Me da Dolava na Yaloda
Me da sa cakava mada me dua na tiki ni noda sasaga ena veisiga me da dolava na yaloda ki vua na Yalotabu
Nikua au gadreva meu na vosa tiko ena kena bibi me da dolava na yaloda ki na Yalo Tabu.
Ni da papitaiso oti eda vakadeitaki ena kena soli vei keda na Yalo Tabu. Sa ikoya oqo e dua na veivakalougatataki vakayalo. Na Yalo Tabu e veivakacegui, veivakatavulici, veivakasalataki, veivakararamataki, ka vakauqeti keda. E tukuna vakarawarawa sara o Nifai: “Kevaka dou sa curu ena matamata ka rawata na Yalo Tabu, ena vakaraitaka vei kemudou o Koya na veika kece mo dou kitaka.”1 Eda gadreva na veivuke ni Yalo Tabu me rawa kina vei keda me da lako sivita ka taqomaki mai na veika e vakatoka o Paula na iApositolo me “gauna ni veivakararawataki”2 eda bula tiko kina oqo.
Na Yalo Tabu sa yalo ga ka sa vaka na ibulibuli ni tamata, io ena lako yani vei iko ko Koya ka tukutuku sara ki lomamu.3 Na domo ni Yalotabu e vakamacalataki me domo lailai ka dau vakasolokakana.4 E rawa vakacava me dua na domo me lailai? Na cava na vuna e vakatauvatani kina me dua na vakasolokakana? Baleta ni Yalotabu e veigauna taucoko e dau vosa ki na noda vakasama ka tukutuku sara ki lomada5 ka sega ki na daligada. E a kaya o Peresitedi Boyd K. Packer, “Na Yalo Tabu e vosa ena dua na domo o vakila vakalevu cake sara mai na nomu rogoca.”6
Eda vakila na veika e lomada. Ena ivolanikalou, o ira na parofita era vakatavulica ni ivakatakila vakatamata e sema voleka sara ki lomada. Me kena ivakaraitaki:
E vakatavulica o Momani, “Baleta ni ra sa yalomalua ka yalomalumalumu, sa soli vei ira na Yalo Tabu.”7
E kaya o Alama, “Ko ira sa yalokaukauwa, era na kila vakalailai ga na vunau; ia ko ira sa yalomalumalumu, era na kila vakalevu na vunau.”8
E vola o Momani me baleti ira na Nifai, “[A sa vakasinaiti na yalodra] ena marau kei na vakacegu … ni ra sa solia na yalodra vua na Kalou.”9
Na Daunisame e vola vakarawarawa sara, “Sa voleka ko Jiova vei ira sa ramusu na yalodra.”10
E sega li ni ka oqori eda vakasaqara taucoko tiko, kemuni na taciqu kei na ganequ—me tiko vata kei keda na Yalo Tabu, me tiko volekati keda sara na Turaga, me da kunea na marau kei na vakacegu ena noda bula? Ke sa vakakina, na kena vakarautaki vakamatau me veirauti vata kei na ituvaki ni yaloda sa ikoya e dua vei ira na ka yaga bibi duadua e rawa me da cakava ena bula oqo.
Na yaloda sa ikoya e dua na vanua malumu. E ririkotaki ena vuqa na veivakayarayarataki, vei rau ruarua na vinaka kei na ca. E rawa me mosi vei ira eso. E rawa me vakaleqai mai na ivalavala ca. E rawa me vakamalumalumutaki mai na loloma. Ena itekitekivu ni noda bula, eda vulica me da taqomaka na yaloda. E vaka me da viribaita wavoki na yaloda ena dua na bai ka dua na kena matamata. Ena sega ni rawa me curu e dua ki na matamata o ya vakavo ga ke da vakadonuya vua.
Ena so na vanua na bai eda viribaita wavoki e yaloda e rawa me vaka e dua na mataqali bai lalai ka toka e matamata e dua na ivakatakilakila “Ni Sa Bula.” Eso na yalo era sa mosi vakalevu se era sa vakaleqai mai na ivalavala ca ni tu vei ira na bai semati ena kaukamea ka walu na fute (2.5-m) na kena cecere ka caka ena sitila vavaku me wavokita na bai ka itataqomaki mai vei ira na dauvakacaca. E vakaloka tu na matamata ka tu kina e dua na ivakatakilakila levu Tabu Na Curu Eke.
Me da sa vakayagataka mada na vakasama ni dua na matamata ki na yalo me ciqoma na ivakatakila ni tamata yadua. E vakatavulica o Nifai: “Ia ko koya sa vosa ena kaukauwa ni Yalo Tabu, na kaukauwa ni Yalo Tabu ena vakadewa ki na yalodra na luve ni tamata.”11 E kauwaitaka o Elder David A. Bednar na vakayagataki ni vosa ki na: “Yalovinaka ka raica na kaukauwa ni Yalotabu ena nona kauta na itukutuku ki na ka sega ni curu sara e loma ni yalo… . O koya gona, … na lewe ni itukutuku kei na ivakadinadina ni Yalo Tabu ena qai curu ga e loma ikoya e ciqoma kevaka e vakatara o koya me vakakina.”12
Na cava e vuna me ki na yalodra walega? Na galala ni digidigi vakayadua e sa rui vakalou ni Tamada Vakalomalagi ena sega ni rawa me vakasaurarataka na yalo ni tamata, mai na Nona kaukauwa mada ga ka sega ni vakaiyalayala. Na tamata e rawa ni tovolea me cakava, ia na Kalou e sega ni vakakina. E dua tale na kena sala, e vakatara vei keda na Kalou me da dauniveisusu, se ivakatawa ni matamata, ni dui yaloda yadua. E dodonu vei keda, ena noda dui galala ni vakatulewa, me da dolava na yaloda ki na Yalotabu, baleta ni o Koya ena sega ni vakasaurarataki Koya kivei keda.
Ia me da dolava vakacava na yaloda?
Ena Vunau ena Ulunivanua, e kaya kina na iVakabula, “Sa kalougata ko ira sa yalosavasava: ni ra na raica na Kalou.”13 Kevaka e dua na ka e savasava, sa ikoya ni sega ni vakadukadukalitaki se boroi ena veika e sega ni rau salavata. Na savasava ni yalo sa ikoya e dua na ivakatagedegede bibi me baleta na noda ciqoma na veivakauqeti mai vua na Kalou. E dina ga ni sega ni maucokona tu na yaloda, na levu ga ni noda tovolea ena yalodina me da tagutuva na dukadukali, se kauta laivi na veika e sega ni ganita me tu kina, na levu cake ga ni noda dolava na yaloda ki na Yalo Tabu. Mo kila na yalayala kamikamica nei Jekope na parofita: “Oi kemudou kece sa yalosavasava, dou laveta cake na ulumudou ka vakabauta na vosa talei ni Kalou me nomudou na nona loloma.”14
Ena loma ni Valeniveivesu e Liberty, e a ciqoma kina na Parofita o Josefa Simici e dua na ivakatakila ka vakamacalataka na ituvaki ni so na yalo:
“Raica sa lewe vuqa era sa kacivi; ia sa lewe lailai ga sa digitaki. A cava era sa sega ni digitaki kina?
Sa baleta ga ni ra sa rui domona na veika ni vuravura oqo, me ra dokai kina ko ira na tamata… .”15
E lewe vuqa e vuravura era vutuniyau ka vakacegu na ituvaki ni nodra bula. Ena iVola i Momani, na vutuniyau e wasoma na kena dau kauti ira tani na tamata mai vua na Turaga. E veivakasalataki o Momani, “Eda raica ena veigauna kece sa vakalougatataki ira kina na nona tamata, sa vuavuai vinaka na nodra iteitei, levu na nodra qele ni sipi kei na bulumakau, na koula kei na siliva kei na iyau talei kecega sa caka vakamatai sara … , era sa qai vakaukauwataka na yalodra, ra guilecava na Turaga na nodra Kalou.”16
E kila na Turaga ni tolu na veika vakatamata e dau yacovi keda ena kena dau vakatikori na veika vakavuravura e yaloda: iMatai, eda vakasaqara me da vunitaka na noda ivalavala ca ka dodonu me da veivutunitaka. Tarava, eda vakasaqara me da vakamamautaki vakayago mai na noda dokadoka kei na vakasama viavialevu ka dodonu me da dau vakasaqara na veika va-Kalou. Kena iotioti, sa tekivu me da viavia lewai ira na tani.17
Mo kila ni dokadoka sa ikoya e dua na ka e dau yacovi keda vakatamata ena kena dau vakatikori na veika vakavuravura e yaloda. Na dokadoka e vakanunutaka tu na yaloda ki na veivakauqeti vakayalo. Me kena ivakaraitaki, e kaya na Turaga: “Koi au na Turaga au sa rarawataki Sidney Rigdon na noqu tamata, raica sa tuburi koya na yalo viavialevu ka sa sega ni vakarorogo; io sa vakararawataka na Yalotabu.”18 Vakatauvatana oqori ki na yalayala oqo: “Ia mo yalomalumalumu, raica ena tubera na ligamu na Turaga na nomu Kalou, ka vakayacora na nomu kerekere.”19
Ena ivakatakila ka ciqomi ena Valeniveivesu e Liberty, e vakamacalataka na Turaga na ka e yaco ena yalo ni veika vakavuravura; “Sa na tasogo ko lomalagi; a sa rarawa na Yalo ni Turaga; ia … ena gauna e qai liaca kina, sa tu taudua ga.”20 Kemuni na taciqu kei na ganequ, ena ”gauna vakarerevaki“ vakaoqo, e sega ni rawa me da vakararawataka na Yalotabu ka da tu taudua ga vakaikeda.
Au tukuna tale, na ituvaki ni yaloda e tara vakadodonu na noda vakila na veika vakayalo.
Me da sa cakava mada me dua na tiki ni noda sasaga ena veisiga me da dolava na yaloda ki na Yalotabu. Me vaka ni o keda na ivakatawa ni yaloda, e rawa me da digia ga na ka eda vakayacora. Eda digia na veika me da tugana se me da biuta tani mai. Eda sa kalougata ni Turaga e gadreva tu vakalevu me vukei keda ena noda digidigi vakavuku.
Meu tinia ena ivakadinadina vata kei na rua na Nona yalayala e a vakayacora kivei ira era vakasaqara me ra lako mai Vua: “Oi kemudou na wekaqu lomani, mo dou masuta na Tamada ena yalomudou taucoko me vakasinaiti kemudou ena [Nona] loloma, … ka vakasavasavataki me vaka sa savasava ko Koya.”21
Me kena itinitini na itukutuku veivakauqeti oqo nei Paula na iApositolo; “Au sa rawata na ka kecega ena vuku i Karisito o koya sa vakaukauwataki au.”22
Me da kerea tikoga na Karisito me vakaukauwataka na yaloda ka vakasinaita tiko ena Nona loloma sa noqu masu ena yaca i Jisu Karisito, emeni.