Lako Voli Tu ena Rarama
Ko na dau digidigi tikoga ena veisiga ka voleka ni veiauwa kecega me rawa kina ni ko lako voli tikoga ena rarama se gole vakatikitiki yani ki na butobuto.
Kivei keda yadudua na bula oqo sa dua na ilakolako. E a tauyavutaka ena loloma na Tamada Vakalomalagi me baleti keda. Oi keda yadua eda sa sotava na veimataqali roka ni bula kei na ituvaki, ia na noda ilakolako oqo a tekivu mai na vanua vata ga o ya ni bera ni da sucu mai ki na vuravura oqo.
Eda a vakavulici kece mai vei Iloimi, na Tama ni yaloda. Eda a lomani Koya ka gadreva sara me da vakataki Koya ka tiko vata ga kei Koya me tawamudu. A kaya vei keda vakamatata o Koya ni sa gadrevi sara vei keda me da rawata na marau o ya. Sa dodonu kina me da mai vakayago ka salavata kei na veivakatovolei ena kauta mai. Ena yaco vei keda na tauvimate ka sa na umani tu e yagoda na ituvatuva ka na laki muataki keda ki na noda mate. Na yagoda oqo ena tu kina na gagadre kaukauwa me marau vakayago.
E a vakamacalataka vei keda na Tamada Vakalomalagi na veika sa lavaki tu me vakayacori kina na ilakolako oqo mai na noda vanua taumada me da qai laki tiko vata rawa kina kei Koya me tawamudu ka bula voli ena bula e bulataka tu o Koya. Eda na lakova yani na ilakolako oqo ena bula oqo ka da sa sega tale ni nanuma rawa na noda gauna vata kei Koya mai na vuravura ni yalo. Ka sa sala duadua ga ni lesu Vua o ya me da valuta rawa na mate vakayago kei na revurevu ni ivalavala ca ka na dau yaco ni da voroka na vunau. E a kaya vei keda o Koya ni na sega ni rawa me da vorata rawa na revurevu ni mate se ivalavala ca vakaikeda ga—ke sega ni dua na iVakabula me na tagutuva laivi na ivesu ni mate ka vakarautaka e dua na sala me da vakasavasavataki kina mai na ivalavala ca ka da na vakayacora dina ga.
Ko ni sa kila tiko mai na ivolanikalou ka sa vakatakila mai na Kalou kivei ira na parofita ni a yaco dina e dua na vukitani ena vuravura ni yalo ena gauna sa vakaraitaki kina vei keda na ituvatuva ni ilakolako oqo. O ira era a vukitani era a sega ni vinakata me ra ciqoma ka vakararavi ki vua e dua na iVakabula se me yaco e dua na vakacalaka me ra sega kina ni lesu rawa tale ki vua na Tamada Vakalomalagi. Oi kemuni yadudua ko ni a dua talega vei ira na yaloqaqa, na yalodina, kei ira na dina tu ena gauna ni veisaqasaqa o ya. Ko ni a ciqoma na iVakabula kei na ituvatuva ni ilakolako oqo me da lesu rawa tale ki na bula reki vata kei na Tamada Vakalomalagi.
Ko ni sa duatani dina ena kedra maliwa mada ga era a digitaka na dodonu ena vakaduiduile mai na vuravura ni yalo. Ko ni sa digitaki mo ni lako mai ki na bula oqo ka lakovi na ilakolako oqo ena gauna sa tu kina ena vuravura oqo na kosipeli i Jisu Karisito. Ena kedra maliwa na bilioni na luvena na Tamada Vakalomalagi era bula tiko ena gauna oqo, ko sa kalougata dina ena nomu kunea na kosipeli i Jisu Karisito kei na Nona Lotu dina. Ia e levu cake sara, ni ka dina oqo ena nomu sa mai vakarorogo tiko ena bogi nikua e kena ibalebale ni ko sa digitaka mo lakova na ilakolako ni bula oqo ena nomu lako voli ena rarama.
O ira yadudua na luvena na Tamada Vakalomalagi era sucu mai ena vuravura oqo sa soli vei ira ni ra sucu mai, na isolisoli soli wale, o ya na Rarama i Karisito. Ko ni sa vakila tiko. Sai koya na kila na ka e dodonu kei na ka e cala kei na ka e dina kei na ka e lasu. Sa dau tu ga vei iko na ka o ya mai na gauna sara a tekivu kina na nomu ilakolako ni bula oqo. E ka dina ni nomu a papitaiso ka ciqoma na Yalo Tabu sa ivakadinadina ni ko sa digitaka mo lako voli ena Rarama i Karisito.
Ena gauna ko a sa vakadeitaki kina mo lewe ni Lotu, sa soli kina vei iko na dodonu me nomu itokani na Yalo Tabu. Na Yalo Tabu sa ivurevure kaukauwa ni rarama me kilai kina na ka dina, me vakamuri ka lomani na Turaga o Jisu Karisito, ka mo kunea na nomu gaunisala lesu ki vua na Kalou ni oti na bula oqo.
Ia na yalo ka a liutaka na vukitani mai na vuravura taumada e se saqata tikoga na ituvatuva ka gadreva sara tiko mo rarawa. E gadreva o koya mo na kakua tale ni kunea rawa na nomu gaunisala lesu ki nomuni vale. Na meca o ya ni yalomu e kilai iko kei na nomu caka vinaka. Sa kila tiko o koya ni kevaka me na vagolei iko rawa tani mai na nomu lako voli ena rarama sa na rawa me vesuki iko ka tarovi iko ena vukei ira na tani ena ilakolako oqo. E kila tiko o koya na nomu gugumatua kei na kaukauwa ni nomu veivakavulici kei na veivakauqeti vei ira e drau vakadrau na luvena na Tamada Vakalomalagi ena bula oqo, kei na udolu vakaudolu na itabatamata era na muria na nomu salatu. Kevaka me na rawa ni vakawelei iko tani o koya mai na nomu ilakolako oqo ena rarama, sa rawa vua me na vakaleqa ka vakararawataka e lewe vuqa.
E ka dina ni nomu sa mai vakarorogo tiko oqo sa ivakadinadina ni Kalou sa raica rawa na kemu yaga bibi ko sa digitaka kina mo lako voli ena rarama sa solia vei iko o Koya. Na digidigi vakaoqo e sega ni dau rawarawa na kena laurai vakamatata sara ena veigauna. Ko na dau digidigi tikoga ena veisiga ka voleka ni veiauwa kecega me rawa kina ni ko lako voli ga ena rarama se gole vakatikitiki yani ki na butobuto. Eso vei ira na digidigi bibi sai koya na veika o biuta ki lomamu.
Sa levu sara tu na veika ko na dau taleitaka toka. Me vaka, ni o keda kece eda na dau vinakata, na nodra veivakadonui na tani. Eda gadreva kece na veitokani. Eda sa dau vakasaqara kece na ivakadinadina eso ni da sa tamata nuitaki. Eda dau digidigi ena yavu ni gagadre oqori. Eso era na muataki keda tani mai na rarama sa solia vei keda na Kalou me idusidusi. Eso era na vakaramasetaka cake na rarama o ya me da kunea rawa kina na noda sala.
Niu railesu, au vakila niu sega tiko ni kila na kedra bibi eso vei ira na gagadre kei na digidigi o ya. Au a vinakata meu digitaki ena timi ni cici. Au vinakata meu vuku ena vuli. Au vinakata meu kunea na itokani vinaka ka dina. Ena gauna au vakayacora kina na digidigi oqori mai na yalo ni noqu gagadre o ya, au sa qai kila rawa, ni kevaka ga au sega ni lakotani tiko mai na rarama se au sa toso tiko yani kina.
Eso vei ira na noqu rawa ka kei na so vei ira na noqu itokani era a veivuke sara vakalevu ena noqu kila rawa na rarama. Eso tale, kau sega tu ni kila vakalevu ena gauna o ya, era a vakayarayarataki au tani tiko mai na rarama. Ena salatu e bibi ka gugumatua, na digidigi au a vakayacora meu kune marau kina ena veitokani kei na veika meu dokai kina era sa vakauti au tiko yani ki na rarama se lako tani mai na rarama me dusimaka na noqu salatu.
Ena dua na gauna balavu sa oti e a solia mai na Tamada Vakalomalagi kivei ira na Nona parofita, e dua na sala me da kila kina na digidigi e bibi cake, kei na vuna—kei na sala me da cakava kina.
Na kena iusutu au kila e tiko ena veivosa mai vei Moronai ena nona a tukuni Momani, na tamana,. Au diva walega meu a kilai ira vakavinaka cake ena gauna au se itaba vata kina kei kemuni, ka sa noqu masu me na vakatikora na Turaga ki na dui lomamuni ena bogi nikua.
“Ia na Kalou sa vakauqeti ira ka sureti ira na tamata me ra ivalavala vinaka tikoga; a sa vu mai vua na Kalou na veika kecega sa vakauqeta ka sureta na tamata me ra ivalavala vinaka ka lomana na Kalou ka qaravi Koya.
“Oi kemudou na wekaqu lomani, dou qarauna mo dou kakua ni nanuma ni sa vu mai vua na Kalou na veika ca; dou kakua talega ni nanuma ni sa vu mai vua na tevoro na veika vinaka; raica sa vu ga mai vua na Kalou na veika vinaka.
“Ia oi kemudou na wekaqu, sa solia vei kemudou na lewa mo dou digitaka kina na ka vinaka mai na ka ca; ia sa matata vinaka sara na sala mo dou kila kina, me vaka ga dou sa kila na rarama mai na butobuto.”1
Na ivolanikalou e tukuna vei keda na ivurevure kei na kaukauwa ni rarama.
“Raica sa soli vei ira na tamata kecega na Yalo i Karisito, me ra kila kina na vinaka mai na ca; ia, au na tukuna vei kemudou na sala mo dou lewa rawa kina; raica na veika kecega sa vakauqeti me da ivalavala vinaka, ka sureti keda me da vakabauta na Karisito, sa vakatakilai ena kaukauwa kei na isolisoli i Karisito; ia dou na kila vakaidina ni sa vu mai vua na Kalou.
“Ia na veika kecega sa uqeta na tamata me ivalavala ca, ka kakua ni vakabauta na Karisito ka cakitaki Koya ka kakua ni qarava na Kalou, dou na kila vakaidina ni sa vu mai vua na tevoro; ia sa vakaoqo na cakacaka ni tevoro; sa sega ni vakauqeta e dua na tamata me ivalavala vinaka, io sa sega sara e dua; era sa vaka talega kina na nona agilosi kei ira kece era sa nona.”2
Au sa qai raica rawa oqo, ka vakavinaka cake mai na gauna ni noqu cauravou, ena noqu rawa ni vakayagataka na idusidusi o ya. E a so talega na timi ni qito kei ira na lewena kei ira na dauniveivakatavulici era vakauqeti au meu caka vinaka. Eso era a sega ni cakava. Era tu talega na itokani, eso vei ira era sega ni lewe ni Lotu i Jisu Karisito, ka a vakauqeti au na nodra ivakaraitaki meu caka vinaka kina ka nanuma tiko na iVakabula.
Eso na noqu lewe ni vuli kei na qasenivuli au a kerea na nodra veivakadonui kei na veitokanitaki a vakavuna meu gadreva kina na caka vinaka ka vaqaqacotaka na noqu lomana na iVakabula. Au a vakalougatataki ena noqu kunea na noqu sala. Ia e dodonu meu a vinaka cake sara keu a kila vakavinaka ena gauna o ya na bibi ni noqu digidigi kei na sala ni digidigi.
E a kila o Momani na ka o ya. Keu a wilika beka vakavinaka na nona vosa ena iVola i Momani kei ira era vakataki koya keu a vakalougatataki ka taqomaki vakalevu cake. Oqo na vosa nei Momani:
“Dou sa kila na rarama i Karisito sa vakatakila vei kemudou na sala mo dou digitaka kina na vinaka mai na ca; ia mo dou lewa vinaka na ka mo dou digia; raica na lewa dou na kitaka, dou na lewai kina.
“Oi kemudou … mo dou vulica vagumatua na ivakavuvuli i Karisito, mo dou kila kina na vinaka mai na ca; ia kevaka dou sa kila ka kitaka tikoga na veika vinaka, dou na yaco mo dou luve i Karisito.
“Ia … e rawa vakaevei mo dou kitaka tikoga na veika vinaka?”3
Na vakabauta ga sa rawa kina mo ququmi tiko ki na veika kecega sa vinaka. Sa noqu masu mai na vu ni yaloqu taucoko ni na qaqaco cake na nomu vakabauta baleta ni ko sa dua na luvena yalewa e dua na Kalou dauloloma. Au sa vakadinadinataka vei kemuni ni ko sa dua vei ira na yaloqaqa mo yacova na ivakatagedegede o sa tu kina oqo ena ilakolako ni bula oqo. Me vaka ga ni ko a wanonovi tiko mo vakarusai mai vua na meca ni ivalavala dodonu, ko sa taqomaki ka wanonovi tiko mai vua na Tamada Vakalomalagi kei na Turaga o Jisu Karisito. Erau kilai iko. Erau kila na veisoqosoqo kaukauwa kei na tamata yadua era vakavolivoliti iko. Erau kila na veika e tiko mai liu vei iko. Ka rau sa kila talega na digidigi cava o sa vakayacora, na digidigi o sa vakatulewataka mo marau kina, kei na veiituvaki cava eso e vakavolivoliti iko ko na vakayacora kina e dua na veisau levu ko na tudei tikoga kina mo lako voli ena rarama. Au sa vakadinadinataka ni vu mai na Yalo i Karisito kei na Yalo Tabu, sa rawa kina mo lako voli ena yalonuidei ena loma ni veika dredre cava ga era na yaco mai. Ena vuku ga ni ko sa iyau talei, eso na nomu veivakatovolei ena kaukauwa sara. E sega ni gadrevi mo yalolailai se rere. Na sala ni kena vorati rawa na veika dredre sa dau tuvanaki oti tu vei iko ia ko na kunea rawa kevaka o vakabauta tiko.
Sa dodonu mo vakabauta tiko ni ko masu. Sa dodonu mo vakabauta tiko mo vakayacora rawa na veika o ya ka lako yani ki na veivanua e dau sureti kina na Yalo i Karisito kei na Yalo Tabu.
Au sa yalataka vei kemuni ena loma ni vica na siga mai oqo ko ni na vakila, na veivakararamataki ni Yalo i Karisito kei na Yalo Tabu ena veisiga yadua ni nomu bula. Ni ko lako voli ena rarama, ko na vakila ena gauna o ya eso na kena vinaka kei na marau ko na laki taukena ni ko sa kidavaki tale mai vale vata kei na lewe drau ka udolu beka na tamata ko na kauti ira vata tiko mai era a lako voli ena rarama baleta ni ko a cakava vakakina.
Oqo dina na Lotu i Jisu Karisito. Sa bula tiko e dua na parofita, o Thomas S. Monson. Ka ra sa tiko na italai dina kei na agilosi me ra vukei iko ena nomu sala sa vakararamataki tu. Au sa vakadinadinataka ena yaca tabu i Jisu Karisito, emeni.