Elder Gérald Caussé
Ena Vitusagavulu
E dau taleitaki ira na tamata o Elder Gérald Caussé. “Ena noqu a peresitedi tiko ni iteki e Parisi, Varanise, au a sotavi ira kina na veimataqali tamata mai na veiyasai vuravura taucoko,” a kaya. “Niu qaravi ira, au raica rawa ni da sa umani vata ga ena dua na yalo kei na dua na ivakadinadina ena kena kosipeli.”
E a veiqaravi tiko vaka-Vitusagavulu ni iWasewase ena iWasewase ena Ra kei Iurope ena gauna a kacivi kina ki na iMatai ni Kuoramu ni Vitusagavulu, ka sa veiqaravi oti o Elder Caussé ena matabisopi, iliuliu ni ilawalawa ni bete levu, ka daunivakasala ena mataveiliutaki ni iteki.
E a sucu e Bordeaux mai Varanise, ena ika 20 ni Me, 1963, kivei rau oJean Caussé kei Marie-Blanche Bonnet Caussé, ka toki o Elder Caussé ki Parisi ni sa yabaki 19. E kea a laki veiqaravi vakamataivalu ena Tabana ni NATO. E a tekivu veimaliwai vakaitau kina kei Valérie Babin ena gauna erau se lewe ruarua tiko kina ni tabanalevu o ya e Parisi. Erau susu ruarua mai na nodrau dui matavuvale YDE yalodina, ka rau se veikilai tu mai ni rau se gone. Erau a vauci ena ika 5 ni Okosita, 1986, ena Valetabu e Bern Switzerland, ka rau sa itubutubu tiko ni lima na gone.
E cakacaka tu mai vakabalavu o Elder Caussé, ena veikabani ni caka kakana, ka a taura na nona diqiri ni masta ena 1987 mai na ESSEC, e dua na koronivuli ni bisinisi e Parisi. Ena gauna a kacivi kina oqo e a manidia dairekita tiko ka lewe ni dua na matabose ni kabani ni veikauyaki ni kakana ki na veikabani lelevu ni cokovata ni veivakani kei na supamaket.
E a tekivu taleitaka o Elder Caussé na ivakatagi ena gauna a tekivu vulica tiko kina na taba piano ni se qai yabaki vitu. Edaidai, sa cokonaki tu na matavuvale na Caussé ena lagasere kei na iyaya ni ivakatagi, ka ra taba piano, vaiolini, se selo o ira na lewe ni matavuvale kece.
“Ena gauna a digitaki iratou kina na Nona iApositolo o Jisu, e vica vei iratou era gonedau, ka ra sa biuta tu na nodra lawa ka muri Koya,” a kaya Elder Caussé. “Sa vakakina na noqu raica na cakacaka ni Lotu ena gauna oqo. Au vakila ni sa kacivi au oqo na Turaga mai vei koya na Nona parofita, o Peresitedi Thomas S. Monson. O au talega au na muria na iVakabula.”