Elder F. Michael Watson
Ena Vitusagavulu
Na nona cakacaka tu mai ena tolusagavulu kawalu na yabaki vata kei ira na iapositolo kei na parofita ena kena veisiga yadua sa vaqaqacotaka cake kina na ivakadinadina nei Elder Frank Michael Watson ena iMatai ni Kuoramu ni Vitusagavulu.
E a vukevuke ni sekeriteri, ka laki sekeriteri sara ni Kuoramu ni iApositolo Le Tinikarua o Elder Watson mai na 1970 ki na 1972. Vakatekivu mai na 1972 e a ivukevuke ni sekeriteri ki na Mataveiliutaki Taumada ka vakatekivu mai na Epereli ni 1986 e a sekeriteri tiko mai ni Mataveiliutaki Taumada.
“Na veika au sa raica rawa ena noqu, veimaliwai ena veiyabaki kece sa qai vaqaqacotaki cake ga kina na noqu ivakadinadina,” a kaya o koya. “Sa sega tale niu lomatarotaro tiko ni sa bula dina tikoga na Kalou, o Jisu na Karisito, kei koya ga sa kaciva o Koya sa Nona parofita ena gauna o ya.”
E a sucu o Elder Watson ena ika 9 ni Maji, 1943, e Spring City, Utah e Amerika kivei rau o Frank C kei Genniel Baxter Watson. E a laki kaulotu ki na Tabana ni Kaulotu ena Northeast British mai na 1962 ki na 1964, tarava na nona laki curu ena mataivalu mai na 1966 ki na 1969, ka dua na yabaki na nona tiko mai na Republic ni Ceva kei Vietnam. A taura na nona diqiri ni bejala mai na Utah State Univesiti.
A vakamautaki Jolene Mann ena ika 3 ni Sepiteba, 1965, ena Valetabu e Salt Lake. Erau itubutubu ni 12 na gone. Sa veiqaravi oti talega vaka-peresitedi ni kuoramu ni italatala qase, peresitedi ni kaulotu ena iteki, bisopi, peresitedi ni iteki, ka dauveivauci ena Valetabu e Bountiful Utah.
“Ena veiyabaki kece oqo au sa cakacaka vata tiko mai kei ira na Vakaitutu Raraba, ia niu sa mai duavata kei ira oqo sa dua dina na ka e veivakayalomaluataki,” a kaya o koya. Me vaka ni sa balavu sara na noqu a cakacaka vata tu mai kei ira, e vakadeitaka o Elder Watson ni sa ka dokai me mai tu oqo ena dua na itutu me vakaqaqacotaka kina na nodra ivakadinadina na tamata me baleti ira na parofita kei na iapositolo kei na ilesilesi ni Lotu i Jisu Karisito ni Yalododonu Edaidai.