E Dua na Dikoni Yabaki 12

Elder John M. Madsen

Ena Vitusagavulu

Ko ikeda yadudua, me vaka ni da sa luvena tagane na Kalou, sa rawa meda vakacavara taucoko na noda ilesilesi kei na icavacava.

iVakatakilakila

Elder John M. Madsen

Kemuni na taciqu lomani ena matabete, au na tekivu, ena noqu na vosa mada kivei ira yadua sara na dikoni yabaki 12 era vakarorogo tiko ki na soqoni raraba ni matabete oqo. Evei ga o ni tiko kina, au gadreva meu kidavaki kemuni, ka tukuna, se tokaruataka tale vei kemuni na veika a sotava o Peresitedi Gordon B. Hinckley ena gauna, a se vakataki kemuni kina, e dua na dikoni yabaki 12.

Mai na ivolatukutuku ni nona bula, eda wilika kina: “Ni oti toka ga vakalailai na nona tabaki me dua na dikoni, a laki tiko sara ena imatai ni nona soqoni ni matabete ni iteki vata kei tamana… . E a veilecayaki vakalailai o koya ka laki dabe sara ena iyatu e muri ni idabedabe ni valenilotu ni iKatini ni Tabanalevu ia … [o tamana,] (ka veiqaravi tiko ena mataveiliutaki ni iteki) e dabe toka mai cake. Ena kena dolavi na soqoni, era tucake na tagane le va na drau ka ra lagata na sere ni qaqa nei William W. Phelps … ‘Me sa dokai na Turaga lumuti! / Lumuti ko Jisu me Parofita ka Daurairai koya. / Sa mai dolava na gauna edai, / Tui veivanua ra doka kecega.’”

Ni vakananuma lesu na veika o ya, a kaya kina o Peresitedi Hinckley: “E dua na ka a yaco vei au niu sa rogoca na nodra lagasere na tamata yalodina o ya. E tara sara ga na yaloqu. E vakatikora vei au e dua na yalo e dredre me vakamacalataki rawa. Au a vakila e dua na veivakauqeti kaukauwa, ki na lomaqu kei na yaloqu. Au se bera mada ni bau sotava vakadua ena veisoqoni ni Lotu au a tiko kina. Sa yaco mai ki na yaloqu e dua na ivakadei ni o koya na tamata era a lagata tiko na kena sere e a parofita dina ni Kalou. Au a sa kila mai kina, mai na kaukauwa ni Yalo Tabu, ni ko Josefa Simici e a parofita dina ni Kalou.”¹

E dina ga ni a sotava o Peresitedi Hinckley na ka o ya, ni se qai dua na dikoni yabaki 12 walega,“e dua na ka ena dau nanuma tiko ena nona bula taucoko.”² Sa noqu masu ni veika ko ni sotava tiko me sa na dua na ka mo ni na dau nanuma tiko ena nomuni bula taucoko.

Ia oqo, au sa sureti keda kece meda raica mada na ivakatakarakara varasa totoka oqo na Deacons’ Bench Kivei kemuni, ko ni sega ni raica rawa, na Deacons’ Bench, sa kedratou ivakatakarakara e lima na dikoni, eratou marau tiko ena nodratou dabe toka ena idabedabe e valenilotu.

Ena nomuni raici iratou tiko na lima na dikoni oqo, na cava beka ko ni raica? Ia oqo, ena noqu wilika yani na nodrau itukutuku e rua na Peresitedi taumada ni Lotu, au na moica vakalailai na taro; na cava ko ni raica rawa?

E vakaraitaka vakaoqo o Peresitedi Joseph Fielding Smith: “O ira na noda itabagone … era sa kawa turaga mai lomalagi, e dua na itabatamata vakarautaki ka digitaki ka sa vakalou na nodra icavacava. E a vakarautaki tu mai na yalodra me ra tadu mai ena siga edaidai ena gauna sa tu kina e vuravura na kosipeli, ka sa gadreva kina na Turaga na italai era yaloqaqa me ra kauta yani ki liu na cakacaka cecere ni gauna oqo.”³

E a vakaraitaka vakaoqo o Peresitedi Spencer W. Kimball, “Eda sa susugi ira tiko e dua na itabatamata vakaturaga … ka sa tiko na nodra ilesilesi digitaki me ra vakayacora.”⁴

Ena vuku ni veivakaro vakaparofita oqo, kevaka meda vakatitobutaka na noda raivotu me baleti iratou na lima na dikoni eratou dabe tiko ena idabedabe, ka oka kina o ira taucoko na cauravou lewe ni Matabete iEroni, sa qai, cava beka ko ni raica rawa?

Au sa nuitaka ka sa noqu masu ni da sa rawa ni raica na nodra rawa ka vakalou; ka da rawa ni raici ira ni ra sa toso yani ki liu me vaka ni ra lewe ni matabete tabu, ka daukaulotu era vunautaka yani na “itukutuku vinaka e sega ni oti rawa,”⁵ mai na Yalotabu,⁶ “ki na veimatanitu e vuravura”;⁷ ka rawa meda raici ira ni ra sa tagane vakawati ka tama yalodina, ni ra sa italai qaqa ka iliuliu ena Lotu kei na matanitu ni Kalou ena gauna oqo.

Ena kena gadrevi vei keda meda raica vakamatata sara na nodra icavacava vakalou na itabatamata digitaki ka vakaturaga oqo, e gadrevi walega meda rai yani kivua na yabaki-12 o Jisu, ka a gole yani ki Jerusalemi vata kei rau na Nona itubutubu, me laki marautaki na Kanavata ni Lako Sivia.”⁸

O cei beka na gonetagane yabaki 12 oqo? Na cava beka na Nona ilesilesi kei na icavacava? Ka a rawata vakacava me vakayacora taucoko?

Eda sa vakarogoya yani, ka sa vakadeitaka na ivolanikalou ni sa iKoya ga o Jisu Karisito, na Luve ni Kalou bula;”⁹ o Koya ka “lako mai ki vuravura … me mai vakoti ki na kauveilatai ena vukudra na kai vuravura, raica sa colata na nodra ivalavala ca na kai vuravura, a sa mai vakavouya na vuravura, ka vakasavasavataka mai na veika dukadukali kecega;¹⁰ “me ra bula kina na luve ni tamata era sa vakabauta na yacana”;¹¹ o ya me vaka ni itabagone, “A sa tubu cake ko Koya ena vuku kei na yagona talega, a sa vinakati Koya vakalevu cake tikoga na Kalou kei ira talega na tamata”;¹² ka “sa tubu cake vata kei iratou na tacina, ka kaukauwa sara, ka waraka na gauna ni Kalou vua ki na nona cakacaka ena lesi kina”;¹³ ia o Koya “sa dau veretaki vakatautauvata vakataki keda ena ka kecega ko Koya.”¹⁴ Sa dina sara, ni sotava o Koya na “veivakatovolei kecega;”¹⁵ ia “a sega ni rawai.”¹⁶ Ka a vakatovolei mai vei Lusefa, “na vu ni ka lasu kecega”;¹⁷ “na vu ni ivalavala ca kecega,”¹⁸ E a sega walega ni taqomaki o Jisu mai na Nona kila na ivolanikalou, ia sa oka talega kina na Nona sa talairawarawa sara ga ki na vosa kei na lewa nei Tamana;¹⁹ ka a vakarota o Koya ena nona kaya, “Mo lako tani, Setani: ni sa volai, Mo vakarokoroko vei Jiova na nomu Kalou, ia mo qaravi koya duadua ga.”²⁰

Ia oqo, na sala sa mai rawata rawa kina o Koya me vakacavara taucoko na Nona ilesilesi kei na Nona icavacava, meda nanuma tiko kina na vosa oqo nei Jisu, ka a kaya:

“Ni dou sa laveta cake oti na Luve ni tamata, dou na qai kila ni sai au, niu sa sega tale ni kitaka e dua na ka vakaiau; ia na ka ga sa vakatavulici au kina ko Tamaqu, sai koya kau sa vosataka.

“Ia sa tiko vata kei au ko koya sa talai au mai: sa sega ni biuti au ko Tamaqu meu tiko duaduaga; niu sa kitaka ga na ka sa vinakata ko koya.”²¹

Ni ko ikeda yadudua, me vaka ni da sa luvena tagane na Kalou,²² sa rawa meda vakacavara taucoko na noda ilesilesi kei na icavacava me vaka a vakamatatataki ena malanivosa oqo ni Turaga kivua na parofita o Josefa Simici: “Raica, sa kaya vakaoqo na Turaga: Ko koya yadua sa veivutunitaka na nona ivalavala ca ka lako mai vei au, ka masuta na yacaqu, ka rogoca na noqu vosa, ka muria na noqu vunau … ia mo dou lako vei Tamaqu ena yacaqu ka rawata na nona iukuuku kecega.”²³

Au sa vakadeitaka kina, niu sa mai vakadinadinataka, ni o Peresitedi Thomas S. Monson sa dua dina, na parofita ni Kalou, ni o koya kei rau na nona daunivakasala ena Mataveiliutaki Taumada, kei na Kuoramu ni iApositolo Le Tinikarua era sa parofita, daurairai, ka dauvakatakila, ena yaca tabu i Jisu Karisito, emeni.