Vakalougatataki Vakalevu
E sa vakaukauwataki na noda ivakadinadina. Au vakabauta ni da sa vakadeitaka vakalevu cake sara me da bulataka na ivakavuvuli ni kosipeli i Jisu Karisito.
Sa balavu mai na noqu dau tiko ena koniferedi. Ia au vakasamataka ni se bera vakadua meu vakila na veivakalougatataki cecere me vakataka na kena oqo. Eda sa ciqoma eso na itukutuku buta-katakata mai vei ira era sa vosa oti, ia o ira vakayadua era tara e dua na iulutaga e bibi cake sara. Edaidai e a dua na noda digidigi ni vakabauta, na loloma, kei na veivakasalataki. Me da cokoti ira vata na veika oqo ena noda bula.
O Baraca Ballard, ena vica na yabaki sa oti e a lako ki valenibula na marama watiqu daulomani. E a biuta koto mai e dua na ivola lailai vei ira na gone: “Kemudou na luvequ lomani, me kakua ni tara o Tata na maikorowevi” —muria e dua na cegu lekaleka, “se na sitovu, se na misini ni sava iyaya, se na misini ni vakamamaca isulu.” E vakamaduataki au meu tomana tale na iwiliwili ni veika oqori.
Au nanuma ni o Baraca Uchtdorf e a kaya, “O tukuna vei ira na vakarorogo tiko edaidai me baleta na wekamu mai vua na marama tinamu. E vakacava na yasana mai vua na turaga tamamu?” Ia au sa na tinia vata kei na vica na vosa me baleta na yasana mai vua na turaga tamaqu.
Na tamana na turaga na tamaqu e lako mai Suwiteni, kei na marama watina mai Igiladi. Erau a sota ena waqa ka lako tiko mai. E a waraka mada me tubu cake sara, ka qai duguca. Erau a vakamau ena Valetabu e Salt Lake, ka vola ena nona ivolaniveisiga, “Nikua sa ikoya e dua na siga marautaki duadua ena noqu bula. Keirau vakamau kei noqu daulomani ena gauna oqo me tawamudu ena valetabu savasava.”
Ni oti e tolu na siga, ena ika 23 ni Epereli, 1898, e a vola , “Vodo ena sitimanivanua e Rio Grande Western Depot ena gaunisala ki Scandinavia, na vanua meu laki kaulotu kina.” E a lako sara ki Suwiteni, ka biu tu mai na nona lewenivale ni tolu na siga.
Na nona ivolaniveisiga, volai ena penikau, vakauta mai vei au e dua na turaga tamana lailai ka digitaki au meu ciqoma na ivolaniveisiga nei turaga tamana. Na ka e volai vakawasoma ena ivolaniveisiga sa ikoya, “Erau suasua na yavaqu.” Ia na kena e totoka duadua na kena volai e kaya: “Nikua keirau lako ki na vale nei Jansson. Keirau sotavi Sisita Jansson. E a vakarautaka tu e dua na ivakayakavi totoka. E daunivakasaqa uasivi ko koya.“ E qai kaya, ”Era lagasere taucoko na gone se vakatagitaka na amonika se dua na meke lailai, oti e qai sauma nona ikatini. E lima na korona vua na Turaga ka dua vei Elder Ipson, na noqu itokani, ka dua vei au.” E a qai volai na yacadra na gone.
Ena noqu wilika oqori ena ivolaniveisiga, e a tu kina na yacai tamai marama watiqu me vaka ni o koya e dua na lewe ni vuvale o ya, e dua e rairai a lagata e dua na sere, e dua a yaco me tama ni dua walega na luvena yalewa, na goneyalewa au a vakamautaka.
Na imatai ni siga au raici Frances kina, au kila niu sa kunea na kena e dodonu. E muri e a qai kauti keirau vata mai na Turaga, kau a kerei koya me keirau gade vata. Au a lako ki nona vale meu laki raici koya. E a vakaveikilaitaki au, e qai kaya na turaga tamana, “‘O Monson’—qori e dua na yaca vaka-Suwiteni, se vakacava?”
Au kaya, “Io.”
E kaya, “Vinaka.”
E a qai lako ki na dua tale na rumu ka kauta mai e dua na iyaloyalo ni rua na daukaulotu ka rau vakaisala tu kei na nodrau ilavelave ni iVola i Momani.
“O drau veiwekani kei na Monson qo,” e kaya, “Elias Monson?”
Au kaya, “Io, o koya e taci tukaqu. O koya talega e a kaulotu e Suwiteni.”
E a tagi o tamana. E tagi vakarawarawa. E kaya,“O koya vata kei na nona itokani sai rau na daukaulotu ka rau vakatavulica na kosipeli kivua na marama tinaqu kei na turaga tamaqu kei ira kece na taciqu kei na ganequ vata kei au.” E a reguca na baluqu. Oti e a qai tagi na marama tinana, ka reguca na baluqu ka dua. Oti au a qai vaqarai Frances. E kaya, “Au sa na lako meu laki kauta mai na noqu kote.”
O noqu Frances kamica e a lutu ena vica na yabaki sa oti. E a lako ki valenibula. E a sega tu ni vakilai koya me rauta e 18 na siga. Au a dabe toka e yasana. E sega vakadua ni yavala e dua nona masela. Era tagi na gone, era tagi na makubuna, au a tagi. E sega ga ni dua na yavala.
Ena dua na siga, e a qai dolava na matana. Au toso sara yani vakatotolo meu toka e yasana. Au mokota ka reguci koya, kau kaya, “O sa lesu tale mai. Au lomani iko.” E a qai kaya, “Au lomani iko, talega, Tomu, ia e daru sa leqa vakalevu.” Au vakasamataka, Na cava o kila me baleta na leqa, Frances? E kaya, “Au guilecava meu vakauta na nodaru ikava ni sausaumi ni ilavo musuki.”
Au kaya vua, “I Frances, kevaka mo a se tukuna qori e liu ni bera nomu reguci au ka tukuna nomu lomani au, sa rawa meu a biuti iko tu ga eke ka lako yani.”
Kemuni na taciqu, me da rokovi ira ka dokai ira na marama watida. Era noda itokani tawamudu. Kemuni na ganequ, ni rokovi ira na turaga watimuni. Era gadreva me ra rogoca na vosa vinaka. Era gadreva na matadredredre. Era gadreva e dua na ivakaraitaki vinaka ni loloma dina.
Ena noqu biuta tu na noqu matavuvale ena dua na gauna, kemuni na taciqu kei na ganequ, e sa dua dina na koniferedi qoroi oqo. Eda sa vakavukui mai na veitukutuku matua ka veivakauqeti. E sa vakaukauwataki na noda ivakadinadina. Au vakabauta ni sa vakadeitaka vakalevu cake sara meda bulataka na ivakavuvuli ni kosipeli i Jisu Karisito.
E sega walega ni da vakalougatataki mai na veivosa totoka eda sa rogoca; eda sa laveti cake talega mai na sere kei na ivakatagi totoka e vakarautaki. Eda vakalougatataki vakalevu ena Lotu mai vei ira era wasea vei keda na nodra taledi ni lagasere. Na veimatasere yadua kei na sere e sa qaravi vakauasivi sara ena loma ni rua na siga sa oti oqo.
Au vakaraitaka na noqu loloma cecekia kivei kemuni kece sara ko ni vakaitavi vakakina kivei kemuni kece sara ko ni a vakarorogo. Au a vakila na nomuni masumasu ena vukuqu kei na noqu tokoni ka vakalougatataki ena loma ni rua na vula ena nona sa mai biuti keda kina o Peresitedi Hinckley na noda daulomani. Meu tukuna tale, noqu vakavinavinakataka na nomuni veitokoni ena digidigi.
E sega ni rawa meu vakamacalataka vakavinaka na noqu vakavinavinakataka na Vakalesui mai ni kosipeli ena itabagauna oqo kei na kena vakaibalebale ena noqu bula. Oi keda vakayadua eda sa vakayarayarataki ka vakarautaki ena noda muria na iVakabula kei na noda rokova na ivakavuvuli ni Nona kosipeli.
Kivei kemuni o ni sa itubutubu, au kaya, vakaraitaka na nomuni loloma kivei ira na luvemuni. O ni kila ni ko ni lomani ira, ia mo ni cakava me ra kila ni vakakina. Era vakamareqeti. Vakatakila vei ira. Kerea na veivuke vua na Tamada Vakalomalagi ena nomuni kauwaitaka na nodra gagadre ni veisiga ena nomuni sotava na bolebole ka dau yaco mai ena gauna vakaitubutubu. O ni gadreva vakalevu cake mai na nomuni vuku vakataki kemuni ena nomuni veisusu tiko.
Keimami tataunaka kivei kemuni na itabagone mo ni vorata na ivalavala ca ni vuravura ka bulataka na veivakaro ki na kena uasivi duadua era rawata.
Kivei kemuni ka sa rawa mo ni curu ki na valetabu, au vakasalataki kemuni mo ni lako vakawasoma. Na nomuni vakayacora ena vukea na vakaukauwataki ni vakamau kei na veimatavuvale.
Me da dau veilomani vakaikeda, me da kauwaitaka na nodra gagadre o ira na tani, ka tovolea me da veivuke ena tikina oqori.
Kemuni na taciqu kei na ganequ lomani, au lomani kemuni, kau masulaki kemuni. Ni yalovinaka ka masulaki au. Eda na qai vakaivotavota vata ena veivakalougatataki ni Tamada Vakalomalagi ka maroroya tu me baleti keda vakayadudua. Sa ikoya oqo na noqu masu, noqu kerekere ena noqu vakuria ena noqu ivakadinadina. Na cakacaka oqo e dina. Ena yaca i Jisu Karisito, emeni.