« មេរៀនទី ១១ ៖ ឯកសាររៀបចំសម្រាប់ថ្នាក់ ៖ ការជ្រើសរើសដៃគូដ៏អស់កល្បជានិច្ច » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )
« មេរៀនទី ១១ ឯកសាររៀបចំសម្រាប់ថ្នាក់ » ឯកសារគ្រូបង្រៀន គ្រួសារដ៏អស់កល្បជានិច្ច
មេរៀនទី ១១ ឯកសាររៀបចំសម្រាប់ថ្នាក់
ការជ្រើសរើសដៃគូដ៏អស់កល្បជានិច្ច
អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់បានប្រឹក្សាថា « សូម ‹ ចូលរួមឲ្យបានរស់រវើក › [ គោលលទ្ធិ និង សេចក្ដីសញ្ញា ៥៨:២៧ ] ក្នុងសកម្មភាពខាងវិញ្ញាណ និងខាងសង្គមដែលអាចសម្រេចគោលដៅអ្នកទៅរកអាពាហ៍ពិពាហ៍ក្នុងព្រះវិហារបរិសុទ្ធ » ( « Choose Wisely » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៤៧ ) ។ នៅពេលអ្នកសិក្សាឯកសារសម្រាប់មេរៀននេះ សូមពិចារណាពីរបៀបដែលសេចក្ដីជំនឿលើព្រះអម្ចាស់អាចជួយអ្នកបាន នៅពេលអ្នកស្វែងរក ជ្រើសរើស និងស្រឡាញ់ដៃគូដ៏អស់កល្បជានិច្ចរបស់អ្នក ។
កំណត់ចំណាំ ៖ ការដើរលេងជាគូមានអត្ថន័យខុសគ្នាទៅតាមវប្បធម៌ផ្សេងៗគ្នា ។ សម្រាប់គោលបំណងនៃមេរៀននេះ ការដើរលេងជាគូសំដៅទៅលើការចំណាយពេលវេលាជាមួយនរណាម្នាក់ដែលមានភេទផ្ទុយគ្នា ប៉ុន្តែត្រូវធ្វើតាមបទដ្ឋាននៃដំណឹងល្អ និងដោយមានបំណងបង្កើតទំនាក់ទំនងមួយ ដែលនៅទីបញ្ចប់អាចនាំទៅរកអាពាហ៍ពិពាហ៍ ។
ផ្នែកទី ១
តើការអនុវត្តសេចក្ដីជំនឿលើព្រះអម្ចាស់អាចជួយខ្ញុំឲ្យបង្កើតទំនាក់ទំនងមួយ ដែលអាចនាំទៅរកអាពាហ៍ពិពាហ៍តាមរបៀបណា ?
ការដើរលេងជាគូអាចជារឿងដ៏អស្ចារ្យ តែក៏ជារឿងពិបាកផងដែរ ។ វាផ្ដល់ឱកាសឲ្យយើងរៀនស្គាល់មនុស្សដទៃ មានបទពិសោធន៍ថ្មីៗ និងរៀនពីមេរៀនដ៏សំខាន់អំពីខ្លួនយើង និងអំពីទំនាក់ទំនង ។ ដោយផ្អែកលើសារៈសំខាន់នៃអាពាហ៍ពិពាហ៍ នោះមិនគួរភ្ញាក់ផ្អើលនោះទេ ដែលយើងអាចប្រឈមមុខនឹងបញ្ហា នៅពេលយើងដើរលេងជាគូ និងរៀបចំខ្លួនសម្រាប់អាពាហ៍ពិពាហ៍ ។ តើអ្នក ឬនរណាម្នាក់ដែលអ្នកស្គាល់ ធ្លាប់បានដកពិសោធន៍រឿងខាងក្រោមនេះណាមួយ ដែលអាចពន្យារពេល ឬបញ្ឈប់ការបន្ដទៅរកអាពាហ៍ពិពាហ៍ដ៏អស់កល្បមួយដែរឬទេ ?
-
ការខ្លាចគេបដិសេធ
-
ការថប់បារម្ភនៅក្នុងមជ្ឈដ្ឋានសង្គម
-
ការខ្វះឱកាស ឬខ្វះការរំពឹងទុក
-
ការនឿយហត់ខាងសតិអារម្មណ៍ ដោយសារទំនាក់ទំនងបរាជ័យច្រើនដង
-
ភាពមិនប្រាកដប្រជាខាងសេដ្ឋកិច្ច
-
ការផ្ដោតលើការអប់រំ ឬអាជីពការងារតែមួយមុខ
-
ការមិនហ៊ានធ្វើការតាំងចិត្ត
-
ការបាត់បង់ទំនុកចិត្តលើអាពាហ៍ពិពាហ៍
ខណៈពេលបម្រើនៅក្នុងគណៈប្រធានសមាគមសង្គ្រោះទូទៅ នោះប្រធាន ជូលី ប៊ី ប៊េក បានសង្កេតឃើញថា យុវវ័យជាច្រើនកំពុងដាក់ « សារៈសំខាន់លើការបង្កើតគ្រួសារដ៏អស់កល្បជានិច្ចមួយកាន់តែតិចទៅៗ ។ មនុស្សជាច្រើនគិតឃើញថា ការបង្កើតក្រុមគ្រួសារមិនមែនជា កិច្ចការដែលផ្អែកលើសេចក្ដីជំនឿ នោះទេ » ( « Teaching the Doctrine of the Family » Ensign ខែ មិនា ឆ្នាំ ២០១១ ទំព័រ ១៤; បានបន្ថែមការគូសបញ្ជាក់ ) ។
ការសិក្សានៅក្នុងការរៀបចំសម្រាប់ថ្នាក់រៀន
សូមអាន សុភាសិត ៣:៥–៦; នីហ្វៃទី២ ២២:២ ហើយសញ្ជឹងគិតពីរបៀបដែលសេចក្ដីជំនឿលើព្រះអម្ចាស់អាចជួយអ្នកបាន នៅពេលអ្នកស្វែងរក និងជ្រើសរើសដៃគូដ៏អស់កល្បជានិច្ច ។
ព្រះអម្ចាស់ខ្វល់ព្រះទ័យយ៉ាងខ្លាំង អំពីបទពិសោធន៍របស់អ្នកទាក់ទងទៅនឹងការស្វែងរក និងការជ្រើសរើសដៃគូដ៏អស់កល្បជានិច្ច ។ ទ្រង់នឹងជួយដល់អ្នក នៅពេលអ្នកអនុវត្តសេចក្ដីជំនឿទៅលើទ្រង់ ។ អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ បានគូសបញ្ជាក់ពីរបៀបដែលសេចក្ដីជំនឿរបស់យើងលើព្រះអង្គសង្គ្រោះអាចមានឥទ្ធិពលលើការដើរលេងជាគូ និងអាពាហ៍ពិពាហ៍ ៖
សូមជឿថា សេចក្ដីជំនឿរបស់អ្នកមានសារៈសំខាន់ជាខ្លាំងចំពោះស្នេហារបស់អ្នក ព្រោះវាពិតជាសំខាន់មែន ។ វាគឺជាគ្រោះថ្នាក់ខាងវិញ្ញាណ នៅពេលគិតថា សេចក្ដីជំនឿ និងការដើរលេងជាគូគឺជារឿងខុសគ្នានៅក្នុងជីវិតនៃភាពជាសិស្សរបស់អ្នក ។ ព្រះយេស៊ូវគ្រីស្ទ ដែលជាពន្លឺនៃលោកិយ គឺជាចង្កៀងតែមួយគត់ដែលអ្នកអាចមើលឃើញផ្លូវនៃសេចក្ដីស្រឡាញ់ និងសុភមង្គលដ៏ជោគជ័យ ។ ( « How Do I Love Thee? » New Era ខែ តុលា ឆ្នាំ ២០០៣ ទំព័រ ៨ )
ការអនុវត្តសេចក្ដីជំនឿលើព្រះយេស៊ូវគ្រីស្ទពាក់ព័ន្ធទៅនឹងការធ្វើសកម្មភាពដែលសុចរិត ។ ដូចដែលព្រះអម្ចាស់បានបង្រៀនពួកបរិសុទ្ធថ្ងៃចុងក្រោយជំនាន់ដើមមួយក្រុម ដែលចង់ដឹងពីព្រះទ័យរបស់ទ្រង់សម្រាប់ពួកគេ នោះទ្រង់រំពឹងឲ្យយើងប្រើប្រាស់សិទ្ធិជ្រើសរើសរបស់យើង ដើម្បីធ្វើសកម្មភាពដោយសេចក្ដីជំនឿ ។
ការសិក្សានៅក្នុងការរៀបចំសម្រាប់ថ្នាក់រៀន
សូមសិក្សា គោលលទ្ធិ និង សេចក្តីសញ្ញា ៥៨:២៦–២៨ ហើយគិតអំពីរបៀបដែលអ្នកអាចអនុវត្តតាមការណែនាំរបស់ព្រះអម្ចាស់សម្រាប់កិច្ចខិតខំរបស់អ្នក ដើម្បីស្វែងរកដៃគូដ៏អស់កល្បជានិច្ចម្នាក់ ។
ប្រធាន ឌៀថើរ អេហ្វ អុជដូហ្វ ដែលកាលនោះលោកនៅក្នុងគណៈប្រធានទីមួយ បាននិយាយអំពីរបៀបដែលយើងអាចឆ្ពោះទៅមុខដោយសេចក្ដីជំនឿ និងសេចក្ដីអំណត់ ៖
ចុះអ្នកដែលអស់សង្ឃឹមនឹងរកឃើញដៃគូដ៏អស់កល្បជានិច្ចម្នាក់នោះ ? ទីមួយ សូមកុំចុះចាញ់ ។ សូមទៅកាន់សកម្មភាពផ្សេងៗ ជួបគេឯង ហើយធ្វើអ្វីៗទាំងអស់ដែលអ្នកអាចធ្វើបាន ។ ខ្ញុំដឹងថា ការដើរលេងជាគូអាចពិបាក ។ ការបដិសេធគឺជារឿងដ៏ឈឺចាប់បំផុតមួយ ដែលយើងអាចជួបប្រទះ ។ …
… សូមស្វែងរករបៀបសាមញ្ញៗដើម្បីនៅជាមួយគ្នា ។ … គោលដៅគឺដើម្បីរៀនស្គាល់បុគ្គលម្នាក់ ហើយរៀនពីរបៀបបង្កើតទំនាក់ទំនងដ៏មានអត្ថន័យមួយ ជាមួយនឹងបុគ្គលដែលមានភេទផ្ទុយគ្នា ។ ( « The Reflection in the Water » [ កម្មវិធីជួបជុំប្រព័ន្ធអប់រំសាសនាចក្រសម្រាប់យុវមជ្ឈិមវ័យ នៅថ្ងៃទី ១ ខែ វិច្ឆិកា ឆ្នាំ ២០០៩ ] នៅលើគេហទំព័រ ChurchofJesusChrist.org )
ការសន្យារបស់ព្រះមិនមែនសុទ្ធតែត្រូវបានបំពេញភ្លាមៗ ឬនៅក្នុងរបៀបដែលយើងសង្ឃឹមទុកនោះទេ វាមកដល់តាមពេលវេលារបស់ទ្រង់ និងរបៀបរបស់ទ្រង់ ។ … [ ប៉ុន្ដែ ] ការសន្យារបស់ព្រះអម្ចាស់នឹងកើតមានជាក់ជាមិនខាន ប្រសិនបើវាមិនលឿនជានិច្ចទេនោះ ។ ( « Continue in Patience » Ensign ឬ Liahona ខែ ឧសភា ឆ្នាំ ២០១០ ទំព័រ ៥៨ )
ខណៈពេលបម្រើជាសមាជិកម្នាក់ក្នុងគណៈប្រធានពួកចិតសិបនាក់ អែលឌើរ ម៉ាលីន ឃេ ជែនសិន បានបង្រៀនអំពីផ្នែកដ៏សំខាន់នៃទំនាក់ទំនង ដែលបុរស និងស្ដ្រីត្រូវបង្កើតឡើងនៅក្នុងការដើរលេងជាគូ ៖
មិត្តភាពគឺជា … ផ្នែកដ៏សំខាន់ និងដ៏អស្ចារ្យខ្លាំងមួយនៃទំនាក់ទំនងស្នេហា និងអាពាហ៍ពិពាហ៍ ។ ទំនាក់ទំនងរវាងបុរសម្នាក់ និងស្ដ្រីម្នាក់ ដែលចាប់ផ្ដើមឡើងដោយមិត្តភាព រួចហើយបន្ដទៅជាមនោសញ្ចេតនា ហើយនៅទីបំផុតរៀបអាពាហ៍ពិពាហ៍នោះ ជាធម្មតានឹងក្លាយជាមិត្តភាពដ៏យូរអង្វែង និងអស់កល្បជានិច្ច ។ ( « Friendship: A Gospel Principle » Ensign ខែ ឧសភា ឆ្នាំ ១៩៩៩ ទំព័រ ៦៤ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើអ្នកអាចធ្វើអ្វីខ្លះ ឬបន្ដធ្វើអ្វីខ្លះ ដើម្បីអនុវត្តសេចក្ដីជំនឿលើព្រះអម្ចាស់ឲ្យបានកាន់តែខ្លាំងឡើង នៅក្នុងកិច្ចខិតខំរបស់អ្នកក្នុងការដើរលេងជាគូ និងការរៀបអាពាហ៍ពិពាហ៍ ? ប្រសិនបើអ្នករៀបការរួចហើយ តើអ្នកបានអនុវត្តសេចក្ដីជំនឿលើព្រះអម្ចាស់នៅក្នុងកិច្ចខិតខំរបស់អ្នក ដើម្បីស្វែងរកដៃគូដ៏អស់កល្បជានិច្ចតាមរបៀបណា ?
ផ្នែកទី ២
តើខ្ញុំគួរតែរកមើល និងបង្កើតឲ្យមានគុណសម្បត្តិអ្វីខ្លះ នៅក្នុងការរៀបចំខ្លួនសម្រាប់អាពាហ៍ពិពាហ៍ ?
តើអ្នកធ្លាប់បង្កើតបញ្ជីគុណសម្បត្តិមួយ ដែលអ្នកសង្ឃឹមចង់បានពីស្វាមី ឬភរិយាម្នាក់ដែរឬទេ ? នៅពេលដើរលេងជាគូ វាសំខាន់ដែលបុរសម្នាក់ និងស្ដ្រីម្នាក់ចំណាយពេលច្រើនជាមួយគ្នា ដើម្បីរៀនស្គាល់គុណសម្បត្តិ អត្តចរិត និងគុណតម្លៃរបស់គ្នាទៅវិញទៅមក ។ អែលឌើរ រ៉ូបឺត ឌី ហែល ក្នុងកូរ៉ុមនៃពួកសាវកដប់ពីរនាក់បានទូន្មាន ៖
នៅពេលអ្នកដើរលេងជាគូ ចូររៀនអ្វីៗឲ្យបានច្រើនពីគ្នាទៅវិញទៅមក តាមដែលអ្នកអាចធ្វើបាន ។ ចូររៀនយល់ដឹងអំពីគ្រួសាររបស់គ្នាទៅវិញទៅមកឲ្យបានច្រើន បើអាចធ្វើទៅបាន ។ តើគោលដៅរបស់អ្នកត្រូវគ្នាឬទេ ? តើអ្នកមានអារម្មណ៍ដូចគ្នាអំពីបទបញ្ញត្តិ ព្រះអង្គសង្គ្រោះ បព្វជិតភាព ព្រះវិហារបរិសុទ្ធ ភាពជាឪពុកម្ដាយ ការហៅបម្រើក្នុងសាសនាចក្រ និងការបម្រើដល់អ្នកដទៃដែរឬទេ ? តើអ្នកបានសង្កេតមើលគ្នាទៅវិញទៅមកនៅក្នុងស្ថានភាពតានតឹង ការឆ្លើយតបចំពោះភាពជោគជ័យ និងបរាជ័យ ការទប់កំហឹង និងការដោះស្រាយឧបសគ្គដែរឬទេ ? តើមនុស្សដែលអ្នកដើរលេងជាគូជាមួយនេះ ជាមនុស្សដែលធ្វើឲ្យអ្នកដទៃធ្លាក់ចុះ ឬលើកតម្កើងអ្នកដទៃឡើង ? តើអាកប្បកិរិយា និងភាសា ព្រមទាំងទង្វើរបស់គាត់ ឬនាង ជាអ្វីដែលអ្នកចង់រស់នៅជាមួយរាល់ថ្ងៃដែរឬទេ ? ( « Meeting the Challenges of Today’s World » Ensign ឬ Liahona ខែ វិច្ឆិកា ឆ្នាំ ២០១៥ ទំព័រ ៤៥–៤៦ )
អ្វីដែលកាន់តែសំខាន់ជាងគុណសម្បត្តិ ដែលអ្នកសង្ឃឹមចង់បានពីស្វាមី ឬភរិយារបស់អ្នកនោះ គឺជាគុណសម្បត្តិដែលអ្នកបង្កើតឲ្យមាននៅក្នុងខ្លួនអ្នកផ្ទាល់ ។ ទាក់ទងទៅនឹងការណ៍នេះដែរ អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានទូន្មានដូច្នេះ ៖
មនុស្សវ័យក្មេងមួយចំនួនហាក់បីដូចជាមាននូវបញ្ជីដើរទិញឥវ៉ាន់មួយ អំពីបុគ្គលិកលក្ខណៈទាំងឡាយ ដែលពួកគេចង់បាននៅក្នុងដៃគូម្នាក់ ហើយវាស់វែងពីសក្ដានុពលភាពរបស់ពួកគេ ៖ « តើអ្នកមានចំណុចទាំងអស់ដែលខ្ញុំត្រូវការដែរឬទេ ? » បើអ្នកសង្ឃឹមចង់មានដៃគូដ៏អស់កល្បមួយ ដែលមានគុណសម្បត្តិខាងវិញ្ញាណជាក់លាក់ទាំងនោះ នោះអ្នកត្រូវតែពុះពារអភិវឌ្ឍគុណសម្បត្តិខាងវិញ្ញាណទាំងនោះនៅក្នុងខ្លួនឯងសិន ។ បន្ទាប់មក នរណាម្នាក់ដែលមានគុណសម្បត្តិទាំងនោះនឹងចាប់ចិត្តមកលើអ្នកដែរ ។ ( នៅក្នុង « Understanding Heavenly Father’s Plan » នៅលើគេហទំព័រ ChurchofJesusChrist.org; សូមមើលផងដែរ គោលលទ្ធិ និង សេចក្ដីសញ្ញា ៨៨:៤០ )
ខណៈពេលបម្រើនៅក្នុងគណៈប្រធានសមាគមសង្គ្រោះទូទៅ ស៊ីស្ទើរ ខារូល អិម ស្ទីវិស បានបង្រៀនអ្វីមួយស្រដៀងគ្នានេះ ៖
សូមសិក្សាពីព្រះជន្មរបស់ព្រះយេស៊ូវគ្រីស្ទ ហើយសូមព្យាយាមប្រែក្លាយឲ្យកាន់តែដូចជាទ្រង់ ។ ប្រសិនបើអ្នកអាចអភិវឌ្ឍគុណលក្ខណៈដូចជាព្រះគ្រីស្ទទាំងនោះនៅក្នុងជីវិតរបស់អ្នកបាន ហើយព្យាយាមកាន់តែក្លាយដូចជាព្រះអង្គសង្គ្រោះ នោះអ្នកនឹងរៀបចំខ្លួនធ្វើជាស្វាមី ឬភរិយាបានកាន់តែប្រសើរហើយ ។ ( Face to Face with Elder Holland, Sister Stephens, and Elder Hallstrom [ ការចាក់ផ្សាយយុវមជ្ឈិមវ័យនៅលីវទូទាំងពិភពលោក នៅថ្ងៃទី ៨ ខែ មីនា ឆ្នាំ ២០១៦ ] នៅលើគេហទំព័រ facetoface.ChurchofJesusChrist.org )
ខណៈពេលដែលវាមានសារៈសំខាន់សម្រាប់យើង ដើម្បីអភិវឌ្ឍគុណសម្បត្តិដូចជាព្រះគ្រីស្ទ ហើយស្វែងរកគុណសម្បត្តិនោះនៅក្នុងស្វាមី ឬភរិយានាពេលអនាគតម្នាក់ នោះយើងត្រូវប្រុងប្រយ័ត្នថា យើងមិនបង្កើតឲ្យមានការរំពឹងទុកដែលមិនសមហេតុផលពីខ្លួនយើង និងអ្នកដទៃ ។ ដូចដែលអែលឌើរ ហែល បានបង្រៀនថា « គ្មានពួកយើងណាម្នាក់រៀបការនឹង ភាពល្អឥតខ្ចោះ នោះទេ យើងរៀបការនឹង សក្ដានុពលភាព » ( « Meeting the Challenges of Today’s World » ទំព័រ ៤៦ ) ។
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើអ្នកគិតថា គុណសម្បត្តិដូចជាព្រះគ្រីស្ទមួយណាដែលសំខាន់បំផុត ដែលអ្នកចង់ឲ្យមាននៅក្នុងស្វាមី ឬភរិយានោះ ? តើអ្នកកំពុងធ្វើអ្វីខ្លះ ដើម្បីបង្កើតឲ្យមានគុណសម្បត្តិទាំងនោះនៅក្នុងខ្លួនរបស់អ្នក ?
ផ្នែកទី ៣
តើខ្ញុំអាចសម្រេចចិត្តពីមនុស្សដែលខ្ញុំត្រូវរៀបការជាមួយយ៉ាងដូចម្ដេច ?
ការជ្រើសរើសមនុស្សដែលត្រូវរៀបការជាមួយ គួរតែជាការសម្រេចចិត្តដ៏ប្រុងប្រយ័ត្ន និងមានការបំផុសគំនិត ។ ប្រធាន ថូម៉ាស អេស ម៉នសុន បានចែកចាយដំបូន្មានមួយ ដែលលោកបានឃើញនៅក្នុងស៊ុមមួយនៅក្នុងផ្ទះម្ដាយមីង និងពូរបស់លោក ៖ « ជ្រើសរើសមនុស្សដែលអ្នកស្រឡាញ់ ហើយស្រឡាញ់មនុស្សដែលអ្នកជ្រើសរើស » ( « Priesthood Power » Ensign ឬ Liahona ខែ ឧសភា ឆ្នាំ ២០១១ ទំព័រ ៦៨ ) ។
វាអាចជួយបានដើម្បីដឹងថា យើងមិនមែនស្វែងរកស្នេហាដែលចារទុកមកពីបុព្វេតែមួយគត់នោះឡើយ ។ ប្រធាន ស្ពែនស៊ើរ ដបុលយូ ឃឹមបឹល បានបង្រៀនថា « ‹ មិត្តមួយរយឆ្នាំ › គឺជារឿងប្រលោមលោកប្រឌិតមួយ និងជាការបំភាន់ភ្នែកមួយ » ( « Oneness in Marriage » Ensign ខែ តុលា ឆ្នាំ ២០០២ ទំព័រ ៤២ ) ។ អែលឌើរ ហែល បានពន្យល់ថា នៅពេលយើងធ្វើការសម្រេចចិត្តដ៏សំខាន់ៗនៅក្នុងជីវិត រួមទាំងការសម្រេចចិត្តអំពីអាពាហ៍ពិពាហ៍ នោះ « ព្រះវរបិតាសួគ៌រំពឹងឲ្យយើងប្រើប្រាស់សិទ្ធិជ្រើសរើសរបស់យើង សិក្សាពីស្ថានភាពនោះក្នុងគំនិតរបស់យើងស្របទៅតាមគោលការណ៍ដំណឹងល្អ ហើយយកការសម្រេចចិត្តនោះថ្វាយដល់ទ្រង់នៅក្នុងការអធិស្ឋាន » ( « The Holy Ghost » Ensign ឬ Liahona ខែ ឧសភា ឆ្នាំ ២០១៦ ទំព័រ ១០៥ ) ។
ព្រះអម្ចាស់សព្វព្រះទ័យឲ្យបុគ្គលម្នាក់ៗខិតខំ និងរិះគិតឲ្យអស់ពីសមត្ថភាពរបស់ពួកគេនៅក្នុងការសម្រេចចិត្តថា នឹងរៀបការជាមួយនរណា ហើយស្វែងរកវិវរណៈបញ្ជាក់អំពីការសម្រេចចិត្តនោះ ។ គោលការណ៍ទាំងនេះ និងគោលការណ៍ផ្សេងទៀតស្ដីពីការទទួលបានវិវរណៈត្រូវបានបង្រៀនដល់ អូលីវើរ ខៅឌើរី នៅដើមដំបូងនៃការស្ដារឡើងវិញ ។
ការសិក្សានៅក្នុងការរៀបចំសម្រាប់ថ្នាក់រៀន
សូមអាន គោលលទ្ធិ និង សេចក្តីសញ្ញា ៦:២២–២៣ និង ៩:៧–៩ ។ នៅពេលអ្នកអាន សូមរកមើលគោលការណ៍ដើម្បីទទួលបានវិវរណៈ ដែលអាចជួយនរណាម្នាក់ឲ្យសម្រេចចិត្តថាត្រូវរៀបការនឹងបុគ្គលជាក់លាក់មួយណា ។ ( សូមមើលផងដែរ គោលលទ្ធិ និង សេចក្តីសញ្ញា ៨:២–៣; ១១:១២–១៤ ) ។
កត់ត្រាគំនិតរបស់អ្នក
សូមសរសេរប្រយោគមួយ ដែលសង្ខេបពីអ្វីដែលបានរៀនមកពីវគ្គបទគម្ពីរទាំងនេះ អំពីការទទួលបានវិវរណៈមកពីព្រះអម្ចាស់ ។