Ena Veigauna Kecega, ena Veika Kecega, kei na Veivanua Kecega
Ni ko tu mo dua na ivakadinadina, talairawarawa ki na vunau, toso yani ki liu ka “tudei vei Karisito,” ko na sega ni tu duadua.
Sa dua na ka dokai meu mai tu e matamuni ka wasea na noqu ivakadinadina me baleta na iVakabula kei na Nona bula e sega ni vakatautauvatataki rawa kei na dua na ka. E a tadu mai ki vuravura me mai vakaraitaka vei keda na sala me da muria kina na ituvatuva ka a tekivutaki mai lomalagi—na ituvatuva, ni kevaka me bulataki, eda na bula marau kina. Na nona ivakaraitaki sa vakatakila vei keda na sala meda lesu rawa tale ki na nona itikotiko na Tamada Vakalomalagi. E sega tale ni dua na tamata e a bula voli me “tudei ka sega ni yavalati rawa’ (Mosaia 5:15). E a sega ni vagolei rawa vakatani o Koya. E a rai vakamatua ga ki na vakayacori na lewa nei Tamana, ka yalodina tikoga ki na Nona ilesilesi vakalou. Sa dina sara ni sa rawa me cavuti Vua ni o Koya sa dau dina sara ena veigauna kecega, ena ka kecega, kei na veivanua kecega (raica Mosaia 18:9).
Oi kemuni sa tiki tiko ni ituvatuva totoka o ya ka a vakatakilaitaki ena vuravura taumada. Na nomuni tadu mai ki na vuravura oqo sa kilai taumada tiko mai na gauna a vakadonui kina na ituvatuva. E sega ni vakacalaka na nomuni gauna oqo kei na vanua ko ni tiko kina. Na nomuni “vakabauta kei na gugumatua” (Alama 13:3) sa mai vakadavora kina e dua na ituvatuva mo ni rawa ka kina ena gauna oqo kevaka ko ni na yalodina tiko ka talairawarawa. Sai kemuni na luvena yalewa vakamareqeti na Kalou, ka sa tiko na veicakacaka cecere mo ni cakava. Ena kena gadrevi mo ni rawata rawa na nomuni ilesilesi vakalou ka bula voli ena ituvatuva ni bula marau, oi kemuni talega mo ni tudei ka sega ni yavalati rawa “ena veigauna kecega kei na veika kecega, kei na veivanua kecega” (Mosaia 18:9).
Ena vica na yabaki sa oti a soli vei au e dua na itaba ni tolu na bolabola, e rua erau ravi toka ga ki na ikatolu ni bolabola ka kena e lailai duadua. Na kena ivakamacala e salavata tiko e vakatoka oqo: “E gadrevi mo kaukauwa sara ni ko sa iotioti tiko ni tamata mo tu ka vakaraitaka.” Sa gadrevi talega vakakina mo ni kaukauwa sara. Ni ko ni sa yalodina tiko ka ivalavala dodonu, era na rai yani vei kemuni na tamata me ra tokoni ka vaqaqacotaki.
E vakamacalataka o Ilamani na kena rawati rawa na ka oqo: “Mo drau nanuma, … ka nanuma, mo drau tara na nomudrau yavu ena uluvatu ni noda iVakabula, sa i koya na Karisito, na Luve ni Kalou, ni sa dodonu mo drau tara cake kina na nomudrau yavu; … sa ikoya na yavu dei, ia kevaka sa tara cake na tamata ena yavu oqo ena sega ni bale rawa” (Ilamani 5:12).
Na nomuni yavu ni vakabauta e dodonu me vakanamata vakatabakidua vei Jisu Karisito. Na kena taukeni na mataqali vakabauta vaka o ya sa kena ibalebale ni ko ni sa vakararavi Vua, ko ni sa nuitaki Koya, ka dina ga ni ko ni sega ni kila na veika kecega, ko ni sa kila tiko ni kila tu o Koya. Sa kila tale tikoga o Koya ni ko ni sa luvena yalewa na Kalou, ka kila na yacamuni, ka dau rogoca na nomuni masu, ka na vukei kemuni mo ni rawata rawa na nomuni ilesilesi e vuravura.
E dua na cauravou au kila vinaka a digitaki me nodra peresitedi na ilawalawa gonevuli ena dua na univesiti levu. Na univesiti a qai vakauti koya ki na dua na semina ni veiliutaki nodra na gonevuli iliuliu mai na veivanua taucoko e Amerika me ra laki soqoni vata e Chicago, mai Illinois, me ra tuberi ka vakavulici. Era a vakaitavi taumada ena dua na qito e rara ena itikotiko ni koronivuli me rawa kina ni ra veikilai vakai ira. Sa mani vakaraitaki vei ira na gonevuli na iulutaga e baleta tiko na veika era sa sotava tiko na itabagone nikua ka ra kerei kina me ra tu ka tokona e dua na yasana. Ena nodra cau ki na iulutaga sa vakatakilai mai o ya, era a vakasalataki me ra cici ki na so na vunikau ki na vanua veico ka makataki tu “tokona vakaukauwa,” “tokona vakatikina,” “vakacala vakalevu,” se “vakacala vakatikina.”
Ni sa vakarau cava na ivakaraitaki oqo, a taroga sara o koya na iliuliu, “O ni vakabauta beka na veidauci ni bera na vakamau?” E sega tale ni wawa, o koya na cauravou oqo ni sa cici yani ki na vunikau e makataki tiko ena “vakacala vakalevu.” E a kurabui, ni o koya walega e a tu e kea! Ka ra sa dredre ka dusi koya mai na gonevuli iliuliu ka ra kaya, “Oilei, Jess, o sa lasa sara ga. Keimami kila ni ko sega sara ga ni dina.” Ena gauna o ya sa kila vinaka sara tu ga o Jess na ka me cakava ka mani kailavaka yani—“Au sega ni lasa. Au dina tiko!” Era a vakanomodi ka ra veisukayaki na ilawalawa ka biuti Jess duadua tu ena vunikau. E a sotava na veilecayaki, io e veilecayaki. Ia e sega ni veilecayaki o koya. E dina o koya. Ka sega ni galili. Ena loma ni macawa, e vuqa vei ira na gonevuli iliuliu era a lako mai vua vakatikitiki ka ra kaya ni ra diva me ra a se kila tu mai na veika e kila tu o koya ena vica na yabaki sa oti yani. E muri a qai kaya o Jess, “E a rawarawa sara baleta niu kila niu sega walega ni matataka tiko na univesiti, ia na noqu matavuvale, na Lotu, kei na iVakabula.”
Na ivakadinadina ni o Jisu Karisito sa iVakabula ka Dauveivueti a vakauqeti Jess me tudei ka totolo na nona vakasama. Sa rawa mo ni rawata talega na yalonuidei vaka o ya ni ko ni masu ena veisiga, vakasaqara na isau ni taro ena ivolanikalou, ka muria na vunau. Ni ko ni vakasaqara vakaidina mo ni taukena e dua na ivakadinadina, na kila ka na lako mai vua na Yalo Tabu ena vukei kemuni ena nomuni bolebole, vakatataro, kei na bulataki ni ivakatagedegede. Ka na rawa talega vei kemuni mo ni yaloqaqa ka tudei ka sega ni yavalati rawa ena veigauna kecega kei na veika kecega kei na veivanua kecega.
Na tudei ka sega ni yavalati rawa sa kena ibalebale na talairawarawa. E dua vei ira na inaki ni nomuni mai tiko eke e vuravura o ya mo ni raica ke rawa mo ni taurivaka na nomuni galala ni digidigi ka “muria na veika kece … sa vakarota vei ira na Turaga” (Eparaama 3:24–25). Ena gauna ko ni vakavouya kina na nomuni veiyalayalati ena veimacawa ni ko ni vakaivotavota ena sakaramede, ko ni sa yalataka kina ni ko ni na nanuma tiko na iVakabula ka muria na Nona ivunau.
Na isolisoli talei ni yagomuni sa rawa kina vei kemuni mo ni taurivaka na galala ni digidigi ka cakacakataka na nomuni vakabauta kei na talairawarawa. Ko ni sa raica tiko li ni voleka ni veivakatovolei taucoko nei Setani, e vagolei vakatabakidua tikoga ki na yagomuni? Na iyaloyalo vakasisila, tovo tawa savasava, samuqawe, itovo tawa kilikili, vakayagataki ni waigaga, kei na veivakatotogani era sa sasaga kece sara ni kena rawai na isolisoli vakamareqeti oqo. Oqo na isolisoli a sega ni soli vei Setani. Na talairawarawa ki na ivunau kei na ivakatagedegede ena rawa kina kivei kemuni yadua mo ni tudei ka sega ni yavalati rawa ena kena taqomaki na isolisoli vakamareqeti oqo ni galala ni digidigi kei na yagomuni.
Na tudei kei na sega ni yavalati rawa sa kena ibalebale mo ni toso tikoga ki liu kei na “tudei vei Karisito” (2 Nifai 31:20). Ena vica na yabaki sa oti, au kalougata meu cici talega ena Boston Marathon. Au a vakavakarau sara vakavinaka kau vakila niu sa tu vakarau, ia ena ika ruasagavulu ni maile sa sotavi kina na veidelana. O ira e kea era vakatoka na delana e baba vakalevu ka balavu duadua me ko Delana ni Rarawa. Ena gauna au sa yacova yani kina na delana o ya, sa oti sara ga vei au. Sa balavu dina na delana o ya, ia me baleta ga niu sega ni daucici dina, au sa vakatara meu vakayacora e dua na ka era sega ni dau cakava o ira na daucici dina—au sa tekivu yalolailai. Oqo sa vakavuna meu sa vakamalua, ia au sa qai saga meu yaloqaqa ka raitayaloyalotaka na icavacava ni laini. Ia niu cakava na ka oqo, au kidacala niu sa tu ena dua na siti levu, ka udolu na tamata era sa yatuni tu ena yasa ni gaunisala, kau a sega ni vakarautaka me keirau veisotari kei na turaga watiqu niu sa vakacavara na cici. Au vakila niu sa veilecayaki ka galili kau sa tekivu meu tagi. Au a dara tiko e dua na siqeleti levu damudamu ka volai toka e liu ena matanivola lelevu na vosa Utah. Ni ra sa raici au mai na sarasara niu sa tagi, era kailavaka mai—“Cici tikoga, Utah.” “Kakua ni tagi, Utah.” “Ko sa voleka ni yaco, Utah.” Ia au sa kila tu ni sega ni vakakina kau sa yali. Au sa kila talega ni kevaka mada ga meu sa tu vakadua ka lakotani mai na veitau cici oqo, au se yali tikoga.
Eso vei kemuni sa vakila beka ni ko ni sa ciciva cake tiko na Delana ni Rarawa ka vakakina, ena gauna mada ga era sa yatuni tu kina na tamata ena yasa ni gaunisala, ko ni sa galili mai? E a yaco vei au. Ia au a qai cakava na veika ko ni na cakava yadudua—au sa tekivu meu masu sara ga ena gaunisala ni veitau cici. Au a tukuna vei Tamada Vakalomalagi niu sa galili, kau sa tu oqo ena dua na delana. Au a tukuna Vua niu sa yalolailai ka rere kau vakila niu sa yali. Au a kerea na veivuke kei na veivakaukauwataki meu tudei ka vakacavara rawa na veitau cici. Niu sa tomana tikoga na noqu cici, e a voqa mai vei au na veimalanivosa oqo:
“Dou kakua ni rere, se dou taqaya,
Na noda Kalou me vukei kedatou.
Tou sa na tuberi ka tokoni tu,
E liga imatau, ni noda Kalou“
(“Na Yavu Tudei,” Serernilotu naba 6)
Na isau totoka ni noqu masu o ya e a solia vei au na kaukauwa meu toso ki liu meu yacova rawa na icavacava ni laini. E dina ga niu a rere, sa tu sara ga e kea na turaga watiqu ka sa mai cava vakavinaka na veika kece.
Ena siga o ya au a sotava kina e dua na ka e levu cake mai na cici balavu. Au a vulica kina eso na ivakavuvuli bibi. Na kena imatai, kakua tale ni dara e dua na siqeleti levu damudamu ka volai toka kina na vosa Utah. iKarua, au a vulica se vakacava sara na levu ni nomu nanuma ni ko sa vakavakarau vakavinaka, era sa tu ga ena sala na veidelana. Au sa vulica ni o ira na tamata era vakayaloqaqataki iko tiko mai e gaunisala era sa yaga dina sara. Au a sa vulica talega ena siga o ya ni da sa sega ni tiko duadua. Na Tamada Vakalomalagi e voleka toka ga ni da masu Vua, ka na rogoca na Yalo Tabu na noda vakasolokakana yani.
Au sa vakadinadinataka ni ko ni tu mo ni dua na ivakadinadina, talairawarawa ki na ivunau, toso yani ki liu ka “tudei vei Karisito,” ko ni na sega ni tiko duadua. Sa rawa mo ni vakararavi ena kaukauwa qaqa ni Veisorovaki ni iVakabula. Kau sa vakadinadinataka ni kena tarai cake na yavu tudei oqo ena vukei kemuni mo ni na vakataki Koya — tudei ka sega ni yavalati rawa ena veigauna kecega, ena veika kecega, kei na veivanua kecega. Ena yaca i Jisu Karisito, emeni.