O Kila Li Se O Cei O Iko?
Na nomu kila se o cei o iko ko na vakaukauwataki vakayalo,vakataucokotaki ka vakadeitaki ena nomu itavi vakabete.
Me vaka e dua na Matabete i Eroni ka cauravou gone au se nanuma tikoga na marau e solegi au ena noqu a tabaki meu dua na dikoni vou. Sa dua na ka na noqu nanamaki ki na vakayacori ni noqu itavi. Niu a se dua na gonetagane ena Lalai, au dau wanonovi ira vakamatailalai na dikoni ena noqu tabanalevu ena noqu namaka toka na siga au sa na yabaki 12 kina, ciqoma na matabete, ka rawa meu vota yani na sakaramede. Sa qai yaco dina mai na siga o ya, ni oti ga na nona tabaki au o tamaqu, o koya ka bisopi tiko ni tabanalevu, au a vakila niu sa vakarau tu, meu tekivutaka na noqu itavi vaka dua na dikoni vou, dina ga niu via rere toka vakalailai.
Au sa lewena tiko e dua na kuoramu ni Matabete i Eroni ena gauna oqo. Era veitokani vinaka sara na lewe ni noqu kuoramu. Na veitokani kei na veitacini ena kuoramu o ya e tomani tikoga ena noqu gauna vakaitabagone ena neimami vuli ka qarava vata tiko na neimami itavi vakabete. Keimami a veitokani vata vinaka kece sara ka lakova vata e dua na gauna ni lasa kei na reki ena neimami duavata tiko ena itaviqaravi ni kuoramu.
Ena dua na Sigatabu salamuria e dua vei ira na soqoni ni sakaramede logalogavinaka ka balavu o ya, e a kacivi au sara me keirau veitalanoa mada na imatai ni daunivakasala ni neitou matabisopi. Na veivakatarogi sega ni vakarautaki oqo e a yaco sara me dua na veivakalougatataki ena noqu bula niu dau vakananuma voli na taro e a taroga vei au ena veitalanoa lekaleka ka bibi oqo. E a raici au matua o Baraca Bateman ka taroga, “Dean, o kila li se o cei o iko?” E a yaco e dua na vakanomodi balavu, ka sa qai tukuni tale vakatotoko ka vakaukauwa sara vei au, “Sai iko na luvei Reid Burgess.”
Na ibalebale kei na bibi ni taro o ya e a kama tu e utoqu ena dua na gauna balavu, kau dau vakananuma sara vakalevu ena noqu veiyabaki vakaitabagone. Na taro ni baraca vinaka oqo—“O kila li se o cei o iko?”—e solia vei au e dua na veidusimaki veivakauqeti ena noqu bula taucoko kei na dua na bolebole meu kauta mai na dokai kei na rokovi ki na noqu matavuvale vakakina ki na matabete.
Ena bogi nikua au na via taroga vei kemuni vakayadua na cauravou ena Matabete i Eroni na taro vata o ya kau a tarogi kina ena noqu a se cauravou, “O kila li se o cei o iko?”
Na nomu kila se o cei o iko ko na vakaukauwataki vakayalo,vakataucokotaki ka vakadeitaki ena nomu itavi vakabete. O na nuidei ka dau segata mo vakayacora na digidigi dodonu. O na vakayaloqaqataki ena tutaki ni veika o kila ni dina. Ko na kila mai ni sa dua dina na ka talei na tauri tu ni matabete ni Kalou ka tu vei iko na kaukauwa mo cakacaka ena Yacana.
O Amoni, e dua na daukaulotu levu ni Vola i Momani, e a dua na tamata yalodina ka qaqa nei Lamonai na Tui. E veivakurabuitaki na nona dau taqomaka na qele ni manumanu nei Lamonai na Tui ka vakakina na nona dau qaravi koya vinaka sara. Ena nona mai rogoca na veicakacaka ni qaqa nei Amoni, e a toroga kina o Lamonai se o cei sara mada o Amoni. E a qai kaya vakaoqo o Amoni:
“Raica au sa tamata ga, kau sa nomuni tamata: ia au na kitaka na veika dodonu kecega ko ni sa lewa.”
“Ia ni sa rogoca na vosa oqo na tui sa kurabui kina, ni sa kila rawa ko Amoni na nanuma ni lomana; a sa vosa vua ko Lamonai na tui ka kaya: Ko cei ko iko? Sai iko li na Kalou sa kila na ka kecega?
“A sa kaya vua ko Amoni: E segai.”
E a qai vakamacalataki koya o Amoni ena nona kaya, “Raica au sa tamata ga koi au … buli me ucuya na Kalou, io; sa talai au mai na Nona Yalo Tabu meu mai vakavulici … ira na tamata oqo” (Alama 18:17–19, 34). E a kila o Amoni se o cei o koya ka vakakina na nona ilesilesi dina.
Na noda kila se o cei o keda sa dua na isau ni taro levu me baleta na noda bula. Ni da itubutubu ka iliuliu, sa dodonu me da gumatua ka dina ena noda itavi ni vukei ira eda lomana ena nodra kunea ka kila na isau ni taro rawarawa ka titobu oqo,“O cei koi au?”
Au tarogi kemuni na cauravou ena Matabete i Eroni, Ena rawa vakacava mo na ciqoma na kila kei na ivakadinadina me baleti iko?
Yalovinaka vakasamataka mada na tolu na taro oqo vakakina na ivakavuvuli veisemai ka ra yaga sara ena nomu kila na veika dina me baleti iko.
iMatai, o kila tiko li ni ko luvena tagane na Kalou?
E dua na luve ni Kalou vakaidina ko iko, “ko sa sucu vakayalo ena bula mai liu. Me vaka ni ko Luvena e rawa ni ko vakadeitaka e lomamu ni tu vei iko na rawa ka tawamudu vakalou, ka ni rawa me vukei iko o Koya [o Tamamu Vakalomalagi] ena nomu sasaga ena yalodina mo rawata na rawa ka o ya” (Tudei ena Vakabauta: E dua na iVurevure Vakosipeli [2004], 74).
Na noda kila ni lomani keda o Tamada Vakalomalagi ka da sa Luvena e solia vei keda na kaukauwa, vakacegu, kei na inuinui ni bula ena bula vakayago oqo. Ena iMatai iVola nei Joni eda wilika kina:
“Raica, na kena levu ni loloma sa ia vei keda na Tamada, me da vakatokai kina me da luve ni Kalou: o koya oqo sa sega kina ni kilai keda ko ira na kai vuravura, ka ni ra sa sega ni kilai koya.
“Oi kemudou sa lomani, eda sa qai luve ni Kalou” (1 Joni 3:1–2).
O ni sa bibi sara vua e dua na Tamada dauloloma mai Lomalagi! Ra cauravou, ni masu tikoga! Na nomuni masumasu ena siga kei na bogi ena vukei kemuni ena nomuni kila ni ko ni sa luve ni Kalou.
iKarua, o kila li se o cei o iko ena ituvatuva ni Kalou?
E a vakatoka o Alama me “na ituvatuva cecere ni marau” (Alama 42:8), e dua na ituvatuva ka vakarautaka na Kalou me baleti iko kei keda vakayadua. Na vakamuri ni nona ituvatuva ena vakatara vei keda me da bula mamarau ena gauna oqo ka lesu tale ki na Nona iserau ni da sa mate. E a tala mai o Tamada Vakalomalagi na Luvena Lomani, o Jisu Karisito, me mai, “sereka na ivesu ni mate” (Alama 7:12) ka sorovaka na noda ivalavala ca kei na ivalavala ca kei vuravura. Na nona vakatara me sorovaka na noda ivalavala ca na iVakabula sa ivakaraitaki uasivi duadua ni nona lomani keda yadudua o Tamada Vakalomalagi. “Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu” (Joni 3:16). Na noda kila, vakabauta ka kunea rawa na nona ilesilesi na iVakabula ena vukei keda ena noda kila se o cei o keda.
Me tiki ni nona ituvatuva na Tamada Vakalomalagi, ko a vakatalai mai kina ki na dua na vale kei na matavuvale e vuravura. Na veiyalayala o vakayacora yadudua ena ituvatuva ni Kalou, ka vakakina vakalewe ni dua na matavuvale, ena vauci iko tawamudu, ena vauci iko tawamudu ki na nomu matavuvale ka vakakina ki na matavuvale ni Kalou. Doka ka rokova na yaca o vakatokai kina. Bulataka na ivakatagedegede kei na ivunau ni Kalou. Vakatara me ra kila na tani se o cei o iko ena nomu bulataka na veivakatagedegede, me vaka e kunei ena ivolalailai, Me iSakisaki ni iTabagone. Vulica, vakanananutaka, ka bulataka na veivakatagedegede vakalou oqori. Era sa baleti iko!
iKatolu, o kila li se o cei o iko ena nomu lewe tiko ni Lotu i Jisu Karisito ni Yalododonu Edaidai?
Ko a sa papitaiso ka ciqoma na Yalo Tabu. Ko sa lewe ni lotu vakalesuimai i Jisu Karisito. Sai koya na Nona Lotu, ka sa solia vei keda o Koya e dua na parofita ni Kalou me vakavulici, liutaki, ka dusimaki keda, ena liutaki ni Nona cakacaka ena vuravura. Au vakadinadinataka ni o Peresitedi Thomas S. Monson e noda parofita ena “gauna ni veivakararawataki” oqo (2 Timoci 3:1). Vakarorogo vua. O koya kei ira na vo ni parofita ni gauna oqo era na vakavulica vei iko, se o cei o iko ka vakakina na sala mo ucuya kina na iVakabula.
Sai iko e dua na lewe ni Lotu i Jisu Karisito ni Yalododonu Edaidai, ka o a sa tabaki mo taura na matabete ni Kalou. E a kaya kina vakaoqo o Peresitedi Monson, “Eda sa nuitaki me da ciqoma na matabete ka cakacaka ena yaca ni Kalou. Eda vakaivotavota ena dua na veivakabauti tabu. E levu sara na ka sa namaki vei keda” (“A Matabete Vakaturaga,” Liaona, Nove 2007, 59).
O sa lewena e dua na kuaoramu ni matabete ni cauravou, na vanua o na vakila kina na veitacini kei na veitokani nodra na vo ni lewe ni matabete. Na kuoramu sa itataqomaki kivei iko mai na veika vakavuravura. Sa rawa kina mo ni veivukevukei vakaikemuni ka vakaitavi ena veicakacakatabu vakalotu ni matabete. Ena nomuni kuoramu ko ni vakavulici talega kina ena ivakavuvuli ni kosipeli i Jisu Karisito ka na vukei iko ena nomu kila se o cei o iko. Kemuni na cauravou, ni doka na matabete ni Kalou.
Au vakadinadinataka ni na kauta mai vei iko na marau ena nomu bula na nomu kila se o cei o iko, kei na nomu maroroya na nomu yalayala ka vakakina na veiyalayalati vata kei na Turaga.
Me rawa vei keda me da kila kece se o cei sara mada oi keda. Me vakadinadinataka vei keda ena bogi nikua na Yalotabu ka da sa vakila tiko oqo “ni tukuna mai ki yalo[da], ni da sa luve ni Kalou” (Roma 8:16). Ena yaca i Jisu Karisito, emeni.