Elder Carlos A. Godoy
Ena Vitusagavulu
O iratou na nomui matavuvale sa rawa me ratou nomu itokani talei duadua,” a kaya o Elder Carlos Augusto Godoy, ka se qai kacivi walega oqo ki na iMatai ni Kuoramu ni Vitusagavulu. ”Ko na rawa beka ni gole tani mai vei ira na itokani eso, ia na matavuvale e dei tikoga.”
E sa sotava oti o Elder Godoy na veika oqo. Ena vuku ga ni itosotoso ni vuli, itutu cecere vakacakacaka, kei na ilesilesi vaka-Lotu, sa levu sara na vanua eratou a laki vakaitikotiko kina o Elder Godoy; o Mônica Soares Brandão na watina,; kei na luvedrau e va, ka oka kina na vanua o Porto Alegre, Brazil; São Paulo, Brazil; Provo, Utah, Amerika; kei Belem, Brazil.
Ni se bera mada ga ni lako ena nona ilesilesi ki na nona vanua kei na veivanua e vuravura, sa dau vakaliuca tu mai o Elder Godoy na veimaliwai vinaka ni matavuvale. Na imatai ni gauna a vakatakilaitaki vua na kosipeli i Jisu Karisito o ya ena gauna a lako vata kina kei ganena ki na dua na itaviqaravi ni Lotu. Na nona lako o ya e a vakavuna me a tuberi kina mai vei rau na daukaulotu ka papitaiso ni oti e dua na vula.
E a sucu o Elder Godoy ena ika 4 ni Feperueri, 1961, e Porto Alegre, Brazil, kivei rau o Moacir Godoy kei Ivone Poersch Godoy. A curu ena Lotu ena 1977 ka laki kaulotu sara ki São Paulo. O koya kei Mônica, ka a sotava ena dua na koniferedi ni itabagone ena vulaikatakata ni oti toka ga vakalailai na nona curu ena Lotu, erau a vakamau ena Valetabu e São Paulo Brazil, ena 1984.
E a taura o Elder Godoy na nona diqiri ni bejala ena veika vakailavo, kei na vuku vakapolitiki ena Pontificia Universidade Católica kei na diqiri ni masta ni ivakarau ni veika vakaisoqosoqo mai na Brigham Young Univesiti. E a cakacaka vakalevu ena veitutu vakabisinisi ni bera ni tekivutaka na nona kabani.
E a veiqaravi mai o Elder Godoy ena itutu vaka-bisopi, lewe ni matabose e cake, peresitedi ni kaulotu, kei na Vitusagavulu ni iWasewase. E kaya ni veimadigi oqo ni veiqaravi, sa vulica vakalevu cake kina o koya na ivakarau me da “tamata yaco” ka sa kakavaki tiko me vulica na nona veikacivi vou.
“Au vakila niu sega soti sara ni vinaka,” a kaya, “ia au kila ni sa veidusimaki tiko na Turaga ena cakacaka oqo ka sa rawa Vua me vukei keda me da na vakataki Koya.”