Elder Gary E. Stevenson
Ena Vitusagavulu
Ni sa mai vakatoka oti o koya me dua na “gauna e vaqaqacotaki kina na duru,” sa vakavinavinaka vakalevu sara o Elder Gary Evan Stevenson ena veikacivi oqo me mai veiqaravi ena iMatai ni Kuoramu ni Vitusagavulu.
“Na vakasama a yaco taumada vei au niu sa mai ciqoma na veikacivi oqo o ya niu sega tu ni taucoko, ia ena gauna vata oqori au sa sobuti ena yalo me vakayacori na itavi,” e kaya o Elder Stevenson. “Eda sa dau rogoca tiko ni Turaga ena vakarautaki ira e sa kaciva o Koya, ka me sa na cakava vei au o Koya.”
E a sucu o Elder Stevenson ena ika 6 ni Okosita, 1955, e Ogden, Utah e Amerika, kivei rau o Evan Stevenson kei Jean Stevenson. E a vuli mai na Utah State Univesiti, ka qeretueti ena liutaki ni bisinisi ka a sotavi Lesa Jean Higley kina na watina. Erau a vakamau ena ika 20 ni Epereli, 1979, ena Valetabu e Idaho Falls Idaho ka rau itubutubu ni va na tagane.
Erau sa tauyavutaka o Elder kei Sisita Stevenson e dua na ituvatuva tudei ni veiqaravi ena nodrau bula ka rau vakabauta dina sara ni marau dina e kune ga ena nodra qaravi na tani. “Ena gauna eda qaravi ira kina na tani, eda sa qarava tiko na Turaga,” e kaya o Elder Stevenson. “Na ivakavuvuli oqo e curuma sara ga na neirau bula ka rawa kina me ra kune marau o ira na tamata kei keirau talega”
Ena dua na gauna sa oti erau a veiqaravi ruarua tiko vaka-qasenivuli ni Matawilivola ni Sigatabu ena nodrau tabanalevu e Providence, Utah e Amerika. E sa veiqaravi oti talega o Elder Stevenson vaka-peresitedi ni Tabana ni Kaulotu e Japani Nagoya me ikuri ni nona a kaulotu talega ni se cauravou ena ceva kei Japani, a bisopi talega, ka lewe ni mataveiliutaki ni iteki.
E a tubucake mai ena dua na vuvale e bulataka na kosipeli, ka dau dokai rau na itubutubu o Elder Stevenson ena nodrau vakavulici koya ni se cauravou ena cakacaka vakaukauwa. E a peresitedi ni dua na kabani ni caka iyaya ni vakaukauwa yago kei na tiko bulabula ka a tauyavutaka o koya ni se qai cauravou qeretueti tiko ena koliji, ka vakabauta tu o Elder Stevenson ni cakacaka vakaukauwa sa dua na ivakavuvuli yaga ki na veituvaki taucoko ni noda bula.
“Na cakacaka vakaukauwa e vakayagataki tiko ena noda cakacaka kei na veikacivi ena Lotu ka na laki mana sara vakalevu ena cakacaka ni kaulotu,” e kaya o koya. “Eda na sega beka ni vakalougatataki me levu cake na noda kila ka, ia sa rawa kivua e dua na tamata me cakacaka vakaukauwa ka rawata rawa na veika cecere sara.”