Na Lotu Dina ka Bula Tiko
Na Lotu i Jisu Karisito ni Yalododonu Edaidai e dina, ka bula tiko.
Ena noda tokoni Thomas Spencer Monson me parofita, daurairai, ka dauvakatakila ka Peresitedi ni Lotu, kei D. Todd Christofferson me dua na iApositolo ka lewe ni Kuoramu ni iApositolo Le Tinikarua, eda sa raica ka vakila na ivakadinadina ni kena dina ka bula tiko Na Lotu i Jisu Karisito ni Yalododonu Edaidai. E a vosa na Turaga kivei ira ka vakalesuya mai kina o Koya na Lotu ena gauna oqo. E tukuna vei ira ni “sa soli talega na kaukauwa vei ira sa lesi me ra tura na yavu ni lotu oqo, io me ra kauta tani mai na vanua butobuto, sa tu kina na lotu dina duadua ga e vuravura, raica oqo na lotu au sa vakadonuya koi au na Turaga; ia na noqu vosa sa baleti kemuni kece na noqu isoqosoqo lewe ni lotu ka sega ni baleta na tamata yadua—
“Raica sa sega sara ni vakadonuya na Turaga e dua sa ivalavala ca;
“Ia ko koya sa veivutuni vakaidina ka muria na vunau ni Turaga, ena vosoti;
“Ia ko koya sa sega ni veivutuni, ena kau tani na rarama sa tu vua; raica ena sega ni veileti tiko na noqu Yalotabu kei ira na tamata me sega ni mudu; sa kaya na Turaga ni Lewevuqa.”1
Sa ikoya oqo na Lotu dina, na Lotu dina duadua ga, baleta ni tiko kina na idola ni matabete. Ena Lotu duadua ga oqo e solia kina na Turaga na kaukauwa me na vauca e vuravura ka vauca talega mai lomalagi me vaka e cakava o Koya ena gauna nei Pita na iApositolo. Na idola oqori era a vakalesui mai vei Josefa Simici, ka qai vakadonui me solia kivei ira na lewe ni Kuoramu ni Le Tinikarua.
Ena nona a labati o Josefa na Parofita, era nanuma na meca ni lotu ni sa na rusa na Lotu. Era nanuma ni bulia ga e dua na tamata vakayago ka na rawa me rusa vata kei koya. Ia e a vakarusai na nodra vakanuinui. Sa ikoya na Lotu dina ka tiko talega kina na kaukauwa me bula tiko, veitalia ga ni ra sa mate yani o ira era a digitaki ena dua na gauna me ra liutaka.
Eda sa raica edaidai e dua na ivakaraitaki ni sa ikoya oqo na Lotu dina ka bula tiko. Na idola ni matabete era taura tu na tamata vakayago ia na Turaga sa vakarautaka tu na sala me ra na vakayagataki tikoga e vuravura ena dede ga ni gauna era cakacakataka tiko kina na tamata na vakabauta ni idola era sa tu e vuravura kei na kedra vakadewataki tiko yani ena lewa ni Kalou kivei ira na Nona dauveiqaravi digitaki.
O ira na tamata ni Kalou era sega ni dau kilikili tu ga ena veika veivakurabuitaki eda sotava ka da veiwaseitaka tiko nikua. Ni oti na nona Kaucake na Karisito, era tomana tikoga na iApositolo, na kena cakacakataki na idola ka a biuta tu mai vei ira o Koya. Ia, me baleta na talaidredre kei na yali ni vakabauta mai vei ira na lewenilotu, era mate na iApositolo ka sega ni vakadewataki na idola kivei ira na kedra isosomi. Eda vakatoka oqori me dua na ka vakaciriloloma “na Vukitani.” Kevaka me a tu na gauna donu kivei ira na lewe ni Lotu ena gauna o ya kei na lewa me ra cakacakataka kina na vakabauta me vakataki kemuni edaidai, ke a sega ni kauta tani mai vuravura na Turaga na idola ni matabete. Sa ikoya oqo na siga vakaibalebale ena itukutuku ni veigauna kei na kena bibi tawamudu ena isitori kei vuravura kei ira na luvena na Tamada Vakalomalagi.
Ena gauna oqo sa noda itavi me da tikoga ena kilikili ni vakabauta e yaga vei keda me da vakayacora kina na noda yalayala ena noda tokoni ira era sa kacivi. Na Turaga e marautaka vakalevu na Lotu ena itekivu ni Vakalesui mai, sa vakakina edaidai. Ia a vakasalataki ira na lewenilotu ena gauna o ya o Koya, me vaka e cakava tiko o Koya ena gauna oqo, ni sa sega sara ni vakadonuya o Koya na ivalavala ca. Kivei keda ni da tokoni ira era sa kacivi edaidai, e dodonu me da dikeva mada na noda bula, veivutuni kevaka e gadrevi, yalayala ni rokovi na ivakaro ni Turaga, ka muri ira Nona dauveiqaravi. E vakasalataki keda na Turaga kevaka eda sega ni cakava na veika oqori, ena vakasuka na Yalo Tabu, ena yali mai vei keda na rarama eda a ciqoma, ka na sega ni rawa me da maroroya na yalayala eda cakava edaidai me da tokoni ira kina na dauveiqaravi ni Turaga ena Nona Lotu dina.
Oi keda vakayadua e dodonu me da lialiaci keda ga. iMatai, e gadrevi me da vakarautaka na titobu ni noda vakavinavinaka ena noda lewena na Lotu dina i Jisu Karisito. iKarua, e gadrevi me da kila mai na kaukauwa ni Yalo Tabu na veigaunisala e rawa, me da vakavinakataka cake tiko kina na noda rokova na veivakaro.
Eda kila mai na parofisai ni Lotu dina ka bula tiko ena sega ni rawa ni kau tani tale mai vuravura, ia ena yaco me vinaka cake. Ena vakavinakataki cake na noda bula ni da cakacakataka na noda vakabauta ena veivutuni, dau nanuma tikoga na iVakabula, ka tovolea vakaukauwa sara me da maroroya na Nona ivakaro. Na ivolanikalou e tiko kina na yalayala ni gauna ena lesu tale mai kina na Turaga ki na Nona Lotu ena raica na vakavakarau vakayalo me baleti Koya. Oqori e sa dodonu me veivakadeitaki ka kakavaki keda. E dodonu me da caka vinaka cake. Eda rawata. Ka da na rawata.
Ena siga nikua vakabibi ni daumaka me vakadeitaki na veitokoni vata kei na noda vakabauta kei na noda masumasu vei ira kece era qaravi keda ena matanitu. Au kidava vakaiau na kaukauwa ni vakabauta ni lewe ni Lotu me da tokoni ira era sa kacivi. Ena vica na macawa sa oti au vakila na sala kaukauwa ni masumasu kei na vakabauta nodra na tamata kau sega ni kilai ira ka ra kilai au walega me dua e kacivi me veiqaravi ena idola ni matabete. Ena vakalougatataki o Peresitedi Thomas S. Monson ena nomuni veitokoni ena vakabauta. Na nona matavuvale ena vakalougatataki vakakina baleta na nomuni vakabauta kei na nomuni masumasu. O ira kece ko ni tokoni ira nikua era na tokoni mai vua na Kalou baleta na nodra vakabauta kei na nomuni.
Na lewenilotu yadua ena dua na nona gauna donu me veitokoni ena veiqaravi ka soli ena yaca ni Kalou. Na Lotu e sai koya na kaukauwa ni igu me baleta na veivakalougatataki ni lewena kei na tamata kecega e vuravura raraba. Kena ivakaraitaki, e sa cakava na Lotu na cakacaka totoka ni veiqaravi raraba ki na veimatatamata e vuravura raraba. E rawa na veika kece oqori baleta na vakabauta ni lewenilotu kei ira na itokani vakalotu ni bula tiko na Kalou kei na Turaga e gadreva me vukei ira kece era leqa tu ka na rawa Vua me yacovi ira yani mai vei ira na Nona tisaipeli yalodina.
Me kena ikuri, sa ikoya na Lotu kei na cakacakatabu vakalotu era tu kina e vakatara na veivakalougatataki ni kaukauwa ni veivauci me yacova yani na vuravura ni yalo. Sa ikoya oqo e dua na Lotu dina ka bula tiko, e yacovi ira sara mada ga yani era sega ni bula tiko. Me vaka ni o ni vakabauta mo ni vakasaqara na yacadra na nomuni itubutubu e liu, ena nomuni lako ki na vale ni Turaga ka solia vei ira na cakacakatabu vakalotu ni veisosomitaki, o ni sa tokona tiko na cakacaka cecere oqo ka kena inaki me soli na veivakabulai kivei ira kece na luve ni Tamada Vakalomalagi era a lako mai ki na vuravura oqo.
Au gadreva meu tukuna eso na vuna e dodonu me da vakavinavinakataka kina e dua na Lotu dina ka bula tiko. Oti meu na qai vakatura eso na sala au raica kina na Lotu ena nona vakavakarau me baleta na nona lesu tale mai na iVakabula. Kei na kena iotioti, au na wasea na noqu ivakadinadina ena noqu kila vakacava ni oqo na Lotu dina ka bula tiko.
Vei ira taucoko au vakavinavinaka ena noqu sotava na kaukauwa ni veivakasavasavataki e rawa mai na cakacakatabu vakalotu e vakayacori mai na kaukauwa ni matabete. Au vakila na veivosoti kei na veivakasavasavataki ena papitaiso mai vei ira e tu vei ira na kaukauwa. Au vakila na katakata ni lomaqu ni rawa walega baleta na vosa ka ra a cavuta na dauveiqaravi ni Kalou: “Ciqoma na Yalo Tabu.”
Noqu vakila na vakavinavinaka e lako talega mai na veivakalougatataki ki na noqu matavuvale. Sa ikoya na kaukauwa ni veivauci kei na noda kila ni veisautaka ka vukica na noda bula vakamatavuvale eke kei na noda nanamaki ena reki ni bula vakamatavuvale ena vuravura sa bera mai. Na vakasama kei na vakanuinui ni rawa meu rawata na veiwekani tawamudu e vaqaqacotaki au meu vosota na veidredre ni veitawasei kei na galili ka ra tiki ni bula vakayago. Na yalayala kivei ira na yalodina ena Lotu i Jisu Karisito ni Yalododonu Edaidai sa ikoya ni rawa me da veimaliwai ka tubu me levu na matavuvale ena tawamudu. Na veivakadeitaki oqori e veisautaka tawamudu ka vakavinakataka taucoko na noda veimaliwai ena veimatavuvale.
Kena ivakaraitaki, au sa yacova e dua na itagede ni noqu bula me baleta na tu veiyawaki sa sega ni rawa na veimaliwai vinaka vata kei ira na makubuqu, na ka e yaco, o ira na makubuqu vakarua. Eso talega na tamata era se bera vakadua ni yacova na gauna donu me ra vakamau kina ka itubutubu ka tu vei ira na mosi ni yalo vata e yacovi au meu voleka ki na matavuvale. Me baleta na vakalesui mai ni vakasama ni matavuvale tawamudu, eda sa vakanuinui vakalevu cake ka taleitaka vakalevu cake na veiwekani vakamatavuvale. Na reki uasivi duadua ena bula oqo e vakadodonu ki na matavuvale ka na vakakina ena veivuravura sa bera mai. Au vakavinavinakataka na veivakadeitaki sa tu vei au ni kevaka eda vakabauta, na veimaliwai vata ga eda marautaka ena bula oqo eda na taukena me tawamudu ka lagilagi sara ena vuravura sa bera mai.2
Au sa rawa ni raica na ivakadinadina ni kena vakacokotaki ni Lotu, ka a parofisaitaki. Me kena ivakaraitaki, ena noqu veilakoyaki kau kilai ira kina na lewe ni Lotu, au raica ni sa dua na veivakatorocaketaki tudei ena nodra bula. Ena nodra vakabauta ka talairawarawa, na Veisorovaki e sa veisautaki ira ka vakatorocaketaki ira na lewenilotu. Vakawasoma na noqu dau soqoni vata kei ira na tamata yalomalua ka vakatarai me ra vakatavulica na veilesoni ka wasea na vunau ka tu vei ira na kaukauwa vata ga e a soli vei Liai kei Nifai, kei ira na luvei Ilamani. O ni nanuma tiko na veika a yaco:
“Erau sa vunau voli vei ira na Leimani ko Nifai kei Liai ena kaukauwa levu kei na lewa; raica sa soli vei rau na kaukauwa kei na lewa me rau vosa kina, a sa soli talega vei rau na ka me rau vosataka.”3
Au sa nuidei ena tokaruataki ni gagadre nei Peresitedi Gordon B. Hinckley ni na soli. E vakatavulica ni o ira kece era lako mai ki na Lotu sa rawa me ra maroroi tiko ena veitokani e taucoko kevaka era vakavulici ena ivakavuvuli ni Kalou. Au nanuma nona a kaya ni rairai me sa iotioti ni vosa ena rawa ni tukuna ena icavacava ni nona veiqaravi “veimaroroi, veimaroroi, veimaroroi.” E bula tu na nona vosa ena veiliutaki nei Peresitedi Monson kei keda taucoko ena kena vakatarai me tu vei keda na kaukauwa ni dua na Liai kei na dua na Nifai ka vakatavulica na ivakavuvuli ni Kalou. Au nuidei ni ko ni na tomana tiko, me vakataki au, me ra vakadrukai mai na nodra yalomalua na Yalododonu Edaidai ka ra veituberi ki na vuvale, dauveisiko, ka vosa kivei ira nodra itokani sega ni lewenilotu ena kaukauwa e levu cake sara.
Ena veiyabaki eda na daunanuma tiko na vosa nei Peresitedi David O. McKay: “Na lewenilotu yadua e daukaulotu.” Au nuidei ni na yaco mai na siga oqori mai na vakabauta ni lewenilotu eda na raica na tubu cake ni iwiliwili ni tamata era sureti me ra rogoca na vosa vinaka ni Kalou ka ra na qai lako mai ki na Lotu dina ka bula tiko.
Au sa nuidei ni na lako mai e dua tale na veivakatorocaketaki. Na veimatavuvale ena Lotu era sa vakasaqara tiko na gaunisala me ra vaqaqacotaka ka taqomaka na luvedra mai na ivalavala ca ka vakavolivoliti ira tu. Ena so na gauna o ira na itubutubu oqori era tovolea sara tiko vakaukauwa me ra kauti ira lesu mai eso ena nodra matavuvale ka ra sa lako sese tu. Au sa nuidei ni na rawa, me vakalevutaki, e dua na kena isau ka solia na Kalou ena nodra sasaga. O ira era sega ni guce era na raica ni Kalou e sega ni dau guce ka na vukei ira o Koya.
E vuqa na veivuke oqori era na lako mai vei ira era kacivi me ra veiqaravi ena Lotu. Na gagadre ni lako yani ka qaravi ira na tani ena vakalevutaki me rawa ni lewe levu me ra vaka na Bisopi gone o Thomas Monson, e a vakauqeti ena veigaunisala ni vakatovotovo me veisureti ka vakayaloqaqataki ira era, ena dua na gauna, sega ni vakila na veivakalougatataki ni Kalou sa vakarautaki tu me baleti ira. Me yacova mai oqo e nanumi ira na tamata o Peresitedi Monson e a cakacaka vakaukauwa me vakabulai ira ena gauna e a se nodra bisopi tu kina. Na noqu vakanuinui sa ikoya ni o keda kece sara me tu vei keda na nuidei ni Kalou ena dusimaki keda ena noda lako yani, ka kauti ira lesu mai, o ira e gadreva na Kalou me da kauti ira lesu mai ena gauna eda sa na lesu kina ki Vua.
E dua tale na veivakatorocaketaki au raica ena matanitu sa ikoya e dua na gagadre kei na dua na ivakarau me da lako yani kivei ira na dravudravua kei ira era leqa tu. Au sa raica na levu ni veivakurabuitaki ena kedra maliwa na lewe ni Lotu ena loloma me baleti ira na vakaleqai ena leqa sega ni namaki e vuravura raraba. Ena itukutuku ni mate au raica ni matavuvale era kerea na veivuke me vakauti ki na iLavo Vure ni Vuli se ki na iLavo ni Veika Vakamatatamata ni Lotu.
Na Parofita o Josefa Simici e a raica na veivakatorocaketaki veivakurabuitaki oqori. E kaya me vaka ni sa saumaki vakaidina mai e dua na tamata ena vinakata o koya me lako yani ki vuravura ka qaravi ira na luve ni Tamada Vakalomalagi.1 Sa tekivu oti na kena yaco kivei ira e vuqa sara na lewe ni Lotu. Na ka e taleitaki vei au sa ikoya na ivakarau ni solika kivei ira era leqa tu e tete yani kivei ira era leqa tu mada ga ka kena irairai era na sega ni leqa kevaka era tu vinaka se dredre tu na nodra ituvaki ni bula. Oqori na ivakadinadina kivei au ni cakacaka ni Veisorovaki e sa vuavuai vinaka vakalevu cake sara ena kedra maliwa na lewenilotu.
Na noqu ivakadinadina ni Lotu dina oqo ka bula tiko e tekivu sara mai na noqu gauna ni gone. E dua vei ira na noqu ivakananumi ena gauna e liu sara sa ikoya na soqoni ni koniferedi e sega ni dau vakayacori ena so na vanua me vakaoqo ia ena dua ga na rumu saumi ena dua na otela. E dua na turaga e a vosa tiko kau sega ni kila se meu kila na yacana edaidai. Au kila walega ni dua o koya e taura tu na matabete ka vakauti mai ki na neitou tikina lailai ena lomanibai ni kaulotu. Au sega ni kila na ka e kaya. Ia au a ciqoma e dua na ivakadinadina kaukauwa, vakaidina ni bera noqu yabaki walu, ni se bera mada ga niu papitaiso, niu a rogoca tiko e dua na dauveiqaravi ni Kalou ena Lotu dina i Jisu Karisito. Na ka e solia vei au e dua na ivakadinadina e sega ni rumu saumi, e sega ni kena levu na ivavakoso, e lailai ga, ia e dua na ivakadinadina dei ena noqu a vakalougatataki ena gauna o ya meu tiko rawa ena dua na soqoni ni Lotu dina.
Ena noqu sa toki vata kei na noqu matavuvale ki na iteki tauyavutaki ni Lotu ena noqu sa yabaki tini vakacaca, e se qai imatai ni gauna meu vakila kina na kaukauwa ni kuoramu ni matabete kei na dua na bisopi dauloloma. Au se nanuma tu ga oqo kau vakila na veivakadeitaki e yacovi au ena noqu a dabe taravi bisopi toka ena dua na kuoramu ni bete kau kila ni tiko vua na idola ni dua na turaganilewa dina e Isireli.
Na ivakadinadina vata oqori e a yaco mai ena itekivu ni noqu bula ena rua na Sigatabu, e dua e Albuquerque, New Mexico ka dua tale e Boston, Massachusetts. Na kisi yadua oqori au a tiko kina ena siga e a tauyavu kina e dua na iteki mai na dua na tikina. Kena irairai ni o ira na tamata wale kau kilai ira vinaka era a kacivi me ra peresitedi ni iteki. Au a laveta cake na ligaqu ena siga oqori me vaka o ni vakayacora edaidai ka dua na ivakadinadina e lako mai vei au ni Kalou e kacivi ira na Nona dauveiqaravi kau na vakalougatataki mai na nodra veiqaravi kei na noqu tokoni ira. Au vakila tu ena gauna oqo na cakamana vata ga oqori ena veigauna ka tawa wili rawa ena Lotu.
Au raica ena veisiga kei na veivula ka tarava ena nodra tokoni ni o ira na peresitedi ni iteki oqori era vakaukauwataki ki na nodra veikacivi. Au a raica na cakamana vata ga oqori ena veiqaravi nei Peresitedi Monson ena nona ciqoma na ilesilesi me veiliutaki me parofita ka Peresitedi ni Lotu ka me cakava kece sara na idola ni matabete e vuravura. Na ivakatakila kei na veivakauqeti era lako mai vua ena noqu tiko vata kei koya e vakadeitaka vei au ni Kalou e doka na idola oqori. O au e dua na ivakadinadina bula. Era idola ni dua na matabete ka sa ikoya, ena vosa ni Turaga, “sa sega ni kena itekivu se kena itinitini.”5
Au wasea vei kemuni na noqu ivakadinadina bibi ni sa ikoya oqo na Lotu i Jisu Karisito e dina ka bula tiko. Na Tamada Vakalomalagi ena sauma na nomuni masumasu vagumatua mo ni kila kina vakataki kemuni. E rawa me dua na nomuni ivakadinadina ni ilesilesi o ni tokona nikua e sa mai vua na Kalou. Me vakalevutaki sara mada ga, e rawa mo ni kila ena loma ni Lotu oqo na cakacakatabu vakalotu e vakayacori e rawa me vakasavasavataka na yalo ka vauci e vuravura ena vauci mai lomalagi, me vaka ga na gauna nei Pita, Jemesa, kei Joni. O ira na idola kei na cakacakatabu vakalotu oqori era vakalesui mai oqo ena kena taucoko sara mai vei Josefa Simici na Parofita ka vakadewataki sobu mai vei ira na nona isosomi. O Jisu na Karisito. E bula tiko o Koya. Au sa kila tu o ya. Au vakadinadinataka ni o Thomas S. Monson e Nona parofita bula. Na Lotu i Jisu Karisito ni Yalododonu Edaidai e dina, ka bula tiko. Au vakadinadinataka, ena yaca i Jisu Karisito, emeni.