Mary N. Cook
iMatai ni Daunivakasala ena Mataveiliutaki Raraba ni Goneyalewa
Ena gauna e cavuta kina na itoko ni Goneyalewa vata kei ira na goneyalewa e vuravura taucoko, sa vakavinavinaka kina vakalevu o Mary Nielsen Cook, na imatai ni daunivakasala ena mataveiliutaki raraba ni Goneyalewa ni sa kila o koya ni sa dua na luvena yalewa na Kalou.
“E a mate o tamaqu ena Noveba ni 2007, kau vakabauta ni sa lomasoli tiko na Turaga me tiko vata kei au ena gauna veivakatovolei oqo,” a kaya o Sisita Cook. “Eda sa vakatavulica tiko vei ira na noda goneyalewa ni da sa luvena yalewa taucoko na Kalou; na veika tabu au sa mai kila oqo sa vakadeitaka kina ni sa kilai au ka lomani au o Koya.”
E a sucu o koya ena ika 8 ni June, 1951, kivei rau o Kenneth Nielsen kei Fern Swan Nielsen, ka a tubucake o Sisita Cook e Midvale, Utah e Amerika, ka sa mai vakaraitaka kina na veika e sotava me ivakaraitaki kivei ira na goneyalewa era dau sotava na veika dredre ni bula oqo.
“Au a sega tu ni vakamau me yacova niu sa yabaki 37, kau sa kila vakavinaka tu na veika rarawa kei na veika rerevaki era sotava tu o ira na yalewa,” e kaya o Sisita Cook. “Sa dodonu ga mo ni vakabauta ka yaloqaqa tiko ena toso ki liu, se cava ga na veika veilecayaki e sotavi.”
A vakamautaki Richard E. Cook ena ika 16 ni Julai, 1988, ena Valetabu e Salt Lake ka sa tina vakacabecabe tiko ni 4 na gone ka budra vakacabecabe e 17 na makubuna.
“Na noqu a vuli vakavinaka sara sa mai vukei au vakalevu sara ena noqu bula oqo,” e kaya o Sisita Cook, ka a taura na nona diqiri ni bejala kei na masta ena pecolaji ni ivosavosa ka vakakina ena veika ni rorogo kei na diqiri ni EdS (dauniveikavakavuli) mai na Brigham Young Univesiti. “Na veika oqo sa vakarautaki au vakavinaka sara meu mai veiqaravi vakatina ka veiqaravi ena Lotu.”
E a laki kaulotu o Sisita Cook e Mongolia vata kei watina, ka dau vakatokai me nona itokani vinaka. Sa veiqaravi oti o koya ena itutu vaka-ikarua ni daunivakasala ena mataveiliutaki raraba ni Goneyalewa ka vakakina ena matabose raraba ni Goneyalewa.
E vakabauta o Sisita Cook ni sa ka bibi na noda kauwaitaki ira na tamata yadua. “Eda sa gadrevi ira na goneyalewa yadua me ra tu ka ivakadinadina bula kei Karisito,” e kaya o Sisita Cook. “E sega ni vosa walega oqori. E dodonu me da vukei koya me soli vua e dua na igu ni yalo kei na nuidei me dua na luvena yalewa bula savasava ni Kalou.”