Veika Era Yaco ena Koniferedi
Ena Moniti ka tarava ni oti na koniferedi raraba, o ira na vaka akaude tiko ena LDS Gems, o ya e dua na i-meli dauveivakauqeti, era a ciqoma e dua na veisureti me ra wasea na veika era sotava ena ivavakoso vakalou kei na soqoni tale eso ni koniferedi. Na i-meli era tarava oqo sa ivakaraitaki tiko ni sivia e 1,200 na isau ni ivola a ciqoma na mekesini ni Lotu.
Ena mataka ni Vakarauwai ni bera ni tekivu na koniferedi, sa maqusa sara na noqu matavuvale ena veika me dau vakayacori ena vei-Vakarauwai, ka vakasauri ga sa osota tu na neitou televiseni na iyaloyalo kei na rorogo ni sere ni Mormon Tabernacle Choir ena dola ni koniferedi raraba. Keirau sa vakadaberi rau sara na luvei keirau tagane lalai ka “vagalui rau toka” me yacova ni sa oti na idola masu. Ena gauna sa gole yani kina o Peresitedi Uchtdorf ki na itutu ni vunau me tekivutaki na lotu bibi oqo, sa veisau na ituvaki ni yaloi keitou. Keitou sa tekiduru ka masu ena mata ni televiseni, sa vakasinati na neitou vale ena Yalotabu. Au a madua vakalailai ena vuku ni keitou sa mai toka oqo ena dua na gauna vakalou ka vakaisulu tu ga vakaca ena dua na loma ni rumu e tu sara ga vakaca ena vuku veiqitori vaka-mataka lailai. Ia, ni keitou sa tucake vakayadudua me keitou laveliga ena veitokoni, sa vakasinaiti na yaloi keitou ena marau levu. Sa oti o ya keitou a qai tucake vakamatavuvale, o gone lailai sara mada ga a bau laveta na ligana imatau, ka vakilai e dua na yalo vakalou e dau vakilai ga e valetabu. Keitou sa tucake vata tu ka vakadinadinataka na veika sa vakadeitaka mai na Yalotabu.
Ni oti vakalailai, sa tekivu tale me rau talabusese na gone ka keirau sa mani tosoya cake kina na tivi me rogoci rawa kina o ira era vosa tiko, ia na gauna lekaleka ni sautu o ya ena dau tikoga ena neitou vale kei na yaloi keitou.
Christina N., Utah, Amerika
Ia, au na sega ni tukuna e levu na ka me baleta na veika au vakila ena koniferedi oqo. Sa kaukauwa sara ga na veivakauqeti ni Yalotabu; au a sarasara tikoga mai vale, kau vakila ni solegi au na Yalotabu. Au a sega tiko ni lako ki lotu, ia niu rogoci Peresitedi Monson ena nona sureti au lesu tiko ki na ivavakoso e vaka sara ga ni sa vosa sara tikoga vei au. Au a taleitaka na veivosa kece sara. Au vakila sara ga, ni sa vosa tiko na Tamada Vakalomalagi mai vei ira oqo. Au kila niu sega ni uasivi sara, ia au sa vakila dina ni sa dodonu meu lesu tale ki lotu me rawa kina meu laki vakatawani ka tekivu vou tale. E se lailai ga vei au na veika au taura rawa mai ena koniferedi oqo. Au sa laki raica sara vakatotolo na Initaneti meu laki vakarorogo tale kina. Au sa namaka tiko meu na laki lotu ki na noqu tabanalevu ena macawa ka tu mai.
Jeanne U.
Sa totoka dina na vakarorogo ki na itukutuku ni koniferedi, vakabibi mai vua na parofita bula, o Peresitedi Monson, e dina ga niu tu mai na yasana kadua ni vuravura oqo ena dua na vanua ka sega tiko ni rawa me vunautaki kina na kosipeli. Ia ena vuku ga ni tekinolaji au a vakarorogo rawa kina ka vakila na Yalotabu ka vakavukui kina. Niu vakarogoca na veivakasalataki sa soli mai kei na ivakadinadina e wasei, sa yaco meu gadreva vakalevu cake kina me ra votai o ira na taciqu kei na ganequ ena veivakalougatataki vuabale ni kosipeli. Sa noqu masu me na yaco vakatotolo na ka oqo.
Janryll F.
Na gauna kaukauwa duadua vei au ena koniferedi oqo o ya ena gauna a vosa kina o Peresitedi Uchtdorf me baleta na waqavuka a voca ena Antarctica. A lauta sara ga na utoqu na kena rawa ki na dua walega na ka somidi lailai me icavacava ni dua na ka, ka rawa ni veisautaki ka salamuria mai e levu na ka e tawayalani. E a vakaraitaki talega kina ni cava ga na yawa ni vanua eda sa laki muatani tiko kina mai na salatu dodonu ka rabalailai, sa dodonu me da vakatusa ni da sa caka cala ka kerea me da vosoti mai vua na Tamada Vakalomalagi sa dau-loloma tawamudu. E kauwaitaka vakabibi o koya na noda bula ena veisiga ka lomani keda ni da sa vakadinadinataka na noda cala, vuli mai kina, ka tubu vakayalo mai vei ira.
Orion H., Colorado, USA
E a tarogi au o noqu itokani vinaka mai koronivuli na cava au a cakava ena mua ni macawa. Au a tukuna vua, kei na veiulutaga ni koniferedi raraba a vakauqeti koya me taroga tikoga mai na veika e baleta na noqu vakabauta kei na iVola i Momani. Au a vakayagataka rawa kina na Yavu ni Vakabauta meu wasea kina na veika bibi e duidui kina na noda Lotu mai na veimatalotu Vakarisito tale eso, ka a rawa talega vei au meu vakamacalataka vakamatatata kina na veika e baleta na iVola i Momani kei na kena semati ki na iVolatabu.
Au sa vakavinavinakataka vakalevu na gauna talei au sa sotava oqo! Au kila ni a dusimaki au na Yalotabu ena isau ni taro a taroga mai o koya, kevaka e a sega beka na koniferedi raraba, keu a sega beka ni vakauqeti donu ena yalotabu meu sauma vakarawarawa.
Ellie W., England
Au a saumaki mai ena 1972, au sa sega tu ni laki lotu me sivia e 20 na yabaki. Au a sa tekivu laki lotu tale ena tini na yabaki sa oti kau sa laki vauci e valetabu vua na turaga watiqu, o koya talega a saumaki mai. Au lomani Peresitedi Hinckley vakalevu kau nanuma ni sega tale ni dua na parofita me na vakataki koya. Ena gauna sa vakaraitaki mai kina o Peresitedi Monson me da tokoni koya, au a cudru sara ga ka rarawataka, baleta au nauma ni sega ni rawa ni cakava o koya na kena cakacaka. Isa, au sa qai domoqa dina! Ena gauna sa tucake kina o Peresitedi Monson me vosa, au a vakaraica toka na matana kei na nona ivukivuki kece. E laurai vua na ramase kei na serau ni mata vata e a tiko vei noqu Peresitedi Hinckley daulomani! Sa dua na ka na noqu marau ka vakila rawa na veisobuti ni Yalo Tabu vua na turaga oqo—na noqu parofita vou, daurairai, ka dauvakatakila.
Mary Lou R., New Mexico, USA
Au a vakauqeti ena Yalotabu ena gauna ni koniferedi raraba meu veisautaka na noqu bula. E dina ga niu sa dau “gole tiko ” ki Lotu ena noqu bula taucoko, au se bera mada ni vakauqeti mai vua na Yalotabu me vaka na kena a yaco vei au ena koniferedi oqo. Au vakila ni itukutuku taucoko e cauraki mai sa baleti au sara ga. Au na gole yani vei iratou na noqu matavuvale kei na itokani ka kerea me ra vosoti au ena vuku beka ni dua se cala kece sara au a cakava vei ira ka vosoti ira era caka cala vei au. Au na vakayacora na itovo vei ira na tamata me vaka na kena au vinakata me ra vakayacora vei au ka vakamuria na iVakabula ena kena e voleka duadua.
Delbert C., USA
Keitou dau vakaitavi vakayadudua ena ilesilesi ni lotu vakamatavuvale. O turaga watiqu e nona na Moniti ni oti na koniferedi. Ni vakayacori tiko na soqoni ena yakavi ni Sigatabu, a solia kina o Elder Zwick e dua na lesoni me baleta na tudei tiko ena noda ivakatagedegede. E a vakayagataka o turaga watiqu na vosa oqo me vakamatatataka kina na kena gadrevi me keitou tudei tiko ena neitou ivakatagedegede. Au a vakacuruma na faili MP3 mai na Mataveilawa. Keitou a qai dabe vakamatavuvale ka vakarorogo tale ki na vosa o ya. A tadola kina vei keitou e dua na vakasama ni iulutaga ni kena digitaki donu na itokani, vakatulewa vakadodonu, ka vakayacora e dua na ituvatuva ni bula vata kei luvei keirau tagane yabaki 14.
Gwen D., Washington, USA
Ena gauna ni lotu bibi o ya, au a vakalougatataki, luvuci, ka vakavinavinaka meu rawa ni bau vakaitavi mai na noqu itikotiko ka tucake ka laveta cake na ligaqu meu tokona na noda parofita vou, o Peresitedi Monson. A tuturu na wai ni mataqu ena nona sa tucake rawa talega o luvequ tagane lailai yabaki 12, vata kei ira na lewe ni Matabete i Eroni kei na luvequ yalewa vata kei ira na Goneyalewa me ra vakayacora vakakina. E a kaukauwa sara vei au na kamikamica ni veivakacegui ni Yalotabu ka a vakadeitaka ki yaloqu ni ko Thomas S. Monson sa ikoya na tamata sa vinakata na Turaga me iliuliu ni Nona Lotu edaidai! Au sega tale ni vakabekataka ni sa vakalou na nona itutu tabu oqo.
Maridee H., New Mexico, USA
Au sega tu ni vakawati, ia ena vosa nei Elder Ballard, e tara sara ga na noqu vakasama kei na yaloqu ena sala meu na vakarautaki au kina meu lomana vakavinaka cake kina na marama me mai watiqu ka qaravi koya vakavinaka ka colata na nona icolacola, me na mamada kina. E sega tale ni dua na ka e bibi cake ki na noqu bula ena gauna oqo me tautauvata kei na noqu na gole yani ka vakasaqara e dua na watiqu ka laki vakamautaki koya ena valetabu ka susuga cake e dua na matavuvale me kilai ka vakacaucautaki kina o koya. Au sa maqusa ka nanamaki tiko meu na lomani koya ena yaloqu, noqu igu, vakasama, kei na kaukauwa taucoko.
Mike S., Florida, USA