Na Yavuniiyau Vinaka Duadua
Kevaka ko ni na sauma vakadodonu na nomuni ikatini, ena vakalougatataki kemuni na Turaga. Sa ikoya oqori na yavuniiyau vinaka duadua ko ni na vakayacora rawa.
Ena gauna au a se gonetagane kina, e dua vei ira keitou tiko veivolekati e a tiko na nodratou qele ni bulumakau tinatina. E a mate e dua vei ira na nona bulumakau, ka sa biuta tu mai na luvena lailai sucu vou, ka mani solia sara vei au o koya. Au sa mani qarava sara na luve ni bulumakau lailai oqo, vakania, ka susuga cake. Na siga sa kauta yani kina o tamaqu me laki volitaka ki na vale ni bulumakau e a siga dina ni noqu veilecayaki: Au sa tekivu meu mosita na noqu luve ni bulumakau, ia au sa nanamaki tiko meu raica na isau ni noqu cakacaka. E dua walega noqu kerekere sa ikoya na ilavo au na taura ena kena volitaki na luve ni bulumakau me ilavo siliva. Au nanuma ni sa lesu mai ki vale ena bogi o ya o Tamaqu ka solia ki ligaqu e 20 na dola siliva. E dau dredre ni kune na ilavo, kau sa nanuma kina niu sa vutuniyau. Au a wilika, qoroya, ka qusia vakavinaka na koini yadudua. Ni sa Sigatabu mai, e a dredre vakalailai na noqu biuta e rua na koini siliva lumilumisa ki na noqu taga meu sauma kina na noqu ikatini. E dina ga ni sa rui dredre meu solia na noqu dola siliva talei o ya kivei bisopi, au se nanuma tikoga oqo na marau ni yaloqu niu sa talairawarawa vua na Turaga.
Ena ilakolako ki vale ni suka na lotu, a kaya vei au na marama tinaqu ni dokai au sara vakalevu. E a qai kaya, “E dau tukuna vei keitou o tukamu, kemudou na gone kevaka tou na sauma vakadodonu na ikatini, ena vakalougatataki kedatou na Turaga ka sa ikoya na yavuniiyau vinaka duadua tou na vakayacora.”
Sa kila vakavinaka tu o tukaqu ni “raica sa virikotori tu mai lomalagi na ivakaro ni sa bera ni buli na vuravura oqo, ia sa vakayavutaki kina na veivakalougatataki kecega—ia ni da sa muria e dua na i vakaro, ena vakalougatataki keda na Kalou ena ka sa yalataki tu kina.”1 Na ikatini sa ivunau ni Kalou, ia ena gauna eda muria kina na Nona lawa, sa vauci kina o Koya me vakalougatataki keda. Niu se gonetagane yabaki vitu sara mada ga, sa ikoya qori e dua na ka au sa bau kila vakavinaka,o Peresitedi Thomas S. Monson, ena nona vosa baleta na lawa ni Kalou, a kaya: “Ni da vakacacana ena yaco vei keda na rarawa tawamudu. Ni da talairawarawa kina eda na rawata na marau tawamudu.”2
Ko ni nanuma tiko na gauna a cudruvi kina o Isireli ena nodra butakoca na Kalou, era a taroga kina na tamata, “Keitou a butakoci kemuni vakaevei?” A saumi mai vakaoqo, “Dou sa butakoca na sigana kei na imadrali.” Sa qai yalataki kina vei ira na Isireli ni kevaka me ra na talairawarawa ki na Nona lawa ni ikatini, sa qai kilikili kina me ra ciqoma na Nona veivakalougatataki. A kaya na Turaga, “Dou kauta kece mai na sigana ki na lololo … ka vakatovolei au mada kina, sa kaya ko Jiova ni lewevuqa, seu na dolava, se segai, na katuba ni lomalagi, ka sovaraka vei kemudou na ka ni veivakalougatataki, me na sautu dina sara.”3
Sa kerei ira kina na Isireli na Turaga me ra vakadinadinataka Vua, ka vakatovolei Koya mada, ka vakabauti Koya tiko me rawa kina Vua me vakayacora na nona yalayala vei ira. Na vunau vata ga o ya kei na yalayala vata ga o ya e se vakayacori tikoga edaidai. Ni da vakamuria na lawa ni ikatini, sa na yaco vakaidina na yalayala ni Turaga: ena yaco ruarua mai vei keda na veivakalougatataki vakayago kei na vakayalo, me vaka na vuku kei na gauna ni Turaga.
Oi au kei Joan, na watiqu, keirau a kalougata na laki vakaitikotiko ena veiyasai vuravura eso ena kedra maliwa na tamata qoroi era sa vakararavi ena veisiga vua na Turaga me baleta na nodra veika ni bula vakayago ena veisiga. O ira era bula ena vakabauta ka sauma na nodra ikatini era vakadinadinataka ni katuba ni lomalagi sa dolavi tu mai vei ira. Au nanuma sara e dua na tama yalodina ena Filipaini e a tukuna na gauna a sauma kina e dua na nona ikatini lailai kivei bisopi ena dua na Sigatabu ka qai liutaki iratou yani na luvena ki vale mai valenilotu, ka sa kila tu vakavinaka o koya ni sa sega sara tu ga na kakana me ratou kania. Ena nodratou sa taubale tiko, e a qai lutu mai e matadratou e dua na vua ni uto levu mai vuna. A rai totolo yani o koya ki cake ka vakavinavinaka vua na Kalou ni sa dolava mai na katuba ni lomalagi ka solia mai vua e dua na vua ni uto me vakani iratou kina na luvena.
Eda sa bula donuya tiko na gauna ni bolebole ni bula vakailavo. Ia, ke da raica lesu na veiyabaki sa oti eda raica kina ni sa yaco oti, ka na yaco tikoga, na veigauna donu ni vutuniyau kei na veigauna veilecayaki ni bula vakailavo. Ia, se cava ga na ituvaki oqori eda na solegi kina kevaka ga me da na sauma taumada na noda itavi kivua na Turaga ka me da qai vakayagataka na vuku ka vakatulewa vinaka; ena vukei keda na Turaga me da yalomatuataka na ivurevure sa solia tu vei keda o Koya.
E kaya o Peresitedi Heber J. Grant, “Au gadreva meu tukuna vei kemuni, kevaka mo ni na dau dina tiko vua na Turaga, sauma na nomuni ikatini ka muria na Nona vunau, ena sega walega ni vakalougatataki kemuni ena rarama kei na veivakauqeti ni Nona Yalo Tabu, ia ko ni na vakalougatataki ena dola kei na sede; ko ni na sauma rawa na nomuni dinau, ka na sovaraka mai na Turaga na veivakalougatataki ni bula oqo me vakalevu sara kivei kemuni.”4
Ena 1936, ena veivakacacani kaukauwa ni Leqa Levu Vakailavo e Amerika ena gauna era sa sasaga bula kina na tamata, sa veivakasalataki kina o Elder John A. Widtsoe kivei ira na Yalododonu me ra sauma na nodra ikatini me baleta na veivakalougatataki vakayalo era na ciqoma kina. A kaya: “Na talairawarawa ki na lawa ni ikatini … e kauta mai e dua na reki e titobu, ka vakayalo … ka na sega ni rawati mai ena dua tale na sala… . Na ivakavuvuli ni dina sa matata sara… . Sa rawarawa cake na masu. Sa vagatari na ituvaki ni vakasama vakayalo [ka] … yaco na tamata me vakataka na Tamana mai Lomalagi.”5
E dua na tina ena Ra kei Aferika a wasea na nona ivakadinadina me baleta na ikatini. E dauvolivolitaki o koya ena makete. Ena veisiga ni lesu ki vale, e laki wilika na nona ikatini, ka maroroya ena kena vanua. Ia ena vei-Sigatabu e dau yalodina me kauta yani vei nona bisopi. A wasea vei keimami ena kena sa tubu na nona bisinisi ka sa vakalougatataki na nona matavuvale ena bula vinaka kei na kaukauwa kei na levu ni kedratou kakana. E a tonawanawa na matana ka kaya, “Ia na veivakalougatataki cecere duadua o ya ni ra sa lomana na Turaga na luvequ ka keitou sa dua na matavuvale tawamudu.”
Na marama tina yalomalumalumu oqo e sa kila vakavinaka ni dua vei ira na veivakalougatataki cecere ni ko ni sauma vakadodonu na nomuni ikatini o ya na curuma na vale ni Turaga ka vakaitavi ena cakacakatabu vakalotu me rawa kina ni ra laki duavata tawamudu na matavuvale.
Ni da sauma ena yalodina na noda ikatini, sa dina sara ni Turaga ena dolava na katuba ni lomalagi ka sovaraka mai vei keda na ka ni veivakalougatataki me na sautu dina sara. Au gadrevi kemuni yadua, ka vakabibi o iratou na luvequ kei ira na makubuqu, me ra kila na ka au sa kila, me vakataki tukaqu, ni kevaka ko ni na sauma tiko vakadodonu na nomuni ikatini ena vakalougatataki kemuni na Turaga. Sa ikoya oqori na yavuniiyau vinaka duadua ko ni na vakayacora rawa. Au sa vakadinadinataka na ka oqo ena yaca i Jisu Karisito, emeni.