Na Veiqaravi, e dua na iTovo Vakalou
O ira era dau veiqaravi era na tovolea me ra veivakaturagataki, tarai ira cake, ka laveti ira na wekadra
Na veika kece sara e cakava na Karisito me baleta na noda vakabulai e sa cecere sara. E a rawa me vakayacora na Nona cakacaka ni veivakabulai e rauta ni tolu na yabaki ni veiqaravi. Nikua au gadreva meu vakaraitaka e tolu na inaki ni nona bula e vuravura na iVakabula.
1. Nona Solibula Veisorovaki
Na imatai kei na inaki levu duadua sa ikoya na cecere kei na itavi veivakurabuitaki e ciqoma o Koya mai vua na Tamana: me vakacabori e dua na isorotabu ka bibi me baleti ira na matatamata kecega.
Me vaka ni Luvena e Duabauga na Tamada Vakalomalagi me vakayago, e taukena o Koya na itovo va-Kalou kece nei Tamana, kei na kena mai vei Meri, na tinana vakavuravura, e taukena o Koya na veivakarau vakayago.
Na Nona solibula walega e rawa me vakabulai keda mai na ituvaki vakayago kei na noda lutu (raica Alama 34:8–14). E a lako mai ki vuravura ena dua na inaki matata me solia na Nona bula, me vaka ni Nona bula walega ena rawa ni solia vei keda na bula tawamudu.
Ena sega tale ni dua na tamata sucu vakayago, ena gauna sa oti, ena gauna oqo, se ena gauna sa bera mai, me bula tiko e vuravura se me na mai bula eke me na vakayacora rawa na Veisorovaki ni noda ivalavala ca. Sa iKoya na noda iVakabula ka Dauveivueti (raica Joni 3:16).
Ena lesu tale mai me lewa ka veiliutaki ena keda maliwa ena kaukauwa kei na lagilagi cecere.
2. Nona iVakavuvuli
Na ikarua ni inaki ni Nona tiko maliwai keda sa ikoya me vakatavulica na ivakavuvuli ka vulica mai vei Tamana, ka okati kina na cakacakatabu vakalotu kei na veiyalayalati ni veivakabulai kei na bula va-Kalou (raica Marika 1:27; Joni 7:16).
Na Nona ivakavuvuli sa ikoya na loloma, veivosoti, kei na yalololoma. E sa ikoya na sala ni bula ena vakacegu kei na duavata ena veimaliwai vakaveiwekani kei na sala meda lesu tale kina ka laki bula vata kei na Kalou.
3. Nona Veiqaravi kivei ira na Luve ni Kalou
Na ikatolu ni Nona inaki sa ikoya me tara cake na matanitu ena veiqaravi vei ira na tani. Oqo e dua na mataqali veiliutaki duidui. Na veiqaravi sa ikoya e dua na nodra ivakarau o ira era muri Koya—e dua na itovo va-Kalou.
“Dou sa vakatokai au meu iVakavuvuli, meu Turaga talega: ia dou sa vosa dina; niu sa vakakina.
“Ia kevaka kau sa vuya na yavamudou, koi au na Turaga kei na iVakavuvuli, sa dodonu talega mo dou veivui yava.
“Niu sa solia e dua na ivakarau vei kemudou, mo dou kitaka me vaka kau sa kitaka oti vei kemudou” (Joni 13:13–15).
E bula me vunautaka na kosipeli ni matanitu ka vakabulai ira na tamata mai na mate kecega (raica Maciu 4:23–24). Me vakavulici na Nona ivakavuvuli ka qaravi ira na wekada sa ikoya e rua na itavi eda ciqoma ena gauna eda papitaiso kina. Oqo e veisautaki keda meda dauveiqaravi dina i Karisito.
Ena dua na gauna ni oti na vakatavulici ni Nona ivakavuvuli, e a yalololoma vei ira na tamata ka vakayacora na cakamana ena kena vakalevutaki na ibuli madrai kei na ika ka vakani ira na lewe vuqa, e vakaraitaka tiko vei keda na Nona ivakarau ni yalololoma kei na veiqaravi. Ena siga ka tarava sa levu cake sara na lewe vuqa baleta na kakana era a kania. E vakatavulici ira ena veivakadeitaki kei na raivotu tawamudu:
“Dou sa sega ni vakasaqarai au ni dou sa raica na veika-mana, ni dou a kania ga na veibuli madrai, ka sa mamau kina.
“Dou kakua ni oca me kemudou na kakana sa oti rawa, ia me kemudou ga na kakana sa tu ki na bula tawamudu, o koya ena solia vei kemudou na Luve ni tamata” (Joni 6:26–27).
Me vaka e dua na Lotu e dodonu meda vakani ira era viakana, vakacegui ira na tauvimate, vakasulumi ira na luvawale, ka vakavaletaki ira na dravudravua. Ena isolisoli ni lolo eda vakaceguya na veika e yaga ka gadrevi vakatotolo vei ira na lewenilotu, vata kei na ituvatuva ni welefea me vukea na sotavi ni veika e gadrevi ena dua na gauna balavu. Ena gauna ni leqa sega ni namaki, mai na veiqaravi vakamatatamata eda vakarautaka na veivuke vei ira na tacida kei na ganeda era sega ni lewe ni noda lotu.
Ena sega ni vakawaletaki na veika e gadrevi vakayago, ka ni Lotu i Jisu Karisito ni Yalododonu Edaidai, mai na ivakaro ni Turaga, e maroroya na veiqaravi cecere duadua kei na cakacaka vakaturaga, ka sai koya era vakalougatataki kece kina na turaga ena kena vakatavulici vei ira na ivakavuvuli i Karisito ka sureti ira me ra ciqoma na cakacakatabu vakalotu ni veivakabulai, me rawa ni ra rawata kina na “tucake tale mai na mate kei na bula tawamudu” (Mosese 1:39).
E Dua na Veisau ni Vakanananu kei na iVakarau ni Bula
Au kila ni Kalou e lomani keda. E vakatara meda vakayagataka noda galala ni digidigi kevaka mada ga e cala na noda vakayagataka. E vakatara meda cakava na noda vakatulewa vakaikeda.
E sega ni rawa me vukei keda na Karisito kevaka eda sega ni vakabauti Koya; e sega ni rawa me vakatavulici keda kevaka eda sega ni qaravi Koya. Ena sega ni vakasaurarataki keda meda vakayacora na ka dina, ia ena vakaraitaka vei keda o Koya na gaunisala duadua ga ena gauna eda sa vakatulewataka kina meda qaravi Koya. E dina, na noda qarava Nona matanitu, e gadreva na Karisito meda sotava e dua na veisau ni vakanananu kei na ivakarau ni bula.
“Ia ena kila vakaevei na tamata na nona turaga ka sega ni bau qarava, ka sega ni kilai koya se nanumi koya se lomana?” (Mosaia 5:13).
Veivakalougatataki ni Veiqaravi
Au vakadinadinataka ni noda qaravi ira na wekada eda na kila kina na Turaga.
Na veiqaravi e vakaukauwataki keda ena noda vakabauta ka yaga vakalevu ena Nona matanitu. Na veiqaravi e solia vei keda na inaki kei na yalodei ena noda bula. E kauti keda vakavoleka vua na Kalou ka vukei keda me vakasavasavataka na noda ituvaki va-Kalou. E vakatavulici keda meda lomani ira ka kilai ira na wekada, ka vukei keda meda guilecava na veika eda gadreva vakaikeda, tagutuva laivi na kocokoco, dokadoka, kei na sega ni dau vakavinavinaka. E vakatavulici keda meda nanumi ira era gadreva tu na veivuke, e rawa kina vei keda meda vakalevutaka na bula savasava e taukena tu na iVakabula.
Na yalololoma, loloma, vosota, kila, kei na duavata ena vakalevutaki ni da veiqaravi, ia na sega ni vosota, veiqati, kocokoco, yalokocokoco, kei na nanumi koya vakaikoya ena vakalailaitaki se yali yani. Na levu ga ni noda soli keda, na levu cake ni noda igu meda veiqaravi, ena tubu cake na noda kila, kei na loloma.
O ira era dau veiqaravi era na vakasaqara vakawasoma me ra vakamarautaka na Kalou ka bula ena veilomani vata kei Koya. Era na vakasinaiti ena vakacegu; ena dau laurai vei ira na mata mamarau kei na yalo ni loloma.
O ira era dau veiqaravi era na tovolea me ra veivakaturagataki, tarai ira cake, ka laveti ira na wekadra; o koya gona era na kunea na vinaka vei ira na tani, ka ra sega ni kunea na vuna se me dua na gauna me ra vakacacani kina. Era vakalevutaka na bula savasava ni masumasu me baleti ira era vakalelewa. Era sega ni namaka me ra kilai se me ra saumi. Era taukena na loloma i Karisito.
O ira era dau veiqaravi era na dau lomasoli wasoma me ra wasea na veika era taukena vata kei na veika era kila ena veigauna, ena veivanua kecega, vata kei ira na tamata kecega.
O ira era dau veiqaravi mada ga ena veisaqasaqa era na vakadeitaka tu e dua na inuinui bula ena dua na gauna sa bera mai me na daumaka cake. Era na tomana tiko na nodra vakataudeitaki ena kedra maliwa ni dua na gauna ni leqa baleta ni tiko vei Karisito na nodra vakanuinui.
O ira era dau veiqaravi era na ciqoma na nodra ilesilesi ena yalomalumalumu, nodra kila tiko na nodra yalayala ia era vakadinadinataka ni rua na tamata e rawa me rau cakava na veika kece sara era nakita me ra cakava ia me dua ga vei rau oqori sa ikoya na Kalou.
Ena veivakauqeti va-Kalou, e kaya kina o Penijamini na Tui, “Mo ni kila ko ni sa qaravi Koya tiko na nomuni Kalou, ena nomuni qaravi ira tiko na wekamuni” (Mosaia 2:17). O ira era veiqaravi tiko era na kila vakalevu cake sara na ivakarau kei na vakaitavi ni Kalou.
O ira era dau veiqaravi ena yalogugumatua, ena gauna mada ga e veicalati kina na veika e gadrevi, era sega soti ni vakayalolailaitaki vakarawarawa, oca, se lomatarotaro, baleta na yalayala ni vakacegu ni vakasama kei na veitomani vata kei na Yalo Tabu ena sega ni rawa vakadua me laivi ira.
Veiqaravi e Vuravura Raraba kei na Noda Vanua
Ena Lotu era lewe tini vakacaca na udolu na lewenilotu era veiqaravi vakataki ira ena sivia e 170 na veivanua vakaitamera ka duidui na ivosavosa. Era solia nodra veiqaravi sega ni vakaiyalayala mai na veiliutaki, veivakavulici, kei na qaravi ira na tani, sega ni saumi vakailavo se saumi vakayago, sega na vakavinavinaka se na kilai vakavuravura. Era solia nodra gauna, nodra taledi, nodra ivurevure; era solibula ena veika kece sara era taukena ka veiqaravi vakamaqosa ka vakauasivi sara. Ni oti e dua na gauna era sa na vakagalalataki me soli kina e dua na gauna donu vei ira eso tale me ra veiqaravi.
Ena vuku ni Nona ivunau kei na Nona veiqaravi, na Lotu vakalesuimai i Jisu Karisito sa gugumatua tikoga ena kena vakalougatataki ira tiko na lewenilotu. Eda vakavinavinakataka na Kalou me baleti kemuni kece sara na Yalododonu yalodina era sa vakila na reki ena veiqaravi ka ra sa vakila tiko ena gauna oqo, ka ra na vakila tiko na reki oqo ni ko ni veiqaravi yani vei ira na tani. Sa noda masu me vakalougatataki kemuni tikoga na Kalou ena vuku ni ka oqori. Ena yaca i Jisu Karisito, emeni.