Na Vakabauta kei na Bubului kei na Veiyalayalati ni Matabete
Mo ni toso ki liu ena vakabauta ena kena rokovi na nomuni veiyalayalati vata kei na Kalou ka ciqoma na yalayala e cakava o Koya vei kemuni ena dua na bubului.
Na noqu inaki ena bogi nikua sa ikoya meu vukei kemuni me tubu na nomuni yalonuidei ni rawa mo ni kilikili ki na veivakalougatataki ni ibubului kei na veiyalayalati ni matabete. Na kena yaga ni veika e rawa me yaco ena bubului kei na veiyalayalati e gadrevi me vakaukauwataka vakawasoma na nomuni yalonuidei.
E sa vakamatatataka tu na Turaga na veika ena yaco oqori. Kilikili ena veika e gadrevi ena bubului kei na veiyalayalati e kauta mai na isolisoli cecere duadua ni Kalou: na bula tawamudu. Sa ikoya oqori e dua na inaki ni Matabete i Melikiseteki. Ena noda rokova na veiyalayalati ena noda ciqoma na matabete ka vakavoui ira ena sokalou ni valetabu, e yalataki vei keda ena dua na bubului e cakava o Iloimi, na Tamada Vakalomalagi, ni da na rawata na taucoko ni Nona lagilagi ka bula me vaka sa bula tiko ko Koya. Eda na ciqoma na veivakalougatataki ena noda vauci ena dua na matavuvale tawamudu vata kei na yalayala ni tubu cake tawamudu.
Me vaka o namaka, na nomu sega ni ciqoma na veivakalougatataki vakaoqori ena kauta mai na leqa vakaitamera. E sa vakamatatataka talega na Turaga me baleta na ka oqori. Oqo na veivosa e dau wiliki wasoma kivei ira na cauravou mai vei ira na nodra iliuliu ena nodra sa yacova tiko yani na gauna me ra na ciqoma kina na Matabete i Melikiseteki. Ena rawa mo ni nanuma na veika o ni vakila ena nomuni se qai rogoci ira kina vakadua. Era vosa ni iVakabula o Jisu Karisito e tukuna vei keda na Parofita o Josefa Simici:
“Ia ko ira sa vakabauta na ilesilesi vakabete oqo, era sa vakabauti au; sa kaya na Turaga;
“Raica ko koya sa vakabauti ira noqu tamata, sa vakabauti au;
“Ia ko koya sa vakabauti au, sa vakabauti Tamaqu;
“Ia ko koya sa vakabauti Tamaqu, ena rawata na matanitu i Tamaqu; ia ena soli vua na ka kecega sa tu vei Tamaqu.
“Raica sa vakaoqori na bubului kei na veiyalayalati ni ilesilesi vakabete.
“Ia ko ira kece sa lesi ki na itutu vakabete, era sa vauci ki na bubului kei na veiyalayalati i Tamaqu; io na veiyalayalati ena sega ni voroka se yavalata ko Koya.
“Ia ko koya sa cakava oti na veiyalayalati oqo qai vakacacana ka vuki tani mai kina, ena sega sara ni vosoti na nona ivalavala ca ena bula oqo se na bula sa bera mai.
“Raica ena ca ko ira kece sa sega ni curu ki na matabete dou sa lesi kina, kau sa vakadeitaka oqo vei kemudou edaidai; io sa vakadeitaki ena noqu vosa mai lomalagi; raica au sa lesi ira na kai lomalagi kei ira na noqu agilosi me ra vakatawai kemudou.
“Ia au sa vakarota mo dou qarauni kemudou, ka gumatua ni muria na ivakavuvuli ni bula tawamudu.”1
Ia oqo mo ni vakataki au ena noqu se cauravou au qai rogoca kina vakadua na vosa oqori, na bolebole ni ciqomi ni Matabete i Melikiseteki e rawa me veivakayalolailaitaki. E rua tiko na vuna e dodonu mo ni vakanuinui tiko kina ka kakua ni yalolailai ena itotogi ena rawa ni muria mai ena kena sega ni maroroi na bubului kei na veiyalayalati se na vakatulewa me sa na kakua ni ciqomi. Kevaka o ni ciqoma na bubului kei na veiyalayalati ka kila ni sa rui dredre se kevaka e sega ni rawa mo ni tovolea e tautauvata ga na kena itotogi. E sega na taro, o koya gona, na nomu sala vinaka duadua kei na noqu sa ikoya me da ciqoma na matabete tabu ka tovolea e vuniyaloda taucoko me da maroroya na kena veiyalayalati. Kevaka eda digitaka me da kakua ni tovolea, ena yali vakaidina vei keda na gauna donu ni bula tawamudu. Kevaka eda tovolea ena veivuke ni Kalou eda rawata, eda na rawata na bula tawamudu.
E dua tale tiko na vuna mo ni vakatulewa kina ena gauna oqo ni o ni na tovolea ena vuniyalomuni taucoko mo ni vakatarai me baleta na bubului kei na veiyalayalati o ya ka me tiko na vakanuinui ni ko ni na rawata. Na Kalou e yalataka vei kemuni na veivuke kei na kaukauwa, kevaka o ni cakacakataka na vakabauta, ena solia vei kemuni mo ni rawata.
Meu vakamacalataka mada eso na veivakalougatataki o ni na ciqoma ena nomuni toso ki liu ena vakabauta.
iMatai, na dina ni kena soli vei kemuni na bubului kei na veiyalayalati sa ivakadinadina ni sa digitaki kemuni na Kalou ena nona kila na nomuni kaukauwa kei na levu ni veika o ni rawata. E se kilai kemuni tu mai ena nomuni a tu vata kei Koya ena vuravura ni yalo. Ena Nona kila taumada na nomuni kaukauwa e sa vakatara o Koya mo ni vaqara na Lotu dina i Jisu Karisito ka me soli vei kemuni na matabete. E rawa mo ni vakila na yalonuidei baleta ni tu vei kemuni na ivakadinadina ena Nona vakanuinui tu vei kemuni.
iKarua, ena nomuni tovolea mo ni maroroya na nomuni veiyalayalati, e sa yalataka tu na iVakabula na Nona veivuke ga vakaikoya. E kaya ena nomuni toso tiko ki liu ka vakarokorokotaka tiko na matabete: “Sa vakacegui au talega, niu sa lako vata tiko kei kemudou. Au na tiko e yasamudou imatau ka tiko talega e yasamudou imawi, ia na noqu Yalotabu ena tiko e yalomudou; era na vakavolivoliti kemudou na noqu agilosi ka laveti kemudou cake.”2
Ena veigauna o ni na gadreva beka na veivakadeitaki, vakakina o au, ni na tu vei kemuni na kaukauwa me sotavi na nomuni itavi ena matabete tabu oqo. E sa raica tu mai liu na Turaga na nomuni gadreva na veivakadeitaki. E kaya, “Ia ko ira sa gumatua ka yalodina ki na ilesilesi ruarua vakabete kau sa tukuna ka vakayacora vakavinaka na nodra itavi, ena vakasavasavataki ira na Yalotabu ka ra na vakavoui.”3
Au sa raica na vakayacori ni yalayala oqori ena noqu bula kei na nodra bula na tani. E dua noqu itokani e a veiqaravi tiko vaka-peresitedi ni kaulotu. E kaya vei au ni mai cava na veisiga yadua ena nona veiqaravi tiko e sa dredre sara ga me lako ki na itabarua ni vale e cake me laki moce ena bogi ena lomatarotaro kevaka ena tu vua na kaukauwa me qarava rawa kina e dua tale na siga. Ia ena mataka, e sa tu tale vua na kaukauwa kei na vakalesui mai ni nona yaloqaqa. O ni sa raica ena nodra bula na veiparofita qase ka rairai me ra vakavoui ena gauna yadua era tucake kina me ra vakadinadinataka na Turaga o Jisu Karisito kei na kosipeli vakalesuimai. Oqori na yalayala me baleti ira era toso ki liu ena vakabauta ena nodra veiqaravi ena matabete.
E yalataki talega ni na soli vei kemuni na kaukauwa mo ni wasea kina na ivakadinadina mo ni na vakasavasavataki me baleta na bula tawamudu e a yalataki vei kemuni.
“Raica au a vosota na nomudou ivalavala ca ena ivakaro oqo—io mo dou yalodina tikoga ka ia na masumasu ena yalo vakarokoroko; io mo dou tukuna yani ki vuravura taucoko na veika sa vakatakilai vei kemudou.
“Raica dou lako yani ki vuravura taucoko; ia na veivanua dou sa sega ni taleva rawa, dou talatala yani kina; io me vunautaki yani kina na itukutuku vinaka vei ira kecega na tamata e vuravura taucoko.”4
Ia ena yalayala o ya e sa rokovi iko na Turaga ena nona kaya me baleti iko, “Io sai kemudou sa solia vei au ko Tamaqu; raica dou sa wekaqu… .”5
E dua tale tiko na veivakalougatataki veivakurabui ka na vakauqeti kemuni ena nomuni rokova na veiyalayalati ni matabete. Na veiqaravi ni matabete ena vakarautaki kemuni me baleta na bulataki ni matavuvale tawamudu. Ena veisautaka na veika o ni vakila me baleta na ibalebale ni tagane vakawati se e dua na tama se dua na luvena tagane se dua na tacina tagane. Ena yaco mai na veisau ni yalomuni ena nomuni vakila na kena tubu na nomuni vakabauta ka sa na yaco me dina vei iko na yalayala ni bula tawamudu ena Matabete i Melikiseteki.
E a yaco oqori kivei Parley P. Pratt ena nona vakatavulici koya o Josefa Simici na Parofita ena imatai ni gauna na ivakavuvuli ni matavuvale tawamudu. E vola vakaoqo ko Parley P. Pratt:
“Sa ikoya na gauna oqo au ciqoma kina mai vua na imatai ni vakasama ni isoqosoqo ni matavuvale tawamudu, kei na duavata tawamudu ni tagane kei na yalewa ena veimaliwai vakamareqeti ka sega ni vakamacalataki rawa ka sega tale ni dua ia na kila ena itagede cecere sara, na veivakasavasavataki kei na yalosavasava, kila na kena ivakatagedegede, ka ra sa yavudei ni veika kece sara e kilikili me vakatokai na mamarau… .
“Au a vulica mai vua ni marama watiqu e itokani dredre dina ka rawa me vauci vei au ena gauna oqo ka tawamudu kei na vakasavasavataki ni rarawa kei na loloma e vauci keirau vata ka vure mai na mataniwai ni loloma tawamudu va-Kalou. Au a vulica mai vua ni rawa me teivaki na loloma oqo me tubu ka me vakalevutaki me tautauvata ga ki na tawamudu kecega; me vaka ni ka e yaco ena noda duavata tawa yalani me vakatubukawa era na tubu tikoga me sega ni wili rawa me vaka na kalokalo ni lomalagi, se na nuku ni matasawa… .
Au a dodomo e liu ia au sega ni kila na vuna. Ia oqo au sa dodomo—vata kei na savasava—vakalevutaki ena vakilai ni veivakalagilagi… . Au vakila ni Kalou e Tamaqu vakalomalagi dina; ni o Jisu na taciqu, kei na marama watiqu e itokani dredre dina ka tawa mate rawa, itokani tawamudu; e dauloloma, na agilosi dauveiqaravi vei au me veivakacegui, ka isala ni tui lagilagi ka soli vei au me tawa mudu ka tawamudu.”6
Au ivakadinadina vakaiau ni veiqaravi ni matabete e vakayacori ena vakabauta e vukea vakalevu na veisau ni yaloda kei na veika eda vakila. E dua ga na cauravou e rogoca tiko na noqu vosa nikua e rawa me tu vua na yalonuidei kevaka me rokova na nona matabete ena taqomaki mai na veitemaki ni ivalavala ca ni veiyacovi ka sa yaco tiko ena vuravura eda bula tiko kina oqo. Ena rawa vei ira na lewe ni Matabete i Eroni era rogoci au tiko mai ena bogi nikua, ni sa tubu cake na nona vakabauta ena saumi vakaidina ena bula tawamudu mai na matabete tawamudu, ka na tu vua na kaukauwa me raica vei ira na luvena yalewa na Kalou na nodra kilikili dina kei na yalayala ni dua na kawa mai muri e vuna na bula dodonu kei na bula savasava.
Ena gaunisala vata ga, na vakabauta ena bubului kei na veiyalayalati ena liutaki keda me da vakatorocaketaka na veika eda vakila ena loloma e yaga ki na dua na matavuvale tawamudu. E dua vei ira na yalayala eda cakava ena noda ciqoma na matabete sa ikoya na noda kauwaitaki ira na tani.
Au sa raica na cakamana ena tubu ni loloma o ya e yalodra na lewe ni matabete. Sa vakakina e vuqa vei kemuni. E vakatalega kina e vuqa ena taudaku ni Lotu. Au a tiko ena valenivolavola nei Peresitedi Gordon B. Hinckley ena nona a kerei me ciqoma e dua na qiri ena talevoni. E a vosa ga vakalekaleka ena talevoni ka lesu tale mai ki na neitou veitalanoa. Ia e taura e dua na gauna me vakamacalataka. E kaya ni qiriqiri tiko mai vua na peresitedi kei Amerika ka vuka baleti Utah tiko ena Air Force One ena nona ilakolako ki Washington. E qiriqiri tiko mai na peresitedi kei Amerika me vakavinavinakataki Peresitedi Hinckley me baleta na veika era cakava na lewe ni matabete ni oti na vakacaca ni cagilaba. E kaya na peresitedi kei Amerika ni sa dua na cakamana ena nodra rawa ni cakava na cakacaka vinaka vakatotolo e levu na tamata me ra vakacegui kina na tani. E vakacaucautaki ira na wekada ena nona kaya ni da sa kila tu na veika eda rawa ni cakava.
E rairai a vakadrukai na peresited kei Amerika ena ka e nanuma ena taucoko ni noda kila vakacakacaka na isoqosoqo. Sa ikoya oqori e dua na tiki ni cakamana. Ia na vuna levu duadua ni cakamana sa ikoya ni drau ka rairai ni udolu beka na lewe ni matabete e tu vei ira na vakabauta ena bubului kei na veiyalayalati ni matabete. E sega ni baleta na nodra vakavakarau e vakavuna na duidui: Na vakabauta ni bubului kei na veiyalayalati ni matabete e vakauqeti ira me ra lakova na veivanua yawa, yadra tu vakabalavu, ka vosota na dredre me vaka ni ra matataka tiko na Turaga o Jisu Karisito ena nodra kauwaitaki ira era gadreva tu na veivuke.
Era sa tu sara ga oqori ena kena cakacakataki na veiqaravi ni matabete ka vakatorocaketaki na kaukauwa kei na yalo ni loloma e gadrevi me da yaco kina me da tagane vakawati qaqa, tama, luvena tagane, kei na tacina tagane ena matavuvale eke kei na matavuvale tawamudu. Na veika era yaco oqori kei na ivakadinadina ni veiqaravi ni matabete e vakayacori ena noda toso yani vei ira na tamata, me vaka ni ra tacida ka ganeda ena matavuvale va-Kalou e vuravura raraba, ena veigauna kece sara.
Sa noqu masu mo ni vakatulewa ena bogi nikua, oti me qai veisiga kece, mo ni toso ki liu ena vakabauta ena kena rokovi na nomuni veiyalayalati vata kei na Kalou ka ciqoma na yalayala e cakava o Koya vei kemuni ena dua na bubului. E rawa mo ni cakava ena veika rawarawa. Ena gauna o ni soqoni vata kina ena nomuni kuoramu, e rawa mo ni lewa mo ni raici ira me vaka ni ra tacimuni ena matavuvale ni Kalou. E rawa ni dua ena nomuni kuoramu se ilawalawa ni matabete e gadreva tu na veivuke. O na sega beka ni raica e matamu. Ia na Kalou e kila ka sureti kemuni mo ni Nona dauveiqaravi ena nona vukei.
E rawa mo ni tautauvata kei na dua e lewe ni matabete kau raici koya e veigauna ena neimami veiqaravi vata ena matabete me dau taroga, “Sa vakacava tiko o Bubu?” E se bera vakadua ni rau sota vata kei na marama noqu isa, me vaka na ka au kila. Ia e dua na vanua e kila mai kina ni tauvimate tiko kei na nona sa qase. Au sega ni vakamacalataka rawa na kena bibi vei au noqu raica na liga ni Kalou ena kena yaco yani vei au kei na marama watiqu na yalosavu kei na vakacegu mai vua e dua ka lewe tu ni matabete. E rawa me yaco vei kemuni na ka vata o ya e veigauna o ni soqoni vata kina na lewe ni matabete, kevaka o ni dau nanuma wasoma na nomuni veiyalayalati me vakaukauwataka na liga sa wadamele ka ra colata tu na icolacola bibi. Ena nomuni vakayacora vakakina, o ni sa vakatubura na itagede sara ga ka vakatarai kemuni kina mo ni lewena tawamudu e dua na matavuvale.
E dua tale tiko na ka e rawa mo ni cakava. E rawa mo ni vulica na vosa ni Kalou, e sega ni baleti iko duadua ga, ia mo ni matataka na Turaga o Jisu Karisito ki vuravura taucoko. Ena nomuni vakatubura na nomuni kaukauwa mo ni vunautaka na kosipeli, o ni sa vakatarai mo ni vukea na Tamada Vakalomalagi ena nodra vakasoqoni vata na luvena. Ena nomuni cakava o ya, ena yaco tale mai e dua na veivakalougatataki. Kevaka me yaco mai na gagadre ena bula ni matavuvale ena vuravura oqo, se ena vuravura sa bera mai, ka vukei ira na sipi era sa yali me ra lesu tale vua na Kalou, o ni na ciqoma e levu cake sara na kaukauwa mai na kena o ni rawa ni na vakila ena gauna oqo.
E vakamacalataka na Turaga na veivakalougatataki vakurabui o ya ena Alama 13:6: “A ra sa kacivi ki na ilesilesi tabu oqo ka lesi ki na itutu ni bete levu, ena ilesilesi tabu ni Kalou; io me ra vunautaka na nona vosa vei ira na luve ni tamata, me ra curu rawa kina ki na nona ivakavakacegu.”
E rawa me tu vei kemuni na yalonuidei ena nomuni veiqaravi vata kei na yalayala me rawati kina:
“A sa vakasavasavataki ira na Yalo Tabu, ka sa vulavula sara na nodra isulu ena mata ni Kalou; era sa cata sara na ivalavala ca; io era sa lewe vuqa sara era sa vakasavasavataki ka curu ki na nona ivakavakacegu na Turaga na nodra Kalou.
“Oi kemudou na wekaqu; mo dou vakamalumalutaki kemudou ena mata ni Kalou; ia mo dou vuataka na vua e kilikili kei na veivutuni, mo dou curu talega ki na nona ivakavakacegu.”7
Au vakadinadinataka ni bula tiko na Kalou na Tamada. O ni sa cakava na veiyalayalati vata kei Koya. E vakarautaka vei kemuni e dua na bubului, e dua na yalayala ni bula tawamudu, ka na sega ni rawa me voroka. Au vakadinadinataka vei kemuni ni matabete sa ikoya na kaukauwa ni Kalou ka lako mai vua na Luvena o Jisu Karisito ka bulia na vuravura. Au vakadinadinataka ni Kalou e vinakati kemuni mo ni rawata ka lako tale mai ka mai bula vata kei Koya ena matavuvale tawamudu. Au vakadinadinataka vei kemuni ni oqo na Lotu dina i Jisu Karisito. E tiko kina na idola ni matabete. Sa ikoya na matabete e solia vei kemuni na Kalou. Au yalataka vei kemuni ni kila o Koya na veika o ni rawata ka vakakina ni sa veiraurau me rawa kina ni ena vakabauta me nomu na yalonuidei ni bula tawamudu me baleti kemuni kei ira na nomuni matavuvale me tawamudu. E na yaca i Jisu Karisito, emeni.