Na iYaqa ni iVakadinadina

Mary N. Cook

iKarua ni Daunivakasala ena Mataveiliutaki Raraba ni Goneyalewa

Vaqaqacotaka na nomuni vakabauta ena nomuni vakamuria na ituvatuva oqo ni masu, vuli, kei na talairawarawa ki na ivunau.

iVakatakilakila

Mary N. Cook

Ena noqu tiko voli e Esia, au dau raica kina na veitobu era bula tu kina na veiotalili totoka ka ra se tu. Era vakarairaivinakataka ka vakaboivinakataka na veitobu soso ka boica o ya ka ra sa sega tu ni drodro. Na drau ni veiotalili era nawa toka e dela ni wai oqo, ka dua, na ikasana balavu ka kaukauwa e kena iyaqa tu e loma ni tobu. Na bula vinaka tikoga ni kena ikasana oqo ena vakadeitaka tiko na kaukauwa ni senikau oqo, ena gauna mada ga ena luvuci kina na tobu ena uca bi.

Kemuni na noqu goneyalewa lomani, ko ni sa vaka sara ga na senikau totoka oqo. Na kemuni ituvaki vinaka, bula savasava, kei na nomuni totoka e mai vakavinakataka cake na neimami bula kei na nodra bula na nomuni dui matavuvale. Ko ni bula tiko oqo ena dua na vuravura veibolei e vakacacani tu ena veitemaki kei na veivakatovolei, ia na nomuni ivakadinadina baleti Jisu Karisito sa rawa me nomuni iyaqa. Na vakabauta na Turaga o Jisu Karisito ena vaqaqacotaka ka vukea na tubu ni nomuni ivakadinadina, ka sa na rawa kina mo ni vorata rawa na veika butobuto kei vuravura ka tudei tikoga ena nomuni ivakatagedegede ni ivalavala dodonu.

Na iyaqa e kena ibalebale “e dua na ka e solia na kaukauwa se yalodei ena gauna ni veilecayaki.”¹ Na nomuni ivakadinadina sa nomuni iyaqa ka na solia vei kemuni na yalodei mo ni “tudei ka sega ni yavalati rawa”² ena nomuni muria na ivunau ni Turaga ena dua na vuravura e veilecayaki.

Ena gauna oqo, sa tubu tiko na nomuni ivakadinadina, me vaka ga na ikasana ni otalili. Na nomuni vakabauta ena vukea na kena tubu ka me kaukauwa tikoga, ena gauna mada ga ko ni na sotava kina na bolebole kei na veitemaki ni dua na vuravura sa vakacacani tu ena waigaga, ivalavala tawasavasava, iyaloyalo vakasisila, kei na tawa madua.

“Na vakabauta e isolisoli mai vua na Kalou, ia sa dodonu mo vakania tiko na nomu vakabauta me kaukauwa tiko kina… . E rawa ni o ni vakania na isolisoli ni vakabauta ena masumasu vua na Tamada Vakalomalagi ena yaca i Jisu Karisito… . E rawa ni o ni vaqaqacotaka na nomuni vakabauta ena nomuni talairawarawa tiko ki na ivakaro… . E rawa talega ni o ni vakatorocaketaka na nomuni vakabauta ena nomuni dau vulica na ivolanikalou kei na nodra vosa na parofita ni gauna oqo.”³

Au kilai ira eso na goneyalewa era dau lomatarotaro tu me baleta na isulusulu tawakilikili. Ena nodra vaqara na isau ni nodra taro, era vakamuria na ituvatuva dodonu oqo: era a masu vua na Tamada Vakalomalagi, era a vulica na ivolanikalou kei na nodra vosa na parofita ni gauna oqo, ka ra talairawarawa ki na kena bulataki na ivakatagedegede ni bula savasava. Ni ra sa mai ciqoma oqo na isau ni nodra lomatarotaro, sa vakalevutaki na nodra vakabauta ka vaqaqacotaki na nodra ivakadinadina. Au sa sureti kemuni yadudua mo ni vakamuria na ituvatuva oqo.

iMatai, masu vua na Tamamuni Vakalomalagi. Kerea Vua mo ni vukei ena kena kunei na isau ni nomuni vakatataro.

Na noda parofita, o Peresitedi Thomas S. Monson, a kaya ena imatai ni nona soli itukutuku raraba:

“Ena so na gauna na isau ni taro vinaka duadua e rawa vei ira na itabagone me ra [taura] me isau ni vakatataro ena veika ni bula e kunei ga ena nodra tekiduru ka masu vua na Tamada Vakalomalagi.

“Kevaka me ra na nanuma tiko ni Turaga e dau nanumi ira tikoga ka na sauma na nodra masu, sa na rawa kina vei ira me ra vorata rawa na bolebole yadua e dau yaco mai vei ira.”⁴ Na masu ena vukea na kena vaqaqacotaki na nomuni vakabauta ka vakaiyaqataka na nomuni ivakadinadina.

Me isema ni masu, me vulici na ivolanikalou e baleta na vakabauta. Ena Alama, wase 32, tikina e 27, sa dua na vanua totoka mo ni tekivu kina ena kena vulici na ituvatuva ni kena vakalevutaki na nomuni vakabauta: “Dou yadra mada ka vakasama, dou rogoca na noqu vunau ka vakabauta, ia kevaka dou sa sega ni rawa ni vakabauta, dou rogoca mada ga ka vakasamataka, de mani rawa mo dou vakabauta e vica na tikina.”

Ko ni sa gadreva li mo ni tovolea na veika a cakava o Alama me vakalevutaki kina na nomuni vakabauta? E rawa beka mo ni vakabauta mada ga vakalailai? Ko ni gadreva beka mo ni vakabauta?

Ni ko ni vuli mai na ivolanikalou, au kila na Turaga ena vakalougatataki kemuni ena Nona Yalotabu ka, me vakataki ira na goneyalewa eda rogoci ira ena bogi nikua, ena vakararamataki na nomuni kila. Ena vakalevutaka na ivolanikalou na nomuni vakabauta ka vukea na kena vakaiyaqataki na nomuni ivakadinadina.

Na vulici ni nodra vosa na parofita ni gauna oqo ena vakalevutaka talega na nomuni vakabauta. “Mo na dau vakabauti ira na parofita bula. Na nodra ivakavuvuli sa baleta na lewa ni Turaga”⁵ ka na vukea na kena vakaiyaqataki na nomuni ivakadinadina.

E dua vei ira na noda parofita ni gauna oqo, o ya o Peresitedi Spencer W. Kimball, a vakasalataki ira na itabagone me ra tuvanaka na sala me ra yalodina tiko ga me vukea me ra “tudei ka sega ni yavalati rawa” ka vakavulica kina vakaoqo: “O ira na noda itabagone me ra tuvanaka na nodra sala ni ra se gone… . Na sala e rua tiko na mataqali: ‘Au na cakava oqo’ kei na ‘Au na sega ni cakava oqo.’ … Ni ra se gone tiko, sa dodonu vei ira na itabagone me ra bula voli mai ena dua na ituvatuva… . Ni sa vakayavutaki na ilakolako oqori ka tuvanaki na inakinaki, sa na rawarawa sara na kena vorati rawa na veitemaki e vuqa ka kaya yani ‘sega’ ki na imatai ni tibi tavako, ‘sega’ ki na imatai ni bilo gunu, … ‘sega’ ki na imatai ni ivukivuki garogaro e veimuataki ki na ivalavala tawa kilikili.”⁶

Sa tu vei keda e dua na iyaya ni cakacaka cecere me vukei keda me da muria kina na sala vinaka o ya. Sai koya na Me iSakisaki ni iTabagone. Ena ivola lailai oqo ko ni na kunea kina na nodra vosa na noda parofita ni gauna oqo. Na “sala” e vakamacalataka tiko o Peresitedi Kimball era tiko ena ivola oqo: na “veika au na cakava ” kei “na veika au na sega ni cakava.”

E sega ni se rauta, o ya, na kena wiliki wale tu ga na nodra vosa na parofita. Sa dodonu mo ni muria na itinitini ni ikalawa ena noda ituvatuva ka “maroroya na ivakatagedegede oqo ka bulataka na dina e tu ena ivolanikalou.”⁷ Oqo na tikina e veibolei, ia ni vakayacori e dua na ituvatuva taumada ki na veika mo ni cakava kei na ka mo ni kakua ni cakava ka mo ni qai bula voli ena ituvatuva o ya, ko ni na rawata vakaidina!

Na vakabauta sa dua na ivakavuvuli ni cakacaka. Meu talanoataka mada vei kemuni eso na goneyalewa era a vulica na nodra vosa na parofita e tiko ena Me iSakisaki ni iTabagone, ka ra cakava sara. Era a biuta e dua na ituvatuva, digitaka na veika me ra cakava kei na ka me kua, ka bula voli ena ituvatuva o ya.

E dua vei ira na idusidusi e tiko ena Me iSakisaki ni iTabagone e vakaoqo: “Na nomu isulusulu kei na kemu irairai, sa rawa ni o vakaraitaka kina vua na Turaga na nomu vakamareqeta na yagomu. Sa rawa ni o vakaraitaka ni o dua na tisaipeli i Jisu Karisito.”⁸

Ni oti na kena vulici na veivosa oqo, a kidava rawa e dua na gone yalewa ni rairai so na nona isulusulu e sega ni taucoko sara na kena rakorako. Mai na nona masu kei na vulica na ivolanikalou, a vakavotui vua ni o koya e dua na tisaipeli i Jisu Karisito, ka me baleta ni matataki Koya tiko, sa dodonu kina vua me vakayacora eso na veisau. Sa sega ni vinakata o koya me tiko tale ena nona drowa e dua na ka ena veitemaki, ka sa mani talaucaka mai ena nona kovate kei na drowa ni isulu ka kauta laivi na ka kecega e sega ni rakorako. E kaya o koya, “Au na yalomatua sara kevaka au na sega mada ga ni tovolea na isulu kau kila ni sega ni dodonu meu dara eso ena kena sitoa. Na cava mo ni temaki kina?” Na iwali tudei o ya e vakaraitaka vua na Turaga ni rokova o koya na yagona, ka vakamuria vakavinaka sara na sala me baleta na bula savasava.

E dua tale na goneyalewa ena kalasi o ya a vakila rawa o koya ni digidigi ni nona isulusulu e laki vakauqeta na iwalewale ni isulusulu nei tacina yalewa lailai. E dua na malanivosa e tiko ena Me iSakisaki ni iTabagone e vaka toka oqo: “Na nomu isulusulu kei na kemu irairai e vakaraitaka tiko e dua na itukutuku baleti iko vei ira na tamata ka na tara sara tikoga na nomu veimaliwai kei ira.”⁹ Sa mani lewa o koya me veisautaka na ivakarau ni nona isulusulu, ni sa kila o koya ni sa nona itavi me ivakaraitaki vinaka vei tacina yalewa. Sa mani vakamuria sara vakavinaka o koya na sala o ya ka vakauqeta kina na digidigi ni isulusulu nei tacina yalewa.

Na ivakatagedegede ni “Veivakamarautaki kei na Veitukutuku Volai ” e vakatavulica vei keda “mo digitaka ga na ka ni veivakamarautaki kei na veitukutuku volai ka rawa ni veivakauqeti vei iko. Na ka ni veivakamarautaki vinaka ena vukei kemuni mo ni vakasamataka na veivakasama vinaka ka digia na digidigi dodonu.”¹⁰ Au kila e dua na goneyalewa kei na tacina yalewa ka rau a vakarorogo tiko ki na dua na CD ka rau kidava ni qaqana e sega ni veivakatataki cake ka sega ni vukea me rau vakanananu savasava. Erau a veiwanonovi ka rau kila mai na Yalotabu ni sega ni dodonu me rau vakarogoca na mataqali ivakatagi vakaoqo. E a taura mai o koya e qase e dua na ituki ka vorolaka vakamatailalai na CD o ya. Taumada erau a vakamuria tiko mai na sala vinaka ni vakarorogo ki na ivakatagi. Erau sa kila vinaka tu na veika me rau rogoca kei na kena me kakua ni rogoci ka sa rawa kina me rau bula voli ena nodrau ituvatuva ena nodrau vakamuria na veivakauqeti ni Yalotabu. Na cakacaka lailai oqo a vaqaqacotaki rau ka solia vei rau e dua na yalodei ni talairawarawa ena veigauna e veibolei sara vakalevu.

E dua tale na goneyalewa a digitaka me sa dua vei ira na sala vinaka ni nona bula o ya me rokova na siga ni Vakacecegu, se cava ga na veika e sotava. Ni oti toka e dua na yabaki mai na nona a papitaiso me lewe ni Lotu vata kei na nona matavuvale, sa wase rua sara na nona tabanalevu. Sa laki lesi na nona matavuvale ki na tabanalevu tauyavu vou, ka sa ikoya duadua ga na goneyalewa me lewena na tabanalevu vou o ya. Erau a sega ni vinakataka na nona itubutubu na veisau o ya ka rau sa sega ni laki lotu, ia a vinakata o koya me muria na idusidusi e tiko ena Me iSakisaki ni iTabagone ena “Vakarokorokotaki ni Siga ni Vakacecegu.” Sa mani lewa o koya me laki lotu ki na tabanalevu vou ena gauna ga e rawata kevaka mada ga me na laki tiko duadua voli ga ena veisoqoni kece.

Ena vei-Sigatabu e dau wilika na nona ivolanikalou ka cakacakataka na nona Torocake Yadudua. Na nona digitaka me “tudei ka sega ni yavalati rawa” ena kena rokovi na siga ni Vakacecegu a vakauqeta kina na tinana kei tacina yalewa gone me rau tekivu laki lotu. A vakadinadinataka o tinana ni ivakaraitaki ni tudei nei luvena ena bulataki ni kosipeli kei na nona raica na nona caka vinaka a vukea na nodrau lesu tale ki lotu.

“O vakaraitaka na nomu vakabauta ena nomu cakacaka—ena ivakarau ni nomu bula.”¹¹ Na nodra bula o ira na goneyalewa oqo sa vakaraitaka tiko na nodra vakabauta. Ka me kilai tiko ni nodra vakabauta kei na ivakaraitaki ni nodra bula e kauta mai na “cakacaka vinaka.” Erau sa veivakalougatataki na veitacini yalewa ka vukei tinana e dua na gone yalewa me lesu ki na soqo ni Lotu.

Eso vei kemuni ko ni sa nanuma beka ni ko ni na sega ni rawa ni lamata cake mai na tobu duka o ya, ka sa dredre sara na leqa o ni sotava tiko, sa rui dredre na nomuni vakatovolei, sa vakaitamera na nomuni temaki. Ia mo ni nanuma na yalayala nei Alama: “Ko ira kecega sa vakabauta na Kalou sa dau vukei ira ko Koya ena nodra leqa, ka vakacegui ira mai na nodra rarawa; ia era na laveti cake ena siga mai muri.”¹² Mo ni nanuma tiko ni ikasa ni otalili e tubu voli ena veituvaki ca, me vaka ga ni laveta cake na otalili na kena ikasana, na nomuni vakabauta ena tokoni kemuni ka laveti kemuni cake.

Oi kemuni na noqu goneyalewa lomani, na nomuni ivakadinadina kei Jisu Karisito sa nomuni iyaqa. Vaqaqacotaka na nomuni vakabauta ena nomuni vakamuria na ituvatuva oqo ni masu, vuli, kei na talairawarawa ki na vunau. Vakamuria na sala vinaka oqo ena nomuni sa digitaka ena gauna oqo na veika mo ni cakava se kakua ni cakava ka vakayacora sara na nomuni ituvatuva.

Au sa vakadinadinataka ni Turaga e lomani kemuni yadua ka na vakalougatataki kemuni ena nomuni sasaga mo ni “tudei sara ka kakua ni yavalati.” E dina na kosipeli i Jisu Karisito, ka na vakaiyaqataki kemuni vakavinaka tu na nomuni kila kei na nomuni ivakadinadinataki Jisu Karisito, ka na rawa mo ni tudei tiko ena nomuni ivakatagedegede ni ko ni tutaka na dina kei na ivalavala dodonu. Sa noqu ivakadinadina malumalumu oqo, ena yaca i Jisu Karisito, emeni.