Elder James J. Hamula
Ena Vitusagavulu
Kevaka e dua beka na ka meu kilikili kina ki na veikacivi oqo, sai koya o ya na noqu ivakadinadina au a taukena niu se qai yabaki 18 niu vakavakarau tiko ki na kaulotu,” a kaya o Elder James Joseph Hamula. “Au a sotava e dua na ka veivakurabuitaki niu a ciqoma mai kina na noqu ivakadinadina kaukauwa ni sa vakalou na Turaga kei na Nona Lotu.”
E a sucu o koya ena ika 20 ni Noveba, 1957, e Long Beach, California mai Amerika, kivei rau o Joseph kei Joyce Hamula, ka nanuma lesu kina o Elder Hamula na nona a wilika na itukutuku ni iMatai ni Raivotu. A wilika o koya na nona a gadreva na cauravou o Josefa Simici me kila na ka dina, ka nanuma o koya ni sa dodonu talega vua me gole vua na Turaga ena masu. “Au a qai tekiduru ena yasani noqu loga ka masu ena yaloqu dina ki lomalagi. E a yaco mai na isau ni noqu masu e matata ka kilai vakavinaka sara ga mai na veika kece tale au sa sotava ena noqu bula oqo. Au a tucake mai ka kila ni sa dina na Lotu oqo.”
Ni oti na nona veiqaravi ena Tabana ni Kaulotu e Germany Munich, a qeretueti o Elder Hamula mai na Brigham Young Univesiti ena diqiri ni vuku vakapolitiki kei na filosofi. E a qai taura na nona masta ni arts ena filosofi ni politiki kei na koroi levu ni lawa mai BYU talega. Ena gauna a kacivi kina ki na iMatai ni Kuoramu ni Vitusagavulu, e a cakacaka tiko vaka-daunilawa e Mesa, Arizona mai Amerika.
Mai Arizona a sotavi Joyce Anderson kina, na watina, o Elder Hamula, Erau a vakamau ena Valetabu e Mesa Arizona ena ika 27 ni Epereli, 1984, ka rau sa itubutubu tiko ni ono na gone. Erau a sucu na luvedrau drua tagane gone duadua, ena gauna a peresitedi tiko kina o Elder Hamula ena Tabana ni Kaulotu ena Ceva kei Washington D.C.
E a veiqaravi talega o Elder Hamula ena itutu vaka-bisopi, peresitedi ni iteki, kei na Vitusagavulu ni iWasewase. “Na veika kece au sotava ena Lotu sa mai vakaqaqacotaki kina na ka au a sotava o ya niu se qai yabaki 18 tiko kina ka vakavakarau tiko ki na noqu laki kaulotu,” a kaya. “Sai koya o ya na kena yavutu taucoko sara.”