“Eda Na Sega Ni Soro, Eda Sega Ni Rawa Ni Soro”
Bulataka na nomu ivakatagedegede. Tutaka na veika o vakabauta.
Au vakavinavinaka vata kei kemuni yadua niu tokona na loma ni Kalou me baleti ira na Nona tamata. Vinaka vakalevu, Peresitedi Monson, na savasava ni yalomuni.
Ena gauna e tukuna kina o Josefa Simici na ka dina me baleta na veika vakalou e sotava ena loma ni veikau, e a vakalialiai ka sega ni lomani. E a vakayagataka o vu ni ca na veivakalialai me iyaragi me vorati koya: “Au sa gonetagane walega, kau tiko ena maliwa ni yabaki tinikava kei na tinikalima, … ia era tu na turaga vakaitutu rogo me ra raica me ra vakauqeti na vakasama ni lewenivanua raraba me vorati au, ka bulia na veivakacacani e gaga sara.”1
E a tubu cake o Josefa, ena vosota, lewa maqosa kei na vakabauta, veitalia ga na nodra tiko na meca ena veiyasana kece sara. Ena vosa sara ga i Josefa vakaikoya: “E dina ga ni kaukauwa ni ivalavala ca ena rawa ni vakasaqara na kena vakarusai na Lotu, … ia sa tete tikoga ki liu na Kosipeli ena kena e taucoko ”2 “E sega na liga dukadukali me rawa ni muduka na kena toso ki liu na cakacaka.”3
Nikua sara mada ga era tiko o ira era tawa kila na noda ivakavuvuli ka bolea na talei ni sega ni veisau sai koya era sureti keda tiko me da bulataka.
O noqu itokani gone, o Ethan, a torovi tinana vata kei na dua na taro bibi sara. O Ethan, me vakataka ga e levu sara na itabagone, e gadreva tu me tu galala, bula rawati-koya, ka vakavolivoliti mai vei ira na itokani vinaka. E yaloqaqa sara vakalevu o koya, cakacaka vakaukauwa ena nona itutu vakavuli kei na vulici ni ivolanikalou ena veisiga. Me vakataki ira kecega na itabagone, e sotava tiko o Ethan na veitemaki vakaitamera. E lako mai ena olo ni koronivuli, ena Initaneti, ena iyaloyalo yavala kei na ivakatagi. E rawa ni rogoci ena vosa ca ka raici ena isulusulu e veivakacalai. O ya e sega ni dodonu ka dau wasoma me caka tu me rairai dodonu. Lomaleqataki ni veika e namaki kei na rerevaki ni kena sega ni ciqomi e ka wale vei ira na itabagone. E vakawasoma ni dau veivakamalumalumutaki na nodra veivakasauraratki na itaba vata. A vakila o Ethan ni sa boloraki tiko ena veisaqasaqa sega na betena.
Sai koya oqo na taro a tarogi tinana kina o koya: “Nau, e dodonu beka meu vakalolovirataka na ivakatagedegede ni noqu bula meu maroroi ira kina na noqu itokani?”
E taro bibi sara me baleti keda yadua me vakasamataki ena buturara kece sara ni bula. Eda sa vakalolovirataka tiko beka na noda ivakatagedegede me rauti ira na noda lewenivanua? Eda sa veisautaka tiko beka na noda veika talei me veirauti kei na ituvaki ni vanua ni cakacaka se me da rogo kina e koronivuli?
A sauma vua o tinai Ethan dauloloma ena irorogo ka na dau rogo tikoga kina na sega.
O au, au na sauma talega ena isau matata sara: “Kakua ni cakava, Ethan. Kakua ni guilecava ni o iko e dua na luvena na Kalou ka lomani iko o Koya. Bulataka na nomu ivakatagedegede. Tutaka na veika o vakabauta. Ena so na gauna ena sega ni rawarawa ia ko na tucake taudua tu. Vakasaqarai ira na nomu itokani era dau yalodina ka itovo vinaka, lako vei ira ka vakaraitaka na vakavinavinaka me baleta na nodra ivakaraitaki. Ko na rawa ni kunea e dua sara mada ga e galili tu me vakataki iko. Masuta na veidusimaki kei na veitaqomaki mai vua na Turaga. Ena tokoni iko ko Koya. Ena yaco ko koya me nomu itokani nuitaki ka ko na raica ni nomu ivakaraitaki ena dreta mai e vuqa sara na itokani era na vakayaloqaqataki mai na nomu kaukauwa kei na ivakarau qaqa.”
E vakatavulica vei keda o Nifai e dua na ivakavuvuli matata ka kaukauwa ena nona talanoataka na tadra nei tamana me baleta na vunikau ni bula. E vakamacalataka e dua na gaunisala dodonu ka rabalailai e mua tiko ki na vunikau ni bula kei na dua na vale cecere ka vakaitamera. Na vale oqo e sa sinai tu vei ira na tamata era vakaisulu ena isulu isau dredre ka vakaiukuukutaki. Era vaka me ra veivakalialiai ka veidusi vei ira na kania tiko na vuanikau. Era a saga tiko me ra vagolei ira tani na tamata mai na nodra sala ki na salatu ka curuma yani na vale o ya. Mai na kena irairai kece, o ira na tamata era tiko e loma e vaka me ra marautaka e dua na gauna vinaka cecere. Sa qai dua dina na ituvaki ni veitemaki kei na veivakalialiai sega ni takali rawa! Ena vosa nei Elder Neal A. Maxwell, “Na matadredredre nei vuravura sa dua walega na bula galili dina ka tovolea tiko ena veivakasini me vakavinakataki koya kina.”4
“Ia era sa lewe vuqa sara era sa curu ki na vale vakaitamera ko ya… . Era sa qai dusi au ka vakalialiai au kei ira talega era sa kania na vuanikau; ia keimami sa sega ni kauwaitaki ira.”5
Ena itinitini ni tikina sa tiko kina na ivakavuvuli kaukauwa nei Nifai, sai sau tiko ni leqa ni veivakasaurarataki: “Ia, keimami sa sega ni kauwaitaki ira.”
Ena dua na gauna lekaleka sa oti e a vakamatatataka kina o Peresitedi Boyd K. Packer na ivakavuvuli veidusimaki: “Ia se na vanua tani vakacava ga eda na gole kina, ia se cava ga na levu ni kena vakacacani na noda ivakatagedegede, ia ke ra lewe levu era na soro, eda na sega ni soro, eda sega ni rawa ni soro.”6
Eda na kila rawa beka na veitemaki kevaka sa matavulotaki vakavinaka tu mai?
Eda sa yalodina beka me da valuta na ivalu vakatani e yaco mai?
E veivunauci kina vakamatata o Paula ni sega ni dodonu me da: “vinakati kina vakatamata, ia me vaka dou sa tamata nei Karisito, mo [dou] cakava na loma ni Kalou, mai na vu ni yalomudou.”7
Sa yaco mai na gauna me da sa tudei tikoga kina. Me da sa vaqaqacotaka na noda yavu vakayalo ka me da vakarorogo kivei ira na parofita ni Kalou ka vakayacora na nodra ivakasala.
E kaya o Paula vei Timoci: “Ni sa sega ni solia mai vei keda na Kalou na yalo ni rere, a yalo ni kaukawa ga, kei na yalololoma kei na yalomatua. O koya mo qai kakua ni maduataka na kena itukutuku ni noda Turaga.”8
Sa gadrevi na yaloqaqa me da digidigi donu kina, ena gauna mada ga era digidigi tani kina o ira era tiko vakavolivoliti keda. Ena gauna eda digidigi donu tiko kina ena veisiga ena veika lalai, na Turaga ena vaqaqacotaki keda ka vukei keda me da digia na dodonu ena gauna ni dredre levu e dau tarava mai.
Na ivakavuvuli kei na yavunibula eda sa vakamareqeta vakalevu cake era sa sega ni vinakata na tamata sa vakavuravura. Ena noda saga me da tudei tikoga vakaikeda kei ira na luveda, na itukutuku ni kosipeli sa dodonu me teivaki vakatitobu sara ki lomada ka vakavulici ena loma ni noda vuvale.
O Apinatai, e dua na parofita ni Nifai, me vaka e tukuni tiko ena vica na draunipepa veivakaukauwataki sara ena Mosaia, e vakavulica vei keda e dua na lesoni tawacava rawa ka veisotari vakavinaka kei na bolebole ni ika 21 ni senijiuri.
E a dua na tamata yaloqaqa dina o Apinatai ka a tutaka na veika dina ena gauna e sega ni dau kilai tu me vakayacori rawa. Ena nona sa douvaka me tukuna na veivutuni vei ira na tamata, sa kila vakavinaka tu o koya ni na vakaleqai kina na nona bula. Ena noda vakasama, eda na raica rawa kina na ituvaki kei Apinatai, ka sa tau vua na itotogi me sa na vakamatei. E a yaco mai na gauna me sa dro bula kina o ya me cakitaka na nona vakabauta kei na ivakadinadina, me vakalolovirataka na nona ivakatagedegede, ia e a yaloqaqa ga ka tukuna yani: “Au sa kaya vakaidina vei iko, au na sega sara ni vakalasuya na vosa au tukuna vei iko me baleti ira na tamata oqo, niu sa tukuna na ka dina.”9
Eda na sega beka ni da vakamatei ni da tutaka na dina, ia eda rawa, me vakataki Apinatai, me da tu ena yaloqaqa, ena yalodina kei na kaukauwa, ka qaqa ena noda kaburaka yani ni ko Jisu Karisito sa noda iVakabula. O koya ga sa Luvena na Kalou Cecere. E bula tiko o Koya ka lomani keda.
Ni da muri Koya, sa na rawa kina me da solibula ka maroroya na noda veiyalayalati tabu. E kaya na Turaga kivei keda: “Kakua ni rere, na qele ni sipi lailai; dou caka dodonu tiko ga; raica ena sega ni rawai kemudou ko vuravura kei eli, kevaka dou sa tara ena dela ni noqu uluvatu… . [Ni] kakua ni rere se lomalomarua; ia [mo ni] vakaliuci au ena nomu[ni] nanuma kecega”10
Sa dodonu me da vaqaqacotaki keda. Na veivaqaqacotaki vakayalo ka tudei oqori e kune ga ena rua na vosa—Jisu Karisito. Sa noqu ivakadinadina malumalumu oqo ena Vukuna, ena yaca tabu i Jisu Karisito, emeni.