« មេរៀនទី ២០ ឯកសាររៀបចំសម្រាប់ថ្នាក់ ៖ ការទទួលខុសត្រូវដ៏ពិសិដ្ឋរបស់ឪពុក » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )
« មេរៀនទី ២០ ឯកសាររៀបចំសម្រាប់ថ្នាក់ » ឯកសារគ្រូបង្រៀន គ្រួសារដ៏អស់កល្បជានិច្ច
មេរៀនទី ២០ ឯកសាររៀបចំសម្រាប់ថ្នាក់
ការទទួលខុសត្រូវដ៏ពិសិដ្ឋរបស់ឪពុក
ព្រះវរបិតាសួគ៌បានតែងតាំងបុត្រាទាំងឡាយរបស់ទ្រង់ឲ្យមានទំនួលខុសត្រូវ « ធ្វើជាអ្នកដឹកនាំនៅក្នុងគ្រួសាររបស់ខ្លួនដោយសេចក្ដីស្រឡាញ់ និងសេចក្ដីសុចរិត ហើយមានភារកិច្ចក្នុងការផ្គត់ផ្គង់សេចក្ដីត្រូវការក្នុងជីវិត ព្រមទាំងការពារក្រុមគ្រួសារខ្លួនផង » ( « ក្រុមគ្រួសារ ៖ ការប្រកាសដល់ពិភពលោក » នៅលើគេហទំព័រ ChurchofJesusChrist.org ) ។ នៅពេលអ្នកសិក្សាមេរៀននេះ សូមគិតអំពីរបៀបដែលអ្នកមានពរជ័យដោយសារឪពុក និងបុរសដទៃទៀត ដែលបានខិតខំបំពេញទំនួលខុសត្រូវដ៏ពិសិដ្ឋទាំងនេះ ។
កំណត់ចំណាំ ៖ នៅក្នុងមេរៀននេះ យើងនឹងផ្តោតទៅលើការទទួលខុសត្រូវក្នុងការការពារ ។ ប្រធានបទអំពីការធ្វើជាអធិបតី និងការផ្គត់ផ្គង់បានពិភាក្សារួចហើយនៅក្នុងមេរៀនមុនៗ ។
ផ្នែកទី ១
តើបុរសៗអាចយកគំរូក្នុងការខិតខំរបស់ពួកគេដើម្បីធ្វើជាឪពុកល្អ តាមព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ?
ខណៈកំពុងបម្រើនៅក្នុងគណៈប្រធានសមាគមសង្គ្រោះទូទៅ ប្រធាន លីនដា ខេ ប៊ើតុន បានថ្លែងអំពីឧបសគ្គមួយចំនួន ដែលបុរសកំពុងប្រឈមមុខ ៖
វាពិបាកណាស់សម្រាប់បុរសនៃសេចក្តីសញ្ញា ក្នុងការរស់នៅក្នុងលោកិយនេះ ដែលមិនត្រឹមតែតម្រូវឲ្យបំពេញតួនាទី និងការទទួលខុសត្រូវដ៏ទេវភាពរបស់គេប៉ុណ្ណោះទេ តែថែមទាំងទទួលសារលិខិតខុសឆ្គងអំពីអត្ថន័យនៃ « បុរសពិត » ថែមទៀតផង ។ សារខុសឆ្គងទាំងនោះគឺថា « មានតែខ្ញុំទេដែលសំខាន់ » ។ ឯជ្រុងម្ខាងទៀតគឺជាសារលិខិតបន្តុះបង្អាប់ និងចំអកថា មិនត្រូវការស្វាមី និងឪពុកទាំងឡាយទៀតទេ ។ ខ្ញុំសូមអង្វរអ្នក សូមកុំស្តាប់តាមការកុហករបស់សាតាំងឡើយ ! វាចង់ក្លែងបន្លំឯកសិទ្ធិពិសិដ្ឋនៃការក្លាយជាស្វាមី ឬឪពុក ។ ពីព្រោះវាច្រណែនជាមួយអស់អ្នកដែលមានតួនាទីពិសិដ្ឋ ដែលវានឹងមិនអាចធ្វើបានទេ នោះវាមានចេតនាចង់ឲ្យ « មនុស្សលោកទាំងអស់មានទុក្ខវេទនាដូចវាដែរ … » [ នីហ្វៃទី២ ២:២៧ ] ! ( «We’ll Ascend Together » Liahona ខែ ឧសភា ឆ្នាំ ២០១៥ ទំព័រ ៣០ )
យើងអាចទប់ទល់នឹងសារក្លែងក្លាយអំពីភាពជាឪពុកបាន តាមរយៈការមើលទៅព្រះវរបិតាសួគ៌ទុកជាគំរូដ៏ល្អឥតខ្ចោះនៃភាពជាឪពុកដ៏សុចរិត ។ អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
គំរូដ៏ឥតខ្ចោះ និងដ៏ទេវភាពអំពីភាពជាឪពុក គឺព្រះវរបិតាសួគ៌របស់យើង ។ លក្ខណៈ និងគុណសម្បត្តិរបស់ទ្រង់មាននូវសេចក្ដីល្អ និងសេចក្ដីស្រឡាញ់ដ៏ឥតខ្ចោះយ៉ាងបរិបូរ ។ កិច្ចការ និងសិរីល្អរបស់ទ្រង់ គឺការរីកចម្រើន សុភមង្គល និងជីវិតអស់កល្បជានិច្ចរបស់កូនចៅទ្រង់ [ សូមមើល ម៉ូសេ ១:៣៩ ] ។ ឪពុកនៅក្នុងពិភពលោកដែលធ្លាក់ចុះនេះ គ្មានជាអ្វីទាំងអស់ បើប្រៀបទៅនឹងព្រះដ៏មានឫទ្ធានុភាពនៅស្ថានដ៏ខ្ពស់ ប៉ុន្តែពួកគេកំពុងព្យាយាមដើម្បីធ្វើតាមទ្រង់ ហើយពួកគេកំពុងធ្វើកិច្ចការរបស់ទ្រង់ដោយអស់ពីសមត្ថភាព ។ ពួកគេត្រូវបានគោរពដោយការទុកចិត្តដ៏អស្ចារ្យ និងការជឿជាក់ ។ ( « Fathers » Liahona ខែ ឧសភា ឆ្នាំ ២០១៦ ទំព័រ ៩៤ )
យើងក៏អាចរៀនគោលការណ៍នៃភាពជាឪពុកដ៏សុចរិត មកពីគំរូរបស់ព្រះយេស៊ូវគ្រីស្ទបានផងដែរ ។ នៅពេលយើងកើតខាងវិញ្ញាណម្ដងទៀត នោះទ្រង់នឹងក្លាយជាព្រះវរបិតានៃជីវិតថ្មីរបស់យើង ( សូមមើល ម៉ូសាយ ៥:៧; អេធើរ ៣:១៤; គោលលទ្ធិ និង សេចក្តីសញ្ញា ២៥:១ ) ។
ការសិក្សានៅក្នុងការរៀបចំសម្រាប់ថ្នាក់រៀន
នៅអំឡុងពេលនៃការងារបម្រើក្នុងព្រះជន្មរមែងស្លាប់របស់ទ្រង់ នោះព្រះអង្គសង្រ្គោះបានបង្រៀនពួកអ្នកដើរតាមទ្រង់ អំពីតួនាទីរបស់ទ្រង់ក្នុងនាមជាអ្នកគង្វាលល្អ ។ សូមអាន យ៉ូហាន ១០:១១–១៥ ហើយសូមគិតអំពីរបៀបដែលគំរូរបស់ព្រះអង្គសង្គ្រោះជាអ្នកគង្វាលល្អ អាចប្រៀបធៀបទៅនឹងការខិតខំរបស់ឪពុកដ៏សុចរិតក្នុងគ្រួសារមួយ ។
កត់ត្រាគំនិតរបស់អ្នក
សូមស្វែងរកវគ្គបទគម្ពីរ ឬដំណើររឿងព្រះគម្ពីរមួយ ដែលបង្រៀនអំពីគោលការណ៍នៃភាពជាឪពុកដ៏សុចរិត ចេញមកពីគំរូរបស់ព្រះវរបិតាសួគ៌ ឬព្រះយេស៊ូវគ្រីស្ទ ។ សូមកត់ត្រាគោលការណ៍ដែលអ្នករកឃើញ ហើយសរសេររបៀបដែលបុរសៗអាចអនុវត្តតាមគោលការណ៍ទាំងនេះនៅជំនាន់របស់យើងបាន ។ សូមត្រៀមខ្លួនចែកចាយគំនិតរបស់អ្នកនៅក្នុងថ្នាក់រៀន ។
ផ្នែកទី ២
តើការពេញដោយក្ដីស្រឡាញ់ និងការមានវត្តមានពេញលេញ អាចជួយឪពុកឲ្យការពារក្រុមគ្រួសាររបស់ពួកគេបានយ៉ាងដូចម្ដេច ?
ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ បានបង្រៀនថា ទំនួលខុសត្រូវរបស់ឪពុកក្នុងការការពារគ្រួសាររបស់ខ្លួនរួមមានទាំងការការពារខាងរូបកាយ និងខាងវិញ្ញាណផងដែរ ៖
ព្រះ និងព្យាការីរបស់ទ្រង់បានរំពឹងទុកពីលោកឪពុកទាំងឡាយថា ពួកគាត់មិនត្រឹមតែផ្គត់ផ្គង់ដល់ក្រុមគ្រួសាររបស់ពួកគាត់ប៉ុណ្ណោះទេ ប៉ុន្តែថែមទាំងត្រូវការពារពួកគេផងដែរ ។ គ្រោះថ្នាក់គ្រប់ប្រភេទទាំងអស់ ដែលកើតមាននៅក្នុងពិភពលោកដែលយើងរស់នៅនេះ ។ ការការពារខាងរាងកាយកុំឲ្យមានគ្រោះថ្នាក់ធម្មជាតិ ឬគ្រោះថ្នាក់បង្កឡើងដោយសារមនុស្ស គឺសំខាន់ណាស់ ។ គ្រោះថ្នាក់ខាងសីលធម៌ក៏នៅជុំវិញយើងដែរ ហើយវាប្រឈមមុខនឹងកូនៗរបស់យើងតាំងពីពួកគេនៅតូចៗមកម្ល៉េះ ។ ឪពុកមានតួនាទីយ៉ាងសំខាន់ក្នុងការការពារកូនៗកុំឲ្យជាប់អន្ទាក់បែបនេះ ។ ( « The Sacred Responsibilities of Parenthood » Ensign ខែ មីនា ឆ្នាំ ២០០៦ ទំព័រ ៣០ )
ដោយបន្ថែមលើរបៀបដែលឪពុកអាចការពារកូនៗរបស់ពួកគេបាន ប្រធាន ហាវើដ ដបុលយូ ហឹនធើរ បានបង្រៀន ៖
ឪពុកដ៏សុចរិតម្នាក់ការពារកូនៗរបស់ខ្លួនដោយការមានពេលវេលា និងវត្តមាននៅក្នុងសកម្មភាព និងការទទួលខុសត្រូវខាងសង្គម ការអប់រំ និងខាងវិញ្ញាណរបស់ពួកគេ ។ ការបង្ហាញសេចក្ដីស្រឡាញ់ដ៏ទន់ភ្លន់ចំពោះកូនៗ គឺជាការទទួលខុសត្រូវរបស់ឪពុក ដូចជាម្តាយដែរ ។ សូមប្រាប់កូនៗរបស់អ្នកថា អ្នកស្រឡាញ់ពួកគេ ។ ( « Being a Righteous Husband and Father » Ensign ខែ វិច្ឆិកា ឆ្នាំ ១៩៩៤ ទំព័រ ៥១ )
សូមមើលវីដេអូ « Father’s Day » ( ២:៣០ ) ហើយគិតអំពីរបៀបដែលឪពុកការពារកូនៗ ដោយការធ្វើអ្វីៗដែលបានបង្ហាញនៅក្នុងវីដេអូនេះ ។
ការធ្វើជាឪពុកដែលពេញដោយក្ដីស្រឡាញ់ និងមានវត្តមានពេញលេញ ត្រូវការឆន្ទៈខិតខំ និងភាពខ្ជាប់ខ្ជួន ។ សូមពិចារណាពីអ្វីដែលអ្នកអាចរៀនពីគំរូខាងក្រោមរបស់ប្រធាន រ័សុល អិម ណិលសុន ៖
ការងាររបស់ខ្ញុំគឺត្រូវគាំទ្រភរិយា និងកូនៗរបស់ខ្ញុំ មិនមែនឲ្យពួកគេមកគាំទ្រខ្ញុំនោះទេ ។ … នៅពេលអ្នកនៅផ្ទះ គឺអ្នកនៅផ្ទះ ។ សូមទុកភាពមមាញឹកពេញមួយថ្ងៃនៅមួយអន្លើសិន ។ សូមផ្តល់ការយកចិត្តទុកដាក់របស់អ្នកដល់ពួកគេ ១០០ ភាគរយ នៅពេលអ្នកនៅផ្ទះ ។ ខ្ញុំធ្លាប់ប្រាប់ខ្លួនឯងថា « កុំដើរចូលផ្ទះហ្នឹង រ័សុល រហូតដល់ឯងអាចផ្ដល់ពរជ័យដល់ជីវិតរបស់កូនៗ និងភរិយារបស់ឯងសិន » ។ ( នៅក្នុង Vivian S. Lee « Elder Russell M. Nelson, M.D., ’47 » Good Notes ( ប្លក់ ) University of Utah Health ថ្ងៃទី ១២ ខែ កញ្ញា ឆ្នាំ ២០១៤ នៅលើគេហទំព័រ uofuhealth.utah.edu/notes )
ឥទ្ធិពលវិជ្ជមានរបស់ឪពុកទៅលើកូនៗរបស់គាត់ អាចមានឥទ្ធិពលដ៏អស្ចារ្យទៅលើការអភិវឌ្ឍរបស់ពួកគេ ។ ឧទាហរណ៍ ការស្រាវជ្រាវបានបង្ហាញថា ឪពុកដែលពេញដោយសេចក្ដីស្រឡាញ់ និងភាពស្និទ្ធស្នាលអាច ៖
-
បណ្ដុះឲ្យមានការអភិវឌ្ឍការគោរពខ្លួនឯង ការគ្រប់គ្រងខ្លួនឯង ការអត់ឱនគ្រប់គ្រងភាពតានតឹង និងអារម្មណ៍អំពីភេទ ( ត្រង់នេះកំណត់ថាជាភេទជីវសាស្ត្រមកពីកំណើត ) នៅក្នុងកូនប្រុស និងកូនស្រីរបស់គាត់ ។
-
បង្កើនសុវត្ថិភាព និងទំនុកចិត្តខាងផ្លូវចិត្តរបស់កូនៗគាត់បានកាន់តែខ្លាំងឡើង និងបង្កើតទំនាក់ទំនងដ៏ល្អប្រសើរជាមួយមនុស្សដទៃ ។
-
បន្ថយចុះនៃការរាតត្បាតនៃភាពក្រីក្រ ឧក្រិដ្ឋកម្ម និងការប្រើប្រាស់គ្រឿងញៀនរបស់កុមារ ។ ( សូមមើល ជែមស៍ អ៊ី ហ្វោស្ត « Fathers, Mothers, Marriage » Ensign ខែ សីហា ឆ្នាំ ២០០៤ ទំព័រ ៣–៧; Sarah Keenan « Elephants, Fathers, and Families » Ensign ខែ កញ្ញា ឆ្នាំ ២០១៨ ទំព័រ ៥៤–៥៨; សូមមើលផងដែរសេចក្ដីយោងដែលបានដកស្រង់នៅក្នុងអត្ថបទទាំងនេះ ) ។
ឥទ្ធិពលការពាររបស់ឪពុកគឺជាការបំពេញបន្ថែមដ៏មានឥទ្ធិពល ទៅលើឥទ្ធិពលចិញ្ចឹមបីបាច់ដ៏សំខាន់របស់ម្តាយ ។ ក្នុងនាមជាដៃគូស្មើភាពគ្នាក្នុងចំណងអាពាហ៍ពិពាហ៍ នោះស្វាមី និងភរិយាមានទំនួលខុសត្រូវក្នុងការការពារក្រុមគ្រួសាររបស់ពួកគេ ។ ស្វាមី និងភរិយាអាចធ្វើការ និងប្រឹក្សារួមគ្នាបាន នៅពេលពួកគេបំពេញកាតព្វកិច្ចដ៏ពិសិដ្ឋនេះ ។
តួនាទីរបស់ឪពុក និងការទទួលខុសត្រូវដ៏ពិសិដ្ឋដើម្បីការពារនេះ អនុវត្តចំពោះបុត្រារបស់ព្រះវរបិតាសួគ៌ទាំងអស់ ដោយសារលក្ខណៈ និងជោគវាសនាដ៏ទេវភាព និងដ៏អស់កល្បជានិច្ចរបស់ពួកគេ ។ ទោះបីជាភាគច្រើនបុរសបំពេញទំនួលខុសត្រូវនេះនៅក្នុងគ្រួសាររបស់ពួកគេផ្ទាល់ក៏ដោយ ក៏ពួកគេអាចបំពេញការទទួលខុសត្រូវនេះនៅក្នុងមជ្ឈដ្ឋានផ្សេងៗទៀតបានផងដែរ ។ សូមពិចារណាអំពីគំរូរបស់ យេត្រូ ជាមួយនឹងកូនប្រសារប្រុសរបស់លោក គឺម៉ូសេ ( សូមមើល និក្ខមនំ ១៨ ) និងហេលេមិន ជាមួយនឹងកងពលកំលោះ ( សូមមើល អាលម៉ា ៥៦–៥៧ ) ។ តើមានគំរូក្នុងព្រះគម្ពីរផ្សេងទៀតណាខ្លះ ដែលអ្នកអាចគិតដល់ ?
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើអ្នកបានទទួលពរជ័យ និងការការពារដោយសេចក្ដីស្រឡាញ់ និងការចូលរួមរបស់ឪពុក ឬបុរសដែលដូចជាឪពុកដ៏សុចរិតម្នាក់នៅក្នុងជីវិតរបស់អ្នកតាមរបៀបណា ?
ផ្នែកទី ៣
តើវិវរណៈដ៏ទេវភាព និងអំណាចបព្វជិតភាពអាចជួយលោកឪពុកទាំងឡាយ ឲ្យការពារក្រុមគ្រួសាររបស់ពួកគេបានដោយរបៀបណា ?
ចេញពីបទពិសោធន៍របស់យ៉ូសែបនៃស្រុកណាសារ៉េត នោះយើងអាចរៀនគោលការណ៍ដ៏សំខាន់មួយអំពីរបៀបការពារក្រុមគ្រួសាររបស់យើង ។
ការសិក្សានៅក្នុងការរៀបចំសម្រាប់ថ្នាក់រៀន
សូមអាន ម៉ាថាយ ២:១៣–១៥ ហើយស្វែងរកអ្វីដែលបានជួយយ៉ូសែបឲ្យការពារព្រះរាជបុត្រព្រះគ្រីស្ទ និងម៉ារាពីគ្រោះថ្នាក់ ។
វិវរណៈអាចជួយឪពុកទាំងឡាយនៅជំនាន់របស់យើងឲ្យការពារ និងផ្ដល់ពរជ័យដល់ក្រុមគ្រួសាររបស់ពួកគេបានដូចគ្នាដែរ ។ ដូចដែលប្រធាន បាឡឺដ បានទូន្មានមកថា « ឪពុកទាំងឡាយគួរតែខិតខំស្វែងរកការដឹកនាំមកពីព្រះវិញ្ញាណបរិសុទ្ធយ៉ាងខ្ជាប់ខ្ជួន ដើម្បីពួកគេនឹងដឹងពីអ្វីដែលត្រូវធ្វើ អ្វីដែលត្រូវនិយាយ និងដឹងពីអ្វីដែល មិន ត្រូវធ្វើ និងអ្វីដែល មិន ត្រូវនិយាយផងដែរ » ( « The Sacred Responsibilities of Parenthood » ទំព័រ ៣០ ) ។
បុរសទាំងឡាយដែលជាអ្នកដើរតាមព្រះយេស៊ូវគ្រីស្ទ ដែលបានរក្សាសេចក្ដីសញ្ញារបស់ខ្លួន មានអំណោយដ៏ពិសិដ្ឋមួយទៀត ដែលពួកគេអាចប្រើដើម្បីការពារក្រុមគ្រួសាររបស់ពួកគេបាន ។ កាលថ្លែងទៅកាន់បុរសៗ នោះប្រធាន ប៊យដ៍ ឃេ ផាកកឺ នៃកូរ៉ុមនៃពួកសាវកដប់ពីរនាក់ បានបង្រៀនអំពីអំណោយទាននេះ ៖
អ្នកមានអំណាចព្វជិតភាពដោយផ្ទាល់មកពីព្រះអម្ចាស់ ដើម្បីការពារគេហដ្ឋានរបស់អ្នក ។ វានឹងមានពេលជាច្រើន ដែលអំណាចនោះនឹងឈរជាខែលមួយ ដើម្បីបាំងការពារអ្វីៗគ្រប់យ៉ាងរវាងគ្រួសាររបស់អ្នក និងអំពើអាក្រក់របស់សត្រូវ ។ ( « The Power of the Priesthood » Liahona ខែ ឧសភា ឆ្នាំ ២០១០ ទំព័រ ៩ )
ប្រធាន ណិលសុន បានបង្រៀនបុរសទាំងឡាយអំពីរបៀបដែលពួកគេអាចបង្កើនអំណាចបព្វជិតភាពរបស់ពួកគេ ដើម្បីការពារក្រុមគ្រួសាររបស់ពួកគេបាន ៖
សូមផ្ដោតការយកចិត្តទុកដាក់របស់បងប្អូនទៅលើការប្រែចិត្ត ប្រចាំថ្ងៃ ជាគ្រឹះក្នុងជីវិតរបស់បងប្អូន ដែលបងប្អូនអាចអនុវត្តបព្វជិតភាពដោយអំណាចកាន់តែខ្លាំងជាងមុន ។ នេះគឺជារបៀបតែមួយគត់ដែលបងប្អូននឹងរក្សាខ្លួន និងគ្រួសាររបស់បងប្អូនឲ្យមានសុវត្ថិភាពខាងវិញ្ញាណនៅក្នុងសម័យដ៏មានឧបសគ្គខាងមុខនេះ ។ ( « We Can Do Better and Be Better » Liahona ខែ ឧសភា ឆ្នាំ ២០១៩ ទំព័រ ៦៩ )
ធ្វើសកម្មភាព
សូមពិចារណាសរសេរ និងផ្ញើសារថ្លែងអំណរគុណដល់ឪពុករបស់អ្នក ឬបុរសម្នាក់ដែលមានឥទ្ធិពលក្នុងការការពារ ឬមានឥទ្ធិពលយ៉ាងខ្ជាប់ខ្ជួននៅក្នុងជីវិតរបស់អ្នក ។