៣ ឯកសារគ្រូបង្រៀន ៖ អំណោយទានដ៏ទេវភាព និងការទទួលខុសត្រូវដ៏ពិសិដ្ឋនៃភាពសិទ្ធិស្នាលខាងផ្លូវភេទ

« មេរៀនទី ១៣ ឯកសារគ្រូបង្រៀន ៖ អំណោយទានដ៏ទេវភាព និងការទទួលខុសត្រូវដ៏ពិសិដ្ឋនៃភាពសិទ្ធិស្នាលខាងផ្លូវភេទ » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ១៣ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច

មេរៀនទី ១៣ ឯកសារគ្រូបង្រៀន

អំណោយទានដ៏ទេវភាព និងការទទួលខុសត្រូវដ៏ពិសិដ្ឋនៃភាពសិទ្ធិស្នាលខាងផ្លូវភេទ

ភាពស្និទ្ធស្នាលខាងផ្លូវភេទរវាងស្វាមី និងភរិយាគឺជាអំណោយទានមកពីព្រះ វាត្រូវបានតែងតាំងឡើងជាផ្នែកមួយដ៏ស្រស់ស្អាត និងពិសិដ្ឋនៅក្នុងចំណងអាពាហ៍ពិពាហ៍ ។ នៅក្នុងមេរៀននេះ សិស្សនឹងយល់កាន់តែស៊ីជម្រៅអំពីសេចក្ដីពិតដ៏អស់កល្ប ដែលទាក់ទងទៅនឹងអំណោយទានដ៏ទេវភាពនេះ ។ សិស្សក៏នឹងវាយតម្លៃពីដែនកំណត់ ឬព្រំដែនដែលពួកគេបានដាក់ ឬត្រូវដាក់ដើម្បីជួយពួកគេឲ្យរស់នៅតាមច្បាប់ព្រហ្មចារីភាពផងដែរ ។

កំណត់ចំណាំ ៖ ដោយសារតែលក្ខណៈដ៏រសើបនៃប្រធានបទនេះ សូមបង្រៀនគោលលទ្ធិឲ្យបានច្បាស់លាស់ ប៉ុន្ដែដោយមានការប្រុងប្រយ័ត្ន និងការយកចិត្តទុកដាក់ ។ អ្នកអាចត្រូវសម្របវិធីសាស្ដ្របង្រៀន ឬសាច់រឿងដែលបានប្រើនៅក្នុងមេរៀននេះ ដើម្បីឲ្យវាត្រូវទៅតាមវប្បធម៌របស់អ្នក ។

យោបល់សម្រាប់ការបង្រៀន

ការអភិវឌ្ឍការបង្រៀន និងការរៀនសូត្ររបស់យើង

សូមបង្កើតឲ្យមានអារម្មណ៍នៃភាពពិសិដ្ឋ ។ វិធីសាស្រ្តដែលគ្រូបង្រៀនរៀបចំបង្រៀន ឬគ្រោងប្រធានបទមួយ អាចជួយសិស្សឲ្យមានអារម្មណ៍ពីលក្ខណៈដ៏ពិសិដ្ឋនៃប្រធានបទនេះ ។ អែលឌើរ ប៉ូល ប៊ី ផែបភើរ នៃពួកចិតសិបនាក់បានបង្រៀនថា « តាមរយៈការកំណត់អ្វីមួយថាពិសិដ្ឋ ព្រះអម្ចាស់បង្ហាញថា វាមានតម្លៃ និងមានអាទិភាពជាងកិច្ចការផ្សេងៗទៀត » ( « To Hold Sacred » Ensign ឬ Liahona ខែ ឧសភា ឆ្នាំ ២០១២ ទំព័រ ១០៩ ) ។ នៅពេលអ្នកពិភាក្សាអំពីភាពជិតស្និទ្ធខាងផ្លូវភេទ សូមសញ្ជឹងគិតពីរបៀបដែលអ្នកអាចជំរុញឲ្យមានការពិភាក្សាដ៏ស្មោះត្រង់ និងឥតលាក់លៀមមួយ ខណៈពេលជួយសិស្សឲ្យមានអារម្មណ៍ និងយល់ពីលក្ខណៈដ៏ពិសិដ្ឋនៃប្រធានបទនេះផងដែរ ។

ភាពស្និទ្ធស្នាលខាងផ្លូវភេទរវាងស្វាមី និងភរិយាមានគោលបំណងធ្វើឲ្យមានភាពស្រស់ស្អាត និងពិសិដ្ឋ ។

សូមបង្ហាញសាច់រឿងខាងក្រោមនេះ ៖

មិត្តរបស់អ្នកមិនយល់ពីមូលហេតុ ដែលអ្នកគិតថា ការរួមភេទមុនពេលរៀបអាពាហ៍ពិពាហ៍គឺជារឿងខុសឆ្គងនោះទេ ។ ថ្ងៃមួយ មិត្តម្នាក់បាននិយាយមកកាន់អ្នកថា « តើមានអ្វីខុសនឹងការរួមភេទជាមួយនរណាម្នាក់ ដែលអ្នកស្រឡាញ់នោះ ? ប្រសិនបើទាំងពីរនាក់យល់ព្រម តើការណ៍នោះអាចជាបញ្ហាដោយរបៀបណា ? តើអ្នកមិនគិតថា អ្នកកំពុងតែខកខានផ្នែកដ៏សំខាន់ និងរីករាយមួយនៃជីវិតនេះ ដោយការរង់ចាំទាល់តែអ្នករៀបការហើយដើម្បីមានការរួមភេទទេឬអី ? »

សូមអញ្ជើញសិស្សឲ្យពិនិត្យឡើងវិញក្នុង ផ្នែកទី ១ និងទី ២ នៃឯកសាររៀបចំ ហើយរកមើលសេចក្ដីពិត ដែលអាចជួយពួកគេឲ្យឆ្លើយតបទៅនឹងសាច់រឿងនេះ ចេញពីទស្សនវិស័យនៃដំណឹងល្អ ។ សូមអញ្ជើញសិស្សពីរបីនាក់ឲ្យសរសេរសេចក្ដីពិតនានា ដែលពួកគេបានរកឃើញដាក់នៅលើក្ដារខៀន ។ សេចក្ដីពិតនានាអាចរួមមាន ៖ ព្រះបានដាក់បញ្ញត្តិថា ភាពស្និទ្ធស្នាលខាងផ្លូវភេទគឺត្រូវបង្ហាញឡើងតែរវាងបុរសម្នាក់ និងស្រ្តីម្នាក់ ដែលបានរៀបអាពាហ៍ពិពាហ៍តាមច្បាប់ប៉ុណ្ណោះ ។ ភាពស្និទ្ធស្នាលខាងផ្លូវភេទនៅក្នុងអាពាហ៍ពិពាហ៍ មានគោលបំណងដើម្បីបង្ហាញនូវសេចក្ដីស្រឡាញ់ បង្កើតជីវិត និងពង្រឹងដល់ទំនាក់ទំនង និងសាមគ្គីភាព ។ ភាពស្និទ្ធស្នាលខាងផ្លូវភេទគឺជានិមិត្តរូបនៃការតាំងចិត្តយ៉ាងពេញលេញ និងការរួបរួមគ្នាទាំងស្រុងនៅក្នុងអាពាហ៍ពិពាហ៍ ។ រូបកាយសាច់ឈាមរបស់យើងគឺជាផ្នែកមួយដ៏សំខាន់នៃព្រលឹងរបស់យើង ហើយរបៀបដែលយើងប្រើប្រាស់រូបកាយនេះ ជះឥទ្ធិពលទៅលើវិញ្ញាណរបស់យើង និងការរីកចម្រើនដ៏អស់កល្បជានិច្ចរបស់យើងផងដែរ ។

អ្នកនឹងមិនមានពេលដើម្បីស្វែងយល់ពីសេចក្ដីពិតទាំងអស់នេះឲ្យបានស៊ីជម្រៅនោះទេ ដូច្នេះសូមផ្ដោតទៅលើសេចក្ដីពិតទាំងឡាយណា ដែលសិស្សចាប់អារម្មណ៍ចង់ពិភាក្សាខ្លាំងបំផុត ។ សំណួរខាងក្រោមនេះមួយចំនួនអាចនឹងជួយធ្វើឲ្យការរៀនសូត្ររបស់សិស្សបានស៊ីជម្រៅ ៖

យោងតាម លោកុប្បត្តិ ២:១៨, ២១–២៤ តើលោកអ័ដាម និងនាងអេវ៉ាបានរៀនអ្វីខ្លះ អំពីធម្មជាតិនៃសេចក្ដីស្រឡាញ់ក្នុងចំណងអាពាហ៍ពិពាហ៍ ? តើស្វាមី និងភរិយាអាចមានពរជ័យ តាមរយៈការមើលទៅភាពស្និទ្ធស្នាលខាងផ្លូវភេទថាជានិមិត្តរូបមួយនៃការបញ្ចូល « ដួងចិត្ត សេចក្ដីសង្ឃឹម ជីវិត សេចក្ដីស្រឡាញ់ គ្រួសារ អនាគត និងអ្វីៗគ្រប់យ៉ាងរបស់ពួកគេ » យ៉ាងដូចម្តេច ? ( ជែហ្វ្រី អ័រ ហូឡិន « Personal Purity » Ensign ខែ វិច្ឆិកា ឆ្នាំ ១៩៩៨ ទំព័រ ៧៦ ) ។ ( សូមពិចារណាអញ្ជើញសិស្សឲ្យរំឭកឡើងវិញក្នុង សេចក្ដីថ្លែងការណ៍ដោយអែលឌើរ ជែហ្វ្រី អ័រ ហូឡិន នៅក្នុងផ្នែកទី ១ នៃឯកសាររៀបចំ ។ ជាផ្នែកមួយនៃការពិភាក្សានេះ សូមជួយសិស្សឲ្យយល់ថា នៅពេលស្វាមីភរិយាបណ្ដុះឲ្យមានភាពជិតស្និទ្ធខាងបញ្ញា សតិអារម្មណ៍ និងខាងវិញ្ញាណរបស់ពួកគេ នោះភាពស្និទ្ធស្នាលខាងផ្លូវភេទរបស់ពួកគេនឹងកាន់តែមានអត្ថន័យថែមទៀត ) ។
ហេតុអ្វីវាខុសឆ្គងដើម្បីមើលទៅភាពស្និទ្ធស្នាលខាងផ្លូវភេទ ថាគ្រាន់តែជាបទពិសោធន៍ខាងរូបកាយ ដែលមានបំណងដើម្បីតែផ្ដល់ការរីករាយខាងផ្លូវកាយប៉ុណ្ណោះនោះ ? តើភាពស្និទ្ធស្នាលខាងផ្លូវភេទនៅក្រៅចំណងអាពាហ៍ពិពាហ៍ អាចបង្កគ្រោះថ្នាក់ខាងសតិអារម្មណ៍ និងខាងវិញ្ញាណដល់អស់អ្នកដែលពាក់ព័ន្ធយ៉ាងដូចម្ដេច ? ( វាអាចមានប្រយោជន៍ដើម្បីអញ្ជើញសិស្សឲ្យរំឭកឡើងវិញក្នុង សេចក្ដីថ្លែងការណ៍ដោយអែលឌើរ ហូឡិន នៅក្នុងផ្នែកទី ២ នៃឯកសាររៀបចំនេះ ) ។
តើទីបន្ទាល់អំពីព្រះយេស៊ូវគ្រីស្ទ និងដង្វាយធួនរបស់ទ្រង់ និងគោលបំណងដ៏ទេវភាពនៃរូបកាយសាច់ឈាមនេះ អាចមានឥទ្ធិពលយ៉ាងណាទៅលើរបៀបដែលយើងប្រព្រឹត្តចំពោះភាពស្និទ្ធស្នាលខាងផ្លូវភេទ ? ( សូមពិចារណាអញ្ជើញសិស្សម្នាក់ឲ្យអាន កូរិនថូស ទី១ ៦:១៩–២០ ឮៗ មុនពេលសួរសំណួរនេះ ) ។
តើការយល់ដឹងពីសេចក្ដីពិតដែលមានសរសេរនៅលើក្ដារខៀននេះ អាចជួយលុបបំបាត់នូវឥរិយាបថអវិជ្ជមាន ឬការគិតដោយមានការភ័យខ្លាចអំពីភាពស្និទ្ធស្នាលខាងផ្លូវភេទដោយរបៀបណា ?

ដោយមានជំនួយពីព្រះអម្ចាស់ នោះយើងអាចបង្កើនភាពបរិសុទ្ធផ្ទាល់ខ្លួនរបស់យើង ហើយរស់នៅកាន់តែរីករាយពេញលេញតាមច្បាប់ព្រហ្មចារីភាព ។

សូមអញ្ជើញឲ្យសិស្សនឹកស្រមៃថា ពួកគេគឺជាឪពុកម្ដាយរបស់កូនប្រុស ឬកូនស្រីអាយុ ១៣ ឆ្នាំម្នាក់ ។ ពួកគេមានអារម្មណ៍ថា វាជាការណ៍ល្អដើម្បីមានការសន្ទនាម្ដងទៀតជាមួយនឹងកូនរបស់ពួកគេអំពីច្បាប់ព្រហ្មចារីភាព ។ សូមផ្ដល់ពេលវេលាពីរបីនាទីឲ្យសិស្សចែកចាយនៅក្នុងក្រុមតូចៗ ពីរបៀបដែលពួកគេនឹងបង្រៀន ឬបញ្ជាក់សាជាថ្មីអំពីច្បាប់ព្រហ្មចារីភាពទៅកាន់កូនអាយុ ១៣ ឆ្នាំរបស់ពួកគេ ។ សូមហាមប្រាមសិស្សកុំឲ្យប្រើប្រាស់ភាសា ឬការប្រៀបធៀបដែលអាចបង្កឲ្យមានភាពខ្មាសអៀន ការភ័យខ្លាច ឬការភាន់ច្រឡំ ។ ក្រោយពីមានពេលគ្រប់គ្រាន់ហើយ សូមសួរសិស្សក្នុងថ្នាក់ ៖

តើអ្នកនឹងបង្រៀនតាមរបៀបណា ដែលអាចជួយក្មេងវ័យជំទង់ម្នាក់ឲ្យមានអារម្មណ៍វិជ្ជមាន អំពីអំណោយទានដ៏ទេវភាពនៃភាពស្និទ្ធស្នាលខាងផ្លូវភេទ និងច្បាប់ព្រហ្មចារីភាព ?
តើមានការបង្រៀនណាខ្លះ ដែលអ្នកបានរៀនពេលធំឡើង ដែលបានជួយអ្នកឲ្យមើលទៅភាពស្និទ្ធស្នាលខាងផ្លូវភេទថាជាអ្វីមួយ ដែលជាផ្នែកដ៏ស្រស់ស្អាត និងសមរម្យនៅក្នុងអាពាហ៍ពិពាហ៍នោះ ?

សូមឲ្យសិស្សម្នាក់អាន អាលម៉ា ៣៨:១២ ឮៗ ។ សូមលើកទឹកចិត្តសិស្សឲ្យពិចារណាគូសចំណាំការបង្រៀនរបស់អាលម៉ា ដែលឆ្លុះបញ្ចាំងពីគោលការណ៍ដូចតទៅនេះ ៖ ប្រសិនបើយើងគ្រប់គ្រងចំណង់របស់យើងបាន នោះយើងអាចពោរពេញដោយសេចក្ដីស្រឡាញ់បាន ។

សូមដាក់បង្ហាញចំណងជើង និងសំណួរខាងក្រោម ។ ( ប្រសិនបើអ្នកចង់ អ្នកអាចបោះពុម្ពច្បាប់ចម្លង និងចែកចាយវាបាន ) ។ សូមអញ្ជើញសិស្សឲ្យធ្វើការនៅក្នុងក្រុមតូចរបស់ពួកគេដដែល ហើយជ្រើសរើសសំណួរពីរ ឬបីដែលពួកគេមានអារម្មណ៍ថា វាពាក់ព័ន្ធនឹងពួកគេ ហើយពិភាក្សាពីសំណួរទាំងនោះ ។

ការដាក់ដែនកំណត់ និងការស្វែងរកជំនួយដ៏ទេវភាពដើម្បីរស់នៅតាមច្បាប់ព្រហ្មចារីភាព

ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ១៣

តើមានឧបសគ្គដ៏ធំបំផុតអ្វីខ្លះ ក្នុងការរស់នៅតាមច្បាប់ព្រហ្មចារីភាព ? តើយើងអាចយកឈ្នះលើឧបសគ្គទាំងនេះដោយរបៀបណា ?
តើការអនុវត្តសេចក្ដីជំនឿលើព្រះយេស៊ូវគ្រីស្ទ និងការស្វែងរកព្រះគុណរបស់ទ្រង់ បានជួយអ្នកឲ្យកាន់តាមច្បាប់ព្រហ្មចារីភាពដោយរបៀបណា ? ( សូមពិចារណាពិនិត្យមើលឡើងវិញក្នុង កូរិនថូស ទី១ ១០:១៣; អាលម៉ា ១៣:២៨; គោលលទ្ធិ និង សេចក្ដីសញ្ញា ៦២:១ ) ។
ហេតុអ្វីបានជាវាសំខាន់ដើម្បីដាក់ដែនកំណត់របស់អ្នកទាំងមុនពេល និងអំឡុងពេលអាពាហ៍ពិពាហ៍ នៅពេលវាពាក់ព័ន្ធទៅនឹងការកាន់តាមច្បាប់ព្រហ្មចារីភាព ? តើគូសង្សារដែលកំពុងដើរលេងជាគូ ទទួលបានពរជ័យ តាមរយៈការមានការពិភាក្សាអំពីព្រំដែនរបស់ពួកគេ សម្រាប់ការបង្ហាញការស្រឡាញ់ខាងរូបកាយនោះយ៉ាងដូចម្ដេច ? ( អ្នកអាចចង់ពិនិត្យឡើងវិញក្នុង សេចក្ដីថ្លែងការណ៍របស់អែលឌើរ នែល អិល អាន់ឌើរសិន នៅក្នុងផ្នែកទី ៣ នៃឯកសាររៀបចំ ) ។
មិនថាអ្នកនៅលីវ ឬរៀបការរួចហើយនោះទេ តើអ្នកឃើញថា មានយុទ្ធសាស្ដ្រ ការអនុវត្ត និងព្រំដែនអ្វីខ្លះដែលមានប្រយោជន៍បំផុត ក្នុងការកាន់តាមច្បាប់ព្រហ្មចារីភាព ?
តើយើងគោរពតាមព្រះវរបិតាសួគ៌ និងព្រះយេស៊ូវគ្រីស្ទតាមរយៈការកាន់តាមច្បាប់ព្រហ្មចារីភាពដោយរបៀបណា ?

រូបភាព

សំណៅចែករបស់គ្រូបង្រៀន

ដើម្បីបញ្ចប់មេរៀន សូមអញ្ជើញសិស្សក្នុងថ្នាក់ឲ្យចែកចាយនូវរបៀបនៃការយល់ដឹងរបស់ពួកគេអំពីភាពស្និទ្ធស្នាលខាងផ្លូវភេទ និងច្បាប់ព្រហ្មចារីភាព ត្រូវបានពង្រឹងតាមរយៈការពិភាក្សានៅក្នុងឯកសាររៀបចំ និងនៅក្នុងថ្នាក់រៀន ។

សូមអញ្ជើញសិស្សឲ្យពិនិត្យឡើងវិញនូវអ្វីដែលពួកគេបានកត់ត្រា ដែលជាចម្លើយចំពោះ ការបំផុសគំនិតឲ្យ « កត់ត្រាគំនិតរបស់អ្នក » នៅក្នុងផ្នែកទី ៣ នៃឯកសាររៀបចំ និងបន្ថែមគំនិតផ្សេងៗទៀតដែលពួកគេមាន ឬចំណាប់អារម្មណ៍ទាំងឡាយដែលពួកគេបានទទួល ។ អ្នកក៏អាចអញ្ជើញពួកគេឲ្យគិតអំពីរបៀប ដែលព្រះអង្គសង្គ្រោះបានធ្វើឲ្យយើងអាចយកឈ្នះលើការល្បួង និងអំពើបាបខាងផ្លូវភេទ ហើយមានទំនាក់ទំនងដ៏ល្អប្រពៃផងដែរ ។

សូមចែកចាយទីបន្ទាល់របស់អ្នកអំពីសេចក្ដីពិតទាំងឡាយ ដែលបានបង្រៀននៅថ្ងៃនេះ ហើយសូមលើកទឹកចិត្តសិស្សឲ្យស្វែងរកជំនួយដ៏ទេវភាព នៅពេលពួកគេខិតខំរស់នៅតាមច្បាប់ព្រហ្មចារីភាព ។

សម្រាប់ពេលក្រោយ

សូមចង្អុលប្រាប់សិស្សថា ការគំរាមកំហែងដ៏គ្រោះថ្នាក់បំផុតមួយចំពោះភាពបរិសុទ្ធផ្ទាល់ខ្លួនរបស់យើងគឺ រូបអាសគ្រាម ។ សូមអញ្ជើញសិស្សឲ្យសិក្សា ឯកសាររៀបចំសម្រាប់មេរៀនលើកក្រោយ ដោយមានការប្រុងប្រយ័ត្ន ហើយរកមើលរបៀបដែលពួកគេអាចចៀសវាង និងជួយមនុស្សដទៃឲ្យចៀសវាងពីការគំរាមកំហែងនេះបាន ។