Elder L. Whitney Clayton
Ena Mataveiliutaki ni Vitusagavulu
Ni tomani tiko na veisusugi ena dua na vuvale dauloloma, e rua na ka bibi a yaco ki na bula nei Elder Lyndon Whitney Clayton ka veisautaka kina na veika kece, a kaya o koya. Na imatai o ya na nona a kaulotu tiko e Peru. Na ikarua o ya na nona vakamautaki Kathy Ann Kipp, na watina, ena ika 3 ni Okosita, 1973, ena Valetabu e Salt Lake. Erau itubutubu ni vitu na gone.
“Eratou dau veiwalitaka na gauna o ya na luvei keirau e vale vata kei Tamaqu kei Tinaqu ka yaco me dua sara na yasanibuka tubukoso vakamatavuvale,” e kaya o Elder Clayton. “Ia o ya sa kena itukutukuni vinaka.” Eratou dau taleitaka na matavuvale na Clayton me ra dabe ka veitalanoataka e vuqa na veimataqali ulutaga; eratou taleitaka talega na lagasere vata.
A sucu o Elder Clayton e Salt Lake City, mai Utah e Amerika, ena ika 24 ni Feperueri, 1950, kivei rau o L. Whitney Clayton Jr. kei Elizabeth Touchstone Clayton. A tubu cake e Whittier, mai California e Amerika, ka taura na nona diqiri ni bejila ena veika vakailavo mai na Univesiti ni Utah kei na diqiri ni lawa mai na Univesiti ni Pasivika e California.
Ena 1970 a kacivi o koya me laki veiqaravi ena Tabana ni Kaulotu na Andes e Peru. E kea e a tekivu taleitaka kina na vulica na ivolanikalou. “E dua vei ira na gauna marautaki ni noqu bula o ya na dua na auwa vakanomodi ena veisiga yadua ni vulici ni ivolanikalou,” a kaya. “Au dau kunea kina na vakacegu kei na sautu e cecere kei na veidusimaki.”
Sa veiqaravi oti o Elder Clayton vaka-peresitedi ni tabana, bisopi, daunivakasala ni peresitedi ni kaulotu, ka lewe ni Vitusagavulu ni iWasewase. Na veiqaravi vaka- bisopi mai na tabana ni vosa vaka-Sipeni e Santa Ana mai California, “sa dua dina na kalougata cecere,” a kaya. “E a vakatorocaketaka na noqu igu meu raica rawa ni o ira era maroroya tu na vunau era na kune marau ga.”
Sa raica o koya ni laki dina talega na ka oqo ni gauna e veilakoyaki voli kina vaka- lewe ni iMatai ni Kuoramu ni Vitusagavulu. “Se cava ga na veivanua era bula voli tiko kina na tamata ena vuravura oqo, ena vakalougatataki ira na Turaga kevaka era maroroya tiko na ivunau,” a kaya. “O ira era na vakararavi tikoga Vua era na raica ni na vakavutuniyautaki ira o Koya ena veisala kece ni nodra bula.”