Elder José A. Teixeira
Ena Vitusagavulu
O Elder José Augusto Teixeira ena iMatai ni Kuoramu ni Vitusagavulu e a dua talega vei ira na vakabulai ena tatamusuki levu a vakayacori mai na nodra a vakadonui na daukaulotu ni Yalododonu Edaidai ki Potukali ena mua ni yabaki 1975. Ena 1976 eratou a vakatakilaitaki ki na kosipeli vakalesui mai oi rau na nona itubutubu, o ya o Fernando Teixeira kei Benilde Teixeira, kei na vo ni lewe ni matavuvale, ka ratou sa mai papitaisotaki na matavuvale taucoko ena 1977.
Ni bera o ya, sa dau lako wasoma tiko ki lotu o Elder Teixeira, veivuke ena gauna ni soqoni, ka vakayacora na veika kece sa dau namaki tu mai vua e dua na vakabauta gone. Ia e se lomatarotarotaka tikoga na nona vakabauta oqo.
Ena gauna erau sa sureti koya kina na daukaulotu me wilika na iVola i Momani ka me masulaka, a vakayacora sara. “O ya sara ga na itekivu ni noqu vakadinadinataka na iVola i Momani kei Josefa Simici,” a kaya o koya.
E a sucu o Elder Teixeira ena ika 24 ni Feperueri, 1961, e Vila Real, Potukali, ia a tubucake mai na siti makawa ni univesiti o Coimbra, na vanua a qai lewena kina na Lotu ni se yabaki 16. Me vakataki ira kecega na curuvou, e a sotava talega na vakatulewa me baleti ira na nona itokani. E kalougata, ni ra sa tekivu me ra ciqoma o ira na nona itokani na ivakarau ni nona bula vou. “Era sa kila ni gauna au sa mai curuvou kina oqo sa sega tale niu cakava na veika eso,” a kaya o koya.
Ni oti na nona kaulotu ena Tabana ni Kaulotu e Portugal Lisbon, e a laki curu sara o Elder Teixeira ki na Mataivalu ni Vuka ni Potukali ka laki siteseni tiko mai Oeiras me dua na tabana raraba vakaveimatanitu ni NATO. E kea, a kacivi o koya me dairekita ni veika vakalewenivanua ni Lotu ena matanitu o ya. Ena dua na soqoni ni vuli, a sota kina kei Filomena Lopes Teles Grilo na kodineita ni veika vakalewenivanua ni iteki o Lisbon, e vakaitikotiko talega e Oeiras. Erau a qai vakamau ena Valetabu e Bern Switzerland ena ika 5 ni June, 1984, ka rau itubutubu ni rua na tagane kei na dua na yalewa.
E taura tu o Elder Teixeira na diqiri ni qaravi ni akaude kei na liutaki ni bisinisi ka se bera ni kacivi e a kontrola tu ni veika vakaveimatanitu ena Lotu, ka a siteseni tiko e Frankfurt, Jamani. Sa veiqaravi oti mai o Elder Teixeira vaka-peresitedi ni tikina, peresitedi ni iteki, Vitusagavulu ni iWasewase, ka peresitedi ni Tabana ni Kaulotu ena Ceva kei Brazil São Paulo.