Elder D. Todd Christofferson

Ena Kuoramu ni iApositolo Le Tinikarua

iVakatakilakila

E tiko na veika o na vulica rawa mai vei ira na tamata kecega,“ e kaya o Elder David Todd Christofferson, na lewe vou sa kacivi ka tokoni ni Kuoramu ni iApositolo Le Tinikarua. ”Au se bera mada ni kunea e dua na tamata—e loma se ena taudaku ni Lotu—meu sega ni vulica mai vua e dua na ka me vakavinakataki au cake kina.“

Na nona vuli ka mai vei ira na tamata vuku ka sa tu na nodra ivureuvure me ra solia e a gumatuataka sara o Elder Christofferson ena nona bula taucoko, vakatekivu mai vei rau na nona itubutubu.

A sucu kivei rau o Paul Vickery Christofferson kei Jeanne Swenson Christofferson ena ika 24 ni Janueri, 1945, ka susu cake o Elder Christofferson mai Pleasant Grove kei Lindon e Utah mai Amerika. E kaya ni o koya kei iratou na va na tacina tagane gone eratou a bula voli mai ena dua na gauna vaka-gone e “marautaki” ka “taucoko.”

“E a taudei tu ka keitou marautaka na neitou vuvale,” e nanuma lesu o koya. “E a vakaraitaka o Tamaqu kei Tinaqu na ivakarau ni kena bulataki na ituvatuva ni kosipeli.”

Ena itekivu ni koronivuli torocake, sa toki o Elder Christofferson kei na nona matavuvale ki Somerset, New Jersey mai Amerika. E kea e a raica kina na veivanua vovou, tamata vou, kei na veimadigi vovou.

“Au a taleitaka na veitokani kei na vemaliwai kei ira na tamata mai na veiyasana kecega kei na veimataqali veivakabauta tale eso,” a kaya. “E a vuavuai vinaka sara na veimaliwai oqo.”

Ni oti na vuli torocake, e a laki vuli sara o Elder Christofferson ena Brigham Young University me dua na yabaki ni bera ni biubiu me laki kaulotu tudei e Argentina. E kea, a kaya o koya, ni a vuli mai vei rau “e rua na peresitedi ni kaulotu duatani sara,” o ya o Peresitedi Ronald V. Stone ena imatai ni vica na vula ni nona kaulotu vata kei Perestedi Richard G. Scott (sa Elder Scott tiko ena gauna oqo, ka lewe talega ni Kuoramu ni iApositolo Le Tinikarua) me yacova ni sa oti na nona kaulotu.

Me baleti Elder Scott, e nanuma lesu vakaoqo o Elder Christofferson: “Keirau a vulica me keirau dau vakadodonutaki keirau tikoga, me vakataki koya ga. E dau saga o koya na veika cecere me rawa ni toro cake kina ka cakava e vuqa na ka, ka me rawa ka vakalevu. Ena vuku ni ka o ya, keirau sa tekivu me keirau raici keirau cake tiko, na kena cakacaka, kei na veika me keirau rawata.”

Ni sa lesu mai o koya mai Argentina, sa laki vuli tale o Elder Christofferson e BYU, ka vulica kina na vosa Vakavalagi ka vakaitavitaki koya sara ena vakamatanitutaki ni gonevuli kei na qito e loma ni univesiti. E a sotava ka vakamautaki Katherine (Kathy) Thelma Jacob na watina; erau a vakamau ena mua ni nodrau vuli torocake ena ika 28 ni Me, 1968, ena Valetabu e Salt Lake. Edaidai sa lima tiko na luvedrau ka walu na makubudrau.

E a qeretueti o Elder Christofferson mai BYU ena diqiri ni bejala ena 1969 ka laki saga sara na nona diqiri ni lawa ena Duke Univesiti. Ni qeretueti oti mai ena 1972, a laki cakacaka sara vaka-vunivola ni lawa vei Turaganilewa John J. Sirica, ka veiqaravi sara ena gauna ni veivaqaqai ni Watergate.

“Sa qai dua dina na gauna talei na imatai ni noqu cakacaka ni oti toka ga mai na vuli,” a kaya o Elder Christofferson. “Au a raica kina na nodrau lako vata ga na cakacaka vakalawa e uasivi kei na kena e torosobu duadua. Ia na ka au sotava oqori sa vakavulica vei au na ka ena cakava rawa na veiqaravi vakalawa e vinaka, ka solia vei au e dua na yalonuidei kei na veivakauqeti.”

E a cakacaka vakalawa taumada o Elder Christofferson ena dua na kabani ni lawa ka tomana yani ki na veivakasalataki vakalawa ena veibaqe kei na veikabani lelevu tale eso, vakalevu ga ena Tokalau kei Amerika. Na veika e marautaka vakalevu ena veiyabaki o ya, a kaya o Elder Christofferson, “ni sai koya na nona veimaliwai kei ira na tamata vinaka ni veituvaki kecega kei na veimataqali vakabauta kecega. Au raica kina ni vuqa na tamata era gadreva vakaidina me ra vukei ira na tamata ka ra yalodinataka me vakavotukana.”

Ena 1993 a kacivi o Elder Christofferson me lewe ni iMatai ni Kuoramu ni Vitusagavulu, a vakatoka o koya me gauna ni “veivakavukui.” Na nona ilesilesi a vakauti koya sara vakalekaleka ki na iWasewase ni Ceva-i-Ra ni Vualiku kei Amerika kei na iWasewase ni Ceva kei Mexico.

E nanuma vinaka tiko o Elder Christofferson na veigauna ni nona veivakatarogi ena gauna a veisautaki kina na veiliutaki ena dua na iteki e Mexico. “E dua vei ira era a vakatarogi e turaga yalomalua, ka lailai toka ga. E a dua na veivakatarogi vinaka sara, kau a abrazo vua [mokoti koya]. Ni sa curu ki tuba na turaga oqo, a kaya sara vei peresitedi ni iteki, ’La autoridad me abrazó.’ [’Sa mokoti au na iliuliu levu.’] E a baci tukuna ka tukuna tale. Na ka o ya e a vakavulica vei au meu dau vakavinavinakataka na veika lalai era dau vakayacora na tamata. A vakavulica talega vei au ni sa rawa me da cakava eso na ka me ra vakila kina eso ni ra kauwaitaki tiko ni ra sa luvena tagane se yalewa na Kalou.

“E rawa dina me da vulica na veika vinaka eso mai na veisotari kei na veimaliwai yadua,” a tomana. “Sa nuitaki, ni da sa vakayacora tiko vei ira na tani.”

Ena 1998 e a kacivi o Elder Christofferson me lewe ni Mataveiliutaki ni Vitusagavulu, na vanua a veiqaravi tiko kina me yacova sara na nona kacivi ki na Kuoramu ni iApositolo Le Tinikarua. E kaya o koya ni gauna a ciqoma kina na nona veikacivi vou mai vei Peresitedi Thomas S. Monson, taumada “e vaka me ka dredre.”

“Niu vakasamataka sa vaka me uabaleti au na icolacola ni ilesilesi oqo. Ia au sa vuli vinaka mai vei ira na noqu dauveituberi totoka ena noqu a veiqaravi tiko ena Kuoramu ni Vitusagavulu vata kei ira na lewe ni Kuoramu ni iApositolo Le Tinikarua ena veiyabaki 15 sa oti. Ia au sa mai vakadeitaki talega vakakina niu sa kila ni Turaga sa dau tokoni au tikoga. Ena veileqa kece, ena veituvaki vou, kei na noqu gagadre yadua, sa dau rogoci au o Koya niu masu. Au sa dau nuitaki Koya tikoga ka sega mada niu bau lomaleqa. Sa tudei tu ga na Nona yalayala. Au sa kila ni na vukei au o Koya ena veika au gadreva talega eke.”