Kerekere ena Vakabauta

Elder David A. Bednar

Ena Kuoramu ni iApositolo Le Tinikarua

Na masu ka vakaibalebale cake vakalevu e gadrevi ruarua kina na veivosaki sa vakalou kei na cakacaka vakatabui.

Elder David A. Bednar

Au sa sureta na Yalo Tabu me vukei keda ena noda na rogoca e dua na ivakavuvuli ena rawa ni vukea me vakaibalebale cake vakalevu na noda masu—o ya na ivakavuvuli vakosipeli ni kerekere ena vakabauta.

Au gadreva meu raicalesu mada e tolu na ivakaraitaki ni kerekere ena vakabauta ena masu e vakaibalebale cake vakalevu, ka me veivosakitaki na lesoni eda na vulica mai vei iratou yadua. Ni da vakamacalataka tiko na masu, au via vakamatatataka na vosa vakaibalebale cake vakalevu. E tukuni tiko kina ni noda masu wale tu ga e duidui sara mai na masu e vakaibalebale cake vakalevu. Au vakabauta ni o keda kece oqo eda sa kila tiko ni masu sa ka bibi ki na vakatorocaketaki ni noda bula vakayalo kei na veitaqomaki. Ia na veika eda sa kila tu e sega ni vakavotukanataki ena veika eda dau vakayacora. Ka dina ga ni da sa kila tiko na bibi ni masu, ia sa rawa vei keda me da vakatorocaketaka na ivakarau tudei kei na mana ni noda masu yadudua kei na masu vakamatavuvale.

Kerekere ena Vakabauta ka Cakacakataka

Na ivakaraitaki cecere ni kerekere ena vakabauta o ya o Josefa Simici kei na iMatai ni Raivotu. Ena nona a vakasaqara voli na cauravou o Josefa na ka dina baleta na lotu, a wilika kina o koya na tiki ni ivolanikalou oqo ena imatai ni wase ni vola i Jemesa:

“Ia kevaka sa lailai na vuku vua e dua vei kemudou me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.

“Ia me kerekere ena vakabauta, me kakua ni vakatitiqa” (Jemesa 1:5–6).

Sa kerei mo ni raica ni gadrevi kina na kerekere ena vakabauta, kau kila ni sa kena ibalebale ni sa gadrevi kina me kakua walega ni cavuti ia me vakayacori sara ga, sa rua kina na itavi me kerekere ka cakava, na ilalavaki me veivosaki ka cakacakataka.

Ni a vakasamataka na tiki ni ivolatabu oqo a gole yani kina o Josefa ki na dua na veikau e volekata na nona vale ka masu me vakasaqara na vuku vakayalo. Me da raica oqo na taro e a dusimaka na vakasama kei na vakamamasu nei Josefa.

“Ia ni sa veisaqasaqa tu vakoqo na vunau, na vakasama ni tamata kei na nodra cikecike na veimatalotu, au sa kaya e lomaqu: A cava meu cakava? Na matalotu cava vei iratou oqo e dina? Eratou lasu taucoko li? Ke dua vei iratou e dodonu tiko, ia ko cei? Au na kila beka vakacava?…

“Au a laki taroga na Turaga se matalotu cava e dodonu, io meu kila ka curu kina” (Josefa Simici—Ai Tukutuku 1:10, 18).

Na lomatarotaro nei Josefa e sega walega ni vakatabakidua ki na veika me kila ia sa baleta talega na veika me na vakayacori! Na nona masu e sega walega ni taroga,“Na lotu cava e dina?” E a taroga, “Na lotu cava meu na lewena?” E a gole yani o Josefa ki na veikau me laki kerekere ena vakabauta, ka sa yalonuidei o koya me na cakacakataka.

Na vakabauta dina sa vakatabakidua yani vua na Turaga o Jisu Karisito ka na dau veimuataki ki na cakacaka dodonu. E a vakatavulica na Parofita o Josefa Simici ni “vakabauta [sa] imatai ni ivakavuvuli ena lotu sa vakatakilai mai, ka sa yavu ni ivalavala dodonu kecega” ka sai koya talega “na ivakavuvuli ni cakacaka kivei ira taucoko na tamata vuku” (Lectures on Faith, [1985], 1). Na cakacaka e sega walega ni vakabauta na iVakabula, na cakacaka e umanaki ena kena ivakavuvuli dina ka sa iusutu tudei ni vakabauta. O koya gona, ni “sa mate ga na vakabauta ni sa sega na cakacaka” (Jemesa 2:20).

E a tomana tale o Parofita Josefa na nona ivakamacala ni “vakabauta e sega walega ni ivakavuvuli ni cakacaka, ia ka ni kaukauwa talega, kivei ira kece na tamata vuku, era tiko mai lomalagi se e vuravura” (Lectures on Faith, 3). O koya gona, na vakabauta na Karisito ena veimuataki ki na cakacaka dodonu ka na vakatorocaketaka na noda rawa ka vakayalo kei na kaukauwa. Na noda kila vakavinaka ni vakabauta sa ivakavuvuli ni cakacaka kei na kaukauwa ena vakauqeti keda me da taurivaka na noda galala ni digidigi ka salavata kei na dina ni kosipeli, ena sureta na kaukauwa veivueti kei na veivaqaqacotaki ni Veisorovaki ni iVakabula ki na noda bula, ka vakarabailevutaka na kaukauwa sa tiko e lomada ka sa yaco me da vakayacora ga na ka eda gadreva (raica V&V 58:28).

Sa dede na noqu doka na dina ni masu ka vakaibalebale cake vakalevu e gadrevi ruarua kina na veivosaki sa vakalou kei na cakacaka vakatabui. Na veivakalougatataki ena gadrevi toka kina na noda cakacakataka ni bera ni da taura, kei na masu, me vaka e sa “dua na tiki ni cakacaka, … e sa dua na ivurevure ni kena rawati na veivakalougatataki e cecere duadua” ( Bible Dictionary, “Prayer,” 753). Me da mua ga ki liu ka gumatua tikoga ena cakacaka vakatabui ni masu ni cavuti oti na “emeni” ena noda vakayacora yani na cakacaka eda sa talaucaka yani vua na Tamada Vakalomalagi.

Na kerekere ena vakabauta sa gadrevi kina na dodonu, cakacaka, yalodina kei na gumatua. Meu vakamacalataka mada e dua na ivakaraitaki ni ka au tukuna tiko kau sa sureti kemuni kina.

Eda dau masulaka vakadodonu me ra taqomaki ka rawa ka o ira na daukaulotu tudei e vuravura taucoko. Ka dua vei ira na gacagaca bibi ni noda masu e vuqa o ya na noda kerea me ra muataki yani kivei ira na tamata yadua kei na matavuvale era sa vakarau tu me ra ciqoma na itukutuku ni Vakalesuimai. Ia sa kena iusutu dina ni sa noqu ilesilesi ka nomuni ilesilesi me daru vakasaqarai ira na tamata me ra vakavulici mai vei rau na daukaulotu. O ira na daukaulotu e nodra cakacaka tudei na veivakatavulici; o kemuni vata kei au e nodaru cakacaka tudei na vakasaqarai ira na tamata. Ka sa dodonu kivei kemuni kei au ni daru sa daukaulotu ena bula oqo me daru kakua ni masulaka me ra cakava na daukaulotu tudei na nodaru cakacaka!

Kevaka o kemuni kei au me daru masu vakaidina ka kerekere ena vakabauta, me vaka a cakava o Josefa Simici —kevaka me da masu ka kakavaki tiko me laki cakacakataki ka sega ni cavuta walega—ia sa na qai toso dina ki liu na cakacaka ni kena kaburaki na kosipeli ena sala e veivakurabuitaki. Na masu ena vakabauta vakaoqo sa rawa me oka kina na gacagaca eso oqo:

• Vakavinavinakataka na Tamada Vakalomalagi ena vuku ni vunau kei na cakacakatabu vakalotu ni kosipeli vakalesuimai i Jisu Karisito ka sa kauta mai na inuinui kei na marau ki na noda bula.

• Kerea me da vakayaloqaqataki ka doudou me da dolava na gusuda ka wasea yani na kosipeli vata kei ira na noda matavuvale kei ira na itokani.

• Vakamamasu vua na Tamada Vakalomalagi me vukei keda me da kunei ira na tamata kei na matavuvale era sa tu vakarau me ra na ciqoma na noda veisureti me ra vakavulici mai vei ira na daukaulotu ena noda vale.

• Yalataka me da na cakava na noda itavi ena siga nikua kei na macawa oqo—ka kerea na veivuke mo kakua ni veilecayaki, rere, se lomalomarua.

• Vakasaqara na isolisoli ni kila na yalo—me rai na mata kei na daliga me rogoca na veigauna donu ni kaulotu ni ra yaco mai.

• Masu ena yalodina me da vakaukauwataki me da laki cakava na veika e dodonu me da vakayacora.

Me da vakavinavinaka talega, ka kerea vakakina na veivakalougatataki tale eso ena masu vakaoqo, ka na tini ena yaca ni iVakabula. Ka na yaco me tomani tikoga ka vakarabailevutaki na cakacaka vakatabui ni masu o ya.

Na ivakarau tudei vakaoqo ni veivosaki vakalou kei na cakacaka vakatabui sa rawa me vakayacori ena noda masu baleti ira na dravudravua kei na vakaleqai me baleti ira na tauvimate kei na vakararawataki, baleti ira na lewe ni noda matavuvale kei ira na itokani era sotava tiko na dredre, kei ira era sega tiko ni lako mai ki na soqoni ni Lotu.

Au sa vakadinadinataka ni na yaco me vakaibalebale cake vakalevu na masu ni da kerekere ena vakabauta ka cakacakataka. Au sa sureti keda yadua me da masu ena vakabauta me baleta na noda ilesilesi vakalou ena kena kaburaki na kosipeli. Ni da vakayacora oqo, au sa yalataka ni na tadola na veikatuba ka da na vakalougatataki me da kila ka cakacakataka yani na kena veigauna donu sa vakarautaki mai.

Ni Oti na Vakatovolei ni Noda Vakabauta

Na ikarua ni noqu ivakaraitaki e vakamatatataka tiko na bibi ni gumatua tikoga ena gauna ni vakatovolei ni noda vakabauta. Ena vica na yabaki sa oti e a gole yani e dua na matavuvale ki Iurope mai Amerika. Ni oti toka ga vakalailai na nodratou yaco yani, sa tauvimate vakalevu sara e dua na luvedrau tagane yabaki 13. Erau sa qai nanuma o tinana kei tamana ni mosi ni ketena oqo e vu beka mai na wawale ni vuka vakabalavu o ya, ka ratou sa tomana tikoga na matavuvale na nodratou veilakoyaki.

Ni toso tiko na siga o ya, sa bibi sara na tauvimate nei luvedrau tagane. Sa mamaca sara vakalevu na yagona. Sa qai solia o tama vei luvena e dua na veimasulaki ni matabete, ia e a sega ni dua na veisau.

Sa oti e vica vata na auwa, ka sa mani tekiduru o tinana e yasai luvena tagane ka vakatakekere ena masu kivua na Tamada Vakalomalagi me baleta na bula nei luvena. Eratou sa yawa sara mai vale ena dua na vanua tani ka ratou sega ni kila na ivakarau ni kena rawati na veiqaravi vakavuniwai.

E a qai taroga o tinana vei luvena kevaka e gadreva me masu vata kei koya. Sa kila vinaka tu o tinana ni waraki tiko na veivakalougatataki me yaco mai e sega sara ni se rauta; eratou sa gadreva me tomani tikoga na kena cakacaka. Ni sa vakamacalataka ni veimasulaki sa vakayacori oti vua e se kaukauwa tikoga, ka sa vakatura o koya ena kerekere ena masu, me vaka ga era a vakayacora na iApositolo taumada, “Ni vakalevutaka na neitou vakabauta” (Luke 17:5). Na masu e oka kina e dua na ilesilesi ni veivakabauti ena kaukauwa ni matabete kei na dua na yalodina me gumatuataki tikoga me yaloqaqataki na kena vakayacori na veika cava ga sa lavaki mai me rokovi kina na veimasulaki—kevaka sa vaka na lewa ni Kalou na veimasulaki o ya. Ni oti ga vakalailai na nodrau masu vakarawarawa o ya, sa tekivu me vinaka cake mai na bula nei luvedrau tagane.

Na cakacaka ena yalodina nei marama tina kei na luvena tagane a vukea na kena sureti na kaukauwa ni matabete sa yalataki tu ka sa vakakina na kena vakadeitaki na kena lavaki me da “kakua ni vakatitiqataka [ni da] sa sega ni raica, ka ni na vakatovolei taumada na [noda] vakabauta [eda] na qai raica e muri na kena i vakadinadina” (Ica 12:6). Me vakataka ga na valeniveivesu erau a vesu tiko kina o Alama kei Amuleki e a sega ni bale ki na qele “kevaka e [rau] sa sega ni vakabauta,” ka vakakina vei Amoni kei iratou na nona itokani daukaulotu eratou sa sega ni raica na caka mana lelevu ena nodratou cakacaka “kevaka eratou sa sega ni vakabauta” (raica Ica 12:12–15), ia na nona a vakabulai na gontagane-yabaki-13 oqo ena sega ni yaco me yacova ni sa oti nodratou vakabauta ka sa yaco vakakina “me vaka na nodra vakabauta” (V&V 10:47).

Me Kakua ni Yaco na Noqu Lewa, Me Yaco ga Na Nomuni Lewa

Na ikatolu ni ivakaraitaki e vakabibitaka na kena kilai ka ciqomi na lewa ni Kalou ena noda bula. Ena vica na yabaki sa oti e a dua na tama ni gone cauravou e a gugumatua tu ena Lotu ni se gonetagane ia a mai digitaka e dua tani na sala ena nona veiyabaki ni itabagone. Ni oti mai na nona veiqaravi ena mataivalu, a vakamautaka e dua na goneyalewa totoka, ka sa vakalougatataki na nodrau vuvale ena luvedrau.

Ena dua na siga ka sega ni namaki a tauvimate kina e dua na luvedrau yalewa lailai yabaki-va ka curu sara ki valenibula. Ena nuiqawaqawa ka sa imatai ni gauna vua ena vica vata na yabaki, sa tekiduru na tama oqo ka masu, ka kerea me vakabulai na luvena yalewa. Ia sa toro sobu tikoga na nona bula. Sa yaco sara, me sa vakila o tamana ni sa sega ni rawa ni bula na luvena yalewa lailai oqo, ka sa tekivu me veisau na nona masu; sa sega tale ni masu; ka me ia na veivakabulai ia sa masulaka me soli na yalo ni kila. “Me Yaco ga na Lomamuni” sa ikoya na voqa ni nona vakamamasu.

Sa yaco me sa laki cegu wale tu ga o luvena yalewa, ka sa kila o tamana ni sa vo lailai sara na auwa ni nona bula e vuravura. Ena nodrau sa vaqaqacotaki ena yalo sa kila, vakanuinui, kei na kaukauwa erau sa sobuti kina, erau sa mani masu tale na itubutubu, ka kerea me rau mokoti koya tale mada vakadua vakavoleka ni se cegu tiko. E a tadola mai na mata ni luvedrau yalewa, ka sa dodoka mai na ligana malumalumu vei rau na nona itubutubu me iotioti ni nodratou veimokomoko. Ka sa mani takali yani. Sa kila vakavinaka na tama oqo ni sa rogoci na nodrau masu—sa mai vakaceguya na yalodrau e dua na Tamada Vakalomalagi dauveivukei, dauloloma. Sa mai yaco na lewa ni Kalou, ka sa soli vei rau e dua na yalo ni kila. (Adapted from H. Burke Peterson, “Adversity and Prayer,” Ensign, Jan. 1974, 18.)

Na kena kilai ka ciqomi na lewa ni Kalou ki na noda bula sa gacagaca bibi dina ni kerekere ena vakabauta ena masu sa vakaibalebale cake vakalevu. Ia, na kena cavuti wale tu ga na vosa “Me yaco ga na nomuni lewa” e sega sara ni se taucoko. Eda sa gadreva vakayadudua na veivuke ni Kalou ena noda solia na noda vakatulewa ki Vua.

“Na masu sa ikoya e dua na cakacaka erau dau duavata kina na lewa ni Tamada kei na lewa nei luvena” (Bible Dictionary, “Prayer,” 752–753). Na masu ena yalomalumalumu, yalodina, kei na cikecike ena rawa kina kivei keda me da kila vakavinaka ka umani keda ki na lewa ni Tamada Vakalomalagi. Kei na kena oqo a vakayacora kina na iVakabula e dua na ivakaraitaki uasivi duadua ena Nona a masu ena Were o Kecisemani,“ka kaya, Tamaqu, ko ni sa vinakata, ni kauta tani vei au na bilo oqo: ia me kakua ni yaco na noqu lewa, me yaco ga na nomuni lewa… . Ia ni sa yaluma sara sa masu vagumatua sara” (Luke 22:42, 44).

Na inaki ni noda masu e sega ni dodonu me dua na lisi se ituvatuva ni veika eda gadreva ia me vakadeitaki vei keda kei ira na tani eso na veivakalougatataki sa gadreva tiko na Kalou me vakatikora kivei keda, ena Nona lewa kei na kena gauna donu. Sa dau rogoca ka sauma mai na Tamada Vakalomalagi na noda masu ena yalodina, ia na kena isau eda na ciqoma ena rairai sega ni kena eda namaka tiko se na yaco mai vei keda ena gauna eda gadreva kina se ena kena sala eda vinakata kina. Na dina oqo sa mai vakadinadinataki tiko ena tolu na ivakaraitaki au sa mai cauraka tiko nikua.

Na masu sa dua na madigi kei na gagadre dina ni yalo. Sa rawa me da ulabaleta yani na iwalewale kei na masu e vaka“lisi” ka me da vakayacora ga na noda masu ena yalodina ni sa dodonu me da kerekere ena vakabauta ka cakacakataka, ena gauna eda bula curuma yani ena yalo vosota, qaqa ena vakatovolei ni noda vakabauta, ni da sa vakavinavinaka ena yalomalua ka ciqoma “ia me kakua ni yaco na noqu lewa, me yaco ga na Nomuni lewa.”

Au sa vakadinadinataka ni sa dina ka vakalou na Tamada Tawamudu, na Luvena sa Duabauga, na Turaga o Jisu Karisito, kei na Yalo Tabu. Au sa vakadinadinataka ni Tamada sa dau rogoca ka sauma mai na noda masu. Me da gugumatua mada koi keda yadua ena veivakadeitaki cecere me da kerekere ena vakabauta ka me yaco na noda masu me vakaibalebale cake vakalevu. Sa noqu masu oqo ena yaca tabu ni Turaga o Jisu Karisito, emeni.